ದೈವಾರಾದನೆದ ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಟ್ ಕಟ್ಲೆಲು

ದೈವಾರಾದನೆದ ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಟ್ ಕಟ್ಲೆಲು

 ತುಳುನಾಡ್ ದ ಪೂರ್ವ ಪರಂಪರೆದ  ದೈವಾರಾದನೆದ ಸಾಂಪ್ರದಾಯಿಕ ಪದಿನಾಜಿ ಕಟ್ಲೆಲು-

                         ಅಪ್ಪೆ ಉಲ್ಲಾಲ್ದಿ ಕಣಂದೂರು-ಕೂಟಾಜೆ

           ( ದೈವಾರಾದನೆದ ಕಟ್ಟ್ ಕಟ್ಲೆಡ್ ಪ್ರಾದೇಶಿಕ ಭಿನ್ನತೆ ಉಂಡು ಪಂಡಲ ಮೂಡಾಯಿ ಪಡ್ಡೇಯಿ ತೆನ್ಕಾಯಿ ಬಡಕಾಯಿದ ಒಟ್ಟು ವ್ಯಾಪ್ತಿಡುಪ್ಪುನ ತುಳುವೆರ್ ಬದುಕುನ ತುಳು ಧರ್ಮದ ತುಳು ಬಾಷೆದ ತುಳುನಾಡ್ ಒಂಜೆ)

ದೈವದ ನುಡಿ ಪ್ರಕಾರ ಊರುಗೊಂಜಿ ಬಾಸೆ,ದೇಸೊಗೊಂಜಿ ಕಟ್ಟ್.ಉಂದೆನ್ ತೂನಗಲ ಸಾಂಪ್ರದಾಯಿಕ ಕಟ್ಟ್ ಕಟ್ಲೆ ಒಂಜೇ ಆದಿಪ್ಪೊಡಾಂಡ್.

ನಮ ಬಡುಟು ಬೇರ್ದ್ ಹಾಕುವ ಗಾಯ ಆವು,ಆಮಡ ಮಾಜಿದ್ ಪೋವು.ಆಂಡ ದೈವ ಹಾಕುನಿ‌ಮಾಯೆದ ಬಡುಟು.ಹಾಕ್ ನ ತೋಜಂದ್.ಗಾಯಲ ಮಾಜಂದ್

ದೈವದ ಕಲತ ದುಂಬುದ ಬಳೆಸರಪೊಳಿನ್ ಇನಿ ಮುದ್ರೆ ಪನ್ಪೆರ್

         ದೈವಾರಾದನೆ ಹಿರಿಯೆರ್ನ ಆರಾದನೆ ಪನ್ಪ.ಉಂದೆಕ್ ಸ್ಪಷ್ಟ ಉದಾರ್ಮೆ ದೈವ ಗಡಿ ಪತ್ತ್ ನಾರೆನ್ ಪುರಪು ಲೆಪ್ಪುನವು.ಇನಿತಾತ್ ದಿನೊಕು ಇನಿತಾರ್ ಗಡಿ ಪತ್ಯೆರ್ಡಲ ಅನಾದಿಡ್ ಆ ಕುಟುಮೊಡು ಗಡಿ ಪತ್ತ್ ನಕ್ಲೆ ಪುದರ್ ದೊಟ್ಟುಗು ದೈವ ಪುರಪು ಲೆಪ್ಪುನಿ ಪಂಡ ದೈವದ ನೇರ್ಪುಡು ಆನಿ ಕರಿದ್ ಪೋಯಿನಕುಲು ಇನಿಕ್ಲಾ ಜೂವೊಡುಲ್ಲೆರ್ಂದ್ ಅರ್ಥ. ಉದಾರ್ಮೆಗ್ ಪನ್ಪುಂಡ ಕೋಟಿ ಬೈದ್ಯೆರೆಂದ್ ಕುಪ್ಪೆಟ್ಟು ಪಂಜುರ್ಲಿಗ್ ಕಟ್ಟುನೌಲು ದೈವ ಲೆಪ್ಪುಂಡು.ಇತ್ತೆ ಕುಪ್ಪೆಟ್ಟು ಪಂಜುರ್ಲಿನ ಅರಾದನೆ ಬಾಬು ಪೂಜಾರ್ಲು(ಬಾಯಾರ್ ಮಲಾರ್ ದ  ಕೈತಲ್) ಮಲ್ತೆರ್ಡಲಾ ದೈವ ಲೆಪ್ಪುನಿ ಕೋಟಿ ಪೂಜಾರ್ಲೆನ ಪುದರ್ ಸೇರಾದೇ ಇನಿತಾರೆನ್ ಲೆಪ್ಪುನಿ.ಕೋಟಿ ಬೈದ್ಯೆರ್ ಗುರುನ ಸ್ಥಾನೊಡು ಕುಲ್ಲುದು ಬೈದ್ಯ ವೃತ್ತಿನ್ ಕುಟುಮೊಗು‌ ಪಂಡ್ ಕೊರ್ನೆರ್ದಾದ್ ದೈವದ ಪುರಪು ಅಂಚ ಉಂಡು.ನನೊಂಜಿ ಉದಾರ್ಮೆ ಪಂಡ ಬೀರ್ಣಾಳ್ವ ದೈವ ಕಡಾರ್ ಬೀರಣ್ಣಂದ್ ಲೆಪ್ಪುಂಡು.ಇತ್ತೆದಾರ್ ಪದ್ಮನಾಭ ಶೆಟ್ರ್.ಅರೆನ್ ಕಡಾರ್ ಬೀರಣ್ಣಂದೇ ಲೆಪ್ಪುಂಡು. ಬೀರಣ್ಣ ಪನ್ಪಿ ಆಣಗ್ ದೈವ ತಿಕ್ಕ್ ನೆರ್ದಾವರ ಕರ್ಬದ ತುಂಡುನು ದೈವ ಮಯಕ ಮಲ್ತ್ ನೆಡ್ದಾವರ ಬೀರ್ನಾಳ್ವ ದೈವಂದಾಂಡ್.ಅಪಗ ದೈವದ ಕಟ್ಟ್ ಡೇ ಹಿರಿಯಾಕುಲು ಉಲ್ಲೆರ್ಂದಾಯಿಜಾ? .ಆಂಡ ನಮ ಕರಿದ್ ಪೋಯಿನಕ್ಲೆಗ್ ಏರಾ ಪಿದಯಿರ್ದ್ ಬತ್ತಿನಕುಲು ಪಂಡೆರ್ಂದ್ ಪಿಂಡ ಬುಡ್ಯ .ಅಕ್ಲೆ ಕಟ್ಟ್ ಡ್ ಪಿಂಡ ಬುಡ್ಪುನವು ಉಪ್ಪು.ಆಂಡ ಅಕ್ಲ್ ಅಕ್ಲೆ ಕಟ್ಟ್ ನ್ ತುಲುವೆರೆನಡೆ ಕನತ್ ದ್ ತುಳುವ ಮೂಲ ಕಟ್ಟ್ ನ್ ಪೊಳಿಪುನವು ತಪ್ಪು.ಮುಗ್ದ ತುಲುವೆರ್ ಅಕ್ಲ್ ಪಂಡ್ ನೆನ್ ನಂಬುದು ತನ್ನ ಶ್ರೀಮಂತ ಸಂಸ್ಕೃತಿನ್ ಕಳೆಯೊಂಡೆರ್. ಅಕ್ಲೆ ಪಾತೆರ ಕೇಂದ್ ನಮ ಇನಿ ನಮ್ಮ ಕಟ್ಟ್ ಮದತ್ ದ್ ಪಿಂಡ ಬುಡ್ದು ಕಡಲ್ ಗ್ ದಕ್ಕುನ ಕೆರಮ ಮಲ್ತೊಂದುಲ್ಲ.ಈ ಪಿಂಡ ಬುಡ್ಪುನ,ಸ್ವರ್ಗ ನರಕ,ಮೋಕ್ಷ,ಪುನರ್ಜನ್ಮ ಉಂದು ತುಳುವ ಕಟ್ಟತ್ತ್.ನಮ ಕರಿದ್ ಪೋಯಿನಕ್ಲೆನ್ ಪಿಂಡ ಬುಡ್ದು ಕಡಲ್ ಗ್ ದಕ್ಕ್ಂಡ ಪದಿನಾಜೆಕ್ ಹಿರಿಯಾಕ್ಲೆ ಒಟ್ಟಿಗೆ ಕರಿನಾರೆನ್ ಸೇರ್ಸಾಯೆರೆ ಸಾದ್ಯ ಉಂಡಾ?.ಅಂಚನೇ ಪಂಜುರ್ಲಿನ ಕೈಕ್ ಕರಿನಕ್ಲೆನ್ (ದೈವದ ಬಲತಂಗಾರ್ ಗ್ ಒಪ್ಪಿಪುನಿ) ಒಪ್ಪಿಪುವ. ಏರೇ ತುಳುವೆರ್ ಕರಿದ್ ಪೋವಡ್ ಅಕ್ಲೆನ ಕುಲೆ ಉಪ್ಪುನಿ ಪಂಜುರ್ಲಿನ ಕೈಟ್(ಮಕ್ಕಳ ಕಟ್ಟಾವಡ್,ಅಳಿಯ ಕಟ್ಟಾವಡ್) ವಿನಃ ಬೇತೆ ದೈವೊಲ್ನ ಕೈಟತ್ತ್.ದಾಯೆ ಪಂಡ ಪಂಜುರ್ಲಿ ತುಳುವ ಮಣ್ಣ್ ದ ಅನಾದಿದ ದೈವ.ಅಂಚನೆ ಕುಲೆನ್ ಬುಡು ಕೊರ್ಪುನ ಅಧಿಕಾರಲಾ ಆಯಗ್ ಮಾತ್ರ ಉಪ್ಪುನಿ.ಆಯೆ ಇಂಡಿದೊಟ್ಟುಗಿತ್ತಿ ಪಿಂಗಾರ ಪಾಳೆಡೇ ಕುಲೆನ್ ಬುಡು ಕೊರ್ಪುನಿ.ಆಂಡ ಇನಿ ಈತ್ ಕುಲೆ ಬುಡ್ಪಾಯೆರೆ ಈತ್ ತಾರಾಯಿಂದ್(ಒಂಜಿ ಕುಲೆಕ್ ಒಂಜಿ ತಾರಾಯಿಗೆ),ಈತ್ ಕೋರಿಂದ್( ಒಂಜಿ ಕುಲೆಕ್ ಒಂಜಿ ಕೋರಿಂದ್ ) ದೆತೊಂದು ತಾರಾಯಿನ್ ಕೋರಿನ್ ಅವೆತ ಅಂಗಡಿಗ್ ಮಾರೊಂದುಲ್ಲೆರ್.ದೈವೊನು ಅಕ್ಲೆಗ್ ಕೊಸಿ ಬತ್ತ್ ಲೆಕ ಮಲ್ತೆರ್ಡ ಕುಟುಮದಕುಲು ಬೊಕ್ಕ ಓಡೆ ತರೆ ದೆರ್ಪುನಿ?.

              ‌                      ಗಗ್ಗರದೆಚ್ಚಿ

ಊರುಗೊಂಜಿ ಬಾಸೆ ದೇಸೊಗೊಂಜಿ ಕಟ್ಟ್ಂದ್ ಉಂಡು.ಆಂಡ ದೈವದ ಕಟ್ಟ್ ಬೇತೆನೇ ಉಂಡು.ಅಂಚಾದ್ ದೈವ ಪರತ್ ನ್ ನಿಗಿಪಡ ಪೊಸತ್ ನ್ ತೋಡಡಂದ್ ಪಂತ್ಂಡ್.ನಮಕ್ ಪೊಸ ಕಟ್ಟ್ ಮಲ್ಪುನ ಅಧಿಕಾರ ಇಜ್ಜಿಂದ್ ದೈವನೇ ತೆರಿಪಾದ್ಂಡ್.ದೈವ ಪಂಡಿನ ಅನಾದಿದ ಸಾಂಪ್ರದಾಯಿಕ ಮೂಲ ಕಟ್ಟ್ ನ್ ಪೊಳಿಪಂದೆ ನಡಪಾವೊಂದು ಪೋವೊಡು .ದೈವ ಓಡೆ ಪೋಂಡಲ ಅವ್ವೇ ದೈವ,ಅವ್ವೇ ಮೂಲದ ಒಂಜೇ ಕಟ್ಟ್ .ನಮ ಮಾತ ನಮ ಕೊಸಿ ಬತ್ತ್ ಲೆಕ ಕಾಲ ಕಾಲೊಗು ಕಟ್ಟ್ ಲೆನ್ ಪಗತೊಂದು ಪೋಯಿನೆಡ್ದಾದ್ ದೈವದ ಕಲೆ ಕಾರ್ನಿಕ ನೆಗತ್ ಬರ್ಪುನಲ ಕಮ್ಮಿಯಾಂಡ್.ಅಯಿಕ್ ಕಾರಣ ನಮನೇ ಆದುಲ್ಲ.ನಮ್ಮ ದೈವೊಲೆಗ್ ನಮನೇ ಅಪಚಾರ ಮಲ್ತ್ ದ್ ಕಲೆ ಕಾರ್ನಿಕೊನು ದೆಂಗಾವುಲೆಕ ಮಲ್ತಿ ದೋಷಲ ನಮ್ಮ ತರೆಕೇ ಬೂರ್ದ್ಂಡ್.ಅಂಚನೆ ಕಟ್ಟ್ ಪೊಲ್ತ್ ನಾಯನ್ ನಮ ಪ್ರಶ್ನೆ ಮಲ್ಪುಲೆಕಲಾ ಇಜ್ಜಿ.

ಅಂಚಾಂದ್ ದೈವದ ಮೂಲ ಕಟ್ಲೆಡ್ ಬರ್ಪುನ  ಅರದಲದ ಬದಲ್ ಮೋನೆಗ್ ತಿಕ್ ನ ರಂಗ್ ಪಾಡೆರೆ ಆಪುಂಡೇ?.

ಗಗ್ಗರದ ಬದಲ್ ಕಾರ್ ಗ್ ಗೆಜ್ಜೆ ಪಾಡೆರೆ ಆಪುಂಡೇ?

ತಾರೆದ ಒಲಿತ ಬದಲ್ ಕಂಗ್ ದ ಸೋಗೆ ಸೊಂಟೊಗು ಕಟ್ಟೆರೆ ಆಪುಂಡೆ?

ಪಾಳೆದ ಅಣಿ ಪೋದು ಇನಿ ಫೈಬರ್,ಪ್ಲೈವುಡ್ ದ ಅಣಿ ಬೈದ್ಂಡ್.

ಜೀಟಿಗೆ ಪತ್ತುನ ದೈವೊಗು ಸೂಟೆ ಪತ್ತೆರೆ ಆಪುಂಡೆ?

ಅಮುರ್ತ ದೀಪುನ ದೈವೊಗು ಗಂಗಸರ ದೀಯೆರೆ ಆಪುಂಡೇ?,

ಕೋರಿ ಕುತ್ತಾಬಾರ ಮಲ್ಪುನ ದೈವೊಗು ಕುಂಬುಡ ಕಡ್ಪೆರೆ ಆಪುಂಡೆ?

ಪೊರಿ ಬಜಿಲ್,ಬೆಲ್ಲ ತಾರಾಯಿ,ಪಂರ್ದ್ ಪಂಚಾವಾರದ. ದೈವೊಲೆಗ್ ಬೇತೆ ದಾದಾಂಡಲ ಆವಾರ ಕೊರ್ಂಡ ಆಪುಂಡೇ?

ಕೇಪುಲು ರಂಗ್ ದ ತುತ್ತೈತದ ದೈವೊಗು ಬೇತೆ ರಂಗ್ ದ ತುತ್ತೈತ ತುತ್ತೆರೆ ಆಪುಂಡೇ?.

ಬಂಡಿದ ಮಿತ್ತ್ ಕುಲ್ಲುನ ದೈವೊನು ತೇರ್ ಡ್ ಕುಲ್ಲಯೆರೆ ಆಪುಂಡೇ?

ದೈವದ ಬಲಿ ಚರ್ವೊಗು ಪಾಡುನ ನುಪ್ಪು,,ಅರಿ ಕಡೆದ್ ಮಲ್ತಿ ಚಪ್ಪೆ ಅಡ್ಯೆ,ಪಂರ್ದ್, ಬಚ್ಚಿರೆ ಬಜ್ಜೆಯಿ,ಪಿಂಗಾರದ ಬದಲ್ ಬೇತೆ ದಾದಾಂಡಲ ಬಲಿಕ್ ಬಲಸೆರೆ ಆಪುಂಡೇ?

ಬಲಿಕ್ ಕುತ್ತುನ ಬಲಿಕುತ್ತುದ ತುಡರ್ ದ ಬದಲ್ ಅವೆಕ್ ಬಣ್ಣ ಬಣ್ಣದ ಬಲ್ಬ್ ಪಾಡೆರೆ ಆಪುಂಡೇ?

ದೈವದ ಬಂಡಾರ,ಕಿರ್ವಾಲ್ ಬರ್ಪುನ ಸಾದಿಡ್ ದರಿ ಚೋರ್ನ ಪಾಡುನ ಬದಲ್ ಶಾಮಿಯಾನ ಪಾಡೆರೆ ಆಪುಂಡೇ?

ಇಂಚ ಪನೊಂದು ಪೋಂಡ ಬೋಡಾಯ್ನಾತ್ ಉಂಡು.

ದೇಸಗೊಂಜಿ ಬಾಸೆ,ಊರುಗೊಂಜಿ ಕಟ್ಟಾಂಡಲ ದೈವೊಗೊಂಜಿ ಇತ್ತಿ ಮೂಲ ಸಾಂಪ್ರದಾಯಿಕ ಕಟ್ಲೆನ್ ಪೊಲಿತ್ ದ್ ಒಂಜಾತ್ ವರ್ಸದ ಪಿರವು ಕೆಲವೊಂಜಿ ಕಟ್ಲೆನ್ ಬದಲ್ತ್ಂಡ ದೈವದ ಮೂಲ ಕಟ್ಟ್ ನ್ ಒರಿತೊನುನ ಜಬದಾರಿಕೆ ನಮ ಮಾತ ತುಳುವೆರೆಗುಂಡು

             ಕೊಡಮಂದಾಯನ ಮುಗ ಮಿಜಾರ್ ಗರಡಿ

 ದುಂಬುದ ಕಾಲೊಡು ಪಜ್ಜಿ ಮಡಲ್ ದ ಮಿತ್ತ್ ದೈವ ಭಂಡಾರ ಕೇರ್ತೊಂತೆರ್.ಅಪಗದ ದೈವೊಲ್ನ ಕಾರ್ನಿಕ ಅವೆರ್ದ್ ಬೊಕ್ಕ ಬತ್ತಿನ ಕುಕ್ಕು,ಪೆಲತ ಮಣೆ ಮಂಚೊಡಾವಡ್,ಮುಗಮೂರ್ತಿಲೆಡಾವಡ್ ತೂಯೆರೆ ತಿಕ್ಕೊಂದಿಜ್ಜಿ.

ದೈವದ ಕಲೊಟು ದೈವೊಲೆಗ್ ಕಡೆ ಕೆತ್ತ್ ನ ಬೊಂಡೊನೇ ಪರ್ಯೆರೆ ಕೊರೊಡು.ಕೊಡಿ ಕಡ್ತ್ ನ ಬೊಂಡ ಪಂಡ ಕಣ್ಣ್ ಕಡ್ತ್ ನ ಬೊಂಡೊನು ದೈವೊಗು ಕೊರ್ರೆ ಬಲ್ಲಿ."ಕಡೆ ಕಡ್ತಿ ಬೊಂಡೊನೆ ನಮಕ್ ಕೊರೊಡು" ಪಂಡ್ ದ್ ದೈವದ ಸಂದಿಡುಂಡು.ದೈವ ಸ್ಟ್ರಾಟ್ ಬೊಂಡ ಪರ್ಪುನ ಕಟ್ಟಿಜ್ಜಿ.ದೈವ ಗಟ ಗಟ ಪರ್ಪುಲೆಕ ಬೊಂಡ ಕಡೆ ಕೆತ್ತ್ ದ್ ಕೊರೊಡು..ದೇವೆರೆಗ್ ಬೊಂಡ ಒಟ್ಟೆ ಮಲ್ತ್ ದ್ ದೀಯೊಡು.

ಅಂಚನೆ ದೈವೊಲೆಗ್ ಬೆಮ್ಮೆರೆ ಸುತ್ತೆ ದೀನಗ ಮುಗಟೆ ದಾಂತಿ ತಾರಾಯೇ ದೀಯೊಡು.ಅವೆಟೇ ಸಕನ ತೂಯೆರೆ ಸಾದ್ಯ.ದೇವೆರೆಗ್ ಜುಟ್ಟುದ ತಾರಾಯಿ ದೀಪುನಿ

    ನಿಜವಾದ್ ದೈವ ದುಂಬು ಪೂರ ನೂಲು ಪಾಡಿ ಸಂಸಾರಂದ್ ಲೆತ್ತೊಂದಿಜ್ಜಾಂಡ್.ದಾಯೆ ಪಂಡ ದೈವೊಗು ಸಮ್ಮಂದಪಟ್ಟ್ ದ್ ಇತ್ತ್ ನಿ ಗುತ್ತು, ಬರ್ಕೆಲು,ಬಾವಬೂಡು,ಪರಾಡಿಲು.ಚಾವಡಿ ಇತ್ತ್ ನ ಮನೆತನದ ಇಲ್ಲುಲು,ದೈವ ಚಾಕಿರಿನ್ ನಡಪಾವುನ ಸಂಸಾರೊಲಿತ್ತ್ ನಿ.ಅವು ಬುಡ್ದು ದೈವೊಲೆಗ್ಂದ್ ನೂಲು ಪಾಡಿ ಸಂಸಾರ ಇತ್ತ್ ನಿ ಮಕರ ಚೋರ್ನ,ಮೂರ್ತದ ಚಾಕಿರಿದ ಆಚಾರಿಲು.ಅಂಚಾದ್ ದೈವ ಅವೆಕ್ ಸಮ್ಮಂದ ಪಟ್ನಕ್ಲೆನ್ ಲೆತ್ತೊಂತ್ಂಡ್ ವಿನಃ ಇನಿತಲೆಕ ಅವೆಕ್ ಸಮ್ಮಂದನೇ ಇಜ್ಜಂದಿನ ನೂಲು ಪಾಡಿ ಸಂಸಾರ,ತಂತಿರ್ದಾರೆಂದ್ ಲೆತ್ತೊಂದಿಜ್ಜಾಂಡ್.ಉಂದು ಪೂರ ಪೊಸ ಸೇರಿಗೆ.ಮೂಲದ ದೈ ಕಡ್ತ್ ದ್ ಪೊಸತೊಂಜಿ ದೈತ ಕೋಲುನು ಕಸಿ ಕಟ್ಲೆಕಾಂಡ್.ಮೂಲದವು ಮಯಕಾಂಡ್,ಪೊಸತ್ ಗ್ ಬಿಲೆ ಬತ್ತ್ಂಡ್.ಅಂಚಾದ್ ದೈವದ ಉರಿ ದಿಟ್ಟಿಗ್ ನಮ ಪೂರ ಬಲಿಯಾತ.ದೈವೊಲೆಡ್ ಕೊಡಮಂದಾಯಗ್ ಪಿಲಿ ಬಂಡಿ ಎರ್ದ್ ನೇಮ ಇತ್ತ್ಂಡಲ ಜಯನ ಅರಸೊಳಿಗೆಡ್ ಪಿಲಿತ ಬದಲ್ ಅಡೆಗ್ ಅರಸೊಳಿಗೆದ ಒರುವಾಯಿ ಕುದುರೆದ ಒರು ಕನದೆರ್

             ತೆಂಬರೆ ಬೊಟ್ಟೊಂದು ಪಾಡ್ದನ ಪನ್ಪುನಿ

ಎಂಚಿತ್ತ್ ನ ಮಾರಿನ್ಲ ತಟ್ಟ್ ಪಾರಾವುನ ತಾಕತ್ತ್ ನಮ ನಂಬಿ ದೈವೊಲೆಗಿತ್ತ್ಂಡ್.ನಮ ತರೆಕ್ ಮೈಕ್ ಮೀದ್,ಸುದ್ದ ಮಡಿ ಕುಂಟು ತುತ್ತುದು,ಸುದ್ದ ಮುದ್ರಿಕೆಡಿತ್ತ್ ದ್ ಸ್ವಾಮಿ ಪಂಡ್ ದ್ ಕೊಂಡಾಡ್ ನಡೆ ದೈವ ಅಂದಾಪುನಂಚಿನ ಪರಂಪರೆ ತುಳುವೆರ್ನ.ಇನಿಕಾನಗ ನಮ್ಮ ದೈವದ ಚಾಕಿರಿ ನಮಕ್ ಮಲ್ಪೆರೆ ಬಚ್ಚೆಲ್ ಎಚ್ಚಾದ್ ಪಿದಯಿದಕ್ಲೆಡ ದುಡ್ಡು ಕೊರ್ದು ಮಲ್ಪಾಯಿನೆರ್ದಾತ್ರ ಅಕುಲು ಮೂಲು ಬತ್ತ್ ದ್ ಸೇರೊಂಡೆರೆ ಹೊರತು ಅಕುಲು ಕುಟುಮದ ಬೂತಂದ್ ನಂಬುಜೆರ್.ಹಿರಿಯಾಕ್ಲೆರ್ದ್ ಬತ್ತ್ ನ ಬೂತಂದ್ ನಂಬುಜೆರ್.ಅಕ್ಲೆಗ್ ಕುಟುಮದ ದೈವೊಲಿಜ್ಜ.ಅಕ್ಲೆಗ್ ಮನೆ ದೇವೆರ್ ಉಪ್ಪುನಿ.ಅಕುಲು ಬದ್ ಕೊಂದಿಪ್ಪುನ ಜಾಗೆಡ್ ಉಪ್ಪುನ ದೈವೊಲೆರ್ದ್ ತನ್ಕುಲೆಗ್ ತೊಂದರೆ, ದೋಸ ಬರ್ರೆ ಬಲ್ಲಿಂದ್ ಅಕ್ಲೆನ ಚಾಕಿರಿದಕ್ಲೆಡ ಅಕ್ಲೆ ಜಾಗದ ದೈವೊಲೆಗ್ ಕರಿಪುವೆರಾತೆ.

   ಮಡ್ಯೆಲೆರ್ ಪುಣತ ಕುಂಟುನು ಸುದ್ದ ಮಲ್ತ್ ದ್ ದೈವದ  ಕೊಡಿಯಡಿ ಕಟ್ಟುನ,ನೆತ್ತೆರಾವಾರದ ತಾಮಸಿಕ ಆರಾದನೆದ ದೈವದ ಕೊಡಿಯಡಿಕ್ ನೂಲು ಪಾಡಿ ಸಂಸಾರ ಬರೊಂದಿಜ್ಜಾಂಡ್.ಇತ್ತೆ ದೈವೊಗು ಅಕುಲೆ ಕೊಡಿಯಡಿಟ್ ಉಂತುದು ಮದು ಪನ್ಪೆರ್.ನಮ್ಮ ಹಿರಿಯಾಕ್ಲಾವಡ್,ದೈವ ಆವಡ್ ಅಕ್ಲೆನ್ ಲೆಪ್ಪೆರೆ ಇಜ್ಜಾಂಡ್.ಒವೆನ್ ನಮ ಸುರುಕು ಮಲ್ಪೆರೆ ಬಲ್ಲಿತ್ತ್ಂಡಾ ನಮ ಅವೆನ್ ಸುರುಕು ಮಲ್ಪೆರೆ ಪೋದು ದೈವದ ಕಲೆ ಕಾರ್ನಿಕ ದೂರಾಂಡ್.ಇನಿ ನೇಮದ ದುಂಬು ಕೊಡಿ ಇರೆಟ್ ರಡ್ಡ್ ಬೊಂಡ,ಬೂಲ್ಯ,ಪಿಂಗಾರ,ಮಲ್ಲಿಗೆನ್ ದೈವದ ಅಪ್ಪಣೆ ಪಡೆದ್ ಅಕ್ಲೆ ಕಾರ ಮುದೆಲ್ ಗ್ ದೀಪುನವು ಸರಿಯತ್ತ್.ಅಂಚ ಕಾರ ಮುದೆಲ್ಡ್ ಬೂಲ್ಯ ದೀಂಡ ಬೂಲ್ಯದ ದೈವ ಮಲ್ಲನಾ,ನೂಲು ಪಾಡಿ ಸಂಸಾರಿ ಮಲ್ಲೆನಾ ಅಲಚನೆ ಮಲ್ಪೊಡು.ಉಂದೇ ದೈವದ ಕಾರ ಮುದೆಲ್ಡ್ ಸ್ವಾಮಿ ಸತ್ಯೊನೇ ಈಯೆ ಕಾಪುಲಂದ್ ನಮ ಪುಡ್ಯಾಡುವ.ಅಂಚಾದ್ ಏರೆನ ಕಾರ ಮುದೆಲ್ಡ್ ಲ ದೈವದ ಬೂಲ್ಯ ದೀಯೆರೆನೆ ಬಲ್ಲಿ.

 ದೈವಾರಾದನೆದ ಸಾಂಪ್ರದಾಯಿಕ ಪಿರಾಕ್ ದ ಪದಿನಾಜಿ ಕಟ್ಟ್ ಕಟ್ಲೆಲು-

೧.ಮಣ್ಣ್ ದಪ್ಪಣೆ:-

      ದೈವಾರಾದನೆದ ಮೂಲ ಸಾಂಪ್ರದಾಯಿಕ ಕಟ್ಟ್ ಡ್ ಸುರುತವು ಮಣ್ಣ್ ದಪ್ಪಣೆ ದೆತೊನುನವು .ಒಂಜಿ ಮಣ್ಣ್ ಡ್ ಒಂಜೇ ದೈವ ಉಂತುದುಪ್ಪುಜಿ.ಆ ಮಣ್ಣ್ ಡ್ ಬೇತೆ ಬೇತೆ ದೈವೊಲಿಪ್ಪುವ.ನಮ ಆ ಮಣ್ಣ್ ಡ್ ಬೇತೆ ಬೇತೆ ದೈವೊಲೆಗ್ ಬೇತೆ ಬೇತೆನೇ ಕೋಲನಾ ನೇಮನಾ ಕೊರ್ಪುಜ.ನಮ ನಂಬಿನ ದೈವೊಗು ಮಾತ್ರ ನೇಮ ಕೊರ್ಪ.ನಮ ಆ ಮಣ್ಣ್ ನ್ ನಮ್ಮ ಸರ್ವಸ್ವಂದ್ ಎನ್ನಿದಿಪ್ವ.ನಮ ಬದುಕುನೆಡ್ದಾದಿಪ್ಪು,ನಮ ನಂಬುನ ದೈವ ಉಂತುನೆಡ್ದಾದಿಪ್ಪು ,ನಮ ನಡಪಾವುನ ನೆಮ ನೆರಿ ಕೋಲ ತಂಬಿಲ ಆದಿಪ್ಪು  ಆ ಮಣ್ಣ್ ದ ಮಿತ್ತ್ ನಮ ನಡಪಾವೊಂದು ಬರ್ಪುನಿ.ಅಂಚಾದ್ ಎಂಕುಲು ಇಂಚಿತ್ತಿ ಕಾರ್ಯೊಗು ಇಂಚಿತ್ತಿನ ದೈವೊಗು ಇಂಚಿತ್ತ್ ನ ದಿನಮಾನೊಗು ನಡಪಾಯೆರೆ ಉಲ್ಲ.ಅಂಚಾದಿಪ್ಪುನಗ ತುಂಬಿ ಬೂಮಿ,ಮಣ್ಣ್ ಎಂಕ್ಲೆಗ್ ಅವೆನ್ ನಡಪಾಯೆರೆ ಅಪ್ಪಣೆ ಕೊರೊಡುಂದು ಮಣ್ಣ್ ದ ಅಪ್ಪಣೆ ಪಡೆಯುನಿ.ದೈವೊನು ನಂಬುನಂಚಿನ ನಂಬಿಕಸ್ತೆರ್, ಗ್ರಾಮೊಗಂಡ ಗ್ರಾಮೊಗು ಸಮ್ಮಂದ ಪಟ್ಟ್ ನಕುಲು‌ಬೋಡು.ಗ್ರಾಮ ಸಮ್ಮಂದಿ ದೈವ ಆಂಡ ಗುತ್ತು ಬರ್ಕೆ,ಬಾಳಿಕೆ,ನೇಮದ ಕಲೊಕು‌ ಸಮ್ಮಂದಪಟ್ಟ್ ನಕುಲು ಬೋಡು,ಕಟ್ಟುನಕುಲು ಬೋಡು.ಯಜಮಾನೆರ್,ಸಮ್ಮಂದ ಪಟ್ಟಿನ ಮಾತೆರಿತ್ತ್ ದ್ ಮಣ್ಣ್ ದಪ್ಪಣೆ ಪಡೆಯೊಡು.

೨.ದಿನ ದೀಪುನಿ_ಬಲ್ಯಾಯಡ:-

     ಮೂಲ ಸಾಂಪ್ರದಾಯಿಕ ಕಟ್ಟ್ ಡ್ ರಡ್ಡನೆದಾದ್ ಬಲ್ಯಾಯಡ ದಿನಮಾನ ತೂಪುನಿ.ದುಂಬುದ ಕಾಲೊಡು ದೈವದ ನಿಮಿತ್ತ ನೋಟ ತೂವೊಂತ್ ನಿ.ಆಂಡ ಇನಿ ಅಕುಲು ಮದೆಕ್ ಸೇರ್ದ್ ಅಡೆಗ್ ವೈದಿಕ ಪ್ರಶನಾ ಚಿಂತನೆದಕುಲು ಬೈದೆರ್.ಬಲ್ಯಾಯನಕುಲು ಪಂಚಾಂಗ ತೂದು ದೋಷ ಇಜ್ಜಂದಿನ ದಿನಮಾನೊನು ನೇಮ ನೆರಿ ನಡಪಾಯೆರೆ ತೆರಿಪಾವೆರ್.ಅಂಚನೆ ಕಟ್ಟುನಾಯಗ್ ಬೂಲ್ಯಕೊರ್ರೆಲಾ ಬಲ್ಯಾಯಡನೆ ದಿನಮಾನ ಕೇನುನಿ.

೩.ವೀಳ್ಯ ಕೊರ್ಪುನಿ:-

     ಕಟ್ಟುನಾಯಗ್ ಬೂಲ್ಯ ಕೊರ್ಪುನವು ಮೂಜನೆ ಕಟ್ಟ್.ಕಟ್ಟುನಾಯನ್ ಲೆತ್ತ್ ದ್ ಇಲ್ಲದ ಜಾಲ್ಡಾಪುನ ನೇಮ ಆಂಡ ಇಲ್ಲದ ಜಾಲ್ಡೇ ವೀಳ್ಯ ಕೊರೊಡು.ಒಂಜಿ ವೇಳೆ ಸಾನ ಮಾಡೊಡು ಆಪುನ ನೇಮ ಆಂಡ ಸಾನದ ಮಾಡದ ಜಾಲ್ಡೇ ಕೊರೊಡು.ನಮ್ಮ ಅನುಕೂಲೊನು ಒಂದುದು ದಿನ ದೀನೆರ್ದ್ ಬೊಕ್ಕ ನೇಮ ಕಟ್ಟುನಾಯಗ್ ದೈವೊಗು ವೀಳ್ಯ ಕೊರ್ಯೆರೆಲಾ ಬಲ್ಯಾಯಡ ದಿನ ಕೇನೊಡು.ದಾಯೆ ಪಂಡ ಸುದ್ದ ಬಾವ ತಿಕ್ಕೊಡಾನಿ.ಬಾವಸುದ್ದ ತಿಕ್ಕುನ ದಿನ ತೂದು ಒಂಜಿ ವಾರದ ದುಂಬುಲ ವೀಲ್ಯ ಕೊರೊಲಿ.10 ದಿನ ದುಂಬುಲ ಕೊರೊಲಿ.ನಮಡ ಆತೊಂಜಿ ದಿನ ಇಜ್ಜಿಂದಾಂಡ ನಾಲೈನ್ ದಿನ ದುಂಬುಲ ಕೊರೊಲಿ.ಐಕ್ ದಾಲ ಈತೇ ದಿನಾಂದ್ ನಿಗಾಂಟ್ ದಾಲ ಇಜ್ಜಿ.ವೀಳ್ಯ ಕೊರ್ಪುನ ದಿನ ಬರಣಿ,ಕಿರ್ತಿಕೆ,ಸಿಂಗೊಡೆ,ಅಮಾಸೆ ಬರಂದೆ ಉಪ್ಪೊಡು.ಅಂಗಾರೆ,ಸುಕ್ರಾರ ಪೂರ ದೈವೊಗು ನಿಶಿದ್ದ ಇಜ್ಜಿ.ಅಂಗಾರೆ,ಸುಕ್ರಾರ,ಐತಾರ ಅಗೆಲ್ ಪಾಡೆರೆ ಎಡ್ಡೆ ದಿನಾಂದಾಂಡ ಕಟ್ಟುನಾಯಗ್ ವೀಳ್ಯ ಕೊರ್ರೆಲಾ ಆದಿನ ಕೊರೊಲಿ,ತಪ್ಪತ್ತ್.ಒಂಜೆನ್ ನಮ ಸರಿಂದ್ ಪನ್ಪಂದಂಡ ಬೊಕ್ಕೊಂಜೆನ್ ತಪ್ಪುಂದು ನಮಕ್ ಪನೆರಾಪುಜಿ.ವದ್ಯದಕುಲು ಬೊಕ್ಕ ಆ ದೈವೊಗು ಸಮ್ಮಂದಪಟ್ಟ್ ನಕುಲು ಅವ್ಲು ಬೋಡು.ಅಕ್ಲೆಗ್ ದಾಲ ವೀಳ್ಯ ಕೊರ್ರೆ ಇಜ್ಜಿ,  ಇಂಚಿನಾನಿ ನೇಮಂದ್ ನೇಮದ ದಿನತ ಲೆಪ್ಪು ಕೊರ್ಪುನಿ.ಅವ್ಲು ನೇಮ ಕಟ್ಟುನಾಯಗ್ ಮಾತ್ರ ಲೆಪ್ಪು ಕೊರ್ಪುನಿ.ವೀಳ್ಯೊಡು ಬಚ್ಚಿರೆ,ಬಜ್ಜೆಯಿ,ಎಲ್ಯ ಪಣವು ಕೊರ್ಪೆರ್.ಪೊರ್ತು ತಿರ್ಗುನ ದುಂಬು ಪಂಡ ಮದ್ದೆನದ ದುಂಬು ವೀಳ್ಯ ಕೊರೊಡು.ದಾಯೆ ಪಂಡ ಸೂರ್ಯ ದೇಬೆರ್ ಉದಿತ್ ದ್ ನೆಗತ್ ದ್ ಬರ್ಪುನ ಪೊರ್ತಾದಿಪ್ಪುಂಡು.

೪.ಕೋರಿ ಕುಂಟ,

ಕೈಲ್ ಮೂರ್ತ,

ಪಾಳೆ ಮೂರ್ತ,

ಮಣ್ಣ್ ಮೂರ್ತ,

ಮರ ಮೂರ್ತ .

ಕೈಲ್ ಕಡ್ಪುನಿ:-

ಕೈಲ್ ಕಡ್ಪುನಿ ಪಂಡ ಅವೆಕ್ ಪೂಬಾರೆದನೇ ಕೈಲಾವೊಡು .ಇನಿ ಅವು ತಿಕ್ಕಂದಿನೆಡ್ದಾದ್ ಕದೊಳಿದ ಕೈಲ್ ಕಡ್ಪುವೆರ್.ಬೇತೆ ಕೈಲ್ ಆಪುಜಿ. ಕೈಲ್ ಕಡ್ಪುನೆಕ್ಲ ಅವೆತನವೇ ಆಯಿನ ಕೆರಮೊಲು ಉಲ್ಲ.ಕೈಲ್ ಕಡ್ಪುನಾರ್ ತರೆಕ್ ಮೈಕ್ ಚೌಞಲಿ ನೀರ್ ಡ್ ಮೀದ್ ಮುಂಡೊಗು ಬಸ್ಮದ ಅಡ್ಡ ನಾಮ ಪಾಡ್ದ್  ಸಂಬಂದ ಪಟ್ನ ದೈವದೌಲು ಅಡ್ಡ ಬೂರ್ದು  ನಿನ್ನ ನೇಮೊಗು ಬೋಡಾಯಿನ ಕೈಲ್ ಮೂರ್ತೊಗು ಪೋವೊಂದುಲ್ಲ.ಈ ಎಂಕ್ಲೆಗ್ ಬೆರಿಸಾಯ ಕೊರ್ಲಂದ್ ಕೈಲ್ ಮೂರ್ತೊಗು ಪಿದಡುನಿ. ಕೈಲ್ನೇ ಕಡ್ಮತ್ದ ನೆನ್ ನಮ ತೊಲಚಿ ಕಟ್ಟೆದ ಎದುರು ಕೊನತ್ ದೀದ್ ಅವೆಕೊಂಜಿ ಕುರ್ದಿ ,ದೂಪ,ದೀಪ ಆಯಿನೆರ್ದ್ ಬೊಕ್ಕ ದೈವಡ ನಮ ಅರಿಕೆ ಮಲ್ತೊಂದು ಕೈಲ್ ನ್ ನೆಲ ಬುಡ್ದು ಮಿತ್ತ್ ಕಟ್ಟುನಿ. ಐಡ್ದ್ ಬೊಕ್ಕ ಆ ಕೈಲ್ ನ್ ನೇಮದಾನಿಯೇ ಗಿಚ್ಚಾವುನಿ.ಅಡೆ ಮುಟ್ಟ ಕೈಲ್ ನ್ ಬೇತೆ ಏರ್ಲ ಪಿದಯಿದಕುಲು ಮುಟ್ಟುಲೆಕ ಇಜ್ಜಿ. ಏಳ್ ದಿನ ದುಂಬು ಕೈಲ್ ಕಡ್ತ್ ದ್ ನೇಮದಾನಿ ದೈವದ ಅವಾರದೊಟ್ಟುಗು ಆ ಕೈಲ್ದ ಪರ್ಂದ್ ನ್ ಗಲಸುವೆರ್.ಅಂಚಾದ್ ಆ ಕೈಲ್ ಮೂರ್ತೊಗು ಆತೊಂಜಿ ಮಹತ್ವ ಉಂಡು.ಕೈಲ್ ಕಡ್ತ್ಂಡ್ಂದ್ ಪಂಡ ಆ ನೇಮೊಗು ಸಮ್ಮಂದಪಟ್ನಕ್ಲೆಗ್ ಸೂಕೆ ಬತ್ತ್ಂಡ್ಂದ್ ಲೆಕ್ಕ.ಆ ಸೂಕೆ ಬತ್ತ್ ನಕುಲು ನೇಮ ಕರಿನೇಟ ಊರು ಬುಡ್ದು ಪರವೂರುಗು ಪೋಪುನ ನಿರ್ದಾರ ಮಲ್ಪೆರೆ ಬಲ್ಲಿ .ದಾಯೆ ಪಂಡ ಕೈಲ್ ಕಡ್ತ್ ದ್ ದಡೆಟ್ ದೀಂಡತ್ತೆ,ಅವೆಡ್ದ್ ಬೊಕ್ಕ ಮೊಕುಲು ಅವೆನ್ ಅರ್ದೊಡು ಬುಡ್ದು ಪೋಯೆರ್ಂದಾಂಡ ದೈವೊನು ನಮ ನಂಬಿಸಾದ್ ಬುಡ್ದು ಪೋಯಿಲೆಕ ಅಯಿಜಾ?.ಅಂಚ ಮಲ್ತ್ಂಡ ಬಾಸೆ ಕೊರ್ದು ತತ್ತ್ ನ ದೋಷ ಬರ್ಪುಂಡು.ಕೈಲ್ ಕಡ್ತ್ ನಕುಲು ದೈವೊಗು ಸಮ್ಮಂದ ಪಟ್ಟ್ ನ ಚಾಕಿರಿದಕುಲು ಪ್ರಾದೇಶಿಕತೆಗ್ ಸರಿಯಾದ್ ಕೆಲವು ಕೋಡಿಡ್ ಮೀನ್ ಕೋರಿದೊಣಸ್ ಮಲ್ಪೊಲಿ,ಕೆಲವು ಕಞೋಡಿಡ್ ಮೀನ್ ಕೋರಿ ಅಡ್ಯೆರೆನೆ ಬಲ್ಲಿ.ಗ್ರಾಮ,ಸೀಮೆ ದೈವದ ಕೈಲ್ ಕಡ್ತಿ ಬೊಕ್ಕ ಆ ಗ್ರಾಮ,ಸೀಮೆಡ್ ವಾ ಎಡ್ಡೆ  ಕೆಲಸ ಪಂಡ ಮದಿಮೆ,ಮಸ್ಕಿರಿ ಮಲ್ಪುಲೆಕಿಜ್ಜಿ.ಕೈಲ್ ಕಡ್ಪುನ ಪೊರ್ತುಡು ಊರುಡಿತ್ತ್ಂಡ ನೇಮ ನೆರಿ ಮುಗಿದ್ ಊರು ಬುಡ್ದು ಪಿದಯಿ ಪೋವೊಡು.ಅಂಚನೆ ಕೊಡಿ ಏರ್ನಗ ಊರುಡಿತ್ತ್ಂಡ ಕೊಡಿ ಜಾಯಿ ಬೊಕ್ಕ ಊರುಡ್ದು ಪಿದಯಿ ಪೋವೊಡು.ಕೋರಿ ಪೊಜೆಂಕೊಡಾಂಡಲ ಗ್ರಾಮ,ಸೀಮೆದ ಸುದೆ ಆಯೆರೆಗ್ ಪೋದು ಪೊಜೆಂಕ್ ದ್ ಬತ್ತ್ ದ್ ಕಜಿಪು ಮಲ್ಪೊಡು.ಕುಟುಮದ ದೈವೊಗು ಕೈಲ್ ಕಡ್ತಿ ಬೊಕ್ಕ ಕುಟುಮೊಗು ಸಮ್ಮಂದಪಟ್ನ ವಾ ಇಲ್ಲಲ್ ಲ ಎಡ್ಡೆ ಕೆಲಸ ನೇಮ ಮುಗಿನೇಟ ಮಲ್ಪೆರೆ ಬಲ್ಲಿ.

ಕೋರಿ ಕುಂಟ:-

       ದೈವದ ಪ್ರತಿಯೊಂಜಿ ನೆತ್ತೆರಾವಾರದ ಬಲಿಕ್ ಕೋರಿ ಬೋಡು.ದೈವದ ಆರಾದನೆಡ್ ಕೋರಿ ಕುಂಟ ಅವೆತನವೇ ಅಯಿನ ಮಾನಾದಿಗೆನ್ ಒರಿತೊಂದ್ಂಡ್.ಕೋರಿ ಕುಂಟ ಬಯ್ಯದ ಪೊರ್ತುರ್ದು ಸೂರ್ಯೆ ಕಂತುನ ದುಂಬು ಪಾಡುನಿ.ಕೋರಿ ಕುಂಟ ಪಾಡ್ಂಡ್ ಪಂಡ ಇಂಚಿತ್ತ್ ನ ದೈವೊಗು ಇಂಚಿತ್ತ್ ನ ದಿನತಾನಿ ನೇಮಂದ್ ಗಡು ಪಾಡಿಲೆಕಾಂಡ್. ಕೋರಿ ಕುಂಟದ ಸಂಕಲ್ಪ  ದಾದ ಪಂಡ ಅವು ಒಂಜಿ ಮೂರ್ತ.ಆ ನೇಮೊಗೌಲು ಗಡಿ ಪಾಂಡ್ಡ್,ಮೂರ್ತ ಆಂಡ್,ದಿನ ನಿಘಂಟ್ ಆಂಡ್ಂದ್ ಲೆಕ್ಕ.ಅಯಿರ್ದ್ ಬೊಕ್ಕ ಕೈಲ್ ಕಡ್ಪುನಿ.ಗ್ರಾಮ ದೈವೊಗು ,ರಾಜಂದೈವೊಗು ಕೋರಿಕುಂಟ 8 ದಿನೊಕು ದುಂಬುಲ ಮಲ್ಪೊಲಿ,15ದಿನೊಕು ದುಂಬುಲ ಮಲ್ಪೊಲಿ,48 ದಿನೊಕು ದುಂಬುಲಾ ಮಲ್ಪೊಲಿ.ಅವು ಅಲ್ತ ಪ್ರದೇಶಾಚಾರೊಗು ಬುಡ್ತಿನ ಇಚಾರ.ಆಂಡ  ಅರಸು ದೈವೊಲೆಗಾಂಡ ಕೋರಿ ಕುಂಟದ ಒಂಜಿ ತಿಂಗೊಲ್ದ ಕುದಿ ಮೂರ್ತ,ಕುಟುಮ ದೈವೊಲೆಗ್ ಕೈಲ್ ಕಡ್ಪುನಿ.ನೇಮೊಗು 5,7ದಿನತ ಉಲಯಿ ಕೈಲ್ ಕಡ್ಪುನಿ.ಕೋರಿ ಕುಂಟ ಪಾಡ್ದ್ ನೇಮ‌ ಆಪುನ ದೈವೊಲೆಗ್ಲಾ ಕೈಲ್ ಕಡ್ಪುವೆರ್.ಕೋರಿ ಕುಂಟ ಆವಂದೆ ಕೈಲ್ ಕಡ್ಪುನ ಶಾಸ್ತ್ರ ದುಂಬು ಇಜ್ಜಾಂಡ್ .ಕೋರಿ ಕುಂಟ ಆವಂದೆ ಕಾಲಿ ಕೈಲ್ ಕಡ್ತ್ ದ್ ನೇಮ ಆಪುನ ಜಾಗೆಲ ತುಳು ನಾಡ್ ಡ್ ಉಂಡು. ಕೈಲ್ ಕಡ್ತ್ ನೆತ ಪಂರ್ದ್ ನ್ ದೈವದ ಆವಾರೊಗು ಗಲಸುವೆರ್.ಪೂರ್ವೊಡು ಪೂ ಬಾರೆದ ಕೈಲ್ ನೆ ಕಡ್ತೊಂತೆರ್.ಪೂಬಾರೆ ಅಪ್ರೂಪ ಆಯಿನೆರ್ದಾತ್ರ ಕದೊಳಿ ಬಾರೆದ ಕೈಲ್ ಕಡ್ಪುವೆರ್.ಕೋರಿ ಕುಂಟೊಗು ಜೋಗ ಉಂಡು.ಜೋಗದಪ್ಪಣೆಯಾದ್ ಕೋರಿ ಕುಂಟ ಆಂಡ ಕೈಲ್ ಕಡ್ಪುನೆಕ್ ಜೋಗದಪ್ಪಣೆ ಇಜ್ಜಿ.ಕೈಲ್ ಕಡ್ಪುನಗ ಗಡಿ ಪತ್ತ್ ನಕುಲು ಚಾಕಿರಿದಕುಲು,ಕೊಂಬುದಕುಲು ಬೊಲ್ಪುಗು ಪೋದು ದೈವೊನು ಪ್ರಾರ್ಥನೆ ಮಲ್ತ್ ದ್ ಕೈಲ್ ಕಡ್ಪುವೆರ್.ಕೈಲ್ ಕಡ್ಪುನಗ ಅವೆಕ್ ಸಂಬಂದಪಟ್ಟ್ ನಕುಲು ಇತ್ತ್ ದ್ ಕೊಂಬು ವಾದ್ಯೊಡೆ ಕೈಲ್ ಕಡ್ಪುವೆರ್.ಅಂಕ ಅಯನ ಪಂಡ ಕೋರಿ ಕುಂಟ ಬೋಡೆ. ಕುಂಟ ಪಂಡ ಒಂಜಿ ತಮೇರಾದ್ ಉಂತುನ‌ ಒಂಜಿ ಇಚಾರವು.ಕುಂಟ ಪನ್ಪುನವು ದೈವದ ಆ ಕಲೊಕು ತಮೆರ್ / ಆಧಾರ ಸ್ಥಂಭ.ಕುಂಟ ಪಾಡ್ಂಡ್ ಪಂಡ ದೈವದ ಕಟ್ಟ್ ನ್ ಮೀರ್ದ್ ಪೋಯೆರೆ ಆಪುಜಿಂದ್ ಅರ್ಥ.ಅವ್ವೆಂಚ ಪಂಡ ಕೋರಿ ಕುಂಟದಪಗ,ಕೊಡಿ ಏರ್ನಪಗ ಕಿರ್ವಾಲ್ ಬನ್ನಗ ಇತ್ತ್ ನಕುಲು ಕೊಎಇ ಜಾನೇಟ,ಕಿರ್ವಾಲ್ ಪೋನೇಟ ಊರು ಬುಡ್ದು ಪೋಪುಲೆಕ ಇಜ್ಜಿ,ಮದಿಮೆ ಮಸ್ಕಿರಿಂದ್ ಎಡ್ಡೆ ಕೆಲಸ ಮಲ್ಪುಲೆಕ ಇಜ್ಜಿ.ಕೋರಿ ಪೊಜೆಂಕುಂಡಲಾ ದೈವದ ಗಡು ಪಾಡಿ ಜಾಗೆದ ಗಡಿ ಕಡತ್ ದೆ ಕೋರಿ ಪೊಜೆಂಕೊಡು.

        ಕೋರಿದ ಕುಂಟ 5 ದಿನ,7ದಿನ, 9ದಿನ ಇಂಚ ಆಪುನಿ ಹೆಚ್ಚಿಗೆ.ಕೆಲವು ಕೋಡಿಡ್  ಕೋರಿದ ಕುಂಟ ಕೆಲವೊಂಜಿ ದಿನೊಕ್ಲೆ ದುಂಬೇ ಪಾಡ್ವೆರ್.ಕಲ್ಲಾಡಿಡ್ ಬಿಸುತಾನಿ ಬಯ್ಯಗ್ ಕೋರಿ ಕುಂಟ ಆದ್ ಬಿಸುತಾನಿ ನೇಮ ಆಪುನಿಪಂಡ 18 ದಿನತ  ಅಂತರ. ಕಣಂದೂರುಡು ಒಂಜಿ ತಿಂಗೊಲು‌ ದುಂಬೇ ಕೋರಿ ಕುಂಟ ಪಾಡುವೆರ್. ಕೋರಿ ಕುಂಟ ಮೂಜಂಜೊಡೇ(ಕತ್ತಲೆ ಬೂರುನ ಪೊರ್ತು) ಪಾಡುನ ಕೆರಮ.ಬೊಲ್ಬೇಪು,ಮದ್ತೆನ,ಬಯ್ಯಂದ್ ಬೇತೆ ವಾ ಏಳ್ಯೆಡ್ಲ ಕುಂಟ ಪಾಡುನ‌ ಕೆರಮ ಇಜ್ಜಿ.ಆಂಡ ಕೈಲ್ ಕಡ್ಪೆರೆಗ್ ಕಾಂಡೆದ ಮೂರ್ತನೇ ಆವೊಡು. .ಕೋರಿ ಕುಂಟೊಡು ಪ್ರದೇಶಾಚಾರೊಡು ಎತ್ತೇಸ ಉಂಡು.   ಕೋರಿ ಕುಂಟೊಡು ಕೆಲವು ಕೋಡಿಡ್ ಒಂಜಿ ಕುಂಟ ಪಾಡ್ವೆರ್.ಕೆಲವು ಕೋಡಿಡ್ ಐನ್ ಕುಂಟ ಪಾಡ್ವೆರ್.ಅಂಚ ಮುಗುಳಿ ಬರೊಡುಂದು ಮೂಜಿ ಕುಂಟ ಪಾಡುಜೆರ್.ರಡ್ಡ್,ನಾಲ್ ಇಂಚ ಸಮ ಸಂಕೆಡ್ಲ ಕೂಂಟ ಪಾಡ್ರೆ ಇಜ್ಜಿ.ಕೋರಿ ಕುಂಟ ಪಾಡ್ನಗ ದೈವ ಇತ್ತ್ ದ್ ಕೋರಿ ಕುಂಟ ಪಾಡ್ನ ಸಂಕಲ್ಪದ ಒರುವಾದ್ ಆ ಜಾಗೆಡ್ ದೈವ ಮಾನಿನ ವಸಾಯ ಉಪ್ಪುಂಡು.ಕೋರಿ ಕುಂಟ ರಡ್ಡ್ ಅರ್ಥ ಕೊರ್ಪುಂಡು.೧-ಆನಿರ್ದ್ ಬೊಕ್ಕ ಆದೈವದ ನೇಮ ಆಪುನಡೆಮುಟ್ಟಗ್ ಒಂಜಿ ಗಡು ಪಾಡ್ಂಡ್.ಕೋರಿ ಕುಂಟ ಪಾಡಿ ಬೊಕ್ಕ ಆ ಊರುಡು ಒವ್ವೇ ರೀತಿದ ರಕ್ತಪಾತ,ಕಲಹ,ಸಮಸ್ಯೆ ಆಯೆರೆ ಬಲ್ಲಿ,ಮನುಷ್ಯ ಸಮ್ಮಂದಿ ಒವ್ವೇ ಎಡ್ಡೆ ಕೆಲಸ ಆಯಿನ ನಿಚ್ಚಯ, ಮದಿಮೆ,ಸಮ್ಮಣ,ಬಯಕೆ,ಇಲ್ಲೊಕ್ಕೆಲ್  ನೇಮ ಕರಿನೇಟ ಒವ್ಲ ಮಲ್ಪೆರೆ ಬಲ್ಲಿ. ದಿನಮಾನ ಮಲ್ಪೆರೆ ಬಲ್ಲಿ.ಆಂಡ ಕೆಲವು ಕೋಡಿಡ್ ಪ್ರಾದೇಶಿಕವಾದ್ ಎತ್ತೇಸೊಲು ಉಂಡು ಕೆಲವೊಂಜಿ ಊರುಲೆಡ್ ಬಲ್ಲಿ ಪಂಡ ಬಲ್ಲಿ.ನನ ಕೆಲವೊಂಜಿ ಊರುಲೆಡ್ ಆ ಊರುಗು ಸಂಬಂದಪಟ್ಟ್ ನಕುಲು ಆ ಊರುದ ದೈವೊಲ್ನ ಅಪ್ಪಣೆ ಪಡೆದಿಪ್ಪುವೆರ್.ದೈವದ ಮಾನಿ ಜೋಗೊಡಿತ್ತ್ ದೆ ಅಕುಲೆಗ್ ಅಪ್ಪಣೆ ಕೊರ್ಪುನಿ.ಎಂಕ್ ಲ್ನ ಊರು ಮಲ್ಲ,ಮಾಗಣೆ ಮಲ್ಲ,ಸೀಮೆ ಮಲ್ಲ .ಅಂಚಾದಿಪ್ಪುನಗ ನಿಕ್ ಲ್ನ ಕಟ್ಟ್ ಗ್ ಸರಿಯಾದ್ ಇನಿತ ದಿನಮಾನೊಡು ನಡತೊನೆರೆ ಎಂಕ್ಲೆಗ್ ಕಷ್ಟ ಆಪುಂಡು.ಅಂಚಾದ್ ಎಂಕುಲು ನಿನ್ನ ಕೋರಿ ಕುಂಟದ ಪೊರ್ತುಡು ಇಡೆ ಬತ್ತ್ ದ್ ನಿನಡ  ಬಿನ್ನೈತೊಂಡ, ನಿಕುಲು  ಎಂಕ್ಲೆಗ್ ಒಪ್ಪಿಗೆ ಕೊರೊಡು(ಮದಿಮೆ ಮಸ್ಕಿರಿ ಪನ್ಪಿ ಒವ್ವಾಂಡಲ ಎಡ್ಡೆ ಕಜ್ಜೊಲಿತ್ತ್ಂಡ) ಪಂಡ್ ದ್ ಕೋರಿ ಕುಂಟದಾನಿ ಮೊಕ್ಲು ಕೈಕಾನಿಕೆ ಪತ್ತೆರೆ ಉಂಡು.ಬೊಂಡ ಪೂ,ಪಣವು ಪೂರ ಪತ್ತೆರೆ ಉಂಡು .ಅಕುಲು ದೈವೊಗು ಕೈಕಾನಿಕೆ ಪತ್ತ್ಂಡ ದೈವ ಅಕ್ಲೆಗ್ ಒಪ್ಪಿಗೆದ ಬೂಲ್ಯ ಕೊರ್ಪುಂಡು.ಕೋರಿ ಕುಂಟದ ಜೋಗದ ಮಾನಿನೌಲು ಕೈ ಕಾನಿಗೆ ಪತ್ತುನಕುಲು  ದುಂಬು ಗಡಿ ಪತ್ತ್ ನಾರೆಗ್ ಬೊಕ್ಕ ಆ ದೈವಸಾನದ ಆಡಲ್ತೆದಕ್ಲೆಗ್ ತೆರಿಪಾದಿಪ್ಪೊಡು. ಎಂಕ್ ಲೆಗ್ ಇಂಚಿ ಎಡ್ಡೆ ಇಚಾರದ ಬಗೆಟ್ ಪನೆರೆ ಬರ್ರೆ ಉಂಡು,ಎಂಕ್ಲೆಗ್ ನಿಕುಲು ದೈವದ ಒಪ್ಪಿಗೆ ದೆಪ್ಪಾದ್ ಕೊರೊಡುಂದು. ಆಂಡ ಕೆಲವು ಕೋಡಿಡ್ ಇಂಚಿನೆಕ್ ಅವಕಾಶನೇ ಇಜ್ಜಿ.೨.ಆನಿರ್ದ್ ಬೊಕ್ಕ ಆ ಗ್ರಾಮೊಡು ನಿಚ್ಚ ಕೋರಿದ ಕಟ್ಟ,ಜನೊಕ್ಲೆನ ಕೂಡು ಕಟ್ಟ್,ನೇಮ ನೆರಿಕ್ ಸಮ್ಮಂದಪಟ್ನ ಕೆಲಸೊಲು ನಡತೊಂದೆ ಬೋಡು.ಅವ್ಲ ಪ್ರದೇಶಾಚಾರವಾದ್ ಎತ್ತೇಸೊ ಉಂಡು.

        ಜಾತ್ರೆಗ್ ದುಂಬು ದೈವ ಸಾನದ ಕೈತಲ್ ಕೋರಿ ಕುಂಟ ಪಾಡ್ವೆರ್ ಅವೆಟ್  ಐನ್ ಕುಟ್ಟಿಲು ಉಪ್ವ .ರಾಜಂದೈವೊಲೆಗ್ ಅರಸು ದೈವೊಲೆಗ್ ಮಾತ್ರ ಕೋರಿ ಕುಂಟ. ಕೋರಿ ಕುಂಟ ಆಯಿ ಬೊಕ್ಕ ಆ ಊರ್ದ ದೈವದ ಗಡುವಾಡಿ ಜಾಗೆ ಮುಟ್ಟ ಕೋರಿ ಕೊಯ್ದ್   ಕಜಿಪು ಮಲ್ಪುಲೆಕ ಇಜ್ಜಿ .ಕೊಯ್ಯೊಡಾoಡಲಾ ಗಡುಕಡತ್ ದ್ ಸುಧೆ ಅಯೆರೆಗ್ ಪೋದು ಕೊಯ್ಯೊಡು .  ಕೋರಿ ಕುಂಟ ಪಾಡಿ ಬೊಕ್ಕ ಕೆಲವು ಕೋಡಿಡ್ ಅಪಗನೆ ಕೋರಿದ ಕಟ್ಟ ಸುರು ಆಪುಂಡು. ಕುಂಟ ಪಾಡಿ ಕೂಡ್ಲೆ  ಕಟ್ಟ ಆಪುನವ್ಲು ಶಾಸ್ತ್ರೊಗಾಂಡಲ ದೈವದ ಮಾನೆಚ್ಚಿದೆದುರು ಕೋರಿ ಕಟ್ಟೊಡು‌.ಕೋರಿ ಕುಂಟಾದ್ ಅಪಗನೆ ಕೋರಿ ಬುಡ್ಂಡ ಅಲ್ಪರ್ದ್ ಬೊಕ್ಕ ದಿನೋಲ ಕೋರಿದ ಕಟ್ಟ ನಡಪೊಲಿ.ಅಂಚಾಂದ್ ಅವ್ಲು ಬಾಲ್ ಕಟ್ಟ್ ದೇ ಸುರು ಕೋರಿ ಕಟ್ಟೊಡುಂದು ಇಜ್ಜಿ.ಬಾಲ್ ಕಟ್ಟಂದೆ ಕೋರಿ ಮುಟ್ಟವೊಲಿ ಪಂಡ ಕಟ್ಟ ಮಲ್ಪೊಲಿ. ಕುಂಟ ಪಾಡಿನಲ್ಪ  ಮಾನೆಚ್ಚಿಡ್ ಕೋರಿ ಕುಂಟೊಗು ದೈವದ  ಅಭಯ ಅದ್ ಕುಂಟ ಪಾಡಿ ಬೊಕ್ಕ ಗಡಿ ಪತ್ತ್ ನಕುಲು,ಚಾಕಿರಿ ಬಾಗದಕುಲು ಮಾತೆರ್ಲ ಕುಂಟೊಗು ಪುಡ್ಯೊನುವೆರ್.ಅಂಚಿನವ್ಲು ಕೋರಿದ ಕಟ್ಟೊಗು ದೈವದ ಅಪ್ಪಣೆ ಉಪ್ಪುಂಡು." ಕಲ ಸೇರೊಂಡರ್,ಎನನ್ ಅಂದ್ ಮಂತೊಂಡರ್,ಕುಂಟ ಪಾಡಾಯರ್,ಕಟ್ಟ ಸುರು ಮಲ್ತರ್,ಆಂಡ ಕುಂಟ ಪಾಡಿ ಬೊಕ್ಕ ಇನಿ ಮುಟ್ಟದ ನೇಮ ನೆರಿ ಬೊಕ್ಕ  ಕಟ್ಟೊನು ಮಲ್ಪವೊಂದು ಗಣೊಕ್ಲೆಗ್ ಬೋಡಿತ್ತ್ ನ ರಕ್ತಾಹಾರೊನು ಕೊರ್ದು ಎಂಕುಲು ಎಂಚ ಸಂಪಾಯನ ಅಂಚನೆ ನಿಕ್ಲೆನ್ ಸಂಪುಡು ದೀಪುನ ಆರ ಬಾರ ಎಂಕ್ಲೆಗ್ ಸಂದ್ ನ  " ಪಂಡ್ ದ್ ದೈವದ ಅಪ್ಪಣೆ ಆಪುಂಡು.ಪ್ರತಿಯೊಂಜಿ ದೈವಾರಾದನೆದ ಸಂದರ್ಬೊಡ್ಲ ಜೋಗದ ನುಡಿ ಬರೋಡೆ. ಅಭಯ ದೈವೊಲು ಕೊರ್ಪುಜೆರ್ಂದಾಂಡ ಜೋಗ ದಾಯೆ?.ಕೋರಿ ಕುಂಟೊಗು ಮಾತ್ರ ಅತ್ತ್ ದೈವದ ಒವ್ವೇ ಕೆಲಸ ಮಲ್ತ್ಂಡ್ ಲ ದೈವದ ನೇಮ ಪಿರಿಯುನ‌ ದುಂಬು ದೈವದ ಅಭಯದ ನುಡಿ ಬರೋಡೆ .ದೈವದ ನಡಾವಳಿಗ್ ಸರಿಯಾಯನ ಅಭಯೊನು ದೈವ ಕೊರೊಡು.ಸತ್ಯದ ನುಡಿ ಎಂಚ ಇತ್ತ್ಂಡ್ ಪಂಡ " ಕಲೊಕು ಬೋಡಾದ್ ಕಟ್ಟ,ಅಂಕೊಗು ಬೋಡಾದ್ ಕಟ್ಟ ' ಪಂಡ್ ದ್.ದುಬು ದೈವದ ಕಲತ ಕಟ್ಟೊಡು ದೂದು ಕಟ್ಟೆರೆ ಬಲ್ಲಿತ್ತ್ಂಡ್.ಇನಿಲಾ ಕೇಪುದ ಉಲ್ಲಾಲ್ದಿನ ಸಾನದ ಕಟ್ಟೊಡು ಈ ಕೆರಮ ಒರಿದ್ ಬೈದ್ಂಡ್.ಒರಿನಂಚ ಜೂಜು ಕಟ್ಟ್ ದೇ ದೈವದ ಕಲತ ಕಟ್ಟ ನಡತೊಂದುಂಡು.ಅವ್ಲೆ ನಮ ತತ್ತ್ ದ್ ನಿ.ಬೊಕ್ಕ ನಮ ಪಂಡಿನೆನ್ ದೈವ ಕೇನುಜಿ ಪನ್ಪ.ದೈವ ಪನ್ನೆನ್ ನಮ ಕೇನಂದೆ ದೈವ ನಮ ಪನ್ನೆನ್ ಕೇನುವಾ?.

   ಕೆಲವು ಕೋಡ್ಡ್ ಕಿರ್ವಾಲ್ ಪೋದು ಒಂಜಿ ದೈವದ ಕೊಡಿ ಏರುನ‌ ಇತ್ತ್ಂಡ ಕೊಡಿ ಏರ್ದ್ ಒಂಜಿ ದೈವೊಗು ಸುರುತ ನೇಮ ಆಯಿಬೊಕ್ಕ ,ಇಜ್ಜಿಂದಾಂಡ ಕಿರ್ವಾಲ್ ಪೋದು ಅವ್ಲು ವಾ ದೈವ ಉಂಡಾ ಅವೆಟ್ ಒಂಜಿ ದೈವೊಗು ಒಂಜಿ  ನೇಮ ಆದ್ ಅಯಿರ್ದ್ ಬೊಕ್ಕ ಕೋರಿ ಕಟ್ಟೆರೆ ಸುರು.ಅಂಚಾದ್ ಅವ್ಲು ರಡ್ಡ್ ಸಂಕಲ್ಪೊಲು ಉಂಡು.ಒಂಜಿ ಕುಂಟದಾನಿಯೆ ಕಟ್ಟ ಸುರಾಂಡ ಅವ್ಲು ಕಿರ್ವಾಲ್ ಪೊಪುನೆಕ್ ಲೆಕ್ಕಾಚಾರ ಇಜ್ಜಿ.ಕಟ್ಟ ನಡತೊಂದೆ ಉಪ್ಪುಂಡು.ಕುಂಟದಾನಿ ಕೋರಿ ಕುಂಟದ ಗಡುವಾದ್ ಉಂತ್ಂಡ ಬೊಕ್ಕ ಕಿರ್ವಾಲ್ ಪೋದು ಕಿರ್ವಾಲ್ ಕೆರ್ತ್ ನೆರ್ದ್ ಬೊಕ್ಕ ಒಂಜಿ ನೇಮ ಆಯಿನೆತ ಮನದಾನಿಡ್ದ್ ಬೊಕ್ಕ ಕಟ್ಟ ಸುರು.ಅಂಚ ಈ ರಡ್ಡ್ ಇಚಾರೊಲು ಕೋರಿಕುಂಟದ ಬಗೆಟುಂಡು

ಕೋರಿ ಕುಂಟದಾನಿಯೆ ಕೋರಿ ಬುಡ್ದು ಕೋರಿದ ಕಟ್ಟ ಸುರಾಂಡ ನೇಮ ಮುಗಿಯುನ ದಿನತಾನಿಮುಟ್ಟ ಕೋರಿ ಕಟ್ಟೊಂದೇ ಜಪ್ಪುವೆರ್.ಅಂಚಾದ್ ಅಂಕದೊಟ್ಟಿಗೆ ಆಯನ ನಡತೊಂದು ಇತ್ತ್ ದ್ "ಅಂಕ-ಅಯನ" ಪನ್ಪಿ ಪುದರ್ ಬೈದ್ಂಡ್.ಅಂಕ ಪಂಡ ಕೋರಿದ ಕಟ್ಟ.ಆಯನ ಪಂಡ ದೈವದ ನೇಮನೆರಿ,ನಡಾವಳಿ.ಅಂಚಾಂದ್ ಒಂಜಿ ನೇಮ ಆದ್ ಕೋರಿದ ಕಟ್ಟ ಆಂಡ ಅವು ಅಂಕ ಆಯನಂದಾಪುಜಿ.ದಾಯೆ ಪಂಡ ಅವ್ಲು ಕೋರಿದ ಕುಂಟ ಮಾತ್ರ ಪಾಡ್ದಿಪ್ಪುವೆರ್.ಕೋರಿ ಕಟ್ಟ್ ದುಪ್ಪುಜೆರ್.ಒಂಜಿ ನೇಮ ಆದ್ ಬೊಕ್ಕ ಕೋರಿ ಕಟ್ಟುವೆರ್.ಅವ್ಲು ಆಯನ ದುಂಬಾಂಡ್,ಅಂಕ ಬೊಕ್ಕ ಆಂಡ್.ತರ್ಕೊಗು ಅವ್ಲು ಕೋರಿದ ಕಟ್ಟ ಆಯಿಜಾ ಕೇಂಡ ಆಂಡ್ ಪನೊಲಿ ಶಾಸ್ತ್ರ ಪ್ರಕಾರ ಕುಂಟ ಪಾಡ್ ನಲ್ತ್  ಕಿರ್ವಾಲ್ ಜತ್ತ್ ಪೋನೇಟ ಕೋರಿದ ಕಟ್ಟ ನಡತ್ಂಡ ಅಯಿಕ್ "ಅಂಕ-ಆಯನ" ಪನ್ಪುನಿ..

ಮರ ಮೂರ್ತ:-

       ಮರ ಮೂರ್ತಲ ದೈವದ ಕಟ್ಲೆಡ್ ತೋಜಿದ್ ಬರ್ಪುಂಡು.ದೈವದ ನೇಮದ ದೊಂಪೊಗು ಕಬೆ ಕಡ್ಪುನಗ ಮೂರ್ತ ತೂಯೆರೆ ಉಂಡು ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್ ಮಲ್ಪುನ ಕಟ್ಲೆ ಉಂದಾದುಂಡು..ನೇಮದ ದೊಂಪೊಗ್ಲ ಆಯ ಉಂಡು.ದೈವದ ಕೊಡಿಯಡಿಕ್ಲ ಆಯ ಉಂಡು,ನೇಮ ನಡಪುನ ದೊಂಪೊಗ್ಲ ಆಯ ಉಂಡು.ಆಯಾ ದೈವೊಗು ಸಂಬಂದಪಟ್ಟ್ ದ್ ನೇಮದ ದೊಂಪ ಈತ್ ಕೋಲು ಉದ್ದ,ಈತ್ ಕೋಲು ಅಗೆಲ,ಈತ್ ಕೋಲು ಎತ್ತರಂದ್ ಉಂಡು.ದೈವದ ದೊಂಪದ ಲೆಕ್ಕಾಚಾರ ಕೋಲು ಲೆಕ್ಕೊಡೆ ಆವೊಡು.ಆಂಡ ಇತ್ತೆ ದೊಂಪ ಬುಡ್ದು ಸಾಮಿಯಾನ ಪಾಡ್ದ್ ನೇಮ ನಡಪಾವುನಡೆ ನಮ ಎತ್ತ್ ದ.ಪಾಳೆಡ್ ದೈವೊಗು ಕೊರ್ಪುನ ಆವಾರೊನು ಸ್ಟೀಲ್ದ ತೋಪುಡು ಕೊರ್ಪುನಡೆ ಎತ್ತ್ ದ.ದೈವದ ದಂಪದ ಕಬೆ ಮುಗುಳಿ ಬರ್ರೆ ಬಲ್ಲಿ,ಸರಿ ಬರೊಡು.ದೈವದ ದೊಂಪೊಗು ನಾಲೇ ಕಬೆ ಬರೊಡು.ದೊಂಪ ಪೊರ್ಲಾವಡ್ಂದ್ ಒಂಜಿ ಕಬೆ ಕೊರ್ಪುನ ಕಟ್ಟೇ ಇಜ್ಜಿ.ದೊಂಪದ ಮರ ಮೂರ್ತ ಮಲ್ಪೆರೆ ಪೋನಗಲ ಅಯಿಕ್ ಸಂಬಂದಪಟ್ಟ್ ನಕುಲು ದೈವ ಸಾನದ ಎದುರು ಪ್ರಾರ್ಥನೆ ಮಲ್ತ್ ದ್ ದೈವದಪ್ಪಣೆ ದೆತೊಂದೆ ದೊಂಪದ ಮರ ಮೂರ್ತೊಗು ಪೋವೊಡು.ದೈವದ ದೊಂಪ 5 ದಿನೊಕಾಂಡಲಾ ದುಂಬು ಪಾಡೊಡು.ಬೊಕ್ಕ ದೊಂಪದಡಿಕ್ ಅಂಬಿ ಅಡಿಪೊಡು.ಬೊಕ್ಕ ದೊಂಪೊಗು ಬೋಡಾಯಿನ ಐತ/ಅಲಂಕಾರ ಪೂರ ಮಲ್ಪೊಡು.ದೈವದ ದೊಂಪೊಗು ಮೊಡೆಯಿನ ಅರು ಕಟ್ಟ್ ನ ನುಂಗೆಲ್ ಮಡಲೇ ಪಾಡೊಡು.ದಾಯೆ ಪಂಡ ಅರು ಕಟ್ಟಂದಿನ ಮೊಡೆಯಿ ಪಜ್ಜಿ ಮಡಲ್ ನ್ ಬೆಲ್ಚಾಡ ಜಾತಿದಕುಲು ಪುಣ ಜೆಪುಡಾಯೆರೆ ಗಲಸುವೆರ್.ದೈವದ ಕಲೊಟು ಅಂಗಣ ಕೆತ್ತುನ ಚಾಕಿರಿನ್ ಅಕುಲು ಮಲ್ಪುವೆರ್.ನಮ್ಮ ಹಿರಿಯಾಕುಲು ಒವ್ವೊವು ಪೂರ ಮಲ್ತ್ ದೆರ,ಒವ್ವೊವು ಬಲ್ಲಿ ಪಂತೆರ ಮಾತೆಕ್ಲ ಬೇತೊಂಜಿ ಉದಾರ್ಮೆ ದೀತೆರ್.ಒವೆನ್ ಅರು ಕಟ್ಟಂದೆ ನರಮಾನ್ಯನ ಪುಣ ಜೆಪುಡಾಯೆರೆ ಗಲಸುವೆರಾ ಅವು ದೈವೊಗು ಆವಂದ್ಂದ್ ತೆರಿಪಾದೆರ್.

ಪಾಲೆ ಮೂರ್ತ:-

     ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್ ಮಲ್ಪುನ ಕಟ್ಲೆ:- ದೈವದ ಮುಗೊಕ್ಲ,ಅಣಿಕ್ಲ ಪಾಳೆನ್ ಗಲಸುವೆರ್.ಇನಿ ಬೊಳ್ಳಿ,ಬಂಗಾರ್ದ ಅಣಿ ಮುಗಂದ್ ಏತ್ ಆಡಂಬರ ಮಲ್ತೆರ್ಡಲ ಪ್ರಕೃತಿಡ್ ತಿಕ್ಕೊಂತಿನ ಸೊತ್ತುಲೆಡೇ ಮೂಲ ದೈವಾರಾದನೆ ನಡತೊಂತ್ ನಿ.ಪಾಲೆದ ಮುಗೊಕು ಬೊಕ್ಕ ಪಾಲೆದ ಅಣಿಕೇ ದೈವಾರಾದನೆಡ್ ಮಾನಾದಿಗೆ ಇತ್ತ್ ನಿ.ಇನಿಲಾ ಆತೆ ಇಲ್ಲದೆಚ್ಚಿದ ಪೊಣ್ಣು ಬೂತೊಲ್ನ ನೇಮೊಡು ಸುರುಕು ಬೊಳ್ಳಿ ಬಂಗಾರ್ದ ತರೆ ಪಟ್ಟ ದೀದ್ ಕೋಲ ನಡತ್ಂಡಲ ಕಡೆಕ್ ತಾರೆದ ತಿರಿತ ಕದಿರೆ ಮುಡಿ ದೀದೇ ಕಡೆಕ್ ಕೋಲ ಪಿರಿಯುನಿ.ನಮ್ಮ ತುಲುವ ಮಣ್ಣ್ ದ ಮೂಲ ದೈವ ಪಂಜುರ್ಲಿಗ್ ತಾರೆದ ತಿರಿತನೆ ಅಣಿ ಪಾಡುನಿ,ಪಾಳೆದ ಮುಗನೇ ದೀಪುನಿ.ಮೂಲೊಡು ಮೊಡೆಯಿನ ಮಡಲ್ದ ಮಿತ್ತೇ ದೈವದ ಬಂಡಾರ ಕೇರ್ತೊಂತ್ ನಿ.ಪಜ್ಜಿ ಮಡಲ್ ಡ್ ,ಮುಳಿತ ಕಡ್ಡಿಡ್ ದೈವ ಸಾನಿದ್ಯ ಇತ್ತ್ಂಡ್.ನೇಮ ನಡಪುನ ಮೂಜಿ ದಿನ ದುಂಬು ಪಾಲೆ ಮೂರ್ತ. ನಡಪುಂಡು. ದಾಯೆ ಪಂಡ ಪಾಲೆನ್ ಬೊದ್ ಲ್ಪೊಡು,ಮೊಡೆಯೊಡು ಅಂಚ ಆ ಬೇಲೆಗ್ ರಡ್ಡ್ ಮೂಜಿದಿನ ಬೋಡು.ಅಂಚಾದ್ 3 ದಿನ ದುಂಬು ಪಾಲೆ ಮೂರ್ತ ಮಲ್ಪುವೆರ್.ಆಂಡ ದೈವ ಚಾಕಿರಿಗ್ ಗಲಸುನ ತಾರೆದ ತಿರಿ ದೆಪ್ಪುನೆಕ್ ಇಂಚಿನ ಕಟ್ಟ್ ದಾಲ ಇಜ್ಜಿ.ಪೊರ್ತುಗು ಆ ಸೊತ್ತು ಎತ್ತ್ಂಡ ಆಂಡ್ ಆತೆ.

೫.ಸುದ್ದ ಮುದ್ರಿಕೆ ಓಮ,ಸುದ್ದ ಮುದ್ರಿಕೆ:-

   ನೇಮದಾನಿ ಕಾಂಡೆ ಸುದ್ದ ಮುದ್ರಿಕೆ ಓಮ ನಡಪುಂಡು.ಇತ್ತೆ ವೈದಿಕೆರ್ಡ ಗಣ ಓಮ ದೀಪಾವೆರ್.ಉಂದು ತಪ್ಪು.ನಿಜವಾದ್ ಮಡ್ಯೆಲೆರ್ ಪೆಲತ ಕಣಕ್,ಪೊರಿ,ಬೊಂಡ,ಪೆತ್ತದ ನೈ ಗಲಸ್ ದ್ ಸುದ್ದ ಮುದ್ರಿಕೆ ಓಮ ದೀಪೆರ್.ಕೊಡಿಯಡಿಟ್,ನೇಮ ಆಪುನ ಜಾಗೆಡೇ ಮೊಕುಲು ಸುದ್ದ ಮುದ್ರಿಕೆ ಓಮ ದೀಪುನಿ.ಸುದ್ದ ಮುದ್ರಿಕೆ ಓಮೊನು ಮಡಿವಾಳ ಜನಾಂಗದಕ್ ಲೆ ಮಲ್ಪೊಡು.ಇನಿ ನಮಕ್ ಅನುಕೂಲ ಆಂಡ್ಂದ್ ನಮ ದೈವದ ಕಲೊಕು ಏರೆನೋ ಕನತ್ ದ್ ದಾದನೋ ಮಲ್ತ್ಂಡ ದೈವ ಬೊಕ್ಕ ನಮಕ್ ಅನುಗ್ರಹ ಮಲ್ತ್ ಜಿ ಪಂಡ ತತ್ತ್ ನೆ ಅವ್ಲು ನಮನೆ.ದೈವ ಅತ್ತ್.ಮಡ್ಯೆಲೆರೆ ಮಡಿರ್ದ್ ಮಲ್ಲ ಸುದ್ದ ದೈವದ ಕಲೊಟು ನನೊಂಜಿಜ್ಜಿ.ಮಡಿತ ಅದಿಕಾರ ಅಕ್ಲೆಗೇ ಉಪ್ಪುನಿ.ಸುದ್ದ ಓಮೊನು ದೈವದ ಕಲೊಟು ಮಡಿವಾಳೆರೆನ್ ಬುಡ್ದು ಬೇತೆ ಏರೆಗ್ಲ ಮಲ್ಪುನ ಅದಿಕಾರ ಇಜ್ಜಿ.ಇನಿ ನಮ ಅಡೆ ವೈದಿಕೆರೆನ್ ಕನತ್ ದ್ ಅಕುಲು ಮುಗಲ ಪತ್ತುವೆರ್,ಕಿರ್ ವಾಲ್ ಲ ಪತ್ತುವೆರ್,ದೈವ ಇನಿ ಅಕ್ಲೆನ್ ಕೊಡಿಯಡಿಟ್ ತಂತಿರ್ದಾರೇ,ನೂಲು ಪಾಲ್ ಸಂಸಾರಂದ್ ಲ ಲೆಪ್ಪುಂಡು.ಆಂಡ ದೈವದ ಕಲೊಟು ನೂಲ್ ಪಾಲ್ ಸಂಸಾರ ಪಂಡ ಆಚಾರಿನಕುಲು.ನೂಲು ಪಾಲ್ ಸಂಸಾರದ ದೈವದ ಪುರಪು ಉಪ್ಪುನಿ ಆಚಾರಿಲೆಗ್ ಮಾತ್ರ.ದೈವದ ಸೊತ್ತುಲೆನ್ ಮಾತ ಮಲ್ಪುನಿ ಅಕುಲೆ.ಅಂಚಾದ್ ದೈವ ಅಕುಲೆನೆ ಲೆಪ್ಪುನಿ.ಇನಿ ಆಚಾರಿನಕುಲು ಮೂಲೆ ಸೇರ್ದ್ ಅಡೆ ಪೊಸತಾದ್ ಬತ್ತ್ ನಕುಲು ,ದೈವ ನೂಲ್ ಪಾಲ್ ಸಂಸಾರಂದ್ ಲೆಪ್ಪುನಗ "ಚಿತ್ತ "ಪನ್ಪೆರ್.ನೂಲ್ ಪಾಲ್ ಸಂಸಾರ ಪೋದು ನೂಲು ಪಾಡಿ ಸಂಸಾರ ಆಂಡ್.ಸುದ್ದ ಮುದ್ರಿಕೆ ಓಮ ಸಾಮಾನ್ಯ ಸೂರ್ಯೆ ಉದಿತ್ ನೆಡ್ದ್ ಬೊಕ್ಕನೆ ನಡಪುನಿ.ಆ ಮಣ್ಣ್ ಡ್ ದಾದಾಂಡಲ ಅಶುದ್ದಿ, ದೋಷ ಬಾದೆಲಿತ್ತ್ಂಡ ಅವೆನ್ ದೆತ್ತ್ ದ್ ಸುದ್ದ ಮಲ್ಪುನೆಕ್ ಸುದ್ದ ಮುದ್ರಿಕೆ ಓಮ ದೀಪುನಿ.ಅವು ಗಣ ಓಮಂದತ್ತ್.ಅವು ಸುದ್ದ ಮುದ್ರಿಕೆದ ಓಮನೆ.ಮುದ್ರಿಕೆ ಪಂಡ ಮೂಲು ಒಂಜಿ ಸಂಕೇತಂದ್ ಪನೊಲಿ.

೬.ಬಂಡಾರ ಜಪ್ಪುನಿ:-

      ಬಂಡಾರ ಜಪ್ಪುನಗ ಅಡೆಗ್ ಸಮ್ಮಂದ ಪಟ್ನ ಪೂರ ಪರಿವಾರ ಉಪ್ಪೊಡು.ಕೊಂಬು ವಾದ್ಯೊಡೇ ದೈವದ ಬಂಡಾರ ಜಪ್ಪೊಡು.ಆಂಡ ಇತ್ತೆ ಕೆಲವು ಕೋಡಿಡ್ ಬಂಡಾರ ಜಪ್ಪುನ ಕಟ್ಟ್ ಮಲ್ಪುಜೆರ್.ಲೆಕ್ಕ ಪ್ರಕಾರ ಬಂಡಾರ ಜಪ್ಪೊಡು.ಅವೆರ್ದ್ ಬೊಕ್ಕ ಬಂಡಾರ ಕೇರ್ಪೊಡು.ಸಾನೊರ್ದು ಬಂಡಾರ ಜಪ್ಪುನ ದುಂಬು ತಂಬಿಲಾವೊಡು,ದೂಪಾವೊಡು,ಅವೆಕ್ ಸಂಬಂದಪಟ್ನ ಪರ್ವಾದಿಲೆನ್ ಬಲಸೊಡು.ಬಲಸಿನೆಡ್ದ್ ಬೊಕ್ಕ ಅವ್ಲು ಕೈ ಮುಗಿದ್ ಕೇಂಡೊನೊಡು,"ನಿಕ್ಲೆ ನೇಮ ನೆರಿಕ್ ಎಂಕುಲು ಬಂಡಾರ ಜಪುಡಾವೊಂದುಲ್ಲ.ನಿಕುಲು ಮಾಯೆಲು ಮಣೆ ಮಂಚಾವುನು ಬುಡ್ದು ಕೊರ್ದು ಎಂಕುಲು ಜಪುಡಾಯಿ ಬಂಡಾರದೊಟ್ಟಿಗೆ ನಿಕ್ಲೆ ಕಲೆ ಕಾರ್ನಿಕೊನು ನೆಗತ್ ಬರ್ಪುಲೆಕ ಅನು ಮಲ್ತ್ ಕೊರೊಡು" ಪಂಡ್ ದ್ ಮದಿತ್ ದ್ ಬೊಕ್ಕ ಬಂಡಾರ ಜಪ್ಪೊಡು.ಅಡೆಮುಟ್ಟ ಮಾಯೆದೊರುತ ದೈವೊಲು ಮಣೆ ಮಂಚೊಡೆ ಉಪ್ಪುನಿ.ಮಣೆ ಮಂಚೊನು ಬುಡ್ದು ಕೊರ್ಲೆಂದ್ ನಮ ಕೇಂಡೊನೊಡು.

೭.ಬಂಡಾರ ಏರ್ಸಾವುನಿ/ಬಂಡಾರ ಕೇರ್ಪುನಿ:-

         ಬಂಡಾರ ಕೇರ್ತಿ ಬೊಕ್ಕನೆ ನೇಮ ನೆರಿ ಪೂರ ನಡಪುನಿ.ಬಂಡಾರ ಜಪ್ಪುನಗ ಸಾನದುಲಯಿ ದಾದ ಪೂರ ನಡತ್ಂಡ ಯಥಾ ಪ್ರಕಾರ ಬಂಡಾರ ಕೇರ್ತಿ ಕೊಡಿಯಡಿಟ್ಲಾ ಆವೊಡು.ಅವ್ಲು ತಂಬಿಲಾದಿಯಾದ್ ಜಪುಡಾಂಡ್,ಮೂಲು ತಂಬಿಲ ದೂಪದಿಯಾದ್ ಬಂಡಾರ ಏರಾವೊಡು.

೮.ಬಂಡಾರ ಏರಿ ಬೊಕ್ಕದ ಸುದ್ದ ಓಮ,ಜೋಗ,ಕೊಡಿಯಡಿ ಕಟ್ಟುನಿ-ಮಡ್ಯೆಲೆರೇ ದೀಪುನ ಸುದ್ದ ಓಮ..ಕೊಡಿಯಡಿ ಕಟ್ಟುನ್ಲಾ ಮಡಿವಾಳ ಜನಾಂಗದಕುಲೆ.ಸುದ್ದ ಮುದ್ರಿಕೆ ಓಮ ಆದ್ ,ತಂಬಿಲ ಪಾಡ್ದ್,ಜೋಗದಪ್ಪಣೆಯಾದ್ ಜೋಗ ಪಿರಿ ಬೊಕ್ಕ ಕೊಡಿಯಡಿ ಕಟ್ಟುನಿ.ತಾರಾಯಿ,ಬಜ್ಜೆಯಿ,ಕುಕ್ಕುದ ಇರೆ,ಪೆಲತ ಇರೆಟ್ ಕೊಡಿಯಡಿ ಕಟ್ಟುನಿ.ಇನಿ ಪೂರ ಕೊಡಿಯಡಿ ಕಟ್ಟ್ ನಗ ತಾರೆದ ತಿರಿ,ಬಚ್ಚಿರೆ ಪೂರ ಕಟ್ಟೊಂದುಲ್ಲೆರ್,ಉಂದು ತಪ್ಪು.ಕೊಡಿಯಡಿ ಪಾಡುನೆಟ್ಲ ಪ್ರಾದೇಶಿಕವಾದ್ 2 ಎತ್ತೇಸೊಲುಂಡು.

1.ಕೊಡಿಯಡಿ ಪಾಡಿ ಬೊಕ್ಕ ಬಂಡಾರ ತರ್ಪವುನಿ.ಈ ಪ್ರಕಾರ ದೈವೊನು ಅಂದ್ ಮಲ್ಪಂದೆ ಏರೆಗ್ ಕೊಡಿಯಡಿ ಪಾಡುನಿ/ಕಟ್ಟುನಿಂದ್ ಅರ್ಥ ಆಪುಜಿ(ಇಲ್ಲಲ್ ಒಣಸ್ ಗ್ ಏರ್ಲ ಕುಲ್ಲಂದೆ ಬಲಸ್ ದೀಲೆಕಾಪುಂಡು)

2.ಬಂಡಾರ ಕೊಡಿಯಡಿಟ್ ಕೇರ್ತ್ ದ್ ದೈವೊನು ಜೋಗೊಡು ಅಂದ್ ಮಲ್ತ್ ದ್ ಜೋಗ ಪಿರಿ ಬೊಕ್ಕ ಕೊಡಿಯಡಿ ಪಾಡುನಿ.ರಡ್ಡನೆ ಕೆರಮ ಉಂದು ಪೂರಹಿರಿಯಾಕ್ಲೆ ಕಟ್ಟಾದುಂಡು.

          ಬಂಡಾರ ಒಂಜಿ ಊರುರ್ದು ಕುಡೊಂಜಿ ಊರುಗು ಪೋಪುನ ಕಟ್ಟ್ ಲಾ ಉಂಡು.ಕೆಲವು ತಿಕ್ ಡ್ ಬಂಡಾರ/ಕಿರ್ವಾಲ್ ಬತ್ತ್ ದ್ ಕೊಡಿಯಡಿಟ್ ಸಿಂಗದನೊಟು ಬಂಡಾರ ಏರಾದ್ ನೇಮ ನಡಪುನಲಾ ಉಂಡು.ಮೈಲ್ಕಟ್ಲೆ ಬಂಡಾರ ಪೋಪುನಲಾ ಉಂಡು.ಅವ್ಲು ದೈವ ದರಿ ಕೈಕೊಂದು ಪೋಪುಂಡು.ಮೂಲು ಕಿರ್ವಾಲ್ ಪೋಪುನ ಸಾದಿ ದೂರಾದಿಪ್ಪು.ಆಂಡ ಬಂಡಾರ ಜಪ್ಪುನ,ಏರುನ ಕ್ರಮ ಪೂರಾ ಅಂಚನೆ ಉಂಡು.ಅಂಚ ಬಂಡಾರ ಪೋನಗ ಬಸವೆ ಬೋಡು,ಬಿರ್ದಾಳಿ ಬೋಡು,ಗಡಿ ಪತ್ತ್ ನಕುಲು ಮಾನ್ಯಾದಿಗೆದಕುಲು ಬೋಡು.ಸಾನದ ಆಡಳ್ತೆದಕುಲು ಬೋಡು ,ದೈವದ ಬಂಡಾರದ ಪ್ರತಿ ಸೊತ್ತುಲಾ ಬೋಡು,ದೈವದ ಕರ್ವಾಲ್ ನ್ ಪಲ್ಲೆಂಕಿಡ್ ತುಂಬೊಂದು ಪೋಪುನ ಕಟ್ಟ್..ದೈವೊಗು ಮಸ್ತ್ ಬೊಳ್ಳಿ ಬಂಗಾರಾದ್ ಅವೆನ್ ಕೊನೊಯೆರೆ ಪಲ್ಲೆಂಕಿ ಬತ್ತ್ಂಡ್.ದುಂಬು ದೈವದ ಕಿರ್ವಾಲ್ ನ್ ಕೈಟ್. ಪತೊಂದೇ ಪೋವೊಂತ್ ನಿ.(ದುಂಬು ಪೂರ ಅನುಕೂಲದಕುಲು ಮದಿಮಯನಾ,ಮದಿಮಾಲೆನಾ ನಾಲ್ ಕಾರ್ದ ಕುರ್ಸಿದಂಚಿ ಮಂಚಿ ಲ್ಡ್. ಬೋವಿ ಜನಾಂಗದಕುಲು ತುಂಬೊಂದು ಪೋವೊಂತೆರ್ ಗೆ.ಬೊಕ್ಕ ಬೊಕ್ಕ ಬೇತೆ ಜಾತಿದಕುಲ್ಲಾ ತುಂಬೆರೆ ಸುರು ಮಲ್ತೆರ್)

೯.ಸುತ್ತೆ ದೀದ್ ,ಪನಿವಾರ ಬಲಸ್ ದ್, ದೂಪ-ದೀಪಾದ್ ತಂಬಿಲ:-

ದೈವದ ಕಲೊಟು ಬೆಮ್ಮೆರೆಗೇ ಉರ್ಪೆಲರಿ,ಮುಗಟೆ ದಾಂತಿ ತಾರಾಯಿಡ್ ಸುತ್ತೆ ದೀಪುನ ಕೆರಮ.ನೇಮದೌಲು ಗಣಪತಿ ಸುತ್ತೆ ದೀಪುನ ಕೆರಮ ಇಜ್ಜಿ.ಅಂಚನೆ ಸುತ್ತೆದ ತಾರಾಯಿದ ಕಣ್ಣ್ ಗ್ ಕೊಡತ್ ದೇ ದೀವೊಡು.ದೈವೊಗು ನೇಮೊಡು ಕೊರ್ಪುನ ಬೊಂಡೊನು ಪಿರಾವುಡೇ ಕೆತ್ತ್ ದ್ ಒಟ್ಟೆ ಮಲ್ತ್ ಕೊರೊಡು,ಬೆಮ್ಮೆರೆ ಸುತ್ತೆಡ್ ಬಚ್ಚಿರೆ ಬಜ್ಜೆಯಿ ಉಪ್ಪೊಡು.ತಾರಾಯಿದ ಕಣ್ಣ್ ನ್ ಚೂರು ಕೊಡಪೊಡು,ಒಟ್ಟೆ ಮಲ್ಪುನತ್ತ್.ಕಣ್ಣ್ ಗ್ ಕೊಡಪುನಿ ಪಂಡ ದೃಷ್ಟಿ ದೆಪ್ಪುನಿಂದ್ ಅರ್ಥ.ಹಿರಿಯಾಕ್ಲೆ ಸೂತ್ರ ಪ್ರಕಾರ ಕಣ್ಣ್ ಕೊಡತ್ ದ್ ದೀಂಡ್ ಪಂಡ ಇಂಚಿನ ದೈವದ ದೃಷ್ಟಿ ದೆತ್ತ್ ದ್ ಬೆಮ್ಮೆರೆಗ್ ಸುತ್ತೆ ದೀಂಡ್ಂದ್ ಲೆಕ್ಕ.ಅವೆನ್ ಬೊಕೊಂಜಿ ಬತ್ತ್ ದ್ ಮುಟ್ಟುಲೆಕ ಇಜ್ಜಿ.

ದೈವದ ಆವಾರ,ಪನಿವಾರ:-

      ದೈವದ ಪನಿವಾರೊಡು ಪೊರಿ ,ಬಜಿಲ್ ,ಪಂರ್ದ್, ಬೆಲ್ಲ, ತಾರಾಯದ ಪೂ ಪಾಡ್ವೆರ್.ರಾಜಂದೈವೊಗು ಹೆಚ್ಚಾದ್ 5 ಇರೆತ ಪನಿವಾರಪಾಡುವೆರ್.ಅಂಚಾಂದ್ 3 ಇರೆಟ್ ಪನಿವಾರ ಪಾಡೆರೆ ಬಲ್ಲಿ.ಮೂಜಿ ಇರೆಟ್ ಬಲಸುನಿ ಕರಿದ್ ಪೋಯಿನಕ್ ಲೆಗ್/ಅಪರ ಕರ್ಮೊಗು.ದೈವದ ಪನಿವಾರೊಗು 5 ಇರೆನೇ ಪ್ರದಾನ.ಇನಿ ಕೆಲವೊಂಜಿ ಇಲ್ಲಗ್ ಪನಿವಾರ ಕೊರೊಡುಂದು ಜಾಸ್ತಿ ಇರೆತ ಪನಿವಾರ ಪಾಡುವೆರ್.ಅವು ಸರಿಯತ್ತ್.15 ಇಲ್ಲ್ ಲೆಪ್ಪುದಕ್ಲಿತ್ತ್ಂಡ 15 ಇರೆತ ಪನಿವಾರ ಪಾಡುವೆರ್.ಉಂದು ಸರಿಯತ್ತ್.ಪಂಚ ಬೂತೊಗು ಸಾಕ್ಷಿಯಾದ್ 5 ಕೊಇ ಇರೆತ ಪನಿವಾರ ಪಾಡುವೆರ್. ಮೊಕ್ಲು 5 ಇರೆಟ್ 50 ಇರೆಕ್ ಬೋಡಾಯಿನಾತ್ ಬಲಸಡ್,ಅವೆನ್ ಮಾತೆರೆಗ್ ಪಟ್ಟಡ್,ಆಂಡ ದೈವದ ಕಲೊಟು ಐನೆನ್ ಮೀರುನ (5 ಇರೆತ ಪನಿವಾರ) ಅಧಿಕಾರ ಏರೆಗ್ಲ  ಇಜ್ಜಿ.

೧೦.ಪಡಿಯರಿ ಪತ್ತುನಿ

೧೧.ಎಣ್ಣೆ ವೀಳ್ಯ/ಬೂಲ್ಯ

೧೨.ಬೀರ ಲೆಪ್ಪುನಿ-ತೆಂಬರೆ ಬೊಟ್ಟೊಂದು-ವಸಯ

೧೩.ಗಗ್ಗರದೆಚ್ಚಿ

೧೪.ನೇಮದೆಚ್ಚಿ-ಬಲಿ ಸುತ್ತುಲು

೧೫.ಆವಾರ,ನುಡಿ,ಪೇರ್ ಪರ್ಪುನಿ -ಕೆಲವು ತಿಕ್ ಡ್ ದುಂಬು ಆವಾರಾದ್ ಬೊಕ್ಕ ನುಡಿಯಾಂಡ,ಕೆಲವು ಕೋಡಿಡ್ ಸುರುಕು ನುಡಿಯಾದ್ ಬೊಕ್ಕ ಆವಾರ

೧೬.ಬೂಲ್ಯ-ಸೂತ್ರ ಬೂಲ್ಯ,ನೇಮೊರ್ದು ಇಡೆ ಬುಡ್ಪುನಿ,ದೂಪಾದ್,ಸುದ್ದ ಮುದ್ರಿಕೆಯಾದ್,ಬಂಡಾರ ಯಥಾ ಸ್ಥಾನೊಗು ಪೋದು,ಅವ್ಲು ಬಂಡಾರ ಏರ್ಸಾದ್,ಕುಡ ಸುದ್ದ ಮುದ್ರಿಕೆಯಾದ್ ತಂಬಿಲ .

          

                ‌‌‌ ‌              ಮಗ್ರಂದಾಯ ದೈವ

ಗ್ರಾಮ ದೈವೊಲ್ನ ಕಾಲಾದಿ 16 ಕಟ್ಲೆದ ಪೊರ್ಲೇ ಬೇತೆ.ವರ್ಸೊಗು 12ಸಂಕ್ರಾಂತಿಲು,1ಚೌತಿದ ಪಾಡ್ಯ,1ಪರ್ಬೊದ ಬಿನ್ನದೊನ್ಯ,1ದೊಂಪದ ಬಲಿ,1 ಸಾನದ ನೇಮ ಇಂಚ ಒಟ್ಟು 16 ಕಟ್ಲೆಲು ದೈವಾರಾದನೆದ ಕಾಲಾದಿಡ್ ನಡಪುವ.

ಬದಿಕರ ಬೂಲ್ಯ_ಬದಿಕರ ಪತ್ತ್ ನಾರ್ನೊಟ್ಟುಗು ದೈವ ಬಲಿಕ್ ಮೂಜಿ ಸರ್ತಿ ಸುತ್ತು ಬತ್ತ್ ದ್ ಬೂಲ್ಯ ಕೊರ್ಪುಂಡು.ಬದಿಕರ ಮಣ್ಣ್ ದವಾದಿತ್ತ್ ದ್ ಅವೆತ ಉಲಯಿ ಬೂಲ್ಯದ ಕಟ್ಟ್,ಕೇಪುಲ ಪೂ(ಇತ್ತೆ ಪಿಂಗಾರ ಪಾಡ್ವೆರ್)ಬಚ್ಚಿರೆ,ಬಜ್ಜೆಯಿ ಬೊಕ್ಕ ಆ ದೈವೊಗು ಸಮ್ಮಂದಪಟ್ನ ಒಂಜಿ ಸೊತ್ತುನು ದೀದುಪ್ಪುವೆರ್.ಬಾರೆದಿರೆಟ್ ಬದಿಕರತ ಬಾಯಿ ಕಟ್ಟ್ ದಿಪ್ಪುವೆರ್.

ಬೂಲ್ಯಡ್ ಬೇತೆ ಬೇತೆ ಬೂಲ್ಯೊಲಿಪ್ಪುವ.

೧.ಕಟ್ಟ್ ದ ಬೂಲ್ಯ-ಯಜಮಾನಿ,ಯಜಮಾನಿ ಸಂಸಾರೊಗು.

೨.ಗಡಿತ ಬೂಲ್ಯ-ಗಡಿ ಪತ್ತ್ ನಕ್ಲೆಗ್,ಮಾನಿನಕ್ಲೆಗ್

೩.ಲೆಪ್ಪುದ ಬೂಲ್ಯ-ಗುತ್ತು ಬರ್ಕೆಗ್.ಚಾಕಿರಿ ವರ್ಗೊಗು

೪.ರಾಸಿದ ಬೂಲ್ಯ-ಸಭೆ ಸರ್ವೆರೆಗ್

 ಬೂಲ್ಯ ಕೊಡಿ ಇರೆಟ್ ಕೊರ್ಂಡ ಅವ್ವೊಂಜಿ ಗೌರವ ಆತೆ.

ವಾ ಬೂಲ್ಯೊಗು ದೈವ ಆಯುಧ ಮುಟ್ಟದ್ ಕೊರ್ಪುಮಡಾ ಅವೆರ್ದ್ ಮಲ್ಲ ಗೌರವ ನನೊಂಜಿಜ್ಜಿ.

ದೈವದ ಪದಿನಾಜಿ ಕಟ್ಟ್ ಕಟ್ಲೆಲು :ಸರ್ವೇ ಸಾಮಾನ್ಯ ಉಪ್ಪುನವು.

೧. ಕುಕ್ಕೆಲ್ ಪಾಳೆ ದೆಪ್ಪುನಿ [ ನೆಲಟ್  ದೀನ ಪಾಳೆಡ್ ಪೊತ್ತದ್ ದೀನ ನಿನೆನ್ ತೆಕ್ಕಾದ್ ಅನಿಷ್ಟ ಕಳೆವುನಿ ]:

ಕುಕ್ಕೆಲ್ ಪಾಳೆ ದೆಪ್ಪುನೆಟ್ ಉಪಯೋಗ ಮಲ್ಪುನಿ ಬಾರೆದ ಬಂಬೆ  ಬೊಕ್ಕ ತಾರೆದ ಲತ್ತ್  ತಿರಿ . ಐತ ನಡುತು ಚಂಡಿ ಮಂತ್ ನ ನಿನೆನ್ ಪೊತ್ತಾದ್ ದೀಪೆರ್ .ಅಂಚನೆ ಬಚ್ಹಿರೆ ಬಜ್ಜೆಯಿ ನಡುಟು ದೀದುಪ್ವೆರ್ ಐನ್ ಬೂತ ಕಟ್ಟುನ ಪಾತ್ರಿ ಇಜ್ಜಿಂಡ  ಆಯನ ಕಡೆತ ಒರಿ [ ವಸಮುಕ್ಕಾಲೆ ] ಬಚ್ಚಿರೆ ಬಜ್ಜೆಯಿ ಸಮೇತ ದೆತೊಂದು ನಿನೆನ್ ಬಾಯಿಡ್  ಉರ್ತುದು ತೆಕ್ಕಾವೆರ್ .ಉಂದು ರಾಜನ್ದೈವ ನೇಮೊಡು ತೂವೆರೆ ತಿಕ್ಕುಂಡು . 

೨. ಪಡಿಯರಿ,ಎಣ್ಣೆ ಬೂಲ್ಯ ಪತ್ತುನಿ:

        ಪಡಿಯರಿ: ಉಂಡೆತ್ ಒಂಜಿ ಸೇರ್ ಉರ್ಪೆಲರಿ ,ಒಂಜಿ ತಾರಾಯಿ,ಒಂಜಿ ಬಜ್ಜೆಯಿ ,ಐನ್ ಬಚ್ಚಿರೆನ್ ತಡ್ಪೆದ ಮಿತ್ತ್  ದೀದುಪ್ವೆರ್ . 

   ಇಲ್ಲದ ನೇಮ ಮಲ್ಪವುನ ಯಜಮಾನಿ ದೈವ ಪಾತ್ರಿನ ಕೈತಡೆ ಬತ್ತ್ ದ್ ಗುಂಡದ ಯೆದುರುನ್ತುದು ಪಡಿಯರಿ ಕೊರ್ಪೆಂದ್ ೩ ಸರ್ತಿ ಪನ್ಪೆ . ದೈವ ಪಾತ್ರಿ ಇಲ್ಲದ ಯಜಮಾನಿ ಕೊರ್ನ ಪಡಿಯರಿನ್ ದೆತೊನುನೆಕ್ ದುಂಬು "ಕೂಡಿ ರಾಜ್ಯ ಸಭೆ ಸರ್ವೆರ್ಲಾ ಅಂದ್ ಪಡಿಯರಿ ಪತ್ವೆ"ನ್ದ್ ೩ ಸರ್ತಿ ಸೇರ್ನ ಸಭೆಕ್ ಕೈ ಮುಗಿದ್ ಪಂಡೋಂದು ಪಡಿಯರಿ ಪತ್ವೆ

                      ದೈವ ಪಾತ್ರಿಗ್ ಯಜಮಾನಿ ಎಣ್ಣೆ ಬೂಲ್ಯ ಕೊರ್ನಗ ಎಣ್ಣೆ ಬೂಲ್ಯ ಕೊರ್ಪೆಂದ್ ೩ ಸರ್ತಿ ಪನ್ಪೆ .  ಪಾತ್ರಿ ಎಣ್ಣೆ ದೆತೊನ್ನಗಲ "ಕೂಡಿ ರಾಜ್ಯ ಸಭೆ ಸರ್ವೆರ್ಲಾ ಆಂದ್ ಎಣ್ಣೆ ಬೂಲ್ಯ ದೆತೊನ್ಬೆ"ನ್ದ್ ೩ ಸರ್ತಿ ಪಂಡ್ ದ್ ಎಣ್ಣೆ ಬೂಲ್ಯ ದೆತೊನ್ಬೆ . ಮೂಳು ಬೂಲ್ಯೊಡು ೧ ಬಜ್ಜೆಯಿ ೫ ಬಚಿರೆ ಉಪ್ಪುಂಡು. ಬಚ್ಚಿರೆದ ಕೊಡಿ ಕಿನ್ ಕ್ ದ್  ಕಿನ್ಕಿ ಕೊದೀನ್ ನೆಲಕ್ ಪಾಡ್ನ ದೈವ ಪಾತ್ರಿ ಎಣ್ಣೆ ನ್  ಕಾರ್ ರ್ದ್ ತರೆ ಮುಟ್ಟ ಪೂಜಿದ್ ಮೀಯೇರೆ ಪೋಪೆ .

೩. ಅರ್ದಲ ಪಾಡುನಿ:                                     

ಮೋನೆಗ್ ಅರ್ದಲ[ಮಂಜಲ್ ಬಣ್ಣ ] ಪೂಜಿನ ಪಂಬದ ಜಾತಿದ  ದೈವ ಪಾತ್ರಿ  . ಮಂಜಲ್ ಬಣ್ಣ ನಲಿಕೆದಕ್ಲ್ ಲಾ ಪಾಡ್ವೆರ್ . ಅಂಡ  ಅವು ಒಂತೆ ಕದಕ್ಕ್ ಜಾಸ್ತಿ ಉಪ್ಪುಂಡು .

            ನಲಿಕೆದಕ್ಲೆನ ಮೋನೆ  ವರ್ಣಿಕೆಡ್ ಮಂಜಲ್ ಬಣ್ಣ ಜಾಸ್ತಿ ಉಪ್ಪುಂಡು. ಪಂಬದೆರ್ನೆಟ್ ಒಂತೆ ಕೆಂಪು ಮಿಶ್ರಿತ ಮಂಜಲ್ದ ಅರ್ದಲ ಉಪ್ಪುಂಡು .   

    ದೈವ ಪಾತ್ರಿ ಮೋನೆಗ್ ಅರ್ದಲ ಪಾಡ್ದ್ ಕುಲ್ದ್ ನಿ . ಮಂಜಲ್ ,ಕಪ್ಪು,ಕೆಂಪು ,ಬೊಲ್ದು  ಬಣ್ಣ ಉಪಯೋಗ ಮಲ್ಪುವೆರ್ . ಮಂಜಲ್ ಕೆಲವು ದೈವೊಲ್ದ ಮೊನೆಗ್ ಇಡೀ ಪೂಜಿಂಡ ಕೆಲವು ದೈವೊಲೆಗ್ ಕಪ್ಪು ಇದೇ ಮೋನೆಗ್ ಪೋಜಿಬೆರ್. ಇತ್ತೆ ಗುಲಾಬಿ ,ಬೋಲ್ಡು ಮಿಶ್ರಿತ ಕೆಂಪು ಬಣ್ಣಲಾ ಕೆಲವು ಪಾತ್ರಿಲು ಪೂಜಿಬೆರ್                                          .

೪. ದಂಡೆ ಕಾಜಿ ತರೆ ಪಟ್ಟ ದೀಪುನಿ:

      ದೈವ ಪಾತ್ರಿನ ಕೈಕ್ ದೀಪುನ ದಂಡೆ ಕಾಜಿ . ಕೆಲವು ಬೊಳ್ಳಿದ ಕಾಜಿ ಉಪ್ಪುಂಡು

 ೫. ಗಗ್ಗರದೆಚ್ಚಿ -ಕಾರ್ ಗ್ ಗಗ್ಗರ ದೀಪುನಿ :

     ಗಗ್ಗರೊಡು ಸಾದಾ ಗಗ್ಗರ ಬೊಕ್ಕ ಕೋಲು ಗಗ್ಗರಂದ್ ರಡ್ಡ್ ನಮುನೆ ಉಪ್ಪುಂಡು .ಕೋಲು ಗಗ್ಗರ -ಮಲಯಾಳಿ ದೈವ ಪಾತ್ರಿಲು ಉಪಯೋಗ ಮಲ್ಪುವೆರ್

           ಕೋಲು ಗಗ್ಗರ .ಉಂದೆನ್ ದೈವ ಪಾತ್ರಿಲು ಉಪಯೋಗ ಮಲ್ಪುಜೆರ್ . ಆಂಡ ದೇವೆರೆ ದರ್ಶನ ಬಲಿತಪಗ ಬೆದ್ರ್ ದ ಓಂಟೆಗ್ ತುರಿದ್ ಗಿಜಿಕ್ ಗಿಜಿಕ್ ಶಬ್ದ ಮಲ್ಪುವೆರ್ .

೬ ಅಣಿ ಕಟ್ಟುನಿ,ಸಿರಿಮುಡಿ ಏರುನಿ

   ಪರವೆರ್ನ ದಯ್ಯೊಂಗುಲ್ನ ಸಿರಿಮುಡಿ ಗಾತ್ರೊಡು ಒಂತೆ ಕುದ್ಯ  ಉಪ್ಪುಂಡು

       ಪಂಬದೆರ್ನ ದೈವದ ಸಿರಿಮುಡಿ ಎತ್ತರ ಇತ್ತ್ ದ್ ತೂಯೆರೆ ಬಾರೀ ಪೊರ್ಲಿಪ್ಪುಂಡು. ಉಂದೆಟ್ ಗುಬ್ಬೆಲು  ಜಾಸ್ತಿ ಉಪ್ಪುಂಡು

            ಪಂಬದೆರ್ನ ಪೊಣ್ಣು  ದೈವದ ಸಿರಿಮುಡಿ ಬೊಕ್ಕ ಜಕ್ಕೆಲಣಿ .ಕುದ್ಯ ಆದ್ ಆಗೆಲ ಇತ್ತ್ ದ್ ಬಾರೀ ದಿನ್ನ ಉಪ್ಪುಂಡು

೭. ಮುಗ ದೀಪುನಿ/ಮುಗ ಏರುನಿ

                 ಮುಗ ದೀಪುನಿ ಪಂಡ ದೈವ ಪಾತ್ರಿ ಅಣಿ ಕಟ್ಟಿ ಬೊಕ್ಕ ದೈವ ಚಾಕಿರಿದ ಒರಿ ದೈವದ ಮುಗೊನು ಪತೊಂದು ಬತ್ತ್ ದ್ ದೈವ ಪಾತ್ರಿನ ಮೋನೆಗ್ ದೀಪೆ . ಉಂದೆನ್ ಮುಗ ದೀಪುನಿ ಪನ್ಪೆರ್

                                 ಮುಗ ಏರುನಿ . ನಾಗರ ಬೆತ್ತೊಡು ರಚನೆ ಮಲ್ತ್ ನ ಮುಗತಟ್ಟೆ ಗ್ ದೈವದ ಮುಗ ಕಟ್ವೆರ್ . ಆ ಮುಗೊನು ಅಣಿ ದೀನೆರ್ದ್ ಬೊಕ್ಕ ದೈವ ಪಾತ್ರಿನ ತರೆತ ಮಿತ್ತ್ ಉಂತುಲೇಕ ಕಟ್ವೆರ್ . ಉಂದೆಕ್ ಮುಗ ಏರುನಿ ಪನ್ಪೆರ್              

 ೮. ಪೂ ಅರಿ ಪಾಡುನಿ

          ದೈವದ ದುಂಬು ಉಂತ್ ನ ಗುತ್ತು ಬಾರ್ಕೆದಕ್ಲ್ ದೈವೊಗು ಮಧು/ಪಾರಿ ಪಂಡ್ ದ್ ಪೂ ಅರಿ ಪಾಡುನಿ

೯. ಮಲ್ಲ ವಸಾಯ -ಮಲ್ಲ ದರಿಪುನಿ

  ೧೦.  ಮೂಜಿ ಆರ್ಭಟ

  ದೈವ ೩ ಸರ್ತಿ ವಸಾಯದೊಟ್ಟುಗು ಕಡ್ಸಲೆ ದೆರ್ತ್ ಪತ್ತ್ ದ್ ಬೊಬ್ಬೆ ಪಾಡುಂಡು  

೧೧. ಮೂಜಿ ಸುತ್ತು ಬಲಿ

     ದೈವ ದೈವಸಾನೊಗು ೩ ಸುತ್ತು ಬಾಲಿ ಬಲಿ ಬರ್ಪುಂಡು

              ದೈವ ಬಲಿಕ್ ಸುತ್ತು ಬರ್ಪುನಿ . . ದೈವದ ಸುತ್ತು ಬಲಿ ಒಟ್ಟು ೫ . ಬದಿಕರ ಬಲಿ ,ಸರ್ವ ಸುತ್ತು ಬಲಿ / ಸರ್ವ ವಾದ್ಯ ಬಲಿ ,ಮದ್ಮಾಲೆ ಸುತ್ತು ಬಾಲಿ / ಓಡ ಬಲಿ,ಸೀದಾ ಸುತ್ತು ಬಲಿ ಬೊಕ್ಕ ದರ್ಶನ ಬಲಿ

೧೨. ಸೂ ಪತ್ತುನಿ -ಜೀಟಿಗೆನ್ ತಿಗಲೆಗ್ ಪತ್ತುನಿ.

ಜೀಟಿಗೆದ ಇಸೇಸೊಲು:-

ಅರಸು ದೈವೊಲೆಗ್ ಅಂಗೈ ಜೀಟಿಗೆ ಪತ್ತುವೆರ್.ಅರಸು ದೈವೊಲ್ನ,ದೈಯ್ಯೊಂಗುಲ್ನ ಅಂಗೈ ಜೀಟಿಗೆನ್ ರಾಜಂದೈವೊಲೆಗ್ ಪತ್ತೆರೆ ಇಜ್ಜಿ 

 ರಾಜಂದೈವೊಲೆಗ್ ಪಂಚ ಜೀಟಿಗೆ,ಒತ್ತೆ ಜೀಟಿಗೆ ಪತ್ತುವೆರ್.ಪಂಚ ಜೀಟಿಗೆನ್,ಒತ್ತೆ ಜೀಟಿಗೆನ್ ಕುಟುಮ,ಇಲ್ಲದೆಚ್ಚಿದ ದೈವೊಲೆಗ್ ಪತ್ತೆರೆ ಇಜ್ಜಿ.ಪಂಚ ಜೀಟಿಗೆ,ಒತ್ತೆ ಜೀಟಿಗೆನ್ಲಾ ಕೆಲವೊಂಜಿ ರಾಜಂದೈವೊಲು ರಡ್ಡ್ ಕೈಟ್ ಪತ್ತುನ ಕೆರಮಲಾ ಉಂಡು.

ಪಂಚ ಜೀಟಿಗೆ ಪತ್ತುನ ಗ್ರಾಮದ ದೈವೊಲಿಪ್ಪುನಗ ಆ ಗ್ರಾಮೊಡು ಕುಟುಮೊಡು,ಇಲ್ಲದೆಚ್ಚಿಡ್ ನಡಪುನ ದೈವೊಲೆಗ್‌(ಉದಾರ್ಮೆಗ್ ಪಂಜುರ್ಲಿ,ಕಲ್ಲುರ್ಟಿ,ಮಂತ್ರಜಾವದೆ) ವಾ ಕಾರಣೊಗ್ಲಾ ಅಂಗೈ ಜೀಟಿಗೆಯಾವಡ್, ಪಂಚ ಜೀಟಿಗೆಯಾವಡ್,ಕೋಲು ಜೀಟಿಗೆಯಾವಡ್ ಪತ್ತುನ ಕೆರಮ ಇಜ್ಜಿ.ಇನಿ ಪೂರ ಅಡಿಮೇಲಾದ್ ಪೋತ್ಂಡ್.ಮಂತ್ರಜಾವದೆಗ್ ತೆಪ್ಪರಿಗೆದ ತೂಟೆ ಕೊರ್ಪುನ ಬದಲ್ ಪಂಚ ಜೀಟಿಗೆ ಕೊರೊಂದಿಪ್ಪುನವು ಸರಿಯತ್ತ್.ಅವ್ಲು ದೈವಾರಾದನೆದ ಕಟ್ಟ್ ಪೊಳಿತ್ ಲೆಕಾಂಡ್

೧೩.ಸಭೆನ್ ತೂಪುನಿ

 ೧೪. ಗಡಿ ಸೇವೆ

          ಗಡಿಸೇವೆ ಪಂಡ ದೈವೊಲು ಸಾರತ್ತೊಂಜಿ ಗಂಡ ಗಣೊಕುಲ್ನ ಪರವಾದ್ ನೆತ್ತೆರ್ ದೆತೊನ್ವ ಪಂಡ ಕೋರಿದ ನೆತ್ತೆರ್ ದೆತೊನ್ವ . ಸಾರತ್ತೊಂಜಿ ಗಡಿಟ್ ಉದ್ಭವ ಆಯಿನ ನೆಮ್ಪುಗಾದ್ ದೈವೊಲು ತರೆಕ್ ಕಡ್ಸಲೆಡ್ ಗಡಿ ಪಾಡೊನ್ವ . ಪಂಜುರ್ಲಿ ದೈವ ಗಡಿ ಪಡೊಣಿ ಬೊಕ್ಕ ಗಡಿಗಂಧ ಗುರ್ಕಾರ್ರೆಡ ಕೕಡಲಾ ದೈವದ ಪೂಜಾರಿಯೇ ಅವೆನ್ ಕೊರೊಡು . ಜುಮಾದಿ ಬಂಟಡ್ ಜುಮಾದಿ ಬಾಯಿದ್ ನುಡಿ ಕೊರುಂಡ ಬಂಟೆ ಗಡಿಟ್ ನುಡಿ ಕೊರ್ಪೆ. ಬಂಟನ್ ಆಲ್ಯೆರೆ ಆವನ್ದಿನಪಗ ಬಂಟೆ ತೊಟ್ಲ ಬಾಲೆಗ್ ,ಕಿದೆ ಕಂಜಿ ಕೈಕಂಜಿಗ್ ತೊಂದರೆ ಕೊರ್ನಗ ಬೆಂಜನ ಪದವುಡು ಜುಮಾದಿ ದೈವ ಆಯನ ಬಾಯಿಗ್ ಬೀಗ ಪಾಡುಂಡು . ಇನಿಕ್ಲಾ ಬಂಟೆ ಕೊಂಡಾನ ಬುಡುಂಡ ಬೇತೆ ಒಲ್ಲಾ ಬಾಯಿ ಬುಡ್ಪುಜೆ

೧೫. ಬಾರ್ನೆ ಪೋಪುನಿ -

           ದೈವೊಲೆಗ್ ಆವಾರ ಪಂಚಾಮೃತ ಕೊರ್ಪುನಿ . ದೈವ ಕಣ್ಣಾರ ತೂದು ಗಾಳ್ಯಾರ(ಕಮ್ಮೆನೊನು ಗಾಳಿದ ಒರುಟು ಆವಾರಾದ್ ಕೈಕೊನುನಿ) ಪೋಪುನಿ. [ಈ ಬಾರ್ನೆಡ್  ಪೊರಿ ,ಪಂರ್ದ್,ತಾರಾಯಿದ ಪೂ,ಬೆಲ್ಲದ ಪೊಡಿ ,ಪೆತ್ತದ ನೆಯ್ ಉಪ್ಪುಂಡು . ಈ ಐನ್ ಬಗೆನ್ ಪಂಚಾಮೃತಂದ್ ಪನ್ಪೆರ್ ].

೧೬. ಬೂಲ್ಯ ಕೊರ್ಪುನಿ .  

         ದೈವದ ಬೂಲ್ಯ ತಿಕ್ಕುನೇಟ  ಬತ್ತ್ ನಕ್ಲ್ ಕುಲ್ದುಪ್ವೆರ್ . ದೈವ ಬೂಲ್ಯ ತಿಕ್ಕಿ ಬೊಕ್ಕನೆ ಅಕ್ಲ್ ಅಲ್ತ್ ಪೋಪುನಿ . ಅಂಚನೆ ಮಲ್ಲಾಕ್ಲೆಗ್ ದೈವ ಕೊಡಿ ಬಾರೆದಿರೆಟ್ ಒಂಜಿ ಬೊಂಡ ,ಒಂಜಿ ಚೂರು ಮಲ್ಲಿಗೆದೊಟ್ಟುಗು ಬೂಲ್ಯ  ಕೊರ್ನ್ದ ಜನಸಾಮಾನ್ಯೆರೆಗ್ ಬೂಲ್ಯ ಬೊಕ್ಕ ಒಂಜಿ ತುಂಡು ಪಿನ್ಗಾರದೆಸಲ್ ಕೊರ್ಪುಂಡು . ಅಸ್ಸತ್ತ ಇರೆತ ಬೂಲ್ಯ ,ಬಚ್ಚಿರೆದಿರೆತ ಬೂಲ್ಯ ,ಪೆಲತಿರೆತ ಬೂಲ್ಯ ಇಂಚ ಬೇತೆ ಬೇತೆ ಬೂಲ್ಯೊಲುಪ್ಪುವ. ಕೆಲವು ಕಡೆಟ್  ಚಂದನ ,ಗಂಧ ದ ಬೂಲ್ಯಾಂಡ ಕೆಲವು ತಿಕ್ದ್ ಮಂಜಲ್ದ ಗಂಧ ನನ ಕೆಲವು ತಿಕ್ ಡ್ ಕರಿ ಗಂಧ ಉಪ್ಪುಂಡು.

  ದೈವಾರಾದನೆಡ್ 48 ಚಾಕಿರಿ ಬಾಗದಕ್ಲೆನ ಪಾಲುಂಡು.16ಗುತ್ತುಲು,16ಉಳಗುತ್ತುಲು,16 ಚಾಕಿರಿ ವರ್ಗೊಲು.ಪ್ರತಿಯೊರಿಯಗ್ಲ ಅಕ್ಲೆನವೇ ಚಾಕಿರಿದ ಪಾಲುಂಡು.ಒಂಜಿ ನಿರ್ದಿಷ್ಟ ಚಾಕಿರಿ ವರ್ಗದ  ಸೊತ್ತು‌ ದೈವಾರಾದನೆಯತ್ತ್.ಪ್ರತಿಯೊಂಜಿ ಚಾಕಿರಿ ಬಾಗದಕುಲು ಅಕ್ಲೆನ ಚಾಕಿರಿ ಮಲ್ತೆರ್ಡ ಮಾತ್ರ ಪರಿಪೂರ್ಣ ದೈವಾರಾದನೆ.ಕಟ್ಟುನಕ್ಲೆರ್ದ್ ದೈವ ಅತ್ತ್.ದೈವೊರ್ದು ಕಟ್ಟುನಕುಲು  ಪನ್ಪುನೆನ್ ಮದಪೆರೆ ಬಲ್ಲಿ.ನೂಲು ಪಾಲ್ ಸಂಸಾರೊರ್ದು ದೋಲು ಪಾಲ್ ಸಂಸಾರ ಮುಟ್ಟ ದೈವ ಚಾಕಿರಿದ 16 ವರ್ಗದ ಪಾಲುಂಡು.ಕಟ್ಟುನಕುಲು‌ ಕಟ್ಟುಜಿ ಪನೊಲಿ.ದೈವಾರಾದನೆ ಒರಿಯುಜಿ.ಪೂ ನೀರ್ ಅಗೆಲ್ ತಂಬಿಲೊಡು ದೈವಾರಾದನೆ ಮಲ್ಪೊಲಿ.ಅಂಚಾಂದ್ ದೈವಾರಾದನೆ ಮಲ್ಪವುನಕುಲು ನೇಮ ಮಲ್ಪಾವುನ ಬುಡ್ದು ಪೂನೀರ್,ಅಗೆಲ್ ತಂಬಿಲೊಡು ದೈವಾರಾದನೆ ಮಲ್ತೆರ್ಡ ನೇಮ ನೆರಿ ಉಂತುದು ಪೋವು.

            ‌ ‌‌‌‌‌          ಉಲ್ಲಾಲ್ದಿನಕುಲು ಕೇಪು

         ನಮಕ್ ಇಡೀ ವರ್ಸ ನುಪ್ಪು ನೀರ್ ಒದಗಾವುನ ದೈವೊಲೆಗ್ ನಮ ಗ್ರಾಮ ಸರ್ವೆರಿತ್ತ್ ದ್ ಸುದ್ದಾಚಾರೊಡು ನೇಮದಾನಿ ಒಂಜಿ ದಿನ ಕೊರ್ಪುನ ಆವಾರನೇ ದೈವೊಗು ಶ್ರೇಷ್ಠ.ಅವೆನ್ ಕೊರ್ಪುನಲಾ ಬೋಡಾ ಬೊಡ್ಚಂದಾತ್ಂಡ್.ಪೊರಿ ಲಪ್ಪುನಗಲ ಐನ್ ಸರ್ತಿ ಲಪ್ಪೊಡುಗೆ.ಉಂದೆನ್ ಐವಾಲ ಪೊರಿಂದ್ ಪನ್ಪೆರ್ .ಕರ್ಕ್ ಬೊಂಡ ಪರಿಯೆರೆ,ನರಿಪಾನ ತಾರಾಯಿ ಪೆರೆದ್ ತಾರಾಯಿದ ಪೂ ಪಂಚಾಮೃತೊಗು ಪಾಡೆರೆ ಗಲಸುವೆರ್.ಕೆಲಪಾನ ಕೋರಿದ ಬಿಂದು ನೆತ್ತೆರ್ ಗಂಡ ಗಣೊಕ್ಲೆಗ್.ಆವಾರ ಪಂಚಾಮೃತೊನು‌ ದುಂಬು ಪೂರಾ ಕಂಚಡ್ಪೆಡ್ ಕೊರೊಂತೆರ್.

 

  ದೈವದ ಅಣಿಕ್ ಪಾಳೆ ಕನನಗ ಐಟ್ ಎಡ್ಡೆಂತಿನ ಐನ್ ಪಾಳೆಲೆನ್ ದೆತ್ತ್ ದ್,ಐನ್  ಪಾಂದೋಲುಡು ತುರಿದ್ ಅಗೆಲ ಮಲ್ತ್ ದ್,ಅವೆತ ಮಿತ್ತ್ ಕೊಡಿರೆ ಪಾಡ್ದ್,ನೀರ್ ತಲಿತ್ ದ್ ಅವೆಟ್ ಆವಾರ ಪಂಚಾಮೃತ ಕೊರೊಂತೆರ್.ಇತ್ತೆ ಸ್ಟೀಲ್ ತೋಪು,ಪ್ಲಾಸ್ಟಿಕ್ ತೋಪುಡು ಕೊರೊಂದುಲ್ಲೆರ್. 

   ಆವಾರ ಪಂಚಾಮೃತದ ಬಾರ್ನೆಗ್ ದುಂಬು ಕೆಲವು ರಾಜಂದೈವೊಲೆಗ್ ಕೋರಿ ಕುತ್ತಾಬಾರ(ಕೋರಿ ಕುದ್ಪುದು ನೆತ್ತೆರ್ ಬಿಂದುದಾವಾರ ಕೈ ಕೊನುನಿ.ನೆತ್ತೆರ್ ಬಿಂದು ರಾಜಂದೈವೊಲ್ನ ಒಟ್ಟುಗು ಉಪ್ಪುನ ಗಂಡ  ಗಣೊಕ್ಲೆಗ್.)ಮಲ್ಪುನ ಕ್ರಮ ಉಂಡು.

    

  ರಾಜಂದೈವದ ನುಡಿ ಇಂಚ ಉಂಡು"ನೆತ್ತೆರ್ ದ ಬಿಂದುಗು ಕುರ್ದಿದ ಬಾರ್ನೆ ಪೋಪೆ,ಅಲವುದ ಬಿಂದುಗು ಪಂಚೋಲಿ ಬಚ್ಚಿತೆ ದೀಪೆಂದ್.ಅರ್ಥ ಈತೆ,ರಾಜಂದೈವ ಸ್ವೀಕಾರ ಮಲ್ಪುನಿ ಸಾತ್ವಿಕ ಆವಾರ ಮಾತ್ರ.

                               ‌‌    ಬೆಮ್ಮೆರ್

      ದೈವೊಗು ಕೋರಿ ಕುದ್ಪುದು ಆಹಾರ ಕೊರ್ಪುನಿ.  ಉಂದೆನ್ ಕೋರಿ ಕುತ್ತಾಭಾರ ಪನ್ಪೆರ್ .ಕೆಲವೊರ ಬಲಿಕ್ ನೆತ್ತೆರ್ ಬಿಂದುದಾವಾರ ಕೊರ್ಂಡ ಕೆಲವೊರ ದೈವ ಬಾರ್ನೆ ಪೋಪುನ ದುಂಬು ದೈವದ ಎದುರು ಕೊಡಿರೆ ಪಾಡ್ದ್ ಕೋರಿ ಕುದ್ಪುವೆರ್.

    

    ದೈವೊಲೆಗ್ ಕೊರ್ಪುನ ಅವಾರೊಲೆನ್ ಕೊರಂದೆ ಕಂಡೊಲು ಪೂರ ಪಡಿಲ್ ಬೂರ್ದ.ಚಾವಡಿಲು ಪೂರ ಬೂತ ಬಂಗ್ಲೆ ಆಯ.ತಪ್ಪು ಮಲ್ತ್ ನಕ್ಲೆ ಇಲ್ಲಿಲ್ಲಲ್ ಒರಿಯೊರಿ ಮಂಡೆ ಸುದ್ದ ದಾಂತಿನಾಯೆ ಪುಟ್ಟೊಂದುಲ್ಲೆ.ಗುತ್ತು,ಬರ್ಕೆ,ಕುಟುಮೊಲೆನ ಸಮ್ಮಂದೊಲು ಪೂರ ಕಡಿಯೊಂದುಲ್ಲ.ದೈವದ ಮಿತ್ತ ಮನಬಗ್ ತಿ ಮಯಕಾದ್ ಪೋವೊಂದುಂಡು,ದೈವಾರಾದನೆ ಪರಕೆಗ್ ಸಂದಾವೊಂದುಲ್ಲೆರ್.ತೆರಿಯಂದೆ ತಪ್ಪು ಮಲ್ತ್ಂಡ ದೈವ ಮಾಪು ಮಲ್ಪುಂಡು.ಆಂಡ ತೆರಿದ್ ತಪ್ಪುತರ್ವೆಲ್ ಮಲ್ತ್ಂಡ ಮಾನೊಗು ಸುತ್ತುನೆನ್ ಮಂಡೆಗ್ ಕಟ್ಟಾವು

    

ಅನಂತಾಡಿ ಉಲ್ಲಾಲ್ದಿ.ನೆತ್ತೆರ್ ಚಂದನ ಮುಗ ಬಂಗಾರ್ದ ಮುಗ,ಬೊಳ್ಳಿದ ಮುಗ(ಬೊಳ್ಳಿದ ಮುಗ ದೀನಗ ಪೊಂಜನಕುಲು ಅಗಪೊಡು.ಪದ್ದೆಯಿಡ್ ಸುರುತ ಪದ್ದೆಯಿ ಬೊಳ್ಳಿ.ಅವರ್ದ್ ಬೊಕ್ಕ ಬಂಗಾರ್.ಅಂಚಾದ್ ಉಲ್ಲಾಲ್ದಿಗ್ ಪದ್ದೆಯಿ ದೀನಗ ಅವೆಕ್ ಪೊಂಜನಕ್ಲೆ ಆಸೆ ಬೂರೆರೆ ಬಲ್ಲಿಂದ್ ಈ ಕೆರಮ‌ ಬತ್ತಿಪ್ಪು .ಚಿತ್ರ ಕೃಪೆ-ನರೇಂದ್ರ ರೈಕುಲು ನೇಲ್ದೊಟ್ಟು ಅನಂತಾಡಿ)

    ಪೊಲಬು-ಮಂಜುನಾಥ ಡಿ.ಶೆಟ್ಟಿ

                   ತಮ್ಮಣ್ಣ ಶೆಟ್ಟಿ

  ತುಳುನಾಡ್ದ ನಾಲ್ ದಿಕ್ಕ್ ದ ನಾಲ್ ನ್ಯಾಯ ಪೀಠ ಸಾನೊಲು

 

ಕೃಪೆ-ತುಳುನಾಡ ಮಹಾತ್ಮೆ

ತೆರಿಯೊನ್ಗ:-

  ಇನಿ ದೈವಾರಾದನೆದ ಅಜ ತಪ್ಪೆರೆ ಒಂಜಿ ಕಾರಣ ಚಾಕಿರಿ ವರ್ಗಂದ್ ಲ ಪನೊಲಿ.ದಾಯೆ ಪಂಡ ನೇಮದ ಕೊಡಿಯಡಿಕ್ ಒರಿ ಸಿನೆಮ ಮಲ್ಪುನಾಯೆ,ರಾಜಕೀಯದಾಯೆ ಬತ್ತೆಡ ಸುರುಕು ದೈವ ಆಯನ ಕೈ ಪತೊಂದು ತನ್ನ ತಿಗಲೆ ಮುಟ್ಟುದು ಯಾನುಲ್ಲೆ ಪಂಡ ಮೂಲು ದೈವ ಅಂಚ ಪನೆರೆ ಸಾಧ್ಯನೇ ಇಜ್ಜಿ‌‌.ದಾಯೆ ಪಂಡ ಅಕುಲೇರ್,ಮೊಕುಲೇರ್ಂದ್ ದೈವೊಗು ಗೊತ್ತಿಪ್ಪೆರೆ ಸಾಧ್ಯನೇ ಇಜ್ಜಿ..ಉಂದು ಚಾಕಿರಿದಾರೆ ಬೇಲೆ‌.ದಾಯೆ ಪಂಡ ಅರೆಗ್ ಗುರ್ತ ಮಲ್ಲಕ್ಲೆನ ಉಪ್ಪುಂಡತ್ತೆ.ಅಂಚ ಆರ್ನ ಕಾರ್ಬಾರ್ ನ್ ದೈವದ ಕಲೊಟು ತೋಜಾವೆರ್.ದುಂಬು ಪೂರ ದೈವ ಏರೆನ ಮೈ ಕೈ ಮುಟ್ಟುನ ಕೆರಮ ಇಜ್ಜಾಂಡ್,ಬೂಲ್ಯೊನು ದೂರೊರ್ದೆ ದೆತೊನ್ನಾರೆನ ಕೈಕ್ ಬೂರುಲೆಕ ಕೊರೊಂತ್ಂಡ್.ದುಂಬು ರಾಜಂದೈವದ ಕಲೊಟು ದೈವ ಭಂಡಾರದ ಮುಗ,ಕಡ್ಸಲೆನ್ ಪತಿ ಮಾನಿ (ಭಂಡಾರೊನು/ಕಿರ್ವಾಲ್ ನ್/ಆಯುಧ/ಕಡ್ಸಲೆನ್ ಪತೊಂದಿನ ಪತಿಮಾನಿ) ವಸಾಯೊಡು ಕಟಿಮಾನಿ ನ ಕೈಕ್ ಒಪ್ಪಿತೊಂತೆರ್.ಇನಿ ತಿಕ್ ನೌಲು ಪೂರ ತಿಕ್ ನ ದೈವೊಗು ಪೂರ ಮಾನೆಚ್ಚಿಲಾವೊಂದುಂಡು.ಓಡೆ ಮುಟ್ಟ ಪಂಡ ದೈವದ ಮುಗೊನ್ಲ ಮೊಕ್ಲೇ ಒಪ್ಪಿಪಾವೊನ್ನಡೆಮುಟ್ಟ ಎತ್ತ್ ದೆರ್.ದೈವದ ಕಲೊಟು ಇಜ್ಜಾಂದಿ ಉಚ್ಚಾಟನೆಲೆನ್ ಮೂಲ ಚಾಕಿರಿದಕುಲು ಮಲ್ತೊಂದುಲ್ಲೆರ್.ಇಂಚನೆ ಆಂಡ ದೈವದ ಮಿತ್ತ ನಂಬೊಳಿಗೆ ಮಯಕಾಯೆರೆ ಮೊಕ್ಲೆ ಕಾರಣೆರಾಪೆರ್.ಗಟ್ಟ ಜತ್ತ್ ದ್ ತುಳು ನಾಡ್ ಗ್ ಬತ್ತಿ ತುಳುನಾಡ ದೈವೊಲೆನ್ ಮೊಕ್ಲು ಕುಡ ಗಟ್ಟ ಬಡ್ತಾವೊಂದುಲ್ಲೆರ್ ಪಂಡ ದೈವದ ಕಲೊಕು ವೈದಿಕದಕುಲು ಮಲ್ಪುನ ಎತ್ತೇಸೊಗ್ಲ,ಕಟ್ಟುನಕುಲು ಮಲ್ಪಿ ಎತ್ತೇಸೊಗ್ಲ ದಾದ ಪರಕುಂಡು.ವೈದಿಕೆರಾಂಡಲ ದೈವದ ಚಾಕಿರಿನ್ ತುಳುನಾಡ ವ್ಯಾಪ್ತಿಡೇ ಮಲ್ತೊಂದುಲ್ಲೆರ್.ಚಾಕಿರಿದಕುಲು ದೈವೊನು ಗಟ್ಟದ ಮಿತ್ತ್ ಕೊನೊದು ಅಕ್ಲೆ ಬಂಜಿದ ಪಾಡ್ ತೂಯೆರ್ ವಿನಃ ಮೂಲ ಒಲ್ತ ಆರಾದನೆ ಪನ್ಪುನೆನ್ ಮದತ್ ಬುಡ್ಯೆರ್.

  ನಿಜವಾದ್ ತುಳುವೆರೆಗ್ ದೈವಾರಾದನೆದ ಕಟ್ಟ್ ನ್ ತೆರಿಪಾದ್ ಕೊರೊಡಾಯಿನಕುಲು ಕಟ್ಟುನಕುಲು.  ಅಂಚನೆ ಇಂಚಿನ ದೈವೊಗು ಇಂಚಿನ ಬಣ್ಣ,ಇಂಚಿನ ತುತ್ತೈತ,ಇಂಚಿತ್ತ್ ನ ಮಣೆ ಮಂಚ,ಇಂಚಿತ್ತ್ ನ ಉಜ್ಜಾಲ್ಂದ್ ತೆರಿಪಾವೊಡಾಯಿನಕುಲು ಕಟ್ಟುನಕುಲು..ಇನಿ ಅಕುಲೇ ಮಣ್ಣ ಸಂಸ್ಕೃತಿನ್ ಮದತೆರ್ಡ ನನ ಏರೆಡ ಕೇನೊಡು?.ದುಂಬು ದೈವದ ತುತ್ತೈತ,ಅರ್ದಾಲೊಡು ಉಂದು ಗುಳಿಗೆ,ಉಂದು ಪಂಜುರ್ಲಿ,ಉಂದು ಜುಮಾದಿಂದ್ ಗೊತ್ತಾವೊಂತ್ಂಡ್.ಇನಿ ಕಲ್ಲುರ್ಟಿ,ಗುಳಿಗನ್ ಪೂರ ತೂನಗ ದಾದ ಬಣ್ಣಂದೇ ಗೊತ್ತಾವೊಂದಿಜ್ಜಿ.ಪುಟ್ಟುರ್ದು ಸಾವುಮುಟ್ಟದ ಆಚರಣೆಲು ಸಂಪೂರ್ಣ ವೈದಿಕ ಅಯಿಲೆಕ ತುಳುನಾಡ ದೈವಾರಾದನೆದ ಮೂಲ ಪರಂಪರೆ ನಾಶ ಆವೊಂದುಂಡು.

ನಮ್ಮ ದೈವೊಲೆನ್ ನಮ ನಮ್ಮ ದೈವದ ಸಾನ ಗುಂಡ,ಮಾಡ,ಆಲಡೆ ಇಂಚ ಅರಾದನೆದ ಕೊಡಿಯಡಿತ ಪಿದಯಿ ಕೊನೊದು ಪಣವು ಮಲ್ಪುನ ಸಾದಿಗ್ ಗಳಸುನವು ಮಲ್ಲ ತಪ್ಪು. ನಮ ನಂಬಿ ದೈವೊಲೆಗ್ ನಮ ಮಲ್ಪುನ ಮಲ್ಲ ಅಪಚಾರ,ಮಾಪಿಜ್ಜಂದಿ  ಅಪರಾಧ.       

    ಅಂಚನೆ ದೈವೊಲೆನ್  ನಮಕ್  ಕೊಸಿ ತಿಕ್ಕುಂಡುಂದು ರಂಗ್ ಲೇಸ್ ಲೆಡ್ ಗಲಸುನವು ಮಲ್ಲ ತಪ್ಪು.

ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು.ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ಎಡತ ಮರ್ಗಿಲ್ಡೇ ಉಪ್ಪೊಡು.ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.