ತುಳುವೆರೆ ಚೌತಿ

                        ತುಳುವೆರೆ ಚೌತಿ

  

               ತೊಲಚಿ ಕಟ್ಟೆದೆದುರು ಚೌತಿ ಬಲಸ್ ದ್ ನಿ

                                      ಚೌತಿ ಪೂ

   

ಚೌತಿ ಪರ್ಬೊಗು ಕೇರ್ಪು ದೀಪುನಿ.ಸುಳ್ಳ ಮಲೆ ಗುಹಾತೀರ್ಥ.ಚಿತ್ರ ಕೃಪೆ-ಸಚಿನ್  ರೈ ಮಾಣಿಗುತ್ತು

ತುಳುವೆರೆ ಅಟ್ಟೆಮಿ

                ‌‌‌        ತುಳುವೆರೆ ಅಟ್ಟೆಮಿ

ಮಸ್ರುಡ್ಕೆ ತುಳುಟು "ಕೊಜಪುಕುದುಪೆ" ಇಜ್ಜಾ "ಬೊಳ್ನೆಯಿ ಕುದುಪೆ" ಪನೊಲಿ

ಎಣ್ಣೆನ,ಗ್ರೀಸಾ ಪೆರೆಸಿ ಕಂಗ್ ಗ್ ಪೂಜಿದ್ ಕಂಗ್ ದ ಕೊಡಿಕ್ ಕರ ಕಟ್ಟ್ ದ್ ದರ್ಪುವೆರ್.ಆ ಏರುನ ಜಾರುನ ಕಂಗ್ ನ್ "ಏರ್ಜಾರ್" ಕಂಬ" ಪಂಡ್ ದ್ ಪನೊಲಿ

ಜೋಗಿ ಪುರುಷರಾಯ ದೈವ

    ಜೋಗಿ ಪುರುಷರಾಯ,ಪುರುಷ ದೈವ,ಪುರುಷ  ಬೂತ,ಜೋಗಿ ಪುರುಷ ದೈವ

    ಜೋಗಿ ಪುರ್ಸ ದೈವ,ಪುರ್ಸ ಬೂತ,ಪುರ್ಸ ದೈವ

         ಒಂಜಿ ಜಾತಿದ ಪುದರ್ದೊಟ್ಟುಗು ಆರಾದನೆ ಪಡೆಯಿನ ದೈವ, ಜೋಗಿ ಪುರುಷೆರೆ ಜಾತಿದೊರುತ ಜೋಗಿ ಪುರುಷ ದೈವ.ಜೋಗಿ ಪುರುಷ ರಾಯೆ ಒರಿಯೆ ಉಪ್ಪುನಿ.ಜೋಗಿ ಪುರ್ಸ ದೈವ ಜೋಗಿ ಪುರ್ಸೆರೆಗ್ ಪೆರ್ಮೆದ ಇಚಾರ  .ಜೋಗಿ ಪುರುಷರಾಯ ದೈವದ ಬಗೆಟ್ ತೆರಿಪಾವುನ ದುಂಬು ನಾಥಪಂಥ,ದೈವಾರಾದನೆಗ್ ಬೊಕ್ಕ ನಾಥ ಪಂಥದ ಜೋಗಿ ಪುರ್ಸೆರೆ ಗ್  ಬೊಕ್ಕ ತುಳು ನಾಡ್ ಗ್ ಉಪ್ಪಿ ಸಮ್ಮಂದದ ಒಟ್ಟೊಟ್ಟುಗು‌ ಪುರುಷರಾಯ ದೈವದ ಬಗೆಟ್ ತೆರಿಪಾವುನ ಕಿನ್ಯ ಪ್ರಯತ್ನ ಮಲ್ಪುವೆ.

    ತುಳುನಾಡ ದೈವಾರಾದನೆಡ್ ನಾಥ ಪಂಥದ ಜೋಗಿಲೆಗ್ ಅಕ್ಲೆನವೇ ಆಯಿನ ಮಾನಾದಿಗೆ‌ ಉಂಡು.ದೈವದ ಸುರುತ ಪುರ್ಪ ಮರ್ಯಾದಿ ಜೋಗಿ ಪುರ್ಸೆರೆ ನಾಗಸರೊಕು.ದೈವದ ತಾರಾಯಿದ ಸುರುತ ಮರ್ಯಾದಿ ವಾದ್ಯ ಸೇವೆದರೆಗ್ ಕೊರ್ಂಡಲ ಅವು ಅಕುಲೆ ಮಠೊತ ಗುರುಕುಲೆಗ್ ದೈವ ಕೊರ್ಪುನ ಮಾನಾದಿಗೆ .ನಾಥ ಪಂಥದ ಯೋಗಿಲೆನ್ ಜೋಗಿಲುಂದು ಪನ್ಪೆರ್.ಜೋಗಿಲು ನಾಥ ಪಂಥದ ಯೋಗಿಲೆನ ಅನುಯಾಯಿಲು.ಜೋಗಿಲೆನ್ ತುಳು ನಾಡ್ ಡ್ ಪುರುಷೆರ್,ಪುರ್ಸೆರ್ಂದ್ ಲ ಲೆಪ್ಪುವೆರ್.ನಾಥ ಯೋಗಿ ಸನ್ಯಾಸಿಲು ಪುರುಷ ಸಂತಾನೊನು ಕರುಣಿಸವುನಕುಲು ಪನ್ಪಿ ಒಂಜಿ ನಂಬೊಳಿಗೆ ಉಂಡು.ಮೂಲ ಪುರುಷೆಂದ್ ಈಸರ ದೇಬೆರೆನ್ ಪನ್ಪೆರ್.ಪುರುಷ ರಾಯ ಪಂಡ ಪುರುಷರ ಗುರ್ಕಾರೆ,ಶೈವ ಜೋಗಿಲೆ ಆದಿನಾಥೆ ಶಿವೆ.ತುಳುನಾಡ ಮೂಲದಾರೆನ್ ತೂಪುಂಡ ಬೆಮ್ಮೆರ್ ನಮಕ್ ತೋಜಿದ್ ಬರ್ಪೆರ್.ಜೋಗಿಲು ಆದಿನಾಥೆ,ಮುಂಡದಾಯೆ,ಮೂಡದಾಯೆ ವೈದ್ಯನಾಥನ, ಶಿವನ ಆರಾದಕೆರ್.ಅರ್ಜುನೆ ಜೋಗಿ ಸನ್ಯಾಸಿಯಾದ್ ಅಪ್ಪೆನ ಕೈತಡೆ ಬರ್ಪುನ ಇಚಾರೊಲೆನ್ ಕಿಂದರಿ ಜೋಗಿಲು ಊರೂರು ಪದತೊರುಟು ಪಸರ್ವೆರ್.ತುಳುನಾಡ್ ಡ್ ದೈವಾರಾದನೆ ಒಂಜಿ ಕಾಲಗಟ್ಟೊಡು ಪೊಸ ಸಂಸ್ಕೃತಿದ ದಾಳಿರ್ದಾದ್ ನಾಶ ಆಪುನ ಪರಿಸ್ಥಿತಿಗ್ ಎತ್ತ್ ದಿತ್ತ್ಂಡ್. ಪೊಸ ಸಂಸ್ಕೃತಿ ಬನ್ನಗ ಅಕುಲು ಗ್ರಾಮ ದೈವೊಲೆನ್ ಕ್ಷುದ್ರ ಶಕ್ತಿಲುಂದು ಪಂಡೆರ್.ಜನೊಕುಲು ದೈವೊಗು ಪಾಡೊಂತಿ ಅಗೆಲ್ ನ್ ಉಂತಾಯೆರ್.ಅಷ್ಟ ದಿಕ್ಪಾಲೆರೆನ್,ಬ್ರಹ್ಮ,ವಿಷ್ಣು ಈಸರನ್ ದೇವೆರ್ಂದ್ ನಂಬುಲೆಂದ್ ಪಂಡೆರ್.ರಾಮಾಯಣ,ಮಹಾಬಾರತ,ವೇದ,ಪುರಾಣೊಲೆನ್ ಓದಾದ್ ಜನೊಕ್ಲೆಗ್ ಅರ್ಥ ಆಯಿಜಿಂಡಲ ಓದುನ ಅನಿವಾರ್ಯ ಪರಿಸ್ಥಿತಿ ಬತ್ತ್ಂಡ್.ದೈವ ಚಾಕಿರಿದ ಮೂಲ ನರ್ತಕೆರ್,ಚಾಕಿರಿದಕುಲು ಬಡವುಡು ಬರೆಲುಲೆಕಾಂಡ್. 

               ಚಿತ್ರ ಕೃಪೆ-ಗಗ್ಗರ ಫೇಸ್ ಬುಕ್

     ಪೊಸತಾದ್ ಬತ್ತ್ ನಕುಲು ಚಾಕಿರಿದ ಕೆಲವೊಂಜಿ ವರ್ಗೊಲೆನ್ ಅಸ್ಪೃಷೈರ್ಂದ್ ಪಂಡೆರ್.ತನ್ನಾತೆಗೆ ದೈವಸಾನೊಲು ಮೂಲೆ ಸೇರ್ದ್ ದೇವಸಾನೊಲು ಉದಿತೊಂದು ಬತ್ತ.ದೈವೊಲೆನ್ ದೇವ ದೇವಿ ಮಲ್ತ್ ದ್ ಅಡೆಗ್ ಶ್ರೀ ಚಕ್ರ ದೀಯೆರ್.ನಾಗನ ಒರು ಬುಡ್ಪಾದ್ ಬನೊಟು ನೀರ್ ದೀವೊಂತಿ ನಾಗಮೂರಿ ಕರೊಕ್ಲೆನ್ ಕರತ ಪೂಜೆ ಮಲ್ಪಂದಿ ಅಕುಲು ತುದೆ ತೋಡುಗು ದಕ್ಕಾಯೆರ್.ವೈದಿಕ ಚಾಕಿರಿಗ್ ರಡ್ಡ್ ಲಾಬ ಆಂಡ್.ಚಾಕಿರಿಗ್ಂದ್ ಬೂಮಿ ತಿಕ್ಕ್ಂಡ್.ಬೇಲೆಗ್ಂದ್ ದಕ್ಷಿಣೆ ಪಣವು ತಿಕ್ಕ್ಂಡ್.ಇಂಚಿ ಪೊರ್ತುಗು ದೇವೆರೆ ಗೋಜಿಗ್ ಪೋವಂದಿ,ಗುರುನೇ ದೇವೆರ್ಂದ್ ಎನ್ನಿನ,ತಂತ್ರ ಮಂತ್ರೊಡು ಬಿರ್ಸೆರಾಯಿನ ನಾಥ ಪಂಥದ ಜೋಗಿಲು ತುಳುನಾಡ್ ಗ್ ಬತ್ತೆರ್.ಕುಡೊರ ದೈವಾರಾದನೆ ಮೂಲ ಸೊರ್ಪೊಡು ತುಳುನಾಡ್ ಡ್ ಒರಿದ್ ಬೆಳಗುಲೆಕ ಮಲ್ತೆರ್.ಸಮಾಜದ ತಿರ್ತ ಜಾತಿದಕ್ಲೆನ್ ಮೋಕೆಡ್ ತೂಯಿ ಜೋಗಿಲೆಗ್ ಮುಗೇರೆರ್,ಪೂಜಾರಿಲುಗೌಡೆರ್,ಕಟ್ಟುನ ಮೂಲ ಜನಾಂಗೊಲು ಪೂರ ಮುಟ್ಟ ಆಯೆರ್.ಅಕುಲು ಪೂರ ಜೋಗಿಲೆ ಸ್ವಾಮಿಲೆನ್ ತನ್ಕುಲ್ನ ಗುರುಕುಲುಂದು ಎನ್ಯೆರ್.ಕುಡೊರ ಬದ್ಕ್ ಕೊರ್ನ ಜೋಗಿ ಸನ್ಯಾಸಿಲೆ ಉಪಕಾರ ನೆನೆತೊಂದು ದೈವೊಲೆಗ್ ಕಟ್ಟುನ ಮುಲ್ತ ಮೂಲ ಜನಾಂಗದಕುಲು ನಾಥ ಪಂಥೊನು ಜೋಗಿ ಪುರುಷ ನಲಿಕೆ,ಕಾವೇರಿ ಪುರುಷ,ಮಾಯಿದ ಪುರ್ಸೆರ್,ಸೋಣದ ಜೋಗಿ ಇಂಚ ಜಾನಪದ ನಲಿಕೆದ ಮೂಲಕ ಊರೂರು ಪಸೆರ್ಯೆರ್.ಇನಿ ಕುಡ ದೈವಸಾನೊಲೆಗ್ ಪೊಸತಾದ್ ಅಷ್ಟಮಂಗಲ ಪ್ರಶ್ನೆಲು  ಬ್ರಹ್ಮ ಕಲಶ,ದೈವೊಲೆಗ್ ದೇವೆರೆ ಭಜನೆ,ಇಜ್ಜಾಂದಿ ದೇವೆರೆ ಪುದರ್ದ ಓಮ,ಪೂಜೆಲು ಬತ್ತ್ ದ್ ಮೂಲ ಚಾಕಿರಿದಕುಲು ದೈವ ಸಾನೊರ್ದು ಪಿದಯಿ ಬೂರೊಂದುಲ್ಲೆರ್.ದೈವೊಲೆ ಪುದರುಲು ದೇವೆರೆ ಪುದರಾದ್ ದೈವೊಲೆಗಿಜ್ಜಾಂದಿ ಪೂಜೆ,ಭಜನೆಲು,ಆರತಿಲು ಬೈದ.ಸಂಕ್ರಾಂತಿ ಕರಿತೊಂತಿ ಮೂಲ ಚಾಕಿರಿದಕುಲು ಪಿದಯಿ ಬೂರ್ದು ಅಡೆಗ್ ತಂತ್ರಿರ್ದಾರ್ ಸಂಕ್ರಾಂತಿ ಕರಿಪೆರೆ ಬೈದೆರ್.ಪಾಗರದ ಉಲಯಿ ಇತ್ತಿ ದೈವೊನು ಅಕುಲು ಪಾಗರದ ಪಿದಯಿ ಪಾಡ್ಪಾಯೆರ್.ದೇವ ದೇವಿನಕ್ಲೆಗ್ ದಾಲ ನೇಮ ಕಟ್ಟಯೆರೆ ಆಪುಂಡೇ?.ಉಲ್ಲಾಲ್ದಿನ್ ದುರ್ಗಾ ಪರಮೇಶ್ವರಿ ಮಲ್ತ್ಂಡ ದುರ್ಗಾಪರಮೇಶ್ವರಿಗ್ ನೇಮ ಕಟ್ರೆ ಆಪುಂಡೇ?.ಆತ್ ಸಾಮಾನ್ಯ ಜ್ಞಾನಲ ನಮಕ್ ಇಜ್ಜಾಂದೆ ಪೋಂಡು.ಕುಡೊರ ದೈವಾರಾದನೆ ತುಳುವೆರೆನ ಕೈ ತತ್ತ್ ದ್ ಪೋವೊಂದುಂಡು.ಉಂದೆಟ್ ದೈವಾರಾದನೆದ ಮಾತಾ ಚಾಕಿರಿದಕ್ಲೆ ಪಾಲುಂಡು .

   

      ಸೋಣದ ಜೋಗಿ ನಲಿಕೆ ಕಾಸ್ರೋಡು,ಬಂಟಾಲ,ಪುತ್ತೂರು ತಾಲೂಕುಡು ನಡಪುಂಡು.ಕಾವೇರಿ ಪುರುಷೆರೆ ಜಾನಪದ ಇಚಾರ ಸುಳ್ಯದಂಚಿ ಇತ್ತ್ ದ್ ತಲಕಾವೇರಿಗ್ಲ ಕಾವೇರಿ ಪುರ್ಸೆರೆಗ್ಲ ದಾದಾಂಡಲ ಸಮ್ಮಂದ ಉಪ್ಪು.ಮಾಯಿದ ಪುರ್ಸೆರ್ ಕಾರ್ಲದಂಚಿ ತೂವೆರೆ ತಿಕ್ವೆರ್.ಮೂಲ ಜನಾಂಗದಕುಲು ನಾಥ ಪಂಥದ ಪ್ರಚಾರೊಗು ಬೋಡಾದ್ ದೈವೊಲೆಗ್ ಸಂದಿ ಪಾಡ್ದನ ಕಟ್ಟೊಂಡೆರ್.ಸಂದಿ ಪಾಡ್ದನೊಲೆಡ್ಲ ಕೆಲವು ತಿಕ್ ಡ್ ಕದಿರೆ,ಇಟ್ಟೇಲ ಮಠತ ಇಚಾರೊಲು ಬರ್ಪ.ಕಾಸ್ರೋಡುದಂಚಿ ಸೋಣದ ಜೋಗಿ ಪಂಡೆರ್ಡ ಇಟ್ಟೇಲ ಸೀಮೆಡ್ ಜೋಗಿ ಪುರ್ಸೆಂದ್ ಪನ್ಪೆರ್ .ಮ್ಯಾನರ್ ಸಂಗ್ರಹ ಮಲ್ತ್ ನ ಮುಡದೇರ (ಮೂಡಾಯಿದ ದೇವೆರ್--ಶಿವೆ) ಕಾಲ ಬೈರವ ಪಾಡ್ದನೊಡು ನಾಲ್ವೆರ್ ಪುರ್ಸೆರ್ನೊಟ್ಟುಗು ಕುಲದೈವ ಕಾಲ ಬೈರವೆ ಬತ್ತ್ ನ ಉಲ್ಲೇಖ ಉಂಡು(ಬಿಳಿಮಲೆ1990,ಪುಟ-25).ಕೆಲವೆರ್ ಜೋಗಿ ಪಂಡ ಯೋಗಿ ,ಯೋಗಿ ಪಂಡ ಶಿವೆಂದ್ ಪಂಡ ಅರ್ಜುನೆ ಜೋಗಿಲ್ನ ಮೂಲ ಪುರುಷೆಂದ್ ಲ ಪನ್ಪೆರ್.ಮೂಲ ಪುರುಷ್- ಬೆಮ್ಮೆರ್ -ಶಿವೆ-ಪ್ರಕೃತಿದ ಮೂಲ ಸ್ವರೂಪ-ಬನೊಟು-ಕಾಟ್ ಕಲ್ಲ್ ಡ್ ಆರಾಧನೆ.

       ಜೋಗಿ ಪುರುಷ ರಾಯ ದೈವ ಬೈಲಂಗಡಿ ಅರಂತಡೆಡ್ ಅಡಿಮಾರ್ ಡ್(ಪೀಠ) ಕುಲ್ದಿನಿ

           ಚಿತ್ರಕೃಪೆ-ಧರ್ಮ ದೈವ

     ವಿಜಯ ನಗರದ ಅರಸುಲೆ ಕಾಲೊಡು ಅರಸುಲ್ನ  ಪುದರ್ ಗ್ ರಾಯ ಪನ್ಪಿ ಸವ್ದ ಸೇರೊಂತ್ಂಡ್.ಅಂಚನೆ ಅರಸುಲು ಕುಡಲದ ಸುತ್ತಮುತಲಿಗೆನ್ ತೂವೊನೆರೆ ಕದಿರೆ ಮಠತ ಜೋಗಿ ಮಠಾಧೀಶೆರೆಗ್ ಅದಿಕಾರ ಕೊರ್ದಿತ್ತೆರ್. ಅಂಚ ಜೋಗಿ ಸನ್ಯಾಸಿಲೆನ ಕದಿರೆ ಮಠತ ಜಿಡ್ಡೆದ ಗುರ್ಕಾರನ್(ಪೀಠಾಧಿಪತಿ) ಅರಸೆರ್,ಮಹಾರಾಜೆರ್ಂದ್ ಲೆಪ್ಪುವೆರ್.ಪುರುಷ ದೈವೊಗು ರಾಜನ್ ದೈವ,ಪಟ್ಟದ ದೈವ ಆದ್ ಆರಾದನೆ ಇತ್ತ್ ನೆರ್ದಾದ್ ಜೋಗಿ ಪುರುಷ ರಾಯ ಬತ್ತಿಪ್ಪೊಡು.ಒರಿನಂಚ ಅರಸೊಳಿಗೆದ ಅರಂತಡೆನ್ ಬುಡ್ದು ಆರಾಧನೆ ಉಪ್ಪುನವುಲು ಪುರುಷ ದೈವ,ಜೋಗಿ ಪುರುಷ ದೈವ,ಪುರುಷ ಬೂತಂದ್ ಆರಾಧನೆ ಉಂಡು.

         ಪುರುಷ ದೈವ ದೇವರ ಗುಂಡ ಬೆಳ್ಳಿಪ್ಪಾಡಿ ಪುತ್ತೂರು   

     ಸುಮಾರ್ 1200 ವರ್ಷೊಗು ದುಂಬು ತುಳುನಾಡ್ ಗ್ ನಾಥ ಪಂಥ ಬತ್ತ್ಂಡ್.ಶಿವೆನೇ ನಾಥ ಪಂಥದ ಆದಿನಾಥೆ,ವೈದ್ಯನಾಥೆ,ಮೂಲಮಾನಿ/ಮೂಲ ಪುರುಷೆ.ನಾಥ ಸವ್ದದ 'ನಾ' ಪಂಡ ಅನಾದಿ.'ಥ' ಪಂಡ ಮೂಜಿ ಲೋಕದ ಸ್ಥಿತಿ ಗತಿ ಲಯೊತ(ತ್ರೈಲೋಕ) ದೇವೆರಾಯಿನ ಶಿವೆಂದರ್ಥ.ಪೊಸ ಜೀವೊನು ಉಂಡು ಮಲ್ಪೆರೆ, ಕರಿದ್ ಪೋಯಿ ಜೀವೊಗು ಕುಡ ಜೀವ ಕೊರೆರೆ ಸಗ್ತಿ ಇತ್ತ್ ನ ಶಿವನ ಆರಾಧಕೆರ್ ಶೈವ ನಾಥ ಪಂಥದ ಜೋಗಿಲು.ಕ್ರಿ.ಪೂ.3ನೇ ಶತಮಾನೊಡೇ ಶಿವನ ಆರಾದನೆ ಸುರಾಂಡಲಾ ಗಂಗರಸೆರೆ ಕಾಲೊಡು ಗುಂಡದ ಉಲಯಿ ಬೈರವನ ಆರಾದನೆ ಸುರಾಂಡ್.ಶಿವನ ಆರಾದನೆದಾತೆ ಪಿರಾಕ್ ಕಾಳ ಭೈರವನ ಆರಾದನೆಗ್ಲ ಉಂಡು.ನಾಥ ಪಂಥ ಭಾರತದ ಪುದರ್ ಪೋಯಿನ ಯೋಗ ಪಂಥ.ಮುಲ್ತ ಸಾಧಕೆರ್ ಯೋಗಿಲು/ಜೋಗಿಲು.ಗುರು ಮುಖೇನ ತಾಂತ್ರಿಕ ಅನುಷ್ಠಾನ ಮಲ್ಪುನ ನಾಥ ಪಂಥ ಗುರುನು ದೇವೆರಾದ್ ತೂಯಿನ ಪಂಥ.ಪ್ರಚಾರ ಬಯಕಂದಿ ಒಂಜಿ ಪಂಥ ಉಂಡು ಪಂಡ ಅವು ನಾಥ ಪಂಥ.ಬೂಕು ದಾಂತಿ ಬದ್ ಕ್ ನ ಪಂಥ ನಾಥ ಪಂಥ.ತನ್ನ ಬದ್ ಕ್ ನ್ ಲೋಕೊದ ಜನೊಕ್ಲೆಗ್ಂದ್ ಎನ್ನಿದ್ ,ಸರಳ ಜೀವನ,ತ್ಯಾಗದ ಬದ್ ಕ್  ನಡಪಾಯಿನ ಪಂಥ ನಾಥ ಪಂಥ.

ಏರ ಜೇರ ಪಂಡ ಶೃಂಗೊಡು ಇಪ್ಪುನಕುಲು ಶೃಂಗಿಲು. ಅಂಚಿನ ಜೋಗಿ ಸನ್ಯಾಸಿಲೆನ್ ಜನಸಾಮಾನ್ಯೆರ್ ಅರಸುಲೆ ಬಿಲೆ ಕೊರ್ದು ಅರದೆರ್ ಪಂಡ್ ದ್ ಲೆತ್ತೆರ್.ಸುಳ್ಳ ಮಲೆತ ಏರ ಜೇರೊಡು ಬಲ್ಲು ಬೈರ ಸಿಂಗಂದರದೆರ್(ಬೈರ-ಕಾಲ ಬೈರವ,ಸಿಂಗಂದ-ಸಿಂಹಾಸನದೊರುತ)

,ಸಿರಿ ಅರದೆರ್ಂದ್ ಇರ್ವೆರ್ ಜೋಗಿ ಹಠವಾದಿಲಿತ್ತೆರ್(ತುಳುನಾಡ ದೈವೊಲೆಗ್ ಸಿಂಗದನ ದೀದ್ ನೇಮ ನಡಪುನಲಾ ಉಂಡು.ಸಿಂಗದನ-ಸಿಂಹಾಸನ).ಜೋಗಿಲೆಗ್ ತುಳುವೆರ್ ಕೊರ್ನ ಮಾನಾದಿಗೆ ಜೋಕಟ್ಟೆ(ಜೋಗಿಲೆ ಕಟ್ಟೆ:ಕುಡ್ಲ,ಬೈಕಂಪಾಡಿದುಲಯಿ),ಪುರುಷರ ಕಟ್ಟೆ(ಪುತ್ತೂರು),ಜೋಗಿ ಬೊಟ್ಟು/ಜೋಗಿಬೆಟ್ಟು(ಅನಂತಾಡಿ) ಈ ಊರ್ದ ಪುದರ್ನ್ ತೂನಗ ತೆರಿಯುಂಡು.

              ಜೋಗಿ ಪುರುಷ ದೈವ ಕಾಯರ್ತೋಡಿ ಸುಳ್ಯ

   ಜುಮಾದಿನ ಆರಾಧಕೆರ್ ಜೋಗಿಲು.ಜುಮಾದಿಗ್ ಬೇತೆಬೇತೆ ಊರುದೊಟ್ಟುಗು ಪುರಾಪಿಪ್ಪುಂಡು.ಮರ್ದ ಬೈದ್ಯ,ಪುರುಷ ಪಾಲನೆದ ದೈವ ಜುಮಾದಿ.ಜೋಗಿ ಸನ್ಯಾಸಿಲು ಮರ್ದ ಬೈದ್ಯಗ್ ಕೈ ಏರ್ದ್ ಕೊರ್ನ ದೈವ ಜುಮಾದಿ .ಆ ದೈವೊಗು ಪೂಜಾರಿಲೇ ಅಮುರ್ತೊನು ಕಟ್ಟೊಡು.ಬಂಡಿದ ಚಾಕಿರಿಲ ಅಕ್ಲೆಗುಪ್ಪುಂಡು.ಜೋಗಿಲೆಗ್ ಕುಲ ದೇವೆರ್ ಕಾಲ ಬೈರವೆ,ಜೋಗಿಲೆಗ್ ದೈವ ಮೂಡದಾಯೆ ಪಂಡ ವೈದ್ಯನಾಥೆ,ಜುಮಾದಿ ಅಕ್ ಲೆ ಪಾಲನೆದ ದೈವ. ಅವೆಕ್ ಸಾಗ್ಸಿಯಾದ್ ಕದ್ರ,ಮಣೇಲ್,ಇಟ್ಟೇಲ್ ಜೊಗಿ ಮಟೊಕ್ಲೆಡ್ ಜುಮಾದಿನ ಆರಾದನೆ ಉಂಡು.ಜುಮಾದಿನ್ "ನಾಡುವಾಳುನ್ನಮ್ಮೆ" ಪಂಡ ನಾಡ್ ಗ್ ಕಾಪಾದಿಪ್ಪುನಾರ್ಂದ್ ಉಂಡು ವಿನಃ ಧೂಮ್ರಾಕ್ಷನ್ ಕೆರ್ನ ಧೂಮಾವತಿಂದ್ ಓಲ್ಲಾ ಬರ್ಪುಜಿ.ಆಂಡ ಜೋಗಿಲೆ ಕದಿರೆ ಬೊಕ್ಕ ಮಣೇಲ ಮಠತ ಜುಮಾದಿನ ಆರಾದನೆಡ್ ಜುಮಾದಿ ಎಂಚ ಮರ್ಲ್ ಜುಮಾದಿ ಆಂಡ್ಂದ್ ತೆರಿಯುಜಿ.ಸಂದಿ ಪಾಡ್ದನೊಲೆಡ್ ಮರ್ಲ್ ಜುಮಾದಿ ಪನ್ಪಿ ಉಲ್ಲೇಖ ತಿಕ್ಕುಜಿ.ಮರ್ಲ್ ಜುಮಾದಿ ಪನ್ಪಿ ದೈವನೇ ಇಜ್ಜಿಂದ್ ಮಸ್ತ್ ಹಿರಿಯ ದೈವೊಲೆಗ್ ಕಟ್ಟುನಕ್ಲೆಡ ಕೇಂಡ ಪನ್ಪೆರ್.ಆಂಡ ಜೋಗಿಲೆ ಮಣೇಲ ಮಠತ ಸುತ್ತ ಮುತಲಿಗೆಡ್ ಜೋಗಿಲು ಬದುಕೊಂದಿತ್ತ್ ದ್ ಜೋಗಿಲು ಜುಮಾದಿನ್ ಆರಾದನೆ ಮಲ್ಪುವೆರ್.ದುಂಬು ಇದ್ಯಾವಂತೆರ್ ಇಜ್ಜಂದಿನೆರ್ದಾದ್ ಮಣೇಲ ಜುಮಾದಿ ಪೋದು ಮಣ್ಲ ಜುಮಾದಿಯಾದ್ ಮರ್ಲ್ ಜುಮಾದಿಯಾದಿಪ್ಪೊಡು( ದೈವೊಗು ಏರಾ ತಪ್ಪು ಸಾದಿಡ್ ನಡತ್ ನೆರ್ದಾದ್ ದೈವ ಅಕ್ಲೆನ್ ಮರ್ಲ್ ಕಟ್ಟಾದ್ ಮಾನೊಗು ಸುತ್ತುನೆನ್ ತರೆಕ್ ಸುತ್ತಾದಿಪ್ಪು.ಅಂಚ ಮರ್ಲ್ ಕಟ್ಟಾಯಿ ಜುಮಾದಿ ಮರ್ಲ್ ಜುಮಾದಿಯಾದಿಪ್ಪು).ಇತ್ತೆ ಮರ್ಲ್ ಜುಮಾದಿಗ್ ಕಟ್ಟ್ ದ್ ಅಕುಲು ಅಬತಾರ ಕಟ್ಟುನೆನ್ ತೂನಗಲ ಮರ್ಲ್ ಜುಮಾದಿ ಇಂಚಲಾ ಉಂಡುಂದು ಅಸಕ್ಕ ಆಪುಂಡು.ಕಂಜಿದ ಕೆಬಿಕ್ ಗಾಳಿ ಪೊಗ್ಗುದು ಬಲ್ತ್ ಲೆಕ ಅಬತಾರ ಕಟ್ಟೊಂದುಲ್ಲೆರ್.ನಿಜವಾದ್ ಜುಮಾದಿ ಸಾತ್ವಿಕ,ಸಜ್ಜನ ದೈವ,ರಾಜರೆ ಗಾಂಬೀರ್ಯದ ಶಿಸ್ತುದ ದೈವ .ಜೋಗಿ ಬೊಕ್ಕ ಜುಮಾದಿ ಈ ರಡ್ಡ್ ಸವ್ದೊಗ್ಲ ಮುಟ್ಟದ ಸಮ್ಮಂದ ಉಂಡು.ಜೋಗಿಲು ಓಲೋಲು ಪೋಪೆರಾ ಅವ್ಲು ಅಕ್ಲೆ ಗುರ್ತ ಒರಿತ್ ದೇ ಪೋಪೆರ್.ಉದಾರ್ಮೆಗ್ ಮಾಣಿದ ಕೈತಲ್ದ ಸುಳ್ಳಮಲೆತಲ್ಪದ ಜೋಕ್ಲೆ ಕಟ್ಟೆ,ಬಾಬನ ಕಟ್ಟೆ,ಗಣೊಕುಲೆ ಕಟ್ಟೆ,ಸಂಕಯ ಕಟ್ಟೆ ಇಂಚ.ಊರುದೊರುಟು ತೂಪುಂಡ ಜೋಗಿ ಮಠ,ಕಾಶಿ ಮಠ,ಕಾಡು ಮಠ ಇಂಚ.ಕೆಲವು ಮೂಲದ ಪ್ರಕಾರ ಜೈನ ಧರ್ಮದ ಕುಂಞಾಳ್ವ ಪನ್ಪಿನಾರೆಗ್ ಜೋಗಿ ಸನ್ಯಾಸಿಲು ಮಾಣಿಕದ ಪರೆಲ್(ಸ್ಪಟಿಕ ಲಿಂಗ)ಕೊರ್ನ ಗುರ್ತದ ಒರುವಾದ್ ಮಾಣಿ ಪನ್ಪಿ ಊರುದ ಪುದರ್ ಬತ್ತ್ ದಿಪ್ಪೊಡುಂದು ಪನ್ಪೆರ್.ನನಲಾತ್ ತೆರಿಯೊಡಂಡ ಅವೆತ ಬಗೆಟ್ ಅಧ್ಯಯನ ನಡಪೊಡು.ಜೋಗಿ ಸನ್ಯಾಸಿಲು ನೇಪಾಲೊರ್ದು ತುಳುನಾಡ್ ಗ್ ಬನ್ನಗ ಅಕ್ಲೆನ ಆರಾಧನೆದ ತಾಂತ್ರಿಕ ಸಗ್ತಿ ಧೂಮಾವತಿನ್ ಅಕ್ಲೆನೊಟ್ಟುಗು ಕನದೆರ್.ಜೋಗಿಲು ಜ್ವಾಲಾಮಾಯಿಂದ್ ಅಪ್ಪೆ ಪಾರೊತಿನ್ ಆರಾಧನೆ ಮಲ್ಪುವೆರ್(ದಕ್ಷ ಯಜ್ಞೊಡು ಅಪ್ಪೆ ಪಾರೊತಿ ಸೂಕು ಲಾಗಿದ್ ಬೊಕ್ಕ ಆಲ್ ಜ್ವಾಲಾ ಮಾಯಿಯಾದ್ ಉದಿತಿನಿ).ಜೋಗಿ ಮಠೊಕ್ಲೆಡ್ ಮಂಜುನಾಥನ ದತ್ತ್ ಬಲತ್ ಗ್ ಕಾಳ ಬೈರವನ,ಜ್ವಾಲಾ ಮಾಯಿನ ಗುಂಡೊಲುಪ್ಪುವ.ತುಳುನಾಡ ರಾಜಂದೈವ ಸಾರಾಳ ಜುಮಾದಿನ ಕೈಟ್ ಕೋಲ್ತಿರಿ ನಿನೆ ಪೊತ್ತಾಯಿ ಕೊಂಡೆ ಬಲಿಂದ್ ಉಪ್ಪುಂಡು.ಅಂಚಾಂದ್ ತುಳುನಾಡ ಜುಮಾದಿಗ್ಲಾ ಜ್ವಾಲಾಮಾಯಿಗ್ಲಾ ಒಲ್ಪಡಿ ಮಲ್ಪುನ ಸರಿಯತ್ತ್.ತುಳುನಾಡ ಜುಮಾದಿ ಸೈನಿಕ ದಂಡನಾಯಕನೊರುತ ಸಗ್ತಿ.ಜುಮಾದಿನ್ ಕೇರಳ ತುಳುನಾಡ ಬಾಗೊಡು ಪಡಿಂಞಾರ್ ಚಾಮುಂಡಿಂದ್ (ಪಡ್ಡೇಯಿ ಜುಮಾದಿ) ಪನ್ಪೆರ್.ಸುಳ್ಳ ಮಲೆಟ್  ಧೂಮಾವತಿನ್ ಗುಡ್ಡೆ ಚಂಡಿಂದ್ (ಗುಡ್ಡೆ ಚಾಮುಂಡಿ),ಅವ್ವೇ ದೈವೊನು ಅರದೆರೆ((ಜೋಗಿ ಅರದೆರ್-ಸನ್ಯಾಸಿಲು) ಜುಮಾದಿಂದ್ ಲ ಪನ್ಪೆರ್.ಅಲ್ತ ಪಂಜುರ್ಲಿನ್ ಅರದೆರೆ ಪಂಜುರ್ಲಿಂದ್ ಲ ಲೆಪ್ಪುವೆರ್.ಜುಮಾದಿ,ಪಂಜುರ್ಲಿ,ಮಲರಾಯೆ ಪೂರ ಒಂಜೆಂದ್ ಬಾರೀ ಪಿರಯ ಆತ್ ನ ಮೂಲ ಜನಾಂಗದ ಕಟ್ಟುನಕುಲು ಪನ್ಪೆರ್(ಜೋಗಿ ಸನ್ಯಾಸಿಲು ತುಳುವ ಧರ್ಮಿಷ್ಟೆರೆಗ್ ಕೊರ್ನ ತಾಂತ್ರಿಕ ಸಗ್ತಿ ಧೂಮಾವತಿನ್ ಜುಮಾದಿ ಪನ್ಪುನಕುಲ್ಲಾ ಉಲ್ಲೆರ್).

            ಪುರುಷರಾಯ ದೈವ ಬರಾಯ ಅರಂತಡೆ ಅರುವ

      ದುಂಬುದ ಕಾಲೊಡುತುಳುನಾಡ್ ಡ್ ದೈವಾರಾದನೆ ಮಲ್ಪುನ ದುಂಬು ಅಲ್ತ ಯಜಮಾನ್ರ್ ಕದಿರೆ ಮಠೊಕು ಪೋದು ಕಾಲ ಬೈರವನ ದರ್ಶನ ಮಲ್ತ್ ದ್,ಎಣ್ಣೆ ಕೊರ್ದು ಕದಿರೆ ಮಂಜುನಾಥ ದೇಬೆರೆ ದರ್ಶನ ಮಲ್ತ್ ಬತ್ತಿ ಬೊಕ್ಕ ನೇಮ ನೆರಿ ನಡತೊಂತ್ಂಡ್.ಇತ್ತೆ ಅವು ಉಂತುದು ಪೋತ್ಂಡ್.

    ಜೋಗಿ ಸನ್ಯಾಸಿಲು ಮೂಡಾಯಿ ಗಟ್ಟ ಜತ್ತ್ ಬನ್ನಗ  ಸುಬ್ರಹ್ಮಣ್ಯ,ಮರ್ಕಂಜ,ಪುರ್ಸರಕಟ್ಟೆ,ಇಟ್ಟೇಲ್,ಮಾಣಿ,ಅನಂತಾಡಿ,ಸುಲ್ಲಮಲೆ,ಶಂಬುಗ,ಶಂಬೂರು,ಡಿಂಡಿಗೆರೆ(ವೈದ್ಯನಾಥನ ಸಾನದ ಕೈತಲ್ ಜೋಗಿ ಸನ್ಯಾಸಿಲು ಬತ್ತ್ ಕುಲ್ದಿನ ಕಟ್ಟೆ ಉಂಡು),ನರಿಕೊಂಬು(ಕಾಡೆದಿ ಬದ್ರಕಾಳಿ ಸಾನ,ಅವ್ಲು ನಾಲ್ ಜೋಗಿ ಸನ್ಯಾಸಿಲು ಇತ್ತೆರ್),ಸುಜೀರ್(ವೈದ್ಯನಾಥೆ),ನಾಣ್ಯ(ಲೆಕ್ಕೆಸಿರಿನ ಕೆದುಟು ಜೋಗಿ ಸನ್ಯಾಸಿಲು ನೀರ್ ಪರಿ ಜಾಗೆ.ಮಾರಿಪಲ್ಲದ ಕೈತಲ್ದ ಊರು),ಕಮ್ಮಾಜೆ(ತೋಡುಡು ಆಸರ್ ಗ್ ನೀರ್ ವಸರ್ ಲಕ್ಕಾದ್ ನೀರ್ ಪರಿ ತೋಡ ಜಾಗೆ),ಮಣೇಲ್(ಮಣೇಲ ಬಾರೆ ಬಿತ್ತ್ ಲ್ದ ಜೋಗಿ ಮಠ) ಇಂಚ ಕದಿರೆಗ್ ಪೋಪೆರ್.

         ಸೋಣದ ಜೋಗಿ.ಚಿತ್ರ-ಬ್ಯೂಟಿ ಆಪ್ ತುಳುನಾಡ್.

            ನಾಥ ಪಂಥ,ಯೋಗಿ,ಜೋಗಿ,ಪುರುಷ ಉಂದೆತ ಬಗೆಟ್ ತೆರಿಯೊನಿ ಬೊಕ್ಕ ಪುರುಷರಾಯ ಪನ್ಪಿ ದೈವದ ಬಗೆಟ್ ತೆರಿಯೊನ್ಗ.ಜಾನಪದ ನಲಿಕೆಡ್ ಜೋಗಿಲೆನ್ ಮಾಯಿದ ಪುರ್ಸೆರ್,ಕಾವೇರಿ ಪುರ್ಸೆರ್,ಸೋಣದ ಜೋಗಿ,ಜೋಗಿ ಪುರುಷೆರೆಂದ್ ಅವೆಕ್ ಸಮ್ಮಂದ ಪಟ್ಟಿನ ನಲಿಕೆನ್ ಮೂಲ ಜನಾಂಗದಕುಲು ತುಳುನಾಡೊರ್ಮೆ ನಡಪಾವೊಂದು ನಾಥ ಪಂಥದ ಪ್ರಚಾರಕೆರಾಯೆರ್.ಆಂಡ ಜೋಗಿ ಪುರುಷೆರ್ ದೈವ ಆದ್ ತುಳುನಾಡ ಗಟ್ಟದ ಮುದೆಲ್ಲೆಡ್ ಜೋಗಿ ಪುರುಷರಾಯ ದೈವ ಆದ್ ಪಟ್ಟದ ದೈವ ಆದ್, ರಾಜನ್ ದೈವ ಆದ್  ಆರಾದನೆ ಪಡೆಯೊಂದುಲ್ಲೆರ್.

 ಜೋಗಿ ಪುರುಷರಾಯ ದೈವದ ಪಾಡ್ದನ ಮೂಲದ ಕಥೆ:-

           ತುಳುನಾಡ್ ಡ್ ಜೋಗಿ ಪುರುಷರಾಯಗ್ ಕಟ್ಟುನ, ತುಳು ನಾಡ ಪುಗಾರ್ತೆದ ದೈವ ಕಟ್ಟುನಾರಾಯಿನ ಮುಂಡಾಜೆದ ಆನಂದೆರ್ ಪಾಡ್ದನದ ಪ್ರಕಾರ ತುಳುನಾಡ್ ಗ್ ಬತ್ತಿ ಪುರುಷರಾಯ ದೈವದ ಬಗೆಟ್ ಕೊರ್ನ ಪೊಲಬುನು ನಿಕ್ಲೆನೆದುರು ಪಟ್ಟೊಂದುಲ್ಲೆ.ಪುರ್ಸರಾಯ ದೈವ ಪಂಡ ಮೊಕ್ಲು ನರಮಾನಿ ಬಂಜಿಡೆ ಪುಟ್ಟಿನ ಸಾಮಾನ್ಯ ವ್ಯಕ್ತಿಲು, ಮಂಜುನಾಥ ದೇವೆರೆರ್ದಾದ್ ದೈವೊಲಾದ್,ಅಸಾಮಾನ್ಯ ಕಾರ್ನಿಕೊದ ಸಗ್ತಿಲಾದ್ ತುಳು ನಾಡ್ ಡ್ ಆರಾಧನೆ ಪಡೆಯಿನಕುಲು.ಮಾಯೆಡುಂತುದು ಜನಮಂದೆದ ಲೆಪ್ಪುಗು ಜೋಗ ಮಾನಿನ ಮಿತ್ತ್ ಬತ್ತ್ ದ್ ನಂಬಿ‌ ಸಂಸಾರದ ಬೇನೆ ಬೆಸರ್ಕೆ,ಸಿರ್ಕ್ ಸಂಕಡ ತಟ್ಟ್ ಪಾರಾವುನಕುಲು.ದಾಯೆ ಪಂಡ ಜೋಗಿ ಸಿದ್ದಿ ಪುರುಷೆರ್ ತಂತ್ರ ಮಂತ್ರದೊಟ್ಟುಗು ಪುಲಮರ್ದ್ ದ ಬಗೆಟ್ಲ ಎಡೇನ ತೆರಿನಕುಲು.ಪಾಡ್ದನೊಡ್ಲ ಜೋಗಿ ಪುರ್ಸೆರ್ಂದೇ ಪನ್ಪುನಿ.ಮೂಡಾಯಿ ಗಟ್ಟದ ಮಿತ್ತ್  ಕಂಡನಿ ಬುಡೆದಿ ಜೋಗಿ ಪುರ್ಸೆರ್ ಬದ್ ಕೊಂದಿತ್ತ್ ದ್ ಅಕ್ಲೆಗ್ ಮದಿಮೆ ಆದ್ ಏತ್ ವರ್ಸ ಕರಿಂಡಲ ಜೋಕ್ಲಾಪುಜಿ.ಪಿರಾಕ್ ಡೇ ಮಂಜುನಾಥ ದೇಲ್ಯ ತುಳುನಾಡ ಪಡ್ಡೇಯಿ ಕಡಲ ಬರಿತ ಕುಡಲದ ಕದ್ರೊಡು ಡಿತ್ತ್ ದ್ ಅಕುಲು ಮಂಜುನಾಥ ದೇವೆರೆಗ್, "ಎಂಕ್ಲೆಗ್ ಬಾಲೆ ಪುಟ್ಟ್ಂಡ ನಾಲಿಲ್ಲ್ ಜೋಳಿಗೆ ಪಾಡ್ದ್ ನಟ್ಟ್ ದಾಂಡಲ ಪರಕೆ ಸಂದವಂ"ದ್ ಪನ್ಪೆರ್.ಅಕ್ಲೆಗ್ ಒರಿ ಮಗೆ ಪುಟ್ಟುವೆ.ಬಾಲೆ ಪುಟ್ಟುದು ಒಂತೆ ಕಾಲೊಡೇ ಬಡಪೊತ್ತುಡು ಪರಕೆ ಬೂಟೆರಾವಂದೆನೆ ಆಯನ ಅಪ್ಪೆ ಅಮ್ಮೆ ಕರಿದ್ ಪೋಪೆರ್. ಆಯೆ ಕಡ್ತಿ ಕಲ್ಲ್ ಘಾಟಿ(ಕಡ್ತಿಕಲ್ಲ್ ಘಾಟಿ ದಿಡುಪೆದ ಕೈತಲ್ ಇತ್ತ್ ದ್ ಇನಿಲಾ ಅವ್ಲು ಪಾದೆಕಲ್ಲ್ ಡ್  ಮುಟ್ಟುದ ರಚನೆ ಉಂಡು) ಜತ್ತ್ ದ್ ಬಂಗಾಡಿಗ್ ಬರ್ಪೆ(ತುಳುನಾಡ್ ಗ್ ಎಚ್ಚಿನ ದೈವೊಲು ಕಡ್ತಿ ಕಲ್ಲ್ ಜತ್ತ್ ದೇ ಬಂಗಾಡಿಗ್ ಬತ್ತ್ ದೇ ತುಳುನಾಡ್ ಡ್ ಬೇತೆ ಬೇತೆ ಜಾಗೆಡಗ್ ಬತ್ತ್ ದ್ ನಿಲೆಯಾದ್ ಕಲೆ ಕಾರ್ನಿಕ ತೋಜಾವುನಿ).ಇಂಚ ಒಂಜಿ ದಿನ ಆಯನ ಕನೊಟು ಮಂಜುನಾಥ ದೇವೆರ್ ಬತ್ತ್ ದ್ ಆಯನ ಅಪ್ಪೆ ಅಮ್ಮೆ ತನ್ಕ್ ಪಂಡಿ ಪರಕೆನ್ ನೇರ್ಪು ಮಲ್ಪುವೆರ್.ಆ ಪರಕೆ ಸಂದಾಂಡ ತುಳು ನಾಡ್ ಡ್ ನಿಕ್ಕ್ ನಿಲೆ ಕೊರ್ಪೆಂದ್ ಕನೊಟು ಬತ್ತ್ ದ್ ಅಭಯ ಕೊರ್ಪೆರ್ .ಅಂಚನೇ ಆ ಜೋಗಿ ಪುರ್ಸೆ ನಾಲಿಲ್ಲ್ ನಟ್ಟ್ ದ್,ನಾಲಿಲ್ಲ್ ಬೇಡ್ ದ್ ಕದ್ರ ಮಂಜುನಾಥ ದೇಬೆರೆ ಪರಕೆ ಸಂದಾವೆ.ಅವೆರ್ದ್ ಬೊಕ್ಕ ಆಯೆ ಕದಿರೆಡ್ ಮಯಕಾಪೆ.  ಅವ್ಲು ಮಂಜುನಾಥ ದೇವೆರೆ ಪರಕೆ ಬೂಟುದು ಮಯಕಾದ್ ಜೋಗಿ ಪುರ್ಸೆ ಆದ್ ತುಳುನಾಡ ಕೆಲವು ಜಾಗೆಲೆಗ್ ಬತ್ತ್ ದ್ ಆರಾದನೆ ಪಡೆಪೆ .ಮಯಕಾಯಿ ಬೊಕ್ಕ ಮಂಜುನಾಥ ದೇವೆರೆಡ "ನಾಡ್ ಸುತ್ತೊಡು,ನಾಡ್ ತೂವೊಡಂಡ ಎಂಚ ಪೋವೊಡು ದೇವೆರೆಂದ್" ಕೇನ್ವೆ.ಅಪಗ ದೇವೆರ್ ಶಿರಾಡಿಡ್ ಪುಟ್ಟಿನ,ಬಂಗಾಡಿಡ್ ಬುಳೆಯಿನ ಶಿರಾಡಿ ದೈವ ನಿಕ್ಕ್ ತಿಕ್ವೆ ಪಂಡ್ ದ್ ಕಡಪುಡುವೆರ್.ಅಂಚ ಶಿರಾಡಿ ದೈವದೊಟ್ಟುಗು ಪುರ್ಸರಾಯ ದೈವ ನಾಡ್ ಸುತ್ತೆರೆ ಬರ್ಪುನಿ.ಎಂಕ್ ಸಾನಮಾನ ತಿಕ್ಕೊಡುಂದು ಕೆಲವು ತಿಕ್ ಡ್ ಪುರ್ಸೆ ಉಂತುನಿ.ಪುರ್ಸ ದೈವೊನು ತುಳುವೆರ್ ಗೌರವೊಡು ಆರ್ ಮೇರ್ಂದ್ ಪುರ್ಸೆರ್ಂದ್ ಲ ಲೆತ್ತೆರ್,ಪುರ್ಸೆಂದ್ ಲ ಲೆತ್ತೆರ್ .ಪುರುಷರಾಯ ದೈವೊನು ಬೈಲಂಗಡಿ ಅರಂತಡೆಡ್ ಪಟ್ಟದ ದೈವ ಆದ್ ಆರಾದನೆ ಮಲ್ಪುವೆರ್ .ದುಂಬುಗು ತುಳುನಾಡ್ ಡ್ ಜೋಗಿ ಪುರ್ಸೆ  ಜೋಗಿ ಪುರುಷ ದೈವ ಆದ್ ತುಳುನಾಡ ಕೆಲವು ಜಾಗೆಗ್ ಬತ್ತ್ ದ್ ಅವ್ಲು ಆರಾದನೆ ಪಡೆಪೆ.ಜೋಗಿ ಪುರುಷನ ನೇಮ ಸುರಾನಗ"ತುಳು‌ ದೇಸೊಗು ಪೋವೊಂಡೆನೇ ತುಳು ಬಾಸೆನೇ ಕಲ್ಪೊಡು,ಕನ್ನಡ ದೇಸೊಗು ಪೋವೊಂಡೆನೆ ಕನ್ನಡ ಬಾಸೆನೇ ಕಲ್ಪೊಡುಂದು" ದೈವ ಪನ್ಪುಂಡು.ದೈವ ಲೆಪ್ಪುನಗ ಓ ಮಂಜುನಾಥಂದ್ ಮೂಜಿ ಸರ್ತಿ ಲೆಪ್ಪು ಕೊರ್ಪುಂಡು.ಅಂಚಾದ್ ಕದಿರೆಡ್ ಮಯಕಾದ್ ತುಳುನಾಡ ಗಟ್ಟದ ಬರಿಯೆ ಆರಾದನೆ ಉಪ್ಪುನ ಪುರ್ಸ ದೈವೊಗ್ಲ ಕದಿರೆಗ್ಲ ಉಪ್ಪುನ ಸಮ್ಮಂದ ತೆರಿಯೊನೊಲಿ. "ನಾಲೂರು ಸುತ್ತೊಂಡೆ,ನಾಲಿಲ್ಲ್ ನಟ್ಟೊಂಡೆಂದ್ ದೈವ ಪನ್ಪುಂಡು.ಅವ್ಲು ಕದಿರೆದ ಮಂಜುನಾಥ ಸ್ವಾಮಿಗ್ ಆಯನ ಅಪ್ಪೆ ಅಮ್ಮೆ ನಾಲಿಲ್ಲ್ ನಟ್ಟ್ ದಾಂಡಲ ಪರಕೆ ಸಂದಾವೆಂದ್ ಅಕುಲು ಪಂಡೊಂದಿ ಪರಕೆದ ಇಚಾರ ತೆರಿಯುಂಡು.ಮೂಲು ನೇಮೊಡು ನಾಲಿಲ್ಲ್ ಜೋಳಿಗೆ ಪಾಡ್ದ್ ನಟ್ಟುನ ಇಚಾರ ಅಡ್ಡಯೊಡು ಪಂಡ ನೇಮದ ಕಟ್ಟ್ ಕಟ್ಲೆಡ್ ತೆರಿಯುಂಡು.

    

 ಸುಳ್ಯ,ಪುತ್ತೂರು,ಕಕ್ಕಿಂಜೆ,ಚಾರ್ಮಾಡಿ,ಅರುವ ಇಂಚ ಕೆಲವು ಜಾಗೆಲೆಡ್ ಕಾರ್ನಿಕದ ದೈವ ಆದ್ ಪುರುಷರಾಯ ದೈವದ ಆರಾದನೆ ತೋಜಿದ್ ಬರ್ಪುಂಡು.ಉಂದು ಪಾಡ್ದನೊಡು ತೋಜಿದ್ ಬರ್ಪುಂಡು.ತುಳುನಾಡ ದೈವೊಲೆ ಕದ್ರ್ ಮುಡಿ(ಮುಡಿ ಪಂಡ ಜಠೆ/ಜಡೆ-ಜೋಗಿ ಸನ್ಯಾಸಿಲೆ ಜಡೆ,ಶಿವೆ ಜಠಾಧಾರಿ.ಜಠಾಧಾರಿ ದೈವ-ಜಡೆತಾರ್/ಜಿಡೆತಾರ್;ನಾಗೆಲ ದೆರ್ಪುನಿ ಜಿಡೆ-ಒಂಜೆಕೊಂಜಿ ಓಲ್ಪಡಿ ಉಂಡು.) ಸವ್ದೊಗ್ಲ ಪಾಡ್ದನೊಡು ಬರ್ಪುನ ಕದ್ರಗ್ಲ ಸಮ್ಮಂದ ಉಪ್ಪೊಡು.

ಪುರುಷ ರಾಯ ದೈವೊನು ಬಾರೀ ಪ್ರಾಯದಕ್ಲೆಡ ಕೇಂಡ ಪಂಜುರ್ಲಿ ದೈವಂದ್ಲ ಪನ್ಪೆರ್. ಪ್ರಾದೇಶಿಕವಾದ್ ಮೋನೆದ ಬಣ್ಣಗಾರಿಕೆ,ತುತ್ತೈತ,ನುಡಿ ಕಟ್ಟ್,ಆರಾದನಾ ಕೆರಮ ಒಂತೆ ಎತ್ತೇಸ ಇತ್ತ್ಂಡಲ ಕನ್ನಡೊಡು ದೈವ ಪಾತೆರುಂಡು.ಆಂಡ ಕಟ್ಟುನಕುಲು ತುಳುತಕುಲಾಯಿನೆರ್ದಾತ್ರ ಸುರುಕು ಕನ್ನಡೊಡು ಪಂಡ್ ದ್ ಬೊಕ್ಕ ತುಳುಟು ಪಾತೆರ್ವೆರ್.ಅರುವದ ಕೈತಲ್ದ ಬರಯ ಅರಂತಡೆಡ್ ದೈವ ಸಾನದ ಎದುರು ಅಡಿಮಾರ್ ಡ್(ಅಡಿ ಪಂಡ ಕುಲ್ಲುನ ಜಿಡ್ಡೆ,ಉಂತುನ ಅಡಿ ಪಂಡ ಪಾದ ಊರುನ ಜಾಗೆ.ಮಾರ್ ಪಂಡ ಒಂಜಿ ಅಳತೆ) ಕುಲ್ಲುದು ವಸಯಾದ್ ಪಿದಯಿ ಬತ್ತ್ ದ್ ನೇಮ ನಡತ್ಂಡ ಕಕ್ಕಿಂಜೆ ಕೈತಲ್ದ ಬೈಲಂಗಡಿ ಅರಂತಡೆಡ್ ಎದುರುದ ಅಡಿಮಾರ್ ಡ್ ಪಂಡ ತಗ್ಗ್ ದ ಕಟ್ಟೆಡ್ ಕುಲ್ಲುದು ನಾಲ್ ಸುತ್ತೊಗು ವಸಯಾದ್ ಬೊಕ್ಕ ಲಕ್ಕ್ ದುಂತುದು ವಸಾಯ ಉಪ್ಪುಂಡು.ದೈವದ ಎಡ ಕೈಟ್ ತಿರ್ಸೂಲ ಇತ್ತ್ ದ್ ಬಲಕೈಟ್ ಬೆತ್ತ ಉಪ್ಪುಂಡು.ದುಂಬುದ ಕಾಲೊಡು ಎಡ ಪುಗೆಲ್ಡ್ ಜೋಳಿಗೆ ಇತ್ತ್ ದ್ ಬಲ ಕೈಟ್ ಕಂರ್ಬುದ ಜ್ಯೋತಿಕೋಲು(ಬೊಲ್ಪು,ಸಾದಿ ತೋಜಾವುನ‌ ದಂಟೆ)ಇತ್ತ್ಂಡ್.ಇತ್ತೆ ಕರ್ಂಬುದ ಬದಲ್ ಬೆತ್ತ ಉಪ್ಪುಂಡು.ಬೆತ್ತೊಡು ನೇಮೊಡು ನಿಜವಾದ್ ಹಾಕೊನ್ರೆ ಇಜ್ಜಿ.ಕರ್ಂಬುದ ಬದಲ್ ಅವೆನ್ ಗಳಸುವೆರ್.ಜೋಗಿ ಪುರ್ಸೆರೆ ನೇಮೊಡು ಕರ್ಂಬು ಉಪ್ಪೊಡೆ.ಸುಳ್ಯ ಕಾಯೆರ್ತೋಡಿದ ಪುರುಷ ದೈವದ ನೇಮೊಡು ದೈವ ಹೆಚ್ಚಾದ್ ಬೆತ್ತೊಡು ಕಾಲಿ ಮೈಟ್ ಬೆರಿಕ್ ಹಾಕೊಂಡು.ಅರುವದ ಬರಯದ ಅರಂತಡೆಡ್ ಸನ್ಯಾಸಿನಲೆಕನೆ ತುತ್ತೈತ ಇತ್ತ್ ದ್ ಮಾತ ಕಟ್ಟುನಕುಲ್ಲ ಕಟಿ ನೇಮೊಡು ಮುಂಡೊಗು ಭಸ್ಮದ ನಾಮ ಪಾಡ್ದಿಪ್ಪುವೆರ್.ಅರುವದ ಬರಯ ಅರಂತಡೆಡ್ ದೈವ ಕನ್ನಡೊಡು ಪಾತೆರ್ನಗ ಕದಿರೆದ ಉಲ್ಲೇಖ ಬರ್ಪುಂಡು.ಕದಿರೆಗ್ ಬತ್ತ್ ನ ಪುರ್ಸೆ(ಪುರ್ಸನ್ ಗೌರವೊಡು ಪುರ್ಸೆರ್ ಪನ್ಪೆರ್)ಕದಿರೆಡೇ ಮಾಯ ಆಯಿ ಬೊಕ್ಕ ಸನ್ಯಾಸಿನ ಒರುಟು ಜೋಗಿ ಪುರ್ಸೆ ಆದ್ ತುಳುನಾಡ ಗಟ್ಟದ ಮುದೆಲ್ದ ಬಾಗೊಡೆ ಪೋಪೆ.ಚಾರ್ಮಾಡಿ,ಬಂಗಾಡಿ,ಶಿರಾಡಿ,ಮಡಿಕೇರಿ ಗಟ್ಟದ ಮುದೆಲ್ಡ್ ಬೇತೆ ಬೇತೆ ಪುದರ್ ಡ್(ಜೋಗಿ ಪುರ್ಸ/ಪುರುಷ ರಾಯ ಆದ್,ಜೋಗಿ ಪುರ್ಸೆ ಆದ್,ಪುರ್ಸ ಬೂತ ಆದ್,ಪುರ್ಸೆ ಆದ್ ಪುರ್ಸಗ್ ನೇಮ ನಡಪುಂಡು) ಕಾರ್ನಿಕದ ಪುರ್ಸ ದೈವೊಗು ಆರಾದನೆ ನಡಪುಂಡು.

 

                             ಪುರುಷ ದೈವ ಪಂಜ

      ಪುರುಷರಾಯ ದೈವೊನು ಜೋಗಿ ಪುರುಷರಾಯ(ಬೈಲಂಗಡಿ ಅರಂತಡೆ),ಪುರುಷರಾಯ(ಬರಾಯ ಅರಂತಡೆ),ಜೋಗಿ ಪುರುಷ ದೈವ(ಕಾಯರ್ತೋಡಿ - ಸುಳ್ಯ),ಪುರುಷ ದೈವ(ಪಂಜ ಬೊಕ್ಕ ದೇವರ ಗುಂಡ ಪುತ್ತೂರು) ಇಂಚ ಬೇತೆ ಬೇತೆ ಪುದರ್ ಡ್ ಜೋಗಿ ಪುರುಷರಾಯ ದೈವದ ಆರಾದನೆ ನಡಪುಂಡು.ಪುರುಷರಾಯ ದೈವೊಗು ಎವ್ರ ಜಾಸ್ತಿ.ನಿಜವಾದ್ ತೂಂಡ ಜೋಗಿ ಪುರುಷರಾಯೆ ಒರಿಯೆ ಉಪ್ಪುನಿ.ಅವೆಕ್ ದೈವ ಕೊರ್ಪುನ"ಒರಿ ಬೂತ ಪುರುಷರಾಯೆಂದ್"ಪನ್ಪುನ ನುಡಿಯೇ ಸಾಗ್ಸಿಯಾದುಂಡು.  ನೇಲ್ಯ ಪುರುಷರಾಯ,ಎಲ್ಯ ಪುರುಷರಾಯಂದ್ ಇರ್ವೆರುಲ್ಲೆರ್ಂದ್ ಪನ್ಪೆರ್.ನಿಜವಾದ್ ಜೋಗಿ ಪುರ್ಸ ದೈವ ಒರಿಯೆ ಉಲ್ಲಯಿನೆ.ಒರಿ ಉಲ್ಲಾಯನ್ ಇರ್ವೆರ್ ಉಲ್ಲಾಕ್ಲಾದ್ ತುಳುವೆರ್ ಆರಾದನೆ ಮಲ್ಪುವೆರ್.ಆಂಡ ಪುರ್ಸ ದೈವೊನು ಅಂಚ ಆರಾದನೆ ಮಲ್ಪುಜೆರ್.ಪುರ್ಸನ್ ಬಹುವಚನೊಡು ಪನ್ನಗ ಪಂಡ ಮಾನಾದಿಗೆಡ್ ಎದ್ಕೊನ್ನಗ ಪುರ್ಸೆರ್ಂದ್ ತುಳುವೆರ್ ಲೆಪ್ಪುವೆರ್. ಬೈಲಂಗಡಿ ಅರಂತಡೆಡ್ ಪಟ್ಟದ ದೈವ ಆದ್ ಜೋಗಿ ಪುರುಷರಾಯೆ,ಬೈರವೆ ಬೊಕ್ಕ ನೆತ್ತೆರ್ ಮುಗುಳಿ ದೈವ ಇಂಚ ಮೂಜಿ ದೈವೊಲೆನ ನೇಮ ನಡಪುಂಡು.ಬೈಲಂಗಡಿ ಅರಂತಡೆಡ್ ಮೂಲ ದೈವ ಆದ್ ಉಲ್ಲಾಯೆ/ಉಲ್ಲಾಕುಲು ಬೊಕ್ಕ ಉಲ್ಲಾಲ್ದಿನ ಆರಾದನೆ ಉಂಡು.ಪಟ್ಟದ ದೈವೊಲೆ ನೇಮದ ದುಂಬುನಾನಿ ಮೂಲು ಮೂಲದ ದೈವೊಲೆಗ್ ನೇಮ ನಡಪುಂಡು.ಅಂಚನೆ ಮೂಲು ಬಂಟ ದೈವಲ ಇತ್ತ್ ದ್ ಕಲ್ಲುರ್ಟಿ ಪಂಜುರ್ಲಿನ ಆರಾದನೆಲ ಉಂಡು.

ಪುರುಷ ದೈವೊಗು ಮಾಡ ಕಟ್ಟ್ ದ್ ಆರಾದನೆ ನಡಪುಂಡು.ಪುರುಷ ದೈವದ ನೇಮ ಆನಗ ಜನ ಮನಿ ಮಂಬಿಜ್ಜಂದೆ ಕುಲ್ಲುವೆರ್.ತುಳು ನಾಡೊರ್ಮೆ ಉಲ್ಲಾಕ್ಲೆಗ್,ಉಲ್ಲಾಲ್ದಿಗ್ಲ ಅಂಚನೆ ಮಾಡ ಕಟ್ಟ್ ದೇ ಆರಾದನೆ ನಡಪುನಿ.ಉಲ್ಲಾಕ್ಲೆಡ್ ಮೆಗ್ಗಿ ಪಲಯೆಂದ್ ಇರ್ವೆರೆಗ್ ಒಂಜೇ ಐತೊಡು ರಡ್ಡ್ ಸರ್ತಿ ನೇಮ ಆಪಿನ ಕೆರಮ ಉಂಡು.ಪುರುಷ ದೈವ ಪಂಜದ ದೋಳ ಬರ್ಕೆಗ್ ಬತ್ತ್ ದ್ ಕಿನ್ನಿದಾರು,ಪಯ್ಯ ಬೈದ್ಯನ್ ಮಯಕ ಮಲ್ತ್ ದ್ ದೈವ ಮಲ್ತ್ ದೆರ್.ಈ ಇಚಾರ ನಮಕ್ ದೋಳ ಬರ್ಕೆದ ಇತ್ತೆದ ಯಜಮಾನಿ ಪಾತೆರಕತೆಯೊಂಜೆಟ್ ಪೊಲಬು ಕೊರ್ತೆರ್. ಅಂಚಾದ್ ಪುರುಷರಾಯ ದೈವ ಬಾರೀ ಕಾರ್ನಿಕದ ದೈವ ಪನ್ಪುನೆಟ್ ರಡ್ಡ್ ಪಾತೆರ ಇಜ್ಜಿ.ಮದಿಪು ಪನ್ಪುನ‌ ಮದ್ಯಸ್ಥೆರ್ ಕಾಶಿರ್ದ್ ತುಳು ನಾಡ್ ಗ್ ಬತ್ತಿ ದೈವ ಪುರುಷರಾಯೆಂದ್ ಪಂಡ ಅವು ಸರಿಯತ್ತ್.ಜೋಗಿ ಪುರುಷೆನೇ ಜೋಗಿ ಪುರುಷ ದೈವ ಆತ್ ನಿ.ನನಲ ಅಕುಲು ಪಾರಿ ಪನೊಂದು ಪುರುಷದೈವ ಸುಬ್ರಾಯ ದೇವೆರ್ನ ಪಟ್ಟದ್ದ ಪ್ರದಾನಿಂದ್ ಪನ್ಪುನೊಟ್ಟುಗು ಕಾಶಿ ವಿಶ್ವನಾಥ ದೇಬೆರೆ ದತ್ತ ಬಲತ ಮಚ್ಛೇಂದ್ರ ನಾಥೆರ್,ಗೋರಖ ನಾಥೆರೆ ಪುರಾಪುದ ದೈವಂದ್ ಪನ್ಪೆರ್.ಅಂಚನೇ ಗಟ್ಟ ಜತ್ತ್ ದ್ ಬನ್ನಗ ಮೆಗ್ಗಿ ಪಲಯೆ ಪುರ್ಸೆರ್ನ ಕೈ ಪತ್ತ್ ದ್ ಬತ್ತಿ ದೈವಂದ್ ಪನ್ಪೆರ್.ಅಪಗ ಆ ಮೆಗ್ಗಿ ಪಲೆ ಏರ್ಂದ್ ಉಲ್ಲೇಖ ಇಜ್ಜಿ.ನಿಜವಾದ್ ಅವು ಸರಿಯತ್ತ್.ದಾಯೆ ಪಂಡ ಪುರ್ಸೆನೆ ಕದಿರೆಡ್ ಮಂಜುನಾಥ ದೇವೆರೆ ಪರಕೆ ಬೂಟುದು ಮಯಕಾದ್ ಮಂಜುನಾಥ ದೇವೆರೆ ಅಪ್ಪಣೆದಲೆಕ ತುಳುನಾಡ್ ಡ್ ಪುರುಷ ದೈವ ಆದ್ ನಿಲೆ ಆತ್ ನಿ.ನಮ ಸತ್ಯ ಇಚಾರೊನೇ ಜನೊಕ್ಲೆಗ್ ತೆರಿಪಾವೊಡಾಯಿನವು ಧರ್ಮ.ಇಜ್ಜಿಂಡ ನಮ ದೈವೊಗು ದ್ರೋಹ ಮಲ್ತಿಲೆಕ.ತಂತ್ರ ಮಂತ್ರ ಸಿದ್ಧಿದ ನಾಥ ಪಂಥೊನು ಉಂಡು ಮಲ್ತಿ ಗುರು ಮಚ್ಚೇಂದ್ರ ನಾಥೆರಾವಡ್,ನಾಥ ಪಂಥೊನು ಭಾರತೊಡು ಪ್ರಚಾರ ಮಲ್ತಿನ ಗೋರಖ ನಾಥೆರಾವಡ್ ಅಕುಲು ಪುರುಷರಾಯ ದೈವೊಲಾತ್ ನಿ ಅತ್ತ್.ಅಕುಲು ಯೋಗಿಲು,ಸನ್ಯಾಸಿಲು .ಅಕುಲೇ ಬೇತೆ.ತುಳುನಾಡ್ ಡ್ ಆರಾಧನೆ ಪಡೆಯೊಂದಿಪ್ಪುನ ಜೋಗಿ ಪುರುಷರಾಯ ದೈವನೇ ಬೇತೆ.

   

ಬರಾಯ ಅರಂತಡೆಡ್ ಜೋಗಿ ಪುರುಷಗ್ ಪನಿವಾರ

  ಅರುವದ ಬರಾಯ ಅರಂತಡೆಡ್ ಪುರುಷ ದೈವದ ಆರಾದನೆ:-

         ಪುರುಷರಾಯ ದೈವದ ಆರಾದನೆ ನಡಪುನ ರಡ್ಡ್ ಅರಂತಡೆದ ಮಾಯಿತಿ ತಿಕ್ ನೆನ್ ತೆರಿಪಾವುನ ಪ್ರಾಮಾಣಿಕ ಪ್ರಯತ್ನ ಮಲ್ಪುವೆ.ದುಂಬಾದ್ ಬೋಳ್ತೇರ್ ತಾಲೋಕುದ ಅರುವದ ಕೈತಲ್ದ ಬರಾಯ ಅರಂತಡೆಡ್ ಪುರುಷರಾಯ ದೈವ ಆರಾದನೆ ಎಂಚ ಸುರಾಂಡ್ ಪಿಂದೊನ್ಗ.ಬಾರ್ಯಾತ್ ಕಾಲೊರ್ದು ದುಂಬು ಜೋಗಿ ಪುರುಷರಾಯೆ ಜೋಗಿ ಸನ್ಯಾಸಿನ ಒರುಟು ಬರಾಯ ಅರಂತಡೆಕ್ ಬರ್ಪೆ.ಅರಂತಡೆದ ಪೊಂಜನಕುಲು ಜೋಗಿ ಸನ್ಯಾಸಿಗ್ ಒಂಜಿ ಸೇರರಿ,ಒಂಜಿ ತೌತೆನ್ ಕೊರ್ಯೆರ್.ಈತ್ ಕಮ್ಮಿ ದಾಯೆ ಕೊರ್ನಿಂದ್ ಎವ್ರೊಡು ಸನ್ಯಾಸಿ ಜತ್ತ್ ಪೋಪೆ.ಅರಂತಡೆದ ಎದುರುದ ಮಲ್ಲ ತೋಡುದ ಕಲ್ಲ ಪಾಪು ಕಡಿದ್ ಆಯೆ ತೋಡುಗು ಬೂರ್ವೆ.ತೀರ್ದ್ ಪೋಪುನ ದುಂಬು ಮೂಲು ಅರಂತಡೆಡ್ ಯಾನ್ ದೈವ ಆದ್ ನಿಲೆಯಾಪೆ,ನಂಬೊಂದು ಬಲೆಂದ್ ಅಕ್ಲೆಗ್ ಪನ್ಪೆ.ಅಂಚಾದ್ ಅರಂತಡೆದಕುಲು ಜೋಗಿ ಪುರುಷರಾಯ ದೈವ ಆದ್ ಆರಾದನೆ ಸುರು ಮಲ್ಪುವೆರ್.ನಲಿಕೆದಕುಲು,ಪರವೆರ್ ಜೋಗಿ ಪುರುಷರಾಯ ದೈವೊಗು ಕಟ್ಟುವೆರ್.ಮೂಲು ಸನ್ಯಾಸಿನ ಒರುವಾದ್ ಜೋಗಿ ಪುರುಷರಾಯಗ್ ನೇಮ ನಡಪುಂಡು.(ಬರಾಯ ಅರಂತಡೆದ ಪುರುಷರಾಯ ದೈವದ ಪೊಲಬು-ರಾಜಶೇಖರ್ ಚಾವಡಿ ನಾಯಕೆರ್)

  

ಮುಡಂತಿಲ ಮನೆತನದ ಮಡ್ಯೆಲೆರೆಗ್ ಪುರ್ಸರಾಯ ದೈವದೊಟ್ಟುಗು ಪನಿವಾರದ ಮಾನಾದಿಗೆ.ಬೈಲಂಗಡಿ ಅರಂತಡೆ

ಕಕ್ಕಿಂಜೆ ಬೈಲಂಗಡಿ ಅರಂತಡೆಗ್ ಜೋಗಿ ಪುರ್ಸರಾಯ ದೈವ ಬೈದ್ ನಿ:-

      ನನ ದುಂಬು ಕಕ್ಕಿಂಜೆ ಬೈಲಂಗಡಿ ಅರಂತಡೆಗ್ ಜೋಗಿ  ಪುರುಷರಾಯ ದೈವ ಬತ್ತ್ ನ ಇಚಾರೊನು ತೆರಿಯೊನುಗ.ಪುರ್ಸ ದೈವ,ಪುರ್ಸ ನೇಮಂದ್ ಪುರುಷರಾಯ ದೈವದ ಬಗೆಟ್ ಪನ್ಪೆರ್.ಕದಿರೆರ್ದ್ ಬೆದ್ರ ಆದ್ ಮೂಡಾಯಿ ಗಟ್ಟ ಬಡ್ತೆರೆ ಪುರುಷರಾಯದೈವ ಜೋಗಿ ಸನ್ಯಾಸಿ ರೂಪೊಡು ಪೋನಗ ಪೆರ್ನಲ ಮಲೆರ್ದ್ ತಿರ್ತ್ ತೂನಗ ದೈವೊಗು ಬೈಲಂಗಡಿ ಅರಂತಡೆ ತೋಜುಂಡು.ಜೋಗಿ ಪುರುಷ ರಾಯ ದೈವ ಅರಂತಡೆಗ್ ಬರ್ಪಿ ಸಾದಿಡ್ ಅರಂತಡೆತ ಎದುರ್ದ ಕಲ್ಲ ಪಾಂಪು‌ ತೂಂಡಾದ್ ದೈವ ತಿರ್ತ್ ಬೂರುಂಡು.ಬೂರ್ನ ದೈವೊನು ಇತ್ತೆ ಉಪ್ಪುನ ಮುಡಂತಿಲ ಮಡ್ಯೆಲೆರೆ ತರವಾಡ್ ದ ಎರಿಯಾಕುಲು  ಕೈ ಪತ್ತ್ ದ್ ದೆರ್ತ್ ದ್ ಅಕ್ಲೆನ ಇಲ್ಲಗ್ ಲೆತೊಂದು ಪೋದು ಆರೈಕೆ ಮಲ್ಪುವೆರ್.ಅಂಚಾಸ್ ಪುರುಷರಾಯ ದೈವ ಅಕ್ಲೆನವ್ಲು ಆರಾದನೆ ದೆತೊನುಂಡು.ದುಂಬುಗು ದೈವದ ನೇಮ ಆದ್ ಅಗೆಲ್/ಪನಿವಾರ ಪಾಡ್ನಗ ಚಾಕಿರಿದ ಮಡ್ಯೆಲಗ್ ಒಂಜಿ‌ ಕೊಡಿ ಇರೆ ಪಾಡ್ದ್ ಒಟ್ಟಿಗೆ ಆವಾರ ಸಾಂಕೇತಿಕವಾದ್ ಕೊರ್ಪುನ ಕೆರಮ ಆನಿರ್ದ್ ಇನಿ ಮುಟ್ಟ ನಡತೊಂದೇ ಬೈದ್ಂಡ್.ದುಂಬುಗು ಜೋಗಿ ಪುರುಷರಾಯ ದೈವ ಪೆರ್ನಾಲೆ ಮಲೆತ ಮಲೆಕುಡಿಯೆರೆಡ ಬೈಲಂಗಡಿ ಅರಂತಡೆದ ಸಾದಿ ತೋಜಾಯೆರೆ ಕೇನುಂಡು.ಅಕುಲು ಗುದಿಗೆ/ಈಟಿ,ಜೀಟಿಗೆ ಪತೊಂದು ದೈವೊನು ಅರಂತಡೆದಡೆ ಲೆತೊಂದು ಬರ್ಪೆರ್.ಅಂಚ ಲೆತೊಂದು ಬತ್ತಿನ ಪೆರ್ನಾಲೆ ಮಲೆತ ಮಲೆಕುಡಿಯೆರೆ ವಂಶದಕುಲು ಇನಿಲ ಪುರುಷರಾಯ ದೈವೊಗು ಜೀಟಿಗೆ ಪತ್ತುನಿ.

ಪೆರ್ನಾಲೆ ಮಲೆತ ಮಲೆಕುಡಿಯೆರ್ ಪುರುಷ ರಾಯ ದೈವೊಗು ಜೀಟಿಗೆ ಪತ್ತುನಿ.ಬೈಲಂಗಡಿ ಅರಂತಡೆ.

ಮಲೆಕುಡಿಯೆರ್ನೊಟ್ಟುಗು ಪುರುಷರಾಯ ದೈವ   ನಟ್ಟುನ ಜೋಗಿಯಾದ್ ಅರಂತಡೆದ ಎದುರುದ ಮುಟ್ಟುದ ಮಿತ್ತ್ ಉಂತುದು ಭವತಿ ಭಿಕ್ಷಾಂದೇಹಿಂದ್ ಕೇನುಂಡು.ಜೋಗಿ ಪುರುಷರಾಯನ ಜೋಳಿಗೆಗ್ ರಾಣಿ ಅರಿ ಪಾಡ್ನಗ ಆಯೆ ಜೋಳಿಗೆರ್ದ್ ನಾಲರಿ ರಾಣಿನ ತರಕ್ ಪಾಡ್ನಗ ಅಲೆಗ್ ದಾದನಾ ವಸಾಯ/ಆಕರ್ಷಣೆ ಆಯಿಲೆಕ ಆಂಡ್.ದುಂಬು ಆಲ್ ಸೌಖ್ಯ ಇಜ್ಜಂದೆ ಬೂರ್ವಲ್.ಉಂದು ದಾದಂದ್ ನಿಮಿತ್ತ ನೋಟೊಡು ತೂನಗ ಜೋಗಿ ಪುರುಷರಾಯ ದೈವ ಬೈದ್ಂಡ್.ಒಟ್ಟುಗು ಬೈರವೆ,ನೆತ್ತೆರ್ ಮುಗುಳಿ ದೈವ ಬೈದ್ಂಡ್.ಆ ಮೂಜಿ ದೈವೊಲೆನ್ ಪಟ್ಟದ ದೈವ ಆದ್ ನಂಬೊಡುಂದು ತೋಜಿದ್ ಬತ್ತ್ಂಡ್.ಅಂಚನೆ ಅರಂತೆಡ್ ದೈವೊಲೆನ್ ಆರಾದನೆ ಮಲ್ಪೆರೆ ಸುರು ಮಲ್ತೆರ್. ಈ ಮೂಜಿ ದೈವೊಲೆರ್ದ್ ದುಂಬು ಆದಿಡ್ ಮೂಲು ಉಲ್ಲಾಕುಲು ಬೊಕ್ಕ ಉಲ್ಲಾಲ್ದಿ ದೈವ ಇತ್ತ್ಂಡ್.ಬಂಟ ದೈವಲ ಉಂಡು.ಪಟ್ಟದ ದೈವೊಲೆನ ಪಿರವುಡು ನೇರೊಲ್ದಡಿ ಪಂಜುರ್ಲಿನ ಆರಾದನೆ ಉಂಡು.ಕಲ್ಲುರ್ಟಿ ಪಂಜುರ್ಲಿನ ಆರಾದನೆಲ ಉಂಡು.ಮೂಲು ನೇಮೊಗು ದಿನ ದೀಪುನೆನ್ "ಕುದಿ ದೀಪುನಿ" ಪನ್ಪೆರ್.ಬೈಲಂಗಡಿ ದೋರ್ತಾಡಿ ಕೊಪ್ಪದ ಮೂಲ್ಯೆರೆಗ್ ಪಿದಯಿದ ಚಾಕಿರಿ ಉಪ್ಪುಂಡು.ಬೋಂಟ್ರೆರ್/ಪೂಜಾರಿಲು ವೀಳ್ಯ ಕೊರ್ಪುನ/ವೀಳ್ಯ ಪಾಡುನ ಕೆರಮ ಮಲ್ಪುವೆರ್ .(ಪೊಲಬು-ಗೋಪಾಲ ಕೃಷ್ಣ ಇರ್ವತ್ತಾಯ;ಧರ್ಮ ದೈವ ಯೂ ಟ್ಯೂಬ್ ವಾಹಿನಿ)

       ಪುರುಷರಾಯ ದೈವ ಭಂಗಿ ಒಯ್ಪುನಿ(ಇತ್ತೆ ಬೀಡಿ)

      ಪುರ್ಸ ದೈವ(ಬಂಗಿ ಒಯ್ಪುಂಡು.ಇತ್ತೆ ಬೀಡಿ)ದೊಟ್ಟುಗು ಒರ್ಂಬ ಬೂತೊಲುಲ್ಲ.ಅಂಚಾಂದ್ ನವನಾಥೆರ್ ಒರ್ಂಬ ಬೂತೊಲಾತ್ ನಿ ಪಂಡ್ ದ್ ಎನ್ಯಡೆ.ಬೈರವೆ,ನೆತ್ತೆರ್ ಮುಗುಳಿ,ಗಿಳಿರಾಮೆ(ರಾಜೆರೆ ಕಾಲೊಡು ಬೋಂಟೆ ದೇರುನ ಕೆರಮ ಇತ್ತ್ಂಡ್.ಪಕ್ಕಿ ನಿರಾನಿ ದೈವ ಉಂದು.ಬಿರು ಪಗರಿ ಉಪ್ಪುಂಡು. ಬೋಂಟೆದ ಒರುವಾಯಿ ದೈವ ಬೋಂಟೆ ದೇರುನ ಪೊರ್ತುಡು ಪಟ್ಟ್ ಗ್/ಬಲೆಕ್ ಕಡಮ ಬೂರುಂಡು‌.ಯಾನ್ ಇಂಚಿನಾಯೆಂದ್,ಯಾನ್ ದೈವಂದ್ ಪನ್ಪುಂಡು .ಎನನ್ ಕೆರೊರ್ಚಿಂದ್ ಅವು ನಟ್ಟ್ಂಡಲ ಅಕುಲು ಮುರ್ಗ ತಿನ್ಪುನಕ್ಲಾಯಿನೆರ್ದಾತ್ರ  ಅವೆನ್ ಹಾಕ್ವೆರ್.ಅವು ಅಲ್ತ್ ಪೆಟ್ಟ್ ದೆತೊಂದು ಬತ್ತ್ ದ್ ಚಾವಡಿಡ್ ಸೈಪುನಿ.ಕಡಮ ಸಂಧಿ ಉಂಡು.),ಬೆಮ್ಮೆರ್(ಬೆಮ್ಮೆರೆಗ್ ಪಂಚ ಪರ್ವ,ಪೇರ್),ಕೊಡಂಗೆದ ಪಂಜುರ್ಲಿ,ಬೆಮ್ಮೆರಜ್ಜಿ/ಬಿರ್ಮೆರಜ್ಜಿ,ಶಿರಾಡಿ(ರೆಕ್ಕೆ/ರೆಕ್ಯ ಶಿರಾಡಿಡ್ ಪುಟ್ಟುದು ಬಂಗಾಡಿದ ಕಜಕೆ ಬಂಡಾಜೆಗ್ ಬತ್ತ್ ದ್ ದೇವೆರೆನ್ ಪಿದಯಿ ಪಾಡ್ದ್ " ಪಿದಯಿದ ಸಾನ ಮಾನ ಇರೆಗ್ ದೇವೆರೆ,ಉಲಯಿದ ಸಾನ ಮಾನ ಎಂಕ್ಂದ್ " ಉಲಯಿ ಕುಲ್ದ್ ನ‌ ದೈವ ಶಿರಾಡಿ ದೈವ. ಕಜಕೆ ಬಂಡಾಜೆಡ್ ಇನಿಲಾ ದೈವೊಗು ಸುರುಕು,ದೇವೆರೆಗ್ ಬೊಕ್ಕ ಪೂಜೆ ),ಬಸ್ತಿ ನಾಯಕ(ಬೀಡಿ ಒಯ್ಪುಂಡು).ಇಂಚ ಒರ್ಂಬ ದೈವೊಲೆನ್ ಶಿರಾಡಿ ದೈವ ಲೆತೊಂದು ಪೋಪುನಿ.

ಜೋಗಿ ಪುರುಷ ರಾಯಗ್ ಮಲ್ಲಿಗೆದ ಮಲ್ಲ ಪರಕೆ ಉಂಡು.ಕೆರ್ಚಿ ತಾರಾಯಿದ ಕೈ ಪರಕೆಲ ಉಪ್ಪುಂಡು.ಮೇಲ್ಡ್ ಬೂರ್ನ ಸಿರ್ಕ್ ಲೆಗ್,ಮಾರಿ ಬೀರಿ ಸಿರ್ಕ್ ಲೆಗ್ ತನ್ನ ಶಕ್ತ್ಯಾನುಸಾರ ಬೊಳ್ಳಿದ ದಾದಾಂಡಲ ಪರಕೆ ಒಪ್ಪಿಪುವೆರ್.ಬಟ್ಟಲ್ ಕಾನಿಗೆ ಒಪ್ಪಿಪ್ಪುನ ಕೆರಮ ಪುರುಷರಾಯ ದೈವದ ಆರಾದನೆಡುಂಡು.ನರಮಾನಿ ಸಮ್ಮಂದೊಲು ಹಾಳಾದಿತ್ತ್ಂಡ,ಕುಟುಮದ ದೋಷೊಲೆಗ್ ಪುರುಷರಾಯ ದೈವೊಗು ಪರಕೆ ಪನ್ಪೆರ್.

ತುಳುನಾಡ ಪುರುಷಣ್ಣನಕುಲು ಜೋಗ್ಯಣ್ಣನಕುಲು.ಕೈಟ್ ಜೋಗಿತಂಬುರಿ/ಕಿನ್ನೆರಿ-ವೆಂಕಪ್ಪ ಪುರ್ಸೆರ್

ಚಿತ್ರ ಕೃಪೆ-ಕಲಾ ಕುಸುಮ ಯೂಟ್ಯೂಬ್.

ಮೊಕ್ಲು ಕಿನ್ನರಿ ಬಾರ್ಸಾವೊಂದು ಇಲ್ಲಿಲ್ಲಗ್ ಪೋದು ಕಿನ್ನರಿ ನುಡಿಸವೊಂದು ಮೂಡಾಯಿ ಗಟ್ಟ ಜತ್ತ್ ದ್ ತುಳು ನಾಡ್ ಗ್ ಬತ್ತ್ ನ,ಕದ್ರ ಮಂಜುನಾಥ ದೇವೆರೆನಡೆ ಬತ್ತ್ ದ್ ಅಲ್ತ್ ತುಳುನಾಡೊರ್ಮೆ ಬತ್ತಿ ಇಚಾರೊನು ಕನ್ನಡ,ತುಳು ಬಾಸೆ ಬೆರಕೆ ಮಲ್ತ್ ದ್ ಪದತ ಒರುಟು ಪನ್ಪೆರ್.ಮೊಕ್ಲೆಗ್ ತುಳುವೆರ್ ಅರಿ ತಾರಾಯಿ ಕೊರ್ಪೆರ್.ಮೊಕ್ಲು ಪಜೆ ಪೂರ ಮೊಡೆದ್ ದುಂಬು ಕನವೊಂತೆರ್.

ಸೋಣದ ಜೋಗಿ-

https://youtu.be/sy-ik4lgr98

75 ನೇ ಸ್ವಾತಂತ್ರ್ಯ ಅಮೃತ ಮಹೋಚ್ಛಯ

         75 ನೇ ಸ್ವಾತಂತ್ರ್ಯ ಅಮೃತ ಮಹೋಚ್ಛಯ

ನಾಗಬೀದಿ ನಾಗನಡೆ ನಾಗದೋಷ ಕಾಳಸರ್ಪ ದೋಷ ನಾಗಮಣಿ,ಕೊಪ್ಪರಿಗೆ ಬೊಕ್ಕ ಪೊಸ ನಮುನೆದ ನಾಗಮಂಡಲ

ನಾಗಬೀದಿ ನಾಗನಡೆ ನಾಗದೋಷ ಕಾಳಸರ್ಪ ದೋಷ ನಾಗಮಣಿ,ಕೊಪ್ಪರಿಗೆ ಬೊಕ್ಕ ಪೊಸ ನಮುನೆದ ನಾಗಮಂಡಲ.

ತುಳುವೆರೆ ಮೂಲ ನಾಗಾರಾದನೆ ನಮಕ್ ತೆರಿಯಂದಿನಾತ್ ಮೂಲೆ ಸೇರ್ದ್ಂಡ್.ನಾಗ ನಡೆ,ಸರ್ಪ ಜಿಡೆ ಪಂಚ ವರ್ಣದ ಪುಂಚದ ಮಣ್ಣ್ ದ ಮಿತ್ತ್ ಬದುಕುನ ತುಳುವೆರ್ ನಾಗನ್ ಎಡ್ಡೆಂತ್ ನಾಯೆಂದ್,ಪರಪುನಾಯೆಂದ್ ಪನ್ಪುನೆರ್ದಾದ್ ಎಡ್ಡೆಂತ್ ನಾಯೆ ಏಪಲಾ ತುಳುವೆರೆಗ್ ದೋಷ ಮಲ್ಪಯೆ,ಪರತ್ ಪೋಪುನಾಯೆ ಅಯನಾತೆಗೆ ಪರತ್ ಪೋವೆ.ನುಗ ನಾಯೆರ್ ಪೋಪುನ ಕಂಡೊಡು ನಾಗೆ ಸಾದಿ ತೆಲವೆ.ಅಂಚಾದ್ ನಾಗ ದೋಷ ತುಲುವೆರೆಗ್ ಇಜ್ಜಿ.ಏಪ ಮುಗ್ದ ತುಳುವೆರೆ ನಾಗಾರಾಧನೆಗ್ ಶಾಸ್ತ್ರ ಆಧಾರದ ಪೂಜೆಲು ಸುರಾಯನ ಅಡೆಗ್ ಪೊಸ ಪೊಸ ದೋಷೊಲು ಸೇರೊಂಡ.ದುಂಬು ನಾಗ ಬನೊಟು ಪೆರಿಯಾಕ್ಲೆ ಕಾಲೊರ್ದಿಂಚಿ ಅಕ್ಲಕ್ಲೆ ಹಿರಿಯಾಕ್ಲ್ ಮಲ್ತ್ ಲೆಕ ಇತ್ತೆಲ ಆರಾದನೆ ಮಲ್ತೊಂದು ಬತ್ತೆರ್ಡ ದೋಷದ ಉಪದ್ರ ಒಂತೆ ಕಮ್ಮಿಯಾವು.ತುಳುವೆರ್ ಮಾತ್ರ ಜೂವ ಬುಡೊಂದು ನಾಗರ ಪಂಚೆಮಿದಾನಿ ಪೇರ್ ಮೈಪೊಡುಗೆ.ಇಜ್ಜಿಂಡ ಅವು ನಾಗಗ್ ಸಂದುಜಿಗೆ.ಒರಿನಕುಲು ಪೂರ ಷಷ್ಟಿದಾನಿ‌ ಮೈತ್ಂಡಲ ಯಾರುಗೆ.ವಾ ನ್ಯಾಯ?.ನಾಗನ ಪುಂಚೊಗು ಲೀಟರ್ ಕಟ್ಲೆ ಪೇರ್ ಮೈತ್ಂಡ ಪುಂಚ ಕರದ್ ಪೋವು.ಪುಂಚೊಗು ಪೂ ಬಿರ್ಕುನ ಬದಲ್ ಅರಿಯಾ ಬಾರಾ ಬಿರ್ಕೊಲಿ..ಪುಂಚೊಗು ಬುಟ್ಟ ಬುಟ್ಟ ಪೇರ್ ಮೈತ್ಂಡ ಉದಲ ಪುಂಚದ ಅಂಟ್ ದೊಟ್ಟುಗು ಪೇರ್ ಸೇರ್ದ್ ಗಟ್ಟಿಯಾವು.ಅಪಗ ಪುಂಚ ಬರ್ಸೊಗು ಜರಿಯಂದ್

       ನರಮಾನಿಲು ಅನಾದಿಡ್ ಅಲೆಮಾರಿಲು ಆದಿತ್ತ್ ದ್ ಕಾಲ ಕರಿಲೆಕ ಅಕುಲು ಬದ್ ಕ್ ಕಟ್ಟೊನ್ರೆ ಕಾಡ ಬರಿಟ್,ತುದೆ ತೋಡ ಬರಿಟ್ ಬೆನ್ನಿ ಮಲ್ತೊಂದು ಇಲ್ಲ್ ಬದ್ ಕ್ ಕಟ್ಟೊಂಡೆರ್.ನಾಗಾರಾಧನೆಗ್ ಅಧ್ಯಯನ ಪ್ರಕಾರ ೫೦೦೦ ವರ್ಷದ ಇತಿಹಾಸ ಉಂಡು.ನರಮಾನಿ ಬದ್ ಕ್ ಕಟ್ಟೊನ್ನ ಒಟ್ಟೊಟ್ಟುಗು ನಾಗಾರಾದನೆ ಸುರಾತ್ಂಡ್.70% ಕಾಡುಲು,ಪೆರಣಿಲು ಇತ್ತ್ ದ್ ನರಮಾನಿಲು 30%ಮಾತ್ರ ಅಪಗ ಇತ್ತೆರ್.ಏಪ ನರಮಾನಿ ನೀರ್ ನಿಲೆ ಉಪ್ಪಿ ಜಾಗೆಡ್ ಬದ್ ಕ್ ಕಟ್ಟೊಂಡೆನಾ ಆನಿರ್ದ್ ಬೊಕ್ಕ ಬೆನ್ನಿನ್ ನಾಶ ಮಲ್ಪುನ ಪೆರಣಿಲೆನ್ ಬೋಂಟೆ ದೇರ್ಯೆರೆ ಸುರು ಮಲ್ತೆ.ಅಂಚಲಾ ಅವೆಕ್ಲೆನ್ ಗೆಲ್ಪೆರೆ ಆಯಿಜಿಂದಾನಗ ಪೆರಣಿಲೆನ್ ದೈವ ಆದ್ ನಂಬ್ಯೆರೆ ಸುರು ಮಲ್ತೆ.ನರಮಾನಿ ಕಾಡ ಬರಿಟ್,ನೀರ ಬರಿಟ್ ಬದ್ ಕ್ ನಗ ಆಯನ್ ಮುದಲೆಲು ನಿಂಗೊಂತ.ಅಪಗ ಅವೆನ್ ಗೆಲ್ಪೆರಾವಂದೆ ಅವೆತ ಉಗ್ರ ಶಾಂತ ಆವಡ್ಂದ್ ಲೆಕ್ಕೆಸಿರಿಯಾದ್ ಬನೊಟು ನಂಬ್ಯೆರೆ ಸುರು ಮಲ್ತೆ.ಇನಿ ತುಳುನಾಡ ಲೆಕ್ಕೆಸಿರಿ ದೈವದ ಪುದರ್ ದೇವಿ ಮಹಾತ್ಮೆ ಆಟದ ರಕ್ತೇಶ್ವರಿಯಾಂಡ್.ಕಟ್ಟುನಾಯೆಲ  ಎಣ್ಣೆ ವೀಳ್ಯ ದೆತೊನ್ನಗ ಲೆಕ್ಕೆಸಿರಿನ್ ಮದತ್ ದ್ ರಕ್ತೇಶ್ವರಿಗ್ ಎಣ್ಣೆವೀಳ್ಯ ಪತ್ತುವೆಂದ್ ಪನೊಂದುಲ್ಲೆ. ಕಾಡ ಮುರ್ಗೊಲೆನ್ ಗೆಲ್ಪೆರೆ ಆಪುಜಿಂದಾನಗ ಅವೆಕ್ ಸಂಪೂರ್ಣ ಶರಣಾದ್ ಅವೆನ್ ಆರಾದನೆ ಮಲ್ತ್ಂಡ ಅವೆತ ಉಪದ್ರ ಕಡಮೆ ಆವು ಪನ್ಪಿ ನಂಬೊಳಿಗೆ .ನಾಗನ್ ಸುರುಕಾದ್ ಬನೊಟು ನಂಬಿನ ತುಳುವೆರ್ ಪಂಜಿನ್ ಪಂಜುರ್ಲಿಯಾದ್,ಮುದಲೆನ್ ಲೆಕ್ಕೆಸಿರಿಯಾದ್,ಪಿಲಿನ್ ಪಿಲ್ಚಂಡಿಯಾದ್,ಬೊಲ್ಕಂದೊಡಿನ್ ಗುಳಿಗೆ ಆದ್,ಕಾಡ್ ಗೋಣನ್ ಮೈಸಂದಾಯೆ ಆದ್,ಸುರುತ ಇಸಜಂತು ಅರಣೆನ್ ಬೆಮ್ಮೆರಾದ್ ಆರಾದನೆ ಸುರು ಮಲ್ತೆರ್.ಅಂಚಾದ್ ಅರಣೆ ಕಲ್ಲ್,ಮುದಲೆ ಕಲ್ಲ್ ತುಳುನಾಡ ಕೆಲವೊಂಜಿ ಬನೊಕ್ಲೆಡ್ ತೂವೆರೆ ತಿಕ್ಕೊಂತ.

 

ಒಂಜಾತ್ ವರ್ಸದ ದುಂಬು ನಾಗನ ಕಟ್ಟೆ ಎತ್ತರೊಡಿತ್ತ್ ದ್ ತಿರ್ತ್ ಉಂತುದು ಪೂಜೆ ಮಲ್ತೊಂತೆರ್

          

  ತುಳುವೆರ್ ಅನಾದಿರ್ದೇ ನಾಗನ್ ದೈವ ಆದ್ ,ದೇವೆರಾದ್ ನಂಬೊಂದು ಬತ್ತೆರ್.ಅಂಚ ದೇವೆರಾದ್ ನಂಬ್ಯೆರ್ಲ ಕಾರಣ ಉಂಡು.ಮಾತ ಉಚ್ಚುಲು ಕೊಡತ್ ದ್ ಪೋಪ.ಆಂಡ ನಾಗೆ ಮೂಜಿ ಮೂಜಿ ಸರ್ತಿ ಸಾರ್ ದ್ ಬೊಕ್ಕ ನರಮಾನಿಯಗ್ ತುಚ್ಚು.ನಾಗೆ ತುಚ್ಚಿದ್ ಸೈತ್ ನ ಇತಿಹಾಸನೇ ಕಮ್ಮಿ.ನಾಗೆ ಪೋಡಿಗೆ ಆನಗ ಸುರುಕು ಜಿಡೆ ದೆರ್ಪುಂಡು.ರಡ್ಡನೆದಾದ್ ಸುಯ್ಂಪುಂಡು.ಮೂಜನೆದಾದ್ ನೆಲಕ್ ಕೊಡಪುಂಡು.ಕಡೆಕ್ ತುಚ್ಚು ಆತೆ.ನಾಗಗ್ ನಮ ಒಂಜಾತ್ ನಿಮಿಷೊಲೆ ಅಂತರೊಡು ಸಾರ್ದ್ ಪಂಡ ಒಂಜಿ ಸರ್ತಿ ಸಾರ್ನಗನೆ ನಾಗೆ ಅಲ್ತ್ ಲಕ್ಕ್ ದ್ ಪೊಪುಂಡು.ನಾಗೆ ಪನ್ಪುನವು ಒಂಜಿ ಉಚ್ಚು.ಅವೆನ್ ಸರ್ಪೆಂದ್ ಲ ಪನ್ಪೆರ್.ತುಳುನಾಡ ನಾಗಗ್ ಮಂತ್ರ ಇಜ್ಜಿ,ಮದಿಪು ಮಾತ್ರ,ತುಳು ನಾಡ ನಾಗಗ್ ಮೂಲದಕ್ಲ್ ಪನಿವಾರ ಬಲಸೊಂತೆರ್.ಪೇರ್ ಮೈತೊಂದಿಜ್ಜಾಂಡ್.ನಾಗೆ ಪೇರ್ ಪರ್ಪುನ್ಲಾ ಇಜ್ಜಿ.ಪರ್ಂಡ ಬದುಕುಜಿ.ಕಲ್ಲ್ ಗ್ ಪೇರ್ ಮೈಪೊಲಿ ಆತೆ.ತುಳುನಾಡ ನಾಗಗ್ ಸರ್ಪಕೋಲ ಮಣ್ಣ ಮಡತ್ತಾನದೊರುಟು ಮಲ್ತೊಂತೆರ್.ತಮಿಲ್ನಾಡ್ ಡ್ ತೆತ್ತಿ ನಿಂಗುನ ನಾಗನ ಕಲ್ಗ್ ಗ್ ತೆತ್ತಿದನೆ ಅಭಿಷೇಕ. ವೇದೊಲೆಡ್ ನಾಗೆ ಪಂಡ ಕುಂಡಲಿನಿ ಸಗ್ತಿದ ಒರುಂದು ಪನ್ಪೆರ್.ನಮ್ಮ ಬೆರಿ ಎಲುತ ರಚನೆಲಾ ನಾಗನ ಸರ್ರದ ರಚನೆಲ ತೂವೆರೆ ಒಂಜೇ ಲೆಕ್ಕ.ಸೂಕು,ನೀರ್ ಗ್,ಕಿದೆ ಬರಿಟ್ ಪರಿತ್ ಪೋಪುನ ಮಂಜಲ್ ರಂಗ್ ದ ನೀರ್ ಗ್ ನಾಗ ಪನ್ಪೆರ್.ನಾಗ ಬನೊಕ್ಲೆನ್ ದೇವರಕಾಡು,ಕಾಪು,ಕಾನ,ಬನ,ನಾಗಬನ ಇಂಚ ಬೇತೆ ಬೇತೆ ಪುದರ್ಡ್ ಲೆಪ್ಪುವೆರ್.

   ತುಳುವೆರ್ ಪಿಲಿ ಪಂಜಿ ಸಿಮ್ಮೊಗು ಪೋಡ್ಯಂದೆ ಬೋಂಟೆ ದೇರ್ಯೆರ್.ಅವು ಎದುರು ಕಣ್ಣ್ ಗ್ ತೋಜೊಂತ.ಆಂಡ ಉಚ್ಚು ಅಂಚತ್ತ್.ಅವು ಕಣ್ಣ್ ಗ್ ಒರ ತೋಜಿಂಡ ಕುಡೊರ ಮಯಕಾವು.ಅವು ತುಚ್ಚಿಂಡ ನಮ ಬದ್ ಕಯಂದ್ ತೆರಿನ ತುಳುವೆರ್ ನಾಗಾರಾದನೆ ಸುರು ಮಲ್ತೆರ್. ಇಸತ ಉಚ್ಚುಲೆರ್ದ್ ನಾಗೆ ಬೇತೆ ಆದ್ ತುಳುವೆರೆಗ್ ತೋಜ್ಯೆ.ನಾಗನ ಅರ್ಲಿನ ಜಿಡೆ ತೂವೆರೆ ಬಾರೀ ಪೊರ್ಲು.ತುಚ್ಚಿಂಡ ಅವೆತ ಇಸೊಟು ನರಮಾನಿ ಬದುಕುಜೆ.ನಾಗೆ ಬೆನ್ನಿಗ್ ಮಲ್ಪುನ ಸಕಾಯೊನು ತೂದು ಎರಿಯಾಕುಲು ನಾಗನ್ ನಂಬೊಂದು ಬೈದೆರ್.ಕೆಯ್ ಕೊಯ್ಯೆರಾನಗ ಅವೆನ್ ತಿನೆರೆ ಪಕ್ಕಿ,ಪಾಂತೆಲು,ಪಂಜಿ,ಮಂಗೆರ್ಲು ಬನ್ನಗ ಅವೆನ್ ಗಿಡೆಪೆರೆ,ತಿನೆರೆ ಮಾತ ಜಾತಿದ ಉಚ್ವುಲು ಬರ್ಪ.ಅಡೆಗ್ ಸಾಗೊಳಿದಾಯೆ ಬತ್ತೆಡ ಮಾತ ಉಚ್ಚುಲು ಪಾರ್ಂಡ ನಾಗೆ ಅವ್ಲೆ ಓಲಾಂಡಲ ಕಬ್ಬುದು ಕುಲ್ಲುದು ಅಕ್ಲ್ ಪೋಯಿ ಬೊಕ್ಕ  ಕಂಡದಡೆ ಕುಡ ಬರ್ಪೆ.ಪಕ್ಕಿ ಪಾಂತೆಲೆನ್ ತಿನರೆ ವರ್ಸ ಬೋಡಾಂಡಲ ನಾಗೆ ಕಾತ್ ಕುಲ್ಲುವೆ.30%ದಾತ್ ಬಾರ್ ನ್ ಎಲಿ ಪೆರ್ಗುಡೆರ್ದ್ ನಾಗೆ ನಮಕ್ ಒರಿತ್ ಕೊರ್ಪೆ.ಅಂಚನೆ ಕೆಯ್ ಕೊನೊದು ಇಲ್ಲ ಜಾಲ್ ಗ್ ಬೆನ್ನಿದಾಯೆ ಪೋನಗ ನಾಗೆ ಆಯನ ಪಿರವೆ ಪೋಪೆ. ಬಾರ್ ರಾಸಿ ಪಾಡ್ದ್ ನ ತುಪ್ಪೆಗ್ ಬರ್ಪಿ ಎಲಿ ಪೆರ್ಗುಡೆನ್ ತಿನೆರೆ ಅವ್ಲೆ ಕಾಪುವೆ.ನಾಗನ ಪೊರ್ಲ ಜಿಡೆ,ಬದ್ಕ್ ಕರಿಪುನ ಇಸ,ತನ್ನ ಬುಳೆಕ್ಲೆಗ್ ಕಾಪಾದಿತ್ತ್ ನ ನಾಗನ್ ತುಳುವೆರ್ ದೈವ ಆದ್ ನಂಬ್ಯೆರ್.ಅಂಚಾದ್ ನಾಗನ ಪುಂಚದ ಬನೊಕ್ಲೆನ್ ನಾಗಗಾದ್ ಒರಿತೊಂದು ಬತ್ತೆರ್ ತುಳುವೆರ್.ಇತ್ತೆದಕುಲ್ಲೆಕ ಜೀರ್ಣೋದ್ಧಾರಂದ್ ಬನೊನು ನಾಶ ಮಲ್ದ್ ಜೆರ್.ನಾಗ ಬನೊನು ಜೀರ್ಣೋದ್ಧಾರದ ಪುದರ್ಡ್ ನಾಶ ಮಲ್ತ್ಂಡ ಉಚ್ಚುಲು ನಮ ಇತ್ತ್ ನಡೆ ಬರಂದೆ ಓಡೆ ಪೋವೊಡು?.ಅಂಚ ಬನ್ನಗ ಅವು ಸಾದಿಡ್ ವಾನದಡಿಕ್ ಬೂರ್ದು ಸೈತ್ಂಡ ಸರ್ಪ ಸಂಸ್ಕಾರಲ ನಮಡನೆ ಮಲ್ಪವೆರ್.ತಪ್ಪು ಮಲ್ತ್ ನಾಯಗ್ ಸಿಗ್ಸೆ ಇಜ್ಜಿ.ಮಲ್ಪಂದಿನಾಯೆ ಅನುಬವಿಪೊಡು.ನಾಗನ ಸಂತಾನ ಒರಿಪೆರೆಗಾದ್ ತುಳುವೆರ್ ಬನೊಕ್ಲೆನ್ ಬುಡ್ದು ಬುಡ್ಯೆರ್.ಕಾಲ ಕರಿಲೆಕ ಅವ್ಲು ನಾಗಾರಾದನೆ ಸುರು ಮಲ್ತ್ ದ್ ಅಡೆ ಪಾವಿತ್ರ್ಯತೆ ಬತ್ತ್ಂಡ್.

       

   ನಾಗಬನ ದುಂಬು ಪೂರಾ ಬಾರೀ ವಿಸ್ತಾರವಾದ್ ಇತ್ತ್ಂಡ್.ಎಲ್ಯೆಲ್ಯ ಬನೊಕುಲ್ಲಾ ಇತ್ತ.2006ತ ಪೊರ್ತುಡು ಒಂಜಿ ಮೂಲದ ಪ್ರಕಾರ ದ.ಕ,ಒಡಿಪು ಜಿಲ್ಲೆಡ್ 16000 ಬನೊಕ್ಲಿತ್ತ್ ದ್ ಇತ್ತೆ ಅವೆತ ಅರ್ದ ವಾಸಿಲ ಇಜ್ಜಿ.ಇತ್ತ್ ನ ಬನೊಕ್ಲೆನ್ ಒರ್ತೊನುನ ಅನಿವಾರ್ಯತೆ ನಂಕುಂಡು .ಅ ಬನೊಕ್ಲೆಡ್ ನೂದು ನೂತ್ತೈವ ಜಾತಿದ ಮರ ದೈಕುಲಿತ್ತ.ನಾಗ ಬನೊಟು ಉಪ್ಪುನ ಮಲ್ಲ ಮಲ್ಲ ಮರೊಕ್ಲು ಸುಮಾರ್ 5000ಲೀಟರ್ ನೀರ್ ನ್ ಬೇರ್ ಡ್ ಒರಿತೊಂದು ವರ್ಸ ಇಡೀ ಬೂಮಿಗ್ ವಸರಾದ್ ಕೊರೊಂತ..ಅಂಚಾದ್ ಬನೊಕ್ಲೆ ಸುತ್ತಮುತಲಿಗೆದ ಇಲ್ಲದ ಗುವೆಲ್ಲೆಡ್ ವರ್ಸ ಇಡೀ ನೀರ್ ಇಪ್ಪೆದ್ಂಡ್.ಬನೊಕ್ಲೆನ್ ಕಡ್ತ್ಂಡ ಅವೆತ ಸುತ್ತ ಮುತಲಿಗೆದ ಗುವೆಲ್ಲೆಡ್ ನೀರ್ ಆಜುಂಡು.ಉದಲುಲು ಪುಂಚದ ಒರುಟು ಬೂಮಿದಡಿಕ್ ನೀರ್ ಕಂತವೊಂತ್ಂಡ್.ಬೋಡಾಯ್ನಾತ್ ಪಕ್ಕಿಲು ಬನೊಕ್ಲೆಡ್ ಗೂಡು ಕಟ್ಟ್ ದ್ ದೈತ ಬಿತ್ತ್ ಲೆನ್ ಮಾತ ತಿಕ್ ಗ್ ಪದ್ ರ್ದ್ ಪರಿಸರೊಗು ಸಕಾಯ ಅವೊಂತ್ಂಡ್.ಬನೊಟು ಪಾಂತೆ,ಕ್ರಿಮಿ ಕೀಟೊಲು ಪೂಕು ಪರಾಗಸ್ಪರ್ಷ ಕೊರೊಂತ,ಪೊಸ ಪುಟ್ಟುಗು ಕಾರಣ ಆವೊಂತ.ಬನೊಕ್ಲೆ ಮರೊಕ್ಲೆರ್ದಾದ್ ಪೊರ್ಲುದ ಗಾಳಿದ ಸಂಪುದೊಟ್ಟುಗು ಆಮ್ಲಜನಕ ತಿಕ್ಕೊಂತ್ಂಡ್.ನಕ್ಕುರುಲು ಬೆನ್ನಿ ಸಾಗೊಳಿದ ಕಂಡೊಗು ಸಕಾಯ ಮಲ್ತೊಂತ.ಮಲ್ಲ ಮಲ್ಲ ಪುಂಡು ಪುದೆಲ್ಡ್,ಬನೊಕ್ಲೆ ಬರಿಟ್ ಉದಲ್ದ ಪುಂಚ ಇತ್ತ್ಂಡ್.ಸೈತ್ ನ ಮರೊಕ್ಲೆಡ್ ಸೆಲ್ಯುಲೋಸ್ ಪನ್ಪಿ ರಾಸಾಯನಿಕ ಇತ್ತ್ ದ್ ಅವು ಮಣ್ಣ್ ಡ್ ಕರವೊಂದಿಜ್ಜಾಂಡ್.ಆಂಡ ಉದಲ್ ಅಂಚಿನ ಸೈತಿ ಮರೊಕ್ಲೆನ್ ತಿಂದ್ ದ್ ಅವೆತ ಬಂಜಿಡ್ ಅವು ಕರದ್ ಬಂಜಿದ ಪೀಟ್ ಮಣ್ಣ್ ಗ್ ಗೊಬ್ಬರ ತಿಕ್ಕೊಂತ್ಂಡ್.ಓಲು ನೀರ್ದ ಪಸೆ,ಪಚ್ಚೆ ಪಜಿರುಪ್ಪುಂಡ ಅವ್ಲು ಉದಲ್ದ ಪುಂಚ ಉಪ್ಪುಂಡು.ಅಂಚಾದ್ ಪುಂಚ ದರ್ಪುನವು ಅಪರಾಧ.ನೀರ್ ದ ಮೂಲ,ಗಾಳಿದ/ಆಮ್ಲಜನಕದ ಮೂಲ ಆಯಿನ ನಾಗ ಬನೊನು ಜೀರ್ಣೋದ್ಧಾರ ಮಲ್ಪುನವು ತಪ್ಪು.ಅವೆನ್ ಅಂಚನೆ ಒರ್ತೊನೊಡು.ಇಜ್ಜಿಂಡ ಜೀರ್ಣೋದ್ದಾರ ಮಲ್ಪೆರೆ ಪಿದಡ್ಂಡ ಪರಿಸರ ಹಾಳಾವು .ಇನಿ ದಾದಾತ್ಂಡ್ ಪಂಡ ದೂರದೂರು/ರಾಜ್ಯ ದೂರ ದೇಶೊಗು ಪೋಯಿನಕುಲು ಅಕುಲೆಗ್ ದಾದಾಂಡಲ ಅಡ್ಡವಿಡ್ಡೂರೊಲು ಬತ್ತ್ಂಡ್ಂದ್ ಪ್ರಶ್ನೆ ಚಿಂತನೆ ಮಲ್ಪುನಗ ಪ್ರಶ್ನೆ ದೀನಕುಲು ನಿಕ್ಲೆ ಮೂಲ ನಾಗ ಬನ ಜೀರ್ಣೋದ್ಧಾರ ಆತ್ ಜಿ,ಅವೆನ್ ಜೀರ್ಣೋದ್ದಾರ ಮಲ್ತರ್ಡ ಸರಿಯಾಪುಂಡುಂದು ಪನ್ಪೆರ್.ಅಲ್ತ್ ಊರುಗು ಬತ್ತಿನಕುಲು ಸುರುಕು ಮೂಲ ನಾಗಬನ ನಾಡ್ವೆರ್.ಏರಾ ಬಾಸೆ ದಾಂತಿನಕುಲು ಪಂಡೆರ್ಂದ್ ಬನೊಕ್ಲೆನ್ ಕಡ್ಪಾದ್ ಅವ್ಲು ಸಿಮೆಂಟ್ ದ ಕಟ್ಟೆ ಕಟ್ಟ್ ದ್ ನಾಗನ  ಮೂರ್ತಿ ಕುಲ್ಲವೆರ್.ದೋಷ ಬರ್ಪುಂಡುಂದು ದುಂಬೇ ಪೋಡಿನ ನಮ ಅಕ್ಲೆನೊಟ್ಟುಗು ಸೇರೊಂದು ಮೂಲ ನಾಗ ಬನೊನು ನಾಶ ಮಲ್ಪುವ.ಬನೊನು ಕಡ್ಪಾಂಡ ನಮಕ್ ಖಂಡಿತಾ ದೋಷ ಬರ್ಪುಂಡು.ನಾಗ ಬನೊನು ಅಂಚನೇ ಬುಡ್ದು ನಮ್ಮ ಪರಿಸರೊನು ಸಂರಕ್ಷಣೆ ಮಲ್ಪುನ ಜವಾಬ್ದಾರಿ ತುಳುವೆರಾಯಿನ ನಮ್ಮ ಮಿತ್ತುಂಡು.ನಾಗ ಬನೊನು ಸೃಷ್ಠಿ ಮಲ್ತ್ ದ್ ನ್ನೇ ನಮ್ಮ ಪೆರಿಯಾಕುಲು.ನಾಗ ಬನೊನು ಜೀರ್ಣೋದ್ಧಾರ ಮಲ್ಪೊಡುಂದು ವಾ ಶಾಸ್ತ್ರೊಲೆಡ್ಲಾ ಪಂತ್ ಜೆರ್.ದೇವಸ್ತಾನೊಲೆನಂಡ ಜೀರ್ಣೋದ್ದಾರ ಮಲ್ಪೊಡು.ನಾಗ ಬನೊನು ಜೀರ್ಣೋದ್ದಾರ ಮಲ್ಪುನ ಕಟ್ಟೇ ಇಜ್ಜಿ.ನಾಗ ಬನೊಕ್ಲೆನ ಮರೊಕ್ಲು ಮುಗಲ್ ನ್ ತಾಂಗ್ ದ್ ಉಂತದ್ ಬರ್ಸ ಬರ್ಪಾವುಂಡು.ಬನ‌ ನಾಶ ಅವೆರೆ ಬಲ್ಲಿಂದ್ ಬನೊನು ದೇವೆರೆ ಕಾಡ್ಂದ್(ನಾಗ) ಅಲ್ತ ಬಜಕ್ರೆ ಬೂರ್ನೆನ್ಲ,ಅಡರ್ ಬೂರ್ನೆನ್ಲಾ ತುಳುವೆರ್ ಮುಟ್ಟೊಂದಿಜ್ಜಾಂಡ್.ಬನೊಕ್ಲು ಅನಿರ್ದ್ ಇನಿಮುಟ್ಟ ನಮನ್ ಒರಿತೊಂದು ಬೈದ್ಂಡ್.ನಮನ್ ಒರಿಪುನ ಬನೊನು ನಾಶ ಮಲ್ಪುನ ಸಾಸೊಗು ನಮ ಕೈ ಪಾಡೆರೆ ಬಲ್ಲಿ.

  

  ಇತ್ತೆ ಕಟ್ಟೆದ ಮಿತ್ತ್ ಉಂತುದು ನಾಗಗ್ ಪೇರ್ ಮೈಪುವೆರ್.ಆ ಬನ/ಕಟ್ಟೆಗ್ ಸಮ್ಮಂದ ಪಟ್ಟ್ ನಕುಲು ಕಟ್ಟೆದ ತಿರ್ತ್ ಉಂತಿಪ್ವೆರ್.ಕಟ್ಟೆಡ್ ಉಂತಿನಾರ್ ನಾಗನ ಕಲ್ಲ್ ಗ್ ಪೇರ್ ಮೈಪುನಗ ಅವು ಅರೆನ ಕಾರ ಮುದೆಲ್ ತಾಗ್ ದ್ ಪರತಿ ಬೊಂಡದ ನೀರ್,ಪೇರ್ ನ್ಲ ಸೀರ್ತ ಆದ್ ಪರ್ಪುನ ಕಾಲ ಬೈದ್ಂಡ್.ಮೈಪುನಾರ್ ಏತ್ ಕಾರ್ ದೆಕ್ಕ್ಂಡಲ ಆಟಿದ ಪೊರ್ತುಡು ನರಮಾನ್ಯನ ಕಾರ್ ಪುರಿ ತಿಂದ್ ದುಪ್ಪುಂಡು.ಅಂಚಾದ್ ಆಟಿಡ್ ಕಂಡ ದೊಂಕೊಂತೆರ್.ಕಲವೊಂಜಿ ದೇಲ್ಯದ ಮೂರ್ತಿಲೆಗ್ ಅಭಿಷೇಕ ಮಲ್ಪುನಗ ಪಾಣಿ ಪೀಠೊರ್ದ್ ತಮೆಲ್ನ ನೀರ್ ಅಭಿಷೆಕ ಮಲ್ತಿನಾರೆನ ಪಾದದಡಿಟೆ ದೇಲ್ಯದ ಪಿದಯಿ ಬನ್ನಗ ಅವೆನ್ಲಾ ನಮ ಇನಿ ಸೀರ್ತಂದ್ ಪರ್ಪುನ ಪರಿಸ್ಥಿತಿ ಬೈದ್ಂಡ್ .ಅಂಚನೆ ದುಂಬುದ ಇಲ್ಲದ ಉಲಯಿ ಪೊಗ್ಗ್ ನಗ,ದೇಲ್ಯ,ದೈವಾಲ್ಯದ ಉಲಯಿ ಪೊಗ್ಗ್ ನಗ ತರೆ ತಗ್ಗಾದ್ ಪೋವೊಡಿತ್ತ್ಂಡ್.ಇಲ್ಲದ ಜಾಲ ತೊಲಚಿ ಕಟ್ಟೆಲ ಇಲ್ಲದ ಪಾಯದ ಸಮೊಕಿತ್ತ್ ದ್ ನಮ ತರೆನ್ ತಗ್ಗದ್ ತೊಲಸಿಗ್ ನೀರ್ ಮೈತೊಂತ.ನಮ ದೇವೆರೆಗ್ ಕುಲ್ಲುದು ಪೂಜೆ ಆರತಿ ಮಲ್ತ್ಂಡಲ ಕಡೇಕ್ ಉಂತುದು ಬಗ್ಗ್ ದೇ ಆರತಿ ಮಲ್ಪೊಡು.ದೈವ ದೇವೆರೆ ಎದುರು ತರೆ ದೆರ್ತ್ ದ್ ಮಿತ್ತನ್ನಾದ್ ಆರಾದನೆ ಮಲ್ಪುನ ಕೆರಮ ಇಜ್ಜಾಂಡ್.ಇನಿ ಪೂರ ನಾಗನ ಕಟ್ಟೆಲು ಎತ್ತರೊಡಿತ್ತ್ ದ್ ಕಟ್ಟೆಗ್ ಸಮ್ಮಂದ ಪಟ್ಟ್ ನಕುಲು ಕಟ್ಟೆದ ತಿರ್ತುಂತುದು ನಾಗ ದೇವೆರೆನ್ ಮಿತ್ತನ್ನಾದ್ ತೂಪಿನ ತೂನಗ ಏರೆನವೋ ಕಾರ ಮುದೆಲ್ ಗ್ ನಮ್ಮ ತರೆ ದೀಪುನ  ಪರಿಸ್ಥಿತಿ ಬೈದ್ಂಡ್ಂದ್ ತೋಜುಂಡು

   

ನಾಗನಡೆ,ನಾಗಬೀದಿ-

ನಾಗ ನಡೆ ಪಂಡ ನಾಗೆ ಪರತೊಂದು ಪೋಪಿನ ಜಾಗೆಂದರ್ಥ.ನಾಗ ಬೀದಿಲ ಉಂದೇ ಅರ್ಥೊನು ಕೊರ್ಪುಂಡು.ನಾಗೆ ಅವಡ್ ಸರ್ಪೆ ಆವಡ್-ನಾಗನಡೆ,ಸರ್ಪ ಜಿಡೆ ಆವಡ್ ನಾಗೆ,ಸರ್ಪೆ ಅವ್ವೊಂಜಿ ಸರಿಸೃಪ/ಉಚ್ಚು.ನಾಗೆ ಬೇತೆ ಉಚ್ಚುದಲೆಕ ಅಪಗಪಗ ಜಾಗೆನ್ ಬದಲ್ಪುಜಿ.ಅವು ಒಂಜಿ ಪುಂಚೊರ್ದು ನಿಚ್ಚ ಆಹಾರ ತಿಕ್ಕುನ ಸಾದಿಡ್ ದಿನೋಲ ಪೋವೊಂದಿಪ್ಪುಂಡು.ಅಂಚಿನ ಜಾಗೆಡ್ ಏರಾಂಡಲ ಒರಿ ಇಲ್ಲಾ,ಕಟ್ಟೊನೊನ ಕಟ್ಟಂಡ ಉಚ್ಚುಗು ಪೂಪುನ ಸಾದಿಡ್ ದಾದ ಅಡ್ಡಂದ್ ಗೊತ್ತಾಪುಜಿ.ಅಪಗ ಅವು ಆ ಜಾಗೆಗ್ ಬೆರಿ ಬೆರಿ ಬರ್ಪುಂಡು.ಕೆಲವೊರ ಇಲ್ಲದುಲಯಿ ಆಹಾರ ಇತ್ತ್ಂಡ ನಾಗೆ ದಿನೋಲ‌ ಇಲ್ಲಗ್ ಸುತ್ತು ಸುತ್ತು ಬರ್ಪುಂಡು. ಅವು ವೈರಿಲೆನ್ ತಪ್ಪವೊಂದು ತಪ್ಪವೊಂದು ಒಂಜಿ ನಿರ್ದಿಷ್ಟ ಸಾದಿಡ್  ಒಂಜಿ ತಿಕ್ ರ್ದ್ ಕುಡೊಂಜಿ ತಿಕ್ ಗ್ ಪೋವೊಂದಿಪ್ಪುಂಡು.ಅಂಚ ಪೋನಗ ಅಡ್ಡ ಅಯಿನ ಕಟ್ಟೊನದಡೆ ಬೆರಿ ಬೆರಿ ಬತ್ತ್ಂಡ ಅವೆನ್ ನಾಗ ದೋಷಂದ್ ಪನ್ಪುನವು ತಪ್ಪು.ನಡೆ ಪಂಡ ಸಂಚಾರ ಮಲ್ಪುನ ನಿರ್ದಿಷ್ಡ ಸಾದಿಂದರ್ಥ.ಅವು ಅವೆತ ಆಹಾರೊನು ತಿನೆರೆ ಪೋಪುನ ಸಾದಿ ಅವು.ಅವೆಕ್ ಅಡ್ಡ ಕಟ್ಟೊನ ಬತ್ತ್ ನ ಗೊತ್ತಿಪ್ಪುಜಿ.ಅಂಚ ಅಡೆ ಅಪಗಪಗ ಬತ್ತ್ಂಡ ನಾಗ ದೋಷಂದ್ ಆಷ್ಲೆಶ ಬಲಿ ಮಲ್ತ್ ದ್ ಪೆರಜನ ಇಜ್ಜಿ.ನಾಗ ದೋಷಂದ್ ಇಜ್ಜಾಂದಿ ಪೂಜೆ ಮಲ್ಪುನ ಬದ್ಲ್ ಅಡೆಗ್ ಉಚ್ಚು ಪತ್ತುನಕ್ಲೆನ್ ಲೆತೊಂದು ಬತ್ತರ್ಡ ಅವೆಕ್ ಆಹಾರ ತಿಕ್ಕುನ ಜಾಗೆಗ್ ಅಕುಲು ಅವೆನ್ ಜಾಗ್ ರ್ತೆಡ್ ಬುಡ್ದು ಬುಡ್ಪೆರ್.ಅಡೆಗ್ ಸಮಸ್ಯೆ ಪರಿಹಾರ ಆಂಡ್.ಪುಟ್ಟ್ ನೆರ್ದ್ ಸೈಪುನಡೆಮುಟ್ಟ  ವೈರಿಲೆರ್ದ್ ಎಂಚ ತಪ್ಪಾದಿಪ್ಪೊಡುಂದು ಅವೆಕ್ ಹುಟ್ಟರಿವು ಉಪ್ಪುಂಡು.ನಾಗಗ್ ಪಿಜಿನ್ ರ್ದ್ ಆನೆಮುಟ್ಟ ವೈರಿಲು ಉಪ್ಪುನಿ.ನಾಗ ನಡೆ,ನಾಗ ಬೀದಿ ಪಂಡ ನಾಗೆ ಪರತ್ ಪೋಪಿನ ಜಾಗೆ.ನಾಗೆ ಪುಟ್ಟುರ್ದು ಸೈನೇಟ ಎಚ್ಚಾದ್ ಆಹಾರ ತಿಕ್ಕುನಿಯಂಡ ಅವ್ಲೆಉಪ್ಪುಂಡು.ಅವು ಬೊಕ್ಕೊಂಜಿ ಜಾಗೆನ್ ನಾಡೆರೆ ಬಾರೀ ವರ್ಸ ಗೆತೊನುಂಡು.ಏರೆಗ್ಲ ಉಪದ್ರ ಕೊರ್ಪುಜಿ.ನಾಗನ್ ಪತ್ತ್ ದ್ ಬೇತೆ ಜಾಗೆಡ್ ಬುಡುಂಡ ನಾಗ ನಡೆ,ನಾಗ ಬೀದಿದ ನಾಗನ ಉಪದ್ರ ಮಯಕಾವು.ಅವು ಬುಡ್ದು ನಾಗ ಬೀದಿ,ನಾಗನಡೆಂದ್ ಕಟ್ಟೊನೊಲೆನ್ ಪೊಲ್ತ್ ದಕ್ಕ್ಂಡ ನಂಕೇ ಪೋಯಿನಿ.

   

ನಾಗದೋಷ,ಕಾಳಸರ್ಪ ದೋಷ-

ತುಳುನಾಡ ಮೂಲ ತುಳುವೆರ್  ಅಕ್ಲೆಗ್ ತೆರಿ ಮಟ್ಟ್ ಡ್ ಬನೊಕ್ಲೆಡ್ ನಾಗನ್ ಅರಾದನೆ ಮಲ್ತೊಂತೆರ್.ಇನಿ ಅಡೆ ಬತ್ತಿನ ಪೊಸತೊಂಜಿ ವ್ಯವಸ್ಥೆ ಅಕ್ಲೆನ್ ಬನೊರ್ದು,ಕಟ್ಟೆರ್ದ್ ಪಿದಯಿ ಪಾಡ್ದ್ ಬುಡ್ ನತ್ತಂದೆ ಕುಟುಮದ ನಾಗೆ,ಮೂಲ ನಾಗೆಂದ್ ಪೋಡಿ ಕಟ್ಟಾಯೆರ್.ನಾಗನ ಕಲ್ಲ್ ಗ್ ದುಂಬು ಪೊಂಜನಕುಲು ಪೇರ್ ಮೈತೊಂತೆರ್,ಸಂತಾನೊಗಾದ್.ನಾಗಾರಾದನೆ ,ದೈವಾರಾದನೆ ದುಂಬುದ ಕಾಲೊಡು ಕುಟುಮೊನು ಕೂಡಾವೊಂತ್ಂಡ್.ದುಂಬು ಡಕ್ಕೆ ಬಲಿ,ಬ್ರಹ್ಮ ಮಂಡಲ ಪೂರ ಆಲಡೆಲೆಡ್ ನಡತೊಂದಿತ್ತ್ ದ್ ಪೊಸತೊಂಜಿ ವ್ಯವಸ್ಥೆ ಅವೆನ್ ಕೈಪುಂಡಿದುಲಯಿ ದೀವೊಂಡ್.ತನ್ನ ತರೆಕರ್ಚಿಡ್ ಒಂಜಿ ವ್ಯವಸ್ಥೆ ತುಳುವೆರೆನ್ ತನ್ನ ಕೈ ಪುಂಡಿದುಲಯಿ ಮಲ್ತೊನೆರೆ ಬುಡ್ನ ಪಗರಿಯೇ ನಾಗ ದೋಷ ಪನ್ಪಿನವು.ನಿಜವಾದ್ ನಾಗ ದೋಷ ಪನ್ಪುನವು ಇಜ್ಜೇ ಇಜ್ಜಿ.ನಾಗನ್ ನಂಬಂದಿನಕ್ಲೆಗ್ಲ ದೋಷಂದ್ ಪನ್ಪುನವು ಉಂಡು.ದೋಷ ಪಂಡ ನಮ್ಮ ಬದ್ ಕ್ ಡ್ ಬರ್ಪುನ ಕಷ್ಟ ನಷ್ಟೊಲು.ಒಂಜಿ ವರ್ಗ ನಾಗಾರಾದಕೆರಾಯಿನ ನಮನ್ ಒವೆಟ್ಲಾ ಪೋಡಿಕಟ್ಟಾಯೆರೆ ಆಪುಜಿಂದ್ ನಾಗನ್ ದೋಷದ ಒರುಟು ನಮಕ್ ನಾಗದೋಷಂದ್ ಪೋಡಿಕಟ್ಟಾದ್ ನಮನ್ ಸೋಪಾಯೆರ್‌.ಪತ್ತೈವ ವರ್ಸದ ದುಂಬುದ ಜಾತಕೊಲೆಡ್ ಗ್ರಹ ದೋಷ,ಕುಜ ದೋಷ,ಶನಿ ದೋಷಂದ್ ಬರೊಂತ್ಂಡ್.ಇತ್ತೆದ ಜಾತಕೊಲೆಡ್ ನಾಗದೋಷ,ಕಾಳಸರ್ಪ ದೋಷೊಲು ಒರ್ಮೆಲ ತೋಜೊಂದುಲ್ಲ.ತುಳುವೆರೆನ್ ಒವೆಟ್ಲ ಸೋಪಯೆರಾಪುಜಿಂದಾನಗ ಅಕುಲು ದೋಷ ಪಂಡಿ ಸಾತ್ ಗ್ ತುಳುವೆರ್ ಪೋಡ್ತ್ ದ್ ಅರ್ದ ಜೀವಾಪೆರ್.ಬೊಕ್ಕ ಅಕ್ಲೆನ್ ವಾ ನಮುನೆಡ್ಲ ತಾನ್ ಪಂಡಿಲೆಕ ಕೆನ್ಪಾವೊಲಿಂದ್ ಎನ್ನಿ ನ ವ್ಯವಸ್ಥೆ ಇಜ್ಜಾಂದಿನೆನ್ ಪೂರ ತುಳುವೆರೆ ತರೆಕ್ ಪಾಡ್ಂಡ್.ಅವೆಟೊಂಜಿ ನಾಗ ದೋಷ.ನಾಗ ದೋಷ ಪನ್ಪುನವು ವಾ ವೇದ ಪುರಾಣೊಡ್ಲಾ ತೂವೆರೆ ತಿಕ್ಕುಜಿ.ನಮ ಪುಟ್ಟ್ ನಗನೆ ನಮ್ಮ ಆವುಸ ಅಣೆಟ್ ಬರೆದ್ ಉಪ್ಪುನಗ ಮುರನಿ ಮುರನಿ ಬತ್ತಿ ಪ್ರಸ್ನೆ ಚಿಂತನೆದಕುಲು ನಮ್ಮ ಆವುಸೊನು ಒರಿಪೆರೆ ಸಾಧ್ಯನಾ?.ಕೊರೊನೊದಪಗ ಮೊಕ್ಲು,ಜನೊಕ್ಲು ಕಾರ್ ಪತ್ತುನ ಬುಡಿ ಜನೊಕ್ಲೆನ್ ಪಡಿತ ಉಲಯಿಲ ಬರ್ರೆ ಬುಡೊಂದಿಜ್ಜಾಂಡ್.ಇನಿ ನಮ ಪ್ರಸ್ನೆ ಕೇನೆರೆ ಪೊಂಡ ನಾಗಬನ ದೆತ್ತ್ ದ್ ಕಟ್ಟೆ ಕಟ್ಟಲೆ .ನಾಗೆ ಉಪದ್ರದ ದೇವೆರ್ಂದ್ ಪೋಡಿಪದ್ ನಾಗ ಬನೊಕ್ಲು ನಾಶ ಆಯ.ಕುಟುಮೊಗು ಬರ್ಪಿ ದೋಸೊಗು ನಾಗೆ ಕಾರಣಂದ್ ಬನ ಕಡ್ಪಾದ್ ಗುಡಿ ಕಟ್ಟಾಯೆರ್.ಬನ ನಾಶ ಮಲ್ತ್ ದ್ ಗುಂಡ ಕಟ್ಟಾಯಿ ಸಾತ್ ಗ್ ದೋಸ ದೂರಾಪುಜಿ.ಪಿರ ದೋಸ ಬತ್ತ್ಂಡ್ಂದ್ ಸಾರ ಪರಿಹಾರೊಲು ಬೇತೆ.ಒಟ್ಟಾರೆ ತುಳುವೆರ್ ತನ್ನ ಜುಟ್ಟುನು ಬೇತೆಕ್ಲೆ ಕೈಕ್ ಕೊರ್ದು ಇನಿಕಾನಗ ತರೆ ದೆರ್ಪಂದಿ ಪರಿಸ್ಥಿತಿಯಾತ್ಂಡ್ .ಇತ್ತೆ ಪೂರ ಕಾಳಸರ್ಪ ದೋಷಂದ್ ಪೊಸತೊಂಜಿ ಸುರಾತ್ಂಡ್.ಆತೆನಾ ಆ ದೋಷ ನಿವಾರಣೆಗ್ ಕಾಳ ಹಸ್ತಿಗ್ ಒಂದು ಕಪ್ಪು ಕಲ್ಲ್ ದ ಆನೆ ತೂಯೆರೆ ಪೋವೊಡುಗೆ.ವಾ ಜ್ಯೋತಿಷ್ಯ ಶಾಸ್ತ್ರೊಡ್ಲ ಕಾಳ ಸರ್ಪ ದೋಷ ಪನ್ಪುನವಿಜ್ಜಿ.ಜಾತಕೊಡು ಕಾಳ ಸರ್ಪಯೋಗ ಪಂಡ್ ದುಂಡು.ಇನಿ ಕೆಲವೆರ್ ಕಾಳಸರ್ಪ ಯೋಗೊನು ಕಾಳಸರ್ಪ ದೋಷ ಮಲ್ತ್ ಬುಡ್ಯೆರ್‌‌.ಏರೆನವೋ ಬಂಜಿ ದಿಂಜಾಯೆರೆ ಬೋಡಾದ್ ತುಳುವೆರೆನ್ ಇಜ್ಜಾಂದಿ ದೋಸೊಲೆಡ್ ತಿಕ್ಕಾದ್ ಪಾಡ್ಯೆರ್.ಮೂಲ ಜನಾಂಗದಕುಲು ಕಾಳಸರ್ಪ ಮಂಡಲ ಬರೆದ್ ಕಾಡ್ಯ(ಕಾಡ್ಯ ಪಂಡ ಕಾಳಿಂಗೆ)ಕಾಡ್ಯ ನಾಟ ಪನ್ಪಿ ನಾಗದರ್ಶನ ಮಲ್ತೊಂತೆರ್.ಇನಿ ಅವು ಕಾಳ ಸರ್ಪದೋಷ ಆಂಡ್.ನಾಗ ದೊಷ ಪನ್ಪುನವುಲ ಇಜ್ಜಿ.ನಾಗದೋಷಂದ್ ಪೊಸತೊಂಜೆನ್ ಉಂಡು ಮಲ್ತ್ ದ್ ತುಳುವೆರೆನ್ ಕೆಲವೆರ್ ಪೋಡಿ ಕಟ್ಟಾಯೆರ್.ತುಳುವೆರೆನ್ ಓಲ್ಲಾ ಸೋಪಾಯೆರೆ ಅಯಿಜಿಂದಾನಗ ಒಂಜಿ ವರ್ಗ ನಾಡೊಂದಿ ಸಾದಿ ಈ ನಾಗದೊಷ.ನಾಗ ದೋಷದ ಬಗೆಟ್ ವಾ ಶಾಸ್ತ್ರ ಗ್ರಂಥೊಲೆಡ್ಲ  ಮಾಯಿತಿ ಇಜ್ಜಿ.ಒಂಜಿ ನಾಗರ ಉಚ್ಚು ವಾರ ಇಡೀ ಇಲ್ಲದ ಬಾಕಿಲ್ ಬರೊಂದುಂಡು ಪಂಡ ಅವು ನಾಗ ದೋಷ ಅತ್ತ್.ಉಚ್ಚುಲು ಜನೊಕ್ಲು ಇಪ್ಪುನ  ಜಾಗೆದ ಕೈತಲೆ ಉಪ್ಪುನಿ.ಅವೆಕ್ ಬೋಡಾಪಿನ ಅಹಾರೊಲು ನರಮಾನಿ ಇತ್ತಿನ ಜಾಗೆದ ಅಂಚಿಂಚಿ ತಿಕ್ಕುನಿ.ಅಂಚನೆ ನಾಗೆ ಬೆರಿ ಬೆರಿ ಇಲ್ಲ ಬಾಕಿಲ್ ಗ್ ಬರೊಂದುಂಡು ಪಂಡ ಐತ ಅಹಾರೊನು ಅವು ತೂತ್ಂಡ್ಂದ್ ಲೆಕ್ಕ.ಅವು ತೂಯಿನನ್ ತಿನಂದೆ ಪೋವಂದ್.ಅಂಚ ಅಹಾರೊಗಾದ್ ಬರ್ಪುನ ಉಚ್ಚುದ ಮಿತ್ತ್ ನಾಗ ದೋಷ ಆರೋಪ ಮಲ್ಪುನಕ್ಲೆಗ್ ಬುದ್ದಿ ಇಜ್ಜಿಂದೆ ಪನೊಡಾತೆ.ಅಂಚನೆ ರಡ್ಡ್ ಜಿಡೆತ ಸಯಾಮಿ ನಾಗೆ ಪ್ರಕೃತಿಡ್ ತೂವೆರೆ ತಿಕ್ಕುಂಡು.ಪುರಾಣೊಲೆಡ್ ಸಾರ ಜಿಡೆತ ಮಾಶೇಷನ ಇಚಾರ ಬತ್ತ್ಂಡಲ ನಮ್ಮ ಪ್ರಕೃತಿಡ್ ಅವಿಜ್ಜಿ.ನಾಗಾರಾದನೆನ್ ಮೂಡ ನಂಬಿಕೆಡ್ ಕಟ್ಟ್ ಪಾಡೆರೆ ಪೋದು ಇನಿ ಮೂಲ ನಂಬಿಕೆ ನಾಶ ಆದ್ ನಾಗಬನ ನಾಶ ಆದ್ ನಾಗ ದೋಷದ ಪೊಸ ಕಲ್ಪನೆಲು ಮೂಡನಂಬಿಕೆದ ಒರುವಾದ್ ಉದಿತ್ ದ.ಉಚ್ಚುದ ತೆತ್ತಿ ದರಿಂಡ ನಾಗ ದೋಸ ಪನ್ಪುನಕುಲೆಗ್ ನಾಗ ಬನ ಕಡ್ಪಾದ್ ನಾಶ ಮಲ್ತಿನವು ದೋಷ ಆದ್ ತೋಜಿಜ?.ಬೋಡಾಯ್ನಾತ್ ಕಾಸ್ ಇತ್ತ್ ನಾಯನ ಬಿರ್ಸಾದಿಗೆನ್ ಕರಪಯೆರೆ ಉಪ್ಪುನ ಒಂಜೇ ಒಂಜಿ ಸಾದಿ ನಾಗಮಂಡಲ.ನಮ ಇನಿ ನಾಗ ಮೂಲಂದ್ ಒವೆನ್ ಪನೊಂದುಲ್ಲನ ಪಾಡ್ದನೊಡು ಅವು ಬರ್ಪುಜಿ.ಅವ್ಲು ಮಂಜೇಸರ,ಕಾಸ್ರೋಡು ತುಳುನಾಡ ಭಾಗದ ಅದಿ ಬನೊಕ್ಲೆ ಬಗೆಟ್ ಬರ್ಪುಂಡು.ತುಳುವೆರೆನ್ ದೈವ ಬಗ್ತಿಂದ್ ಪೋಡಿಕಟ್ಟಾದ್ ಬತ್ತ್ ನವೇ ಸಾರ್ವಜನಿಕ ನಾಗಾರಾದನೆದ ನಾಗಸಾನೊಲು.

  

ಸರ್ಪ ಸಂಸ್ಕಾರ-

ನಾಗೆ ಬೇತೆ ಸರ್ಪ ಬೇತೆ ಪನ್ಪುನಕುಲು ನಾಗೆ ಸೈತ್ಂಡ,ಸಾದಿಡ್ ಸೈತ್ ನೆನ್ ತೂಂಡ ಸರ್ಪ ಸಂಸ್ಕಾರ ಮಲ್ಪೊಡು ಪನ್ಪೆರ್.ಉಚ್ಚು ಮೋಲ ಪೋಪುನೆನ್ ತೂಂಡ ಆಶ್ಲೇಷ ಬಲಿ ಮಲ್ಪುಲೆ ಪನ್ಪೆರ್.ಆಶ್ಲೇಷ ಬಲಿಟ್ ಮೋಲ ಪೋಯಿನ ಉಚ್ಚುಲೆನ ಮಂಡಲನೆ ಬುಡ್ಪವೆರ್.ಜಗತ್ತ್ ದ ಕೆಲವೊಂಜಿ ದೇಸೊಲೆಡ್ ನಾಗಾರಾದನೆ ಉಂಡು.ನಮ ನಾಗನ್ ದೈವ,ದೇವೆರಾದ್ ತೂಯಿನೆರ್ದಾತ್ರ ನರಮಾನ್ಯಗ್ ಮನ್ಪುನಲೆಕ ಸಂಸ್ಕಾರ ನಾಗಗ್ಲ ಮಲ್ಪುವೆರ್.ದೇವೆರಾದ್ ನಂಬುನ ನಾಗಗ್ ಸದ್ಗತಿ ತಿಕ್ಕೊಡುಂದು ಅಂಚ ಮಲ್ಪುವೆರ್.ನಾಗನ್ ದೇವೆರಾದ್ ತೂಯಿನಕುಲು ಸರ್ಪ ಸಂಸ್ಕಾರ ಮಲ್ತೆರ್ಡ ತಪ್ಪತ್ತ್.ಅವು ಅಕ್ಲೆ ನಂಬೊಳಿಗೆ.ನಮ ಮೋಕೆಡ್ ತಾಂಕಿನ ಎರ್ಲೆನ್,ನಾಯಿಲೆನ್ ಪೂರ ಅವು ಕರಿ ಬೊಕ್ಕ ಪೊರ್ಲುಡೆ ಮಣ್ಣ್ ಮಲ್ಪುಜನ?. ಉಚ್ಚಾದ್ ತೂಪುನಕುಲು ಸರ್ಪ ಸಂಸ್ಕಾರ ಮಲ್ತ್ ಜಿಂಡ ದಾಲ ತೊಂದರೆ ಇಜ್ಜಿ.ಇಂಚಿನಕ್ಲೆ ಮಲ್ಪೊಡುಂದುಲ ಶಾಸ್ತ್ರ ಇಜ್ಜಿ.ಒರ್ಯನ ನಂಬೊಳಿಗೆ ಕುಡೊರ್ಯನ ಆವೊಡುಂದಿಜ್ಜಿ.ನಮ್ಮ ಗೇನ ಬುಳೆಯಿಲೆಕ ಒವು ಸರಿ ಒವು ತಪ್ಪುಂದು ನಮಕ್ ತೆರಿಯೊಂದು ಪೋಪುಂಡು.

  

ನಾಗ ಮಣಿ-

  ನಿಜವಾದ್ ಉರಗ ತಜ್ಙೆರ್ ಅಧ್ಯಯನ ಮಲ್ತಿ ಪ್ರಕಾರ ನಾಗ ಮಣಿ ಇಜ್ಜಿಗೆ.18 ಸಾರ ನಾಗನ್ ಪತ್ತ್ ನ ಉರಗ ತಜ್ಙೆರಾಯಿನ ಗುರುರಾಜ್ ಸನಿಲ್ ಮೇರೆಗ್ ಒಂಜಿ ನಾಗ ಮಣಿಲ ತಿಕ್ ದ್ ಜಿಂದ್ ಅರೆನ ಒಂಜಿ ಸಂದರ್ಷನೊಡು ಪಂಡ್ ದಿತ್ತೆರ್.ನಾಗಮಣಿ ಪನ್ಪುನವು ಒಂಜಿ ಕಲ್ಪನೆ.ಮೋಸ ಪೋಪುನಕುಲು ಇತ್ತ್ ನೇಟ ಮೋಸ ಮಲ್ಪುನಕುಲು ಉಪ್ಪುವೆರ್.ನಿಜವಾದ್ ನಾಗಮಣಿ ಪನ್ಪುನವಿಜ್ಜಿ.ಕೆಲ ಉಚ್ಚು ಪತ್ತುನಕುಲು ನಾಗನ ಜಿಡೆತ ಒಂಜಿ ಪೊರೆನ್ ನೆತ್ತೆರ್ ಬರಂದಿಲೆಕ ಗೀರ್ ದ್ ಅವೆತುಲಯಿ ಪರೆಲ್ ದೀದ್ ಏರಾಂಡಲ ಕೇನ್ನಗ ಪೊರೆನ್ ಗೀರ್ ದ್ ಅವೆರ್ದ್ ನಾಗಮಣಿಂದ್ ದೆತ್ತ್ ಕೊರ್ಪೆರ್.ನಿಜವಾದ್ ನಾಗಮಣಿಂದ್ ಇಜ್ಜಿ.ಇತ್ತ್ಂಡ ಟಿ.ವಿ ಸಿನೆಮೊಲೆಡ್,ದಾರಾವಾಹಿಲೆಡ್ ಮಾತ್ರ.ರೂಬಿ ಮಣಿಂದ್ ಒಂಜಿ ಮಣಿ ಇತ್ತ್ ದ್ ಅವೆನ್ ನಾಗ ಮಣಿಂದ್ ಪನ್ಪೆರ್.ಅವು ನಾಗನ ಜಿಡೆತ ಮಣಿಯತ್ತ್.ತಾಂತ್ರಿಕ ವೇದ ಅಥರ್ವ ವೇದದ ಪ್ರಕಾರ ತಾಯಿತ ಕಟ್ಟುನ ಕೆರಮ ಉಂಡು.ಈ ತಾಯಿತೊನು ನಾಗಮಣಿ ಪನ್ಪೆರ್.ಉಂದುಲಾ ನಾಗ ಜಿಡೆತ ನಾಗಮಣಿಯತ್ತ್.ಆ ಮಣಿ,ತಾಯಿತೊಲೆನ್ ನಾಗನ ಜಿಡೆಕ್ ಸಮೀಕರಣ ಮಲ್ತ್ ದ್ ಕಥೆ ಪುಟ್ಟ್ಂಡ್ ವಿನಃ ನಾಗಗ್ ಮಣಿಯಾವಡ್,ಮಾಣಿಕ್ಯ ಆವಡ್ ಇಜ್ಜಿ.ನಾಗೆ ಮಣಿನ್ ಒಂಜಿ ತಿಕ್ ಡ್ ದೀದ್ ಆಹಾರ ನಾಡೊಂದು ಪೋಪುಂಡು ಪನ್ಪುನವು ಸುಳ್ಳು.ಏತ್ ಕತ್ತಲೆಡ್ಲಾ ಅವೆತ ಆಹಾರೊನು ಸೂಕ್ಷ್ಮ ನಾಲಾಯಿಡ್ ಅವು ನಾಡ್ ಪತ್ತ್ ವ.ದೃಷ್ಟಿಲ ಸೂಕ್ಷ್ಮ ಆದಿಪ್ಪುಂಡು.ಅಂಚಾದ್ ನಾಗಗ್ಲ ಮಣಿಕ್ಲ ವಾ ಸಮ್ಮಂದಲ ಇಜ್ಜಿ.

ಕೊಪ್ಪರಿಗೆನ್ ನಾಗೆ ಕಾಪುನಿ-

ಕೊಪ್ಪರಿಗೆನ್ ವಾ ನಾಗೆಲ ಕಾಪುಜಿ.ಪಡಾರಿ ಬೂರ್ನ(ಪಾಳುಬಿದ್ದ) ಜಾಗೆಲೆಡ್ ಎಲಿ ಪೆರ್ಗುಡೆಲ್ ಉಪ್ಪುವ.ಅವೆನ್ ತಿನೆರೆಂದ್ ನಾಗೆ ಬರ್ಪುಂಡು.ಅವೆತ ತಿರ್ತ್ ಕೊಪ್ಪರಿಗೆ ಉಪ್ಪುಂಡುಂದು ಅವೆಕ್ ಗೊತ್ತಿಪ್ಪುಜಿ.ಕೊಪ್ಪರಿಗೆ ಇಪ್ಪುನವ್ಲು ನಾಗೆ ಕಾಪುವೆಂದ್ ಒಂಜಿ ನಂಬೊಳಿಗೆ ಉಂಡು.ಅಂಚಿ ಜಾಗೆಡ್ ದೈವ ಬೂತ ಉಂಡುಂದು ಪೋಡಿಕಟ್ಟಾದ್ ನಂಬೊಳಿಗೆ ಪುಟ್ಟವೆರ್.ಪಡಾರಿ ಬೂರ್ನ ಆ ಜಾಗೆಡ್ ಕಿನ್ಯ ಕಿನ್ಯ ಎಲಿ,ಪೆರ್ಗುಡೆಲು ಉಪ್ಪುವ.ಅವೆತ ತಿರ್ತ್ ಕೊಪ್ಪರಿಗೆ ಉಂಡುಂದು ಎಲಿ ಪೆರ್ಗುಡೆಲೆಗ್ಲ ಗೊತ್ತಿಪ್ಪುಜಿ,ನಾಗಗ್ಲ ಗೊತ್ತಿಪ್ಪುಜಿ.ಅವ್ಲು ನಾಗೆ ಎಲಿ ಪೆರ್ಗುಡೆನ್ ಪತ್ತ್  ತಿನೊಂದು ಅವ್ಲೇ ಉಪ್ಪುವೆ.ಕೊಪ್ಪರಿಗೆ ಕಾಪೆರೆ ಅವೆಕ್ ದಾದ ಗ್ರಾಚಾರ?.ಮಣಿ,ಮಾಣಿಕ್ಯ,ಭಂಡಾರ,ಕೊಪ್ಪರಿಗೆ,ಪದ್ದೆಯಿ ಅವೆಕ್ ದಾದೆಕ್ ಬೋಡು?.ಅವೆಕ್ ಬಂಜಿ ನಿಲಿಕೆ ತಿನೆರೆ ತಿಕ್ಕ್ಂಡ ಯಾವಾತೆ.ನರಮಾನಿ ಬಂಜಿ ದಿಂಜಯೆರೆ ಉಚ್ಚುನು ಗಲಸ್ಯೆರ್. ಅಂಚಾದ್ ನಾಗೆ ಕೊಪ್ಪರಿಗೆ ಕಾಪುವೆ ಪನ್ಪಿ ನಂಬೊಳಿಗೆಲ ಸರಿಯತ್ತ್.

ಉರಗತಜ್ಙೆ ದಿಲೀಪ್ ಕುಮಾರ್ ಫಜೀರ್ ಮೆರ್ನ ಕೈಟ್ ಜಿಡೆ ದೆರ್ತಿ ನಾಗನ ಕಿನ್ನಿ.

ನಿಕ್ಲೆಗ್ ತೆರಿದಿಪ್ಪಡ್-

ಒವ್ವೇ ಉಚ್ಚುದ ಪಿರವು ನಂಬೊಳಿಗೆ ಉಂಡು ಪಂಡ ಅವೆತ ಸಂತಾನೊನು ಒರಿಪೆರೆ.ಉಚ್ಚುಲು ಬೆನ್ನಿ ಸಾಗೊಳಿಗ್ ಸಕಾಯ ಮಲ್ಪುನವು.ಕೇರೆ ಅಟ್ಟೊಡು ಉಂತ್ಂಡ ಪೊಲಿ ಪೊಲ್ಸು ಎಚ್ಚು ಪಂಡ ಎಲಿಕುಲೆನ್ ತಿಂದ್ ದ್ ಅರಿತ ಮುಡಿನ್ ಒರಿಪುಂಡುಂದರ್ಥ.

ನಾಗೆ ನಾಗಗೇ ಜೋಡಿಯಾಪುನಿ‌.ಅವೆಟ್ ಅಣ್ ಪೊಣ್ಣು ಉಂಡು.ಕೇರಿದೊಟ್ಟುಗು ಜೋಡಿಯಾಪುಜಿ.ಕೇರೆಗ್ ಪುಟ್ಟ್ ನ ನಾಗೆ ಅವು ಮೂಡನಂಬಿಕೆ.ನಾಗೆ,ಕೇರಿ ಸುತ್ರು ಪಾಡ್ದ್ ಲಡಾಯಿ ಮಲ್ಪು

ನಾಗೆ ಪೇರ್ ಪರ್ಪುಜಿ.ಪರ್ಂಡ ಬದ್ಕುಜಿ.ನಾಗೆ,ಉಚ್ಚುಲು ಮಾಂಸಾಹಾರಿಲು.ನಾಗನ ಪುಂಚೊಗು ಪೇರ್ ಮೈತ್ಂಡ ಮೂಂಕುಗು ಬೂರ್ಂಡ ಉಸುಲು ಕಟ್ಟ್ ದ್ ಸೈಯು.ಇಜ್ಜಾ ಪಿಜಿನ್ ಮುತ್ತುದು ಸೈಯು.

ನಾಗರ ಉಚ್ಚುದ ಕಿನ್ನಿ ಕೃಷ್ಣ ಸರ್ಪೆ.ತೆತ್ತಿರ್ದ್ ಪಿದಯಿ ಬತ್ತ್ ನ ಕಿನ್ನಿ ಮೂಜಿ ನಾಲ್ ಸರ್ತಿ ಮೇಲ್ಚೋಲಿ ಜಾರಾವುಂಡು.ಅಪಗ ಉಚ್ಚುದ ಕಿನ್ನಿ ಕಪ್ಪಿಪ್ಪುಂಡು.ಕಪ್ಪು ಇತ್ತ್ ನೆಕ್ ಕೃಷ್ಣಸರ್ಪ ಪನ್ಪೆರ್.

ಉಚ್ಚುಲು ಸುತ್ರು ಪಾಡಿ ಸಾತ್ ಗ್ ಸಂಸಾರ ಮಲ್ಪುನಿಂದ್ ಅತ್ತ್.ಒಂಜಿ ಜಾಗೆಡುಪ್ಪುನ ಉಚ್ಚುದಡೆ ಕುಡೊಂಜಿ ಬನ್ನಗ ಸುತ್ರು ಪಾಡ್ದ್ ಲಡಾಯಿ ಮಲ್ಪುವ.ಪೊಣ್ಣಗ್ ಬೋಡಾದ್ ಲಡಯಿ ಮಲ್ಪೆರ್ಲ ಯಾರು.ಉಚ್ಚು ಲು ಉಚ್ಚುಲೆನೇ ತಿನ್ಪುನೆರ್ದಾದ್ ಒಂಜಾ ಒಂಜಿ ಉಚ್ಚು ಬಲಿಪೊಡು.ಇಜ್ಜಿಂಡ ಅವು ನಿಂಗುಂಡು.

ನಾಗೆ ವಿಷ ದೀವೊಂದಿನಿ ಪಂಡ ಅವೆತ ಜೀರ್ಣಕ್ರೀಯೆಗ್ ಸಕಾಯ ಆಯೆರೆ.ನಾಗೆ ಪಗೆ ದೀದ್ ಗಿಡೆತೊಂದು ಬತ್ತ್ ದ್ ತುಚ್ಚುಜಿ.

ನಾಗೆ ಇಲ್ಲದುಲಯಿ ಅಪಗಪಗ ಬರ್ಪುಂಡು ಪಂಡ ಅವು ನಾಗ ದೋಷ ಅತ್ತ್.ಅವು ಅವೆತ ಆಹಾರೊನು ನಾಡೊಂದು ಬರ್ಪುನಿ.

ಪ್ರಕೃತಿಡ್ ಒವ್ವೇ ಜೀವಿಲು  ಜಾಸ್ತಿ ಅನಗ ಅವೆನ್ ಸರಿಯಾದ್ ಒರಿಪೆರೆ,ಹದೊಕು ಕನಯೆರೆ ಪ್ರಕೃತಿ ಬೇತೊಂಜಿ ಜೀವಿನ್ ಸೃಷ್ಠಿ ಮಲ್ಪುಂಡು.

ನಾಗೆ ಇಲ್ಲದುಲಯಿ ಬರ್ಪುಂಡು ಪಂಡ ಇಲ್ಲದುಲಯಿ ಅವೆಕ್ ಬೊಡಾಯಿನ ಆಹಾರ,ಎಲಿ ಉಂಡುಂದೆ ಲೆಕ್ಕ.ಕೇರಿ ಎಲಿನ್ ನಿಂಗ್ಂಡ ನಾಗೆ ಕೊಡತ್ದ್ ಕೆರಿ ಬೊಕ್ಕ ನಿಂಗುಂಡು.

ಕೇರೆಗ್ ಒರ ಪೆಟ್ಟ್ ಪಾಡ್ಂಡ ಅವು ಕುಡ ಇಲ್ಲದುಲಯಿ ಬರಂದ್..

ನಾಗೆ ಅಂಚತ್ತ್.ಒರ ಬೋಂಟೆನ್ ತೂಂಡ ಇಲ್ಲದುಲಯಿ ಮಸ್ತ್ ಸರ್ತಿ ಬರ್ಪುಂಡು.ಅವು ಅಹಾರ ನಾಡೊಂದು ಬರ್ಪುನಿ ವಿನಃ ಅವೆನ್ ಏರಾ ನಾಗ ದೋಷ ಪಂಡೆರ್ಂದ್ ಆಷ್ಲೇಶ ಬಲಿ ಮಲ್ಪೊಡುಂದಿಜ್ಜಿ.ಮಲ್ತ್ಂಡ ಎಲಿ ಬರ್ಪುನ ಕಮ್ಮಿಯಾವಂದ್.

ನಾಗೆ ಒರ ತೂಯಿನ ಬೋಂಟೆದ ಎಲಿ ಸೈತ್ ದ್ ಕುರಿಂಡಲ ತಿನಂದೆ ಬುಡಂದ್.

ದುಂಬು ಒಂಜಿ ಜಾತಿ ಬರಿಕ್ ಸೇರಿ ನಾಗ ಬನೊತ ಗಂದ ಪುರ್ಸಾದೊನು ಬೇತೆ ಬರಿತಕುಲು ದೆತೊನೊಂದಿಜ್ಜಾಂಡ್.

ಆಷ್ಲೇಷ ಬಲಿತ ಆಹಾರೊನು ಬಡವೆರೆಗ್ ಕೊರೊಡು ಪನ್ಪಿ ಒಂಜಿ ನಂಬೊಳಿಗೆ ಉಂಡು.ಆ ರೀತಿಡಾಂಡಲ ಅಕ್ಲೆ ಸರ್ರೊಗು ಪ್ರೋಟೀನ್ ತಿಕ್ಕಡ್ಂದ್.ಉಚ್ಚುಲು ಇಲ್ಲದ ಪಿದಯಿ ತುಚ್ಚುವ ವಿನಃ,ಬೇನೆಯಾಂಡ ತುಚ್ಚುವ ವಿನಃ ಇಲ್ಲದುಲಯಿ ತುಚ್ಚುಜಿ.

ನಾಗೆ ನಮ ದೂರ ಉಂತೆರೆಂದ್ ಸುರುಕು ಜಿಡೆ ಅರಲ್ತ್ ದ್ ಪೋಡ್ಯಾವುಂಡು,ಪೋಡಿಜಿಂಡ ಸುಂಯ್ತ್ ದ್ ಪೋಡ್ಯಾವುಂಡು,ಅವೆಕ್ಲಾ ಬಗ್ಗ್ ಜಡ ನೆಲಕ್ ಕೊಡತ್ ದ್ ಪೋಡ್ಯಾವುಂಡು.ಅವು ನಮನ್ ದೂರ ಉಂತಯೆರೆ ಅಂಚ ಮಲ್ಪುನಿ ವಿನಃ ಅವೆಕ್ ನಮಡ ಪಗೆಲಾ ಇಜ್ಜಿ,ನಮಕ್ ದೋಷಲಾ ಇಜ್ಜಿ.

ಅಂಚನೇ‌ ನಮ್ಮ

ಸಂತಾನ ಭಾಗ್ಯೊಗಾದ್ ಪೊಂಜನಕುಲು ನಾಗನ ಪುಂಚೊಗು ಚೂರು ಪೇರ್ ಮೈತೊಂತೆರ್

ಮೂಲೊಡು ತುಳುವ ಕಟ್ಟ್ ಡ್ ಬನೊಟು ವರ್ಸೊಗೊರ ಅಕ್ಲೇ ತನು ಮೈತೊಂತಿ ನಾಗಾರಾದನೆ ಇನಿ ನಮ್ಮ ಕೈತತ್ತ್ ದ್ ಸುದ್ದಾಚಾರಂದ್ ಏರೆನವೋ ಪಾಲಾತ್ಂಡ್.ನಮ್ಮನೇ ಜಾಗೆ,ನಮ್ಮನೇ ಬನ,ನಮ್ಮನೇ ಕಾಸ್,ಆಂಡ ನಮ ಕಟ್ಟೆರ್ದ್ ಪಿದಯಿ ಕಟ್ಟೆರ್ದ್ ತಿರ್ತ್.ಉಂದು ನಮಕ್ ಬೋಡಿತ್ತ್ಂಡ್.ನಾಗನ ಕಲ್ಲ್ ಗ್ ಅಕುಲು ಮೈಪುನ ಪೇರ್ ಅಕ್ಲೆ ಪಾದದ ಕುರೆತೊಟ್ಟುಗು ಕಟ್ಟೆರ್ದ್ ತಿರ್ತ್ ಬನ್ನಗ ಅವೆನ್ ಸೀರ್ತಂದ್ ನಮ ಪರೊಂದುಲ್ಲ.ದೇಲ್ಯದ ಉಲಯಿರ್ದ್ ದೇವೆರೆ ಮೂರ್ತಿಗ್ ಮೈತಿ ಬೊಂಡದ ನೀರ್ ಪೀಠೊರ್ದು ತಿರ್ತ್ ಬೂರ್ದು ಉಲಯಿತ್ತ್ ನಕ್ಲೆ ಪಾದ ತಾಗ್ ದ್ ಪಿದಯಿ ಬನ್ನಗ ಅವೆನ್ಲಾ ಸೀರ್ತಂದ್ ಪರ್ಪುನಕುಲು ನಮ.ನಮನೇ ಮಲ್ತಿ ತಪ್ಪುಗು ನಮನೆ ಅನುಬವಿಸವೊಡು.ದೇವಸಾನೊಗು ಪ್ರತಿಷ್ಠೆ ಆಯಿ ಬೊಕ್ಕ ದೇವಸಾನೊಗು ಪೋದು ನಮಕ್ ಆರಾದನೆ ಮಲ್ಪೆರಾಪುಂಡು.ಇಲ್ಲಲ್ ಓಮ ದೀ ಬೊಕ್ಕ ಇಲ್ಲದ ದೇವೆರೆ ಕೋಣೆದ ಪೂಜೆ ನಿಚ್ಚ ನಮಕ್ ಮಲ್ಪೆರಾಪುಂಡು.ನಾಗನ ಬನೊಟು ನಾಗನ್ ಪ್ರತಿಷ್ಟೆ ಮಲ್ತಿ ಬೊಕ್ಕ(ನಾಗ ಬನೊಕು ಈ ಪ್ರತಿಷ್ಟೆಲು ಪೂರ ಇಜ್ಜಿ) ಸುದ್ದ ಮುದ್ರಿಕೆಡ್ ನಮಕೇ ನಮ್ಮ ಬನತ ನಾಗಗ್ ತನು ಮೈಪೆರೆ ಆರಾದನೆ ಮಲ್ಪೆರೆ ಸಾದ್ಯ ಇಜ್ಜಾ?.ಅಲಚನೆ ಮಲ್ಪುಗ.

ಈ ಲೇಖನೊಗು ಮೂಲ ಆಕರ-

ಗುರುರಾಜ್ ಸನಿಲ್,ಉರಗ ತಜ್ಞೆರ್ ,ಪೀಟ ಕ್ರಿಯೇಶನ್ ಯೂಟ್ಯೂಬ್.

ತೇಜಸ್ ಪುತ್ತೂರು.ಕಲಾಕುಸುಮ ಯೂಟ್ಯೂಬ್ 

ದಿಲೀಪ್ ಫಜೀರ್.ಉರಗತಜ್ಞೆರ್.

ಇತ್ತೆದ ಪೊಸ ನಮುನೆದ ನಾಗ ಮಂಡಲ:-

 

 

  

  

 

 

ಇಂಚ ಪೂರ ಪೇ್,ಬೊಂಡದ ನೀರ್ದ ಅಭಿಷೇಕ ಆವಡ್,ನಾಗ ಮಂಡಲೊಗು ಬರೆಯಿನ ಮಂಡಲೊನಾವಡ್,ನಾಗಗ್ ದೀನ ಪಿಂಡೊಡು ಪುರೆಲುನಾವಡ್,ಪೇರ್ ನ್ ಕಂಕನೆ ಜೆತ್ತ್ ದ್ ಪರ್ಪುನ ಕೆರಮಾವಡ್ ನಾಗ ಮಂಡಲೊಡಿಜ್ಜಿ.ಅವ್ಲು ಪೇರ್ ಕುರಿದ್ ವಾಸನೆ ಲಕ್ಕ್ಂಡ ನರಮಾನ್ಯಗ್ ಕುಲ್ಲುದು ಸಯ್ಯೆರೆ ಸಾದ್ಯ ಇಜ್ಜಿ.

..........................................................................................

ನನೊಂಜಿ ನಮುನೆದ ನಾಗ ಮಂಡಲ:-

ಈ ನಮುನೆ ನಾಗ ಮಂಡಲ ಬರೆದ್ ತೋಪುಡು ನಿಲಿಕೆ ಮಂಜಲ್ ಬಿರಾಯಿನ ಪೇರ್ ಪಾಡ್ದ್ ಅಂಚಿಂಚಿ ಕೋಲು ಜೀಟಿಗೆದ ಕಡೆನ್ ಮುರ್ಕಾದ್ ಪೇರ್ ಚೇಪುನ,ಕಡೆಕ್ ಅಮಸರಮಸರೊಡು ಪೇರ್ ಚೇಪುನಗ ಮಾತಾ ಜನೊಕ್ಲೆ ಮೇಲ್ ಗ್ ರಟ್ಟುನ,ತುತ್ತೈತೊಡು ಕಲೆಯಾಂಡ ಏರ್ ಜಬದಾರಿ?.ಆತೇ ಅತ್ತ್ ಪೇರ್ ಚೇತ್  ದ್ ಮೇಲಿಡೀ ಚಂಡಿ ಮಲ್ತೊಂದು,ತೇಪುನ ಪೊರ್ತುಡು ಪೊತ್ತಯಿ ತುಡರ್,ಜೀಟಿಗೆ ತೆಕ್ಕ್ಂಡ,ನಾಗ ಮಂಡಲೊಗು ಪಾಡ್ನ ಮಂಡಲ ಕರಂಡ ಕಲೊಕು ಎಡ್ಡೆ ಅತ್ತ್,ಪೇರ್ ನ್ ಕೋಲು ಜೀಟಿಗೆದೊಟ್ಟುಗು ಚೇತ್ ಚೇತ್ ದ್ ಕಡೇಕ್ ತೋಪುನು ಕಂಕನೆ ಪಾಡ್ಂಡ ಕಲೊಕು ಎಡ್ಡೆ ಅತ್ತ್.ತೋಪುನು ಕಂಕನೆ ಪಾಡಿ ಬೊಕ್ಕ ಅವೆತ ಮೇಲ್ ಗ್ ಪೊರಿ ಪಾಡ್ ದ್ ಅವೆತ ಮಿತ್ತ್ ತುಡರ್ ದೀದ್ ನಾಗಪಾತ್ರಿಗ್ ವಸಾಯ ಆಪುನ ಕೆರಮ ನಾಗ ಮಂಡಲೊಡಿಜ್ಜಿ.
   

 
  

   

    

 

 

  

  

   

 

  

  

 

  

  

ಮಾಹಿತಿಗಾಗಿ ವೀಡಿಯೋ ಲಿಂಕ್- https://youtu.be/GFunನ40kf6OQ

ಲಿಂಕ್-https://youtu.be/GkF3bi_51xA

ಒಂಜಿ ಇಸೇಸ ಸುದ್ದಿ.ಕೃಪೆ-ಉದಯವಾಣಿ ದೈನಿಕ

ಉಚ್ಚು ಪರತ್ ದ್ ಪೋತುಂಡ ಓರೆಕೋರೆದ ಗುರ್ತ ಇತ್ತುದು.ಉಂದು ಸೀದಾ ಪೋಯಿಲೆಕ ತೋಜುಂಡು.ಕುರುವಾಯಿಯಾ,ಬೇತೆ ಕೀಟನಾ ಪೋಯಿಲಕ ತೋಜುಂಡು.