ಪುದರ್ ಬದಲ್ನ ತುಳುನಾಡ ದೈವೊಲು

               ಪುದರ್ ಬದಲ್ನ ತುಳುನಾಡ ದೈವೊಲು

     

                   ಗಿರಾವು ದೈವ ಕಿರಾತೇಶ್ವರ ಆತ್ಂಡ್

ಕೊಡಮಂದಾಯನ ಮುಗ ಮಿಜಾರ್.ಚಿತ್ರ- ಅನೂಪ್ ಸೂರಿಂಜೆ

ಸಂಪೂರ್ಣ ಬದಲಾಯಿನ ಕೊಡಮಂದಾಯನ ಮುಗ ಪಡ್ಡೆದ್ರ.

ದೈವ ಕೊಡಮಂದಾಯೆ ತಿಬಾರ ಸ್ಥಾನರ್ದ್ ತೆನ್ನಾಯ ಪೂಜಾರಿನ ಬೆರಿಟ್ ಬತ್ತ್'ದ್ ಪ್ರಾಯದ ಅಜ್ಜಿನ ರೂಪಡ್ ಬಾಲು ಪೂಜಾರಿ ಸಂಸಾರಡ ಅಸರ್ ಕೇಂದಿನಿಗೆ ಅಯಿಕ್ ದೈವಗ್ ಪೊಣ್ಣ ಪೊಂಜುವುನ ರೂಪಡ್ ಮೂಕುದ ಮುತ್ತೇಸನ ಇಪ್ಪುನ ಮುಗ.ಒಂಜಿ ರಾಜಂದೈವ ಪುದರ್ ಬದಲ್ತ್ ದ್ ಬೇತೆ ಬೇತೆ ತಿಕ್ ಡ್ ಆರಾದನೆ ಪಡೆತ್ಂಡ್.ಆಣ ಒರು ಪೋದು ಪೊಣ್ಣ ಒರುವಾದ್  ಪೋಯಿನ ಚರಿತ್ರೆ ಮೂಲು ಬುಡುಂಡ ಬೇತೆ ಓಲ್ಲ ತೆರಿದ್ ಬರ್ಪುಜಿ.ಆಂಡ ದೈವ ಕೆಲಪಲ್ಲ ಸಾಸ್ತ್ರ ಬೊಳ್ಳೆ ಕೋರಿಯಾದ್ ಬೈದ್ ನ ಇಚಾರೊಲು ಮಸ್ತ್ ತೂವೆರೆ ತಿಕ್ಕುಂಡು.

      

  ಸಾಯೊದ ಬಿರು ಪಗರಿ ಪತ್ತಿ ಬಿಲ್ಲಾರ ದೈವೊ.ಪರಂಕಿಲ ಚಾವಡಿ ಅಡ್ಕ.ಚಿತ್ರ-ರತೀಶ್ ಫೋಟೋಗ್ರಾಫಿ

  

ಮೂವೆರ್ ಉಳ್ಳಾಕುಲು ಬಲರಾಮ ಕೃಷ್ಣ ಸುಭದ್ರೆ ಆನಗ

            

ಕನ್ನಿ ಉಲ್ಲಾಲ್ದಿ ದೈವ/ಪಳ್ಳಿತೊಕುರು ಬಾಕುಡ್ದಿ.ಪರಂಕಿಲ ಚಾವಡಿ ಅಡ್ಕ

      ‌‌‌‌           *_ದೈವಾರಾದನೆ_* 

ಕಾಲದ ಪರಪುಡು ಕರದ್ ಪೋವೊಂದಿಪ್ಪುನ,ಆರಾದನೆದ ಎತ್ಯಯೊಡು ಅಳಿಯಂತ್ರ ಸಾದಿಡುಪ್ಪುನ ತುಳುವ ಧರ್ಮದ ದೈವಾರಾದನೆದ ಮೂಲ ನಂಬೊಳಿಗೆ,ಆರಾದನೆದ ಪದಿನಾಜಿ ಕಟ್ಲೆಲು,ಆಚರಣೆಲೆನ್ ಪೆರಿಯಾಕ್ಲ್ ಪಾಡ್ದ್ ಕೊರ್ನ ಸಾದಿಡೆ ಕುಡೊರ ತುಳುವ ಮಣ್ಣ್ ಡ್ ದೆರ್ತ್ ಪತ್ತುನ ಕಾಲ ಬೈದ್ಂಡ್.ಪೊಸತ್ ನ್ ತೋಡುದು,ಪರತ್ ನ್ ನಿಗಿತ್ ದ್ ಮಣ್ಣೇ ಮರಿಯಾದ್ ಕೊಡಪುನ ದುಂಬು ಮೂಲ ನಂಬೊಳಿಗೆ ದಾದ ಪನ್ಪುನೆನ್ ಪೆರಿಯಾಕ್ಲೆಡ ಕೇಂದ್ ಪಿಂದೊನುಗ.ಅಷ್ಟ ಮಂಗಲ ಇಂಚಿಪ್ಪಿ ಪೊಸ ದೇಕಿದ ಪ್ರಶ್ನೆದ ಬದಲ್ ಪೆರಿಯಾಕ್ಲ್ ನಂಬೊಂದು ಬತ್ತಿ ದೈವದ ನುಡಿಕ್ ಬಿಲೆ ಕೊರ್ಕ.ಅಂಚನೆ ಮೂಲ ನಂಬೊಲಿಗೆದ ಬಲ್ಯಾಯನ ನಿಮಿತ್ತ ನೋಟೊನು ಕುಡೊರ ಮಾನಿತೊನ್ಗ. ಬ್ರಹ್ಮಕಲಸ ದಾಂತೆ ತುಳುವೆರ್ ಮೂಲೊಡು ದೈವದ ಮಣೆಮಂಚದೆದುರು ಹಿರಿಯಾಕ್ಲೆ ಮದಿಪುದ ಪಾತೆರೊಗು ಬಿಲೆ ಕೊರ್ದು  ಸಾನ ಗಿರಿತ್ ದ್ ಸಾನ ಕಟ್ಟಾದ್ ದೈವೊಲೆನ್  ಅಂದ್ ಮಲ್ಪುನ ಸಾನದೊಕ್ಕೆಲ್ ನ್ ಮೂಲ  ಕಟ್ಲೆಡೆ ಮಲ್ಪುನ ಕಾಲ ಒದಗ್ ದ್ ಬರೊಂದುಂಡು.ದೈವೊಲೆಗಿಜ್ಜಂದಿ ಗಣ ಓಮ,ಮೃತ್ಯುಂಜಯ ಓಮ, ದುರ್ಗಾ ನಮಸ್ಕಾರ,ಪೂಜೆ,ಮಂತ್ರ,ಆರತಿ ಉಂದೆನ್ ಬುಡ್ಡು ಮೂಲ ಕಟ್ಲೆಡ್ ಹಿರಿಯಾಕ್ಲ್ ಎಂಚ ನಡಪಾವೊಂದು ಬತ್ತೆರ್ಂದ್ ಕೇಂದ್ ತೆರಿದ್ ಅಂಚನೆ ನಡಪುಗ.ದೈವೊಗು ಹಿರಿಯಾಕ್ಲೆ ಮದಿಪುರ್ದು ಮಲ್ಲ ಮದಿಪಿಜ್ಜಿ,ಕುಟುಮದಕ್ಲ್ ಬಲಸುನೆರ್ದ್ ಮಲ್ಲ ಅಗೆಲಿಜ್ಜಿ.ದೈವದ ಕೊಡಿಯಡಿಟ್ ನುಪ್ಪು ದಾನ ಇಜ್ಜಿ.ಅವ್ಲು ಪೊರಿ ಬಜಿಲ್ ಪಾನಕ ಉಪ್ಪುನಿ.ದಾಯೆ ಪಂಡ ಜಾತ್ರೆದಪಗ ದೈವದ ಲೆಕ್ಕೊಡು ಆ ಗಿರಮ,ಊರುದ ಪ್ರತಿ ಇಲ್ಲಲ್ಲ ಒನಸ್ ಇಪ್ಪುಂಡು.ನಮ ನಂಬೊಂದು ಬತ್ತಿನ ದೈವೊಲೆಗ್ ಪಿದಯಿದಕ್ಲೆನ್ ಲೆತ್ತ್ ದ್ ಅಕ್ಲೆ ಕೊಸ್ವಾಸಿ ಬಲಸಂಡ ದೈವ ಖಂಡಿತಾ ಒಪ್ಪಂದ್.ನಮ್ಮ ಅಪ್ಪೆ ಅಮ್ಮಗ್ ನಮ ಬಲಸ್ ದ್ ಕೊರ್ನಗ ಆಪುನ ಕೊಸಿ ಪಿದಯಿರ್ದ್ ಬತ್ತ್ ನಕುಲು ಬಲಸ್ಂಡ ಆವಂದ್.ನಮಕ್ ತೆರಿ ಮಟ್ಟ್ ಗ್ ನಮ ಹಿರಿಯಾಕ್ಲೆಡ ಕೇಂದ್ ಮಲ್ತೊಂದು ಪೋಯಿ.ದೈವ ತಪ್ಪು ಮಲ್ಪಾಯೆರೆಂದ್ ಉಪ್ಪುನಿ.ಆಂಡ ಪೆದ್ದ್ಂಡ ಅಪ್ಪೆ ತಾಂಕ್ಂಡ ತಮ್ಮಲೆಯಾದ್ ನಮ್ಮ ತರೆ ಬೆರಿ ಮಾನೊನು ಕಾಪುನ್ಲ ನಮ ನಂಬಿಂಚಿ ದೈವೊಲೆ.ಮೂಲ ಕಟ್ಟ್ ನ್ ಪೊಲಿಪೆರೆ ಸುರು ಮಲ್ತ್ ದ್ ಕುಟುಮದ ಸಮ್ಮಂದಲ ಅವ್ವೇ ಲೆಕ ಇನಿಕಾನಗ ಪೊಲಿದಾತ್ಂಡ್. ನಿಚ್ಚ ಪೂ ನೀರ್ ದೀವೊಂತಿ ಇಲ್ಲ ಚಾವಡಿದ ದೈವೊಲೆನ್ ನಮಟೊರಿಂದ್ ನಮ ಎನ್ನಿದಿತ್ತ್ ದ್, ಏತೊಂಜಿ ತೊಟಿಲುಲು ತೂಂಕೊಂತಿ ಕೂಡು ಕುಟುಮದ ಇಲ್ಲುಲು,ಚಾವಡಿಡ್ ಉಜ್ಜಾಲ್ ಡ್ ದೈವೊಲು ,ಇಲ್ಲದ ಹಿರಿಯಾಕುಲ್ಲೆಕ ಇತ್ತ್ ನ ದೈವೊಲೆನ್  ಏಪ ಪಿದಯಿರ್ದ್ ಬತ್ತ್ ನಕುಲು ಪಂಡೆರ್ಂದ್ ಪಿದಯಿ ಸಾನ ಕಟ್ಟಾದ್ ಇಲ್ಲದುಲಯಿರ್ದ್ ಪಿದಯಿ ಸಾನದುಲಯಿ ಪಾಡ್ದ್ ಸಂಕ್ರಾಂತಿಗೊರ ಪೂ ನೀರ್ ದೀದ್ ತಂಬಿಲ ಕರಿತ್ ದ್ ತಿಂಗೊಲಿಡೀ ಬಾಕಿಲ್ ಮುಚ್ಚಿದ್ ಕುಲ್ಲಿಯನ ಅಡೆಗ್ ತುಳುವೆರೆ ಕೂಡು ಕುಟುಮದ ಸಮ್ಮಂದದ ಗೋಡೆಲು ಜರಿಯೆರೆ ಸುರಾಯ. ಹಿರಿಯೆರ್ ಪನ್ಪುನ ಪಾತೆರೊರ್ದು ಮಲ್ಲ ಮದ್ಯಸ್ಥಿಕೆಯತ್ತ್.ಅವ್ಲು ಕಾಸ್ ಗ್ ಪಾತೆರ,ಮೂಲು ಮನ ಬಗ್ತಿದ ಮದಿಪು.ಇನಿ ಕೆಲವು ಸಾನೊಲೆಡ್ ಒಂಜಾತ್ ವರ್ಸೊರ್ದಿಂಚಿ ನೇಮದಪಗ ಒಂಜಿ ಸುತ್ತು ಬಜನೆ ಪನೆರೆ ಸುರಾತ್ಂಡ್.ದೈವದ ಮುಗೊನು ಕಟಿ ಮಾನಿ ದೀದ್ ನೇಮ ಅನಗ ದೈವ ಆಯಿನವು ಸಾನದ ಉಲಯಿ ಪೋಯಿ ಸಾತ್ ಗ್ ದೇವಿಯಾದ್ ಅವ್ಲು ಕುಂಕುಮಾರ್ಚನೆ,ಕರ್ಪೂರಾರತಿ,ನವರಾತ್ರೆ ಪೂಜೆ ಸುರಾಂಡ್ ಪಂಡ ದೈವಸಾನ ದೂರಾದ್ ದೇವಸಾನ ಆಪುನ ಕಾಲ ದೂರ ಇಜ್ಜಿ.ಇನಿ ದೈವೊನು ದೇವೆರೆ ಪುದರ್ಡ್ ಲೆತ್ತ್ ದ್ ಒಂಜಾತ್ ವರ್ಸ ಕರಿನಗ ಜನೊಕ್ಲೆ ಬಾಯಿಡ್ ಮೂಲ ದೈವದ ಪುದರ್ ಮಯಕಾದ್ ದೇವೆರೆ ಪುದರ್ ಮಾತ್ರ ಒರಿಯು.ಪ್ರಸ್ನೆ ಚಿಂತನೆದಕ್ಲ್ ಪಂಡೆರ್ಂದ್ ದೈವದ ಪರ ಮುಗ ಮೂರ್ತಿಲೆನ್ ತೋಡು ಸುದೆಕ್ ಬುಡ್ದು,ಮಣೆ ಮಂಚಾವುನು ಪೊತ್ತಾದ್ ದುಂಬುಗು ನಮ್ಮ ಪಿರಾಕ್ ದ ದೈವಂದ್ ಪನ್ನಗ ಅಕ್ಲ್ ಸಾಗ್ಸಿ ಕೇಂಡ ನಮಡ ಕೊರ್ಯೆರೆ ಪರ ಮುಗ ಮೂರ್ತಿಲಾ ಇಜ್ಜಿ,ಪರ ಮಣೆ ಮಂಚಲಾ ಇಜ್ಜಿ.ಇತ್ತೆನೇ ಸುಮಾರ್ ಕಳೆವೊಂದಾತ್ಂಡ್. ಮುಗ ಮೂರ್ತಿ,ಮಣೆ ಮಂಚವುದ ಸಗ್ತಿ ದೆತ್ತಿ ಬೊಕ್ಕ ಅವೆನ್ ನೀರ್ ಗ್ ದಕ್ಕುನ ಬದಲ್,ತೂಟು ಪೊತ್ತಾವುನ ಬದಲ್ ಸೊತ್ತು ಜಾಗ್ ರ್ತೆ ದೆತ್ತ್ ದೀಪುನ ವಸ್ತು ಸಂಗ್ರಹಾಲಯೊಗು ಕೊರ್ಂಡ ನೆನೆಪಾನಗ ತೂದು ಬರೊಲಿ.ದೈವೊಲೆಗ್ ವಾ ಕಾರಣೊಗ್ಲಾ ಬಜನೆ ಪನ್ಪುನ ಕಟ್ಟಿಜ್ಜಿ.ಬಜನೆ ಪನ್ಪುಂಡ ದೈವ ಬೊಕ್ಕ ದೇವೆರೆಗ್ ದಾದ ಎತ್ತೇಸ?.ದೇವೆರೆಗ್ ಕಲಶ, ಬಜನೆ,ಮಂತ್ರ,ಶ್ಲೊಕ,ಹೋಮ,ಪೂಜೆ,ಪಂಚಕಜ್ಜಾಯ.ದೈವೊಲೆಗ್ ಸಂದಿ ಪಾಡ್ದನ,ದೂಪ,ಗಿಂಡೆ ನೀರ್,ಮದಿಪು,ಅಗೆಲ್. ಇನಿ  ದೈವದ ಕಲೊಕು ಬಜನೆದಂಚ ಓಮ,ಕಲಸ,ಪೂಜೆ,ಆರತಿ,ಪಂಚಜ್ಜಾಯ ಬತ್ತ್ ದ್ ದೈವಸಾನನಾ,ದೇವಸಾನನ ಗೊತ್ತಾವೊಂದಿಜ್ಜಿ.ತುಳುನಾಡ ಸ್ವತಂತ್ರ ಸಗ್ತಿಲಾಯಿನ ದೈವೊಲೆನ್ ದೇವೆರೆ ಅಂಸ ಮಲ್ತ್ ದ್,ದೈವೊಲು ದೇವೆರೆನ್ ಕಾಪುಲೆಕ ಆಂಡ್.ಸ್ವಂತ ಅಸ್ಥಿತ್ವ ಇತ್ತ್ ನ ದೈವೊಲೆಗ್ ಪುರಾಣ ಸೇರಾದ್ ಆಸುರೀ ಕಿರಿಯೆದ ಬದಲ್ ದೇವ ಕಿರಿಯೆಡ್ ಕರಿತೊಂದುಲ್ಲೆರ್.ದೇವ ಕಿರಿಯೆಡ್ ಕರಿಪುನಕ್ಲ್ ಅಂಚನೇ ಕರಿಪಡ್.ಆಂಡ ಆಸುರೀ ಕಿರಿಯೆಡ್ ಕರಿಪುನಕ್ಲೆನ್ಲಾ ನಿಕುಲು ದೇವ ಕಿರಿಯೆಡ್ ಮಲ್ಪುಲೆ ಪನ್ಪುನ ಅಗತ್ಯ ಇಜ್ಜಿ.ನಮ ದುಂಬೆಂಚ ನಂಬೊಂದು ಬತ್ತ್ ನ ಅಂಚನೆ ನಂಬುಗ. ದೈವೊಲು ನಮನ್ ಮಾತ ಒರ್ತು ಕಾಪುವ ಪನ್ಪುನೆನ್ ಮದಪೆರೆ ಬಲ್ಲಿ.ನಮಕ್ ಬದ್ ಕ್ ಡ್ ದಾಲ ನಿಮುರ್ತಿ ಇಜ್ಜಿ ಪಂದಾನಗ ನಮ ಕೈ ಕಟ್ಟ್ ದ್ ತರೆ ತಗ್ಗಾದ್,ಬೆರಿ ಬಗ್ಗಾದ್ ಉಂತುನಿ ನಮ ನಂಬಿ ದೈವೊಲೆನ ಎದುರು ಪನ್ಪುನೆನ್ ಮದಪೆರೆ ಬಲ್ಲಿ.ಆಸತ್ರೆಡ್ ದಮ್ಮು ಕಟ್ಟ್ ನಾಯನ್ ಒರಿಪೆರೆ ಆಪುಜಿ ಪಂಡ್ ದ್ ವೈದ್ಯೆರ್ ಪಿರ ಬುಡಿಯೆರ್ಡ ಕುಟುಮದ ಪಂಜುರ್ಲಿಗ್ ಅರಿಕೆ ಮಲ್ತ್ ದ್ ತರೆ ತೊರತ್ ದ್ ಕೋರಿ ಬುಡ್ದು ಅಕ್ಲೆಡ 48ದಿನ ಪ್ರತಿ ದಿನಲ ತರೆ ತೊರಪಾದ್ ಬಂಜಾರ ಕೋರಿಗ್ ತಿನ್ಪಾದ್ ಅಕ್ಲೆ ಜೂವ ಒರಿತಿ ಪಂಜುರ್ಲಿರ್ದ್ ಮಲ್ಲ ನಮನ್ ಒರ್ತ್ ಕಾಪುನೆಕ್ ಸಾಗ್ಸಿ ಬೋಡೆ?.ದೈವೊಲೆಗ್ ಸಂದಿ ಪಾಡ್ದನೊಲೆಡ್ದ್ ಮಲ್ಲ ಒವುಲಾ ಇಜ್ಜಿ.ಮೂಲೊಡು ಇದ್ಯೆ ದಾಂತಿ ತುಳುವೆರೆಗ್ ಬಜನೆ,ಶ್ಲೊಕ,ಮಂತ್ರ ಪೂರ ಓಲು ತೆರಿದಿತ್ತ್ಂಡ್?.ಅಕ್ಲೆಡ ಇತ್ತಿನಿ ನಿರ್ಮಲವಾಯಿನ ಮನಬಗ್ತಿ,ದೈವೊನು ಲೆತ್ತ್ ಕೊಂಡಾಡುನ ಸಂದಿ ಪಾಡ್ದನೊಲು.ತಾಸೆ,ದೋಲು,ಸುತಿ/ಬಾಂಕೆ,ನಾಗಸರೊಟು ಲಕ್ಕೊಂತಿ ದೈವೊಲೆಗ್ ವಾವಾ ನಮುನೆದ ವಾದ್ಯೊಲು ಇನಿ ಬೈದ.ಇನಿ ದೈವದ ಕಲನ,ಆಟದ ರಂಗತಲೊನ,ಪದ ರಂಗಿತೊದ ರಂಗ ಚಾವಡಿಯ ಒಂಜಿಲಾ ಅರ್ತ ಆವೊಂದಿಜ್ಜಿ.ಮಾತ  ಗಾಂಡ್ ಗೌಜಿದ ನಡುಟು ಮನ ಬಗ್ ತಿ ದಾಂತೆ ಕಲೊಟು ದೈವೊಲು ಖಂಡಿತಾ ಉಪ್ಪೆರೆ ಸಾದ್ಯ ಇಜ್ಜಿ‌.ಪೆರಿಯಾಕ್ಲ್ ದೀನ ತುಳುವ ಮಣ್ಣ್ ದ ದೈವದ ಪುದರ್ ನ್ ಬದಲ್ತ್ ದ್ ಲೆತ್ತ್ ದ್ ಉಂದೆನನ್ ಲೆಪ್ಪುನತ್ತ್ಂದ್ ದೈವ ಕಲೊಕು ಬರ್ರೆ ಸಾದ್ಯಲ ಇಜ್ಜಿ.ನಮಕ್ ಪೆರಿಯಾಕ್ಲ್ ದೀನ ಪುದರ್ ವಾ ಬಾಸೆಡ್ ಪಂಡಲ,ವಾ ದೇಸೊಡು ಪಂಡಲ ಒಂಜೇ ಪುದರ್.ನಮ ನಂಬಿಂಚಿ ದೈವೊಲೆಗ್ಲ ಅಂಚನೆ.ಪೆರಿಯಾಕ್ಲ್ ದೀನ ಪುದರ್ ಡೇ ಲೆಪ್ಪೊಡು.ಕನ್ನಡ,ಸಂಸ್ಕೃತೊಡು ಲೆತ್ತಿ ಸಾತ್ ಗ್ ಮೂಲ ಪುದರ್ ದಾಲ ಬದಲಾಪುಜಿ.ಮೂಲ ಪುದರ್ ಅವ್ವೇ ಆದಿಪ್ಪುಂಡು. ದೈವಾರಾದನೆ ತುಳುನಾಡ್ ಬುಡ್ದು ಇನಿ ಪಿದಯಿ ಪೋವೊಂದುಂಡು.ನರಮಾನಿ ಕುಂಬರೊಲಿ,ನುಡಿ ಕೊರ್ಪಿ ದೈವ ಮಾಯೆರ್ದ್ ಅವ್ಲು ಜೋಗೊಡು ಬರೆರೆ ಸಾದ್ಯ ಇಜ್ಜಿ.ಅಂಚಾದ್ ದೈವದ ಮೂಲ ಪದಿನಾಜಿ ಕಟ್ಲೆನ್ ಮೂಲದೊರುಟು ಒರಿತ್ ದ್ ದುಂಬುದ ಜೋಕ್ಲೆಗ್ ದೈವಾರಾದನೆನ್ ತೆರಿಪಾವುನ ಬೇಲೆ ನಮ ಮಾತೆರೆಡ ಆವೊಡು.ಮಾತೆರೆ ಪಾತೆರೊಗು ಬಿಲೆ ಕೊರ್ಕ.ಅಂಚಾಂದ್ ಮೂಲ ದೈವಾರಾದನೆಗ್ ಒಡಕ್ ಬರಂದಿಲೆಕ ತೂಕ.

-ಕೆ.ಮಹೇಂದ್ರ ನಾಥ್ ಸಾಲೆತ್ತೂರು.ಎಂ.ಎ

ಗುರ್ಕಾರ್ರ್

ತುಳು ಒರಿಪುಗ

 ಬೊಕ್ಕ 

ತುಳು ಸಾಹಿತ್ಯ ಪರಿಷತ್ ಅಂತರ್ಜಾಲ

    

ಒಡಿಪು (ಒಡಿಪುದ ಮೂಲ ಪುದರ್ ಶಿವಳ್ಳಿ(ಶಿವಳ್ಳಿ ಪಂಡ ಶಿವನ ಹಳ್ಳಿಂದರ್ಥ.ಅಪಗ ಅವ್ಲೊಂಜಿ ಶಿವನ ದೇಲ್ಯ ಉಪ್ಪೊಡೆ) ಶಿವಳ್ಳಿ ಬೆರಣೆರ್ಂದ್ ಮಾದ್ವ ತುಳು ಬೆರಣೆರೆನ್ ಪನ್ಪೆರ್.ಅಂಚನೇ ಕಾಪುದ ಮೂಲ ಪುದರ್ ಪೂ ಬಿತ್ತಿಲ್) ಮಲ್ಪೆ ಕೈತಲ್ದ ಜುಮಾದಿ ನಗರ,ಬಂಟಾಲದ ಬೆರ್ಮೆರೆ ಕೂಟೇಲ್ದಲ್ತ ಜುಮಾದಿ ಗುಡ್ಡೆ,ಬೊಳ್ತೇರ್ ಗುರುವಾಯನಕೆರೆ ಗೋಂಕುದ ಕಟ್ಟೆದಲ್ಪದ ಜುಮಾದಿ ಗುಡ್ಡೆ,ಉಲ್ಲಾಲೊಡ್ದು ಪಳ್ಳಿ ಬರಿಯೆ ತೊಕ್ಕೊಟ್ಟುಗು ಬರ್ಪುನ ಸಾದಿದ  ಜುಮಾದಿ ಸಾನ,ಪುತ್ತೂರುದ ಮುರತಲ್ಪದ ಜುಮಾದಿಪಲ್ಕೆ ಉಂದೆಡ್ದ್ ಮಲ್ಲ ಸಾಗ್ಸಿ ಜುಮಾದಿದೈವ ಪನ್ಪುನೆಕ್ ಬೇತೆ ದಾದ ಬೋಡು

 ದೈವಾರಾದನೆದ ಕಲತ ಕೇತ್ರುಲ್ಲಾಯೆ ಕ್ಷೇತ್ರುಲ್ಲಾಯೆ,ಕ್ಷೇತ್ರದ ಉಲ್ಲಾಯೆ ಪಂಡ ಆ ಬೂಮಿದ ಒಡೆಯಲೆಕಂತಿ ದೈವ (ಪಂಜುರ್ಲಿ,ಗುಳಿಗೆ) ಒಂಜಾತ್ ವರ್ಸೊರ್ದಿಂಚಿ ಕ್ಷೇತ್ರಪಾಲ ಆತ್ಂಡ್.ಉಲ್ಲಾಯೆ ಬೂಮಿದ ಒಡೆಯೆ ಆದಿತ್ತ್ಂಡ ಕ್ಷೇತ್ರಪಾಲೆ ಜಾಗೆನ್ ಕಾಪುಲೆಕಾಯೆ.ತದ್ವಿರುದ್ಧ ಕಲ್ಪನೆ.

ನಾಗನ್ ಬೆಮ್ಮೆರೊಟ್ಟುಗು ಸಮೀಕರಣ ಮಲ್ತ್ ದ್ ನಾಗ ಬೆಮ್ಮೆರಾದ್ ಇನಿ ಅನಂತೇಶ್ವರೆಂದ್ ಆರಾದನೆ ಮಲ್ಪುವೆರ್.ಬೆಮ್ಮೆರ್ ಮೂಲೆ ಸೇರ್ದೆರ್.

ಬೆಮ್ಮೆರೆನ್ ಬ್ರಹ್ಮ ಲಿಂಗೇಸರೆ,ಮಹಾಲಿಂಗೇಸರೆ ಮಲ್ದೆರ್.

ಬೂತ ಬೆಮ್ಮೆರೆನ್ ಬೂತನಾಥೇಶ್ವರೆ ಮಲ್ದೆರ್.

ಲೆಕ್ಕೆಸಿರಿನ್ ರಕ್ತೇಶ್ವರಿ,ಖಡ್ಗೇಶ್ವರಿ,ದುರ್ಗಾ ಪರಮೇಸ್ವರಿ ಮಲ್ತೆರ್.ದುರ್ಗೆ ಬೊಕ್ಕ ಪರಮೇಶ್ವರಿನ ಸಮೀಕರಣ ದುರ್ಗಾಪರಮೇಶ್ವರಿ.

 ದೈವೊಲೆನ್ ರಕ್ಕಸೆರ್ ಮಲ್ತ್ ಬುಡಿಯೆರ್.ಗುಳಿಗೆ ಗುಳಿಗಾಖ್ಯೆಗೆ,ಮೈಸಂದಾಯೆ ಮೈಸಾಸುರೆಗೆ.ಇಂಚಿ ದೈವದ ಪುದರ್ ನಾಶ ಮಲ್ಪೆರೆ ವಧೆತ ಒರುಟು ದೈವದ ಕಲೊಕು ದೇವಿನ್ ಕನತೆರ್

ಮಲರಾಯಗ್ ಈ ದೇವಿನ ವರ್ಣನೆ ಮಲ್ತೊಂದುಲ್ಲೆರ್ .ದೇವೆರೆ ಆರಾದನೆ ಬರ್ಪುನ ದುಂಬೇ ತುಳುನಾಡ್ ಡ್ ದೈವೊಲೆ ಆರಾದನೆ ಇತ್ತ್ ದ್ ಸಂದಿ ಪಾಡ್ದನೊಲೆಡ್ ಪುರಾಣದ ಈ ದೇವಿನ ವರ್ಣನೆ ಮಲರಾಯಗಿಜ್ಜಿ.ಇನಿ ಪಂಜುರ್ಲಿಗ್ಲಾ ಉಂದೇ ದೇವಿನ ವರ್ಣನೆ ಮಲ್ಪುವೆರ್ ಪಂಡ  ದೈವೊಗು ಪುರಾಣ ಕಟ್ಟ್ ದ್ ದೈವೊನು ದೇವೆರ್ ಮಲ್ಪುನ ವ್ಯವಸ್ಥಿತವಾಯಿನ ಹುನ್ನಾರ ಇತ್ತ್ ಲೆಕ ತೋಜುಂಡು.ಸುರುಕು ಪುದರ್ ಬದಲ್ಪುನೆ.ಬೊಕ್ಕ ದೈವೊನೇ ಬದಲ್ತ್ ದ್ ದೇವೆರ್ ಮಲ್ಪುನ ನಮಕ್  ತೆರಿಯಂದಿಲೆಕ ಒಂಜಿ ವ್ಯವಸ್ಥೆ ಮಲ್ತೊಂದುಂಡು.ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ

  ತುಳುನಾಡ ರಾಜಂದೈವ ಕೊಡಮಂದಾಯನ ಅಣಿತ ಕೊಡಿಟ್ ಬೆಮ್ಮೆರೆ ಒರು ಇತ್ತ್ ದ್ ಇನಿ ದೈವ ಕೊಡಮಂದಾಯನ ಪುದರ್ ಬದಲ್ದ್ ಅಡೆ ಕೊಡಮಣಿತ್ತಾಯಿ ಪುದರ್ ಬತ್ತ್ ದ್ ಅವುಲಾ ಪೋದು ಇನಿ ಕುಂಭಕಂಠಿನಿ ದೇವಿಯಾದ್ ಕುಂಭಕಂಠಿನಿಗ್ ದೇವಸಾನ ಆವೊಂದುಂಡು.ದೈವದ ಪುದರ್ ಬದಲ್ತ್ ದ್ ದೇವೆರೆ ದೇವಸಾನ ಆಯಿನೆಕ್ ಉದಾರ್ಮೆ ಕೊಡಮಂದಾಯೆ ಪೋದು ಕೊಡಮಣಿತ್ತಾಯಿಯಾಂಡ,ಬೆಮ್ಮೆರ್ ಪೋದು ಬ್ರಹ್ಮ ಸನ್ನಿಧಿಯಾದ್,ವಿಷ್ಣುಮೂರ್ತಿ ದೈವ ಪೋದು ವಿಷ್ಣುಮೂರ್ತಿ ದೇವಸಾನ ಆದ್,ಲೆಕ್ಕೆಸಿರಿ ದೈವಸಾನ ಪೋದು ರಕ್ತೇಶ್ವರಿ ದೇವಸಾನ ಆದ್,ಕಾಳಾತ್ರಿ ದೈವ ಪೋದು ಕುಂಭೋಧರಿ ದೇವಸಾನ ಆದ್,ಮುಡಿಪಿನಾರ್ ದೈವ ಪೋದು ಕಿರಾತೇಶ್ವರ ದೇವಸಾನ ಆತ್ಂಡ್.ಸದ್ಯೊಡೇ ಮಲರಾಯನ ಪುದರ್ ಬದಲಾಯಿನ ವಾರಾಹಿ ದೇವಿನ ದೇವಸಾನ ಲಕ್ಕುನ,ಜುಮಾದಿನ ಪುದರ್ ಪೋದು ಧೂಮಾವತಿನ ದೇವಸಾನ ಲಕ್ಕುನ ಕಾಲ ದೂರ ಇಜ್ಜಿ.ಅಂಚನೆ ಬಂಡಿ ಒಯ್ತೊಂತ್ ನ ಕೊಡಮಂದಾಯಗ್ ದೇವೆರೆ  ತೇರ್ ಬೈದ್ಂಡ್.ಕೊಡಮಂದಾಯನ ಆರಾದನೆಗ್ ವೈದಿಕ ವಿಧಿ ವಿಧಾನ ಸೇರೊಂದು ಬೂತ ಬಲಿ,ದೇವ ಬಲಿಂದಾತ್ಂಡ್.ನಿಜವಾದ್ ತುಳುನಾಡ ಸ್ವತಂತ್ರ ಸಗ್ತಿ ಕೊಡಮಂದಾಯನ್ ಆ ಪುದರ್ ಡೇ ಲೆತ್ತ್ಂಡ ಓಕೊಂದು ಮಲೆತಲೆಕ ಬತ್ತಿ ಬಂಙೊನು ಮೈಂದ್ ದಲೆಕ ಮಾಜಾವೆ.ಅವು ಬುಡ್ದು ಬೇತೆ ವಾ ಪುದರ್ಪೊರ್ಲುಂಡುಂದು ಲೆತ್ತರ್ಡಲ ಪೆರಿಯಾಕ್ಲೆ ಪುದರ್ ಗ್ ಮಾತ್ರ ಓಕೊನುವೆ

ಇನಿ ಕೆಲವು ಪ್ರಶ್ನೆಚಿಂತನೆದಕ್ಲ್ ಜುಮಾದಿನ್ ಧೂಮಾವತಿ ಪನ್ಪುನ ಮಾತ್ರ ಅತ್ತಂದೆ ನಿಕುಲು ಧೂಮಾವತಿಗ್ ಪಂಜಿದ ಬಂಡಿದ ಬದಲ್ ಕಕ್ಕೆದ ಬಂಡಿ ಮಲ್ಪುಲೆ ಪನೊಂದುಲ್ಲೆರ್.ಓಡೆಗೆತ್ತ್ಂಡ್ ದೈವಾರಾದನೆದ ಸ್ಥಿತಿ?

ದೇವೆರೆ ಆರಾದನೆಡ್ ಕಂಡನಿ ಬುಡೆದಿನ ಆರಾದನೆ ಉಂಡು.ದೈವೊಲೆಡಿಜ್ಜಿ.ಅಂಚಾದ್ ಉಲ್ಲಾಯ ಉಲ್ಲಾಲ್ದಿನ್ ಈಸರ ಪಾರೊತಿ ಪನ್ಪುನವು ಸುದ್ದ ತಪ್ಪು

  

ಪಿಲ್ಚಂಡಿ ದೈವದ ಅರ್ದಾಲ ಮಯಕಾದ್ ಪಿಲಿತ ಮೋನೆದ ಏಸದ ಬಣ್ಣ ಬೈದ್ಂಡ್

ಇಂಚಿಪ್ಪದ ದಿನಮಾನೊಲೆಡ್ ಮಲರಾಯನ ಅಣಿತ ಪಿರವುಡು ಉಲ್ಲಾಲ್ದಿನ ಸಿರಿಮುಡಿತ ಪಿರವು ಪುರ್ಪ ಸುತ್ತಿನ ಮದಿಮಾಲೈತದ ಜಡೆ ನೆಯ್ಲೆಕ ನೆಯ್ಯೊಂದುಲ್ಲೆರ್.ಮಲರಾಯೆ ಆಯೆ ಪೋದು ಆಲ್ ಆಪುನೆಂಚ.

ಮಲರಾಯೆ ಆಯೆ ಪಂಡ ಪೊಣ್ಣತ್ತ್.ಪೊಣ್ಣು ದೈವೊಲು ಬೇತೆನೇ ಉಲ್ಲ.ದೈವಾರಾದನೆದ ಕಲೊಕು ಪೊಸತೊಂಜಿ ವ್ಯವಸ್ಥೆ ಬತ್ತ್ ದ್ ಆಣ್ ದೈವೊಲು ಪೊಣ್ಣಾವೊಂದುಲ್ಲ.

ದೈವೊಲೆನ ಸಂಧಿ,ಪಾಡ್ದನೊನು ತೆಂಬರೆ ಬೊಟ್ಟುದು ತುಳುಟೇ ಪನೊಡು,ಪನ್ಪೆರ್ಲ.ಇನಿ ಮಲರಾಯನ ಮುಗ ದೀದ್  ಮೂರ್ತಿದಪ್ಪಣೆ ಪನ್ಪೆರ್.ಮಾಯೆರ್ದ್ ಜೋಗೊಗು ಬರ್ಪುನ ದೈವ ಏಪ ಮೂರ್ತರೂಪದ ಮೂರ್ತಿಯಾಂಡ ಆನಿರ್ದ್ ಬೊಕ್ಕ ತುಳುನಾಡ ದೈವ ಮಲರಾಯೆ ಪುರಾಣದ ದೇವಿ ವಾರಾಹಿಯಾಂಡ್.ಪುರಾಣೊಡು ವಿಷ್ಣು ವರಾಹ ಸರಿ.ಲಕ್ಷ್ಮಿ ಏಪ ವಾರಾಹಿ ಅಯಿನಿ?.ಒಲ್ತ ಮಲರಾಯೆ, ಒಲ್ತ ವಾರಾಹಿ.ಮಲರಾಯಗ್ ಕಟ್ಟಿ ನೇಮದ  ದುಂಬು ಅಂಧಕಾಸುರನ್ ಕೆರ್ನ ಭೀಕರವಾಯಿನ ರೂಪದ ದೇವಿನ ವರ್ಣನೆನ್ ಕನ್ನಡೊಡು ದೈವದ ಪಿರವು ಪನೊಂದುಲ್ಲೆರ್ ಪಂಡ ಉಂದೆತ ಅರ್ಥ ದೈವೊನು ದೇವಿ ಮಲ್ಪುನವಾ?.ದಾಯೆ ಮಲರಾಯನ ಆರಾದನೆನ್ ದುಂಬುರ್ದೇ ತೂವೊಂದು  ಬತ್ತಿ ಪೆರಿಯಾಕ್ಲ್ ಮನಿಪುಜೆರ್

                   ಬಬ್ಬರ್ಯೆ  ಬರ್ಬರೀಕ,ಬರ್ಭರೇಶ್ವರೆ‌ಆತೆ

ಮೂಲೊಡು ತುಳುನಾಡ್ ಡ್ ದೈವಸಾನೊಲು ಇತ್ತ್ ದ್  ದೈವಾರಾದನೆಲು ನಡತೊಂತಿ ಜಾಗೆಲೆಡ್ ದೇಲ್ಯೊಲು ಲಕ್ಕ್ ದ್ ಅವ್ಲು ದೇವೆರ್ ಪ್ರಧಾನ ಆನಗ ದೈವೊಲು ಉಪ ಆಯೆರ್ ಪಂಡ ಪರಿವಾರ ಸಗ್ತಿಲಾಯೆರ್

ನಂದಿಗೋಣೆ ಬೊಕ್ಕ ಮೈಸಂದಾಯೆ:-

ನಂದಿ-ಬಸವೆ ಉಂದು ಎರು ಜಾತಿಡ್ ಬರ್ಪುನಿ. ದೇವೆರೆ ಆರಾದನೆಡ್ ನಂದಿ ಸಾನದೆದುರು ಉಪ್ಪಂಡು.ಈಸರ ದೇಲ್ಯದ ಎದುರು ನಂದಿ ಇಪ್ಪುಂಡು.ದೈವಾಲ್ಯದ ಸಾನ ಬಲಿ ಸುತ್ತು ನೇಮೊಡು ಬಸವೆ ಇಪ್ಪುಂಡು.ಕಾಲೆ ಕೋಲೊಡ್ಲ ಎರುವೇ ಉಪ್ಪುನಿ.

ಗೋಣೆ ಎರ್ಲೆ ಜಾತಿಡ್ ಬರ್ಪುನಿ.ಸಂದಿ ಪಾಡ್ದನೊಲೆಡ್ ನಾಲ್ ಕಾರ್ದ ಮೈಸಂದಾಯೆಂದೇ ಉಪ್ಪುನಿ.

ನಂದಿ ಬೊಕ್ಕ ಗೋಣೆ ಒಂಜೆ ಅತ್ತ್.ಅವು ಬೇತೆ ಬೇತೆ ಪೆರಣಿಲು.ಬೊಕ್ಕ ವಾ ಕಾಲೊಡು ನಂದಿನ್ ಬೊಕ್ಕ ಗೋಣನ್ ಸಮೀಕರಣ ಮಲ್ತ್ ದ್ ನಂದಿಗೋಣೆ ಮಲ್ತೆರ ತೆರಿಯಂದ್.ಅಂಚನೆ ನಾಗನೊಟ್ಟುಗು ಬೆರ್ಮೆರೆನ್ ಸಮೀಕರಣ ಮಲ್ತ್ ದ್ ನಾಗ ಬ್ರಹ್ಮ ಮಲ್ತ್ ದ್ ನಾಗೆ ಲಕ್ಕ್ ದುಂತ್ಯೆ.ಬೆರ್ಮೆರ್ ಮೂಲೆ ಸೇರ್ಯೆರ್.ನಾಗಬೆರ್ಮಗ್ಂದ್ ಒಟ್ಟುಗು ವಸಯೊಗುಂತೆರೆ ಸುರು ಮಲ್ದೆರ್. ಆಂಡ ನಾಗೆನೇ ಬೇತೆ,ಬೆರ್ಮೆರೇ ಬೇತೆಂದ್ ಇನಿ ತುಳುವೆರೆಗ್ ತೆರಿದ್ಂಡ್.

    

ಅಬ್ಬಗ ದಾರಗನಕುಲು ಅರ್ಭಕ ದಾರಕೇಶ್ವರಿ ಆತೆರ್ದೈವಸಾನ ಪೋದು ದೇವಸ್ಥಾನ ಆತ್ಂಡ್.

 ದಪ್ಪೆರೆ ಗೋಣನ್,ಎರ್ಲೆನ್ ಗಳಸ್ಂಡಲ ಕಂಬುಲ ಎರ್ಲೆಡನೇ ಮಲ್ಪುನಿ.ಮೂಲೊಡು ತುಳುವೆರ್ ಎರ್ಮೆದ ಪೇರೇ ಪರ್ದ್ ಬುಳೆಯಿನಕುಲು.ಎರ್ಲೆಡನೇ ಪಂಡ ಎರು ಮಾದಾದೆ ಕಂಡ ದತ್ತಿನಕುಲು.ಅಂಚಾದ್ ಮೈಸಂದಾಯೆ ಎರು ಜಾತಿ ದೈವಾರಾದನೆಡ್ ಇತ್ತ್ಂಡ,ನಂದಿ,ಬೋರಿ ದೇವೆರೆ ಸಾನದೆದುರು ಇತ್ತ್ಂಡ ಬಸವೆ ದೈವಾರಾದನೆ,ದೇವೆರೆ ಆರಾದನೆಡ್ಲ ಉಂಡು.ನಂದಿ ಬೊಕ್ಕ ಗೋಣೆ ಏಪಲಾ ಒಂಜಿಂದಾಯೆರೆ ಸಾದ್ಯನೇ ಇಜ್ಜಿ.ಮುಗೇರ ಸಮುದಾಯದಕುಲು ಮೈಸಂದಾಯನ್ ಸಾಣದುಲ್ಲಾಯೆಂದ್ ಪನ್ಪೆರ್.ಅಂಚನೆ ಮಾಡ ಪತ್ತಿ ಮೈಸಮದಾಯೆಂದ್ ಲ ಸಂದಿಡುಂಡು.ಬೊಕ್ಕೆಂಚ ಮೈಸಂದಾಯೆ,ಗೋಣೆ ಪೋದು ನಂದಿ,ಬೋರಿಯಾಯೆರೆ ಸಾದ್ಯ?.ಆಂಡ ದೈವಾರಾದನೆದ ಬಗೆಟ್ ಎಡೇನ ತೆರಿನ ಜನಪದ ವಿದ್ವಾಂಸೆರಾಯಿನ ಡಾ.ವೈ.ಯನ್.ಶೆಟ್ರ್ ಪನ್ಪುಲೆಕ ಇಲ್ಲ್ ಪತ್ತ್ ದ್ ಮೂಲ ಮೈಸಂದಾಯನ ಆರಾದನೆ ಇತ್ತ್ಂಡ,ನಾಗ ಬನ,ಆದಿ ಆಲಡೆಲೆಡ್ ಬೆನ್ನಿ ಸಾಗೊಳಿ ಮೂಲದ ಪ್ರಾಣಿ ಸಮ್ಮಂದಿ ಕಲ್ಪನೆದ ನಂದಿ ಗೋಣನ ಆರಾದನೆಂದ್ ಪನ್ಪೆರ್

  

                          ಮಲರಾಯ ದೈವ ಬಾಯಾರ್

ತೆರಿಯೊನ್ಗ:-

  ಇನಿ ದೈವಾರಾದನೆದ ಅಜ ತಪ್ಪೆರೆ ಒಂಜಿ ಕಾರಣ ಚಾಕಿರಿ ವರ್ಗಂದ್ ಲ ಪನೊಲಿ.ದಾಯೆ ಪಂಡ ನೇಮದ ಕೊಡಿಯಡಿಕ್ ಒರಿ ಸಿನೆಮ ಮಲ್ಪುನಾಯೆ,ರಾಜಕೀಯದಾಯೆ ಬತ್ತೆಡ ಸುರುಕು ದೈವ ಆಯನ ಕೈ ಪತೊಂದು ತನ್ನ ತಿಗಲೆ ಮುಟ್ಟುದು ಯಾನುಲ್ಲೆ ಪಂಡ ಮೂಲು ದೈವ ಅಂಚ ಪನೆರೆ ಸಾಧ್ಯನೇ ಇಜ್ಜಿ‌‌.ದಾಯೆ ಪಂಡ ಅಕುಲೇರ್,ಮೊಕುಲೇರ್ಂದ್ ದೈವೊಗು ಗೊತ್ತಿಪ್ಪೆರೆ ಸಾಧ್ಯನೇ ಇಜ್ಜಿ..ಉಂದು ಚಾಕಿರಿದಾರೆ ಬೇಲೆ‌.ದಾಯೆ ಪಂಡ ಅರೆಗ್ ಗುರ್ತ ಮಲ್ಲಕ್ಲೆನ ಉಪ್ಪುಂಡತ್ತೆ.ಅಂಚ ಆರ್ನ ಕಾರ್ಬಾರ್ ನ್ ದೈವದ ಕಲೊಟು ತೋಜಾವೆರ್.ದುಂಬು ಪೂರ ದೈವ ಏರೆನ ಮೈ ಕೈ ಮುಟ್ಟುನ ಕೆರಮ ಇಜ್ಜಾಂಡ್,ಬೂಲ್ಯೊನು ದೂರೊರ್ದೆ ದೆತೊನ್ನಾರೆನ ಕೈಕ್ ಬೂರುಲೆಕ ಕೊರೊಂತ್ಂಡ್.ದುಂಬು ರಾಜಂದೈವದ ಕಲೊಟು ದೈವ ಭಂಡಾರದ ಮುಗ,ಕಡ್ಸಲೆನ್ ಪತಿ ಮಾನಿ (ಭಂಡಾರೊನು/ಕಿರ್ವಾಲ್ ನ್/ಆಯುಧ/ಕಡ್ಸಲೆನ್ ಪತೊಂದಿನ ಪತಿಮಾನಿ) ವಸಾಯೊಡು ಕಟಿಮಾನಿ ನ ಕೈಕ್ ಒಪ್ಪಿತೊಂತೆರ್.ಇನಿ ತಿಕ್ ನೌಲು ಪೂರ ತಿಕ್ ನ ದೈವೊಗು ಪೂರ ಮಾನೆಚ್ಚಿಲಾವೊಂದುಂಡು.ಓಡೆ ಮುಟ್ಟ ಪಂಡ ದೈವದ ಮುಗೊನ್ಲ ಮೊಕ್ಲೇ ಒಪ್ಪಿಪಾವೊನ್ನಡೆಮುಟ್ಟ ಎತ್ತ್ ದೆರ್.ದೈವದ ಕಲೊಟು ಇಜ್ಜಾಂದಿ ಉಚ್ಚಾಟನೆಲೆನ್ ಮೂಲ ಚಾಕಿರಿದಕುಲು ಮಲ್ತೊಂದುಲ್ಲೆರ್.ಇಂಚನೆ ಆಂಡ ದೈವದ ಮಿತ್ತ ನಂಬೊಳಿಗೆ ಮಯಕಾಯೆರೆ ಮೊಕ್ಲೆ ಕಾರಣೆರಾಪೆರ್.ಗಟ್ಟ ಜತ್ತ್ ದ್ ತುಳು ನಾಡ್ ಗ್ ಬತ್ತಿ ತುಳುನಾಡ ದೈವೊಲೆನ್ ಮೊಕ್ಲು ಕುಡ ಗಟ್ಟ ಬಡ್ತಾವೊಂದುಲ್ಲೆರ್ ಪಂಡ ದೈವದ ಕಲೊಕು ವೈದಿಕದಕುಲು ಮಲ್ಪುನ ಎತ್ತೇಸೊಗ್ಲ,ಕಟ್ಟುನಕುಲು ಮಲ್ಪಿ ಎತ್ತೇಸೊಗ್ಲ ದಾದ ಪರಕುಂಡು.ವೈದಿಕೆರಾಂಡಲ ದೈವದ ಚಾಕಿರಿನ್ ತುಳುನಾಡ ವ್ಯಾಪ್ತಿಡೇ ಮಲ್ತೊಂದುಲ್ಲೆರ್.ಚಾಕಿರಿದಕುಲು ದೈವೊನು ಗಟ್ಟದ ಮಿತ್ತ್ ಕೊನೊದು ಅಕ್ಲೆ ಬಂಜಿದ ಪಾಡ್ ತೂಯೆರ್ ವಿನಃ ಮೂಲ ಒಲ್ತ ಆರಾದನೆ ಪನ್ಪುನೆನ್ ಮದತ್ ಬುಡ್ಯೆರ್

ಅರಸುಲೆ ಸಿರಿ ಮುಡಿಟ್ ಸೂರ್ಯೆ ಚಂದ್ರೆ ಮಯಕ

ಪುದರ್ ಬದಲ್ದ್ ನಿ ರಡ್ರಡ್ಡ್ ದೇವ,ದೇವಿನಕ್ಲೆನ್ ಒಂಜಿ ಮಲ್ತ್ ದ್:-

೧.ಅನಂತ(ನಾಗೆ-ನಾಗೆಲ ಸುಬ್ರಹ್ಮಣ್ಯೆ ಅತೆ)+ಪದ್ಮನಾಭ(ವಿಷ್ಣು)=ಅನಂತಪದ್ಮನಾಭ

೨.ಅನಂತ+ಈಶ್ವರೆ=ಅನಂತೇಶ್ವರೆ.

೩.ಬ್ರಹ್ಮ+ಲಿಂಗೇಶ್ವರೆ(ಶಿವೆ)=ಬ್ರಹ್ಮಲಿಂಗೇಶ್ವರೆ(ನಿಜವಾದ್ ಲಿಂಗರೂಪೊಡಿಪ್ಪುನ ಬೆಮ್ಮೆರ್)

೪.ದುರ್ಗಾ+ಪರಮೇಶ್ವರಿ(ಪಾರ್ವತಿ)=ದುರ್ಗಾಪರಮೇಸ್ವರಿ)

  

                ಮರ್ಲ್ ಜುಮಾದಿ ದೈವ. ಅಡ್ಕ

ಒಂಜಿ ಕಾಲೊಡು ಕೇರಳದ ಕಾಲಟಿರ್ದ್ ತುಳುನಾಡ್ ಗ್ ಬತ್ತಿನ ಶಂಕರಾಚಾರ್ಯೆರ್ ಉಲ್ಲಾಲ್ದಿನ ದೈವಸಾನೊಲೆಡ್ ಶ್ರೀಚಕ್ರ ದೀದ್ ಉಲ್ಲಾಲ್ದಿ,ಲೆಕ್ಕೆಸಿರಿ ಪೂರಾ ದುರ್ಗಾಪರಮೇಶ್ವರಿ ರಕ್ತೇಶ್ವರಿ ಆಂಡ್.ಶ್ರೀರಾಮಾನುಜಾಚಾರ್ಯೆರ್ ವಿಷ್ಣು ಮೂರ್ತಿನ್ ತುಳುನಾಡ್ ಗ್ ಕನತೆರ್.ಅರಸು ಬಿಟ್ಟಿದೇವನ್ ಆರ್ ಸುರು ವಿಷ್ಣುವರ್ದನಂದ್ ಪುದರ್ ಬದಲ್ತೆರ್.ಕಾಲನುಬಾಗೊಡು ವಿಷ್ಣುಮೂರ್ತಿ ದೈವಲಾ ವಿಷ್ಣುನ,ಗೀತೆದ ಸಂಸ್ಕೃತದ ಸಾಲ್ ಲೆನ್ ಪನೆರೆ ದುರು ಮಲ್ತೆರ್.ವಾದಿರಾಜೆರ್ ಶಿವ ಸನ್ನಿದಿಡ್ ಶಿವಲಿಂಗದ ಮಿತ್ತ್ ವಿಷ್ಣುನ ಸಾಲಿಗ್ರಾಮ ದೀವೊಂದು ಬತ್ತೆರ್.ಇನಿ ಕೇರಳದ ಪ್ರಶ್ನೆ ಚಿಂತನೆದಕುಲು ಅವ್ವೇ ಬೇಲೆನ್ ಮಲ್ತೊಂದುಲ್ಲೆರ್.ಶಿವ ದೇಲ್ಯೊಲೆಗ್,ಜೋಗಿ ಮಠೊಕ್ಲೆಗ್,ದೈವಾಲ್ಯೊಲೆಗ್ ಇಜ್ಜಾಂದಿ ಬ್ರಹ್ಮಕಲಶೊನು ಅಷ್ಡ ಮಂಗಲ ಪ್ರಶ್ನೆ ದೀದ್  ಮಲ್ಪಾಯೆರೆ ಪಂಡೆರ್.ಉಂದು ನಮಕ್ ಗೊತ್ತಾವಂದಿಲೆಕ್ಕ ನಡಪುನ ಧಾರ್ಮಿಕ ಆಕ್ರಮಣನಾ ಅತ್ತ್ ಮತಾಂತರನಾ ತೆರಿಯೊಂದಿಜ್ಜಿ.

ನಾಗನ್ ಬೊಕ್ಕ ಬೆಮ್ಮೆರೆನ್ ಸಮೀಕರಣ ಮಲ್ತ್ ದ್ ನಾಗಬ್ರಹ್ಮಂದ್ ಮಲ್ತೆರ್ಡ ಜೈನೆರ್ ನಾಗ ಬೆಮ್ಮೆರೆ ಸಾನಿಧ್ಯೊನು ಅನಂತನಾಥ ಬಸದಿ ಮಲ್ತೆರ್.ದುಂಬುಗು ಉತ್ತರ ಭಾರತದ ಅಹಿಛತ್ರ ಪ್ರದೇಶೊರ್ದು ವಲಸೆ ಬತ್ತ್ ದ್ ಒಡಿಪುಡು ನಿಲೆ ಉಂತಿ ಶೈವ ಬೆರಣೆರ್(ಶಿವಳ್ಳಿ) ಶಂಕರಾಚಾರ್ಯೆರೆರ್ದ್ ಬೊಕ್ಕ ಶೃಂಗೇರಿ ಮಠತ ಸುಪರ್ದಿಡ್ ಅನಂತನಾಥ ಜೈನ ಬಸ್ತಿನ್ ಅನಂತೇಶ್ವರ ದೇವಾಲ್ಯ ಮಲ್ತೆರ್.೧೭-೧೮ನೇ ಶತಮಾನದ ಚೌಟರಸು ಮೂಜನೇ ಭೋಜರಾಜೆ ಪುತ್ತಿಗೆ ಮಠಾಧೀಶೆರೆ ಮುತಾಲಿಕೆಡ್ ಒಡಿಪುದ ಅನಂತೇಶ್ವರ ದೇಲ್ಯೊಡು ಒಂಜಿ ಸರ್ಪ ಯಾಗ ಮಲ್ಪಾದ್ ಬೊಕ್ಕ ಅನಂತೇಶ್ವರ ದೇಲ್ಯದ ತೂಪರಿಕೆನ್/ಉಸ್ತುವಾರಿನ್ ಪುತ್ತಿಗೆ ಮಠೊಕು ಕೊರ್ನವು ಇತಿಹಾಸ.