ದೈವದ ಪಾರಿ/ಮದು

                           ದೈವದ ಪಾರಿ/ಮದು

ಪತ್ತ್ ಕೂಡಿತ್ ನ ತಲೊಟು ಮುತ್ತುಂಡಾಂಡ್ ಗೆಂದ್ ಹಿರಿಯಕ್ಲು ಮಲ್ತಿ ಕಟ್ಟ್. ಎಂಕ್ಲ್ ತೆರಿಯಂದಿ ನರಮಾನಿಲು. ನಿಕುಲು ಮಾಮಲ್ಲ ಸತ್ಯೊಲು. ಎಡ್ಡೆ ಮಲ್ತಿನಕ್ಲೆಗ್ ಅಮೃತದ ಮಿರೆ ಕೊರ್ದು, ಹಾಲ್ ಮಲ್ತಿನಕ್ಲೆಗ್ ಇಸತ ಮಿರೆ ಕೊರ್ನ ದೈವೊಲು ನಿಕ್ಲು. ಇನಿ ನಮ ಮಲ್ತಿನ ಓಮೊಡು, ದೀಸುತ್ತೆಡಾವಡ್, ಕಟ್ಟಿ ತಿರಿಟ್, ಕೊರ್ನ ಗಗ್ಗರೊಡು, ಬಲಸಿ ಬಾರ್ನೆಡ್, ಕೊರ್ತಿ ಬೊಂಡೊಡು, ಶುಭನಾ, ಅಶುಭನಾ , ಉರಿಯಾ, ಸಿರಿಯಾ, ಲಾಭನಾ, ನಷ್ಟನಾ ದಾದಂದ್ ನಂಕ್ ಪನ್ಯೆರೆ ಬಲ್ಲಿ. ನೇಮದ ಎಚ್ಚಿಗ್ ಉಂತ್ ದ್ ನ ನರಮಾನಿ ಮಿತ್ತ್ ಮುಕ್ಕಾಲ್ ಮೂಜಿ ಗಳಿಗೆ ವಸಾಯಾದ್, ಪೊರ್ಲುದ ನಾಲ್ ಅಭಯೊನು ಕೊರ್ದು, ಜಾಗೆದ ಕಲೆ ತಗ್ಗಂದಿಲೆಕೊ, ಮಣ್ಣ್ ಗ್ ಕೊರತೆ ಬರಂದಿಲೆಕೊ, ನಾಲ್ ಕೋಡಿದ ಮುಗಾಲ್ ನ್ ಒಂಜಿ ಕೋಡಿಗ್ ಸೇರ್ಸಾದ್, ಇರೆನ್ ನಂಬಿ ಎಂಕ್ಲೆಗ್ ಎರುಕು ಇನೆ, ಬಿತ್ತ್ ಗ್ ಮುದೆಲ್, ಸಂತಾನೊನು ಸಾಯಿರ ಮಲ್ತುದ್, ಮೇಲ್ ಕಾಲೊಗು ಉಂದೆಡ್ ದ್ ಹೆಚ್ಚಿಗೆ ಮಲ್ಪಾವೊಡು. ಜನೊಕ್ಲು ದೈವೊನು ಬುಡ್ಜೆರ್ ಗೆ, ದೈವ ಜನೊಕ್ಲೆನ್ ಬುಡ್ಜಿಗೆ ಪನ್ಪಿ ಕೀರ್ತಿ ಕನಪಾವೊಡು.

ಇಂಚ ಪಂಡಿನ ಬೊಕ್ಕ ದೈವದ ಎದುರುಡು - ಆಕಾಶ ಬುಡ್ಲ, ಬೂಮಿಡಾಲ, ಬೂಮಿ ಬುಡ್ಲ ಮಣೆ ಮಂಚೊಡಾಲ, ಮಣೆ ಮಂಚ ಬುಡ್ಲ ದೀಸುತ್ತೆಡಾಲ, ದೀಸುತ್ತೆನ್ ಬುಡ್ಲ ಕಟ್ಟಿ ಪಾತ್ರಿಡಾಲ, ಮುಕ್ಕಾಲ್ ಮೂಜಿ ಗಳಿಗೆ ವಸಾಯಾಲ....

ಇಂಚ ಪಂಡುದ್ ಅರಿ ಪೂವರಿನ್ ಕೂಡಿ ರಾಜ್ಯ ನಂಬಿ ಸಂಸಾರ ದೈವ ಕಟ್ಟುನಾಯನ ಮೇಲ್ ಗ್ ಪಾರಾನಗ, ಆಯನ ಮೈಟ್ ದೈವ ವಸಯಾಪುಂಡು. ಒಟ್ಟು ಮೂಜಿ ಸರ್ತಿ ಕಟ್ಟುನಾಯನ ಮಿತ್ತ್ ವಸಯಾಪುಂಡು. ಒರ ಮದು ಪಂಡ್ ದ್ ಅರಿ ಪೂವರಿ ಪಾಡ್ನಗ, ಕುಡೊರ ಗಗ್ಗರ ದೀನಗ, ಕುಡ ಮೂಜನೆ ಸರ್ತಿ ನಿಲೆ ಆನಗ ಪಂಡ ಪಿರಿನಗ ಜೋರ್ ವಸಾಯಾದ್ ಮೂಜಿ ಸರ್ತಿ ಊಂಕುಟ್ಟುದಾ, ಕಲ್ಕ್ ದಾ ವಸಾಯ ಪಿರಿಯುಂಡು. ಇಲ್ಲದೆಚ್ಚಿದ ದೈವೊಲಾಂಡ ಗಗ್ಗರ ದೀನಗ, ಕದಿರೆ ಮುಡಿ ಏರಾದ್ ಸೂಟೆ ಪತ್ತ್ ನಗ, ವಸಾಯ ಪಿರಿಯಾನಗ ಮೂಜಿ ಸರ್ತಿ ಮಲ್ಲ ವಸಾಯ ಉಪ್ಪುಂಡು. ಅಪಗ ಅಕ್ಲೆ ಮೈ ಪರ್ತಿದಲೆಕ ಬಾರೀ ಹಗುರ ಆಯಿಲೆಕ್ಕ ಉಪ್ಪುಂಡು. ನೆತ್ತಿದ ಕುಜಲ್ ನಿಮಿರ್ ದುಪ್ಪುಂಡು, ಕಣ್ಣ ಬೊಂಬೆ ಅಡಿ ಮಗುರ್ದ್ ಉಪ್ಪುಂಡು. ಪಂಡ ಬೊಲ್ದುದ ಬೊಂಬೆ ಕಣ್ಣ್ ಡ್ ತೋಜುಂಡು. ಕಪ್ಪುದ ಕಣ್ಣ ದೃಷ್ಟಿ ರೆಪ್ಪೆದುಲಯಿ ಉಪ್ಪುಂಡು. ಕಾರ್ ದ ಉಂಗುಟ ನೆಲಕ್ ಗಟ್ಟಿಯಾದ್ ಊರ್ದ್ ಉಪ್ಪುವೆರ್. ಮೈ ಇಡೀ ಸೂ ಬರ್ಪಿನೆರ್ದಾದ್ ಸೂ... ಸೂ ಪಂದ್ ಉಸುಲುಡು ಬಾಯಿಡ್ ಸವ್ದ ಬರೊಂದಿಪ್ಪುಂಡು. ಅಕ್ಲ್ ಪಂಡಿನ ದುಂಬಾಯಿನ, ಇತ್ತೆ ಆಪಿನ, ದುಂಬು ಆಪಿನ ಇಚಾರೊ ಸತ್ಯ ಆಪುಂಡು. ಮೈಕ್ ದೈವ ಆವಾಹನೆ ಆನಗ ಅಕ್ಲೆಗ್ ಮೈ ಅಗ್ಗಿತೋ ಮಸ್ತ್ ಗೆ. ಪಾರಿಗ್ ತಕ್ಕ ನುಡಿನೇ ದೈವಲ ಕೊರ್ದು ಜನಕ್ಷೇಮೊನೇ ಮಲ್ಪುಂಡು.

     

ಮಾಹಿತಿ: ತುಳು ಒರಿಪುಗ ಸಹಾಯ: ಅಮೃತ ಸೋಮೇಶ್ವರೆರ್ನ "ದೈವಾರಾಧನೆಯಲ್ಲಿ"

#############################################