ದೈವಾರಾದನೆ ಒರ್ತೊನುನ ಸೂತ್ರ ಕಟ್ಟ್

ದೈವಾರಾದನೆ ಒರ್ತೊನುನ ಸೂತ್ರ ಕಟ್ಟ್

  

ಮೂಡದಾಯೆ/ವೈದ್ಯನಾಥೆ ಗುರುಪುರ

ದೈವೊಲೆಗ್ ಪಾರಿ/ಮದಿಪು ಪನ್ಪುನವು ಇಜ್ಜಿ.ಹಿರಿಯಾಕ್ಲೆನ,ಗುತ್ತಿನಾರೆನ ನಾಲ್ ಪಾತೆರೊಗು ದೈವ ಕಟ್ಟಿ ಮಾನಿನ ಮಿತ್ತ್ ವಸಯಾವೊಂತ್ಂಡ್.ಇನಿ ದೈವೊಗು ಪಾರಿ/ಮದಿಪು ಪಂಡಿತೆರ್ ಪುಟ್ಟೊಂದು ಎನ್ನ ಮದಿಪು ಪೊರ್ಲಾವೊಡು,ಎನ್ನ ಪಾರಿ ಪೊರ್ಲಾವೊಡುಂದು ಸ್ಪರ್ದೆ  ಮಲ್ತೊಂದುಲ್ಲೆರ್,ಮೈಕ್ ಬೇತೆ,ಪಾರಿದ ಪ್ರಚಾರೊಗು.ದೈವದೆದುರು ರಡ್ಡ್ ಕೈನೀರ್ದ್ ಪೂವರಿ ಪತ್ತೊಂದು ಮದಿಪೊಡಾಯಿನಕುಲು ಇನಿ ಕೈನ್ ಅಂಚಿಂಚಿ ಬೀಜಾವೊಂದು,ಆ ಊರುಗು ಸಮ್ಮಂದನೇ ದಾಂತಿ ದೈವ ದೇವೆರೆ ಪುದರ್ ಪನೊಂದು ಪಾರಿ ಪನ್ಪುನತ್ತಂದೆ,ದೈವಾರಾದನೆಗ್ ಇಜ್ಜಾಂದಿ ಪುರಾಣ ಸೇರಾದ್  ಗಂಟೆಕಟ್ಲೆ  ಮದಿಪುನಗ ತನ್ಕೇ ವಸಾಯ ಬತ್ತ್ ಲೆಕ ದೈವೊನು ಪೋಡಿಪಾವುಲೆಕ ಕಣ್ಣ್  ಮಲ್ಲ ಮಲ್ತೊಂದು ಅಜ ತತ್ತದ್ ನನ ದಾನೆ ಕುಂಬರುವೆರಾ ಪನ್ಪುನಡೆಮುಟ್ಟ ಸರ್ರೊನು ಆಡಾವೊಂದು ಮದು ಪನೊಂದುಪ್ಪುನವು ನಿಜವಾದ್ ಲ ತಪ್ಪು.

 

ದುಂಬು ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಇಲ್ಲದುಲಯಿ ಮದನಕೈ ಪಲಯಿಡ್,ಮಣೆಟ್ ದೀದ್ ಆರಾದನೆ ಮಲ್ತೊಂತೆರ್ಡ ತುಡರ್ ದೀದ್,ಸುತ್ತೆ ದೀದ್ ಲ ಆರಾದನೆ ಮಲ್ತೊಂತೆರ್.ಹಿರಿಯಾಕ್ಲೆಗ್ ವರ್ಸೊಗೊರ ಅಗೆಲ್  ಪಾಡ್ದ್ ಕುಟುಮೊಗು ಸೆರ್ಸಾವುನ ಕೆರಮಲ ಇತ್ತ್ಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿನ್ ಒಂಜೆ ಕೋಣೆದುಲಯಿ ಪಂಜುರ್ಲಿನ ಬಲತ್ ಗ್ ಕುಲ್ಲಾದ್ ತಗೆ ತಂಗಡಿಯಾದ್ ಆರಾದನೆ ಮಲ್ಪುನೊಟ್ಟುಗು ರಾವು,ನಾಗೆ,ಪದಿನಾಜಿ ಸೇರ್ನ ಹಿರಿಯೆರ್,ಮುಡಿಪು ಇತ್ತ್ ದ್ ಮುಡಿಪುದ ಕುಟುಮೊಗು ಒಂಜಿ ಸೂತಕ ಇತ್ತ್ ದ್ ದೈವಾರಾದನೆ ಕುಟುಮೊನು ಒಂಜಿ ಸೂತ್ರದಡಿಟ್ ಗಟ್ಟಿ ಮಲ್ತ್ ದಿತ್ತ್ಂಡ್.ಇತ್ತಿತ್ತೆ ಕುಟುಮದ ಕಲ್ಲುರ್ಟಿ ಪಂಜುರ್ಲಿಗ್ ಪಿದಯಿ ಕಲ್ಲ್ ಪಾಡ್ದ್ ನಂಬುನ,ಬೇತೆ ಸಾನ ಕಟ್ಟ್ ದ್ ನಂಬುನ,ಸಾನೊಗು ಮುಗುಳಿ ದೀಪುನ ಕರಮ ಸುರಾತ್ಂಡ್. ಕೇರಳದ ಪ್ರಶ್ನೆ ಚಿಂತನೆದಕ್ಲೆನ ಪಾತೆರ ಕೇಂದ್ ಕಲ್ಲುರ್ಟಿ ಪಂಜುರ್ಲಿನ್ ರಡ್ರಡ್ಡ್ ಕೋಣೆಡ್ ಬೇತೆ ಬೇತೆನೆ ಕುಲ್ಲವುನ ಕೆರಮ ಸುರಾತ್ಂಡ್.ಪಿದಯಿ ಕಲ್ಲ್ ಪಾಡ್ದ್ ನಂಬುನಲಾ ಸಾನದ ಸಂಕಲ್ಪನೇ ಆಂಡ್.ಕೆಲವೊಂಜಿ ಕುಟುಮೊಡು ವರ್ಣಾರ ಪಂಜುರ್ಲಿ ಬತ್ತಿ ಬಿನ್ನೆಯಾಂಡ,ಕುಪ್ಪೆ ಪಂಜುರ್ಲಿ ಪ್ರದಾನ ಆದಿತ್ತ್ಂಡ ಅವುಲು ಕುಪ್ಪೆನ ಎಡತ ಮರ್ಗಿಲ್ ಡ್ ವರ್ಣಾರನ್ ಬೇತೆನೆ ಪಲಯಿಡ್ ದೀದ್ ನಂಬುವೆರ್. 

  ಕುಟುಮದ ಮುಡಿಪುನು ಕಲ್ಲುರ್ಟಿ ಪಂಜುರ್ಲಿನ ಅದೆಟೇ  ದೀವೊಂತೆರ್.ಇತ್ತೆ ಅವ್ವೇ ಅದೆಟ್ ಗೋಡೆ ಕೊರೆದ್ ಪಲಯಿಡ್ ಮುಡಿಪು ದೀಯೊಂದಿಪ್ಪುನವು ಆಯೊಗು ಮಲ್ಪುನ ಒಡಕ್.ಇಲ್ಲಗೊಂಜಿ ತಾರಾಯಿ ಕಟ್ಟ್ ನಗ,ಈಡ್ ಕಟ್ಟ್ ನಗ,ಓಮದ ಪುರ್ಸಾದ ಕಟ್ಟ್ ನಗ ಗೋಡೆಗ್ ನೆಲಕ್ ತಾಗಂದಿಲೆಕ ಕುಬಲ್ ಗ,ಅಟ್ಟದ ಅಡ್ಡೊಗ ಕಟ್ಟೊಂತೆರ್.ಅಂಚನೆ ಮುಡಿಪುನ್ಲ ನೆಲ ಬೊಕ್ಕ ಗೋಡೆಗ್ ತಾಗಂದಿಲೆಕ ದೀಯೊಡು.ಮುಡಿಪು ದೈವದ ಕೋಣೆಡ್ ದೀನವ್ಲು ಅಗೆಲ್ ಪಾಡ್ಂಡ ಅಸುದ್ದಾಪುಂಡುಂದು ದೈವದ ಮಣೆ ಮಂಚದೆದುರು ಅಗೆಲ್ ಪಾಡಂದೆ ಕೋಣೆದ ಪಿದಯಿ ಚಾವಡಿಡ್ ಬಲಸೊಂದುಲ್ಲೆರ್ ಉಂದು ತಪ್ಪು.ನಮ ಕಲ್ಲುನವ್ಲು ಒನಸ್ ಬಲಸಂದೆ ಓಲಾ ಪಿದಯಿ ನಂಕ್ ತೋಜುಲೆಕ ಬಲಸ್ಂಡ ನಮಕ್ ಉನೆರಾಪುಂಡೇ.ಅಂಚನೇ ಅತ್ತೆ ನಮ ನಂಬಿ ದೈವೊಲು.ದೈವೊಗು ಬಲಸುನ ಜಾಗೆ ಸುದ್ದಾಚಾರೊಡುಪ್ಪೊಡುಂದು ಅಟ್ಟ ಇಜ್ಜಂದಿ ಜಾಗೆಡ್ ಕುಬಲ್ ರ್ದ್ ಕಜವು ಬೂರಂದಿಲೆಕ ಅಟ್ಟದ ಬಾಗೊಗು ಬೊಲ್ದು ಕುಂಟು ಕಟ್ಟೊಂತೆರ್.ನಿಚ್ಚ ಗೋಡೆಗ್ ಕುತ್ತು ದೀಪ(ಕೋಲ್ತಿರಿ) ದೀಪುನೆನ್ ತಪ್ಪು ಪಂಡಿ ಪ್ರಶ್ನೆ ಚಿಂತನೆದಕುಲು ನಿತ್ಯ ತುಡರ್ ದೀಯೆರೆ ಪಂಡ್ ದ್ ಪೊತ್ತೊಂತಿ ನಿನೆನ್ ಎಲಿ ಮಾಡ್ ಗ್ ಕೊನೊದು ಇಲ್ಲ್,ಸಾನ ಪೊತ್ತ್ ನಲ ಉಂಡು.ನಿಚ್ಚ ಪೂನೀರ್ ದೀಯೊಡಾಯಿನ ದೈವೊಲೆಗ್ ಸಂಕ್ರಾಂತಿಗೊರ ಬಾಕಿಲ್ ದೆಪ್ಪುನ ಪರಿಸ್ತಿತಿಗ್ ತುಳುವೆರೆನ್ ಅಕುಲು ಕನತ್ ಪಾಡ್ಯೆರ್.

-ಪೂರಕ ಮಾಯಿತಿ-ಶಂಕರ ಕುಂಜತ್ತೂರು.ದೈವಾರಾದನೆ ಕ್ಷೇತ್ರ ಕಾರ್ಯದ ಅನುಭವಿಲು.

  

 ಬಾಲೆದ ಕೈಟ್ ದೈವೊಗು ಪೂತ ಮಾಲೆ ಪಾಡ್ಪಾವುನಿ

ಅಂಚನೆ ಕುಟುಮದಿಲ್ಲಲ್ ಪಡ್ಡೇಯಿಗ್ ಮೋನೆ ಪಾಡ್ದ್ ನಮ ಕೈ ಮುಗಿನಗ ಮಣೆ ಮಂಚೊಡಿತ್ತಿ ದೈವದ ಮುಗ ಮೂಡಾಯಿಗುಪ್ಪುಂಡು. ಏಪಲಾ ಕುಟುಮದ ಪ್ರದಾನ ದೈವ ಪಂಜುರ್ಲಿ ನಮ ಪಡ್ಡೇಯಿಗ್ ಮೋನೆ ಪಾಡ್ದ್ ಕೈ ಮುಗಿನಗ ನಮ್ಮ ಎಡತ ಮರ್ಗಿಲ್ಡೇ ಉಪ್ಪೊಡು,ಕಲ್ಲುರ್ಟಿ ಬಲಬಾಗೊಡೆ ಉಪ್ಪೊಡು .ಅಂಚನೆ ತಗೆ ತಂಗಡಿಯಾದ್ ಕಲ್ಲುರ್ಟಿ ಬೊಕ್ಕ ಪಂಜುರ್ಲಿನ್ ಆರಾದನೆ ಮಲ್ಪುನಗ ರಡ್ಡ್ ದೈವಲಾ ಒಂಜೇ ಕೋಣೆದುಲಯಿ ಉಪ್ಪೊಡು.