ಲೆಕ್ಕೆಸಿರಿ ದೈವ ರಕ್ತೇಶ್ವರಿಯತ್ತ್
ನೀರ್‌ದ ನೆಗರ್ ಬೂಮಿಬಾರಗ/ಬೂಮಿ ತೂಕದ ಲೆಕ್ಕೆಸಿರಿನ್ ನೆತ್ತೆರ್ ಪರ್ಪುನ ರಕ್ತೇಶ್ವರಿ ಮಲ್ತ್ಂಡ ನೀರ ಬರ್ಸ ಬರುವಾ ನೆತ್ತೆರ ಬರ್ಸ ಬರುವಾ?.
ಒಂಜಿ ಕಾಲೊಡು ಲೆಕ್ಕೆಸಿರಿ ದೈವೊಗು ಪಿದಯಿಡ್ ಕೋರಿ ಕೊಯ್ದ್ ನೆತ್ತೆರಾವಾರ ಕೊರೊಂತೆರ್.ಇತ್ತೆ ನೆತ್ತೆರಾವಾರ ಬುಡ್ದು ಪೊರಿ ಬಜಿಲ್,ಬೆಲ್ಲ,ಪಂರ್ದ್,ತಾರಾಯಿದ ಗಡಿ,ಬಚ್ಚಿರೆ ಪೂಳು ದೀದ್ ತಂಬಿಲ ಕರಿತೊಂದುಲ್ಲೆರ್.ಪದಿನಾಜಿ ಕೊಡಿ ಇರೆಟ್ ತಂಬಿಲ ಕರಿಪುನ ತುಳುನಾಡ ಮಾಮಲ್ಲ ದೈವನೇ ಲೆಕ್ಕೆಸಿರಿ.
ತುಳುನಾಡ ಆಲಡೆ,ಬನ,ಮಾಡ,ಗುತ್ತು,ಬರ್ಕೆ,ಇಲ್ಲಲ್ ನಂಬಿನ ಬೂಮಿ ಉಂಡಾನಗ ಉಂಡಾಯಿನ ಬೂಮಿತೂಕದ ದೈವನೇ ಲೆಕ್ಕೆಸಿರಿ.ನೀರ ನಿಲೆ,ಬೆನ್ನಿ ಸಾಗೊಳಿದ ಬೂಮಿಡ್ ನಿಲೆಯಾಯಿನ ಪದಿನಾಜಿ ಗೂಂಟದ ಆರಾದನೆದ ದೈವ ಲೆಕ್ಕೆಸಿರಿ.ಆದಿಮೂಲ ದೈವ ಲೆಕ್ಕೆಸಿರಿನ್ ತುಳುವೆರ್ ಆಣ್ ದೈವವಾದೇ ಆರಾದನೆ ಮಲ್ತೊಂದು ಬತ್ತೆರ್.ತಾಂಕ್ಂಡ ತಮ್ಮಲೆ,ಪೆದ್ದ್ಂಡ ಅಪ್ಪೆಂದ್ ಲ ದೈವೊನು ಆರಾದನೆ ಮಲ್ಪುವ.ಅಪಗ ಲೆಕ್ಕೆಸಿರಿನ್ ಪೊಣ್ಣನ ಒರುಟುಲ ತೂಯಿನಕುಲುಲ್ಲೆರ್.ಬೆಮ್ಮೆರೆ ಪೊಣ್ಣನ ಒರು ಲೆಕ್ಕೆಸಿರಿಂದ್ ಪನ್ಪೆರ್.ಮೋಕೆಡ್ ಅಪ್ಪೆ,ಎವ್ರೊಡು ಆಣನ ಒರುಟು ತೋಜುನವು ತುಳುನಾಡ ದೈವೊಲು.ಅಂಚಾನಗ ಲೆಕ್ಕೆಸಿರಿನ್ ಸಿರಿಬೊಳ್ಳಿ,ಕನ್ಯಾವುಂದು ಲೆತ್ತೆರ್.ಆನ ತರೆ ಪೊಣ್ಣ ನೆರಿನ್ ತುಳುನಾಡ ದೈವೊಲೆಡ್ ತೂಯಿನಕುಲು ನಮ್ಮ ತುಳುವೆರ್.ಆದಿಮೂಲ ಅಲಡೆಲೆಡ್ ಅನಾದಿಡ್ದ್ ತುಳುವೆರ್ ಕಲ್ಲ್ ಪಾಡ್ದ್ ಲೆಕ್ಕೆ ಸಿರಿನ್ ಆರಾದನೆ ಮಲ್ತೊಂದು ಬೈದೆರ್.ಲೆಕ್ಕೆಸಿರಿನ ನಂಬೊಳಿಗೆದ ಕಲ್ಲ್ ನ್ ಮುದಲೆ ಕಲ್ಲ್ಂದ್ ಲ ಲೆತ್ತೊಂತೆರ್.
ಲೆಕ್ಕೆಸಿರಿ ಬೊಕ್ಕ ಪಿಲ್ಚಂಡಿ ಕುಂಟಾಡಿ
ದೈವ ಲೆಕ್ಕೆ ಸಿರಿನ್ ತುಳುವೆರ್ ಬನೊಟು ಕಲ್ಲ್,ಪಾದೆ/ಬಂಡೆ ಕಲ್ಲ್ ಡೇ ನಂಬೊಂದು ಬತ್ತೆರ್ಡಲ ಜೈನ ಅರಸುಲ್ನ ಅರಸೊಳಿಗೆದ ಕಾಲೊಡ್ದು ಬೊಕ್ಕ ಲೆಕ್ಕೆಸಿರಿನ್ ಮೂರ್ತಿದ ಒರುಟು ಆರಾದನೆ ಮಲ್ತೊಂದು ಬತ್ತೆರ್.ಕಾಲಾನುಬಾಗೊಡು ತುಳುವೆರ್ ಲೆಕ್ಕೆಸಿರಿಗ್ ಮುಗೊಲೆನ್ ಮಲ್ತ್ ದ್ ಮಣೆಮಂಚೊಡು ದೀದ್ ಆರಾದನೆ ಮಲ್ತೊಂದು ಬತ್ತೆರ್.ಲೆಕ್ಕೆಸಿರಿ ದೈವದ ತರೆಕ್ ಕಟ್ಟುನ ಒರುನು ಅಪ್ಪರಂಬು ಪಂಡ್ ದ್ ಲೆಪ್ಪುವೆರ್.ಬೋಲ್ತೇರ್ ದಂಚಿ ಮುದಲೆದೊರುತ ಮುಗೊನು ದೈವೊಗು ಕಟ್ಟುವೆರ್.ಕೆಲವೊಂಜಿ ಗುತ್ತು ಬರ್ಕೆದಕುಲು ಲೆಕ್ಕೆಸಿರಿನ್ ಚಾವಡಿದ ಬಾಮೊಗು ಕನತ್ ದ್ ಮುಗ ದೀದ್ ಆರಾದನೆ ಮಲ್ತೊಂದು ಬತ್ತೆರ್.
ಲೆಕ್ಕೆಸಿರಿ ಬೊಕ್ಕ ಪಿಲ್ಚಂಡಿ ದೈವ
ಎಂಕೊಂಜಿ ದೈವ ಲೆಕ್ಕೆಸಿರಿ,ಯಾನ್ ಮಲ್ತಿನವು ಪೂರ ಅಯಿಕೇ ಸರಿ ಪನ್ಪಿನ ಒಂಜಿ ಪಾತೆರ ಉಂಡು.ಬೊಂಡ,ಪಿಂಗಾರ ಪುರ್ಪ,ತಂಬಿಲ ಪರ್ವ ಕರಿಪುನ ಮಲ್ಲ ಮಟ್ಟ್ ಡೇ ನಡಪೊಡು.ಬೂಮಿ ತೂಕದ ಬೂಮಿ ಬಾರಗ ದೈವದ ಪದಿನಾಜಿ ಗೂಂಟದ ಬಲಿ ಪನ್ನಗನೇ ಲೆಕ್ಕೆಸಿರಿನ ಆವಾರ ಏತ್ ಮಲ್ಲ ಮಟ್ಟ್ ದ ಪನ್ಪುನವು ತೆರಿಯುಂಡು.ಕುಪ್ಪೆಟ್ಟು ಬರ್ಕೆಡ್ ಇನಿಕ್ಲಾ ರಡ್ಡ್ ತಾರಾಯಿ ದೀದ್ ಲೆಕ್ಕೆಸಿರಿನ್ ಆರಾದನೆ ಮಲ್ಪುವೆರ್.
ಲೆಕ್ಕೆಸಿರಿನ ಬೊಳ್ಳಿದ ಮುಡಿ
ಕಲ್ಲ್ ಡ್ ನಂಬೊಂತಿ ಲೆಕ್ಕೆ ಸಿರಿಕ್ ಒಂಜಿ ಮಣೆ ಮಂಚ ಮಲ್ತ್ ದ್ ಕೂಚಿ ನೀರ್ ದೀದ್ ಕಾಲಾದಿ ತಂಬಿಲ ಕರಿತ್ ದ್ ಆರಾದನೆ ಮಲ್ತೊಂತೆರ್.ಕಾಲಾನು ಬಾಗೊಡು ಮಣೆ ಮಂಚದ ಮಿತ್ತ್ ಅಲವುದ ಕಡ್ಸಲೆ,ಮಣಿ ದೀದ್ ದುಂಬುಗು ಕಡ್ಸಲೆದೊಟ್ಟುಗು ಅಡ್ಡಣ ದೀಯೆರ್ಲ ಸುರು ಮಲ್ತೆರ್.ದುಂಬುದ ಕೆಲವೊಂಜಿ ಗುತ್ತು ಬರ್ಕೆಲೆಡ್ ಲೆಕ್ಕೆಸಿರಿನ ಮಣೆ ಮಂಚೊಡು ಮಣಿ ಕಡ್ಸಲೆ ದೀದ್ ಆರಾದನೆ ಮಲ್ಪುನ ತೂಯೆರೆ ತಿಕ್ಕುಂಡು..
ಲೆಕ್ಕೆಸಿರಿನ ಮೂರ್ತಿದ ಒಂಜಿ ಕೈಟ್ ಕಡ್ಸಲೆ,ಕುಡೊಂಜಿ ಕೈಟ್ ಅಡ್ಡಣ ಇತ್ತ್ಂಡ ನನ ಕೆಲವು ಮೂರ್ತಿ ಲೆಡ್ ಒಂಜಿ ಕೈಟ್ ಮಣಿ ಒಂಜಿ ಕೈಟ್ ಸುರಿಯ ಉಪ್ಪುಂಡು.ತರೆಟ್ ಸಿರಿಮುಡಿ ಮುಗೊಟು ಮೀಸೆ ಇತ್ತ್ ನ ಲೆಕ್ಕೆಸಿರಿನ ಮುಗೊಕುಲ್ಲಾ ತೂಯೆರೆ ತಿಕ್ಕುವ.
ಲೆಕ್ಕೆಸಿರಿ ದೈವೊಗು ಪನಿವಾರ ಕೊರ್ಪುನಿ
ದುಂಬು ಪೂರ ಲೆಕ್ಕೆಸಿರಿಗ್ ಬೂಡು,ಗುತ್ತುಲೆಡ್ ಚಾವಡಿದುಲಯಿ ನೇಮ ನಡತೊಂತ್ಂಡ್.ದುಮಬು ಪೂರ ಚಾವಡಿಲೆದ ಒಂಜಿ ಮೂಲೆಡ್ ಅಡ್ಡೊಗು ಕದಿಕೆ ತಟ್ಟಿ ಕಟ್ಟ್ ದಾ ,ಸೀರೆ ಕಟ್ಟ್ ದಾ ಅವೆತ ಪಿರವು ನೇಮ ಕಟ್ಟುನಾಯೆ ಅಬತಾರ ಕಟ್ಟೊಂದು ಉಪ್ಪುನಗ ಕಟ್ಟುನಾಯನ ಸಮ್ಮಂದದ ಪೊಂಜನಕುಲು ತೆಂಬರೆ ಬೊಟ್ಟೊಂದು ಸಂದಿ ಪನೊಂದಿಪ್ಪುವೆರ್.ದೈವದ ಪದಿನಾಜಿ ಅವತಾರದ ಕಲ್ಪನೆ ಮುಗಿ ಬೊಕ್ಕ ಪರದೆ ಬುಡ್ಪಾದ್ ಲೆಕ್ಕೆಸಿರಿ ದೈವ ಅಣಿ ಏರ್ದ್ ಸಿರಿ ಕೂಟುದು ಸಿಂಗಾರಾಯೆರೆ,ಗೆಂಡೊಡು ನಲಿಪೆರೆ ಜಾಲ್ ಗ್ ಜತ್ತೊಂತ್ಂಡ್.
ಲೆಕ್ಕೆಸಿರಿ ದೈವ ಪೂಂಬಾಡಿ ಸುಳ್ಯ
ದುಂಬುದ ಕಾಲೊಡು ಲೆಕ್ಕೆಸಿರಿಕ್ ಕಾಲ ಕಾಲ,ವರ್ಸ ವರ್ಸ ಕಾಲಾದಿ,ವರ್ಸಾದಿ ನೇಮ ನಡಪಂದೆ ದೊಂಪದ ಬಲಿ ವರ್ಸಲ ನಡತೊಂತ್ಂಡ್.ಪದಿನಾಜಿ ಸರ್ತಿ ಬಚ್ಚಿರೆ ಬಜ್ಜೆಯಿ ಪಗತೊಂದು ಪದಿನಾಜಿ ಅವತಾರದ ಕಲ್ಪನೆನ್ ತೋಜಾವೊಂತ್ಂಡ್.
ಲೆಕ್ಕೆಸಿರಿ ದೈವೊಗು ಪದಿನಾಜಿ ಅವತಾರೊಡು ನಡತೊಂತಿ ನೇಮ ತೂಯೆರ್ನೇ ಪೊರ್ಲುಂದು ದುಂಬುದ ಪೆರಿಯಕ್ಲೆ ಪಾತೆರ.ಬಾರ್ಯಾತ್ ಪೊರ್ತು ನಡತೊಂತಿ ಮಲ್ಲ ನೇಮ ಲೆಕ್ಕೆಸಿರಿ ದೈವದ.ಪ್ರತಿಯೊಂಜಿ ಅಬತಾರದ ಕಲ್ಪನೆದ ಕಡೆಕ್ ದೈವದ ಮುಕ್ಕಾಲ್ದಿ ಬಚ್ಚಿರೆ ಪೂಳು ಪಗತೊಂತೆರ್.ಪದಿನಾಜಿ ಸರ್ತಿ ಬಚ್ಚಿರೆ ಪೂಳು ಪಗಪೆರೆ ಬಾರ್ಯಾತ್ ಪೊರ್ತು ತಾಗೊಂತ್ಂಡ್.
ಲೆಕ್ಕೆಸಿರಿನ ಸಂದಿದ ಪೂರ್ವಬಾಗೊಡು ಎಚ್ಚಿನ ಬಾಗ ಬೆಮ್ಮೆರೆ ಸಂದಿ ಇತ್ತ್ ದ್ ಲೆಕ್ಕೆಸಿರಿನ ಪುಟ್ಟುಕಟ್ಟ್ ದ ಸಂದಿ ತಿಕ್ಕುಜಿ.ದೈವದ ಕಾರ್ನಿಕ,ದೈವ ಉಂಡಾಯಿ ಜಾಗೆದ ಇಚಾರೊಲು ಸಂದಿಡ್ ತೋಜಿದ್ ಬರ್ಪ.ತುಳುನಾಡೊರ್ಮೆ ದೈವ ಲೆಕ್ಕೆಸಿರಿ ಬತ್ತಿ ಇಚಾರ ತೂಯೆರೆ ಪೋನಗ ಸುರುಕು ಬಾನು ಸೇನವೆರೆ ಸಂದಿ ತೂಯೆರೆ ತಿಕ್ಕುಂಡು.
ಗಂಗೆ ಮದಿಮಾಲ್,ಗೌರಿ ಮದಿಮಾಲ್,ಒಪತ್ತಿ ಮದಿಮಾಲ್,ಬಾಲೆ ಮದಿಮಾಯೆ,ಬಾನು ಸೇನವೆ ಇಂಚಿತ್ತಿ ಪುದರುಲು ಲೆಕ್ಕೆಸಿರಿನ ಸಂದಿಡ್ ತೂಯೆರೆ ತಿಕ್ಕುಂಡು.ಬಾನು ಸೇನಪ್ಪೆರೆರ್ದ್ ಸುರಾಯಿ ಕಥೆಟ್ ಅಣ್ಣು ಸೇನಪ್ಪೆರ್ನ ಪುದರ್ಲ ಬರ್ಪುಂಡು.
ಲೆಕ್ಕೆಸಿರಿ ದೈವ ಮಂಗಲಾದೇವಿ.ಚಿತ್ರ-ಧರ್ಮದೈವ
ಅಂಗದೇಶ,ಕೊಂಗನಾಡು,ಪೆರಿಯ ಬಡಕಾಯಿ ಗಂಗೆ ಲೆಕ್ಕೆಸಿರಿನ ಪುಟ್ಟುದ ಸಂದರ್ಬೊಡು ತೋಜಿದ್ ಬರ್ಪುಂಡು.ದುಂಬುಗು ಲೆಕ್ಕೆಸಿರಿ ಬಾನು ಸೇನಪ್ಪನ ಜನನಾಂದ ಬೂಡುಗು ಬರ್ಪಿ ಇಚಾರ ಸಂದಿಡ್ ತೋಜುಂಡು.ಕೆಲವೆರ್ ಮರಿಗಲ್ಲ ಬೂಡುಂದುಲ ಪನ್ಪೆರ್
ಲೆಕ್ಕೆಸಿರಿ ದೈವ ದುಂಬುದ ಗುಳಿಗ ಬನ ಇತ್ತೆದ ಪುದರ್ ಬದಲ್ನ ಅಂಬಾವನ.ಚಿತ್ರ-ಧರ್ಮ ದೈವ
ಮೂಜಂತರಬೂಡು ,ಪಲ್ಲಮಂಜ(ಬಲ್ಲಮಂಜ) ಬೊಟ್ಟು ಉಪದೇಶಿ ಕೊಟ್ಯಣ್ಣ ಬಾಲೊಲಿ,ಕೊಟ್ಟಾರಿ ಬನ್ನಾಯೆ,ಶಂಕರ ಬಾಲೊಲಿ,ಶಾಂತಣ್ಣ ಬನ್ನಾಯೆ ಲೆಕ್ಕೆಸಿರಿನ ಸಂದಿಡ್ ನೆಗತ್ ತೋಜುವೆರ್.
ಲೆಕ್ಕೆಸಿರಿ ದೈವ.ಚಿತ್ರ-ಧರ್ಮ ದೈವ
ಬಾನು ಸೇನಪ್ಪನ ಬೂಡುಡು ಏಳ್ ಪ್ರಾಯದ ಪೊಣ್ಣು ಮಗಳಾದ್ ಒರ ನಲಿತ್ ದ್,ಒರ ತೆಲಿತ್ ದ್,ಒರ ಬುಲಿತ್ ದ್ ಕಾರ್ನಿಕ ತೋಜಾಯಿ ಸಗ್ತಿ ದೈವ ಲೆಕ್ಕೆಸಿರಿ.ಅಂಚಾದ್ ಲೆಕ್ಕೆಸಿರಿನ್ ಪೊಣ್ಣು ದೈವವಾದ್ಲ ತುಳುವೆರ್ ಆರಾದನೆ ಮಲ್ತೊಂದು ಬತ್ತೆರ್.ಆಂಡ ಲೆಕ್ಕೆಸಿರಿನ ಮೂರ್ತಿಲೆಡ್ ಆಣನ ಒರುವೇ ನೆಗತ್ ತೋಜುಂಡು.
ಲೆಕ್ಕೆಸಿರಿನ್ ಬೇತೆ ಬೇತೆ ಪುದರ್ಡ್ ಆರಾದನೆ ಮಲ್ಪುವೆರ್.ಮೂಜಿಲ್ನಾಯೆ,ರಾಯೆ ರಾವುದ್ರೆ,ಪಡ್ಡೊಟ್ಟುನ್ನಾಯೆ,ಬನ್ನಡ್ಕದಾಯೆ,ಕಾರಂದಾಯೆ,
ರಾಜಪತಿ ರಾವುದ್ರೆ,ಮದ್ದಡ್ಕದಾಯೆ,ಪಳ್ಳದಾಯೆ/ಹಲ್ಲಡ್ಕದಾಯೆ,ಕುಡುಮುಲ್ದಾಯೆ ಇಂಚ ಬೇತೆ ಪುದರ್ ಡ್ ಗ್ರಾಮ ದೈವ ಆದ್ ಆರಾದನೆ ಮಲ್ಪುವೆರ್.
ಒಂಜಿ ಕಾಲೊಡು ಕಲ್ಲ್ ಡ್ ಆರಾದನೆ ಮಲ್ತೊಂತಿನ,ಬೊಕ್ಕ ಮಣೆ ಮಂಚೊಡು ಮುಗ ಮೂರ್ತಿ ಮಣಿ ಕಡ್ಸಲೆ ದೀದ್ ಆರಾದನೆ ಮಲ್ತೊಂತ್ ನ ಲೆಕ್ಕೆಸಿರಿ ದೈವೊನು ರಕ್ತೇಶ್ವರಿ ದೇವಿ ಮಲ್ತ್ ದ್ ಮರತ ಮುದೆಲ್ಡ್ ಲೆಕ್ಕೆಸಿರಿನ್ ನಂಬೊಂತಿ ಕಲ್ಲುಲು ಪಡಾರಿಯಾದ್ ಬೂರ್ದ್ಂಡ್.ಕೈತಲ್ ರಕ್ತೇಶ್ವರಿ ದೇವಸ್ಥಾನ ಲಕ್ಕ್ ದ್ ಅವ್ಲು ಪೂಜೆ ಪುನಸ್ಕಾರ,ವರ್ಸದುಚ್ಚಯ ನಡತೊಂದಿತ್ತ್ ದ್ ಮೂಲ ಚಾಕಿರಿದಕುಲು ಇಜ್ಜಂದೆ ಪೊಸತಾದ್ ವೈದಿಕ ವಿಧಿವಿಧಾನೊಲೆದ ಪೂಜೆ ಬೈದ್ಂಡ್.
ಶಂಕರ ಬಾಲೊಲಿನ ಜಪದ ದೈವ , ಬೂಮಿ ಬಾರಗ ದೈವ ಲೆಕ್ಕೆಸಿರಿನ್,ತುಳುವೆರ್ ಮನ ಬಗ್ ತಿಡ್ ಆರಾದನೆ ಮಲ್ತೊಂದು ಬತ್ತಿನ ಲೆಕ್ಕೆಸಿರಿನ್ ರಕ್ತಬೀಜಾಸುರನ ನೆತ್ತೆರ್ ನ್ ಜುಂಬಿನ ರಕ್ತೇಶ್ವರಿ ದೇವಿ ಮಲ್ಪುನಗಲ ತುಳುವೆರ್ ಮನಿಪಂದೆ ಕುಲ್ದಿನವು ದುರಂತ.ನಮ ನಂಬಿ ದೈವ ಲೆಕ್ಕೆಸಿರಿ ನರಮಾನ್ಯನ ನೆತ್ತೆರ್ ಜುಂಬಿನ ಇತಿಹಾಸನೇ ಇಜ್ಜಿ.
ಲೆಕ್ಕೆಸಿರಿನೊಟ್ಟುಗು ಭಾವನ.ಬವನಂದ್ ಲ ಪನ್ಪೆರ್
ಕಂಡ ಸಾಗೊಳಿದ ಬರಿಟ್ ಪರಪಿ ತೋಡುಲಿತ್ತ್ ದ್ ತೋಡ ಬರಿಟ್ ಬನೊಕುಲು ಇತ್ತ್ ದ್, ಬನೊಕ್ಲೆನ ಬರಿಟ್ ಕೆದುಕುಲಿತ್ತ್ ದ್ ಕಂಡ ಸಾಗೊಳಿದೊಟ್ಟೊಟ್ಟುಗು ತುಳುವೆರ್ ದೈವೊಲೆನ್ ನಂಬೊಂದಿತ್ತೆರ್.ಆಲಡೆ ಬನೊಕ್ಲೆಡ್ ಬೆಮ್ಮೆರ್ ಪ್ರದಾನ ದೈವ ಆದಿತ್ತ್ ದ್ ನಾಗೆ ಉಪ ದೈವ ಅದಿತ್ತೆ.ಒರಿನಂಚ ಲೆಕ್ಕೆಸಿರಿ,ಮೈಸಂದಾಯೆ,ಪಂಜುರ್ಲಿ,ಗುಳಿಗನ ಆರಾದನೆಲ ಅವ್ಲು ಇತ್ತ್ಂಡ್.
ಲೆಕ್ಕೆಸಿರಿಗ್ ಅಪ್ಪರಂಬುದ ಏಳ್ ಇಜ್ಜಾ ಒರ್ಂಬ ಜಿಡೆತ ಒರು
ಲೆಕ್ಕೆಸಿರಿ ದೈವ ದ ನೇಮ ಬಾರ್ಯಾತ್ ಪೊರ್ತು ನಡಪುನೆಡ್ದಾದ್ ಕಟ್ಟಿಮಾನಿನ ಬಚ್ಚೆಲರಪಯೆರೆ ಬವನ ಪನ್ಪಿ ಒಂಜಿ ಪಾತ್ರೊನು ದೈವದ ಕಲೊಕು ಕನಪೆರ್.ಒಂಜಾತ್ ಪೊರ್ತು ಹಾಸ್ಯದ ಲೇಪನ ಇತ್ತ್ ನ ಬವನ ನ ಕೈತಲ್ ನಮ್ಮ ಮನಸ್ ನ್ ನಡ್ಪುನೆಡ್ದಾದ್ ಒಂಜಾತ್ ಪೊರ್ತು ರಾಜಗಾಂಭೀರ್ಯದ ಲೆಕ್ಕೆಸಿರಿ ದೈವೊಗು ಕಟ್ಟುನಾರೆಗ್ ಬಚ್ಚೆಲರಪಯೆರೆ ಅವಕಾಶ ತಿಕ್ಕುಂಡು.
ಕನ್ಯಾವು ಲೆಕ್ಕೆಸಿರಿ
ತುಳುನಾಡ ಲೆಕ್ಕೆ ಸಿರಿನ ಆರಾದನೆಡ್ ಧರ್ಮ ನೇಮೊಡು ಒಂಜಿ ಪೊಸ ತಡ್ಪೆಡ್ ಬಾರ್ ಒಂಜಿ ಕೋಡಿಡ್,ಕುಡೊಂಜಿ ಕೋಡಿಡ್ ಬೊಲ್ದರಿ ದೀದುಪ್ಪುವೆರ್.ಅವ್ಲೊಂಜಿ ಸಾಸ್ರ ಬೊಳ್ಳೆ ಕೋರಿನ್ ಬುಡ್ಪೆರ್.ಆ ಕೋರಿ ಬೊಲ್ದು ಅರಿನ್ ತಿಂದ್ಂಡ ಧರ್ಮ ನೇಮ ದೈವೊಗು ಸಂದಾಯ ಆಂಡ್ಂದ್ ಅರ್ಥಗೆ
ಧರ್ಮ ನೇಮ ಕೊರ್ದು ಧರ್ಮ ನೇಮ ದೈವೊಗು ಸಂದಾಯ್ತ ಆಂಡ ಸಾಸ್ರ ಬೊಳ್ಳೆ ಕೋರಿ ತಡ್ಪೆಡ್ ಪಾಡ್ನ ಅರಿನ್ ತಿನೊಡು.
ನೀರ್ ಡ್ ನೆಗರ್,ಮರಟ್ ಮರಪಿಲಿ,ಅಕ್ಕಸೊಡು ತೆಡಿಲ್ ಮೆಂಚಿ,ಪುಂಚೊಡು ಮರಿ,ಮಾಡೊಡು ಲೆಕ್ಕೆಸಿರಿಯಾದ್ ಆರಾದನೆ ಪಡೆಯುನ ದೈವದ ಕಾರ್ನಿಕ ಮಲ್ಲೆ.ಲೆಕ್ಕೆಸಿರಿನ ಪುಟ್ಟುದ ಸ್ಪಷ್ಟ ಕಲ್ಪನೆ ತಿಕ್ಕ್ ಜಿಂಡಲ ಪಾಲೆ ಪಾಪು,ನೂಲು ಕೈ ಸಾಂಗ್ ಡ್ ಬೂಮಿಗ್ ಜತ್ತ್ ಬತ್ತಿ ಸತ್ಯಂದ್ ದೈವ ತುಳುನಾಡೊರ್ಮೆ ಪದ್ ರ್ದ್ ನ ಕಥೆಟ್ ತೆರಿಯುಂಡು.
ಲೆಕ್ಕೆಸಿರಿನ ಪಾಡ್ದನೊಡು ಬರ್ಪಿನ ಸಾಲುಲು:-
ಬಂಗಾಡಿ ಸೀಮೆದ ಮುಂಡಾಜೆದ ಗುಂಡೊಡು ಮೂರ್ತಿಲ್ಲಾಯೆ,ಈದು ನಾರಾವಿಡ್ ಮೂಜಿಲ್ನಾಯನ ಆರಾದನೆ,ದೆಸಿಲ್ದ (ಶಿಶಿಲ) ಸೀಮೆಗ್ ಬನ್ನಗ ರಕ್ಕಸ ರಾವುದ್ರೆ,ಲಂಕೆ ಲೋಕ ನಾಡ್ ದ ಜಯವುಲ್ಲ ಬೆಮ್ಮೆರೆ ನಡೆಟ್,ಗೆಜ್ಜೆದ ಮರತ ಅಡಿಟ್ ಗೆಜ್ಜೆಸರಾಯೆ/ಗೆಜ್ಜೆಸ್ರಾವಲೆ,ಬರಂಗಾಯ ಬೂಡುಡು ಪಾಲೆದ ಮರತಡಿಟ್ ಪಾಲೆಸರಾಯೆ/ಪಾಲೆಸ್ರಾವಲೆ,ಪಡ್ಡೇಯಿ ಬಾಕಿಲ್ ಡ್ ನೇಮ ಕೊರ್ನಗ ಪಡ್ಡೆಟ್ಟುನ್ನಾರ್(ಸಾಂತ್ಯ ಪುತ್ತೂರು),ಮೂಡಾಯಿ ಬಾಕಿಲ್ಡ್ ನೇಮ ಕೊರ್ನಗ ಮೂಡೊಟ್ಬುನ್ನಾರ್(ಬಿಳಿಯೂರು ಪೆರ್ನೆ,ಉಬಾರ್) ಪನ್ಪಾವೊಂದು ಬೂಮಿರ್ದ್ ಬಾನೊಗು,ಬಾನೊರ್ದು ಬೂಮಿಗ್ ಓರುಂಬೊಡಿ,ನಾಯಿಲ,ಕಟ್ಟೆಮಣೆಟ್ಟ್ ರಕ್ಕಸ ರೂಪೊಡು ಗವನಿದ್ ರಾಜ್ಯಾದಿಪತಿ ರಾವುದ್ರ ಕುಮಾರೆ ಪನ್ಪಾವೊಂದು ಮುರಿಯೆಲು ಮಾಡತಾನೊಗು ಬನ್ನಗ ಹಳ್ಳತ್ತಾಯೆಂದ್ ಪನ್ಪವೊಂದು ಬತ್ತೆ"....ಪಂಡ್ ದ್ ಪಾಡ್ದನ ಪನ್ಪುಂಡು
ಇನಿ ತುಳುನಾಡ ದೈವ ಲೆಕ್ಕೆಸಿರಿ ರಕ್ತೇಶ್ವರಿ,ದುರ್ಗಾ ಪರಮೇಶ್ವರಿ ಆವೊಂದುಂಡು.ಲೆಕ್ಕೆಸಿರಿ ಮಾಡೊಲು ರಕ್ತೇಶ್ವರಿ ಸನ್ನಿಧಿ/ದಾನ/ಗುಡಿ/ದೇವಸ್ಥಾನ ಆವೊಂದುಂಡು.ದೇವಿ ಮಹಾತ್ಮೆ ಆಟ ಬುಡುಂಡ ಲೆಕ್ಕೆಸಿರಿನ ಸಂದಿಡಾವಡ್,ದೇವಿ ಪುರಾಣೊಡಾವಡ್ ರಕ್ತೇಶ್ವರಿ ಪನ್ಪಿ ಪುದರ್ ತೂಯೆರೆ ತಿಕ್ಕುಜಿ.ರಕ್ತ ಬೀಜಾಸುರನ್ ಕೆರ್ನಾಲ್ ರಕ್ತದಂತಿಂದ್ ಪುರಾಣೊಡು ಬರ್ಪುನಿ.ನಮ್ಮತುಳುನಾಡ ದೈವ ಲೆಕ್ಕೆಸಿರಿ ಪ್ರಾಣಿ ಮೂಲದ ದೈವಾರಾದನೆಡ್ ನೀರ್ ಡ್ ನೆಗರ್ /ಮುದಲೆ ಆದ್ ತೋಜಿದ್ ಬತ್ತ್ಂಡಲ ಅವು ರಕ್ತೇಶ್ವರಿಯತ್ತ್. ಪಾಲೆಸರಾಯೆ/ಪಾಲೆಸ್ರಾವಲೆ,
