ತುಳುನಾಡ ದೈವ ತುಳುನಾಡ ಗಡಿಪುಡೆ ಬುಡ್ದು ಪಿದಯಿ ರಾಜ್ಯೊಗು ಪೋವಂದ್

ತುಳುನಾಡ ದೈವ  ತುಳುನಾಡ ಗಡಿಪುಡೆ ಬುಡ್ದು ಪಿದಯಿ ರಾಜ್ಯೊಗು ಪೋವಂದ್

" ಪರತ್ ನ್ ನಿಗಿಪಡ,ಪೊಸತ್ ನ್ ತೋಡಡ " ಪನ್ಪಿ ದೈವದ ನುಡಿ ತೆರಿದಿತ್ತ್ಂಡ ಇಂಚ ಪೂರ ಆತಂದ್

" ನಮ ನಂಬಿನ ಮಾಯೆನ್ ನಮ ಜಗತ್ತ್ ದ ವಾ ಮೂಲೆಡುಂತುದು ಕೈ ಮುಗಿದ್ ಲೆತ್ತ್ಂಡಲಾ ಬತ್ತ್ ದ್ ನಮನ್ ಕಾತ್ ರಕ್ಷಣೆ ಮಲ್ಪು.ಅಂಚಾಂದ್ ತುಳುನಾಡ ಗಡಿ ಪುಡೆ ಬುಡ್ದು ತುಳುನಾಡ ಮಣ್ಣ್ ಡ್ ಕಾರ್ನಿಕ ಮೆರೆಯಿನ ದೈವೊಲು ಬೇತೆ ಓಲ್ಲಾ ತುಳುನಾಡ್ ಅತ್ತಾಂದಿ ಜಾಗೆಡ್ ತುಲುವೆರಿತ್ತೆರ್ಡಲ ನಿಲೆ ಆಯೆರೆ ಸಾದ್ಯ ಇಜ್ಜಿ"

  

     ತುಳುನಾಡ ದೈವೊಲೆಗ್ ಈತೇ ಗಡಿ,ವ್ಯಾಪ್ತಿ,ಪರಿಧಿಂದ್ ಉಂಡು. ' ಮೂಡಾಯಿ ಗಟ್ಟೊರ್ದು ಪಡ್ಡೇಯಿ ಕಡಲ ಬರಿ ಮುಟ್ಟ , ಬಡಕಾಯಿ ಬಾರ್ಕೂರುರ್ದ ತೆನ್ಕಾಯಿ ಚಂದ್ರಗಿರಿ ಮುಟ್ಟ ' ದೈವದ ಗಡಿಯಾದುಂಡು.ಅವು ಬುಡ್ಂಡ್ಂದಾಂಡ ತುಳು ನಾಡ್ ದ ಈ ಕಟ್ಟ್ ಗ್,ಈ ಪದ್ಧತಿಗ್,ಈ ಸ್ವರೂಪೊಗು,ಈ ಲೆಪ್ಪುಗು,ಈ ಗಡಿಕ್,ಈ ಮಾನ್ಯಾದಿಗೆಗ್,ಈ ಮೂಲ್ಯಾದಿಗೆಗ್,ಈ ಬೂಳ್ಯದ ಕಟ್ಟ್ ಗ್,ಈ ಬದಿಕರದ ಕಟ್ಟ್ ಗ್,ಈ ಆರಾದನಾ ಪದ್ಧತಿಲು ಇಜ್ಜಂದೆ ಬೇತೆ ರಾಜ್ಯೊಡು ದೈವ ನಿಲೆ ಆಯೆರೆ ಸಾಧ್ಯ ಇಜ್ಜಿ.ಬೇತೆ ರಾಜ್ಯೊಲೆಡ್ ಅಡೆಗ್ ಸಂಬಂದ ಪಟ್ನ ಆರಾದನೆ ಇತ್ತ್ ದ್ ಅವು ಅಡೆಗೇ ನಂಬೊಳಿಗೆದ ಆರಾದನೆತೆದುಪ್ಪುಂಡು.ಅಂಚನೆ ನಮ ಬೇತೆ ರಾಜ್ಯೊಡಿತ್ತ್ ದ್ ದೈವೊನೊ ನಂಬ್ಯಂದ್ ಪನೊಲಿ ಅತ್ತಂದೆ ಕುಟುಮದ,ಜಾಗೆದ ಕಲ್ಲುರ್ಟಿ ಪಂಜುರ್ಲಿಲ ತುಳುನಾಡ ಸೀಮೆ ಬುಡ್ದು ಪೋಪುಜಿ. ತುಳುನಾಡ್ ನ್  ಮೀರ್ದ್ ಗಟ್ಟ ಜತ್ತ್ ಬತ್ತಿ ದೈವೊಲು ಗಟ್ಟದ ಮಿತ್ತ್ ಕುಡ ಪೋಯೆರಿಜ್ಜಿ.ಅಪಗ ಆಟಿಡ್ ದೈವೊಲು ಗಟ್ಟ ಮಿತ್ತ್ ಪೋಪತ್ತಾಂದ್ ನಿಕುಲು ಪನುವರ್.ಆಂಡ ದೈವ ಚಾಕಿರಿ ಮಲ್ಪುನಕುಲು ಆ ಸಮಯೊಡು ಬಂಜಿದ ಗುಜ್ಜಾರ್ಮೆಗಾದ್ ಬೆನಿಯೆರೆ ಗಟ್ಟದ ಮಿತ್ತ್ ಪೋಪೆರ್.ಅಕುಲು ದೈವ ನಂಬೊಳಿಗೆದಕುಲಾದಿತ್ತ್ ದ್ ಅಕುಲು ಪೋಯಿನೆಕ್ ದೈವನೇ ಪೋಪುಂಡು ಪನ್ಪಿ ಪಾತೆರ ರೂಢಿಗ್ ಬೈದ್ಂಡ್ ವಿನಃ ಧರ್ಮೆತ್ತಿ ಮಣ್ಣ್ ತುಳುನಾಡ್ ಡ್ ನಿಲೆಯಾಯಿ ದೈವ ಗಟ್ಟದ ಮಿತ್ತ್ ಪೋಪುಜಿ.ಗಟ್ಟದ ಮಿತ್ತೇ ಪೋವಂದಿನ ದೈವ ಬೇತೆ ರಾಜ್ಯೊಗು ಪೋಯೆರೆ ಸಾಧ್ಯನೇ?.ಖಂಡಿತಾ ಇಜ್ಜಿ.

  

ನಮ್ಮ ಪೂರ್ವ ಹಿರಿಯಾಕ್ಲೆಡ ಅಲ್ಮೋಗದ ಮಲ್ಲ ಸಗ್ತಿ ಇತ್ತ್ಂಡ್.ಅಕ್ಲೆಡ ಇತ್ತ್ ನ ಅನುಭವೊನು ನಮ್ಮ ತರೆಟ್ ದೀಪುನಾತ್ ಸಾಮರ್ಥ್ಯ ಇಜ್ಜಿ.ಓಲು ತತ್ತ್ಂಡ್ ಪಂಡ ನಮ ಜೀವನ ಪದ್ದತಿಡ್ಲಾ ತತ್ತ,ಆಚಾರ ಪದ್ದತಿಡ್ಲಾ ತತ್ತ,ಇದ್ಯೆಡ್ಲಾ ತತ್ತ,ಆರಾದನಾ ಪದ್ದತಿಡ್ಲ ತತ್ತ .ಉಂದೆಡ್ದಾದ್ ನಮ್ಮ ಅಲಚನೆಲೆಡ್ ಎತ್ತೇಸೊಲು ಆವೊಂದು ಬತ್ತ. ಪೂರ ಹಿರಿಯಾಕ್ಲ್  ಅವೆಕೈಕ್ ಬೋಡಾಯ್ನ ರೀತಿಡ್ ಜನಮನಸ್ ಗ್ ಕುಲ್ಯೆರೆ ಬೋಡಾದ್  ದೈವದ ಬಂಡಿಗ್ಲ ಆಕಾರ ಕೊರ್ತೆರತ್ತಂದೆ ಕಲ ಮೀರ್ದ್ ಬಂಡಿ ಪೋಯೆರ್ಲ ಇಜ್ಜಾಂಡ್,ಕಲ ಮೀರ್ದ್ ದೈವ ಪೋಯೆರ್ಲಾ ಇಜ್ಜಾಂಡ್.ದೈವ ರಾಜ್ಯದ ಕಲನೇ ಬುಡ್ದು ಪೋವಂದಿನವು ಬೇತೆ ರಾಜ್ಯದ ಕಲೊಟು ನಿಲೆ ಆಯೆರೆ ಸಾಧ್ಯನಾ?.ಅಲಚನೆ ಮಲ್ಪೊಡಾಯಿನ ಇಚಾರ.ಅಂಚಾಂದ್ ಒರಿ ತುಳುವೆ ದೂರದ ರಾಜ್ಯೊಡುಂತುದು ಓ ಎನ್ನ ಸತ್ಯ ಜುಮಾದಿ,ಎನನ್ ಕಾಪುಲಂದ್,ಎಂಕ್ ಈ ರೀತಿದ ಬಂಙ ಆವೊಂದುಂಡುಂದು, ಮಾಯೆದ ಜುಮಾದಿ ಆಯನ್ ಕಾಪೆರೆ ಯಾರು. ಮಾಯೆದ ದೈವ ನಂಬಿ ಸಂಸಾರ ಓಲಿತ್ತ್ಂಡಲಾ ಲೆತ್ತ್ ನಡೆ ಓಕೊನ್ದು ಬರು,ಕಷ್ಟೊಲೆನ್ ಪರಿಹಾರ ಮಲ್ಪು.ಆಂಡ ಆ ಮಣ್ಣ್ ಡ್ ಬತ್ತ್ ದ್ ತುಳುನಾಡ ದೈವ ನಿಲೆ ಆಯೆರೆ ಸಾಧ್ಯ ಇಜ್ಜಿ.ದಾಯೆ ಪಂಡ ದೈವಾರಾದನೆಗ್ ಹಿರಿಯಾಕ್ಲ್ ಗುರ್ತ ಪತ್ತಿನ ಗಡಿಪುಡೆನ್ ಬುಡ್ದು ಬೇತೆ ರಾಜ್ಯೊಗು ತುಳುನಾಡ ದೈವ ಪೋಯೆರೆ ಸಾದ್ಯ ಇಜ್ಜಿ.ದಾಯೆ ಪಂಡ ತುಳುನಾಡ ದೈವಾರಾದನೆಗ್ ಅವೆತನವೇ ಆಯಿನ ಕಟ್ಟ್ ಕಟ್ಲೆಲು,ಅವೆಕವೆಕ್ ಬೋಡಾಯಿನ ಗುತ್ತು ಬರ್ಕೆಲು,ಅವೆಕೈಕ್ ಬೋಡಾಯಿನ ಜಾತಿ ವರ್ಗದ ಚಾಕಿರಿ ಮಾನಿನಕುಲು ಉಪ್ಪುನಿ ಈ ತುಳು ಮಣ್ಣ್ ಡೇ.ಮುಲ್ತ ದೈವಾರಾದನೆದ ವಾತಾವರಣೊನು ಬೇತೆ ರಾಜ್ಯೊಲೆಡ್ ಉಂಡು ಮಲ್ಪೆರೆ ಸಾಧ್ಯ ಇಜ್ಜಿ.ತುಳುವ ನೆಲಟ್ ತುಳುವೆರೆಗ್ ದೈವ ಪಂಡ ಅವು ಬದ್ ಕ್ ದ ಒಂಜಿ ಭಾಗ. ಬೇತೆ ರಾಜ್ಯೊಡು ನಮ್ಮ ದೈವಾರಾದನೆನ್ ಪ್ರದರ್ಶನ ಮಲ್ಪೊಲಿ ವಿನಃ ಅಲ್ಪ ಬದುಕೊಂದಿಪ್ಪುನ ತುಳುವೆರೆಗ್ ಬುಡ್ದು ಬೇತೆಕ್ಲೆಗ್ ನಮ್ಮ‌ಆರಾದನೆ ಅಗತ್ಯ ಉಪ್ಪುಜಿ.ಅಂಚಾದ್ ನಮ ತುಳುವೆರ್ ಬೇತೆ ರಾಜ್ಯೊಡು ದೈವದ ಸಾನ ಗುಂಡ ಕಟ್ಟ್ ದ್ ನಂಬುನ ಬದಲ್ ವರ್ಸೊಗೊರ ತುಳುನಾಡ್ ಡ್ ನಡಪುನ ಅಕ್ಲೆಗ್ ಸಂಬಂದಪಟ್ಟಿನ ದೈವದ ನಡೆಕ್ ಬತ್ತ್ ದ್ ಬೂಲ್ಯ ಪತ್ತುನ ಎಡ್ಡೆ.

ದೈವ ಗಡು ಮೀರ್ದ್ ಪೋವಂದಿನೆಡ್ದಾದ್ ದೈವ ಬೇತೆ ರಾಜ್ಯೊಡು ಇಜ್ಜಿ ಪಂಡ ತುಳು ನಾಡ್ ಬುಡ್ದು ಬೇತೆ ರಾಜ್ಯೊಡು ನಿಲೆ ಆಪುಜಿ.ವಾದ ಮಲ್ಪುನಕುಲು ಕೇಂಡ ದೇವೆರೆನ್ ,ದೈವೊಲೆನ್ ನಮಕ್ ತೋಜಾಯೆರೆ ಸಾದ್ಯನಾ?.ದೈವ ಸಾನಿದ್ಯ ಪಂಡ ಮಾಯ ಉಂಡು.ಆಯನ ಉಡಲ್ ದೈವೊನು ಓಲು ನಂಬುಂಡ ಆಯನ ಉಡಲ್ ಗ್ ಮಾಯೆ ಓಕೊನು.ಆ ಜಾಗೆಡ್ ಕಟ್ಟುನಾಯೆ ಉಪ್ಪೆ, ಆಂಡ ದೈವದ ನಿಲೆ ಅವ್ಲು ಉಪ್ಪುಜಿ.ತುಳುನಾಡ ದೈವ ನೇಮೊಗು ತುಳುನಾಡ ಗಡಿ ಬುಡ್ದು ಬೇತೆ ರಾಜ್ಯೊಡು ನೇಮದೆಚ್ಚಿಗ್ ಬತ್ತ್ಂಡ್,ಅತ್ತ್ಂಡ ಗಡಿಯಾವಾರ ದೆತೊಂಡ್,ಇಜಿಂದಾಂಡ  ದೈವ ಪೇರಾಮೃತ ಪಂರ್ಡ್ ಪಂಡ ಅವು ನಡಪಂದಿ ಇಚಾರ.ಅಂಚನೆ ನಮ ತುಳುನಾಡ್ ಡ್ ನಿಲೆ ಇತ್ತ್ ದ್ ಬದುಕುನಕುಲು.ಪಿದಯಿ ಬೆನೆರೆ ಪೋದು ಅವ್ಲು ಬದ್ ಕ್ಂಡ ನಮನ್ ಅವ್ಲು ತುಳುವೆಂದ್ ಗುರ್ತ ಪತ್ಯೆರ್ಡಲಾ ನಮ್ಮ ಬದ್ ಕ್ ದ ನಿಲೆ (ಕುಟುಮ ಸಂಸಾರ) ಉಪ್ಪುನಿ ತುಳು ಮಣ್ಣ್ ಡೇ.ಅಂಚಾದ್ ತುಳು ಮಣ್ಣ್ ಡ್ ಆರಾದನೆ ಉಪ್ಪುನ ದೈವೊನು ನಮ ತುಳು ಮಣ್ಣ್ ಡೇ ನಂಬುಂಡ ಅವೆಕ್ ಮಾನಾದಿಗೆ.ಅವು ಬುಡ್ದು ಅವ್ಲಿತ್ತ್ ನಡೆ ಕೊನೊದು ನಂಬುಂಡ ಅವ್ಲು ದೈವ ಖಂಡಿತಾ ನಿಲೆ ಆವಂದ್.ಅವ್ಲು ನಿಲೆ ಇಜ್ಜಂದಿನವ್ಲು  ಕಲೆ  ದಿಂಜುನೆಂಚ? .

  ತುಳುನಾಡ್ ಡ್ದ್ ಬೇತೆ ರಾಜ್ಯೊಗು ಪೋದು ಬದ್ ಕೊಂದಿಪ್ಪುನಕುಲು ಕಟ್ಟುನಾಯನ್ ಕೊನೊಯೆರೆ ಯಾರು.ಉರಿಪುನಾಯನ್ ಕೊನೊದು ಉರಿಪಾಯೆರೆ ಯಾರು,ಜೋಗ ಬತ್ತ್ಂಡ್ಂದ್ ಕಟ್ಟುನಾಯೆ ಜೋಗ ಮಲ್ಪೆರ್ಲಾ ಯಾರು.ಆಂಡ ಆಯನ ಮೈಕ್ ದೈವ ಬರ್ಪುಜಿ.ದಾಯೆ ಪಂಡ ಅವ್ಲು ದೈವದ ನಿಲೆ ಇಜ್ಜಿ.ನಿಲೆ ದಾಂತೆ ಕಲೆಕಾರ್ನಿಕ ತೋಜೆರೆ ಸಾಧ್ಯನೇ?.ಜೂವೊಡಿತ್ತ್ ನ ಕಟ್ಟುನಕುಲು ಅಡೆ ಪೋವೊಲಿ.ಆಂಡ ಮಾಯೆ ಅಡೆ ಪೋವಂದ್. ದೈವಾರಾದನೆಗ್ ಹಿರಿಯಾಕ್ಲು  ಮಲ್ತ್ ನ  ತುಳುನಾಡ ಗಡಿತ ಕಟ್ಟ್ ತಪ್ಪುಂದಾಂಡ  ಅಕುಲು ಮಲ್ತ್ ನ ಮಾತ ಕಟ್ಟ್ ಲಾ ತಪ್ಪುಂದಾಯಿಜಾ?.ಇನಿ ಒರಿ ಬೇತೆ ರಾಜ್ಯೊಡು ದೈವೊಗು ನೇಮ ಕೋಲ ಕಟ್ಟವೆಂದಾಂಡ,ಕಂಬುಲ ಮಲ್ಪುವೆಂದಾಂಡ  ಅವು ಅಲ್ತ ಆಂಡ?.ಇಜ್ಜತ್ತೆ.ಅವೆನ್ ತುಳುನಾಡ್ ಡ್ದ್ ಆಯೆ ಅಡೆಗ್ ಕೊನೊದು ಮಲ್ಪದ್ ನಿ.ಅವೆತ ಅರ್ಥ ಎಂಚಿನ?.ಅಲ್ಪದಕ್ಲೆಗ್ ಎಂಕ್ಲೆ ತುಳುನಾಡ್ದ ದೈವಾರಾದನೆ ಇಂಚ ಉಂಡುಂದು 

ತೊಜಪಾಯಿಲೆಕಾಂಡ್.ಅವೆತ ಮೂಲ ತುಳುನಾಡತ್ತೆ.ನಮಕ್ ದೈವಾರಾದನೆ ಬದ್ ಕ್ ದ ಒಂಜಿ ಭಾಗ ಆಂಡ ಅಲ್ತಕ್ಲೆಗ್ ಅವು ಅಗತ್ಯ ಇಜ್ಜತ್ತೆ?.ಅವೆನ್ ದಾಯೆ ನಮ ಅರ್ಥ ಮಲ್ಪುನವ್ಲು ಸೋತ್ ದ?.ದಾಯೆ ಪಂಡ ಗೇನದ ಕೊರತೆ.ಹಿರಿಯಾಕುಲು ತೆರಿನೆನ್ ಪಂಡ್ ಕೊರ್ಜೆರ್,ಕಿರಿಯಾಕುಲು ಕೇಂದ್ ಕಲ್ತ್ ಜೆರ್,ಅಕ್ಲೆ ಕೊಸ್ವಾಸಿಗ್ ಮಲ್ತೊಂದು ಪೋಯೆರ್.ಅಂಚಾದ್ ಇಂಚಾಯೆರೆ ಕಾರಣ ಆಂಡ್.ಅಂಕ ಆಯನೊಡು ಒಂಜಿ ಬಾಗ ಕೋರಿದ ಕಟ್ಟ.ಆಂಡ ತುಳುವೆರ್ ಓಲು ಬದ್ ಕೊಂದುಲ್ಲೆರಾ ಅವ್ಲು ತುಳುನಾಡ ರೂಡಿದ ಕೋರಿದ ಕಟ್ಟ ಮಲ್ಪಾವೆರ್.ಕೋರಿ ಕಟ್ಟುಂಡು,ಕೋರಿ ಗೆಂದುಂಡು,ಸೈಪುಂಡು ಕಜಿಪು ಮಲ್ತ್ ದ್ ತಿನ್ಪುಂಡು.ಆಂಡಲಾ ತುಳುನಾಡ್ ದ ಕಟ್ಟದ ಬಿಲೆ ತುಳುನಾಡ್ ಗೇ ಪೊರ್ಲು.

ನಮ ಒಂಜಿ ದೂರದ ರಾಜ್ಯೊಡು ಪೋದು ಕುಲ್ಲುದು ನಮ ನಂಬಿ ದೈವದ ನೆನವರಿಕೆಗಾದ್ ಪೂ ನೀರ್ ದೀಂಡ ಪೂ ನೀರ್ ದೀನಡೆಗ್ ದೈವ ಬರ್ಪುಜಿ.ಅವು ನಮ್ಮ ನಂಬೊಳಿಗೆಗ್ಂದ್ ಕಣ್ಣ್ ಗ್ ತೋಜುನ ಒಂಜಿ ಸೊತ್ತು ಆತೆ‌.ಆಂಡ ನಮ್ಮ ನೆನವರಿಕೆದಡೆ ದೈವ ಉಡಲ್ ಗ್ ಬತ್ತ್ ದ್ ಉಡಲ್ ಗ್ ಸಗ್ತಿ ಕೊರ್ಪುನವು ಸತ್ಯ.ನಮ ನೆನೆತ್ ನಾಡೆಗ್ ದೈವ ಬರು,ಅವು ಬುಡ್ದು ಕಟ್ಟ್ ನಾಯನ ಮೇಲ್ಡ್ ದೈವ ಬರ್ರೆಲಾ ಸಾದ್ಯ ಇಜ್ಜಿ, ದೈವ ನಿಲೆ ಆಯೆರ್ಲ ಸಾದ್ಯ ಇಜ್ಜಿ,ಕಟ್ಟ್ ನಾಯೆ ಎನ್ನ ಮೇಲ್ ಗ್ ದೈವ ಬತ್ತ್ಂಡ್ಂದ್ ನಂಬಯೆರೆ ಯಾವು.ದೈವದ ಕಲೊಟು ಬತ್ತ್ ದ್ ದೈವ ಇಜ್ಜಿಂದ್ ನಿಕುಲು ಪನ್ಲೆಂದ್ ಏರಾಂಡಲಾ ಪಂಡೆರ್ಡ  ಅಕ್ಲೆಡ ನಮ ಪನೊಡಾಯಿನಿ ಈತೆ,ನಿಕ್ಲೆ ಮೇಲ್ ಡ್  ದೈವ ಬೈದ್ಂಡ್ ಪಂಡ್ದಾಂಡ ಆ ದೈವೊನು ನಮ್ಮ ಎದುರುಂತಾದ್ ತೋಜಾಲೆಂದ್.ತುಳು ನಾಡ ಗಡಿ ಮೀರ್ದ್ ತುಳು ನಾಡ ದೈವ ಓಡೆಗ್ಲ ಪೋಪುಜಿಂದ್ ಪನ್ಪುನವು ಸಾರ ಪಾಲ್ ಗ್ಲ ಸತ್ಯ . ತುಳುನಾಡ್ ಡ್ ದೈವ ದೇವೆರೆ ಸ್ಥಾನ ಕೊರ್ದು ನಾಗನ್ ನಂಬುವೆರ್.ತುಳು ನಾಡ್ ಕರಿದ್ ಪೋಂಡ ನಾಗೆ ಒಂಜಿ ಬಜೀ ಉಚ್ಚು ಆತೆ.ನಂಬುನವ್ಲು‌ಇಂಬು ಉಂಡು.ಆಂಡ ಆ ಮಣ್ಣ್ ದ ಪದ್ದತಿಗ್ ಬಿಲೆ ಕೊರೊಡು.ದೈವಾರಾದನೆ,ನಾಗಾರಾದನೆ ತುಳುವ ಮಣ್ಣ್ ದ ಪದ್ಧತಿ.ಅವೆನ್ ಬೇತೆ ರಾಜ್ಯದ ಮಣ್ಣ್ ಡ್ ಕೊನೊದು ನಂಬುಂಡ ಅವು ಆ ಮಣ್ಣ್ ದ ಪದ್ಧತಿಯತ್ತ್.ಅಂಚಾದ್ ತುಳುನಾಡ ಮಣ್ಣ್ ದ ದೈವ ಆ ರಾಜ್ಯದ ಮಣ್ಣ್ ಡ್ ನಿಲೆ ಆಯೆರೆ ಸಾಧ್ಯ ಇಜ್ಜಿ.ನಮ ಅವ್ಲು ನಮ್ಮ ಮಣ್ಣ್ ದ ಪದ್ಧತಿನ್ ಮೀರ್ದ್  ನಮ್ಮ ತುಳು‌ ಮಣ್ಣ್ ದ ದೈವಾರಾದನೆನ್ ನಡಪಾಂಡ ಅವ್ಲು ದೈವ ನಿಲೆ ಆಯೆರೆ ಸಾದ್ಯ ಇಜ್ಜಿ.ನಮ್ಮ ಈ ಮಣ್ಣ್ ದ ಆರಾದನೆ ನಮ ಬದ್ ಕೊಂದುಪ್ಪುನ ಆ ಮಣ್ಣ್ ಗ್ ಅಗತ್ಯನೇ ಉಪ್ಪುಜಿ.ಮೂಲು ನಮ ದೈವಾರಾದನೆನ್ ಪಿದಯಿ ರಾಜ್ಯೊಡ್ಲ ಮಲ್ತ ಪಂಡ ಅವ್ಲು ನಮ್ಮ ಆರಾದನೆನ್ ತೊಜಪಾವುನ ಬೇಲೆ ಮಲ್ತಂದ್ ಆಂಡಾತೆ.ಆಂಡ ತುಳುನಾಡ ದೈವ ಅಡೆ ಪೋವಂದ್,ನಿಲೆಲಾ ಆವಂದ್.ದೈವದ ನಿಲೆ ಇಜ್ಜಂದಿ ಜಾಗೆಡ್ ದೈವದ ಕಲ ಮಲ್ತ್ಂಡಲ ತೋರಿಕೆದ ಕಲ ಆವಾತೆ,ದೈವದ ಕಲನೇ ಇಜ್ಜಂದಿ ಊರುಡು ದೈವದ  ಕಲ ಕಟ್ಟುನಕುಲು ಏರ್?.ಗುತ್ತು ಓಂಡು,ಬರ್ಕೆ ಓಂಡು,ಬಾವ ಓಂಡು,ಬೂಡು ಓಂಡು,ಬಾಳಿಕೆ ಓಂಡು,ಚಾಕಿರಿ ಬಾಗ ಓಲುಂಡು,ಗಡಿ ಓಲುಂಡು ?.ಕಟ್ಟುನಕುಲು,ವಾದ್ಯದಕುಲು,ಮದಿಪುದಕುಲು ಉಪ್ಪೆರಾತೆ.ದೈವದ ಕಲಂದ್ ಅವೆನ್ ಪನೆರೆ ಆಪುಂಡೇ?.ದೈವದ ಕಲ ಪನೊಡಂಡ ತುಳುನಾಡ ಮಣ್ಣ್ ಬೋಡು,ಸಾನ ಬೋಡು .ಕಾಸ್ ಪಾಡ್ದ್ ಕಲ್ಲ್ ಡಾ,ಇಟ್ಟಿಗೆಡಾ ಕಟ್ಟೊಣ ಕಟ್ಟಿ ಸಾತ್ ಗ್ ಅವು ಸಾನ ಆಪುಜಿ.ದೈವ ಉಂಡಾಯಿ ಮಣ್ಣ್ಂದ್ ಜನೊಕ್ಲೆನ್ ನಂಬಾಯೆರೆ ಸಾನ ಕಟ್ಟೊಲಿ ಆತೆ.ಅವ್ಲು ಸತ್ಯೊಲು ನಿಲೆ ಆಯೆರೆ ಸಾದ್ಯ ಇಜ್ಜಿ.ಅಂಚಾದ್ ನಮ ಅಕ್ಲೆ ಪಣವುದ ತಾಕತ್ತ್ ಗ್ ತರೆ ತಗ್ಗವುನ ಬದಲ್ ಸತ್ಯೊಲೆಗ್ ತರೆ ತಗ್ಗಾವೊಡು.ದೈವೊಗು‌ ಸಮ್ಮಂದ ಪಟ್ನ ವಾ ಚಾಕಿರಿ ಬಾಗದಕುಲ್ಲಾ ಇಜ್ಜಂದೆ,ಮನೆತನೊಲು ಇಜ್ಜಂದೆ ಕಲ ಉಂಡಾಯೆರೆ ಸಾದ್ಯನಾ?.ಕಟ್ಟುನಾಯೆ ಆಯನ ಅನುಭವದ ಅದಾರೊಡು ಅವ್ಲು ವಸಾಯ ಮಲ್ಪೊಲಿ ವಿನಃ ಅಡೆ ದೈವ ಬರ್ಪುಜಿ.ದೈವದ ಕಲನೇ ಇಜ್ಜಂದಿನವ್ಲು ದೈವೊನು ಕಲೊಕು ಬಲಂದ್ ಲೆತ್ತ್ಂಡ ದೈವ ಎಂಚ ಅಡೆ ಬರ್ಪುನಿ?.ಅಂಚಾದ್ ನಮ್ಮ ತುಳುನಾಡ ದೈವೊನು ನಮ್ಮ ಸತ್ಯಾನುಭಗ್ತಿಡ್ ನಮ್ಮ ತುಳುವ ಮಣ್ಣ್ ಡೇ ಆರಾಧನೆ ಮಲ್ಪುಗ.

ಬರವುಗು ಪೂರಕ ಮಾಯಿತಿ:- 

ಯಂ.ಡಿ.ಶೆಟ್ಟಿ ಇರಾ.-ಹಿರಿಯ ಜನಪದ ತಜ್ಞೆರ್.

    

ಈ ಬರವುಡು ಹಿರಿಯಾಕ್ಲೆ ಕಟ್ಟ್ ದ ಇಚಾರೊಡು ಮೂಲು ತೆರಿಪಾಯ.ಒಪ್ಪುನ‌ ಬುಡ್ಪುನ  ನಿಕ್ಲೆಗ್ ಬುಡ್ನ.