ಬರೊಂದುಲ್ಲೆ ಆಟಿ ಕಳೆಂಜೆ

           *ಬರೊಂದುಲ್ಲೆ ಆಟಿಕಲೆಂಜೆ* 

ಬರೊಂದುಲ್ಲೆ ಜಾಲ್ ಗ್ ಆಟಿ ಕಳೆಂಜೆ

ಬಿರ್ಮಾರು ಮಾಂಕಾಳಿ ಬಾಲೆ ಕಡೆಂಜೆ

ಭಸ್ಮದ ಅಡ್ಡಣಗೆ  ಪೂಂಜ ಕತ್ತಿಗೆ

ಗಿರ ಗಿರ ತಿರ್ಗವೆ ಕೈಪಣೆ ಕಳೆಂಜೆ

ಪೊಸ ಪೋಡಿಗೆಡ್ ಪರತ್ ಪೋಡಿಗೆನ್ ಗಿಡೆತೆ

ನಂಜಿ ಪುರಿ ಕೈಕಾರ್ ಪುಲಮರ್ದ್ ಕೊರ್ ತೆ

ಕನ್ನಿನ ಒಟ್ಟುಗು ಬತ್ತೆ ಕಳೆಂಜೆ

ಸಿರ್ಕ್ ಕಡಪ ರಾಜ್ಯ ತಟ್ಟ್ ಪಾರಾದೆ

ತಾರೆದ ತಿರಿ ತಿಗ್ ತೆ ಬೆದೆ ದಿಂಜ ಪತ್ಯೆ

ತರೆಮಣಿ ಪತ್ಯೊಗೆ ತರೆಕುಂಟು ಸುತ್ಯೆ

ಕೈಕ್ ಕೈದಂಡೆಗೆ ಕೆಬಿಕ್ ಕೆಬಿಯಣಿಗೆ

ಕೈನಾಗೆ ಬೆರಿಚವರಿ ಗೆಜ್ಜೆ ಕಿಣಿಕಿಣಿಗೆ

ಜಾಲ್ ಡೆಡಬಲ ಎದುರು ಪಿರವು ತಿರ್ ಗಿಯೆ

ಪಜ್ಜೆ ಮೆತ್ತೆನ ಮಾರಿ ಬೀರಿ ಮಾಜಾಯೆ

ಐಮೂಲೆ ಸುತ್ತುಗು ಗೆಜ್ಜೆ ಸೊರೊ ಪೊರುಲು

ನಲಿಕೆಗ್ ತೆಂಬರೆದ ಕಟ್ಟ್ ಲೆಪ್ಪುಲು

ಕನ್ನಿನ ನಲಿಪುಗು ತಪ್ಪುದ ಸೂಡಿ

ಕಳೆಂಜನ ತಂತ್ ರೊಡು ಮದಿಪವು ಕೂಡಿ

ಅರಿದಲ ಮೋನೆಗ್ ಕೆಂಪು ತುತ್ತೈತ

ದೈವೊದ ನೆಂಪವೆಟ್ ಸೊಂಟ ತಿರಿತೈತ

ಕಿದೆಕ್ ನೆಕ್ಕಿ ತಪ್ಪು ಕನತ್ ದ್ ದೀಪೆ

ತಾರೆ ಮುದೆಲ್ ಗ್ ನೀರ್ ಪಾಡ್ ದ್ ಪೋಪೆ

ಪೊಣ್ ಪೊಂಜೊವಾಯೆರೆ ತರೆ ನೀರ್ ಪಾಡ್ಯೆ

ಜೋಕ್ ಲೆನ ಸಿರ್ಕ್ ಲೆನ್ ಮಾಜದ್ ಬುಡ್ಯೆ

ಪತ್ತ್ ಪಿರಯೊಗು ಪದಿನಾಜೆತ ಬುಳೆಚಿಲ್ ಗೆ

ಕೈಕಂಜಿ ಜನಮಂದೆ ಸಿರ್ಕ್ ದೆತ್ತೆಗೆ

ತಿಕ್ಕ್ ನೆನ್ ತಿಂದೆಗೆ ಬಂಜಿ ಉಬ್ಬೆರ್ಂಡ್

ಕಣ್ಣ್ ಕೆಂಪಾಂಡ್ ಗೆ ದೊಂಡೆ ಕಿರ್ಂಬುಂಡ್.

ಕೇಮರಿ ಗಡ್ಡಗೆ ಕೆಂಚಿ ಮೀಸೆಗೆ

ಮಾಮಿನ್ ಕತ್ತಲೆಡ್ ಪೊರ್ಲು ಕಾತೆಗೆ

ಮಗಳೆನ್ ಪಗೆಲ್ ಡ್ ಒರ್ತು ಕರ್ ತೆಗೆ

ತಾಂಕಿ ಜೂವದ ಸಿರ್ಕ್ ದೂರ ಮಲ್ತೆಗೆ

ಬತ್ತೆ ಕಳೆಂಜೆ ಇಲ್ಲ ಜಾಲ್ ಗ್

ಕಲೆಂಜನ್ ಗಿರ್ಯಪೊ ಪನ್ಪಿ ಪಾತೆರೊಗು

ಮೂವೊಡ್ದ ಸಾಂತನಿ ಈವೊಡ್ದ ಪೆಲತರಿ

ಮುಂಚಿದ ಚೋಲಿಗೆ ತೆಪ್ಪು ತಾರಾಯಿ

ಪುಳಿ ಪೊಡಿ ನಿಂಗಲ್ ಪುಗೆರೆದ ಎಸಲ್

ಚೆಟ್ಟ್ ಬಾರ್ ಕೊರ್ಲೆ ಒರ್ಂಬ ಸೇರ್

ಪರಿನ ಕುಂಟುಂಡೆ ಬಚ್ಚಿರೆ ಪೂಳು

ಇಲ್ಲದ ಉಲ್ಲಾಲ್ದಿ ಪಿದಯಿಗ್ ಕನಲೆ

ಇಲ್ಲದ ಎದುರಿಪ್ಪಿ ಕಲೆಂಜನ್ ತೂಲೆ

ಬೋಲ್ತೇರ್ ಕಾರ್ಲ ಕುಡಲ ಬಂಟಾಲ

ಸುಳ್ಯ ಪುತ್ತೂರು ಒರ್ಮೆಲ ತೂಲ

ಬರೊಂದುಲ್ಲೆ ಕಲೆಂಜೆ ಮಾರಿ ದೇರೊಂದು

ತುಳುವ ನಾಡ್ ದ ನಂಬೊಳಿಗೆನೊರಿತೊಂದು.

  

          ಮುಗೇರೆರೆನ ಆಟಿ ಕಳಂಜೆ ಬೆರ್ಮೆರೆ ಮಾಣಿ

ಕವಿ-ಕೆ.ಮಹೇಂದ್ರನಾಥ್ ಸಾಲೆತ್ತೂರು.ಎಂ.ಎ

ಪಾದೂರು ಗುರುರಾಜ ಭಟ್

                 ಪಾದೂರು ಗುರುರಾಜ ಭಟ್

  ತುಳುನಾಡಿನ ದೇಗುಲಗಳಲ್ಲಿ ಸ್ಥಾನಿಕ ಬ್ರಾಹ್ಮಣರು ಮೊದಲಿನಿಂದಲೂ ಪೂಜೆ ಮಾಡಿಕೊಂಡು ಬಂದವರು.ಮುಂದೆ ಅವರಿಗೆ ದೇಗುಲಗಳಲ್ಲಿ ಅವಕಾಶ  ಸಿಗದೆ ಅಲ್ಲಿಗೆ ದೇವರ ಪೂಜೆಗೆ ಶಿವಳ್ಳಿ ಬ್ರಾಹ್ಮಣರು ದೇವರ ಪೂಜೆಗೆ ಸೇರಿಕೊಂಡರು.ಈ ವಿಚಾರವನ್ನು ಅವರು ತನ್ನ ಕೃತಿಯಲ್ಲಿ ಬರೆದುದರಿಂದ ಅವರಿಗೆ ಸಂಕಟ ಎದುರಾಗಿರಬಹುದು.

      ಅವರ ಸಾವು ಇನ್ನೂ ನಿಗೂಢ ! ಅದು ಆತ್ಮಹತ್ಯೆಯೋ ಅಥವಾ ಕೊಲೆಯೋ ?! ಒಟ್ಟಾರೆ ಆರ್ಥಿಕ ಮುಗ್ಗಟ್ಟಿಗೆ ತುತ್ತಾಗಿ ಮನೆಯ ಬಾವಿಗೆ‌ ಹಾರಿ ಆತ್ಮಹತ್ಯೆ ಮಾಡಿಕೊಂಡರು ಎಂದು ಪೊಲೀಸರು ಅಂತಿಮ ಷರಾ ಬರೆದರು !! ಆತ್ಮಹತ್ಯೆ ಮಾಡಿಕೊಳ್ಳುವ ಮುನ್ನ ಡೆತ್ ನೋಟ್ ಕೂಡಾ ಬರೆದಿಟ್ಟಿದ್ದರು ಎಂದು ಪತ್ರಿಕಾ ವರದಿ ಬಂದಿತ್ತು !! ವಿಧಿವಶರಾಗುವಾಗ ಕಲ್ಯಾಣಪುರದ ಮಿಲಾಗ್ರಿಸ್ ಕಾಲೇಜಿನ ಪ್ರಾಂಶುಪಾಲರಾಗಿದ್ದರು .  Studies in Tuluva History and Culture ಎಂಬ ಪ್ರಸಿದ್ಧ ಗ್ರಂಥವನ್ನು ಬರೆಯಲು ಬೇಕಾದ ಕ್ಷೇತ್ರಾಧ್ಯಯನ ಹಾಗೂ ಗ್ರಂಥ ಪ್ರಕಟಣೆಯ ವೆಚ್ಚಗಳನ್ನು ಸ್ವಂತ ಕಿಸೆಯಿಂದ ಭರಿಸಲು ಸಾಲವನ್ನು ಮಾಡಿದ್ದರು . ಆ ಕಾಲದಲ್ಲಿ (1975 ರ ಇಸವಿ) ಸುಮಾರು ಒಂದು ಲಕ್ಷ ರೂಪಾಯಿಯಷ್ಟು ಸಾಲದ ಹೊರೆ ಇತ್ತಂತೆ. ಮರ್ಯಾದೆ ಉಳಿಸಿಕೊಳ್ಳಲು ಕೊನೆಕ್ಷಣದಲ್ಲಿ ಆರ್ಥಿಕ ಸಹಾಯಕ್ಕಾಗಿ ಅಷ್ಟ ಮಠಗಳನ್ನು ಹಾಗೂ ಮಣಿಪಾಲದ ಪೈಗಳ ಮೊರೆ ಹೋದರೂ ಸೂಕ್ತ ಸ್ಪಂದನೆ ಸಿಕ್ಕಿರಲಿಲ್ಲವಂತೆ . ಸ್ವಂತ ಕಿಸೆಯಿಂದ ಕ್ಷೇತ್ರಾಧ್ಯಯನ ಹಾಗೂ ಪ್ರಕಟನೆಯ ವೆಚ್ಚ ಭರಿಸಿ ಅವರು ಬರೆದು ಪ್ರಕಟಿಸಿದ ಅವರ ಆಕರ ಗ್ರಂಥ Studies in Tuluva History and Culture ತುಳುನಾಡಿನ ಚರಿತ್ರೆಯಲ್ಲಿ ಅವರ ಹೆಸರನ್ನು ಅಜರಾಮರವನ್ನಾಗಿಸಿದರೂ ಅದಕ್ಕಾಗಿ ಅವರು ತಮ್ಮ ಬದುಕನ್ನೇ ಬಲಿಕೊಡ ಬೇಕಾಗಿ ಬಂದಿದ್ದು ಒಂದು ಮಹಾ ದುರ್ದೈವ ಹಾಗೂ ದುರಂತ !

ಮಾಹಿತಿ - ಶಶಿಕಾಂತ ಶೆಟ್ಟಿ ಕಟಪಾಡಿ

64 ವಿದ್ಯೆಲು

       ‌                       64 ವಿದ್ಯೆಲು

ದೈವಾರಾಧನೆದ ಕಟ್ಟಡ್ ಭಜನೆ ಇಜ್ಜಿ

                  ದೈವಾರಾಧನೆದ ಕಟ್ಟಡ್ ಭಜನೆ ಇಜ್ಜಿ

"ಕಾರ್ ಡ್ ಗಗ್ಗರ,ಕೈಟ್ ಮಣಿ ಕಡ್ಸಲೆ,ಮೋನೆಗ್ ಅರ್ದಾಲ ,ತರೆಕ್,ಕೈದಂಡೆ ಕಾಜಿಗ್ ಕಾಡ ಕೇಪುಲ ಚೆಂಡ್ ,ತಾರೆ ತಿರಿತ ಅಣಿ ಸಿರಿಮುಡಿಟ್ ಸೂರ್ಯ ಚಂದ್ರೆರೊರುತ ಸಿರಿ ಸಿಂಗಾರ ಆದ್ ತೆಂಬರೆದ ಸೊರೊಕು,ಸಂಧಿ ಬೀರ ಬಿರ್ದಾಳಿ ,ಪೆರಿಯಾಕ್ಲೆ ಮದಿಪುದ ನಾಲ್ ಪಾತೆರೊಗು ಪದಿನಾಜಿ ಕಲೆಟ್ ಪರಿಪೂರ್ಣವಾದ್ ಲಕ್ಕ್ ದುಂತುನ ದೈವದ  ಬಲಿ ಸುತ್ತುಗು ಭಜನೆ ಇಜ್ಜಿ"

           ಒವ್ವೇ ಆರಾದನೆಲೆನ ನಡುಟು ಕೊರು-ದೆತೊನುನ ಕಿರಮ ದುಂಬುರ್ದೇ ನಡತೊಂದು ಬೈದ್ ನ ಇಚಾರ.ಪ್ರಕೃತಿಡ್ ಬದಲಾವಣೆ ಸಹಜ.ಅಂಚಾಂದ್ ಒಂಜಿ ಆರಾದನೆನ್ ಕುಡೊಂಜಿ ಆರಾದನೆ ಮೂಲ ತೆರಿಯಂದಿನಾತ್ ಸಂಪೂರ್ಣವಾದ್ ಬದಲ್ ಮಲ್ಪುನವು ತಪ್ಪು.ಮೂಲ ಆರಾದನೆ ನಾಶ ಆಂಡ ಅವೆತೊಟ್ಟುಗು ಬದ್ ಕೊಂತ್ ನ  ಜನೊಕ್ಲು ಗಳಸೊಂತ್ ನ ಭಾಷೆ, ಸೊತ್ತುಲು ಮಯಕಾಪುನೊಟ್ಟುಗು ಒಂಜಿ ಸಂಸ್ಕೃತಿ ನಾಶ ಆಪುಂಡು.ಸವ್ದೊಲು ಮಯಕಾಯಿನೆಕ್ ಒಂಜಿ ರಡ್ಡ್ ಉದಾರ್ಮೆ ತೂಲೆ.ವಾಮಜಾಮಂದ (ಪುಲ್ಯಕಲ) ತುಳು ಮೂಲ ಸವ್ದ ಮಯಕಾದ್ ಬ್ರಾಹ್ಮೀ ಮಹೂರ್ತ ಆಂಡ್.ರಮರಾತ್ರೆ (ನಡೀರ್ಲ್)  ಮೂಲ ತುಳು ಸವ್ದ ಪೋದು ಮಧ್ಯರಾತ್ರಿ ಆಂಡ್ .ಮೂಲ ದೈವದ ಪುದರ್ ಮಯಕಾಂಡ ಪೊಸತಾದ್ ದೈವೊಗು ಬತ್ತಿ ಪುದರ್ ನಮಕ್ ಇಚಿತ್ರ ಆದ್ ತೋಜುಂಡು .ಉದಾರ್ಮೆಗ್-ಬಬ್ಬರ್ಯೆ ಪೋದು ಬಾರ್ಬರಿಕೆ,ಅಬ್ಬಗ ದಾರಗ ಪೋದು ಅರ್ಬಕ ದಾರಕೇಶ್ವರಿ,ಜುಮಾದಿ ಪೋದು ಧೂಮಾವತಿ,ಮಲರಾಯೆ ಪೋದು ವಾರಾಹಿ-ಮೂಲು ಮೂಲ ಪುದರೇ ಇಜ್ಜಿ.ಅಪಗ ಮೂಲೊಡು ಪೆರಿಯಾಕ್ಲ್ ದೀನ ಪುದರ್ನ್ ಬುಡ್ದು ದೈವೊನು ಲೆತ್ತ್ಂಡ ಓಕೊನುವ?.ನನಲಾ ಕೊಡಿಯಡಿಟ್ ಪಾರಿ ಪಂಡಿತೆರ್ ಆ ದೇವೆರೆ ಕಾರ್ ಪತೊನ್ಲ,ಈ ದೇವೆರೆ ಕಾರ್ ಪತೊನ್ಲ ಪನೆರೆ ದೈವ ಮಲ್ತಿ ತಪ್ಪಾಂಡಲ ದಾದ?.ಸಂಧಿಪಾಡ್ದನದೊರುತ ದೈವೊನು ಮಂತ್ರ ತಂತ್ರೊಗು ಅಡವು ದೀವೊಂದುಲ್ಲ.ಇತ್ತೆನೇ ಬಡ್ಡಿ ಕಟ್ಟೊಂದುಲ್ಲ.ಈ ಪರಿಸ್ಥಿತಿ ನಮ ನಂಬೊಂದು ಬೈದ್ ನ ದೈವಾರಾದನೆದ ಕಲೊಕು ಬೈದ್ಂಡ್.ಒರಿನೆನಾಂಡಲ ದುಂಬುದ ಕಿನ್ನಿ ಕಿರ್ತಾಲೆಲೆಗ್ ಒರಿಪುನ ಜಬಾಬ್ದಾರಿ ತುಳುವ ಜವನೆರೆಗುಂಡು.  

    ದ್ರಾವಿಡ ಸಂಸ್ಕೃತಿದ ತುಳು ಧರ್ಮದ ತುಳುನಾಡ್ ಗ್ ದೇವೆರೆ ಆರಾದನೆ ಬರ್ಪುನ ದುಂಬು ಮೂಲು ಅವೈದಿಕ ದೈವಾರಾದನೆ ಇತ್ತ್ಂಡ್ ಪನ್ಪುನವು ಸತ್ಯ.ಸಂದಿ ಪಾಡ್ದನೊಲೆಡ್,ತೆಂಬರೆದ ಸೊರೊಕು ,ಪೆರಿಯಾಕ್ಲೆ ಮದಿಪುಗು ದೈವದ ಜೋಗ ಬರೊಂತ್ಂಡ್.ತೆಂಬರೆಡೇ ಬತ್ತ್ ದ್ ತೆಂಬರೆಡೇ‌ ಪೋಪುನ ದೈವೊಲೆ ಪೋಪುನ ದೈವೊಲೆಗ್(ಪಾತ್ರಿ) ಸಾಧಾರಣ ವಾದ್ಯೊಡು ವಸಾಯನೇ ಬರೊಂದಿಜ್ಜಿ.15 ನೇ ಶತಮಾನದ ದಾಸ ಸಾಹಿತ್ಯದ ಭಜನೆಲು ಬರ್ಪುನ ದುಂಬೇ ದೈವೊಲೆನ  ಆರಾದನೆಡ್ ಸಂಧಿ ಪಾಡ್ದನೊಲಿತ್ತ.ಅನಾದಿಡ್  ವಾ ದೈವದ ಕಲೊಟ್ಲ ಭಜನೆ ಇಜ್ಜಾಂಡ್.ಉಂದು ಒಂಜಾತ್ ವರ್ಸದ ಬುಳೆಚಿಲಾತೆ. ಗ್ರಾಮದ,ಸೀಮೆದ ರಾಜಂದೈವೊಲೆಗ್ ಸಂದಿ,ಬೀರ ದೈವದ ಉಟ್ಟು ಕಟ್ಟ್ ನ್ ಪಂಡ್ ದ್ ಜೋಗ ಬರ್ಪವುನ ಬದಲ್ ಬಜನೆಡ್ ಜೋಗ ಬರ್ಪಾಯೆರೆ ಸಾಧ್ಯನೇ ಇಜ್ಜಿ. ಭಜನೆಗ್ಲಾ ದೈವೊಗ್ಲಾ ಸಮ್ಮಂದ ಇಜ್ಜಿ.ಸಂದಿಗ್ಲಾ ದೈವೊಲೆಗ್ಲಾ ಸಮ್ಮಂದ ಉಂಡು.ಭಜನೆಗ್ಲಾ ದೇವೆರೆಗ್ಲ ಸಮ್ಮಂದ ಉಂಡು.ನಮ ದೇವೆರೆನ್ಲಾ ನಂಬುನಕುಲು,ದೈವೊನ್ಲಾ ಆರಾದನೆ ಮಲ್ಪುನಕುಲು.ಒವು ಕಟ್ಟ್ ಒವೆಕ್ ಪನ್ಪುನೆನ್ ಸರಿಯಾದ್ ತೆರಿದ್ ತೀರ್ಮಾನೊಗು ಬರೊಡು.ಅಂಚ ತೂಪುಂಡ ದೇವ ಯೋನಿಡ್ ಉದಿಪಂದಿ ದೈವೊಲೆಗ್ ಸಂಧಿ ಪಾಡ್ದನ ಉಪ್ಪುನಿ,ಅಲವುದ ಕಡ್ಸಲೆ,ಅಡ್ಕದ ಪೂ ದೀವೊಡಾಯಿನಿ.ಅಂಚಾದ್ ದೈವೊಲೆಗ್ ಪುರಾಣ ಸಮ್ಮಂದ ಇಜ್ಜಾಂಡ್.

      ದೇವಸಾನೊಡು ಎಂಚ ಮಂತ್ರ ಶ್ಲೋಕ ಪಂಡಲ ದೇವೆರ್ ಬರ್ಪುನ ಗೋಚಾರಾಪುಜಿ.ಆಂಡ ಸಂಧಿ ಪಾಡ್ದನ,ಮದಿಪುಗು ದೈವ ಕಲೊಕು ಬರ್ಪುನವು ವಸಾಯೊಡು ಗೋಚಾರಾಪುಂಡು.ಇನಿ ನಮ್ಮ ತುಳುನಾಡ ದೈವೊಲು ಧೂಮ್ರಾಕ್ಷನ್ ಕೆರ್ನ ಧೂಮಾವತಿಗೆ,ರಕ್ತಬೀಜಾಸುರನ್ ಕೆರ್ನ ರಕ್ತೇಶ್ವರಿಗೆ,ಚಂಡ ಮುಂಡೆರೆನ್ ಕೆರ್ನ ಚಾಮುಂಡಿಗೆ ,ಇಂಚ ದೈವದ ಕಲೊಕು ಪುರಾಣದ ಕಲ್ಪನೆ ಬತ್ತ್ ದ್ ಧೂಮಾವತಿಯಾಯೈ ನಮಃ,ವಾರಾಹಿಯಾಯೆಯೈ ನಮಃಂದ್ ಬತ್ತ್ಂಡ್.ಸಂಸ್ಕೃತದ ಜ್ಯೋತಿಷ್ಯ ಶಾಸ್ತ್ರೊಲೆಡ್ ತುಳುನಾಡ ದೈವೊಲ್ನ ಪುದರಿಜ್ಜಿ.ಸಂಸ್ಕೃತ,ಸಂಸ್ಕೃತಿದ ಅನುಕರಣೆಡ್ದಾದ್ ಇಂಚಾವೊಂದುಂಡು.ತುಳುನಾಡ ಪೆರಿಯಾಕ್ಲು ದೈವೊನು ನಂಬುದು ದೀನ ಪುದರ್ ತುಳುವೆರೆಗ್ ಯಾರು.ಕನ್ನಡ,ಸಂಸ್ಕೃತದಕ್ಲು ನಮ್ಮ ದೈವೊಲೆಗ್ ಪೊಸತ್ ಪುದರ್ ದೀದ್ ಪ್ರಮಾಣ ಪತ್ರ ಕೊರ್ಪುನ ಅಗತ್ಯ ಇಜ್ಜಿ.ಇನಿ ಸಂಸ್ಕೃತ ಮಂತ್ರ ಶ್ಲೋಕದ ಬೆರಿಕ್ ಬಜನೆಲಾ ದೈವದ ಕಲೊಕು ಸೇರೊಂಡ್. ದೇವೆರೆಗ್ ಭಜನೆ,ದೇವೆರೆಗ್ ಸಂಧಿ ಪಾಡ್ದನ ಇಜ್ಜಿ.ಮಂತ್ರ,ಶ್ಲೋಕೊಲು ಉಪ್ಪುನಿ.ತಂತ್ರ ಮಂತ್ರೊಲಿಜ್ಜಂದಿ ದೈವದ ಕಲೊಟು ಇನಿ ತಂತಿರ್ದಾರ್ ಇಜ್ಜಂದೆ ದೈವೊಲೆಗ್ ವಸಾಯ ಬರೊಂದಿಜ್ಜಿ ಅಕ್ಲ್ ದೇವೆರೆ ಆರಾದನೆದ ಮಂತ್ರೊಲೆನೆ ದೈವೊಗ್ಲ ಪನೊಡಾತೆ.ದೇವೆರೆಡ್ ಶಿವನ ಮಂತ್ರ ,ಮೃತ್ಯುಂಜಯ ಮಂತ್ರ ,ಓಮೊಗ್ಲ,ಪೂಜೆದ ಆರಾದನೆದ ಕಿರಮೊಗ್ಲಾ,ವಿಷ್ಣುನ ಮಂತ್ರ,ಸುದರ್ಶನ ಓಮೊಗ್ಲ,ದೇವಿನ ಮಂತ್ರೊಗ್ಲ,ಚಂಡಿಕಾ ಯಾಗೊಗ್ಲ ಕಿರಮೊಲೇ ಬೇತೆ ಬೇತೆ.ದೇವೆರೆ ಆರಾದನೆಡೇ ಇಂಚ ಉಪ್ಪುನಗ ದೇವೆರೆ ಕಲತ ಇಚಾರೊನು ದೈವದ ಕಲೊಕು ಕನತ್ಂಡ ಏತೆನ ಮಟ್ಟ್ ಡ್ ಸರಿಯಾವು?.

    ಅಂಚನೆ ದೈವೊಲೆ ಸಂದಿನ್ ದೇವೆರೆ ಮಂತ್ರ ಮಲ್ಪೆರೆ ಆಪುಂಡೇ.ದೈವೊಲೆಗ್ ವಾ ಬೀಜ ಮಂತ್ರಲ ಇಜ್ಜಿ.ಅಂಚನೆ ದೇವೆರೆ ಮಂತ್ರ,ಶ್ಲೋಕೊಲೆನ್ ದೈವದ  ಕಲೊಕು ಕನಯೆರಾಪುಜಿ.ವಾ ವೇದ ಪುರಾಣೊಲೆಡ್ಲಾ ದೈವಾರಾದನೆದ ಉಲ್ಲೇಖ ಇಜ್ಜಿ. ದೇವೆರೆಗ್ ವಸಾಯ ಇಜ್ಜಿ.ಜನೊಕ್ಲೆಗ್ ದೇಲ್ಯದ ಉಲಯಿ ಪೊಯೆರೆ ಅವಂದಿನೆಕ್ ದೇವೆರೆ ಮೂರ್ತಿನ್ ಜನೊಕ್ಲೆಗ್ ತೂಯೆರೆ ಬೋಡಾದ್ ದೇವೆರೆ ಮೂರ್ತಿ ತುಂಬುನಾರ್ ಮೂರ್ತಿ ತುಂಬೊಂದು ದೇವಾಲ್ಯೊದ ಸುತ್ತು ಬನ್ನಗ  ದೇವೆರೆನಉಚ್ಚಯ ಮೂರ್ತಿದ (ಪ್ರ)ದರ್ಶನ ಬಲಿ ಉಪ್ಪುನಿ.ಅಪಗ ವಾದ್ಯೊಲು ಚೆಂಡೆಲುಪ್ಪುವ ವಿನಃ ಓಲ್ಲ ಬಜನೆ ಪನೊಂದು ದೇವಸಾನೊಗು ಬಲಿಸುತ್ತು ಬರ್ಪುಜೆರ್.ಬೊಕ ದಾಯೆ ದೈವದ ಸಾನ ಬಲಿ ಸುತ್ತುಗು ಬಜನೆ ಪನೊಂದು ಬಲಿ ಬರೊಡು?.

  ದೈವದ ಅಣಿತ ದಂಡೆಮಾಲೆ ದೇವೆರೆ ಉಚ್ಚಯದ ಬಲಿಮೂರ್ತಿಗ್ಲಾ ಬೈದ್ಂಡ್.ದೇವಾಲ್ಯದ ಎದುರುಪ್ಪುನ ಬಲಿಕಲ್ಲ್/ಬಲಿ ಪೀಠಂದ್  ಒಂಜಿ ಕಾಲೊಡು ನೆತ್ತೆರಾವಾರದ ಬಲಿ ಪಡೆಯೊಂದಿತ್ತ್ ದ್ ಕಾಲಾನುಬಾಗೊಡು ಅವು ಉಂತ್ ದ್ ಪೋತ್ಂಡ್.ದೇವೆರೆಗ್ ಪಾರಿ/ಮಧು ಪನೆರೆ ಇಜ್ಜಿ.ದೇವೆರೆಗ್ ಪೂಜೆ ಪುನಸ್ಕಾರ ಮಾತ್ರ.ಏರಾ ದೈವದ ಕಲೊಟು ಭಜನೆ ಮಲ್ಪುವೆರ್ಂದ್ ಅವೆನ್ ನಮ ಒತ್ತೊನೊಡುಂದು,ಅವೆನ್ ನಮಲ ಮಲ್ಪೊಡುಂದು ದಾಲ ಇಜ್ಜಿ.ನಿಜವಾದ್ ಬಜನೆ ಸುರು ಮಲ್ತಿ ಬೊಕ್ಕ ಮಂಗಲ ಆವಂದೆ ಬಜನೆ ಮುಗಿಪೆರೆ ಬಲ್ಲಿ.ಆಂಡ ದೈವದ ಕಲೊಟು ದೈವದ ಅಣಿ,ಸಿರಿ ಮುಡಿಯೇರ್ದ್,ಮುಗ ದೀದ್,ಮುಗ ಏರ್ದಿಪ್ಪುನಗ ಒಂಜಿ ರಡ್ಡ್ ಸುತ್ತು ಭಜನೆ ಮಲ್ತ್ ದ್ ಅರ್ದೊಡೆ ಬುಡ್ಂಡ ಅವೆಕ್ ಅರ್ಥನೇ ಇಜ್ಜಿ.ದೈವ ಬೊಕ್ಕ ಆವಾರಾದ್,ನುಡಿಕಟ್ಟಾದ್,ಬೂಲ್ಯ ಕೊರ್ದು ದೈವದ ಪದಿನಾಜಿ ಕಟ್ಲೆದಲೆಕನೆ ವಸಾಯ ಬಿರಿಯುನಿ.ನಡುಟು ಬಜನೆ ಕನತ್ ದ್ ಮೊಕ್ಲು ದಾದ ಮಲ್ಪೆರೆ ಪಿದಡ್ದೆರ್ಂದ್ ಅರ್ಥ ಅಪುಜಿ. ರಾಜಂದೈವದ ಕಲೊಟು ದೈವ ಇಜ್ಜಿಂಡ ಗಡಿ ಪತ್ತ್ ನಾರೆಗ್ ಬೂಲ್ಯ ಕೊರ್ಪುನ ಅಧಿಕಾರ ಇತ್ತ್ ನಡೆ ಆ ಜಾಗೆನ್ ಬೇತೆಕ್ಲ್ ಉಳಕೈ ಮಲ್ತೊಂದೆರ್.

   ನಾಗಮಂಡಲ ಇಂಚಿಪ್ಪದವು.ನಾಗನ್ ದೇವೆರಾದ್ ತೂಯಿನಕುಲು ಭಜನೆ ಮಲ್ತ್ಂಡ ಏರ್ಲ ಕೇನುಜೆರ್.ದಾಯೆ ಪಂಡ ವಸಯೊಗುಂತುನಕುಲು ಬೇತೆ.ದೈವಾರಾದನೆ ಪನ್ಪುನವು ನಾಗ ಮಂಡಲ ಅತ್ತತ್ತೆ.ನಾಗನ್ ದೇವೆರ್ ಮಲ್ತಿ ಕಲೊಟು ಡಕ್ಕೆ ಬೊಟ್ಟೊಂದು ಬಜನೆ ಪನೊಂದು ವೈದ್ಯೆ ಬೊಕ್ಕ ನಾಗ ಕನ್ನಿಕೆ ಮಂಡಲೊಗು ಸುತ್ತು ಬರ್ಪೆರ್.ಅಂಚಾಂದ್ ಅವೈದಿಕ ದ್ರಾವಿಡ ತುಳುವೆರ್ ಆದಿಡ್ದೇ ನಾಗನ್ ದೈವ ಅದ್ ನಂಬಿನಕುಲ್ನ ನಾಗ ಕೋಲ,ಸರ್ಪಕೋಲೊಡು,ಕಾಡ್ಯ ನಾಟೊಡು ಏರ್ಲ ಭಜನೆ ಪನ್ಪುಜೆರ್.ದಾಯೆ ಪಂಡ ಬಜನೆಗ್ಲಾ ಅವೆತನೇ ಆಯಿನ ಜಾಗೆ,ಕಟ್ಟ್ ಪಾಡ್ ಲುಲ್ಲ.ದೈವಾರಾದನೆ ಪನ್ಪುನವು ನಾಗ ಮಂಡಲೊರ್ದು ಅವ್ವೇತೋ ಪಿರಾಕ್ ದವು.ಆಯಾಯ ಕಲೊಕು ಇಂಚಿತ್ತ್ ನವೇ ಕಟ್ಟ್ಂದ್ ಉಪ್ಪುನಗ ಒಂಜೆತ ಕಟ್ಟ್ ನ್ ಕುಡೊಂಜಿ ಕಲೊಕು ಕನಪುನವು ತಪ್ಪು.

    ದೈವದ ಕಲೊಟು ಅನಾದಿಡ್ದೇ ಮಡ್ಯೆಲೆರ್ ಏಳ್ ಬಗೆತ ಸೊತ್ತುಲೆನ್ ಪಾಡ್ ದ್ ಮಲ್ತೊಂತಿ ಕೂಚಿ ನೀರ್ ದ ತಲಿಪು, ಅಕುಲು ಪಾಡೊಂತ್ ನ ದಲ್ಯೊರ್ದು/ಬೊಲ್ದು ಕುಂಟುರ್ದು ಮಲ್ಲ ಸುದ್ದ ನನೊಂಜಿಜ್ಜಾಂಡ್.ಇನಿ ಅಡೆ ಮಂತ್ರೊಲು ಬತ್ತ್ ದ್ ಅವೆಟ್ ಸುದ್ದ ಮಲ್ಪುವ ಪಂಡೆರ್ಡಲಾ ಇನಿಕ್ಲಾ ದೈವದ ಕಲೊಕು ಮಡ್ಯೆಲೆರ್ ಪಾಡುನ ದಲ್ಯನೇ ಸುದ್ದ.ಮೂಲೊಡು ಅಕುಲು ತುಳು ಧರ್ಮದ ಪರೋಯಿತೆರಾದಿತ್ತೆರ್.ಸೂತಕೊಲೆನ್ ಅಕುಲೇ ಸುದ್ದ ಮಲ್ತೊಂತೆರ್.ದೈವದ ಪೂಪೂಜನೆ,ತಂತ್ರಗಾರಿಕೆಲೆನ್,ಕರಿಪುನೆನ್ ಪೂರಾ ಪೂಜಾರಿಲು ನಡಪಾವೊಂತೆರ್.ಸಾನ ಕಟ್ಟ್ ನಗ ಆಚಾರಿಲು ಪೆಲತ ಕುಟ್ಟಿಲೆನ್ ಪಂಡ ಆ ಕುಟ್ಟಿಲೆಗ್ ಪೇರ್ ಮೈತ್ ದ್ ಪೇರ್ ಕುಟ್ಟಿಲೆನ್ ಪಾಡೊಂತೆರ್ಡ ಅಡೆಗಿನಿ ಕೆಸರ್ ಕಲ್ಲ್ ಬೈದ್ಂಡ್.ದೈವೊಲೆನ್ ನಂಬಂದಿ ಸುಬ್ರಹ್ಮಣ್ಯನ ಆರಾದಕೆರಾಯಿನ ಕೇರಳ ಅಷ್ಟಮಂಗಲ ಪ್ರಶ್ನೆ ದೀಪುನಕ್ಲೆಗ್ ತುಳುನಾಡ ದೈವೊಲೆ ಬಿಲೆ ತೆರಿದಿಜಿ.ಇನಿ ಕೊಡಿ ಏರುನವು ಧ್ವಜಾರೋಹಣ ಆಂಡ್,ದೈವದ ಬಂಡಿ ಒಯ್ಪುನಗ ಕೊಡಿ ಏರ್ನಗ,ಕಡೆಕ್ ದೈವ ಸಾನದೊಕ್ಕೆಲ್ ಗ್ಲಾ ಗೋವಿಂದ ಪಾಡುಲೆಕಾಂಡ್.ದೊಂಪ ಏರಾವುನವು ಚಪ್ಪರ ಪ್ರತಿಷ್ಠೆ ಆಂಡ್ .ಆಯಾಯ ಕಟ್ಟ್ ಕಟ್ಲೆಲು ಅಕ್ಲಕ್ಲೆ ಪೆರಿಯಾಕ್ಲೆ ಕಾಲೊರ್ದೇ ಬತ್ತ್ ನವು.ಅವು ಇನಿ ಕೋಡೆದ ಬುಲೆಚಿಲತ್ತ್.ಅವೆನ್ ನಾಶ ಮಲ್ಪುನ ಅಧಿಕಾರಲ ಏರೆಗ್ಲ ಇಜ್ಜಿ.ಉದಾರ್ಮೆಗ್ ದೇವೆರೆಗ್ ಪಂಚಾಮೃತ ಮಲ್ತ್ಂಡ ದೈವೊಲೆಗ್ ಅಮುರ್ತಂದ್ ಪುಡೆ/ಬುಳೆ ಕಲಿ ದೀಪ.ದೇವೆರೆ ಆರಾದನೆಗ್ ಅವೆನ್ ದೀಯೆರಾಪುಜತ್ತೆ.ಅಂಚನೇ ದೈವೊಲೆಗ್ ಪಜಿ ಕೋರಿದ ನೆತ್ತೆರ್ ಬಿಂದು,ಅಗೆಲ್ ಕೊರ್ಪ.ದೇವೆರೆಗ್ ಅವೆನ್ ಮಲ್ಪೆರಾಪುಂಡೇ.

       ಜುಮಾದಿನ ನುಡಿಟ್ ಬಾಯಿಡ್ ಮದುಮಾಸ ಪನ್ಪಿ ಸಾಲ್ ,ನಾಲ್ ಕೈಟ್ ನಾಲ್ ಆಯುದೊಲೆನ್ ಪತೊಂದು ಬತ್ತೆ ಪನ್ಪುನ ಸಾಲ್ ತೂನಗ ದೈವಾರಾದನೆ ಪನ್ಪುನವು ತಾಮಸಿಕ ಆರಾದನೆ ,ಅಂಚನೆ ವೀರೆರೆ ಆರಾಧನೆಂದ್ ಲ ಒತ್ತೊನೊಲಿ .ತೂಂಕನದ ಉಜ್ಜಾಲ್ ಬಯಕಂದೆ,ಬೊಳ್ಳಿದ ಸತ್ರ ಕೇನಂದೆ ಮನಬಗ್ತಿಗ್ ಎರಿಯಾಕ್ಲೆ ಬೈರಾಸ್ ದ ನೀರಿ ಸೆರಂಗ್ ಪತೊಂದು ಬತ್ತಿ ದೈವೊಲೆಗ್ ಪ್ರತಿಯೊಂಜೆಕ್ಲಾ ಹಿರಿಯೆರ್ ಇಂಚಿನವೇ ಕಟ್ಟ್ಂದ್ ಮಲ್ತ್ ದಿತ್ತೆರ್.ಇನಿ ಬೆಚ್ಚ ನೆತ್ತೆರ್ದ ಜವನೆರ್ ತೆರಿದಾ,ತೆರಿಯಂದೆನಾ ಅತ್ತ್  ದಾದಾಪುಂಡು ತೂಕಂದ್ ದೈವದ ಕಲೊಕು ಪೊಸ ಪೊಸ ಇಚಾರೊಲೆನ್  ಕನತ್ ದ್ ಅವೆಕ್ ಪೂರಕವಾದ್ ಪೊಸ ಪೊಸ ಆದ್ಯಾತ್ಮ ಚಿಂತನೆಲೆನ್ ಕನತ್ ದ್ ಮೂಲ ಕಟ್ಲೆನ್ ಪೊಲಿತೊಂದುಲ್ಲೆರ್.ನಮ್ಮ ಎರಿಯಾಕ್ಲ್ ನಮ ಏರೆನ್ ಆರಾಧನೆ ಮಲ್ಪುವನಾ ಅಕ್ಲೆನ್ ಸೇರುವಂದ್ ನಂಬಿನಕುಲು.ದೇವೆರೆ ಆರಾದಕೆರ್ ದೇವೆರೆನ್ ಸೇರ್ದ್ ಮೋಕ್ಷ ಪಡೆಪೆರ್ ಗೆ.ದೈವೊನು ಆರಾದನೆ ಮಲ್ಪುನಕುಲು ದೈವದ ಕೈಕ್ ಸೇರುವೆರ್.ಜೂವೊಡುಪ್ಪುನಗ ಮೂಲು,ಸೈತ್ಂಡ ಬೆಮ್ಮೆರೌಲು ಪಂಡ್ ದ್ ನಂಬಿನಕುಲು ತುಳುವ ಪೆರಿಯಾಕ್ಲು.

     ಇದ್ಯೆ ದಾಂತಿ ಮೂಲದ ತುಳುವೆರ್ ಮನ ಬಗ್ ತಿಡ್ ಅಕ್ಲ್ ಉನ್ಪುತಿನ್ಪುನೆನ್ ಸುದ್ದಾಚಾರೊಡು ದೈವೊಗು ದೀದ್ ಆರಾದನೆ ಮಲ್ತೆರ್ ವಿನಃ ಅಕ್ಲೆಗ್ ಬರವೇ ಇಜ್ಜಾಂಡ್,ಬೊಕ್ಜ ದಾದ ಶ್ಲೋಕ ಪನೆರೆ ಅಕ್ಲೆಗ್ ಸಾಧ್ಯ?.ಅಕುಲು ನೇಮೊಗು ಗಾಂಡ್ ಗೌಜಿ ಮಲ್ದ್ ಜೆರ್.ಕುಪ್ಪೆ ಪಂಜುರ್ಲಿನ ನುಡಿ ಕೇಂಡ ಅವು ನಮಕ್ ಅರ್ಥ ಆಪುಂಡು."ನಿಕುಲು ಪಾಡಿ ಪಲಾರಿಗ್ ಎಂಕುಲು ದೈವಾದೀನ ಆದ್ ಕುಲ್ಲ್ ನಗ  ತೂಂಕನದ ಉಜ್ಜಾಲ್ ಕೇಂಡನಾ,ಇಜ್ಜತ್ತೆ,ಬೊಳ್ಳಿದ ಸತ್ರ ಕೇಂಡನಾ ಇಜ್ಜತ್ತೆ,ದೈವಾದೀನ ಬಯಕ್ ದ್ ನಿ ಪಜಿ ಕೋರಿಗ್ಲಾ,ಪುಡೆ/ಬುಳೆ ಕಲಿಕ್ಲ.ಪುಡೆಕಲಿಕ್,ಪಜಿಕೋರಿಗ್ ದೈವಾದೀನ ಬಯಕ್ ದ್ ನಿಕ್ಲೆ ಹಿರಿಯಾಕ್ಲೆ ಸೆರಂಗ್ ಪತ್ ದ್ ಬೈದ್ ನ ದೈವ ಯಾನ್"ಪಂಡ್ ದ್ ದೈವ ಪನ್ಪುಂಡು.ಉಂದೆನ್ ತೂನಗ ದೈವಾರಾದನೆ ತಾಮಸಿಕ ಆರಾದನೆಂದ್ ಸ್ಪಷ್ಟವಾದ್ ತೆರಿಯುಂಡು.ನಮ್ಮ ಪೆರಿಯಾಕುಲು ದೈವೊಲೆಗ್ ಬಾರ್ನೆಗ್ ಕೋರಿ,ಅಸರ್ ಗ್ ಅಮುರ್ತ ದೀವೊಂತೆರ್ .ದೈವ ತನ್ನ ಮೂಲ ಕಟ್ಲೆನ್ ಕಲೊಟು ನೆಂಪು ಪುಟ್ಟಾವೊಂದುಂಡು.ಅತ್ತಂದೆ ಎಂಚ ದೈವೊಲೆನ್ ಕಟ್ಟ್ ಕಟ್ಲೆದ ಆಧಾರೊಡು ಆರಾದನೆ ಮಲ್ಪೊಡುಂದುಲಾ ಪಂಜುರ್ಲಿನ ಸಂಧಿಡುಂಡು.ಇಂಚಿನ ದೈವದ ಮೂಲ ಕಟ್ಲೆನ್ ತೆರಿಂಡ ಖಂಡಿತಾ ನಮ ಭಜನೆನ್ ದೈವ ಕಲತ ಬಲಿಸುತ್ತುಗು ಕನವಯ .

     ಆಂಡಲಾ ನಮ ಇನಿ ಮಂತ್ರ ತಂತ್ರದ ವೈದಿಕದಂಚಿ ದೈವಾರಾದನೆನ್ ಕೊನೊವೊಂದುಲ್ಲ.ದೈವೊಲೆನ್ ದೇವೆರ್ ದೇವಿ ಮಲ್ತೊಂದು ಪೋಂಡ ಅಡೆ ಗುತ್ತು,ಬರ್ಕೆ,ಗಡಿಪತ್ತ್ ನಾರ್,ಮುಕ್ಕಾಲ್ದಿ ಪೂರ ಬೊಡ್ಚಿ.ಒರಿ ಪೂಜೆದಾರ್ ಇತ್ತ್ಂಡ ಯಾವು .ದೈವಸಾನೊಲೆಗ್ ಬ್ರಹ್ಮಕಲಶ ಬತ್ತ್ ದ್ ದುಂಬುನಾನಿ ರಾತ್ರೆ ದೈವದ ಭಂಡಾರ ಬಾರೀ ಗೌಜಿಡ್ ಕಿರ್ವಾಲ್ದೊಟ್ಟುಗು ಬತ್ತ್ ದ್ ಬ್ರಹ್ಮ ಕಲಶ ಆಪುನ ಜಾಗೆಡ್ ಬತ್ತಿ ಕಿರ್ವಾಲ್ಲೆನ್ ಪಂಡ ಮುಗ ಮೂರ್ತಿನ್ ಮಣಿ ಕಡ್ಸಲೆನ್ ಬ್ರಹ್ಮ ಕಲಶ ಮಲ್ಪುನಕುಲು ರಾಗಿದ ತಲೆಂಬುದ ಮಿತ್ತ್ ದೀದ್, ಕದಳಿದ ಕಾಯಿದ ಕೈಲ್ ಗ್ ದೈವದ ಕಡ್ಸ ಲೆ ಒರಗದ್ ದೀದ್,ದೈವದ ಮುಗೊಕು ಕೆಂಪು ಕುಂಟು ಮುಚ್ಚಿದ್ ದೀನೆನ್ ತೂನಗ ದೈವಾರಾದಕೆರೆ ಬಂಜಿ ಪೊತ್ತಂದೆ ಕುಲ್ಲಂದ್.ರಾಗಿದ ತಲೆಂಬುದ ಅಡಿಟ್ ಕ್ರಮವಾದ್ ದಾಸೆಮಿ,ಅವೆತ ತಿರ್ತ್ ಎಣ್ಮೆ, ಅವೆರ್ದ್ ತಿರ್ತ್ ಬೊಳಂತೆ,ಅವೆತ ತಿರ್ತ್ ಬಾರ್ ಇಂಚ ಅಟ್ಟಿ ಕಟ್ಟುವೆರ್.ಇಂಚ ಪೂರ ಚರವಾಯಿನ ಮಾಯೆರ್ದ್ ಜೋಗೊಗು ಬರ್ಪುನ ದೈವೊಲೆಗ್ ಮಲ್ಪುನ ಕಿರಮ ದುಂಬು ಇಜ್ಜಾಂಡ್ .ದೈವದ ಕಟ್ಟ್ ಕಟ್ಲೆನ್ ಮದತ್ ದ್ ಕಟ್ಟುನಾಯೆ,ಕಟ್ಟಾವುನಾಯೆ,ಮದಿಪುದಾಯೆ,ಮನೆಚ್ಚಿಲ್ದಾಯೆ,ಒರಿನ ಚಾಕಿರಿದಕ್ಲು ಕಲೊಟು ತಪ್ಪಾನಗ ಮನಿಪಂದೆ ಕುಲ್ದು ಮಾತೆರ್ಲ ಅಪರಾದಿಲಾತ. ಪೊಸ ಪೊಸತ್ ನ್ ದೈವದ ಕಲೊಕು ಕನತ್ ನಕ್ಲೆಗ್ ದಾದ ಲಾಬಂದ್ ತೆರಿಯಂದ್.ಇಂಚನೇ ಆಂಡ ನಿಧಾನವಾದ್ ದೈವಾರಾದನೆ ಮಾತ್ರ ನೆಲ ತುಚ್ಚುನವು ನೂದೆಕ್ ನೂದು ಸತ್ಯ.ಇತ್ತಿತ್ತೆ ದೈವದ ಕಾಲಾದಿದ,ವರ್ಸಾದಿದ ಕಟ್ಟ್ ಪೋದು ವಾರ್ಷಿಕ ಪೂಜೆಯಾತ್ಂಡ್.ಉಂದು ದೈವೊನು ನಿದಾನವಾದ್ ದೇವೆರ್ ಮಲ್ಪುನ ಉನ್ನಾರ.ದೈವದ ಬಂಡಿ ಒಯ್ಪುನಗ ದೈವೊಗು ದೇವೆರೆ ಗೋವಿಂದ ಪಾಡುನವು ತುಳುವೆರ್ ದೈವೊನು ಮದತೊಂದಿಪ್ಪುನೆಕ್ ಸಾಗ್ಸಿ

    ನಮ ಆಟ,ನಾಟಕ,ಮೆರವಣಿಗೆಡ್ ದೈವಾರಾದನೆದ ದಾದಾಂಡಲ ತೋಜಿಂಡ ಅಕ್ಲೆನ್ ಮಿತ್ತ್ ತಿರ್ತ್ ಮಲ್ಪುವ.ದೈವಾರಾದನೆದ ಇಡೀ ಮುದೆಲ್ನೇ ಮೂಲ ಕಟ್ಲೆ ಪೊಲಿತ್ ದ್ ಒಕ್ಕೊಂದಿಪ್ಪುನೆನ್ ಕೇನುಜ.ಅಂಚನೆ ದೈವದ ಕೈಟುಪ್ಪೊಡಾಯಿನ ಜೀಟಿಗೆನ್ ದೇವೆರೆ ದರ್ಶನ ಬಲಿಕ್ ಪತ್ತುನಡೆಮುಟ್ಟ ವ್ಯವಸ್ಥೆ  ತತ್ತ್ ದ್ಂಡ್.ದೈವದ ಬಗೆಟ್ ಸತ್ಯದ ಇಚಾರ  ಪಂಡ ನಿಕ್ಲೆನವು ಸಂಕುಚಿತ ಮನೋಭಾವ ಪನ್ಪೆರ್.ಬುಡು ಉಡಲ್ದಕುಲು/ವಿಶಾಲ ಹೃದಯಿಲು ಏಪಲಾ ಅಂಚ ಪನಯೆರ್.ನಮಕ್ ಮಾತಲ ಬೋಡುಂದು ಕನತ್ ಪಾಡ್ಂಡ ಅವ್ಲು ದಾದಾಂಡಲ ಒಡಕ್ ಬರು.ಅತಿಯಾಂಡ ಅಮುರ್ತಲ ಇಸ ಆವು.ದೈವದ ನುಡಿತಲೆಕ ದೈವ ಮೊರೆತ್ ನಾಯನ್ ಮುಕ್ಕಾವು,ಕಲತ್ ನಾಯನ್ ಕಕ್ಕಾವು,ಅರೆತ್ನಾಯನ್ ನಕ್ಕಾವು. ಪೆರಿಯಾಕ್ಲು ದಾಲ ಬೇಲೆ ಇಜ್ಜಂದೆ ದೈವೊಲೆಗ್ ಇಂಚಿನವೇ ಕಟ್ಲೆಂದ್ ದಾಲ ಮಲ್ದ್ ಜೆರ್.ಪರತ್ ನ್ ನಿಗಿಪಡ,ಪೊಸತ್ ನ್ ತೋಡಡಂದ್ ದೈವನೇ ಪಂಡಿ ಪಾತೆರ ಜನೊಕ್ಲು ಮದತ್ ಲೆಕ ತೋಜುಂಡು.

       ಪೆರಿಯಾಕ್ಲ್ ಮಲ್ತಿ ಕಟ್ಲೆನ್ ದುಂಬೊತ್ತೊಂದು ಪೋಯೆರೆ ನಮ ಮಾತೆರ್ಲ ತಯಾರಾವೊಡು. ದೇಲ್ಯೊಲೆಡ್ ಭಜನೆ ಮಲ್ಪೊಲಿ.ಆಂಡ ದೈವದ ಕಲೊಟು ಬಜನೆ ಪನೆರೆ ಇಜ್ಜಿ.ದೇವೆರೆ ಬಜನೆನ್ ಮೂಜಂಜೊಗು ಇಲ್ಲದ ದೇವೆರೆ ಕೋಣೆದುಲಯಿ ಮಾತೆರಪ್ಪ ಮೀದ್ ಒಟ್ಟುಗು ಕುಲ್ಲುದು ತಾಳ,ತಮ್ಕಿ ಬೊಟ್ಟೊಂದು ಬಜನೆ ಮಲ್ತೊಂತ. ಬಜನೆನ್ ಪನ್ಪುನ ಜಾಗೆಡೆ ಪನೊಡು.ತೊಲಸಿ ಕಟ್ಟೆದ ಎದುರು ದುಂಬು ಮಲ್ಲ ತುಡರ್ ದೀದ್ ಅವೆತ ಸುತ್ತು ಬರೊಂದು ನಲಿತೊಂದು ಬಜನೆ ಪನೊಂತ.ಅಂಚನೇ ದೇವಸಾನದ ಜಗಲಿಡ್ ಕುಲ್ಲುದು ಬಜನೆ ಪನೊಂತ.ತಿಕ್ ನೌಲು ಪೂರ ದುಂಬು ಬಜನೆ ಪನೊಂದಿಜ್ಜಾಂಡ್ .ಬಜನೆ ಪನೊಂದು ದೇವಸಾನೊಗು ಸುತ್ತು ಬರೊಂದಿಜ್ಜಾಂಡ್.ದುಂಬುಗು ದೈವಸಾನದ ಕೈತಲುಪ್ಪುನ ಯುವಕ ಮಂಡಲೊಡು ಬಜನೆ ಪನ್ಪುನ ಕಿರಮ ಸುರಾಂಡ್.ಕಾಲಾನು ಭಾಗೊಡು ದೈವದ ಸಾನೊಲೆಗ್ ಪೊಸತೊಂಜಿ ಭಜನಾಮಂಡಳಿ ಬತ್ತ್ ದ್ ಸುರುಕು ಚಾವಡಿಡ್ ಕುಲ್ಲುದು ಬಜನೆ ಪನೊಂತ್ ನಕುಲು ದೈವದ ಕಲ ಜತ್ತ್ ದ್ ದೈವದ ಬಲಿಸುತ್ತುಗು ಬಜನೆ ಪನೆರೆ ಸುರು ಮಲ್ತೆರ್ .ಇತ್ತೆ ಬಜನಾ ಮಂಡಲಿದ ಕೆಲವೆರ್ ದೇವೆರೆ ಜಾಗೆಡ್ಲಾ ದೈವದ ಬಜನೆ ಪನೊಂದುಲ್ಲೆರ್.ಬಜನೆಡ್ ಒವೆನ್ ಓಲು ಪನೆರೆ ಬಲ್ಲಿ ಪನ್ಪಿ ಸಾಮಾನ್ಯ ಜ್ಞಾನ ನಮಕ್ ಬೋಡು.ಆಂಡ ದೈವಾರಾದನೆಗ್ಲ  ಬಜನೆಗ್ಲ ವಾ ಸಮ್ಮಂದಲ ಇಜ್ಜಿ.  ವೈದಿಕ ಪೂರ್ವ ದೈವಾರಾದನೆಡ್ ಬಜನೆ ಓಲ್ಲಾ ಇಜ್ಜಾಂಡ್.ಭಜನೆಲು ದಾಸ ಸಾಹಿತ್ಯದ ಕೊಡುಗೆ ಆತೆ.ಅವೆರ್ದ್ ದುಂಬೇ ತುಲುವೆರ್ ಅಕ್ಲೆಗ್ ತೆರಿಮಟ್ಟ್ ಡ್  ದೈವಾರಾದನೆ ಮಲ್ತೊಂದು ಬೈದೆರ್.

         ದೈವೊಲು ದೇಲ್ಯೊಲೆನ್ ಕಾಪುನ ಕ್ಷೇತ್ರಪಾಲೆರ್ಲ ಅತ್ತ್.ದೇವೆರೆ ಅಂಶೊಡು,ದೇವ ಯೋನಿಡ್ ಉದಿತ್ ನವ್ಲ ಅತ್ತ್,ದೇವೆರೆ ಪರಿವಾರ ಸಗ್ತಿಲುಂದು ಚಾಕಿರಿ ಮಲ್ಪುನವ್ಲ ಅತ್ತ್.ದೈವೊಲು ತುಳುನಾಡ ಮಣ್ಣ್ ಡ್ ಉದಿತ್ ನ ಸ್ವತಂತ್ರ ಸಗ್ತಿಲು,ತಪ್ಪು ಮಲ್ತ್ ನಾಯನ್ ನಿಗ್ರಹ ಮಲ್ಪುನ,ನಂಬಿನಾಯಗ್ ಅನುಗ್ರಹ ಮಲ್ಪುನ ದೈವೊಲು ಏರೆನ ಚಾಕಿರಿದವತ್ತ್.ಅವೆತ ಗಡು ಉಪ್ಪುನ್ನೇ ತುಳುನಾಡ ಭಾಗೊಲೆಡ್ ಮಾತ್ರ.ನಮಕ್ ಸುರುಕು ಇತ್ತ್ ನಿ ದೈವೊಲು. ಬೊಕ್ಕ ತುಳುನಾಡ್ ಗ್ ದೇವೆರೆ ಆರಾದನೆ ಬೈದ್ ನಿ.ತುಳುವೆರೆಗ್ ತಲಿಪು ಇತ್ತ್ ದ್ ಬೆಮ್ಮೆರೆ ತಲಿಪಿನಿ ಬ್ರಹ್ಮಾರ್ಪಣೆಯಾಂಡ್.ತುಳುವೆರೆಗ್ ಸೀರ್ತ,ಪುಣ್ಯಾರ್ಚನೆ ಇಜ್ಜಾಂಡ್.ಉಜೆ ಬಸ್ಮದ ತಲಿಪಿತ್ತ್ಂಡ್.ನಮ್ಮ ತಲಿಪು ಅವ್ಲು ಪ್ರೋಕ್ಷಣೆಯಾಂಡ್.ನಮ ದೈವ ದೇವೆರ್ ಪನ್ಪುನೆಟ್ಲಾ ಈ ಇಚಾರ ತೆರಿಯುಂಡು.ಸುರುಕು ಒವಿತ್ತ್ಂಡ ಅವೆನೆ ನಮ ಸುರುಕು ಪನ್ಪುನಿ.ದೈವಲ ಅಂಚನೆ,  ಮೂಲೊಡು ತನನ್ ಉಂಡು ಮಲ್ತ್ ದ್ ನಂಬುದು,ಧರ್ಮ ಕೊರೊಂದು ಬತ್ತ್ ನಕ್ಲೆನೆ ಇನಿಕ್ಲ ಸುರುಕು ಲೆಪ್ಪುನಿ.ಸರಳ ಆದ್ ಪನ್ಪುಂಡ ತುಳುವೆರ್ ಸುರುಕು ಕುಡು ಬಿತ್ಯೆರ್ ಬೊಕ್ಕ ಅರಿ ನಾಡ್ ಪತ್ಯೆರ್.ಮೂಲು ಕುಡುನು ಸುರು ಪನ್ಪ.ಕುಡುರ್ದು ಬೊಕ್ಕ ಅರಿ-ಕುಡ್ವರಿ,ದುಂಬುಗು ಲೋಹ ಯುಗ ಬನ್ನಗ ಕುಡುವರಿ ಸ್ಥಿತ್ಯಂತರ ಆದ್ ಕುಡರಿ/ಕೈಮಡು/ಕೈಕುಡರಿ ಆಂಡ್ .ದೈವೊಲೆ ಗಡುವಾಡ್ ದ ಜಾಗೆಲೆನ /ವ್ಯಾಪ್ತಿ ಇಪ್ಪುನ್ನೇ ತುಳುನಾಡ ಗಡಿತ ವ್ಯಾಪ್ತಿಡ್ ಮಾತ್ರ. ಅಂಚಾದ್ ದೇವೆರೆ ಆರಾದನೆದ ಷೋಡಷೋಪಚಾರೊಲು,ಮಂತ್ರ,ಶ್ಲೋಕೊಲು, ಅಷ್ಟ ಮಂಗಲ, ಪ್ರತಿಷ್ಠೆ,ಬ್ರಹ್ಮಕಲಶೊಲು ದ್ರಾವಿಡ ತುಳುವ ಕಟ್ಟ್ ದ ಚರವಾಯಿನ ದೈವಾರಾದನೆಗ್ ಇಜ್ಜಿ.ದ್ರಾವಿಡ ಶೂದ್ರ ತುಳು ಧರ್ಮದ ದೈವೊಲೆನ ಪದಿನಾಜಿ ಕಟ್ಲೆಲೇ ಬೇತೆ.ದೇವೆರೆ ವೈದಿಕ ಆಗಮ ಶಾಸ್ತ್ರದ ಷೊಡಷೊಪಚಾರದ ಕಿರಮೊಲೇ ಬೇತೆ.

ದೇವೆರೆ ಷೋಡಷೋಪಚಾರೊಲು:-

ಪದಿನಾಜಿ ರೀತಿಡ್ ದೇವೆರೆನ್ ಮಾನಾವುನ ದುಂಬು ಸಂಕಲ್ಪ ಮಲ್ತ್ ದ್ ಬೊಕ್ಕ ಧ್ಯಾನೊಡು ದೇವೆರೆನ್ ಲೆಪ್ಪುನಿ.

೧.ಆವಾಹನೆ-ನಮ ಇತ್ತಿ ಇಲ್ಲಗ್,ಜಾಗೆಗ್ ದೇವೆರೆನ್ ಲೆಪ್ಪುನಿ

೨. ಆಸನ-ದೇವೆರೆನ್/ಮೂರ್ತಿನ್ ಎತ್ತರದ ಜಾಗೆ,ಮಣೆಟ್ ಕುಲ್ಲವುನಿ

೩. ಪಾದ್ಯ-ಕಾರ್ ದೆಕ್ಕೆರೆ ನೀರ್ ಕೊರ್ಪುನಿ

೪. ಅರ್ಘ್ಯ-ಕೈ ದೆಕ್ಕೆರೆ ನೀರ್ ಕೊರ್ಪುನಿ

೫. ಆಚಮನ-ಪರ್ಯೆರೆ ನೀರ್ ಕೊರ್ಪುನಿ

೬. ಸ್ನಾನ-ಸುದ್ದವಾಯಿನ ನೀರ್ ಡ್ ಮೀಪಾವುನಿ

೭. ವಸ್ತ್ರ-ಕುಂಟು,ಗೆಜ್ಜೆ ಕುಂಟು ದೀಪುನಿ,ಜನಿವಾರ,ಪದ್ದೆಯಿ ದೀಪುನಿ

೮. ಕುಂಕುಮ,ಗಂಧ,ಮಂಜಲ್-ಮಂತ್ರಾಕ್ಷತೆನ್ ದೇವೆರೆಗ್ ಅರ್ಪಣೆ ಮಲ್ಪುನಿ

೯. ಪುರ್ಪ-ಪೂತ ಮಾಲೆ,ಇರೆಕ್ಲೆಡ್ ದೆವೆರೆನ್ ಪೊರ್ಲೈತ ಮಲ್ಪುನಿ.

೧೦. ಅರ್ಚನೆ/ಅಷ್ಟೋತ್ತರ-ನೂತ್ತ ಎಣ್ಮ ಪುದರ್ಡ್ ದೇವೆರೆನ್ ನೆನವರಿಕೆ ಮಲ್ಪುನಿ.

೧೧. ಧೂಪ-ಕಮ್ಮೆನದ ಧೂಪೊನು ದೇವೆರೆಗ್ ತೋಜಾವುನಿ

೧೨.ದೀಪ-ತುಡರ್ ನ್ ದೇವೆರೆದುರು ಅರ್ಲಾವುನಿ

೧೩. ನೈವೇದ್ಯ,ಬಚ್ಚಿರೆ ಪೂಳು-ಬೇತೆ ಬೇತೆ ಒರುತ ಅಟಿಲ್ ನ್ ಬಲಸ್ ದ್  ಉಂಡಿಬೊಕ್ಕ ಬಚ್ಚಿರೆ,ಬಜ್ಜೆಯಿ,ತಾರಾಯಿ ಕೊರ್ಪುನಿ.

೧೪.ನೀರಾಜನ-ಕರ್ಪೂರೊಡು ಮಂಗಳಾರತಿ ಮಲ್ಪುನಿ.

೧೫. ನಮಸ್ಕಾರ-ದೇವೆರೆಗ್ ಪ್ರದಕ್ಷಿಣೆ ಬತ್ತ್ ದ್ ಸಾಷ್ಟಾಂಗ ನಮಸ್ಕಾರ ಮಲ್ಪುನಿ

೧೬. ನಮಸ್ಕಾರ-ನಮ್ಮ ಇಷ್ಟೊಲೆನ್ ನಡಪಾದ್ ಕೊರ್ಲೆ ದೇವೆರೆಂದ್ ಅರಿಕೆ ಮಲ್ತ್ ದ್ ಕುಂಕುಮ,ಗಂಧ,ಪುರ್ಸಾದೊಲೆನ್ ದೆತೊನುನಿ

ದೈವೊಲೆ ಪದಿನಾಜಿ ಸಾಂಪ್ರದಾಯಿಕ ಕಟ್ಟ್ ಕಟ್ಲೆಲು:-

೧.ಮಣ್ಣ್ ದಪ್ಪಣೆ-ಯಜಮಾನೆರ್,ಸಮ್ಮಂದ ಪಟ್ಟಿನ ಮಾತೆರಿತ್ತ್ ದ್

೨.ದಿನ ದೀಪುನಿ_ಬಲ್ಯಾಯಡ

೩.ವೀಳ್ಯ ಕೊರ್ಪುನಿ

೪.ಕೋರಿ ಕುಂಟ,ಕೈಲ್ ಮೂರ್ತ,ಮರ ಮೂರ್ತ,ಪಾಳೆ ಮೂರ್ತ,ಮಣ್ಣ್ ಮೂರ್ತ-ಮರ ಮೂರ್ತ- ದೊಂಪ,ಕೊಡಿಯಡಿಕ್ ಬೋಡಾಯ್ನೆತ ಸಲುವಾದ್.

೫.ಸುದ್ದ ಮುದ್ರಿಕೆ ಓಮ,ಸುದ್ದ ಮುದ್ರಿಕೆ

೬.ಬಂಡಾರ ಜಪ್ಪುನಿ-ಸಮ್ಮಂದ ಪಟ್ನ ಪೂರ ಪರಿವಾರ ಇತ್ತ್ ದ್.

೭.ಬಂಡಾರ ಏರ್ಸಾವುನಿ

೮.ಬಂಡಾರ ಏರಿ ಬೊಕ್ಕದ ಸುದ್ದ ಓಮ,ಜೋಗ,ಕೊಡಿಯಡಿ ಕಟ್ಟುನಿ-ಮಡ್ಯೆಲೆರೇ ದೀಪುನ ಸುದ್ದ ಓಮ

೯.ಸುತ್ತೆ ದೀದ್ ,ಪನಿವಾರ ಬಲಸ್ ದ್, ದೂಪ-ದೀಪಾದ್ ತಂಬಿಲ-

೧೦.ಪಡಿಯರಿ ಪತ್ತುನಿ

೧೧.ಎಣ್ಣೆ ವೀಳ್ಯ/ಬೂಲ್ಯ

೧೨.ಬೀರ ಲೆಪ್ಪುನಿ-ತೆಂಬರೆ ಬೊಟ್ಟೊಂದು-ವಸಯ

೧೩.ಗಗ್ಗರದೆಚ್ಚಿ

೧೪.ನೇಮದೆಚ್ಚಿ-ಬಲಿ ಸುತ್ತುಲು

೧೫.ಆವಾರ,ನುಡಿ,ಪೇರ್ ಪರ್ಪುನಿ -ಕೆಲವು ತಿಕ್ ಡ್ ದುಂಬು ಆವಾರಾದ್ ಬೊಕ್ಕ ನುಡಿಯಾಂಡ,ಕೆಲವು ಕೋಡಿಡ್ ಸುರುಕು ನುಡಿಯಾದ್ ಬೊಕ್ಕ ಆವಾರ

೧೬.ಬೂಲ್ಯ-ಸೂತ್ರ ಬೂಲ್ಯ,ನೇಮೊರ್ದು ಇಡೆ ಬುಡ್ಪುನಿ,ದೂಪಾದ್,ಸುದ್ದ ಮುದ್ರಿಕೆಯಾದ್,ಬಂಡಾರ ಯಥಾ ಸ್ಥಾನೊಗು ಪೋದು,ಅವ್ಲು ಬಂಡಾರ ಏರ್ಸಾದ್,ಕುಡ ಸುದ್ದ ಮುದ್ರಿಕೆಯಾದ್ ತಂಬಿಲ.

   ಗ್ರಾಮ ದೈವೊಲ್ನ ಕಾಲಾದಿ 16 ಕಟ್ಲೆದ ಪೊರ್ಲೇ ಬೇತೆ.ವರ್ಸೊಗು 12ಸಂಕ್ರಾಂತಿಲು,1ಚೌತಿದ ಪಾಡ್ಯ,1ಪರ್ಬೊದ ಬಿನ್ನದೊನ್ಯ,1ದೊಂಪದ ಬಲಿ,1 ಸಾನದ ನೇಮ ಇಂಚ ಒಟ್ಟು 16 ಕಟ್ಲೆಲು ದೈವಾರಾದನೆದ ಕಾಲಾದಿದ 16ಕಟ್ಲೆಡ್ ನಡಪುವ.

           ಈ ಇಚಾರೊಲೆನ್ ಪೂರ ತೂನಗ ಸಾಮಾನ್ಯ ಜನೊಕ್ಲೆಗಾಂಡಲ ದೈವ,ಬೂತಾರಾದನೆಗ್ಲ,ದೇವೆರೆ ಆರಾದನೆಗ್ಲ ಉಪ್ಪುನ ಎತ್ತೇಸೊಲು ಗೊತ್ತಾಪುಂಡು.ಇನಿ ಕೆಲವೆರ್ ಪಾರಿ ಪನ್ಪುನೆನ್ಲಾ ಭಜನೆಂದ್ ಪನೊಂದುಲ್ಲೆರ್.ಇನಿ ಅವೆನ್ ಭಜನೆಂದ್ ಪನ್ನಕುಲು ಎಲ್ಲೆ ಶಾಸ್ತ್ರೀಯ ಸಂಗೀತಂದ್  ಪನೆರ್ಲ ಯಾವು.ಕಾರ ಗಗ್ಗರ ಕಟ್ಟ್ ದ್ ಉಂತ್ ನಗ ದೈವೊಗು ಪನ್ಪುನ ಪಾರಿ ಬಜನೆ ಆಪುಜಿ.ಪಾರಿಡ್ ದೈವದ ಉಟ್ಟು ಕಟ್ಟ್ ನ್ ಪನ್ಪುನಿ.ದೈವದ ಬೀರಲ ಭಜನೆಯತ್ತ್.ಭಜನೆ ದಾಲ ದೈವದ ಉಟ್ಟುಕಟ್ಟತ್ತ್. ಭಜನೆ ಪನ್ಪುನವು ಉಡಲ್ ಡ್ ದೇವೆರೆ ಮಿತ್ತ್ ಉಪ್ಪುನ ಭಕ್ತಿ ಭಾವೊನು ಪ್ರಕಟ ಮಲ್ಪುನ ಒಂಜಿ ಸಾಧನ ಆತೆ.ದಾಸೆರ್ನಕುಲು ಅಕ್ಲೆ ಗ್ ದೇವೆರೆ ಮಿತ್ತ್ ಇತ್ತಿ ಬಕ್ತಿ ಬಾವೊನು ಒಂಜಿ ಬಾಸೆದ ಸವ್ದದ ಮೂಲಕ ಪ್ರಕಟಪಡಿಸದ್ ದೇವೆರೆಗ್ ಅಕುಲು ತನನ್ ತಾನ್ ಸಮರ್ಪಣೆ ಮಲ್ತ್ ನ ಭಾವೊನು ಭಜನೆಂದ್ ಪನೊಲಿ.ಆಂಡ ತೆಂಬರೆದ ಲಯಬದ್ಧ ಸೊರೊತೊಟ್ಟುಗು ಸಂಧಿ ಬೀರ, ಪನೊಂದು,ಪಾರಿಡ್ ದೈವದ ಉಟ್ಟು ಕಟ್ಟ್ ಪಂಡ್ ದ್ ಮುಕ್ಕಾಲ್ ಮೂಜಿ ಗಳಿಗೆದ ವಸಾಯ/ಜೋಗ ಬರ್ಪವುನವು ಭಜನೆಯತ್ತ್.ಮರಣ ಪೋನಗ ಭಜನೆ ಪನ್ಪುನ ಕಿರಮ ಉಂಡು.ಮರಣೊಗು ಇಂಚಿತ್ತ್ ನವೇ ಭಜನೆ ಪನೊಡುಂದು ಉಂಡು.ಉದಾರ್ಮೆಗ್-ಯಾರಿಗೆ ಯಾರುಂಟು ಎರವಿನ ಸಂಸಾರ,ನನೊಂಜಿ ,ಯಾಕೆನ್ನ ಈರಾಜ್ಯಕೆಳೆತಂದೆ ಹರಿಯೆ ಇಂಚಿನ ಕೆಲವು ಬಜನೆಲು.ಆಯನ ಪಾಪ ಪುಣ್ಯ ಈ ಬೂಮಿಡ್ ಮುಗಿದಾತ್ಂಡ್.ಈ ಮೂಲಕ ಆಯನ್ ಕಡಪುಡ್ದ್ ಕೊರ್ನಗಾಂಡಲ ಆಯಗ್ ಒಂಜಿ ಎಡ್ಡೆ ಸಾದಿ ತಿಕ್ಕಡ್ಂದ್ ದೇವೆರೆಡ ಕೇಂಡೊನ್ನವು ಮರಣ ಭಜನೆ.ಮರಣ ಭಜನೆ ದೈವೊದ ಕಲೊಟು ಬಜನೆ ಪನ್ಲೆಕತ್ತ್.ದೈವದ ಕಲೊಕು ಭಜನೆ ಅಗತ್ಯ ಇಜ್ಜಿ.ಸೈತ್ ನ ಪುಣೊಕು ಜೋಗ ಬರೆರೆ ಭಜನೆ ಪನ್ಪುನತ್ತ್.ಆಯೆ ಕರಿ ಬೊಕ್ಕ ಎಡ್ಡೆ ಸಾದಿ ತಿಕ್ಕಡ್ಂದ್ ದೇವೆರೆನ್ ಸುಗಿಪುನಿ. ಬಜನೆಡ್ ದೈವೊಗು ಜೋಗಲ ಬರ್ಪುಜಿ.

       ಯಾನ್ ಎಲ್ಲೆ ಉಲ್ಲೆನ ಇಜ್ಜಾ ಎಂಕ್ ತೆರಿಯಂದ್.ಆಂಡ ನಮ ಪನ್ನಗ ನಿರ್ದಾಕ್ಷಿಣ್ಯವಾದ್ ನಮ್ಮ ದೈವಾರಾದನೆದ ಕಟ್ಲೆನ್ ಸರಿಯಾದ್ ಪನೊಡು.ಪಂಡ್ ಜಿಂಡ ನಮ್ಮ ಜೀವಿತೊಡು ನಮ ಈತ್ ವರ್ಸ ಬದ್ ಕ್ ನ ,ನಂಬಿನ,ದೈವಾರಾದನೆಡ್ ತೊಡಗಾಯಿಸಾಯಿನೆಕ್ ಫಲ ಇಜ್ಜಿಂದಾಪುಂಡು.ದೇವೆರೆಗ್ ಕೋಲ ನೇಮ ಮಲ್ಪೆರಾಪುಂಡೇ,ದೇವೆರೆಗ್ ಸಂಧಿ ಪಾಡ್ದನ ಪನೆರಾಪುಂಡೇ,ದೇವೆರೆಗ್ ಮಂತ್ರ,ಶ್ಲೊಕ,ಭಜನೆ ಪನ್ಪ.ಅಲ್ತ ಅರಾದನೆದ ಕಿರಮನೇ ಬೇತೆ,ದೈವಾರಾದನೆದ ಕಿರಮನೇ ಬೇತೆ.ದೈವಾರಾದನೆದ ಇಚಾರೊಲೆನ್ ದೇವೆರೆ ಆರಾದನೆಗ್ ಎಂಚ ಕೊನೊಯೆರೆ ಆಪುಜಾ ಅಂಚನೆ ದೇವೆರೆ ಆರಾದನೆದ ಇಚಾರೊನ್ಲಾ ದೈವದ ಕಲೊಕು ಕನಯೆರಾಪುಜಿ.ಆಂಡ ದೇವೆರೆ ಆರಾದನೆದ ಕಲಶ,ಪೂಜೆ,ಆರತಿ,ಪ್ರಶ್ನೆ ಚಿಂತನೆ,ಮಂತ್ರ,ಓಮ,ಪೂಜೆ,ಭಜನೆ ಪೂರ ಇತ್ತೆನೇ ದೈವದ ಕಲೊಕು ಕನತ್ ದ್ ಪೊಸತ್ ನ್ ತೋಡೆರೆ ಸುರು ಮಲ್ತ್ ದ್ ಪರತ್ ನ್ ನಿಗಿತೊಂದುಲ್ಲ.ಉಂದು ಸರಿಯತ್ತ್.ಬಜನೆಗ್ ನಲಿಪುನ ದೈವೊಗ್ಲಾ ತಾನ್ ದೈವಂದ್ ತೆರಿದಿತ್ತ್ಂಡ ಇಂಚ ಕಲತ ಕಟ್ಟ್ ತತ್ತ್ ದಂದ್.

    ಸಂಸ್ಕೃತ ಒಂಜಿ ಕಾಲದ ಜನೊಕುಲು ಪಾತೆರೊಂತಿ ಬಾಸೆಯಾದಿತ್ತ್ಂಡ್.ನಮ ಇತ್ತೆ ಭಜನೆ ಪನ್ಲೆಕ ಅವ್ಲು ಶ್ಲೋಕೊಲಿತ್ತ್ಂಡ್.ನಮ ಇನಿ ಸಂಸ್ಕೃತ ಮಂತ್ರ,ಶ್ಲೋಕ ಪೂರ ದೈವದ ಕಲೊಕು ಕನೈದ.ದೈವೊಲೆಗ್ ಇತ್ತೆನೇ ದೇವೆರೆ ಪುದರ್ ದೀದಾತ್ಂಡ್.ಉದಾರ್ಮೆಗ್-ವಿಷ್ಣುಮೂರ್ತಿ ದೈವೊಗು ವಿಷ್ಣುಮೂರ್ತಿ ದೇವೆರ್ಂದ್ ಪನೊಂದುಲ್ಲೆರ್.ದೈವೊಗು ಕಟ್ಟುನಕುಲ್ಲಾ ಕೋಲ ಸುರಾನಗ ಶಾಂತಾಕಾರಂ ಭುಜಗ ಶಯನಂ.....ಇಂಚ ಸಂಸ್ಕೃತದ ಮಂತ್ರ ಪನೊಂದು ಕೋಲ ಪಿರಿನಗ ಯದಾ ಯದಾಹಿ ಧರ್ಮಸ್ಯ.....ಭಗವದ್ಗೀತೆದ ಸಾಲ್ ನ್ ಪನೊಂದುಲ್ಲೆರ್. ಮುಕಾಂಬಿ ಜೇವುಗು ಮೂಕಾಂಬಿಕೆ,ಉಲ್ಲಾಲ್ದಿಗ್ ದುರ್ಗಾ ಪರಮೇಶ್ವರಿ,ಲೆಕ್ಕೆಸಿರಿಕ್ ರಕ್ತೇಶ್ವರಿ,ಚೌಂಡಿಗ್ ಚಾಮುಂಡೇಶ್ವರಿ,ಪಿಲಿಬೂತೊಗು ವ್ಯಾಘ್ರ ಚಾಮುಂಡಿ ಇಂಚ ಏತೋ ಬದಲಾಯಿನ ಪುದರುಲುಲ್ಲ.ದೈವದ ಪುದರ್ ತಿರ್ಗಾವುನ ದುಂಬು ದೈವದ ಹಿನ್ನಲೆನ್ ಪುದರ್ ಬದಲ್ಪುನ ಪ್ರಶ್ನೆ ಚಿಂತನೆದಕುಲ್ಲಾ, ತುಳುವೆರ್ಲಾ ಸರಿಯಾದ್ ತೆರಿಯೊಂದುವೆರ್ಡ ತಾನ್ ನಂಬಿ ದೈವದ ಪುದರ್ ನ್ ಖಂಡಿತಾ ಬದಲ್ಪಯೆರೆ ತುಳುವೆರ್ ಬುಡ್ತಾಯೆರ್.ಪ್ರಶ್ನೆ ಚಿಂತನೆದಕ್ಲ್ ಪಂಡಿ ಪುದರ್ ಪೊರ್ಲುಂಡುಂದು ತಾಂಕ್ಂಡ ತಮ್ಮಲೆಲೆಕ,ಪೆದ್ದ್ಂಡ ಅಪ್ಪೆಲೆಕ ಇತ್ತಿ ದೈವದ ಪುದರ್ ನ್ ಬದಲ್ಪೆರೆ ಪೋದು ಪೊಸ ಪುದರ್ ಡ್ ದೈವೊನು ಲೆಪ್ಪುನಗ ಎನ್ನ ಪುದರತ್ತ್ಂದ್ ದೈವ ಕಲೊಕು ಬರಂದ್.ಈ ಪ್ರಶ್ನೆ ಚಿಂತನೆದಕ್ಲು ತಾರಾಯಿ ದೀದ್ ನಂಬೊಂತಿ ಚೌಂಡಿ ಗುಳಿಗನ್ ಬ್ರಹ್ಮಲಿಂಗೇಶ್ವರ ಮಲ್ತೊಂದುಲ್ಲೆರ್.ದೇವೆರೆ ಪುರ್ಸಾದ ದೆತೊನ್ನಗ ಬೈರಾಸ್ ನೀರ್ದ್ ದೆತೊಂಡೆರ್ಡ ದೈವದ ಕಟ್ಟ್ ಡ್ ಕೈ ನೀರ್ದೇ ಬೂಲ್ಯ ಪತ್ತೊಂತೆರ್.ಮೂಲ್ಲಾ ದೇವೆರೆ,ದೈವದ ಕಟ್ಲೆದ ಎತ್ತೇಸೊ ತೆರಿಯುಂಡು.ರಾಜಂದೈವೊಲ್ನ ಎದುರು ಬೊಲ್ದು ಬೈರಾಸ್ ಪುಗೆಲ್ ಗ್ ಪಾಡ್ದ್ ದೈವದ ಎದುರುಂತ್ಂಡ ಅರಸು ದೈವೊಲ್ನ ಎದುರು ಬೈರಾಸ್ ಪಗೆಲ್ ಗ್ ಪಾಡಂದೆ ಒಂಜಾ ತರೆತ್ರ/ಮುಂಡಾಸ್ ಕಟ್ಟೊಡು,ಇಜ್ಜಾ ಸೊಂಟೊಗು ಕಟ್ಟೊಡು.ದೈವದ ಕಟ್ಲೆಡ್ಲಾ ಇಂಚಿ ಎತ್ತೇಸೊಲಿಪ್ಪುವ

       ಉಲ್ಲಾಲ್ದಿ ಮಾಡೊಡು ನೇಮ ಆನಗ ಉಲ್ಲಾಲ್ದಿ ದೈವ ಆಯಿನವು ಸಾನದ ಉಲಯಿ ಪೋಯಿ ಸಾತ್ ಗ್ ಅವೆಂಚ ದುರ್ಗಾ ಪರಮೇಶ್ವರಿಯಾಪುನಿ?.ಉಲ್ಲಾಲ್ದಿನ ಮುಗೊನು ಒಂಜಿ ಮರತ ಬೊಂಬೆಗ್ ದೀದ್ ದುರ್ಗಾ ಪರಮೇಶ್ವರಿ ಪನೊಂದು ಪಂಚಕಜ್ಜಾಯ,ಕುಂಕುಮಾರ್ಚನೆ,ಕರ್ಪೂರಾರತಿ ಪೂರ ಮಲ್ತೊಂದುಲ್ಲೆರ್.ಸುಕ್ರಾರ ಸುಕ್ರಾರ ಮಟ ಮಟ ಮದ್ದೆನ ಪೆರಡೆ ಲಾಕಿದ ಕಜಿಪು ಮಲ್ತ್ ದ್ ಅಗೆಲ್ ಪಾಡುನ ಉಲ್ಲಾಲ್ದಿ ಎಂಚ ದುರ್ಗಾಪರಮೇಶ್ವರಿಯಾಪುನಿ?.ಉಲ್ಲಾಲ್ದಿ ನೇಮದ ದುಂಬು ಕೋರಿದ ಕಿನ್ನಿ ಪಾರಾವುನ,ಅರಸುಲು ಕುಲ್ಲುನ ಪಾಗರದ ನಡೆಟ್ ಕೋರಿ ಕೊಯ್ಪುನ,ಕೊಡಿ ಮರತ ಮುದೆಲ್ಡ್ ಕೋರಿಲೆನ್ ಕೊಯ್ಪುನ ಉಲ್ಲಾಲ್ದಿ ದೈವ ಎಂಚ ದುರ್ಗಾ ಪರಮೇಶ್ವರಿಯಾಪುನಿ?.ದೈವೊಲು ದೇವೆರಾಯಿನೆಕ್ ಉಂದೆರ್ದ್ ಮಲ್ಲ ಸಾಗ್ಸಿ ದಾದ ಬೋಡು?.ದುರ್ಗಾ ದೇವಿ ಉಂಡು,ಪರಮೇಸ್ವರನ ಬುಡೆದಿ ಪರಮೇಶ್ವರಿಲಾ ಉಂಡು.ಆಂಡ ದುರ್ಗಾ ಪರಮೇಶ್ವರಿ ಒಟ್ಟಿಗೆ ವಾ ಕಾಲ ಘಟ್ಟೊಡು ಸೇರಿಗೆಯಾಂಡ್ಂದ್ ತೆರಿಯಂದ್.ಅಂಚನೆ ರಕ್ತ ಬೀಜಾಸುರನ್ ಕೆರ್ನ ರಕ್ತದಂತಿ ಎಂಚ ರಕ್ತೇಶ್ವರಿಯಾಂಡ್ ತೆರಿಯಂದ್.ತುಳುನಾಡ ದೈವ ಲೆಕ್ಕೆಸಿರಿನ್ಲ ಇತ್ತೆ ರಕ್ತೇಶ್ವರಿ ಮಲ್ತ್ ಬುಡ್ದು ಕಟ್ಟುನಕುಲ್ಲಾ ರಕ್ತೇಶ್ವರಿಂದೇ ಪನೊಡಾಯಿನ ಪರಿಸ್ಥಿತಿ ಬೈದ್ಂಡ್.ಅಂಚನೆ ದೇವೆರೆ ಅಂಶ ದೈವಂದ್ ಪನ್ಪುನಕುಲು ದೇವೆರೆಗ್ ದೈವೊಲೆ ಪುದರ್ ದೀಯೆರೆ ಸಾಧ್ಯನೇ.ಖಂಡಿತಾ ಇಜ್ಜಿ.ಪುರಾಣ ಪುರುಷೆರ್ ಕರಿದ್ ಪೋಯಿಬೊಕ್ಕ ದೇವೆರಾಯೆರ್.ಚಾರಿತ್ರಿಕ ಪುರುಷೆರ್ ಕರಿದ್ ಪೋದು ದೈವ ಬೂತೊಲಾಯೆರ್.

     ಪುರಾಣದ ದೇವೆರೆ ಆರಾದನೆ,ಮಂತ್ರ,ಶ್ಲೋಕ ಬರ್ಪುನ ದುಂಬು ದ್ರಾವಿಡ ಶೂದ್ರ ಸಂಸ್ಕೃತಿದ ತುಳುನಾಡ್ ಡ್ ದೈವಾರಾದನೆ,ಸಂಧಿ ಪಾಡ್ದನೊಲಿತ್ತ.ದುಂಬು ದೈವದ ಕಲೊಟು ಡೋಲು ಬೊಟ್ಟೊಂದಿತ್ತ್ ದ್ ಇತ್ತೆ ಅಡೆ ಆಟೊಡು ಗಳಸುನ ಚೆಂಡೆ ಬೈದ್ಂಡ್.ಆಟದಡೆ ಬ್ಯಾಂಡ್ ವಾದ್ಯ ಬೈದ್ಂಡ್.ರಂಗ ಕಲಾವಿದಗ್ ಒವೆಕ್ ನಲಿಪೊಡು ಪನ್ಪಿ ಗೊಂದಲ.ದೈವದ ಕಲೊಕು ಚೆಂಡೆ ಬತ್ತ್ಂಡ ಬೊಟ್ಟ್ ನಗ ಆಯೆ ತಾಸೆದ ಪೆಟ್ಟ್ ಗ್ ಕೆಬಿ ಕೊರೊಡಾ,ಚೆಂಡೆದ ಪೆಟ್ಟ್ ಗ್ ಕೆಬಿ ಕೊರೊಡ ತೆರಿಯಂದೆ ಆಯನ ಅಜ್ಜ ತತ್ತೊಂದುಂಡು.ಚೆಂಡೆದ ಪೆಟ್ಟ್ ರಂಗತಲೊಟು ಕೇನೆರೆನೇ ಪೊರ್ಲು.ರಂಗ ಕಲೆತ ಚೆಂಡೆನ್ ಆರಾಧನಾ ಕಲತ ದೈವದ ಕಲೊಕು ಬೊಟ್ಟುನ ಸರಿಯಾ?.ತೆರಿನಕುಲು ಪನೊಡಾತೆ. ಇನಿ ಸ್ವಾಮೀಜಿಲೆನ್ ಮೆರವಣಿಗೆಡ್ ಲೆತೊಂದು ಬನ್ನಗಲ ಚೆಂಡೆ ಬೊಟ್ಟೊಂದುಲ್ಲೆರ್. ಒವ್ವೊವು ಓಲೊಲುಪ್ಪೊಡೋ ಅವ್ಲವ್ಲು ಇತ್ತ್ಂಡನೇ ಪೊರ್ಲು,ಸುಖ.

            ದೈವ ಸಾನೊಗು ಭಜನೆ ಅನಿವಾರ್ಯ ಅತ್ತ್.ಭಜನೆ ಪನ್ಪುನ ಸುರಾಯಿ ಬೊಕ್ಕ ಮೂಲು ಮಾಯೆರ್ದ್ ಜೋಗೊಗು ಬರ್ಪುನಿ ದೈವನಾ ದೇವೆರಾ ಪಂಡ್ ದ್ ಅಲಚನೆ ಮಲ್ಪುನ ಪರಿಸ್ಥಿತಿ ಬೈದ್ಂಡ್.ನಮ ಕೇಸರಿ ರಂಗ್ ದ ತುತ್ತೈತೊಗು,ಸನಾತನ ಸಂಸ್ಕೃತಿಗ್,ದೇವೆರೆಗ್ ಮಾನಾದಿಗೆ ಕೊರ್ದು ದೈವ ದೇವೆರೆನ್ ಆರಾಧನೆ ಮಲ್ಪುನಕುಲು . ಆಂಡ ದೈವಸಾನ,ಬೂತ ಸಾನೊಗು  ದುಂಬುದ ಕಾಲೊಡು ಕೇಸರಿ ರಂಗ್,ಓಂಕಾರ ಗಳಸಂದೆ ಅವ್ಲು ಕೇಪುಲ ರಂಗ್,ಬೊಲ್ದು ಕುಂಟು ಗಲಸೊಂತೆರ್.ಅವ್ಲು ಕೇಪುಲ ರಂಗ್ ಕುಂಟುದ ಮಿತ್ತ್ ಸೂರ್ಯ,ಚಂದ್ರನ ಒರು ಇತ್ತ್ಂಡ್.ದೇವೆರೆ ಆರಾದನೆ,ದೈವೊಲೆ ಆರಾದನೆಗ್ ಪ್ರತಿಯೊಂಜೆಕ್ಲ ಅವೆತನವೇ ಆಯಿನ ಪರಂಪರೆ, ಕಟ್ಟ್ ಕಟ್ಲೆ ಉಂಡು.ಅವೆನ್ ಮೀರ್ದ್ ಏರ್ಲ ಪೋಪುಲೆಕಿಜ್ಜಾಂಡ್.ಇನಿ ಪೆರಿಯಾಕ್ಲೆಗೇ ಬಿಲೆ ಕೊರಂದಿನಕುಲು ದೈವ ದೇವೆರೆಗ್ ಬಿಲೆ ಕೊರೆರೆ ಸಾಧ್ಯನೆ?.ಏರ್ ಎಂಚಿನ ಅಡಿಮೇಲ್ ಮಲ್ತೆರ್ಡಲಾ ದೈವ ಪೋದು ದೇವೆರಾಪುಜಿ,ದೇವೆರ್ ಪೋದು ದೈವ ಅಪುಜಿ.ಬೂತ ಬೂತನೇ ಅವೊಡು,ಬೂತೊಗು ನೇಮನೇ ಆವೊಡು,ದೈವ ದೈವನೇ ಆವೊಡು,ದೈವೊಗು ನೇಮನೇ ಆವೊಡು.ನೇಮ ನಡಪುನಿ, ಕೋಲ ಕಟ್ಟುನಿ.ಉದಾರ್ಮೆಗ್-ಕಾಲೆ ಕೋಲ,ಎರು ಕೋಲ,ಪುದ ಕೊಲ,ಇಂಚ ಕೋಲ ಕಟ್ಟುನಿ.ದೈವ ದೈವಾದೇ ಉಪ್ಪೊಡು.ದೇವೆರೆಗ್ ಮಾತ್ರ ಜಾತ್ರೆ ಉಪ್ಪುನಿ..ಆಂಡ ಇನಿ ಒಂಜಿ ತಿಕ್ ಡ್ ವಿಷ್ಣು ಮೂರ್ತಿ ದೈವದ ದೈವಸಾನೊನು ವಿಷ್ಣು ಮೂರ್ತಿ ದೇವಸಾನ ಮಲ್ದೆರ್.ನನಲಾ ನಮಕ್ ಬುದ್ಧಿ ಬರಂದೆ ದೈವಸಾನೊಡು ದೈವೊದ ಬಲಿ ಸುತ್ತುಗು ಬಜನೆ ಮಲ್ತೊಂದಿತ್ತಡ, ಒರಿನ ದೈವೊಲ್ಲಾ ದೇವ ದೇವಿಯಾದ್,ದೈವ ಸಾನೊಲು ದೇವಸಾನೊಲಾನಗ ಎದುರುಗು ಪಿರವುಗು ಕೈ ಮುಚ್ಚಿದ್ ಕುಲ್ಲೊಡಾವು.

     ದೇವೆರೆಗ್ ತೇರೇ ಒಯ್ಪೊಡು.ದೈವೊಲೆಗ್ ಬಂಡಿಯೇ ಒಯ್ಪೊಡು‌.ದೇವೆರೆಡ್ ವಿಷ್ಣುಗು ಗೋವಿಂದ ಪಾಡ್ಯೆರ್ಡ ಇನಿ ದೈವದ ಬಂಡಿ ಒಯ್ಪುನಗ ಸ್ವಾಮಿ ಸತ್ಯೊಲೇಂದ್ ಪನಂದೆ ಗೊವಿಂದ ಪಾಡ್ವೆರ್.ಈಸರ ದೇಲ್ಯೊಡು ಹರಹರ ಮಹಾದೇವ ಪನಂದೆ ಗೋವಿಂದ ಪಾಡ್ವೆರ್.ದೈವದ ಸಾನದೊಕ್ಕೆಲ್ ಆನಗಲ ಗೋವಿಂದ ಪಾಡೊಂದುಲ್ಲೆರ್.ಕಡೆಕ್ ದೈವ ಸಾನದ ಕೊಡಿ ಏರ್ನಗಲ ಗೋವಿಂದ ಪಾಡೊಂದುಲ್ಲೆರ್.ದೈವೊಲೆ ಬಂಡಿದ ದುಂಬೊತ್ತ್ ನ ವು ದೇವೆರೆ ತೇರ್.ತಂಬಿಲ ಅಗೆಲ್ ದೇವಸಾನೊಡು ಬಲಸೆರಾಪುಂಡೇ.ದೈವದ ಬಂಡಿ ದೇವೆರೆಗ್ ಒಯ್ಪೆರಾಪುಂಡೇ. ದೈವದ ಕಟ್ಲೆಡಿಜ್ಜಂದಿ,ದೈವದ ಕಲೊಟು ಮೂಲೊಡಿಜ್ಜಂದಿ ದೇವೆರೆ ಸಾನೊದ ಬಜನೆನ್ ದಾಯೆ ದೈವದ ಕಲೊಕು ಕನವೊಡು?.ಆಯಾಯ ಕಲೊಟಿತ್ತ್ ನ ಕಟ್ಲೆಲು ಆಯಾ ಕಲೊಟಿತ್ತ್ಂಡನೆ ಅವೆಕ್ ಮರ್ಯಾದಿ,ಪೊರ್ಲು ಅತ್ತೇ.

             ದೈವದ ಕಲೊಟು ಮಲ್ಪೆರೆ ಬಲ್ಲಿತ್ತ್ ನೆನ್ ಮಲ್ತೆರ್ಡ ನಮ ಪನ್ಪುನೆನ್ ನಮ ಪನೋಡೆ.ದೇವಸಾನೊಡು ಪೂತ ಪೂಜೆ ಉಂಡುಂದು ಪಂಡ್ ದ್ ದೈವಸಾನೊಡ್ಲ ಪೂತ ಪೂಜೆ ಮಲ್ಪೊಡುಂದು ದಾಲ ಕಟ್ಟ್ ಇಜ್ಜಿ.ಅಲ್ತ ಕಟ್ಟ್ ಪಾಡುಲು ಬೇತೆನೇ ಉಪ್ಪುವ,ಮುಲ್ತ ಕಟ್ಲೆಲು ಬೇತೆನೆ ಉಪ್ಪುವ.ದೈವಸಾನೊಡು ಬಲಿಕ್ ಕೋರಿ ಕೊಯ್ಪೆರ್,ದೈವೊಗು ಅಮುರ್ತ ದಿಪೆರ್ಂದ್ ದೇವಸಾನೊಗು ಅಂಚ ಮಲ್ಪೆರೆ ಆಪುಂಡೇ?.ದೈವಸಾನ,ಬೂತಸಾನ,ದೇವಸಾನ ಬೇತೆ ಬೇತೆನೆ. ದೇವಸಾನೊಡು ಆಯಿನೆನ್ ಪೂರ ದೈವಸಾನೊಡು ಮಲ್ಪೆರಾಪುಜಿ.ಅಂಚ ಮಲ್ತ್ಂಡ ದೈವ ಸಾನೊಗ್ಲಾ ದೇವಸಾನೊಗ್ಲಾ ದಾದ ಎತ್ತೇಸೊ?.ಮಲ್ಲ ಮಲ್ಲ ದೇವಸಾನೊಡು ಪೂಜೆ ಮಲ್ಪುನ ಅರ್ಚಕೆರ್ ನಮ ಇಲ್ಲಡ್ ಪಟ ದೀದ್  ಕೈ ಮುಗಿಯುನ ದೇವೆರೆಗ್ ಬತ್ತ್ ದ್ ಪೂಜೆ ಮಲ್ಪುವೆರೆ?.ನಮ ಇಲ್ಲಲ್ ನಮ್ಮ ದೇವೆರೆಗ್ ಪೂಜೆ ಮಲ್ಪುನಕುಲು ದೇವಸಾನದ ಗುಂಡದುಲಯಿ ಪೋದು ಪೂಜೆ ಮಲ್ಪೆರಾಪುಂಡೇ?.ದೇವಸಾನೊಡಾಪುನ ಪೂತ ಪೂಜೆ ದೈವಸಾನೊಡು ದಾಯೆ ಬಲ್ಲಿಂದ್ ನಮ ಸಾಧಿಸಯೆರೆ ಪೋಪುನವು ಸರಿಯತ್ತ್.ಅವೆತ ಬದಲ್ ಅಲ್ತ ಮೂಲ ಕಟ್ಟ್ ಕಟ್ಲೆನ್ ದಾದಂದ್ ಎರಿಯಾಕ್ಲೆಡ ಕೇಂದ್ ಪಿಂದೊಂದು ಕಟ್ಲೆನ್ ಒರ್ತೊಂದು ಬತ್ತ್ಂಡ ಪೊರ್ಲು.ದಾಯೆ ಪಂಡ ತುಳುವೆರೆಗ್ ದೈವಲ ದೇವೆರ್ಲ ನಮ ನಂಬಿ ದೈವೊಲೆ.ಮನಿಪಂದಿ ದೇವೆರೆರ್ದ್ ಮದಿಪುನ ದೈವ ನಮಕ್ ಮಲ್ಲ.ನಮ ಮಾತಾ ಓಮ,ಪೂಜೆ,ಪ್ರಸ್ನೆ,ಕಲಶ,ಅಷ್ಟಮಂಗಲ,ಪ್ರತಿಷ್ಟೆಂದ್ ಸೋತು ಸುಣ್ಣಾನಗ ತರೆ ತಗ್ಗಾದ್ ಬೆರಿ ಬಗ್ಗಾದ್ ಉಂತುನಿ ನಮ ನಂಬಿ ದೈವೊಲ್ನ ಎದುರು.ಅವುಲೆ ನಮಕ್ ನಿಮುರ್ತಿ ತಿಕುನೆಲ.ಇನಿ ನಮ ದೈವದ ನುಡಿಂದೆನ್ಯಂದೆ ಕಟ್ಟುನಾಯನ ನುಡಿಂದೆನ್ನಿದ್,ಪಿದಯಿ ಪೊಸ ವ್ಯವಸ್ಥೆಗ್ ತರೆ ಕೊರ್ದು ಕುಡ ದೈವೊದ ಕಲೊಕು ಬರಂದಿನಾತ್ ದೂರದ ಆದ್ಯಾತ್ಮ ಚಿಂತನೆಗೆತ್ತ್ ದ.ಆಂಡ ನಮಕ್ ನಮ ನಂಬಿ ದೈವೊರ್ದು ಮಿತ್ತ್ ಒವುಲಾ ಅತ್ತ್.ಆಂಡ ಇನಿ ಒಂಜಿ ಕಾಲದ ಅವೈದಿಕ ತಾಮಸಿಕ ದೈವಾರಾದನೆಗ್ ಮಂತ್ರ ತಂತ್ರೊಲಿಜ್ಜಂದೆ ದೈವಾರಾದನೆನೆ ಇಜ್ಜಿ ಪನ್ಪುನಡೆಮುಟ್ಟ ಎತ್ತ್ ದ.

           ದೈವ ಸಾನೊಡು ದೈವೊಲೆಗ್ ದೇವೆರೆ ಬಜನೆಡ್ ಬಲಿಸುತ್ತು ಬರ್ಪುಂಡ ಪದಿನಾಜಿ ಕಟ್ಲೆದ ಬೇತೆ ಬೇತೆ ಬಲಿ ಸುತ್ತುದ ನೇಮ ನೆರಿ ಬೋಡಾ?.ಭಜನೆ,ಉಡ್ಕು ಬಲಿಟೆ ಸುದಾರ್ಪೊಲಿಯತ್ತೆ.ತಪ್ಪುನು ಪಂಡ್ಂಡ ಸ್ವಯಂಘೋಷಿತ ವಿದ್ವಾಂಸೆರ್ಂದ್ ತಮಾಸೆ ಮಲ್ಪುವೆರ್.ಆತ್ ವಿದ್ವತ್ ಇತ್ತ್ ನೆರ್ದಾತ್ರ ಮಾತ್ರ ತಪ್ಪುಲೆನ್ ಪನೆರೆ ಸಾಧ್ಯ ಆಪುನಿ.ಏರ್ ದಾದ ಪನ್ಪೆರಾ,ದೈವದ ಮಿತ್ತ್ ದೀಪೆರಾಂದ್ ತುಳುವೆರ್ ಪೋಡಿದ್ ಕುಲ್ಲುದೇ ದೈವದ ಕಲ ಅಜ ತತ್ತೊಂದಿಪ್ಪುನಿ.ನಮ ನಂಬಿ ದೈವೊಲೆ ಕಟ್ಲೆಗ್ ಚ್ಯುತಿ ಬನ್ನಗ ದೈವೊಲೆನ್ ನಂಬುನ ಪ್ರತಿಯೊರಿ ತುಳುವಗ್ಲ ಪಾತೆರುನ ಹಕ್ಕುಂಡು.ಕಟ್ಟುನಕ್ಲೆಗ್ ಉಂದು ತಪ್ಪುಂದು ತೆರಿದಿತ್ತ್ಂಡಲ ಪಾಪ ಪನೆರೆ ಪೋಪುಜೆರ್.ದಾಯೆ ಪಂಡ ಬರ್ಪಿ ವರ್ಸ ಕಟ್ಟೆರೆ ಲೆತ್ತ್ ಜೆರ್ಡಂದ್ ಅಕುಲು ಪಾಡ್ನ ತಾಳೊಗು ಮೊಕ್ಲು ನಲಿಪುವೆರಾತೆ.ಇನಿ ಇಲ್ಲದೆಚ್ಚಿದ ದೈವೊಲೆಗ್ಲ ಬಜನೆದ ಬಲಿಸುತ್ತು ಸುರು ಮಲ್ದೆರ್.ಅಂಚನೆ ಏರ್ ಕಲೊಟು ಕಟ್ಟುನಾಯೆ ಅಬತಾರ ಕಟ್ಟುವೆನಾ ಅಯಗೆ ಬರ್ಪಿ ವರ್ಸದ ನೇಮಲ ನಿಗಂಟಾಪುಂಡು.ಆಂಡ ದೈವದ ಕಲೊಟು ಅಂಚಿ ಅಬತಾರೊಲು ಮೂಲೊಡಿಜ್ಜಾಂಡ್,ಅವು ಸಾಸಿತಲಾ ಅತ್ತ್.ಇನಿ ಕಲ್ಲುರ್ಟಿಗ್ ಕಟ್ಟ್ ನಗಲ ಸಿರಿಯೇಸೊಗು ಕಟ್ಟ್ ಲೆಕ ಕಟ್ಟ್ ದ್ ಅಕ್ಲೆ ತರೆಟ್ ದೇವಿಂದೆ ತರೆಕಡರ್ದ್ ದೈವಾರಾದನೆ ದೇವೆರೆ ಆರಾದನೆದಂಚಿ ಮಾಲ್ದಿನಿ.

       ಮಲರಾಯನ ಸಾನದ ಸುತ್ತುಗು ಭಾಗ್ಯದ ಲಕ್ಷ್ಮಿ ಬಾರಮ್ಮ ಬಜನೆ ಪನೊಂದು,ಉಲ್ಲಾಲ್ದಿನ ಮಾಡ ಸುತ್ತುಗು ಅಂಬೀಗ ನಾ ನಿನ್ನ ನಂಬಿದೆ ಬಜನೆ ಪನೊಂದು,ಇಲ್ಲದೆಚ್ಚಿದ ಸಾನದ ಕಲ್ಲುರ್ಟಿ ಪಂಜುರ್ಲಿ ಸಾನೊಗು ಸುತ್ತು ಬನ್ನಗ ಹರಿ ಕುಣಿದ ನಮ್ಮ ಹರಿ ಕುಣಿದಂದ್ ಭಜನೆ ಮಲ್ತೆರ್ಡ ಈ ಭಜನೆಗ್ಲಾ ದೈವೊಲೆಗ್ಲ ದಾದ ಸಮ್ಮಂದ?.ರಾಜಂದೈವದ ಕಲೊಟು ಇಂಚಿನ ಎತ್ತೇಸೊಲು ನಡತೊಂದಿತ್ತ್ ದ್ ಮೂಲ ಜನಾಂಗದಕುಲು ಆರಾದನೆ ಮಲ್ಪುನ ಕಲೊಕು ಏರ್ಲ ಸುದ್ದಾಚಾರಂದ್ ಬಜನೆ ಮಲ್ಪೆರೆ ಬೈಜೆರ್.ಪೆರಿಯಾಕ್ಲ್ ದೈವಾರಾದನೆದ ಕಟ್ಲೆನ್ ಬರೆದ್ ದೀವಂದೆ,ಜೋಕ್ಲೆಗ್ ಪಂಡ್ ಕೊರಂದೆ ತೆರಿಯಂದಿ ಜವನೆರ್ ಏರೋ ಪಂಡಿನವು ಸರಿಂದ್ ಅವನೇ ದೈವದ ಕಲೊಟು ಮಲ್ತೊಂದುಲ್ಲೆರ್.ಈ ತಪ್ಪೇ ದುಂಬುಗು ಬರ್ಪುನ ದೈವಾರಾದಕ ಪೀಳಿಗೆಗ್ ತಪ್ಪೇ ಸರಿಂದಾದ್ ,ಸತ್ಯಂದಾದ್ ಅವೆನೇ ನಡಪವೊಂದು ಬತ್ತೆರ್ಡ ದೈವಾರಾದನೆದ ಮೂಲ ಕಟ್ಲೆ ಸಂಪೂರ್ಣ ನಾಶ ಆದ್ ಪೋವು.ದೈವ ಬೂತೊಲೆಗ್ ಪದಿನಾಜಿ ಕಟ್ಲೆ ಇತ್ತ್ ದ್ ಅವೆಕ್ ಅವೆನವೇ ಆಯಿನ ಬಿಲೆ ಉಂಡು.ದೇವೆರೆಗ್,ದೇವಿನಕ್ಲೆಗ್ ವಸಾಯ ಇಜ್ಜಿ,ಉಲ್ಲಾಲ್ದಿ ದೈವ ದುರ್ಗಾಪರಮೇಶ್ವರಿಯಾಂಡ ದುರ್ಗಾಪರಮೇಶ್ವರಿಗ್ ನೇಮ ಆಪುಂಡೇ?.  ದೈವ ಬೂತೊಲೆಗ್ ಮಾತ್ರ ವಸಾಯ ಉಪ್ಪುನಿ. ದೇವೆರೆಗ್ ತೆಂಬರೆ ಬೊಟ್ಟೊಂದು  ಸಂದಿ ಪನ್ಪುನ,ಪಾರಿ ಪನ್ಪುನ,ಗಗ್ಗರ ದೀದ್ ವಸಾಯೊಗುಂತುನ ಕಿರಮ ಇಜ್ಜಿ.ಪಿಲ್ಚಂಡಿ ದೈವೊನು ಮಂಜು ಪೂಂಜೆರೆ ಬಜನೆದ ದೈವಂದ್ ಪನ್ಪೆರ್.ಆಂಡ ಪಿಲ್ಚಂಡಿ ಬಜನೆಗ್ ಒಲಿನ ದೈವ ಅತ್ತ್.ಮಂಜು ಪೂಂಜೆರ್ ಆ ಕಾಲೊಡು ಬಜನೆಡ್ ಬಾರೀ ಪುಗಾರ್ತೆ ಪಡೆದಿತ್ತೆರ್.ಅಂಚನೆ ಪಿಲ್ಚಂಡಿ ದೈವದ ಮಿತ್ತ್ ಅರೆಗ್ ಅಪಾರವಾಯಿನ ಮನ ಬಗ್ತಿ ಇತ್ತ್ಂಡ್.ಆರ್ನ ಮನ ಬಗ್ ತಿಗ್ ಒಲಿದ್ ಬೈದ್ ನ ದೈವ ಪಿಲ್ಚಂಡಿ.ಒಂಜಿ ಕಾಲೊಡು ಕೇರಳದ ಕಾಲಟಿರ್ದ್ ತುಳುನಾಡ್ ಗ್ ಬತ್ತಿನ ಶಂಕರಾಚಾರ್ಯೆರ್ ಉಲ್ಲಾಲ್ದಿನ ದೈವಸಾನೊಲೆಡ್ ಶ್ರೀಚಕ್ರ ದೀದ್ ಉಲ್ಲಾಲ್ದಿ,ಲೆಕ್ಕೆಸಿರಿ ಪೂರಾ ದುರ್ಗಾಪರಮೇಶ್ವರಿ ರಕ್ತೇಶ್ವರಿ ಆಂಡ್.ಶ್ರೀರಾಮಾನುಜಾಚಾರ್ಯೆರ್ ವಿಷ್ಣು ಮೂರ್ತಿನ್ ತುಳುನಾಡ್ ಗ್ ಕನತೆರ್.ಅರಸು ಬಿಟ್ಟಿದೇವನ್ ಆರ್ ಸುರು ವಿಷ್ಣುವರ್ದನಂದ್ ಪುದರ್ ಬದಲ್ತೆರ್.ಕಾಲನುಬಾಗೊಡು ವಿಷ್ಣುಮೂರ್ತಿ ದೈವಲಾ ವಿಷ್ಣುನ,ಗೀತೆದ ಸಂಸ್ಕೃತದ ಸಾಲ್ ಲೆನ್ ಪನೆರೆ ದುರು ಮಲ್ತೆರ್.ವಾದಿರಾಜೆರ್ ಶಿವ ಸನ್ನಿದಿಡ್ ಶಿವಲಿಂಗದ ಮಿತ್ತ್ ವಿಷ್ಣುನ ಸಾಲಿಗ್ರಾಮ ದೀವೊಂದು ಬತ್ತೆರ್.ಇನಿ ಕೇರಳದ ಪ್ರಶ್ನೆ ಚಿಂತನೆದಕುಲು ಅವ್ವೇ ಬೇಲೆನ್ ಮಲ್ತೊಂದುಲ್ಲೆರ್.ಶಿವ ದೇಲ್ಯೊಲೆಗ್,ಜೋಗಿ ಮಠೊಕ್ಲೆಗ್,ದೈವಾಲ್ಯೊಲೆಗ್ ಇಜ್ಜಾಂದಿ ಬ್ರಹ್ಮಕಲಶೊನು ಅಷ್ಡ ಮಂಗಲ ಪ್ರಶ್ನೆ ದೀದ್  ಮಲ್ಪಾಯೆರೆ ಪಂಡೆರ್.ಉಂದು ನಮಕ್ ಗೊತ್ತಾವಂದಿಲೆಕ್ಕ ನಡಪುನ ಧಾರ್ಮಿಕ ಆಕ್ರಮಣನಾ ಅತ್ತ್ ಮತಾಂತರನಾ ತೆರಿಯೊಂದಿಜ್ಜಿ.

           ವಾದ್ಯ ಉರಿಪುನವು ಬಜನೆಂದ್ ಪನ್ಪುನಕುಲುಲ್ಲೆರ್.ವಾದ್ಯ ಸೊರೊ ಭಜನೆಯತ್ತ್.ವಾದ್ಯ ಉರಿಪುನಗ ಬಜನೆನ್ ನುಡಿಸವೆರಾತೆ.ವಾದ್ಯೊನು ಕೋಲ,ನೇಮ,ದೇವೆರೆ ಬಲಿ ಉಚ್ಚಯೊಗು,ಕಡೆಕ್ ಎಡ್ಡೆ ಕೆಲಸೊಗ್ಲಾ,ಕರಿದ್ ಪೋಯಿನಕ್ಲೆ ಚಟ್ಟ ತುಂಬೊಂದು ಪೋನಗಲ ಉರಿಪುವೆರ್.ಮೂಲೊಡು ದೈವ ತೆಂಬರೆಡೇ ಜೋಗೊಡಾದ್,ತೆಂಬರೆಡೇ ನೇಮ ಬಿರಿಯೊಂತ್ ನಿ.ದುಂಬುಗು ದೈವದ ಕಲೊಕು ತಾಸೆ ,ದೋಲು ,ಬಾಂಕೆ/ಸುತಿ,ನಾಗಸರ ಬೈದ್ ನಿ.ಅವೆರ್ದ್ ದುಂಬು ಸೊನ್ನೆ ಪಂಡ ಕೊಂಬು ಉರಿತೊಂತೆರ್.ರಾಜಂದೈವೊಲು ಕೆಲವೊಂಜಿ ಇಸೇಸ ನುಡಿ ಕೊರ್ಪುನ ಪೊರ್ತುಗು ಇಡೆಇಡೆಟ್ ನುಡಿತ ಕಡೆಕ್ ಕೊಂಬು ಉರಿಪುವೆರ್.ಒಂಜೇ ವಾದ್ಯೊನು ಮದಿಮೆಗ್ಲಾ,ಸಾವುಗ್ಲಾ ಉರಿಪುನಗ ರಾಗ ಒಂಜತ್ತತ್ತೆ?.ಒಂಜೇ ವಾದ್ಯೊಡು ಉರಿಪುನಗಲ ರಾಗ ಬೇತೆ ಬೇತೆನೆ.ಇನಿ ಕೆಲವೊರ ಒವೆನ್ ಓಲು ಉರಿಪೊಡುಂದು ತೆರಿಯಂದೆ ಬಾಲೆ ಜೆಪುಡಾವುನ ಪದ "ಅತ್ತಿತ್ತ ನೋಡದಿರು ಅತ್ತು ಹೊರಲಾಡದಿರು" ಪಂಡ್ ದ್ ದೈವದ ಪೊಡಿನಲಿಕೆಗ್ ಉರಿತೊಂದುಲ್ಲೆರ್.ದಾಯೆಗಿಂಚಾಂಡ?.ಒಂಜೇ ವಾದ್ಯೊಡು ಬೇತೆ ಬೇತೆ ಸಂದರ್ಬೊಡು ಬೇತೆ  ಬೇತೆ ರಾಗೊಡು ಉರಿತ್ ಲೆಕೊನೆ ಭಜನೆಲಾ ಇಂಚ ಪನ್ಪುನ ಭಜನೆಲ,ಮರಣದ ಭಜನೆಲ ಬೇತೆಬೇತೆಯಾದಿಪ್ಪುಂಡು.ಅವ್ಲು ಉರಿತಿ ರಾಗೊನು ಮೂಲು ಉರಿಪೆರಾಪುಜಿ.

  ಅಂಚನೇ ದೇವಸಾನದ ಭಜನಾ ಮಂದಿರೊಡು,ಇಲ್ಲಲ್ ಮಲ್ಪುನ ಬಜನೆನ್ ದೈವದ ನಡೆಟ್ ದೈವದ ಸುತ್ತು ಬಲಿಕ್ ಪನೆರಾಪುಜಿ. ದೈವದ ಕಲತ ಸಂದಿ ಪಾಡ್ದನೊಲೇ ಬೇತೆ.ಬೀರ ಬೇತೆನೆ,ಭಜನೆ ಬೇತೆನೆ.ಅವುಲಾ ಉಂದುಲಾ ಒಂಜೆಂದ್ ವಾದಿಸಂಡ ಅವೆಕ್ ಅರ್ಥ ಇಜ್ಜಿ.ದೈವದ ಕಲೊಟು ಭಜನೆ ಮಲ್ತ್ಂಡ ದಾದ ಹಾಳಾಪುಂಡುಂದು ಕೆಲವೆರ್ ಕೇನುವೆರ್.ಅವ್ಲು ಹಾಳ್ ಲ ಇಜ್ಜಿ,ಫಲಲಾ ಇಜ್ಜಿ.ಅವ್ಲು ಭಜನೆ ಪಂಡ್ ಜರ್ಡ ದೋಷಲಾ ಬರ್ಪುಜಿ.ಫಲಲಾ ಇಜ್ಜಿ.ಇನಿ‌ ನೇಮ ಕಟ್ಟ್ ನ ದೈವದ ಪಟ ಇಲ್ಲಲ್ ದೀಪುನತ್ತಂದೆ ದೈವೊಲೆಗ್ ಸಿನೆಮಾ ದಾಟಿದ ವಾ ವಾ ನಮುನೆದ ಭಕ್ತಿ ಗೀತೆಲೆನ್ ಪನೆರೆ ಸುರು ಮಲ್ದೆರ್.ಸುದ್ದ ಓಮದಡೆ ಗಣೋಮ ಬೈದ್ಂಡ್,ಬೆಮ್ಮೆರೆ ಕಲ್ಸೆ ಕಟ್ಟುನಡೆ ಬ್ರಹ್ಮ ಕಲಶ ಬೈದ್ಂಡ್,ಕಲ್ಲ್ ನಾಟಾವುನಡೆ ಪ್ರತಿಷ್ಠೆ ಬೈದ್ಂಡ್,ಸಾನದೊಕ್ಕೆಲ್ ದೈವ ಪ್ರತಿಷ್ಟೆಯಾಮಡ್.ದೈವಾರಾದನೆ ಪಂಡ ಇನಿತ ಜವನೆರೆಗ್ ಜೋಕ್ಲಾಟಿಕೆ ಆಯಿಲೆಕ ಆತ್ಂಡ್. ಮಾನಿ ಮಕ್ಕಲಾಟಿಕೆಯಾಂಡಲ ಮಾಯೆ ಮಕ್ಕಲಾಟಿಕೆಯತ್ತ್.ತಪ್ಪು ಮಲ್ತ್ಂಡ ದೈವ ಮಾನೊಗು ಕಟ್ಟುನೆನ್ ತರೆಕ್ ಸುತ್ತಾವಂದೆ ಬುಡಂದ್.ದೈವ ಶಾಂತಿ ಸಮಾದಾನೊಡು ಬೈದ್ ನ ಚರಿತ್ರೆ ಇಜ್ಜಿ.ಕೆರೊಂದು,ಬೂಡುನು ನಾಶ ಮಲ್ತೊಂದು ಬೈದ್ ನಿ.ಬೂಡುಡು ತಪ್ಪಾನಗ ಕಂಜಿ ಕೈಕಂಜಿ, ಕಡೆಕ್ ತೊಟಿಲ್ದ ಬಾಲೆನ್ಲ ಬುಡಂದೆ ನಾಶ ಮಲ್ದ್ಂಡ್.ದೂಪೆದ ಮಿತ್ತ್ ಪೊರಿಪೊದ್ದೊಲು ಪಾಡ್ದ್ ನೇಮ ನಡಪುನ ಜಾಗಲ ಉಂಡು.ತಪ್ಪು ಮಲ್ತ್ಂಡ ಕಟ್ಟ್ ನಾಯನ್ಲ ,ಮುಕ್ಕಾಲ್ದಿನ್ಲಾ,ಕರಿಪುನಾಯನ್ಲಾ ದೈವ ಕೆರಂದೆ  ಬುಡ್ ತಿಜಿ,ದೈವ ತಪ್ಪು ಮಲ್ಪಾಯೆರೆಂದ್ ಉಪ್ಪುನಿ.ಆಚಾರೊಡು ತಪ್ಪು ಮಲ್ತರ್ಡ ಇಚಾರೊಡು ಸರಿ ಮಲ್ತೊನೊಡು. 

      ತಪ್ಪು ಮಲ್ತಿ ದುಂಬುದ ಸಂಸಾರದಕ್ಲೆನ್ ಅಕ್ಲೆ ವಂಶ ಪಾರಂಪರ್ಯ ಉಪ್ಪುನಡೆಮುಟ್ಟ ದೈವ ಒರಿಯಗಾಂಡಲ ಮರ್ಲ್ ಪತ್ತಾವೊಂದೆ ಬೈದ್ಂಡ್.ನಿಕ್ಲೆ ಸುತ್ತಮುತಲಿಗೆದ ಕುಟೊಮೊಲೆನ್ ಒರ ತೂಯರ್ಡ ಯಾನ್ ಪಂಡಿ ಪಾತೆರ ಸತ್ಯನ,ಸುಳ್ಳಾ ನಿಕ್ಲೆಗೆ ತೆರಿಯು.ದೈವ ಸರ್ರದ ಪಿದಯಿ ದಾಲ ತೋಜುಲೆಕ ಮಲ್ಪುಜಿ.ಸರ್ರದ ಉಲಯಿ ಸಿರ್ಕ್ ಸಂಕಡೊನು ಕೊರ್ದು ಕಡೆಮುಟ್ಟ ಗೊತ್ತು ಮಲ್ಪುಜಿ.ಕಡೆಕಾನಗ ಗೊತ್ತು ಮಲ್ಪುಂಡು.ಅಪಗ ಕಾಲ ಕರಿದುಪ್ಪುಂಡು.ಉಂದು ತುಳುನಾಡ ದೈವದ ಕಲೆ ಬೊಕ್ಕ ಕಾರ್ನಿಕ.ಇನಿಕಾನಗ ದೈವದ ಕಲೊಕು ಆಡಲ್ತೆದ ಸಮಿತಿಲು ಬತ್ತ್ ದ್ ಅವ್ಲು ಜವನೆರೆ ಆಡಲ್ತೆ ಸುರಾದ್,ಪೆರಿಯಾಕ್ಲ್ ದೂರ ಉಂತುಲೆಕಾಂಡ್.ಜವನೆರೆ ಒಟ್ಟುಗು ದೈವಾರಾದನೆ ಕಾಸ್ ದ ಪಿರವು ಪೋಂಡ್,ಕಟ್ಲೆಕಡಿಂಡ್.ಪೆದ್ದಿ ಅಪ್ಪೆಲೆಕ,ತಾಂಕಿ ತಮ್ಮಲೆಲೆಕ ನಮ ನಂಬುನ ಒರುಟು ಸಾಂಕೊಂದು ಬನ್ನಗ ದೈವ ನಮ್ಮ ಬೇನೆ ಬೆಸರ್ಕೆಗ್ ಬೆರಿ ತಾಂಗಾವೊಂತ್ಂಡ್.ಇನಿ ನಮ ಪಾಲಿತೊಂತ್ ನ ದೈವೊಲೆನ್ ಬೇತೆಕ್ಲ್ ತಾಂಕುಲೆಕಾಂಡ್.ದೈವ ಅಕ್ಲೆನ್ ಮನಸಾರೆ ಒತ್ತೊನಂದ್.ಒಂಜಿ ಕಾಲೊಡು ದೈವದ ಕೊಡಿಯಡಿಕ್ ಬರಂದಿನಕುಲು ಇನಿ ದೈವ ಪ್ರತಿಷ್ಠೆ, ಬ್ರಹ್ಮ ಕಲಶ ಮಲ್ತೊಂದುಲ್ಲೆರ್. .ನಮ್ಮ ದೈವೊಲೆ ಕಲೊಕು ದೇವೆರೆ ಸುಗಿಪುದ ಭಜನೆದ ಅಗತ್ಯ ಇಜ್ಜಿ.ಪದಿನಾಜಿ ಕಟ್ಲೆಡ್ ಇಜ್ಜಾಂದಿ ಪೊಸತೊಂಜಿ ಕಟ್ಲೆ ದೈವೊಗು ಅಗತ್ಯಲಾ ಇಜ್ಜಿ.ಅಂಚಾದ್ ನಮ್ಮ ಮೂಲ ಕಟ್ಲೆಡ್ ಇಜ್ಜಾಂದಿನೆನ್ ದೈವದ ಕಲೊಕು ಕನತ್ ದ್,ಅವೆರ್ದ್ ಮೂಲ ಕಟ್ಲೆ ಪೊಳಿದ್ ಯುವ ಜನಾಂಗೊಗು ದಾದನಾ ಒಂಜಿ ಪೊಸ ರೂಪೊನು ತೋಜಾದ್ ಯುವ ಜನಾಂಗ ಉಂದೇ ಸರಿಂದ್ ಎಲ್ಲೆ ದಿಕ್ಕ್ ತತ್ತ್ ದ್ ನಡಪೆರೆ ನಮ ಸಾದಿ ಮಲ್ತ್ ಕೊರ್ಂಡ ಅವ್ಲು ದೈವದ ಮೂಲ ಪರಂಪರೆದ ಕಟ್ಟ್ ಕಟ್ಲೆ ಒರಿಯುಜಿ.ಅಂಚಾದ್ ಮೂಲ ಕಟ್ಲೆದ ದೈವಾರಾದನೆನ್ ಒರಿಪುನ,ದೈವೊಗು ಕರಿಪುನ ಬೇಲೆನ್ ಜವನೆರಾಯಿನ ನಿಕ್ಲೇ ಮಲ್ಪೊಡಾತೆ.

ದೈವಸಾನೊಡು ದೈವೊನೇ ಉಪ್ಪೊಡು ವಿನಃ ದೇವೆರತ್ತ್.ದೇವಸಾನೊಡು ದೇವೆರೇ ಉಪ್ಪೊಡು ವಿನಃ ದೈವೊಲತ್ತ್. ದಾಯೆ ಪಂಡ ತುಳುನಾಡ್ ಡ್ ಮೂಲೊಡು ದೈವಸಾನೊಲೆ ಇತ್ತ್ ನಿ.ಒಂಜಿ ಕಾಲೊಡು ದೈವಸಾನೊಲು ದೇವಸಾನೊಲಾನಗ  ದೈವೊಲೆನ್ ಬುಡ್ದು ಅಡೆ ದೇವೆರೆನ್ ಕುಲ್ಲಾಯೆರ್.ದೈವೊಲೆನ್ ಬುಡೆರೆ ಆವಂದಿ ಜಾಗೆಡ್ ದೇವೆರೆ ಗುಂಡದುಲಯಿ ದೇವೆರೆ ಬಲತ ಬಾಗೊಡಾ,ಅಗ್ನಿಮೂಲೆಡಾ ದೈವೊಲೆನ್ ಕುಲ್ಲಾಯೆರ್.ನಮ್ಮ ಮೂಲ ದೈವಾರಾದನೆ.ಅಂಚಾದ್ ನಮ ಸುರುಕು ದೈವಂದ್ ದೈವ ದೇವೆರ್ ದೀಲೆಕಂದ್ ಪನ್ಪ.ದೈವೊಲೆನ ಮಾತ ಕಟ್ಟ್ ಕಟ್ಲೆ ನ್ ಬದಲ್ತ್ ನಕ್ಲೆಗ್,ದೈವದ ಪುದರ್ ಬದಲ್ತ್ ನಕ್ಲೆಗ್, ಆಣ್ ದೈವೊನು ಪೊಣ್ಣು ಮಲ್ತ್ ನಕ್ಲೆಗ್ ದೈವ ದೇವೆರೆನ್ ದೇವೆರ್ ದೈವ ಮಲ್ಪೆರೆ ನನಲಾ ಆತ್ ಜಿ.ಅವು ದೈವಾರಾದನೆದ ತಾಕತ್ತ್.

ಒಂಜಿ ಕಾಲೊಡು ದೈವಸಾನೊಲು ದೇವಸಾನೊಲಾದ್ ದೈವೊಲು ದೇವೆರಾಯಿಲೆಕ,ಕೇತ್ರುಲ್ಲಾಯೆ/ಕ್ಷೇತ್ರದ ಉಲ್ಲಾಯೆ ಆದಿತ್ತಿ ಒಡೆಯೆ ಆದಿತ್ತಿ ದೈವೊಲು ಕ್ಷೇತ್ರಪಾಲೆ ಪನ್ಪಿ ಚಾಕಿರಿದಾಯೆ,ಬೇಲೆದಾಯೆ ಆಯಿಲೆಕ,ತುಳುವ ಮಣ್ಣ್ ದ,ತುಳು ಧರ್ಮದ ಸ್ವತಂತ್ರ ಸಗ್ತಿಲಾಯಿನ ದೈವೊಲು ಪರಿವಾರ ಸಗ್ತಿಲಾಯಿಲೆಕ, ಇನಿ ಕುಡ ದೈವದ ಪುದರ್ ಬದಲ್ತ್ ದ್ ದೇವೆರ್ ಮಲ್ಪುನ,ಕಟ್ಟ್ ಕಟ್ಲೆಲೆನ್,ಚಾಕಿರಿ ಭಾಗೊಲೆನ್ ಪೊಳಿಪುನ ವ್ಯವಸ್ಥಿತ ಉನ್ನಾರ ನಡತೊಂದುಂಡು.ತುಳುವೆರೆಗ್ ನನಲ ಜಡ ಬುಡ್ಜಿಂಡ,ಬುದ್ಧಿ ಬತ್ತ್ ಜಿಂಡ ದೈವಾರಾದನೆ ಇತ್ತ್ಂಡ್ ಪನ್ಪುನವೇ ಒಂಜಾತ್ ವರ್ಸೊಡು ಮಾಜಿದ್ ಪೋವು.ದಾಯೆ ಪಂಡ ದೈವದ ಗಂದಗಾಳಿ ತೆರಿಯಂದಿ,ಒಲ್ತನಾ ಪ್ರಶ್ನೆ ಚಿಂತನೆದಕುಲು ಪಂಡೆರ್ಂದ್  ದಾಖಲೆಗಿತ್ತ್ ನ ಮಣೆ ಮಂಚಾವುನು ಇತ್ತೆನೇ ಪೊತ್ತದಾತ್ಂಡ್.ಮುಗ ಮೂರ್ತಿಲೆನ್ ನೀರ್ ಗ್ ಪಾಡ್ ದಾತ್ಂಡ್, ಮಣೆ ಮಂಚ,ಮುಗ ಮೂರ್ತಿ ಪೊಸತ್ ಮಲ್ತಾತ್ಂಡ್. ಅಕುಲು ಎದುರುಂತುದು ದೈವಾರಾದನೆದ ಪಿರಾಕ್ ಗ್ ಸಾಕ್ಷಿ ಓಂಡು ಕೇಂಡ ತರೆ  ತಗ್ಗಾದ್ ನೆಲ ತೂಪಿನ ಕಾಲ ಬರು.

ತೆರಿಯೊನ್ಗ:-

  ಇನಿ ದೈವಾರಾದನೆದ ಅಜ ತಪ್ಪೆರೆ ಒಂಜಿ ಕಾರಣ ಚಾಕಿರಿ ವರ್ಗಂದ್ ಲ ಪನೊಲಿ.ದಾಯೆ ಪಂಡ ನೇಮದ ಕೊಡಿಯಡಿಕ್ ಒರಿ ಸಿನೆಮ ಮಲ್ಪುನಾಯೆ,ರಾಜಕೀಯದಾಯೆ ಬತ್ತೆಡ ಸುರುಕು ದೈವ ಆಯನ ಕೈ ಪತೊಂದು ತನ್ನ ತಿಗಲೆ ಮುಟ್ಟುದು ಯಾನುಲ್ಲೆ ಪಂಡ ಮೂಲು ದೈವ ಅಂಚ ಪನೆರೆ ಸಾಧ್ಯನೇ ಇಜ್ಜಿ‌‌.ದಾಯೆ ಪಂಡ ಅಕುಲೇರ್,ಮೊಕುಲೇರ್ಂದ್ ದೈವೊಗು ಗೊತ್ತಿಪ್ಪೆರೆ ಸಾಧ್ಯನೇ ಇಜ್ಜಿ..ಉಂದು ಚಾಕಿರಿದಾರೆ ಬೇಲೆ‌.ದಾಯೆ ಪಂಡ ಅರೆಗ್ ಗುರ್ತ ಮಲ್ಲಕ್ಲೆನ ಉಪ್ಪುಂಡತ್ತೆ.ಅಂಚ ಆರ್ನ ಕಾರ್ಬಾರ್ ನ್ ದೈವದ ಕಲೊಟು ತೋಜಾವೆರ್.ದುಂಬು ಪೂರ ದೈವ ಏರೆನ ಮೈ ಕೈ ಮುಟ್ಟುನ ಕೆರಮ ಇಜ್ಜಾಂಡ್,ಬೂಲ್ಯೊನು ದೂರೊರ್ದೆ ದೆತೊನ್ನಾರೆನ ಕೈಕ್ ಬೂರುಲೆಕ ಕೊರೊಂತ್ಂಡ್.ದುಂಬು ರಾಜಂದೈವದ ಕಲೊಟು ದೈವ ಭಂಡಾರದ ಮುಗ,ಕಡ್ಸಲೆನ್ ಪತಿ ಮಾನಿ (ಭಂಡಾರೊನು/ಕಿರ್ವಾಲ್ ನ್/ಆಯುಧ/ಕಡ್ಸಲೆನ್ ಪತೊಂದಿನ ಪತಿಮಾನಿ) ವಸಾಯೊಡು ಕಟಿಮಾನಿ ನ ಕೈಕ್ ಒಪ್ಪಿತೊಂತೆರ್.ಇನಿ ತಿಕ್ ನೌಲು ಪೂರ ತಿಕ್ ನ ದೈವೊಗು ಪೂರ ಮಾನೆಚ್ಚಿಲಾವೊಂದುಂಡು.ಓಡೆ ಮುಟ್ಟ ಪಂಡ ದೈವದ ಮುಗೊನ್ಲ ಮೊಕ್ಲೇ ಒಪ್ಪಿಪಾವೊನ್ನಡೆಮುಟ್ಟ ಎತ್ತ್ ದೆರ್.ದೈವದ ಕಲೊಟು ಇಜ್ಜಾಂದಿ ಉಚ್ಚಾಟನೆಲೆನ್ ಮೂಲ ಚಾಕಿರಿದಕುಲು ಮಲ್ತೊಂದುಲ್ಲೆರ್.ಇಂಚನೆ ಆಂಡ ದೈವದ ಮಿತ್ತ ನಂಬೊಳಿಗೆ ಮಯಕಾಯೆರೆ ಮೊಕ್ಲೆ ಕಾರಣೆರಾಪೆರ್.ಗಟ್ಟ ಜತ್ತ್ ದ್ ತುಳು ನಾಡ್ ಗ್ ಬತ್ತಿ ತುಳುನಾಡ ದೈವೊಲೆನ್ ಮೊಕ್ಲು ಕುಡ ಗಟ್ಟ ಬಡ್ತಾವೊಂದುಲ್ಲೆರ್ ಪಂಡ ದೈವದ ಕಲೊಕು ವೈದಿಕದಕುಲು ಮಲ್ಪುನ ಎತ್ತೇಸೊಗ್ಲ,ಕಟ್ಟುನಕುಲು ಮಲ್ಪಿ ಎತ್ತೇಸೊಗ್ಲ ದಾದ ಪರಕುಂಡು.ವೈದಿಕೆರಾಂಡಲ ದೈವದ ಚಾಕಿರಿನ್ ತುಳುನಾಡ ವ್ಯಾಪ್ತಿಡೇ ಮಲ್ತೊಂದುಲ್ಲೆರ್.ಚಾಕಿರಿದಕುಲು ದೈವೊನು ಗಟ್ಟದ ಮಿತ್ತ್ ಕೊನೊದು ಅಕ್ಲೆ ಬಂಜಿದ ಪಾಡ್ ತೂಯೆರ್ ವಿನಃ ಮೂಲ ಒಲ್ತ ಆರಾದನೆ ಪನ್ಪುನೆನ್ ಮದತ್ ಬುಡ್ಯೆರ್.

ದೇವೆರ್ ಸರ್ವಂತರ್ಯಾಮಿ ಪಟತ ಒರುಟು ಏಪಲಾ ತೂದು ಆರಾದನೆ‌‌ ಮಲ್ಪೊಲಿ.ದೇವೆರೆನ ಪೂಜೆ ಪುನಸ್ಕಾರ ಪೂರ ಕುಲ್ಲುದೆ.ದೇವೆರೆ ಪುದರ್ ಜಗತ್ತ್ ದ ಎಚ್ಚಿನಕ್ಲೆಗ್ ಗೊತ್ತುಂಡು.ದೈವೊಲೆನ ಬಗೆಟ್ ತುಳುವೆರೆಗ್ ಮಾತ್ರ ಗೊತ್ತಿಪ್ಪುನಿ.ದೈವಾರಾದನೆ ತುಳುನಾಡ್ ಗ್ ಮಾತ್ರ ಸೀಮಿತ ಇತ್ತಿ ಆರಾದನೆ,ಕೊಲ ನೇಮದ ಕೊಡಿಯಡಿತ ಆರಾದನೆ‌‌‌.ನೇಮ ಕಟ್ಟುನ ದುಂಬು,ನೇಮ ಪಿರಿ ಬೊಕ್ಕ ಅವ್ಲು ದೈವದ ಒರು ಉಪ್ಪುಜಿ.ಅಂಚ ದೈವೊಲೆನ ಪಟ ದೀದ್ ಆರಾದನೆ ಇಜ್ಜಿ.ದೈವೊಲೆನ ಉಂತುದೇ ಆರಾದನೆ

ವೀಡಿಯೋ ಕೊಂಡಿ-https://youtu.be/6fjSj6dyp7w