ನಾಥ ಪಂಥ ಮಂಗಲಾದೇವಿ ಕದಿರೆ ಮಂಜುನಾಥ

     ನಾಥ ಪಂಥ ಮಂಗಲಾದೇವಿ ಕದಿರೆ ಮಂಜುನಾಥ

         

           ‌ಅಹೆಪಾ ಸಾಮ್ರಾಜ್ಯದ ಆಡಳ್ತೆದಡಿತ ಕೇರಳ ಮಲಬಾರ್ ಪ್ರಾಂತ್ಯದ ಮಹಾರಾಣಿ ಆಯಿನ ಪ್ರಮೀಳೆ/ ಪ್ರೇಮಲಾದೇವಿ ಒರ ನಾಥ ಪಂಥದ ಸಂಸ್ಥಾಪಕೆರಾಯಿನ ಮತ್ಸ್ಯೇಂದ್ರ ನಾಥೆರೆನ್ ಅಲೆನ ರಾಜ್ಯೊಗು ಆರ್ ಬತ್ತ್ ದುಪ್ಪುನಗ ಬೇಟಿಯಾಪಲ್. ಯೋಗಿದ್ವಯೆರಾಯಿನ ಮತ್ಸ್ಯೇಂದ್ರ ನಾಥ,ಗೋರಕ್ಷ ನಾಥೆರೆ ಧರ್ಮ ಪ್ರಚಾರದ ಸಂದೇಶೊಲು ಅಲೆನ ಮಿತ್ತ್ ಪ್ರಭಾವ ಬೀರುಂಡು.ಅಂಚ ಆಲ್ ಇಹ ಲೋಕದ ಸಕಲ ಸಂಪೊತ್ತುಲೆನ ಮಿತ್ತ್ ನಿರಾಸಕ್ತಿಡ್,ಸಿಮಹಾಸನ ಬುಡುದು,ಸರ್ವೊನ್ಲಾ ಬುಡುದು. ಮತ್ಸ್ಯೇಂದ್ರ ನಾಥೆರೆ ಅನುಯಾಯಿಯಾದ್ ನಾಥ ಪಂಥದ ಸುರುತ ಯೋಗಿನಿಯಾದ್ ದೀಕ್ಷೆ ಪಡೆಪಲ್.

        ದುಂಬುಗು ಅಲೆಗ್ ಮತ್ಸ್ಯೇಂದ್ರ ನಾಥೆರ್ ಪಿಂಗಳಾದೇವಿಂದ್ ಪುದರ್ ದೀಪೆರ್.ಸ್ತ್ರೀ ಸಾಮ್ರಾಜ್ಯದವ ವಿರಾಗಿಣಿ ರಾಣಿ ಪಿಂಗಳಾದೇವಿ ಅರೆನೊಟ್ಟುಗು ಸಂಚಾರ ಮಲ್ತೊಂದು ಕೇರಳೊರ್ದು ತುಳುನಾಡನೇತ್ರಾವತಿ-ಪಲ್ಗುಣಿ ಸಂಗಮದ ಕರೆ ಬರಿಟ್ ತಪಸ್ಸ್ ಮಲ್ಪೆರೆ ಸುರು ಮಲ್ತ್ ದ್ ಕೈತಲ್ದ ಜಾಗೆಲೆಡ್ ಬಾರೀ ಪ್ರಸಿದ್ದಿಗ್ ಬರ್ಪಲ್.ಅಲೆನ ದರ್ಶನ ಮಲ್ತ್ ನಕ್ಲೆಗ್ ಕಷ್ಟ ಕೊರದೊಲು ದೂರಾದ್ ಎಡ್ಡೆ ಆವೊಂತ್ಂಡ್ ಗೆ.ದುಂಬುಗು ಆಲ್ ಅವುಲೆ ದಾದನ ಸಿರ್ಕ್ ಡ್ ತೀರುವಲ್.ಅವೆರ್ದ್ ಬೊಕ್ಕ ಕೈತಲ್ದ ಜಾಗೆದ ಜನೊಕುಲು ಅಲೆನ್ ಮಂಗಳಾದೇವಿಂದ್ ಲೆಪ್ಪೆರೆ ಸುರು ಮಲ್ತ್ ದ್ ಅಲೆಗೊಂಜಿ ಸಾನ ಕಟ್ಟಾಯೆರ್.ಕಾಲಾನುಬಾಗೊಡು ಬಾರೀ ವೈಬವೊಡು ನವೀಕರಣ ಮಲ್ತ್ ದ್ ದುಂಬುಗು ಈ ಪ್ರಾಂತ್ಯ ಮಂಗಳಾಪುರಂದ್ ಪ್ರಸಿದ್ದಿಗ್ ಬತ್ತ್ಂಡ್.ಪಿಂಗಳಾ ಪನ್ಪಿ ಸವ್ದ ಮೂಲತಃ ಸಂಸ್ಕೃತ ಸವ್ದ ಆದಿತ್ತ್ ದ್ ಸಂಸ್ಕೃತದ ಲ ಕಾರ ಕನ್ನಡೊಗು ಳ ಕಾರ ಆದ್ ಮಂಗಳಂದಾಂಡ್.

         ಮತ್ಸ್ಯೇಂದ್ರ ನಾಥೆರೆ ಪುದರ್ ಮಚ್ಛೇಂದ್ರ ಅದ್ ಬದಲಾದ್ ಮಂಜಿನಾಥ ಆದ್ ದುಂಬುಗು ಮಂಜುನಾಥ ಆಂಡ್.ಮಂಜುನಾಥೆನೇ ಮತ್ಸ್ಯೇಂದ್ರಾದಿನವನಾಥೆರೆ ರೂಪ ತಾಳಿಯೆಂದ್ ಕದಳೀ ಕ್ಷೇತ್ರ ಮಹಾತ್ಮೆಡ್ ಉಲ್ಲೇಖ ಉಂಡು

        ಈ ಆಧಾರೊಡು ತೂಪುಂಡ ಮಂಜುನಾಥನ ಮೂಲ ಉದ್ಬವ ಲಿಂಗ ಸೋಮ ಸೂತ್ರೊಲಿಜ್ಜಂದಿ ಮೊರಬು ಶಿಲೆತ ಒಂಜಿ ರೂಪ.ದೇಲ್ಯದ ಉಚ್ಚಯ ಮೂರ್ತಿ ಬಿಂಬೊ ದ್ಯಾನಾಸಕ್ತ ಸಮಭಂಗಿಡಿತ್ತ್ ದ್ ಚತುರ್ಬಾಹು ಜಟಾಮುಕುಟ ಉಂಡು.ಮುಕುಟೊಡು ಋಷಿನ ರೂಪದಂಚ ಉಂಡು,ಯಜ್ಞೋಪವೀತ ಉಂಡು.ಮಿತ್ತ ರಡ್ಡ್ ಕೈಕುಲೆಡ್ ಶಂಖ ಬೊಕ್ಕ ಅಕ್ಷಮಾಲೆಲಿತ್ತ್ ದ್,ತಿರ್ತ ಕೈಕುಲು ಅಭಯವರದ ಮುದ್ರಾ ಹಸ್ತದೊರು ಉಂಡು‌.ಈ ಮೂರ್ತಿ ಸಂಪೂರ್ಣ ನಾಥ ಪಂಥದ ಒರುವಾದಿತ್ತ್ ದ್ ಶಿವನ ಬಿಂಬದಲೆಕ ಇಜ್ಜಿ.ಉಂದೆನ್ ತೂನಗ ಕದಿರೆ ಮಂಜುನಾಥ ದೇಲ್ಯೊಗ್ಲಾ,ಮಂಗಳಾದೇವಿ ದೇಲ್ಯೊಗ್ಲಾ ನೇರ ಸಮ್ಮಂದ ಇತ್ತ್ ನ ತೆರಿಯುಂಡು.

 

  

ತುಳುನಾಡ ದೈವಾರಾದನೆಡ್ ದೈವದ ಉಜ್ಜಾಲ್ ಡ್ ಕುಲ್ಲುದು ಪೂಜೆ ಪಡೆಯುನ ಏಕೈಕ ವ್ಯಕ್ತಿ ಪಂಡ ಕುಡಲದ ಕದಿರೆ ಮಠತ ಯೋಗಿ ಮಹಾರಾಜೆರ್.ಮೂಲು ಕುಲ್ದಿನಾರ್ ನಾಥ ಪಂಥದ ಗುರುಕುಲಾಯಿನ ರಾಜಯೋಗಿ ನಿರ್ಮಲನಾಥ ಯೋಗಿಲು.ತನ್ಕುಲೆ ಸಿದ್ಧಿದ ತಾಂತ್ರಿಕ ಸಗ್ತಿ ಧೂಮಾವತಿನ್ ತನ್ಕುಲೊಟ್ಟುಗು ಆನಿದ ಕಾಲೊಡು ಲೆತೊಂದು ಬತ್ತ್ ದ್ ಆರಾದನೆ ಮಲ್ತ್ ನೆರ್ದಾದ್ ಆನಿರ್ದ್ ಇನಿ ಮುಟ್ಟಲ ಕದಿರೆ ಮಠತ  ಧೂಮಾವತಿ ದೈವದ ಉಜ್ಜಾಲ್ ಡ್ ನವರಾತ್ರೆದ ಕಡೆತ ದಿನ ಮಾರ್ನೆಮಿ/ ಮಹಾನವಮಿದಾನಿ ಸ್ವಾಮೀಜಿಲೆನ್ ಕುಲ್ಲದ್ ವಿಶೇಷ ಪೂಜೆ ಮಲ್ಪುವೆರ್. (ತುಳುನಾಡ ಜುಮಾದಿ ಅತ್ತ್).ದುಂಬು ಜೋಗಿ ಸನ್ಯಾಸಿಲೆ ಜುಂಡಿ ಉತ್ತರ ಭಾರತೊಡ್ದು ಬನ್ನಗ ಗುರುಪುರ ಕೈಕಂಬದ ಕೈತಲ್ದ ಬಾರೆಬಿತ್ತ್ ಲ್ ಪನ್ಪಿ ಜಾಗೆಡ್ ಯೋಗ ಸಾಧನೆ ಮಲ್ಪುನೊಟ್ಟುಗು ತಾಮಸಿಕ(ನೆತ್ತೆರಾವಾರ ಕೈಕೊನುನ ಸಗ್ತಿ) ತಾಂತ್ರಿಕ ಸಗ್ತಿ ಧೂಮಾವತಿನ್ ಸಿದ್ಧಿ ಮಲ್ತ್ ನೆಡ್ದಾದ್ ಮಣೇಲ ಜುಮಾದಿಂದಾಂಡ್.ಮಣೇಲ ಜುಮಾದಿ ಏಪ ಮರ್ಲ್ ಜುಮಾದಿ ಆಂಡ್ ಪನ್ಪಿ ಇಚಾರ ತೆರಿಯುಜಿ.ಮಣೇಲ್ ಗ್ ನಾಥ ಪಂಥದ ಗುರುಕುಲು ಬತ್ತ್ ದ್ ಯೋಗ ಸಾಧನೆ ಮಲ್ತೊಂತೆರ್ ಪನ್ಪುನೆಕ್ ಇನಿಲಾ ಕಾಲ ಭೈರವೆ,ಜ್ವಾಲಾಮಾಯಿ(ದಕ್ಷ ಯಜ್ಞೊಡು ಸೂರ್ದ್ ಲಕ್ಕ್ ದ್ ಬತ್ತಿನ ಪಾರ್ವತಿ),ಮಂಜುನಾಥನ,ಮಣೇಲ ಜುಮಾದಿನ(ಇನಿತ ಮರ್ಲ್ ಜುಮಾದಿನ) ಆರಾಧನೆ ಮಲ್ಪುನ ಮಣೇಲ ಮಟ್ಟಿ ಜೋಗಿ ಮಠನೇ ಸಾಗ್ಸಿ.ಅವ್ಲೊಂಜಿ ಕಲ್ಲ ಬರವುದ ಸಾಸನ ಇತ್ತ್ ದ್ ಅವೆತ ಅಚ್ಚರೊಲು ಮಾಜಿದ್ ಪೋತ.

   ದುಂಬುಡ್ದಿಂಚ ತುಳುನಾಡ್ ಡ್ ಮೂಡದಾಯೆ/ಕಾಳಬೈರವೆ/ಮುಂಡದಾಯೆ/ವೈದ್ಯನಾಥನ ಆರಾಧನೆ ಇತ್ತ್ ದ್ ತುಳುನಾಡ ಜೋಗಿ ಸನ್ಯಾಸಿಲು ಬತ್ತ್ ದ್ ಸಿದ್ಧಿ ಮಲ್ತ್ ನ ಜಾಗೆಲೆಡ್ ವೈದ್ಯನಾಥನ ಆರಾದನೆ ಇನಿಲಾ ಉಂಡು.ಅವ್ಲು ಜೋಗಿಲೆ ಕಟ್ಟೆಲ  ಉಂಡು.ವೈದ್ಯನಾಥನ ಆರಾದನೆ ಉಪ್ಪುನ ದೈವಾಲ್ಯದ ಸುತ್ತ ಮುತಲಿಗೆಡ್ ಜೋಗಿಲು ಬದ್ ಕೊಂದಿಪ್ಪುವೆರ್.

    ತುಳುನಾಡ್ ಡ್ ದುಂಬು ಪೂರ ಓಲೇ ನೇಮನೆರಿ ನಡಪಡ್ ಅವೆರ್ದ್ ದುಂಬು ನೇಮ ನೆರಿ ಮಲ್ಪವುನಕುಲು ಕದಿರೆಗ್ ಪೋದು ಕಾಲಭೈರವಗ್ ತಾರಾಯಿದ ಎಣ್ಣೆ ಕೊರ್ದು, ಮಂಜುನಾಥನ,ಜೋಗಿ ಅರಸುಲ್ನ ಅಪ್ಪಣೆ ದೆತೊಂದು ಬತ್ತ್ ದ್ ಬೊಕ್ಕ ನೇಮ ನೆರಿ ನಡಪಾವೊಂತೆರ್.ಆತೇ ಅತ್ತ್ ತುಳುನಾಡ ದೈವೊಲು ಲಕ್ಕ್ ದುಂತೊಡಂಡ ಜೋಗಿಲೆ ನಾಗಸರ,ಬಾಂಕೆ/ಸುತಿತ ಸೊರೊ,ತಾಸೆ ,ದೋಲುದ ಸೊನ್ನೆ/ಕೊಂಬುದ ಸೊರೊ ಬೋಡಿತ್ತ್ಂಡ್.ಅಂಚಾದ್ ದೈವ ಸುರುಕಾದ್ ಪೊಡಿ ನಲಿಕೆ ಆಯಿ ಕೂಡ್ಲೆ ವಾದ್ಯ ಸೇರಿಗಾರೆರೆಗ್ ಪುರ್ಪದ ಮರ್ಯಾದಿ ಕೊರೊಂತ್ಂಡ್.ರಡ್ಡನೆ ಬಾಗೊಡು ತುಲುನಾಡ್ ಡ್ ದೈವಾರಾದನೆನ್ ಒರಿತ್ ನ ಜೋಗಿ ಮಠತ ಗುರುಕುಲೆಗ್ ಗುರು ಕಾನಿಗೆಂದ್ ಸೇರಿಗಾರೆರೆ ಮುಕಾಂತರ ತಾರಾಯಿದ ಮರ್ಯಾದಿ ಕೊರ್ಪುಂಡು. 

ಜೋಗಿಲೆ ಇಲ್ಲಲ್ ಈ ಸಾಲ್ ಲೆನ್ ನಿಚ್ಚ ನೆನವರಿಕೆ ಮಲ್ಪುಗ

"ಅಗಮ್ ಅಗೋಚರ್ ನಾಥ್ ತುಮ್

ಪರ ಬ್ರಹ್ಮ ಅವತಾರ್.

ಖಾನನ ಕುಂಡಲ್ ಶಿರ್ ಜಠಾ

ಅಂಗ್ ವಿಭೂತಿ ಅಪಾರ್.

ಸಿಧ್ದ ಪುರುಷ್ ಯೋಗೇಶ್ವರೋ

ದೋ ಮುಝ್ ಕೋ ಉಪದೇಶ್.

ಹರ್ ಸಮಯ್ ಸೇವಾ ಕರೋ 

ಸುಬಹ್ ಶಾಮ್ ಆದೇಶ್.

ಆದೇಶ್,ಆದೇಶ್ .