ಚರವಾಯಿನ ರಾವು ಗುಳಿಗನ್ ಕಲ್ಲ್,ಕಟ್ಟೆಲೆಡ್ ಸ್ಥಿರ ಮಲ್ಪಡೆ

       ಚರವಾಯಿನ ರಾವು,ಗುಳಿಗನ್ 

          ಕಲ್ಲ್,ಕಟ್ಟೆಲೆಡ್ ಸ್ಥಿರ ಮಲ್ಪಡೆ

ಬೂಮ್ಯಪ್ಪೆನ  ಮಟ್ಟೆಲ್ಡ್ ಗುಳಿಗ ಬುಕ್ಕ ಪಂಜುರ್ಲಿ ದೈವೊಗು ಅಗೆಲ್

      ರಾವು ಪಂಡ ಗುಡ್ಡೆಡ್ ಪ್ರತ್ಯೇಕವಾದ್ ಬಲಸುನೊಂಜಿ ಸಗ್ತಿ.ಅವೆನ್ ಸಾನೊಡಾ,ಇಲ್ಲಡಾ,ಕಟ್ಟೆಡಾ ನಂಬುನಂಚಿ ಕಟ್ಟಿಜ್ಜಿ.ಗುಳಿಗೆ ಬನೊಟಿಪ್ಪುನಂಚಿ ಒಂಜಿ ಸಗ್ತಿ.ಅಯಿಕ್ಲ ಸಾನ,ಕಟ್ಟೆಂದ್ ಮಲ್ಪುನ ಕಟ್ಟಿಜ್ಜಿ.ಇನಿ ಕೋಡೆ ದಾನೇತ್ಂಡ್ ಪಂಡ ರಾವುಗ್ಲ ಕಟ್ಟೆ ಕಟ್ವೆರ್,ಗುಳಿಗಗ್ಲ ಕಟ್ಟೆ ಕಟ್ವೆರ್.ರಾವು ಗುಳಿಗೆಂದ್ ಪಂಡ್ ದ್ ಒಂಜೆ ಕಟ್ಟೆಡ್ ರಡ್ಡ್ ದೈವೊನು ಪಾಡ್ವೆರ್.ದಾದಾಂಡ್ ಪಂಡ ಒಂಜಿ ಅಂಗಿದುಲಯಿ ರಡ್ಡ್ ಸರ್ರೊನು ಪೊಗ್ಗಾಯಿಲೆಕಾಂಡ್.ರಾವು ಬೇತೆನೆ,ಗುಳಿಗೆ ಬೇತೆನೆ.ಬಲಸ್ ನಗಲ ರಾವುಗು ಬೇತೆನೇ ಬಲಸೊಡು,ಗುಳಿಗಗ್ ಬೇತೆನೇ ಬಲಸೊಡು.ಒಂಜಿ ಕಟ್ಟೆಡ್,ರಡ್ಡಿರೆ ಪಾಡ್ದ್ ಬಲಸ್ ದ್ ರಾವು ಗುಳಿಗಗ್ಂದ್ ಪಂಡ ಅವು ತುಳುವ ಕಟ್ಟತ್ತ್.ಅವು ತಪ್ಪು.ಇತ್ತೆ ಒಂಜೇ ಗುಳಿಗಗ್ ಒಂಜಿ ಪಾಗರ ಸುತ್ತುಡು ರಡ್ಡ್ ಕಟ್ಟೆ ಕಟ್ಟ್ ದ್ ಅಸುರು ಕಿರಿಯೆದಕ್ಲೆಗೊಂಜಿ,ದೇವಕಿರಿಯೆದಕ್ಲೆಗೊಂಜಿಂದ್ ಕಟ್ಟೆ ಮಲ್ತ್ಂಡ ದೈವೊನು ಪುಡತಿಲೆಕಾವು.ಆ ಕಟ್ಟೆಗ್ ವಾಸ್ತು ಪನಡ್,ಪ್ರತಿಷ್ಠೆ ಮಲ್ಪಡ್ ಅವು ಪೂರ ಕಾಸ್ ಗ್ ಬೋಡಾದ್ ಮಲ್ಪುನ‌ ಡೊಂಬರಾಟ.ರಾವುಗು ಚರ ಕಲ್ಲ್ ಡ್ ಬೋಡಿತ್ತ್ ನ ಪೊರ್ತುಡು ಬೋಡಿತ್ತ್ ನ ರೀತಿಡ್ ಅಗೆಲ್ ದ ಕಿರಮ ಮಲ್ಪುನ.ರಾವು ‌ಗುಳಿಗೆ ಸ್ಥಿರ ಅತ್ತ್,ಚರ/.ಏಪಲಾ ಅಂತ್ರಾಟೊಡು ತಿರ್ಗೊಂದಿಪ್ಪುನ.ಅಂಚಾದ್ ಚರ ಕಲ್ಲ್ ಡ್ ನಂಬುವೆರ್  ಕುಟುಂಬದ ರಾವುಗು ಸ್ಥಿರವಾದ್ ಕಲ್ಲ್ ಪಾಡುನ ಕ್ರಮಲಾ ದುಂಬು ಇಜ್ಜಾಂಡ್.ಅವೆಕ್ ಒಂಜಾತ್ ಜಾಗೆ ತೂದು ಅಂಬಿ ಅಡ್ತ್ ದ್ ಇಜ್ಜಾ ಅಂಬಿ ನೀರ್ ತಲಿತ್ ದ್ ಒಂಜಿ ಕಾಟ್ ಕಲ್ಲ್ ಪಾಡ್ದ್ ಪನಿ ಕೇಪುಲ ಪೂ ಪಾಡ್ದ್,ಪನಿ ಕುರ್ದಿ ತಲಿತ್ಂಡ ಆ ಕಲ್ಲ್ ಸುದ್ದಾಂಡ್.ಬೊಕ್ಕ ದೈವೊನು‌ ಸಂಕಲ್ಪ ಮಲ್ತ್ಂಡ್ ಪಂಡ ದೈವೊನು‌ ನಮ ಉಂಡು ಮಲ್ಪುನಿ.ಇಜ್ಜಿಂಡ ನಮಡ ಒಂಜಾತ್ ಜಾಗೆ ಅವೆಕ್ ಬುಡ್ರೆ ಇತ್ತ್ಂಡ ರಾವುನ ಕಲ್ಲ್ ಅವ್ಲೇ ಇತ್ತ್ ದ್ ಅವೆನ್ ಬನತ ರೀತಿಡ್ ಬುಡ್ದು ಮಲ್ಪುನ ಕಟ್ಟುಂಡು.ಆಂಡ ಚರವಾದಿತ್ತ್ ನ ಸಗ್ತಿಯಾದಿತ್ತ್ ನೆರ್ದಾದ್,ಸ್ಥಿರವಾದಿಜ್ಜಂದಿನೆರ್ದಾದ್ ಅವು ಅಗತ್ಯ ಇಜ್ಜಿ.ಇಲ್ಲದ ಉಲಯಿಗ್ ಬರಂದೆ ಇಲ್ಲದ ಪಿದಯಿರ್ದ್ ಪಿದಯಿ ಉಪ್ಪುನ ದೈವ ಆಯಿನೆರ್ದಾತ್ರ ಉಲಯಿ ಮಲ್ಪುನ ಕಟ್ಟಿಜ್ಜಿ.

          ಗುಳಿಗಗ್ ಬನೊಟು ಕಟ್ಟುಂಡು.ಗುಳಿಗನ ಬನಂದ್ ಉಂಡು.ರಡ್ಡೆಕ್ ಒಂಜೇ ಕಟ್ಟೆ ಕಟ್ಟ್ ದ್  ಮಲ್ಪುನ ಕಟ್ಟಿಜ್ಜಿ.ರಾವು ಬೇತೆನೆ,ಗುಳಿಗೆ ಬೇತೆನೆ.ಅನುಕೂಲ ಶಾಸ್ತ್ರ,ನಮಡ ದುಡ್ಡಿತ್ತ್ ನೆನ್ ಹಾಳ್  ಮಲ್ಪೆರೆ ಒಂಜಿ ಸಾದಿ ಇಂಚ ಪೂರ ಕಟ್ಟೆ ಕಟ್ಟುನವು.ಚರ ಸಗ್ತಿನ್ ಚರ  ಕಲ್ಲ್ ಡ್ ನಂಬಿ ಬೊಕ್ಕ ಆ ಕಲ್ಲ್ ನ್ ದೆತ್ತ್ ದ್ ಬೇತೆ ಕೋಡಿಡ್ ದೀವೊಲಿ.ಬೋಡಾನಗ ಕುಡ ಸುದ್ದ ಮಲ್ತ್ ದ್ ದೈವೊನು ಆ ಕಲ್ಲ್ ಡ್ ಉಂಡು ಮಲ್ಪೊಲಿ.ಒಂಜಿ‌ ವೇಳೆ ಗುಳಿಗಗ್ ಬನಂದ್ ಇತ್ತ್ಂಡ ಮಾತ್ರ ಸ್ಥಿರ.ಕಲ್ಲ್ ಪಾಡ್ದ್ ನಂಬುಂಡ ಚರ.ಬನ ಇಜ್ಜಿಂದಾಂಡ ಚರನೆ.ಹಿರಿಯಾಕ್ಲ್ ಚರ ಕಲ್ಲ್ ಡ್ ಅವೆನ್ ಆರಾದನೆ ಮಲ್ತ್ ದ್ ಅವೆತ ಸಾದಿನ್ ತೊಜಪಾದೆರ್.ಕೋಲೊಡು ಗುಳಿಗೆ ನಿಜವಾದ್ ಬಲಿಪೆರೆ ಇಜ್ಜಿ.ಕಲ ಬುಡ್ದು ಪೋಯೆರೆ ಇಜ್ಜಿ,ಕಲ ಬುಡ್ದು ಬಂಡಿ ಪೋಯೆರೆ ಇಜ್ಜಿ. ಪತ್ತುನಕುಲು ಉಲ್ಲೆರ್ಂದ್ ಗುಳಿಗೆ ಬಲಿಪುನಿ.ಚೋರ್ನ ಒಯ್ಪುನಿ,ಶಾಮಿಯಾನ ಕುಂಟು ಪರಿಪುನಿ ಇಂಚ ಪೂರ ಇಜ್ಜಿ.ಅಂಚ ಬಲಿಪುನಗ ಸಾನಾದಿಗೆ ಬೂರ್ದು ಪೊತ್ತ್ಂಡ ಏರ್ ಜಬದಾರಿ?.ಮರಕ್ ಬಡ್ತೆರೆ ಇಜ್ಜಿ.ಆಯೆ ಬಲಿಪುನಗ ಜೋಕ್ಲು ಬಾಲೆಲು,ಪಿರಯದಕುಲು ಅಡಿಕ್ ಬೂರ್ದು ಗಾಯ ಆಂಡ ಜಬದಾರಿ ಏರ್?.ಕೋರಿನ್ ಬಿಚ್ಚಾದ್ ತಿನ್ರೆ ಇಜ್ಜಿ.ಪ್ರಾಣಿ ದಯಾ ಸಂಘದಕ್ಲ್ ದೂರು ಕೊರ್ಂಡ ತೊಂದರೆ ಆವು.ಗುಳಿಗೆ ಬಲಿಪುನಗ ಪತೊನ್ರೆಂದ್ 25 ಜನೊಕುಲೆಬ್ ಕಾಸ್ ಕೊರ್ದು ದೀಪುನ ಪರಿಸ್ಥಿತಿ ಬೈದ್ಂಡ್.ಗುಳಿಗಗ್ ಕಟ್ಟುನಾಯೆ ಕಲೊಟು ಪಂರ್ದ್ ನ್ ಪೊರಿಕ್ ಪುರ್ಂಚಿದ್,ಕುರಿ ನೀರ್ಡ್,ಬೊಂಡ ನೀರ್ಡ್ ಮೊರೆತ್ದ್  ತಿಂದೊಂದು ಪೊರಿತ ಉಂಡೆ ಮಲ್ತ್ ದ್ ದಕ್ಕುನವು ತಪ್ಪು.ಕಟ್ಟುನಕುಲು ದೈವ ಕಣ್ಣಾರೆ ತೂದು ಗಾಳ್ಯಾರ ಪೋಪುನೆನ್ ಮದತ್ ದೆರ್ ತೋಜುಂಡು.

   ಗುಳಿಗ ದೈವೊಗು ಮೂಲದ ಆರಾದನಾ ಕೆರಮ:-

            ತುಳುನಾಡ್ ಡ್ ಬಾರ್ಯಾತ್ ವರ್ಸೊರ್ದು ದುಂಬೇ ಗುಳಿಗನ ಆರಾದನೆ ನಡತೊಂದಿತ್ತ್ ದ್ ಗುಳಿಗನ ಬನತ ಬರಿಟೇ ಗಡುವಾಡಿ ಜಾಗೆಡೇ ಗುಳಿಗಗ್ ಕೋಲ ನಡತೊಂತ್ಂಡ್.ಕೋಲ ಮಾತ್ರ ಬಾರೀ ಅಪ್ರೂಪ ಆದಿತ್ತ್ಂಡ್.ಇನಿತಲೆಕ ಮೋನೆಗ್ ಬಣ್ಣ ಪಾಡುನಾವಡ್,ಕೋರಿ ಅಗ್ಯುನಾವಡ್,ಪಲ್ಟಿ ಹಾಕುನ,ಅಬತಾರ ಕಟ್ಟ್ ದ್ ಇಲ್ಲದಕ್ಲೆಗ್ ನಿಲೆನೇ ಇಜ್ಜಂದಿಲೆಕ ಮಲ್ಪುನ ಕೆರಮನೇ ಇಜ್ಜಾಂಡ್.ಗುಡಿ ಗುಂಡ ಸಾನ ಕಟ್ಟ್ ದ್ ಗುಳಿಗನ್ ನಂಬುನ ಕಟ್ಟೇ ಇಜ್ಜಾಂಡ್.ಗುಳಿಗಗ್ ಬನನೇ ಇತ್ತ್ ನಿ.ಗಡುಪಾಡಿ ಜಾಗೆದ ಬನತ ಬರಿತ ಜಾಗೆನ್ ಒತ್ತರೆ ಮಲ್ತ್ ದ್,ಜಾಗೆನ್ ಕೆರೆತ್ ದ್ ಅಂಬಿ ಅಡಿತ್ ದ್ ಗುಳಿಗಗ್ ಕೋಲ ಕೊರ್ದು ಊರುದ ಮಾರಿ ಗಿಡೆತೊಂತೆರ್.ಇನಿತಲೆಕ ತಿಕ್ ನೌಲು ಪೂರ ಗುಳಿಗೆ ಊರು ಬುಡ್ದು ಬಲಿಪುನ ಕೆರಮ ಇಜ್ಜಾಂಡ್.ಇನಿ ತಿಕ್ ನೌಲು ಪೂರ ಗುಳಿಗನ್ ಕೊನೊದು ನಿಜವಾಯಿನ ಗುಳಿಗಗ್ ಪೂ ನೀರ್ ಇಜ್ಜಂದಿಲೆಕಾಂಡ್.ಇನಿ ಗುಳಿಗನ್ ಪತ್ತ್ ದ್ ದೀಯೆರೆಂದ್ ತುಳುವೆರೆ ಸೈನ್ಯ ಬೋಡಾಪುಂಡು.ಮೋನೆಗ್ ಮಜಿ ಪೂಜಿದ್ ಸುಣ್ಣದ ಬೊಟ್ಟು ಪಾಡ್ದ್ ತಿರಿ ಕಟ್ಟ್ ದ್ ಗುಳಿಗಗ್ ಕೋಲ ನಡತೊಂತ್ಂಡ್.ಒಂಜಿ ಊರುಡು ಗಡುಪಾಡಿ ಜಾಗೆಡ್ ಒಂಜೇ ತಿಕ್ ಡ್ ಎಚ್ಚಾದ್ ಕೋಲ ನಡತೊಂತ್ಂಡ ಕೆಲವೊರ ರಡ್ಡ್ ತಿಕ್ ಡ್ ಕೋಲ ನಡತೊಂತ್ಂಡ್.ಇನಿತಲೆಕ ಕುಟುಮದಿಲ್ಲಲ್,ಇಲ್ಲಿಲ್ಲಲ್ ಪೂರ ಗುಳಿಗನ ಕೋಲ ನಡತೊಂದಿಜ್ಜಾಂಡ್.ಕುಟುಮದಿಲ್ಲಲ್ ಕಲ್ಲುರ್ಟಿ ಪಂಜುರ್ಲಿಗ್ ನೇಮ ನಡತೊಂತ್ಂಡ್ ವಿನಃ ಗುಳಿಗನ್ ನಂಬುನ ಕೆರಮ ಇಜ್ಜಾಂಡ್.ಏಪ ಅಷ್ಟಮಂಗಲ ಪ್ರಶ್ನೆ,ತಾಂಬೂಲ ಪ್ರಶ್ನೆಲು ಬತ್ತನ ಇಲ್ಲಲ್ ನಾಲ್ ಜನ ಇತ್ತ್ಂಡ ಪದಿನಾಲ್ ದೈವೊಲೆನ್ ನಂಬುಲೆಕಾಂಡ್.ಕಟ್ಟೆರೆ ಬತ್ತ್ ನಕುಲ್ಲ ನೇಮೊಡು ಪೊಸ ಪೊಸ ದೈವೊಲುಂಡುಂದು ಕುಟುಮೊಡ  ನಂಬಾಯೆರೆ ಸುರು ಮಲ್ಪಾಯೆರ್. ಗುಳಿಗೆ ಇಡಿಡಿ ಕೋರಿ ಅಗ್ಯುನ ಬುಡ್ಲೇ ನೆತ್ತೆರ್ ಬಿಂದುನು ಸಮೇತ ಬಾಯಿಗ್ ಪಾಡ್ರೆ ಇಜ್ಜಾಂಡ್.ಗುಳಿಗಗ್ಂದ್ ಕಟ್ಟ್ ಕಟ್ಟಲೆದಂದ್ ಒಂಜಿ ಕೋರಿ ಮಾತ್ರ ಗಲಸೊಂತೆರ್.ಗುಳಿಗಗ್ ಕೋಲ ರಾತ್ರೆ ಪದ್ರಾಡ್ ಗಂಟೆರ್ದ್ ಬೊಕ್ಕನೇ ನಡತೊಂತ್ ನಿ.ಗಡಿ ಪಾಡ್ನ ಜಾಗೆಡ್ ಗುಳಿಗೆ ಲಕ್ಕ್ಂಡ್ ಪಂಡ ಊರ್ದ ಮಾರಿನ್ ದೇರ್ದ್ ಬರೊಡುಂದು ಲೆಕ್ಕ.ಆಯೆ ಗಡು ಪಾಡಿ ಜಾಗೆಡ್ ಉಪ್ಪುನಾಯೆ.ಬೈಲ ಮಾರಿಡ್ಲ ಊರ್ದ ಮಾರಿನ್ ಗಿಡೆಪುನ ಕೆರಮ ಉಂಡು .ಗುಳಿಗನ ಬನೊಟು ಗುಳಿಗನ ಕಲ್ಲ್ ಗ್ ಕುರ್ದಿ ನೀರ್ ಪಾಡ್ದ್ ,ತುಡರ್ ದೀದ್ ಗುಳಿಗನ ಕೊಡಿಯಡಿಟ್ ಬಲಿಕ್ ಕೋರಿನ್ ಕೊಯ್ದ್ ನೆತ್ತೆರ್ ನ್ ಬಲಿಕ್ ಜಪುಡಾವೊಂತೆರ್.ಪತ್ತ್ ಪದಿನೈನ್ ವರ್ಸೊರ್ದಿಂಚ ಕೋರಿನ್ ಅಗ್ಯುನ‌ ಗುಳಿಗನಕುಲು‌ ತೂಯೆರೆ ತಿಕ್ಕೊಂದುಲ್ಲೆರ್.ಇನಿ ಪೂರಾ ಕಟ್ಲೆಲೆನ್ ನಮ ಪುಡತೊಂದುಲ್ಲ .ಇನಿತಲೆಕ ಅಜ್ಜೊಗೊಂಜಿ ತಿಕ್ ಡ್ ಗುಳಿಗ ಕೋಲ ನಡತೊಂದಿಜ್ಜಾಂಡ್.ಪತ್ತಿರ್ವತ್ತೈನ್ ವರ್ಸೊರ್ದಿಂಚಿ ಗುಳಿಗನ್ ಇಲ್ಲಿಲ್ಲಲ್ ನಂಬೆರೆ ಸುರು ಮಲ್ತೆರ್..ಇನಿ ಕೇನುನಕುಲ್ಲಾ ಇಜ್ಜಿ,ಪನ್ಪುನಕುಲ್ಲಾ ಇಜ್ಜಿಂದಾದ್ ತಾನ್ ಬೀಜುನ ತಂದೇಲೇ ಸರಿಂದ್(ತಂದೆಲ್ ಪಂಡ ಸುತಾಲ ಗೀಸ್ ನ ಸೋಂಟೆ,ಉರುಂಟುದ ದಪ್ಪದ ಕೋಲು,ದಂಟೆ,ತೋರದ ಬೆತ್ತ.ಕಲಸೆದ ಕೋಲುರ್ದು ತಂದೆಲ್ ಒಂತೆ ಉದ್ದ)ಬೀಜೊಂದುಲ್ಲೆರ್.ಇನಿ ಗುಳಿಗನ ಕೋಲ ಮಿತಿ ಮೀರ್ನ ಅಬ್ಬರ ಆದ್ ಪೋಂಡ್.ಗುಳಿಗೆ ತುಳುನಾಡೊರ್ಮೆ ನೆಗತ್ ತೋಜಿದ್ ನಿ ವಿನಃ ಗುಳಿಗನ್ ಪತ್ತ್ ದ್ ದೀನಕುಲಿಜ್ಜೆರ್."ಸ್ವಾಮೀ ಗುಳಿಗ ದೈವ ಕಾತ್ ರಕ್ಷಣೆ ಮಲ್ಪುಲ "ಪನ್ನೌಲು ಆಯೆ ನೆಗತ್ ತೋಜಿದೆ

   ದುಂಬು ಪೂರ ಗುಳಿಗಗ್ ಕೋಲ ಕೊರ್ಪುನ ಕಿರಮೊನೇ ಇಜ್ಜಾಂಡ್.ಒಂಜಾತ್ ವರ್ಸದ ಇಂಚಿಪ ಬತ್ತಿ‌ ಕೆರಮ ಉಂದು.ಗುಳಿಗಗ್ ಪನಿವಾರ ಬಲಸ್ ದ್ ತಂಬಿಲ ಸೇವೆ ಇತ್ತ್ ನಿ.ಗುಳಿಗಗ್ ತಾರಾಯಿ ದರ್ಪುನನೆ ಕಟ್ಟ್.ಗುಳಿಗನ ಕಲ್ಲ್ ಗ್ ತಾರಾಯಿ ದರ್ಪುನ,ಕೋರಿ ಕೊಯ್ಪುನವೇ ಕಟ್ಟ್.ನಮಡ ಬೋಡಾಯ್ನಾತ್ ದುಡ್ಡಾಂಡ್,ಕೆಲವೆರೆಡ ಉದ್ದ ಉದ್ದದ ವಾರಗಟ್ಲೆ ತೂಪುನ ಅಲ್ಮೋಗದ ಪ್ರಶ್ನೆ ಚಿಂತನೆಯಾಂಡ್.ಅವೆಕ್ ಸರಿಯಾದ್ ಬುದ್ದಿ ಪನ್ಪುನ ವೈದಿಕ ಮಾರ್ಗದರ್ಶನ ಸುರಾಂಡ್.ಅಕುಲೇ ಅರ್ಚಕೆರಾದ್ ಬತ್ತ್ ದ್ ಲಾ ಆಂಡ್.ನಮಡ ದುಡ್ಡಿತ್ತ್ ನಕ್ಲು ಅಕುಲು ಪನ್ನವೇ ಸರಿಂದ್ ಪನ್ನಗ ಚರವಾಯಿನ ದೈವೊಲೆಗ್ ಕಲ್ಲ್ ಪ್ರತಿಷ್ಟೆ,ಬ್ರಹ್ಮ ಕಲಶ ಇಜ್ಜಿಂದ್ ಅಕ್ಲೆಗ್ ಗೊತ್ತಿಂಡಲಾ ನಮ್ಮ ಒತ್ತಡೊರ್ದಾದ್ ಬತ್ತಿನ ಅಕುಲು ನಮ‌ ನಂಬುಲೆಕ  ನಮನ್ ನಂಬಿಸಯೆರ್.ಅಂಚಾದ್ ಗುಳಿಗನ ಮೂಲ ಆರಾದನೆ ತತ್ತ್ ದ್ ಇಂಚ ಪೊಸ ಕಟ್ಟೆಲು ಪೂರ ಬೈದ್ ನಿ.ದುಂಬುಗು ಕೋಲಲಾ ಸೇರೊಂಡ್.ದುಂಬು‌ ಗುಳಿಗಗ್ ಕೋಲದ ಕಟ್ಟಿಜ್ಜಂದೆ ಕೋರಿ ಕೊಯ್ಪುನ ಕಟ್ಟಿತ್ತ್ಂಡ್.

                      ಕಲ್ಲತ್ತಿ ಗುಳಿಗೆ ಅಂಡಿಂಜೆ ಬೋಳ್ತೇರ್.

  ದುಂಬುದ ಕಾಲೊಡು ಗುಳಿಗನ ಮೋನೆಡ್ ಉಚ್ಚುದ ಜಿಡೆ ಬುಡ್ಪಾವೊಂದಿಜ್ಜಾಂಡ್.ಮೋನೆಗ್ ಇತ್ತಗ ನ ಬಣ್ಣ ಪಾಡುನ,ಇತ್ತ್ ನ ಗೀಟ್ ಒಯ್ಪುನ,ಇತ್ತ್ ನ ಚಿತ್ರ ಬುಡ್ಪಾವುನ ಕ್ರಮ ದುಂಬಿಜ್ಜಾಂಡ್.ಇನಿ ಅವೆನ್ ಪೂರ ಮಲ್ಪುನವು ತಪ್ಪು.ಮೋನೆಗ್ ಕಪ್ಪು ಪೂಜಿದ್ ಸುಣ್ಣದ ಬೊಟ್ಟ ಪಾಡ್ಂಡ ಅವೆನ್ ಗುಳಿಗೆಂದ್ ನಂಬೊಂತೆರ್.ಮಂತ್ರ ಜಾವದೆಗ್ಲ,ಕಲ್ಲುರ್ಟಿಗ್ಲಾ ಇಂಚನೆ ಮೋನೆಗ್ ಕಪ್ಪು ಬಣ್ಣ ಪೂಜಿದ್ ಬೊಲ್ದು ಸುಣ್ಣದ ಬೊಟ್ಟು ದೀವೊಂತೆರ್.ಕಾಲ ಬದಲಾಯಿಲೆಕ ಕಟ್ಟುಲು ಬದಲಾಯ.ಮೂಲ ನಂಬೊಳಿಗೆ ಪೊಳಿಂಡ್.

    

ಗುಳಿಗೆ ಇಂಚ ಗಣೆಗಟ್ಟ ಏರ್ದ್ ಅಂತ್ರಾಟೊಡು ಅಬತಾರ ಕಟ್ಟುನ ಕೆರಮ ಇಜ್ಜಿ

   ದುಂಬುದ ಕಾಲೊಡು ಗುಳಿಗನ ಕೋಲೊಡು ಕೈಟ್ ಕೊರೊಂತುನ ಆಯುಧ ಅರಿತ ಮುಡಿ ಕಟ್ಟ್ ನಗ ಗಲಸುನ ಕೊದಂಟಿ.ಕೊರಗ ತನಿಯನ ಕೈಟ್ ಇತ್ತ್ ನಿ ರಾಜ ದಂಡದ ಒರುತ  ನೆಕ್ಕಿದ ಬೆತ್ತ.ದುಂಬು ಗುಳಿಗನ್ ಗುಡ್ಡೆಡ್ ತಾತ್ಕಾಲಿಕವಾದ್ ಕಲ್ಲ್ ಪಾಡ್ದ್ ನಂಬೊಂದು ಅವ್ಲು ದಾಲ ದೀವೊಂದಿಜ್ಜಾಂಡ್.ಅಂಚಾದ್ ತಾತ್ಕಾಲಿಕವಾದ್ ಮುಡಿ ಕಟ್ಟುನ ಕೊದಂಟಿನ್ ಗುಳಿಗನ ಕೈಟ್ ಕೊರೊಂತೆರ್.ಮಾಡ್ ಮಿನಿ ಇತ್ತ್ಂಡ ಕರ್ಬದ ಆಯುಧ/ತಿರ್ಸೂಲ ,ತಾರಿದ ತಂದೆಲ್ ದೀವೊಂತೆರ್.ತಾರಿದ ತಂದೆಲ್ದ ಕಡೆ ಕೊಡಿಕ್ ರಡ್ಡ್ ಜಾಗೆಗ್ ಬೊಳ್ಳಿದ ಕಟ್ಟ ಪಾಡ್ದ್ ದೀವೊಂತೆರ್.ತಂದೆಲ್ದ ನನೊಂಜಿ ಪುದರ್ ದಂಟೆ.ರಡ್ಡ್ ಕೈ ಬುಡ್ಪನಗಾಪುನಾತ್ ಉದ್ದದ ಪಂಡ ಒಂಜಿ ಮಾರ್ ಉದ್ದದ ದಂಟೆ.ಒಂಜಿ ಕೈಟ್ ಒರಿಯಗ್ ಆಯುಧ ಪತೊನ್ನಾತ್ ಉದ್ದದ ದಂಟೆನೆ ತಂದೆಲ್.ಇನಿ ತಿರ್ಸೂಲ ಕೊರ್ದು ಗುಳಿಗೇಶ್ವರೆ ಮಲ್ದೆರ್.ಗುಳಿಗಾಖ್ಯೆಂದ್ ಆಟೊಡು ರಕ್ಕಸೆ ಮಲ್ತೆರ್.ಗುಳಿಗಜ್ಜಂದ್ ನಡು ಬಲ ಇಜ್ಜಂದಿಲೆಕ ಮಲ್ತೆರ್. ಶನಿ ಬೊಕ್ಕ ನೀಲನ ಮಗೆ ಗುಳಿಗೆಂದ್ ಪುರಾಣ ಸೇರೊಂಡ್.ರಾವು ಕೇತುನು ರಾವು ಗುಳಿಗ ಪನೊಂದುಲ್ಲೆರ್.ಕೊದಂಟಿ ಆಟೊಡು ಬರ್ಪಿ ರಕ್ಕಸ ಏಸದ  ಆಯುಧ ಪಂಡೆರ್.ಗುಳಿಗಗಾವಡ್,ಕೊರಗ ತನಿಯಗಾವಡ್ ಕಾಯೆರ್ದ ದಂಟೆ ಮಲ್ಪೆರೆ ಬಲ್ಲಿ.ಕಾಯೆರ್ದ ಮರ ಬೂತೊಲೆಗೊಂತೆ ದೂರ.ಆಯುಧ ದಿಪುನ ವ್ಯವಸ್ಥೆ ಇತ್ತ್ಂಡ ದೈವ ಕೈಟ್ ಪತ್ತುನಂಚಿನ ಕರ್ಬದ ಗುದಿಗೆ ಮಲ್ತ್ ದ್ ದೀವೊಲಿ.ಇನಿ ಅನುಮಂತನ ಗದೆತಲೆಕ ಬೊಳ್ಳಿದ ಗದೆ ಗುಳಿಗಗ್ ಮಲ್ತೊಂದುಲ್ಲೆರ್.ಅವು ತಪ್ಪು.ಬಬ್ಬರ್ಯನ ಕೈಟ್ ಬೊಳ್ಳಿದ ಕೊದಂಟಿ ಉಪ್ಪುಂಡು.ತೂನಗ ಗದೆತಲೆಕ ಉಪ್ಪುನ ಅವೆನ್ ಮದಿಪುನಕುಲು ವಜ್ರಾಯುಧೊನು ಧಾರಣೆ ಮಲ್ತೊಂಡ ಪನ್ಪೆರ್.ಇತ್ತ್ನ ದೈವೊಲೆನ್ ದೇವೆರೆಗ್ ಓಲ್ಪಡಿ ಮಲ್ತಿ ಮದಿಪುದಕುಲು ಕಡೆಕ್ ಕೋರಿದ ಕಜಿಪುಲಬಲಸಿ ಅಗೆಲ್ ನ್ಲಾ ಗಟ್ಟಿಡೆ ಉಂಡುದು ಪೋಪೆರ್ .ಇಲ್ಲಲ್ ಕೋಲ ಮಲ್ಪವುನಕ್ಲೆಡ ಚಾಕಿರಿಗ್ ಜನ ಇಜ್ಜಿ.ಎಚ್ಚಾದ್ ಸಂಸಾರದಕ್ಲ್ ಪಿದಯೂರುಡು ಇತ್ತ್ ದ್ ವರ್ಸದ ಕೋಲದಪಗ ಬರ್ಪೆರ್.ಇಲ್ಲಲಿತ್ತಿ ಪ್ರಾಯದಕ್ಲೆಗ್ ಇಜ್ಜಾಂದಿ ಸಿರ್ಕ್ ಸಂಕಡೊರ್ದಾದ್ ದುಂಪೋಯೆರೆ ತೀರುಜಿ.ಅಂಚಾದ್ ಒರಿ ಕಟ್ಟುನಾಯಗ್ ಈತ್ ಕಾಸ್ ಗ್ಂದ್ ದೈವ ಚಾಕಿರಿ ಬುಡು ಕೊರ್ಪ.ಆಯೆ ದಾದ ಮಲ್ತ್ಂಡಲ ಅವ್ವೇ ಸರಿ.ನಮಲ ಕೋಲ ರೈಸ್ಂಡ್ ಪನ್ಪ.ಉಂಡಿ ದೆತೊನ್ನಾಯೆಲ ಸೋಕಾಂಡ್ ಪನ್ನಗ ನಂಕ್ ಕೊಸಿಯಾಂಡ್.

       ಕಾಡ್ ದ ನಡುಟು,ಗುಡ್ಡೆದ ಬರಿಟ್ ಮರತ ಮುದೆಲ್ಡ್ ದೈವೊಲೆ ಮೂಲ‌ ಆರಾದನೆ.ರಾವುದಾಯಗ್ ಅಗೆಲ್.

      ‌‌ಕಟ್ಟ್ ಲೆಡ್ ಪ್ರಾದೇಶಿಕವಾದ್ ಬಿನ್ನತೆಯುಂಡು.ಕೆಲವು ತಿಕ್ ಡ್ ಪತ್ತನಾಜೆಗ್,ಕೆಲವು ತಿಕ್ ಡ್ ಆಟಿ ಪುಟ್ಟುನ ಸಂಕ್ರಾಂದಿಗ್ ,ಕೆಲವು ತಿಕ್ ಡ್ ಒವ್ವಾಂಡಲ ಒಂಜಿ ಸಂಕ್ರಾಂದಿ ನಿಗಂಟ್ ಮಲ್ತ್ ದ್ ಮೂಜಂಜದ ಪೊರ್ತುಗು ಗುಳಿಗಗ್ ಕೋರಿ ಕೊಯ್ಪೆರ್.ಹೆಚ್ಚಾದ್ ಗುಳಿಗನ ಬನೊಟೇ ಕೊಯ್ಪೆರ್.ಪತ್ತನಾಜೆ,ಸಂಕ್ರಾಂದಿ ಗುಳಿಗಗ್ ಕೋರಿ ಕೊಯ್ಯೆರೆ ಗಡುವಾಡಿ ದಿನೊಕುಲು.ರಾವುಗು ಪತ್ತನಾಜೆರ್ದ್ ದುಂಬು ಕರಿಪುನ ಕಟ್ಟ್.ಪತ್ತನಾಜೆ ಕರಿಂಡ ದುಂಬಗಾವೊಡುಂದು ಲೆಕ್ಕ.ರಾವುನ ಒಂಜಿ ಆರಾದನೆ ಇತ್ತ್ಂಡಲ ಅವು ಆರಾದನೆಡ್ ಪ್ರಬಲವಾಯಿನ ಸ್ಥಾಮಾನ ಇತ್ತ್ ನ ಸಗ್ತಿ ಅತ್ತ್.ಅವು ದೈವತ್ವದ,/ಬೂತದ ಒಂಜಿ ಸಗ್ತಿ.ಇನಿ ರಾವು ಪಂಡ ಸರ್ಪೊನು‌ ಕಲ್ಪಿಸಾವೆರ್.ರಾವು ಸರ್ಪೆ ಅತ್ತೇ ಅತ್ತ್.ಬೂತೊಗು ಸಮ್ಮಂದಪಟ್ನ ಒಂಜಿ ಸಗ್ತಿ.ರಾವು ಪಂಡ ಆಕಾರ,ರೂಪ ಇಜ್ಜಂದಿನ  ಒಂಜಿ ಇಸೇಸ ಸಗ್ತಿ.

ರಾವು ,ಗುಳಿಗಗ್ ಬಲಸುನಿ  ಗುಡ್ಡೆಡ್ ಬನೊಟು .ಕೆಲವೊರ ಕಮ್ಮಿ ಜಾಗೆ ಪೂರಾ ಇತ್ತಿನಕುಲು ,ಗುಡ್ಡೆಡ್ ಬಲಸೆರೆ ಆಪುಜಿ .ಅಂಚಾಯಿನೇಡ್ದಾವರ ,ಇಲ್ಲ ಬರಿಟೇ ಒಂಜಿ ಕಾಯೆರ್ದ ಗೆಲ್ಲ್ ಕುತ್ತುದು ,ಅಲ್ಪ ಒಂಜಿ ಕಲ್ಲ್ ಪಾಡ್ಡ್ ಬಲಸೊಲಿ .ಅವೆತ ಕೆರಮ ಪೂರಾ ಆಯಿ ಬೊಕ್ಕ ಕುರ್ದಿ ತಲಿತ್ ದ್ ,ಕಲ್ಲ್ ನ್ ದೆಪ್ಪೊಲಿ .ಆಂಡ ,ಕಲ್ಲ್ ನ್ ಅಲ್ಪನೇ ಸ್ಥಿರ ಮಲ್ಪೆರೆ ಬಲ್ಲಿ .
‌‌   ‌ ‌‌‌‌ ‌‌‌‌ರಾವುನ ಕಡಪು,ಗುಳಿಗನ ದೃಷ್ಠಿ,ಗುಳಿಗನ ಪೆಟ್ಟ್ ಇಂಚಿನ ನಂಬಿಕೆ ತುಳುವೆರೆಡ ಉಂಡು.ಇಂಚಿನನೇ ರೂಪ,ಬಣ್ಣ ಆಕಾರ ಇಜ್ಜಂದಿ,ತರೆ ಇಜ್ಜಾಂದಿ ರಾವುಗು ವಾ ಆಕಾರೊಡು ಕಲ್ಲ್ ಪಾಡುನಿ?.ಚರ ಇತ್ತ್ ನ ರಾವು ಗುಳಿಗನ್ ಕಟ್ಟೆ ಕಟ್ಟ್ ದ್ ನಿಕುಲು ಸ್ಥಿರ ಪಂಡಲ ಅವು ಚರ  ದೈವೊಲು.ಬನೊಟಿತ್ತ್ಂಡ ಮಾತ್ರ ಗುಳಿಗೆ ಸ್ಥಿರ.ಇಜ್ಜಾಂದಿನೆಕ್ ಪೊಸತ್ ನ್ ಕನತ್ಂಡ ಪಂಡ ಚರ ಇತ್ತ್ ನೆನ್  ಸ್ಥಿರ ಮಲ್ತ್ಂಡ ದೋಸ ನಮಕ್,ಊರುಗು.ಮಂತ್ನಾಯಗ್ ದೋಸ ಇಜ್ಜಿ.ಮನ್ಪಾಯಿನಾಯಗ್ ದೋಸ.ರಾವು ಪಂಡ ಅಂತರ್ಪಿಸ್ವಾಸಿದೊರುತ ಒಂಜಿ‌ ಸಗ್ತಿ.ರಾವುಗು ನಮ್ಮಂಚಿ ಕೋರಿ ಕೊಯ್ಪೆರ್.ಬಡಕಾಯಿಡ್ ರಾವು ಪನ್ಪಿ ಸಗ್ತಿದ ಆರಾದನೆ ಇಜ್ಜಿ.ನಮ ಮಾತ್ರ ರಾವುನ್ಲ ಇಸೇಸವಾಯಿನ ಸಗ್ತಿಂದ್ ಆರಾದನೆ ಮಲ್ಪುವ.ರುಂಡ ಛೇದನ ಆಯಿನ ಒಂಜಿ ಸಗ್ತಿಂದ್ ರಾವುನು‌ ಪನ್ಪೆರ್.ಚರ ಸಗ್ತಿಲಾಯಿನ ರಾವು ಗುಳಿಗನ ರಡ್ಡ್ ಬೇತೆ ಬೇತೆ ಕಲ್ಲ್ ನ್ ಒಂಜೇ ಕಟ್ಟೆಡ್ ಕುಲ್ಲವುನವು ಮಹಾ ಅಪರಾದ.ಅಡಂಬರ ಮಲ್ತ್ ದ್ ಪೊಕ್ಕಡೆ ರಡ್ಡ್ ಕಲ್ಲ್ ನ್ ಒಂಜೆ ಕಟ್ಟೆಡ್ ಕುಲ್ಲಾಂಡ, ಚರ ದೈವೊಲೆನ್  ಏರೆನವೋ ಪಾತೆರ ಕೇಂದ್ ಸ್ಥಿರ ಮಲ್ಪೆರೆ ಪೋಯರ್ಡ ಸಂಸಾರೊಗು ಊರುಗು ಖಂಡಿತಾ ದೋಷ ಬರ್ಪುಂಡು .

ಗುಳಿಗನ ಕೋಲೊಡು ಕಟ್ಟುನಾಯೆ ಪಜೆ ಮಡಿತ್ ದ್ದಕ್ಕುನ ಕೆರಮ ಇಜ್ಜಿ

ಇನಿ ಗುಳಿಗನ ಕಟ್ಟೆಡ್ ಕಡ್ಸಲೆನ್ ಸಿಮೆಂಟ್ ಡ್ ಚೂರು ಕೌಂತುದು ದೀದುಪ್ಪುವೆರ್.ನಿಜವಾದ್ ಉಂದು ತಪ್ಪು.

ಗುಳಿಗನ ಕೋಲೊಡು ಗುಳಿಗಡ ನಿನ್ನ ಅಮ್ಮೆ ಏರ್,ನಿನ್ನ ಅಪ್ಪೆ ಏರ್ಂದ್ ಕೇನೆರೆ ಸುರು ಮಲ್ದೆರ್.ಉಂದು ತಪ್ಪು.

ಕಲ್ಲುರ್ಟಿ ಪಂಜುರ್ಲಿ ಸಾನೊದ ಬಲತ ಬಾಗೊಡಿಪ್ಪೊಡಾಯಿನ ಗುಳಿಗನ್ ಸಾನದ ಎದುರು ಪಾಡ್ಯ.

ಇನಿ ಐನ್ ವರ್ಸೊಗೊರ ನಡಪುನ ನೇಮ ಪಂಚವಾರ್ಷಿಕ ನೇಮ ಆಂಡ್.

ಗುಳಿಗನ ಕೋಲೊಡು ಗುಳಿಗಗ್ ಕೋರಿ ಕೊರ್ನಗ ದೈವೊನು ಅಲೆಪಾವುನವು ತಪ್ಪು.

ನಮ್ಮವತ್ತಂದಿನ ಬ್ರಹ್ಮ ರಕ್ಕಸಗ್ ವೈದಿಕ ಚಿಂತನೆದಕುಲು ಪಂಡೆರ್ಂದ್ ಗುಡಿ ಕಟ್ಟಾದ್ ತಪ್ಪು ಮಲ್ತೊಂದುಲ್ಲ.

ಪದಿನಾಜಿ ಚಾಕಿರಿ ವರ್ಗೊಡು ಬರಂದಿ,ದೈವದ ಬೂಲ್ಯ ಪತ್ತಂದಿ,ದೈವದ ಬೂಲ್ಯ ಗಂದೊನು ಮುಂಡೊಗು ಪಾಢಂದಿ,ದೇವೆರೆ ಪೂಜೆ ಮಲ್ಪುನ,ತಾಮಸಿಕ ನೆತ್ತೆರಾವಾರದ ದೈವದ ಕೊಡಿಯಡಿಕ್ ಬರಂದಿ ವೈದಿಕೆರ್ ಇನಿ ದೈವದ ಮಾನಿಯಾದ್ ದೈವದ ಕಲೊಟುಲ್ಲೆರ್.

  ಇತ್ತೆ ಮದಿಪುದಕುಲು ನಿಕ್ಲು ಕುಟುಮೊಡು ಪಂಜುರ್ಲಿನ್ ನಂಬುನಕುಲು ಪಂಜುರ್ಲಿನ ದೂತೆ ಗುಳಿಗನ್ ನಂಬೊಡು ಪನ್ಪೆರ್.ಗುಳಿಗೆ ಬನೊಟು ಆರಾದನೆ ಉಪ್ಪುನ ಸ್ವತಂತ್ರ ಶಕ್ತಿ.ಕಲ್ಲುರ್ಟಿಲಾ ಅಂಚನೆ.ಕಲ್ಲುರ್ಟಿನ್ ಒಂಜಾತ್ ವರ್ಸೊರ್ದು ಇಂಚಿಪ್ಪ ಪಂಜುರ್ಲಿನೊಟ್ಟುಗು ಆರಾದನೆ ಮಲ್ತೊಂದುಲ್ಲೆರ್.ಇತ್ತೆ ಕಲ್ಲುರ್ಟಿ ಮಂತ್ರಜಾವದೆಗ್ ಒಟ್ಟು ನೇಮ ಆಪುನಲಾ ಉಂಡು.ಆಂಡ ಪಂಜುರ್ಲಿ ಅವುಲ ಕುಟುಮದ ಪಂಜುರ್ಲಿನ್ ಒಂಜಾದೇ ನಂಬೆರೆ ಸಾಧ್ಯ ಉಂಡು.ಅಣ್ಣಪ್ಪ ಸ್ವಾಮಿನೊಟ್ಟುಗು ಪಂಜುರ್ಲಿನ್ ಸೇರಾದ್ ಅಣ್ಣಪ್ಪ ಪಂಜುರ್ಲಿಯಾದ್ ಆರಾದನೆಲಾ ಉಂಡು.ಆಂಡ ಬಡಪತ್ತ್ ಡ್ ನೇಮ ಕೊರ್ಪಿ ಕುಟುಮದಕ್ಲೆ ಕಷ್ಟ ತೆರಿದ್ ಕಟ್ಟುನಕುಲಾವಡ್,ಮದಿಪುದಕುಲಾವಡ್ ಅಕ್ಲೆನ ಜಾಗೆಗ್ ಪೊಸ ಪೊಸ ದೈವ ಸೇರಾವೊಂದು ಪೋಯರ್ಡ ಅಕುಲು ಇತ್ತ್ ನ ಆರಾದನೆನ್ಲಾ ಬುಡೊಡಾಯಿನ ಸ್ಥಿತಿ ಬರು.ಇನಿ ಪಂಜುರ್ಲಿಗ್ ವಸಯೊಗುಂತುನ  ಮಾನೆಚ್ಚಿಲ್ದಕ್ಲ್,ಕಟ್ಟುನಕ್ಲು  ಮೂಲು ಕಲ್ಲುರ್ಟಿ ಇಜ್ಜಲ್.ಆಲಿಜ್ಜಂದೆ ನಮ ಉಪ್ಪುಜ ಪನ್ಪೆರ್. ಅಂಚನೆ ಬೂಮಿ ಉಂಡಾನಗ ಇತ್ತಿ ಪಂಜುರ್ಲಿಗ್ಲಾ,ಇಂಚ ಏಳ್ನೂದು ವರ್ಸ ಪಿರಾಕ್ ದ ಕಲ್ಲುರ್ಟಿಗ್ಲಾ ಎಂಚ ಒಟ್ಟುಗಾರಾಧನೆಂದ್ ಅಕ್ಲ್ ಅರ್ಥ ಮಲ್ತೊನೊಡು.ಆತೇ ಅತ್ತ್.ಪಂಜುರ್ಲಿ ಪ್ರಾಣಿಮೂಲ ಆರಾಧನೆ.ಕಲ್ಲುರ್ಟಿ ನರಮಾನಿ ಒರುತ ಆರಾದನೆ.ಇನಿ ಪ್ರಶ್ನೆ ಚಿಂತನೆದಕುಲ್ಲಾ, ಮದಿಪುದಕುಲ್ಲಾ ಪಂಜುರ್ಲಿನೊಟ್ಟುಗು ಕಲ್ಲುರ್ಟಿ ಬೋಡುಂದು ಅಟಛಲ ಕಟ್ಟೊಂದುಲ್ಲೆರ್.ಉಂದು ಎಡ್ಡೆ ಬುಳೆಚಿಲತ್ತ್.

                              ರಾವುದಾಯಗ್ ಅಗೆಲ್

     

ಆಟಿಡ್ ಬೈಲ ಮಾರಿ ಕಳೆಯೆರೆ ಗುಳಿಗಗ್ ಕೋಲ ನಡಪುಂಡು

             ರಾವುದಾಯಗ್ ಅಗೆಲ್.ಕೋರ್ಜೆ ತರವಾಡ್ ಕಬಕ

 ಕುಟುಮದ ಏರಾಂಡಲ ಕರಿದ್ ಪೋಯೆರ್ಡ ಕರಿದ್ ಪೊಯಿನಕುಲ್ನ ಕುಲೆ ಕುಟುಮದ ಪಂಜುರ್ಲಿನ ಕೈಟ್ ಉಪ್ಪುನಿಂದ್ ಹಿರಿಯಾಕ್ಲು ನಂಬುದಿತ್ತೆರ್.ಇನಿ ಕಲ್ಲುರ್ಟಿನ,ಮಂತ್ರ ಜಾವದೆನ ಕೈಟ್ಲ ಕುಲೆ ಉಂಡುಂದು ಪನೊಂದುಲ್ಲಡರ್.ನಿಜವಾದ್ ಕುಟುನದ ಕರಿಸ್ ಪೊಯಿನಕುಲ್ನ ಕುಲೆ ರಾವು ಗುಳಿಗನ ಕೈಟುಪ್ಪುಜಿ.ಓಲಾಂಡಲಾ ಗುಳಿಗನ ದೃಷ್ಠಿ ತಾಗ್ ದ್ ತೀರ್ದ್ ಪೋಯಿನಕುಲ್ನ ಕುಲೆ ರಾವು ಗುಳಿಗನ ಕೈಟ್ ಇತ್ತ್ಂಡ ಮಾತ್ರ ಕೋಲ ಕೊರೊಂತೆರ್.ಇತ್ತೆ ತರವಾಡ್ ಉಂಡು ಮಲ್ಪುನಗ ರಾವು ಗುಳಿಗೆ ಉಂಡು ಪಂಡ ಏರೆಡಲ ಕೇನಂದೆ ಕೋಲ ಕೊರೊಂದುಲ್ಲೆರ್.ವರ್ಸದ ಕುದಿ ದೀದ್ ವರ್ಸಲ ಕೋಲ ಕೊರೊಂದುಲ್ಲೆರ್.ಅಂಚ ಕೊರೆರೆ ಬಲ್ಲಿಂದ್ ತೆರಿನ ಕಟ್ಟುನಕುಲು ಇತ್ತೆರ್ಡಲ ಅವೆನ್ ಕೋಲ ಮಲ್ಪಾವುನ ಇಲ್ಲದಕ್ಲೆಗ್ ತೆರಿಪಾವುಜೆರ್.ಕರಿಪೆರೆ ಬರ್ಪುನಕುಲ್ಲ ಇಂಚ ಮಲ್ಪುನವು ತಪ್ಪುಂದು ಕೋಲ ಮಲ್ಪವುನಕ್ಲೆಡ ಪನ್ಪುಜೆರ್.ಇತ್ತಿತ್ತೆ ಜಾಗೆದ ಗುಳಿಗೆ,ಕುಟುಮದ ಗುಳಿಗೆಂದ್ ಪನೆರೆ ಸುರು ಮಲ್ದೆರ್.ಇತ್ತೆದ ಕುಟುಮದ ಗುಳಿಗೆ ಪಂಡ ದುಂಬುದ ರಾವು ಗುಳಿಗೆ/ರಾವು ಕುಲೆ.ಉಂದೆಕ್ ಕೋರಿ ಕೊಯ್ಪುನ,ಅಗೆಲ್ ಬಲಸುನ ಕೆರಮ ಇತ್ತ್ಂಡ್.ದುಂಬುದ ಕಾಲೊಡು ಮೂಜಂಜದ‌ ಪೊರ್ತುಡು ಜಾಲ್ ಗ್ ಒಂಜಿ ಕಾಯೆರ್ದ ಗೆಲ್ಲ್ ಕನತ್ ದ್ ನಡ್ದ್ ಪತ್ತೊಂಜಿ ಇರೆ ಪಾಡ್ದ್ ಅಗೆಲ್ ಬಲಸೊಂತೆರ್ ವಿನಃ ಇನಿತಲೆಕ ಕೋಲ ಇಜ್ಜಾಂಡ್‌.ಇನಿ ರಾವು ಗುಳಿಗಂದ್ ಅವೆಕ್ ಕೋಲ ಕಟ್ಟೊಂದುಲ್ಲೆರ್.ಇನಿ ಗುಳಿಗನ ಅಬತಾರ ಕಟ್ಟುನ ಕೋಲ ಇಜ್ಜಂದಿ ಜಾಗೆನೇ ಕಡಮೆ.

ಒಂರ್ಬ,ಪದಿನೆಣ್ಮಂದ್ ಗುಳಿಗನಕ್ಲೆಗ್ ಕಟ್ಟದ್ ಕಟ್ಟ್ ಪೊಲ್ತೊಂದುಲ್ಲೆರ್

ಗುಳಿಗಗ್ ಅಗೆಲ್ ಪಾಡುನ ಕೆರಮ(ಆಯಾ ಜಾಗೆದ ಕಟ್ಟ್ ಬೇತೆ ಬೇತೆ ಉಪ್ಪು):-

ಕುರ್ದಿ ಮಲ್ತ್ ದ್ ಸುರುಕು ಜಾಗೆಗ್ ತಲಿತ್ ದ್ ಜಾಗೆ ಸುದ್ದ ಮಲ್ತ್ ದ್ ಒಂಜಿ ಕೊಡಿರೆಟ್ ಉರ್ಪೆಲರಿ ಪಾಡ್ದ್ ಬೆಮ್ಮೆರೆ ಸುತ್ತೆ ದೀಪುನಿ.ಒಂಜಿ ಜುಟ್ಟು ದಾಂತಿ ತಾರಾಯಿ,ಐನ್ ಬಚ್ಚಿರೆ,ಒಂಜಿ ಬಜ್ಜೆಯಿ,ಚಿಲ್ಲರೆ ಪಣವು ಪಾಡೊಡು.ತುಡರ್  ದೀವೊಡು,ದೂಪ ಪತ್ತೊಡು,ಅಗೆಲ್ ಬಲಸುನ ದುಂಬುಲ ದೂಪ ಪತ್ತೊಡು,ಬಲಸಿ ಬೊಕ್ಕಲ ದೂಪ ಪತ್ತೊಡು.ಐನಿರೆಟ್ ಅಗೆಲ್ ಪಾಡ್ದ್ ದೂಪ ಪತ್ತ್ ದ್ ಕೈಟ್ ಕಾಡ ಕೇಪುಳ ಪತ್ತ್ ದೇ ಅರಿಕೆ ಮಲ್ಪೊಡು.ಐನಿರೆ ಪಾಡ್ಂಡ ಮಾತೆಕ್ಲ ಸಂದ್ಂಡ್ಂದ್ ಲೆಕ್ಕ.ಮೂಜಿರೆ ಬಲಸ್ಂಡ ರಾವುನ ದೋಸ ತೋಜಿದ್ ಬರು.ಅಂಚಾದ್ ಐನ್ ಕೊಡಿರೆ ಪಾಡ್ದೇ ಅಗೆಲ್ ಬಲಸೊಡು..

  ಕುಟುಮದ ರಾವುಗು ಸಾಸಿತ ಕಲ್ಲ್ ಪಾಡುನ ಕೆರಮ ಇಜ್ಜಿ.ಕಾಯೆರ್ದ ಮುದೆಲ್ಡಾ,ಕಾಯೆರ್ದ ಕಣೆ/ಗೆಲ್ಲ್ ಕುತ್ತುದಾ ಕಾಟ್ ಕಲ್ಲ್ ನಾಟಾದ್ ಚರವಾಯಿನ ರಾವುಗು ತುಡರ್ ದೀದ್, ಕೊಡಿ ಇರೆ ಪಾಡ್ದ್ ಅಗೆಲ್ ಬಲಸ್ ದ್,ದೂಪ ಪತ್ತ್ ದ್ ಕೈ ಮುಗಿಯುನ ಕೆರಮ .ಆಂಡ ಇನಿ ಪ್ರಶ್ನೆ ಚಿಂತನೆದ ಕೆಲ ಜೋಯಿಸೆರ್ ರಾವುನು ಕುಲೆಂದ್ ಪಂಡ್ ದ್ ತುಳುವೆರೆ ಆರಾದನೆದ ದಿಕ್ಕ್ ತಪ್ಪಾವೊಂದುಲ್ಲೆರ್.

ಕುಟುಂಬದ ಕಲ್ಲುರ್ಟಿ ಪಂಜುರ್ಲಿ ನ್ ಇಲ್ಲ್ ದ ಉಲಯಿ ಮದನ ಕೈ ಪಲಯಿ,ಮಣೆಟ್ ನಂಬುನವು ದುಂಬುದ ಕ್ರಮ.ಅಂಚ ಇಲ್ಲ್ ದ ಸಂಕಲ್ಪ ಇತ್ತ್ಂಡನೇ ಅಲ್ಪ ಮುಡಿಪು ಕಟ್ಟೆರೆ ಸಾದ್ಯ, ಪದಿನಾಜೆಕ್ ಬಲಸುನೆಕ್ ಪೂರ ಅರ್ಥ ಬರ್ಪುಂಡು. ಕಲ್ಲ್ ಪಾಡ್ದ್ ನಂಬುನಗ ಅವು ಇಲ್ಲ ಪಿದಯಿದ ಸ್ಥಾನ ಸಂಕಲ್ಪನೇ ಆಪುಂಡು. ಪಂಜುರ್ಲಿ ನ ಬಲತ ಮರ್ಗಿಲ್ ಡ್ ಕಲ್ಲುರ್ಟಿ ನ್ ಕುಲ್ಲಾವುನವು ಕ್ರಮ.ಕುಟುಂಬದ ರಾವುಗು ಸ್ಥಿರವಾದ್ ಕಲ್ಲ್ ಪಾಡುನ ಕ್ರಮಲಾ ದುಂಬು ಇಜ್ಜಾಂಡ್.ಪ್ರತೀ ಆರಾಧನೆನ್ ಲಾ ದುಂಬುದ ಕ್ರಮಪ್ರಕಾರ ಮಲ್ತೊಂದು ಪೋಪುನವು ಇತ್ತೆದಕ್ಲೆಗ್  ಮಲ್ಲ ಸವಾಲಾದುಂಡು

ಭರಣಿ ಕಿರ್ತಿಕೆ ಅಮಾಸೆ  ಬುಡ್ದು ಅಂಗಾರೆ ಸುಕ್ರಾರಲಾ ಬೂತೊಗು ಕರಿಪೊಲಿ