ತುಡರ ಪರ್ಬ ದೀಪೊಲಿ ಪರ್ಬ

ತುಡರ ಪರ್ಬ ದೀಪೊಲಿ ಪರ್ಬ

ಈ ಜಾಲ ಬಲಿ ಕೊನೊಲ ಪನ್ಪುನವ್ಲು ಬಲಿ ಪಂಡ  ಕೊರ್ಪುನಿಂದ್ ಅರ್ಥ

ಆ ಜಾಲ ಪೊಲಿ ಕನಲ ಪನ್ಪುನವ್ಲು ಪೊಲಿ ಪಂಡ ದೆತೊನುನಿ ಪನ್ಪುನ ಅರ್ಥ

 ಕೊರ್ಪುನ ದೆತೊನುನ ಮಲ್ಲ ಪರ್ಬ ದೀಪಾವಳಿ

ನಂದೊಲಿಗೆದ ಚಾವಡಿ ಅರಂತಡೆಡ್  ವರ್ಸಾದಿದ ತುಡರ ಪರ್ಬದ ಪಾಡ್ಯದಾನಿ ನಡಪುನ ಕೈದು ಪೂಜೆ.ಅವೆನ್ ಇತ್ತೆ ಚಂಡಿಕಾ ದೆವಿ ಪೂಜೆ ಪನ್ಪೆರ್.ಬಾರೆದ ಬಂಬೆಡ್ ದೇವಿನ ಒರು ಮಲ್ತ್ ದ್ ಪೂಜೆ ಆಯಿ ಬೊಕ್ಕ ನೀರ್ ಗ್ ಬುಡ್ಪೆರ್.

ತುಳುನಾಡ್ ಡ್ ಕಲರಿಕಾ ದೇವತೆನ್ ಚಂಡಿಕಾ ದೇವಿ ಪನ್ಪೆರ್.

  

ಬಲಿಯೇಂದ್ರ ಲೆಪ್ಪು.

ಕೊರ್ದು ದೆತೊಂದು ಪಟ್ಟ್ ದ್ ತಿನ್ಪುನವೆ ಪರ್ಬ 

 ಎಣ್ಣೆದ ಮೀಪು ಮೈ ಸುದ್ದ ಮಲ್ಪುಂಡು

  ಕರಿದ್ ಪೋಯಿನಕ್ ಲೆ,ಇತ್ತ್ ನಕ್ ಲೆ,ಕೈ ಕಂಜಿಲೆ ಪರ್ಬ ತುಳುವ ಸಂಸ್ಕೃತಿನ್ ಅನಾವರಣ ಮಲ್ಪುಂಡು

ದೀಪ,ಪೊಲಿ ಸೇರ್ದ್ ದೀಪೊಲಿ ಪರ್ಬ.ಕತ್ತಲೆ ಮಾಜಾದ್  

ಬೊಲ್ಪು ಬೆಳಗವುನ ಪರ್ಬ ದೀಪೊಲಿ ಪರ್ಬ.

ಪೊಲಿ ಪಂಡ ಪೊಲ್ಸು,ಪೊಲ ಪಂಡ ಸಂಪೊತ್ತು

ಬಲೆಕಿ ಮರತ ಬೊಲ್ಪು ಬಲಿಯೆಂದ್ರಗ್ ತುಳುವೆರ್ ಕೊರ್ಪುನ ಮಾನಾದಿಗೆ

ನಿಲತರಸು  ಬಲಿಯೇಂದ್ರೆರೆ  ಲೆಪ್ಪು  

( ಬಲಿ ಬರಂದಿಲೆಕ ಮೊಡೆಯಿ ಮೋಸದ ಕತೆ)   

                  

ಕರ್ಗಲ್ಲ್ (ಕರಿಯ ಕಲ್ಲ್) ಕಾಯಾನಗ

ಬೊಲ್ಕಲ್ಲ್ ಪೂ ಪೋನಗ

ಉಪ್ಪು ಕರ್ಪೂರ ಆನಗ

ಜಾಲ್ ಪಾದೆ ಆನಗ

ಅಲೆಟ್ ಬೊಲ್ನೆಯಿ ಮುರ್ಕ್ ನಗ

ಗೊಡ್ಡೆರ್ಮೆ ಕಂಜಿ ಪಾಡ್ನಗ

ಎರು ದಡ್ಡೆ ಆನಗ

ಉರ್ದು ಮದ್ದೊಲಿ(ಮದ್ದಲೆ) ಆನಗ

 ನೆಕ್ಕಿದಡಿಟ್  ಆಟ  ಆನಗ

ತುಂಬೆದಡಿಟ್  ಕೂಟ  ಆನಗ

ದೆಂಬೆಲಿಗ್ ಪಾಪು ಪಾಡ್ನಗ

ದಂಟೆದಜ್ಜಿ ಮದ್ಮಲ್ ಆನಗ

ಗುರ್ಗುಂಜಿ ಕಲೆ ಮಾಜಿನಗ

ನಿನ್ನ ಊರು ನಿನ್ನ ಸೀಮೆ ಆಳಿಯೆರೆ

ಒರ ಬತ್ತ್ ಪೋ ಬಲೀಂದ್ರ

ಕೂ..ಕೂ...ಕೂ....

ಕಲ್ಲ ಬಸವೆ ಮುಕ್ಕುರು ದಕ್ಕ್ ನಗ

ಕಲ್ಲ ಕೋರಿ ಕೆಲೆಪುನಗ

ಮಂಜಲ್ ಪಕ್ಕಿ ಮೈ ಪಾಡ್ನಗ

ಕೊಟ್ರುಂಜೆ ಕೊಡಿ ಏರ್ನಗ

ಆ ಊರ ಪೊಲಿ ಕನಲ

ಈ ಊರ ಬಲಿ ಕೊನೊಲ

ಬಲ ಬಲೀಂದ್ರ.‌..

 ಅರಕ್ ದ  ಒಟ್ಟೆ ಓಡೊಡು 

ಮಯಣದ ಮೋಂಟು ಜಲ್ಲೊಡು

ಕೊಟ್ಟುಗು ಗೊಂಡೆ ಪೂ ಕಟ್ಟ್ ದ್

ಪೊಟ್ಟುಗಟ್ಟಿ ಪೊಡಿ ಬಜಿಲ್ ಗೆತೊನೆರೆ

ಬಲ ಬಲೀಂದ್ರ....

ಕೂ. ಕೂ ..ಕೂ..

ಆಟಿದ ಅಮಾಸೆಗ್

ಸೋನೊದ  ಸಂಕ್ರಾಂತಿಗ್ 

ಬೊಂತೆಲ್ದ  ಕೊಡಿ  ಪರ್ಬೊಗು 

ಈ  ಬಲ  ಬಲಿಯೇಂದ್ರ .......  

ಕೂ...ಕೂ...ಕೂ....

    ಇಂಚ  ಒವ್ವೇ  ಕಾಲೊಗುಲಾ  ಆವಂದಿನ .... ನಡಪಂದಿನ  ಸುಲ್ಲು  ಕತೆಕ್ಲೆನ್  ನಡಪುಂಡು  ಪಂಡ್ ದ್  ನಂಬುಲೆಕ್ಕ  ಮಲ್ತ್ ದ್  ಆರ್ಯ/ವೈದಿಕ  ಮಾನಿಲು  ನಂಕ್  ಮೋಸ  ಮಲ್ತೊಂದೇ  ಬತ್ತ್ ದೆರ್ , ಈ  ವೈದಿಕೆರೆನ  ಮೋಸೊಗು  ನಮ್ಮ  ದುಂಬುದ  ಸಂತಾನ  ಬಲಿ  ಆಯರ  ಬಲ್ಲಿ. ಅಂಚಾದ್  ನಮ್ಮ  ಪೆರಿಯಾರ್  ನಿಲತ  ಮಗೆ  ಬಲಿಯೇಂದ್ರೆರೆನ್  ನಮ  ಜೋಕೆಡ್  ಅರ್ತಿ- ಪಿರ್ತಿಡ್  ಮೋಕೆಡ್  ಒವ್ವೇ  ಕೋಂಗಿ  ಕಪಟ  ದಾಂತೆ  ಸೀದೊಡೆ  ಇನಿತ  ಈ  ಬೊಂತೆಲ್  ಕೊಡಿ  ಪರ್ಬೊದ  ದಿನ  ಸುಗಿತೊಂದು  ಲೆಪ್ಪುಗ ......................

          ಜನ ಮಂದೆದ ಗೇನೊಗು    ಕಬಿದಿ  ಕತ್ತಲೆ    ದೂರಾನಗ     

ಈ  ನಡತಿ ಸತ್ಯ  ನಿಜಾನಗ

ಮೋಸ  ದಗೆ  ವಂಚನೆ ದೂರಾನಗ

ಪಚ್ಚೆ ಪಜಿರ್ ಕೆಯಿ ಬಾರ್

ಬುಲೆ ಸಲೆ  ಬುಲೆದಾನಗ

ಇಲ್ಲ್ ಇಲ್ಲಲೆಡ್  ಅರಿಬಾರ್

ಸಂಪೊತ್ತು  ದಿಂಜಿದಾನಗ

ಐಸಿರೊದ ಬದ್ ಕ್  ಮಾತೆರೆಡಾನಗ

ಜನಮಂದೆದ ನಡುತ

ಏದ ಬೇದ  ದೂರಾನಗ

ಪತ್ತಪ್ಪೆ ಬಾಲೆಲು ಒಂಜಪ್ಪೆ

ಬಾಲೆಲಾದ್  ಬದ್ ಕ್ ನಗ

ತುಲುವ ಐಸಿರ ನೆಗತ್ ತೋಜಿನಗ ...................

      ಬಂಗಾರ್ ದ  ಓಡೊಡು ಬೊಲ್ಲಿದ  ಜಲ್ಲೊಡು

ಒಚ್ಚಿದೊಚ್ಚಿದ್  ಸೇರ್ ದ್

ತುಲುವ  ಕರೆಬರಿ

ಗಟ್ಟ ಜತ್ತ್ ದ್  ಸಾದಿ  ಪತ್ ದ್

 ತುಲು  ನಿಲತ

ಕಂಡ ಕಲ  ಅರಿಬಾರ ಬುಲೆಸಲೆ

ತೂಯರ  ಕಂಗ್  ತಾರೆ ಬಾರೆದ

ಪೊರ್ಲು ದೈಸಿರ

ಕಂಜಿ ಕಯ್ಕಂಜಿ  ಅಲೆ ಪೇರ್

ಪರಪು  ಬದ್ ಕ್ ನ್ ತೂದು ಪೋಯರ

ಈ  ಕಟ್ ದ್  ಪೋಯಿನ

ಸತ್ಯರಾಜ್ಯೊದ

ತತ್ ದ್  ಪೋಯಿನ  ಸತ್ಯದರ್ಮೊದ

ಮಾನ್ಯ ಬದ್ ಕ್ ದ  ಮಯಿಮೆ  ಪೆರ್ಮೆನೊರಿಪರ

ಬೊಂತೆಲ್ದ  ಕೊಡಿ ಪರ್ಬೊದ

ಎಂಕ್ಲೆ  ಲೆಪ್ಪುಗು  ಉದಗ್ ದ್  ಬರೊಡು

ಕೂಡು ಕುಟುಮೊದ 

ಪಾಡಿ  ಉರಲ್ ಗ್

ಬಕುತಿ  ಮೋಕೆಡ್

ಸಂದಾವು  ಸೊಲುಮೆಗ್

ಆ  ಊರ  ಬಲಿ  ಕನತ್ ದ್

ಈ  ಊರ  ಪೊಲಿನ್ ಕೊನೊವೊಡು

ಬಕುತಿ  ಮೋಕೆಗ್

ಈ  ಒಲಿದ್  ಬಲ  ಬಲಿಯೇಂದ್ರ ........ಕೂ....( ಮೂಜಿ  ಸರ್ತಿ )

ಬರವು--- ಪಿ . ಡೀಕಯ್ಯೆ .

.................................................

    ತುಡರ ಪರ್ಬದಪಗ ತುಳುನಾಡ್ ಡ್‌ ಗಲಸೊಂತಿ ಪೂ ದೈಕುಲು

    

                 ಮೆಗ್ ದಿ ಪಲಿ ಪೂ

  

                      ಪುಚ್ಚೆ ಪರ್ಂದ್ ದ ದೈ

                      ಕುದಿಕ ಬಚ್ಚಿರೆ

              ಪಾದೆ ಪೂ  - ಬಲಿಯೇಂದ್ರ  ಪೂ

ತುಡರ ಪರ್ಬೊದ ಬೊಲ್ಲೆಂದ್ರ ಲೆಪ್ಪು.

ಓ ಬೊಲ್ಲೆಂದ್ರ….

ದಾನ ಶೂರ ಬೊಲ್ಲೆಂದ್ರ..

ಬೂಮಿಗ್ ಜತ್ತ್ ಬಲ ಬೊಲ್ಲೆಂದ್ರ...

ಬಲ‌ ಬೊಲ್ಲೆಂದ್ರ,

ಈ ಪಜ್ಜೆ ದೀಯಿನಲ್ಪ,

ಕರ್ಗಲ್ಲ್ ಕಾಯಿ ಪೋಪುಂಡು,

ಬೊರ್ಗಲ್ಲ್ ಪೂ ಪೋಪುಂಡು,

ಜಾಲ್ ಪಾದೆ ಆಪುಂಡು,

ಕಲ್ಲಬಸವೆ ಮುಕ್ಕುರು ದಕ್ಕುಂಡು,

ಕಲ್ಲಕೋರಿ ಕೆಲೆಪುಂಡು,

ಮಂಜಲ್ ಪಕ್ಕಿ ಮೈ ಪಾಡುಂಡು.

ಕೊಟ್ರುಂಜೆ ಕೊಡಿ ಏರುಂಡು,

ಇಲ್ಲ್ ಇಲ್ಲಲೆಡ್  ಅರಿಬಾರ್

ಸಂಪೊತ್ತು  ದಿಂಜುಂಡು,

ಜನಮಂದೆದ ನಡುತ

ಏದ ಬೇದ  ದೂರಾಪುಂಡು,

ಪಚ್ಚೆ ಪಜಿರ್ ಕೆಯಿ ಬಾರ್

ಬುಲೆ ಸಲೆ  ಬುಲೆವುಂಡು,

ತುಲುವ ಐಸಿರ ನೆಗತ್ ತೋಜುಂಡು,

ಪತ್ತಪ್ಪೆ ಬಾಲೆಲು ಒಂಜಪ್ಪೆ

ಬಾಲೆಲಾವೆರ್,

ಬಂಗಾರ್'ದ  ಓಡೊಡು,

 

ಬೊಲ್ಲಿದ  ಜಲ್ಲೊಡು,

ಒಚ್ಚಿದೊಚ್ಚಿದ್  ಸೇರ್'ದ್

ತುಲುವ  ಕರೆಬರಿ,

ಮಾಯದ ಕಲೆಟ್ ಬರ್ಪಿನ ಬೊಲ್ಲೆಂದ್ರ

ಬಲ ಬೊಲ್ಲೆಂದ್ರ,

ಮೂಜಿ ದಿನೊತ ಉಚ್ಚಯ,

ಮೂಜಿ ದಿನೊತ ಬಲಿ,

ಕಂಡೊ ಕಂಡೊ ತುಡರ್ ತೂಯರೆ,

ಆಜಿ ದಿನೊತ ಪೊಲಿ ಕೊನೊಯೆರೆ,

ಈ ಊರ ಬಲಿ ಕೊನೊಲ,

ಆ ಊರ ಪೊಲಿ ಕನಲ ಬೊಲ್ಲೆಂದ್ರ,

ಪೊಟ್ಟು ಗಟ್ಟಿ ಪೊಡಿ ಬಜಿಲ ಪೊಲಿ ಕೊನೊಯೆರೆ,

ಕೊಟ್ಟುಗು ಗೊಂಡೆ ಪೂ ಕಟ್ಟ್‌ದ್ ಬಲ ಬೊಲ್ಲೆಂದ್ರ,

ಪೊಟ್ಟು ಗಟ್ಟಿ,

ಪೊಡಿ ಬಜಿಲ್,

ಬಲಸ್‌ದ್ ದೀದ್ ಕಾತೊಂದುಲ್ಲ ಬೊಲ್ಲೆಂದ್ರ,

ಆಟಿದ ಅಮಾಸೆಗ್,

ಸೋನೊದ ಸಂಕ್ರಾಂದಿಗ್,

ಬೊಂತೆಲ್ದ ಕೊಡಿ ಪರ್ಬೊಗು,

ಬಲ ಬೊಲ್ಲೆಂದ್ರ,

ನಿನ್ನ ಲೆಪ್ಪುಗು 

ಎಂಕಲೆನ

ಕೂ…ಕೂ… ಕೂ…

 ...................................

     

ತುಡರ ಪರ್ಬೊದಾನಿ ಪೆತ್ತೊಲೆಗ್ ತುಡರ್ ತೋಜಾನಗ ಪನ್ಪಿ ಪದೊ

ಕಲ್ಲಡಿತ ನೀರ್ ಮಗ,

ಮುಲ್ಲಡಿತ ಪಂತಿ ಮಗ,

ಬಾರ್ ಮಗ ಬಾರ್...

ಬರೆ ಕರೆಟೆ ಪೋವಡೆ ಮಗ,

ಆತ್ ವರ್ಷ ಬಾಳ್ ಮಗ,

ತುಡರ್ ಮಗ ತುಡರ್...

ಪಂಚ ಪಾಂಡವೆರೆ ಕೈಕಂಜಿ,

ಕಿದೆದಿಂಜಾ ಬಾಳೊಡು,

ಕುಲೊದಿಂಜಾ ಮೇವೊಡು,

ಕೊಂಬುದಿಡೆ ನರೆವೊಡು,

ಬಾಳ್ ಮಗ ಬಾಳ್...

ಕೊಂಬುಡು ಅಲಂಬು ಕೊಡಿತ್ತ್‌ನೇಟ,

ಕಣ್ಣ್‌ಡ್ ನರೆಪ್ಪು ಬನ್ನೇಟ,

ಈ ಬದುಕೊಡು ವಜ್ರ,

ತುಡರ್ ಮಗ ತುಡರ್,

ಬಾಳ್ ಮಗ ಬಾಳ್...