ತುಳುನಾಡ್ದ ಕಂಬುಲ

ತುಳುನಾಡ್ದ ಕಂಬುಲ

ಲೇಖನ :-
          ಪೂರ್ಣಿಮ . ಯಂ . ನಾಥ್

 

ಬೆಂಗಳೂರು ಕಂಬುಲೊಡು ಮಾನಾದಿಗೆ ಪಡೆಯಿನ ನಂದೊಲಿಗೆ ಶ್ರೀಕಾಂತ ಬಟ್ರೆನ ಎರು ಪಾಂಡು

ತುಳುನಾಡ ಮೂಲ ದೈವಾರಾದನೆಗ್ಲತುಳುವೆರೆ ಬೆನ್ನಿ ಸಾಗೊಳಿಗ್ಲ, ಪೂಕರೆ ಕಂಬ್ಲೊಗ್ಲ,ಕಂಬುಲೊಗ್ಲ ಸಮ್ಮಂದ ಇತ್ತ್ಂಡ್.ಬೆನ್ನಿ ಸಾಗೊಳಿಗ್ ಸಕಾಯ ಮಲ್ತಿ ಎರ್ಲೆನ್ ಮೈಸಂದಾಯ ದೈವ ಆದ್ ಆರಾದನೆ ಮಲ್ತಿನಕುಲು ನಮ.ಎರ್ಲೆಗ್ ಕುಡು ಕೊರ್ಲೆಕ ಮೈಸಂದಾಯನ ಆರಾದನೆಡ್ಲ ಕುಡುನು ಗಲಸುವ.ದೈವ,ನಾಗಾರಾದನೆದ ಒಂಜಿ ಭಾಗ ಆಯಿನ ಕಂಬುಲೊನು ಇನಿ ಜನಪದ ಕ್ರೀಡೆ ಪನೊಂದುಲ್ಲ.

ಬೆನ್ನಿ ಸಾಗೊಳಿದ ಕಂಡೊಡು ಎರ್ಲೆನ್ ದಪ್ಪುನಗ ಎರ್ಲುಕಂಡೊಡು ನುಗ ನಾಯೆರ್ದೊಟ್ಟುಗು ನಡಪುನಗ ಕೇನುನ ಕಂಡದ ಕೆಸರ್ ನೀರ್ದ ಸವ್ದ,ದಪ್ಪುನಾರ್ ಎರು ಮಾದಾನಗ ಪನ್ಪುನ ಉರಲ್ ಸೊರೊ ಕೇನೆರೆ ಪೊರ್ಲು.ಅವ್ಲು ಎರ್ಲೆಗ್ ಪೆಟ್ಟ್ ಪಾಡುನಿ ಬಾರೀ ಕಡಮೆ.ಆಂಡ ಕಂಬುಲ ಗಿಡೆರ್ನಗ ಎರ್ಲೆಗ್ ನಾಲ್ ಪೊಳಿ ಪಾಡಂದೆ ಅವು ಪಾರುಜ.

ಕಂಬುಲದ ಕಂಡೊಗು ದುಂಬುದ ಕಾಲೊಡು ದೈವೊಲೆ ಕೊಡಿಯಡಿಕ್ ಕೊರ್ಪುನಾತೇ ಮಾನಾದಿಗೆ ಕೊರೊಂತೆರ್.ಕಂಬುಲದ ಕಂಡೊಗು ಪಿದಯಾಯಿನ,ಬಂಜಿನಾಲಾಯಿನಕುಲು ಜತ್ತೊಂದಿಜ್ಜಾಂಡ್.ಜೋಡು ಪಾಡ್ದ್ ಜಪ್ಪೆರೆ ಇಜ್ಜಾಂಡ್.ಅಮೆ ಸೂತಕದಕುಲು ಕಂಡ ಜಪ್ಪುನ ಬುಡ್ಲೆ ಕಂಡದ ಪುಣಿಯೆ ಪೋಯೆರಿಜ್ಜಾಂಡ್.ಕೆಸರ್ದ ಕಂಡೊಡು ಗೊಬ್ಬುಲೆಕ ಇಜ್ಜಾಂಡ್.ಅರಿ ಬಾರ್ ಪಂಡ ನಮಕ್ ಪೊಲಿ ಪೊಲ್ಸಾದಿತ್ತ್ಂಡ್.

 ದುಂಬುದ ಕಾಲೊಡು ರಾಜಂದೈವೊಲೆನ್ ನಂಬೊಂತಿ ಗುತ್ತುಗು ಗುತ್ತುಗು ನಾನ ಬನ ಇತ್ತ್ಂಡ್.ಅಂಚನೆ ಆ ಗುತ್ತುಗೊಂಜಿ ಕಂಬುಲದ ಕಂಡ ಇತ್ತ್ಂಡ್.ದುಂಬು ಗುತ್ತು ಬರ್ಕೆಲು ಕಡಿಮೆ ಇತ್ತ್ ದ್ ಕಾಲಾನುಭಾಗೊಡು ಜಾಸ್ತಿ ಆವೊಂದು ಪೋಂಡು.

ಕಂಬುಲದ ಕಂಡೊಲು ಒಂಜಿ ಕಾಲದ ನುಪ್ಪುದ ಬಟ್ಟಲಾದಿತ್ತ್ಂಡ್ .ಕಂಬುಲ ಕಂಡೊಲು ಪಂಡ ಗೊಬ್ಬುದ ಕಲತ ಕಂಡೊಲಾದಿಜ್ಜಾಂಡ್.ಕಂಬುಲ ಒಂಜಿ ಕಂಡದ ಪುದರಾದಿತ್ತ್ಂಡ್ ವಿನಃ ಗೊಬ್ಬುದ ಪಿದರಾದಿಜ್ಜಾಂಡ್.

ಊರುದ ಕಂಬುಲ ಕೋರುನ ದಿನ ಊರುಡು ಎರ್ಲೆನ್ ಸಾಂಕೊಂತಿನಕುಲು ಅಕ್ಲೆ ಎರ್ಲೆನ್ ದೈವದ ಪೂಕರೆ ಪಾಡುನ ಬನತ  ಕಂಬ್ಲದ ಕಂಡೊಗು ಜಪುಡಾದ್ ದಪ್ಪೆರೆ ಇತ್ತ್ಂಡ್.ಉಂದು ದೈವೊಗು ಊರುದಕುಲು ಕೊರೊಂತಿನ ಮಾನಾದಿಗೆ ಆದಿತ್ತ್ಂಡ್.ದುಂಬು ಕಂಬ್ಲದ ಕಂಡೊಡು  ಎರ್ಲೆನ್  ದತ್ತ್ ದಾ,ಗಿಡೆತ್ ದಾ ಬೊಕ್ಕ ಕಂಬುಲ ಕೋರ್ ದ್ ಪೂಕರೆ ಪಾಡೊಂತೆರ್.