ಅಣ್ಣಪ್ಪ ಸ್ವಾಮಿ ಅಣ್ಣಪ್ಪ ಪಂಜುರ್ಲಿಯಾನಗ,ಉರುಂದ್ರಾಯ ಪಂಜುರ್ಲಿ ವರ್ಣಾರ ಪಂಜುರ್ಲಿ ಅನಗ

ಅಣ್ಣಪ್ಪ ಸ್ವಾಮಿ(ಪಂಜುರ್ಲಿನ ಸೇರಿಗೆಡ್) ಅಣ್ಣಪ್ಪ ಪಂಜುರ್ಲಿ ಆನಗ

(ಉಮ್ಮದ ಉರುಂದಾರ ಬೂಡು(ಸಾಣೂರು,ಇರ್ವತ್ತೂರು) ಉಮ್ಮದ ವರ್ಣಾರ ಬೂಡಾನಗ,ಉರುಂದಾರ ಬೂಡುದ ಉರುಂದ್ರಾಯ ಪಂಜುರ್ಲಿ ತೆನ್ಕಾಯಿಡ್ ವರ್ಣಾರ ಪಂಜುರ್ಲಿಯಾನಗ)

        ಅಣ್ಣಪ್ಪ ಸ್ವಾಮಿ ದೈವ ಕಾಂಚೋಡು ಬಾಳಿಲ

      ಅಣ್ಣಪ್ಪ ದೈವಸಾನ ಭಗವತಿ ದೇಲ್ಯ ಸಾದಿ ಇಟ್ಟೇಲ

                                  ಅಣ್ಣಪ್ಪ ಸ್ವಾಮಿ

        ತುಳುನಾಡ ದೈವಾರಾಧನೆಡ್ ಪಂಜುರ್ಲಿಗ್ ಬಾರೀ ಮಾನಾದಿಗೆ ಉಂಡು. ಬಾರೀ ಪಿರಾಕುದ ದೈವ ಆಯಿನ ಪ್ರಾಣಿ ಸಮ್ಮಂದಿ ದೈವ ಪಂಜುರ್ಲಿ ರಾಜಂದೈವ ಆದ್, ಗ್ರಾಮ ದೈವ ಆದ್, ಕುಟುಮದ ದೈವ ಆದ್, ಜಾಗೆದ ದೈವ ಆದ್ ಮಾನಾದಿಗೆ ಪಡೆಯಿನ ದೈವ. ಕುಟುಮದ ವಾ ನ್ಯಾಯ ನಿಮುರ್ತಿ ಇತ್ತುಂಡಲಾ ಸಾರ ಬರೆನ್ ಒಂಜಿ ಪಲಾಯಿಡ್ ಮಾಜಾವುನ  ದೈವ. ಮೂಲು  ಪಲಾಯಿ ಪಂಡ ಕಂಡ ದತ್ತಿ ಬೊಕ್ಕ ಅವೆನ್ ಸಮತಲ ಮಲ್ಪರೆ ಒಯ್ಪುನ ಅತ್ಯಾರ್. ಅಂಚಾದ್ ಬೆನ್ನಿ ಸಾಗೊಳಿಗ್ ಸಮ್ಮಂದ ಪಟ್ಟ್ ನ ದೈವ ಪಂಜುರ್ಲಿ ಆಯಿನೆರ್ದ್ದಾತ್ರ ಈ ಸಾಲ್ ಗ್ ಎಚ್ಚ ತೂಕ ಉಂಡು. ಪಂಜುರ್ಲಿಗ್ ನೇಮಂದ್  ಪನೊಡು ವಿನಃ ಕೋಲಂದ್ ಪನೆರೆ ಇಜ್ಜಿ. ದಾಯೆ ಪಂಡ ಕಟ್ಟುನಕ್ಲೆನ್ ಪಂಜುರ್ಲಿ ಲೆಪ್ಪುನಿ ನೇಮಂತಕ್ಲೆ, ನೇಮಂತ ಮಾನಿ/ಮಾನ್ಯೆಂದ್. ಬೂಮಿದ ಪುಟ್ಟು, ಬಳಕೆ ಪೂರ ಪಂಜುರ್ಲಿಡೇ ಉಂಡಾಯಿನಿ. ಬೂಮಿ ಉಂಡಾನಗ ಉಂಡಾಯಿ ದೈವಂದ್ ಪಂಡಲ ದೇವೆರೆ ಕಲ್ಪನೆ ತುಳುನಾಡುಗ್ ಬರ್ಪುನ ದುಂಬೇ ದೈವಾರಾಧನೆದ ಪಂಜುರ್ಲಿ ತುಳುನಾಡುಡ್ ಇತ್ತುಂಡ್ ಪನ್ಪುನವು ಸತ್ಯ. ದಶಾವತಾರದ ಕೆಲವೊಂಜಿ ಕಲ್ಪನೆಲು ಪಂಜುರ್ಲಿ ಸಂದಿಡ್ ತೂವೆರೆ ತಿಕ್ಕುಂಡುಂದು ಸಂಧಿದ ಅಧ್ಯಯನಕಾರೆರ್ ಪನ್ಪೆರ್. ಪುರಾಣದ ಮತ್ಸ್ಯಾವತಾರೊರ್ದು ದಶಾವತಾರ ಸುರಾಂಡ ಕುಪ್ಪೆ ಪಂಜುರ್ಲಿನ ಸಂದಿಡ್ ಸುರುತ ಸಂಧಿ ಮೀನ್ ದ ಸಂಧಿ.ಉರುಂದಾರ ಬೂಡುದ ಉರುಂದಾರ ಪಂಜುರ್ಲಿನ ಪಾಡ್ದನೊಡು "ಕೆಂಪು ಸುರ್ಪೊಡು, ಕಪ್ಪು ವರ್ಣೊಡು, ಜೌರಿ ಮುರ್ಗೊಡು" ಪನ್ಪಿ ನವ್ಲು ಜೌರಿ ಪಂಡ ತೆಲುಗು ಬಾಸೆಡ್ ಏಮೆಂದ್ ಅರ್ಥ ಬರ್ಪುಂಡು.ಮೂಲೊಡು ಉರುಂದಾರ ಪಂಜುರ್ಲಿಂದ್ ಇತ್ತ್ ನಿ.ಉರುಂದಾರ ಪಂಜುರ್ಲಿನ್ ಕೆಲವು ತಿಕ್ ಡ್ ವರ್ಣಾರ ಪಂಜುರ್ಲಿಂದ್ ಲೆತ್ತೆರ್.ಕುಪ್ಪೆ ಪಂಜುರ್ಲಿಯೇ ದುಂಬುಗು ವರ್ಣಾರ ಪಂಜುರ್ಲಿನ ಒರುಟು ಆರಾದನೆ ಪಡೆಂಡ್ಂದ್ ಲ ಪನ್ಪೆರ್.ಬೂಮಿ ಉಂಡಾನಗ ದುಂಬುಗ್ ಕಡಲ್ ಒಂದು ಒಂದುದು ಕೆಸರ್ ಉಂಡಾನಗ ಅವೆನ್ ತಿನೆರೆ ಪುಟ್ಟಿನ ಜೀವಿ ಪಂಜಿ. ಪ್ರಧಾನ ಮೂಜಿ ಸತ್ಯೊಲಾಯಿನ ಕುಪ್ಪೆ ಪಂಜುರ್ಲಿ, ಉರುಂದಾರ ಪಂಜುರ್ಲಿ,ಅಣ್ಣಪ್ಪ ಪಂಜುರ್ಲಿನೆಟ್, ಕುಪ್ಪೆ ಪಂಜುರ್ಲಿನ ಸಂದಿಲೆಡ್ ಪಂಜಿದ ಸಂದಿಲು ಬರ್ಪ.ಒಂಜಿ ಮೂಲದ ಪ್ರಕಾರ ಏಳ್ ಜನಾಂದ ಬೂಡುದ ಬಲ್ಲಾಲೆರ್ ನಂಬಿನ ಬೂಡುದ ಪಂಜುರ್ಲಿ ಮೂಲೊಡು ಕುಪ್ಪೆ ಪಂಜುರ್ಲಿಯಾದಿತ್ತ್ಂಡ್ ಗೆ.ಬಲ್ಲಾಲೆರ್ ನಂಬಿ ಕುಪ್ಪೆ ಪಂಜುರ್ಲಿನ್ ನೆಲ್ಯಾಡಿ ಬೂಡುಡು ವರ್ಣಾರ ಪಂಜುರ್ಲಿಂದ್ ಆರಾದನೆ ಮಲ್ತೆರ್ಂದ್ ಕೆಲವು ಹಿರಿಯಾಕ್ಲ್ ಪನೊಂತೆರ್. ಪಾರೆಂಕಿಬೂಡು,ನೇರೆಂಕಿ ಬೂಡು,ಕುಕ್ಕಲ ಬೂಡು,ಕೂರಿಯಾಲ ಬೂಡು,ಉರುಂದಾರ ಬೂಡು,ಅನ್ನಂಗಿಲ ಬೂಡು,ಪೊನ್ನಂಗಿಲ ಬೂಡು ಉಂದು ಆ ಏಳ್ ಬಲ್ಲಾಲೆರೆ ಬೂಡುಲು.ಅಂಚನೆ ತಿರ್ತ ರೆಂಜಿಲಾಡಿ,ಮಿತ್ತ ರೆಂಜಿಲಾಡಿ ಇಂಚ ಆರಾದನೆದ ಬೂಡುಲು ಸೇರೊಂದು ಪೋಪ. ಪಂಜಿನ್ ಸಂಸ್ಕೃತೊಡ್ ವರಾಹ ಪನ್ಪೆರ್. ಅವೆರ್ದ್ ಬೊಕ್ಕ ಶರೀರ ನರಮಾನ್ಯನ, ಶರೀರೊಗು ಕಟ್ಟಿನ  ಅಣಿತ ಮಿತ್ತ್ ಮುಗತಟ್ಟೆಡ್ ಮುಗ ದೀಪೆರ್. ಈ ಮುಗ ನರಮಾನ್ಯನ ಮೊನೆರ್ದ್ ಭಿನ್ನವಾದುಪ್ಪುಂಡು. ಪುರಾಣದ ದಶಾವತಾರೊಡ್ಲಾ ನರಸಿಂಹಾವತಾರದ ಕಲ್ಪನೆ ಬರ್ಪುಂಡು. ಉಂದೆನ್ ತೂನಗ ಡಾರ್ವಿನ್ನನ ವಿಕಾಸವಾದೊದ ಜೀವಿಲ್ನ ಬುಳೆಚಿಲ್ ಗ್ಲಾ, ಪುರಾಣದ ದಶಾವತಾರೊಗ್ಲಾ, ದೈವದ ಪುಟ್ಟು ಬುಳೆಚಿಲ್ ದ ಸಂದಿಡ್ ಬರ್ಪುನ ಇಚಾರೊಗ್ಲಾ ದಾದನಾ ಸಮ್ಮಂದ ಇತ್ತಿಲೆಕ ತೋಜುಂಡು. ಪುರಾಣೊಡು ಪಾತಾಳ ಪನ್ಪಿ ಕಲ್ಪನೆ ಉಂಡು. ಅವ್ಲು ನಾಗೆರ್ ಉಲ್ಲೆರ್ಂದ್ ಪನ್ಪೆರ್. ನಿಜವಾದ್ ಗಟ್ಟದ ಮುದೆಲ್ನ್ ಪಾತಾಳಂದ್ ಪನ್ಪೆರ್. ಗಟ್ಟದ ಮುದೆಲ್ದ, ನೀರ ವಸರ್ದ ತುಳುನಾಡ್ ಪುರಾಣೊಲೆಡ್ ಬರ್ಪುನ ಪಾತಾಳ ಆದಿತ್ತ್ ದ್  ತುಳುನಾಡುಡ್ ನಾಗಾರಾಧನೆಗ್ ಬಾರ್ಯಾತ್ ಮಾನಾದಿಗೆ ಇತ್ತುದ್ ಮೂಲು  ನಾಗರ ಜನಾಂಗ ಬದುಕೊಂದಿತ್ತುಂಡುಂದ್ ಚರಿತ್ರೆ ಪನ್ಪುಂಡು. ನಾಗ ವಂಶದ ಬಂಟೆರ್ ತುಳುನಾಡುಡ್ ಇತ್ತೆರ್ ಪನ್ಪಿ ಇಚಾರೊಲಾ ತೆರಿದ್ ಬರ್ಪುಂಡು. ಏಳ್ ಕಡಲ್ ದಾಂಟಿನ ದಂಡುದ ರಾಜ್ಯ, ಏಳ್ ಕಡಲ್ ಕರಿದ್ ಬೆಮ್ಮೆರ್ ನಿಲೆಯಾಯಿನ ಪುರ್ಪದ ಪೊರ್ಲ ಇಚಾರ ಜಾರೆ ಪನ್ಪುನಾಯನ ಸಂದಿಡ್ ಬರ್ಪುಂಡು. ರಾಯೆರೆ ಚಾವಡಿ ಬಂಟಾಲೊರ್ದ್ ಬೊಕ್ಕ ಪ್ರಾಣಿ ಸಮ್ಮಂದಿ ದೈವ ಪಂಜುರ್ಲಿನ, ನರಮನಿ ಒರುತ ಕಲ್ಲುರ್ಟಿನ ಆರಾದನೆ ತಗೆ ತಂಗಡಿಯಾದ್ ಸುರಾಂಡ್.ಆಂಡ ಈ ಇಚಾರೊಗು ಸರಿಯಾಯಿನ ಆಧಾರ ತಿಕ್ಕುಜಿ. ರಾಜಂದೈವ ಕೊಡಮಂದಾಯನ ಒಟ್ಟುಗು ಆರಾಧನೆ ಪಡೆಯುನ ಕಲ್ಲುರ್ಟಿ ಪಂಜುರ್ಲಿನ ಆರಾಧನೆ ತಗೆ ತಂಗಡಿಯಾದ್ ಮಾಯೆದ ಒರುಟು ನೆಗತ್ ತೋಜುಂಡು. ಪಂಜುರ್ಲಿನ್ ಗಟ್ಟದ ಮಿತ್ತ್ ಅನ್ನದಾನದ ಜಾಗೆದ ಸ್ವಾಮಿ, ಅಣ್ಣಪ್ಪ ಸ್ವಾಮಿಂದ್ ಲೆತ್ತೆರ್. ಪ್ರಾಣಿ ಸಮ್ಮಂದದೊರುತ  ಪಂಜುರ್ಲಿನ್ ಅಣ್ಣಪ್ಪೆ ಪಂಡಲ ಅವು ಅಣ್ಣಪ್ಪ ಪಂಜುರ್ಲಿಯೆ.ಅಣ್ಣಪ್ಪೆ ನರಮಾನಿಯಾ,ದೈವನಾ,ದೇವೆರಾ ಈ ಇಚಾರೊಡು ಗೊಂದಲಲ ಉಂಡು. ಪಿಲಿ ಕೋಲ, ಪಂಜಿ ಕೋಲ, ಕುದುರೆ ಕೋಲ, ಪುದ ಕೋಲ, ಕಾಲೆ ಕೋಲ ಇಂಚ ಬೇತೆ ಬೇತೆ ಸಗ್ತಿಲೆಗ್ ಕೋಲ ಕಟ್ಯೆರ್ಡ ಕಲ್ಲುರ್ಟಿ, ಪಂಜುರ್ಲಿಗ್ ಕೋಲ ಕಟ್ಟುನತ್ತ್. 16 ಕಟ್ಲೆದ ವಸಯೊಡು ನೇಮ ಆಪುನಿಂದೇ ಪನೊಡು. ದೈವೊಲೆಗ್ ಕಟ್ಟುನ ನಲಿಕೆ ಜನಾಂಗದಕುಲು ಮಲೆ ಜತ್ತಿನಾಯೆ ಮಲರಾಯ/ಮಲೆರಾಯ ಪಂಜುರ್ಲಿ ಪಂಡ, ಪರವೆರ್ ಮಲರಾಯನ್ ಜುಮಾದಿ ಪಂಡೆರ್ಡ, ಪಂಬದೆರ್ ಮಲೆರಾಯ/ಮಲರಾಯನ್ ಮಲರಾಯೆಂದೇ ಪನ್ಪೆರ್. ಮಲಾರ ಮಣ್ಣುದ ಮಲರಾಯನ್ ನಂಬಿನ ಬೂಡುದ ಬಲ್ಲಾಳ್ರೆನ್/ ಮಲ್ಲರಾಯೆರೆನ್ ನೇರ್ಪು ಮಲ್ಪುನ ಒರುಟ್ ಲಾ ಮಲರಾಯನ್ ತೂಪೆರ್. ಜುಮಾದಿ, ಮಲರಾಯನ ಮುಗತ ಒರು ಒಂಜೇ ಲೆಕ್ಕ ಇತ್ತುಂಡಲ ಪಂಜುರ್ಲಿ ಕೆಬಿತ ಒರು ಕೊಂಡೆ ಕೆಬಿ, ಮಲರಾಯನವು ನರಮಾನಿ ಕೆಬಿ. ಕೆಲವು ತಿಕ್ಕುಡ್ ಮಲರಾಯನ, ಜುಮಾದಿನ ಮುಗ ನರಮಾನಿನ ಮೋನೆದೊರುಟು ಉಪ್ಪುನಲಾ ಉಂಡು. ಕಾಡ್ದ ಮಲ್ಲರಾಯನ್ ತೂಂಡ ಅವು ಪಿಲಿ. ಅಪಗ ಪಿಲ್ಚಂಡಿಂದ್ ಪನೊಡು.  ಆಂಡ ಪಿಲ್ಚಂಡಿ ದೈವ ಎಚ್ಚಾದ್ ಮಲರಾಯನ ಒಟ್ಟುಗು ಉಪ್ಪುಂಡು. ಮಲರಾಯನ ಮುಗ ತೂಂಡ ಮುದಲೆದೊರು ಪಂಡ ಲೆಕ್ಕೆಸಿರಿನ ಒರುತಲೆಕ ಉಂಡು. ಅಂಚಾದ್ ದೈವನ್ ಇಂಚಂದೇ ಪನ್ಯೆರೆ ಬಾರೀ ಬಂಙ.  ಲೆಕ್ಕೆಸಿರಿನ್ ಒರ್ತ್ಯಪ್ಪೆ ಉಲ್ಲಾಲ್ದಿ ಪನ್ಪ. ಅಂಚಾಂಡ ಲೆಕ್ಕೆಸಿರಿಯೇ ಉಲ್ಲಾಲ್ದಿಯಾ? ಉಂದೆನ್ ಪೂರ  ತೂನಗ ತನ್ನ ಇಚಾರೊನು ದೈವ ಸಂಪೂರ್ಣವಾದ್ ಚರ್ಮದೃಷ್ಟಿದ ನಮಕ್ ಬುಡು ಕೊರ್ತಿಜಿಂದ್ ತೆರಿಯುಂಡು. ವಿಷ್ಣುಮೂರ್ತಿನ್ ಕೇರಳ ತುಳುನಾಡ ಬಾಗೊಡು ಪಿಲ್ಚಂಡಿಂದುಲಾ ಪನ್ಪೆರ್. ಅವೆತ ಮುಗತ ಲಕ್ಷಣ ಪಿಲಿತ ಲೆಕನೆ ಉಪ್ಪುಂಡು. ಜುಮಾದಿನ್ ಕೇರಳ ಬಾಗೊಡ್ ಚಾಮುಂಡಿಂದ್ ಆರಾಧನೆ ಮಲ್ತೆರ್ಡ, ಕೊಡಮಂದಾಯನ್ ಲೆಕ್ಕೆಸಿರಿನ ಒರುಂದು,ಕೊಡಮಂದಾಯನ ಏರಿ ಮುಗೊನು ಬೆಮ್ಮೆರೆ ಒರುಂದು,ಕೊಡಮಂದಾಯನ್ ಚಾವುಂಡಿನ ಒರುಂದುಲಾ ಪನ್ಪೆರ್.  ಜಠಾಧಾರಿ ದೈವ - ಜಿಡೆತಾರ್ - ಕೂರ ಪೆರ್ಗಡೆ (ಕೇರಳ ಕರ್ನಾಟಕ ತುಳುನಾಡ ಗಡಿಭಾಗ-ಕೀಲಾರಿ-ಕಣಂದೂರು) , ಕುಮಾರಸ್ವಾಮಿ(ದರ್ಮತಲ) , ಕುಮಾರೆ (ಸುಬ್ರಹ್ಮಣ್ಯ) - ಬೆಮ್ಮೆರ್  ಉಂದು ಪೂರಲ ಒಂಜೆ. ಮೂಲೊನು ನಾಡೊಂದು ಪೋಂಡ ಈ ಇಚಾರ ನಮ್ಮ ಕಣ್ಣ ದುಂಬು ಬರ್ಪುಂಡು.

ಪ್ರಾಕೃತಿಕ ಆರಾಧನೆದ ಆಸುರೀ ಕಿರಿಯೆದ ದೈವಾರಾಧನೆದ ತಾಂತ್ರಿಕ ತಾಮಸ ಸಗ್ತಿಲೆನ ದೇವೆರ್ ಸಿವೆ. ಉಭಯಲಿಂಗಿ ಬೆಮ್ಮೆರ್(ಶಿವ - ಪಾರೊತಿ), ಲೆಕ್ಕೆಸಿರಿ, ನಾಗೆ ಇಂಚ ಬೆಮ್ಮೆರೆಗ್ ಮೂಜಿ ಲಿಂಗದ ಆರಾಧನೆ ಉಪ್ಪುಂಡು. ಇನಿ ನಮ ಪಾವಂಜೆದ (ಹಳೆಯಂಗಡಿದ ಕೈತಲ್) ದೇವಾಲ್ಯೊಡು ಅಣ್ಣಪ್ಪನ ಮೂರ್ತಿನ್ ತೂವೊಲಿ. ಅವ್ಲು ಅಣ್ಣಪ್ಪನ್ ಸ್ವಾಮಿಂದ್, ಗುರುಂದು ಪನ್ಪೆರ್. 1200 ವರ್ಸೊಗು ದುಂಬು ಶಂಕರಾಚಾರ್ಯೆರೆಗ್ ಆರ್ ತನ್ನ ತಪಸ್ಸುದ ಸಗ್ತಿನ್ ಧಾರೆ ಮೈತುದ್ ಆರ್ ಸಮಾಧಿಯಾಯಿನಿಗೆ. ಅವ್ಲು ಅಣ್ಣಪ್ಪನ್ ಗುರುಂದು ಲೆಪ್ಪುವೆರ್. ಈ ಗುರುನ ಮೂರ್ತಿದ ಒಂಜಿ ಕೈಟ್ ಉರುಲಿ(ಸಪಾದದ ಪಾತ್ರೆ), ಕುಡೊಂಜಿ ಕೈಟ್ ಪಂಜು (ಜೀಟಿಗೆ) ಉಂಡು. ಇಂಚ ಪತೊಂದು ತಪಸ್ಸುಗ್ ಕುಲ್ಲಿನ ಅರೆನ್ ಅಣ್ಣಪ್ಪ ಪಂಜುರ್ಲಿಂದ್ ಲೆತ್ತೊಂತೆರ್ ಗೆ. ಅಣ್ಣಪ್ಪ ಸ್ವಾಮಿನ್ ತುಳುನಾಡುದ ಗುರುಂದು ಪಂಡೆರ್ಡಲಾ ಆರೇ ಪಂಜುರ್ಲಿಯತ್ತ್. ಅಣ್ಣಪ್ಪನ್ ಅಣ್ಣು ಜೋಗಿಂದ್ಲಾ ಪನ್ಪೆರ್,ಅಣ್ಣಪ್ಪಯ್ಯೆರ್ ಅಣ್ಣಪ್ಪೆ ಆಯಿನಿಂದ್ ಲ ಪನ್ಪೆರ್.ಅಣ್ಣು ಜೋಗಿಯಾ,ಅಣ್ಣಪ್ಪಯ್ಯೆರಾ ಒವ್ವಾ ಕಾರಣೊಗು ಕರಿದ್ ಪೋದು ಪಂಜುರ್ಲಿನ ಸೇರಿಗೆಡ್ ಅಣ್ಣಪ್ಪ ಪಂಜುರ್ಲಿಂದ್ ಆರಾದನೆ ಪಡೆದಿಪ್ಪೆರ್. ವರ್ಣಾರ ಪಂಜುರ್ಲಿನ್ ಒಂಜಿ ಜೋಗಿನ ಅವತಾರಂದ್ ಲ ಪನ್ಪೆರ್. ದರ್ಮತಲೊಟು ಕಾಳಾತ್ರಿ, ಕಾಳರಾಹು, ಕುಮಾರಸ್ವಾಮಿ, ಕನ್ಯಾಕುಮಾರಿ ಧರ್ಮ ದೈವೊಲಿತ್ತುದ್ ಅಣ್ಣಪ್ಪೆ ಅಡೆ ಬೊಕ್ಕ ಬೈದ್ ನಿಗೆ. ಪಂಜುರ್ಲಿನ ಆರಾದನೆ ಅವ್ಲು ದುಂಬೆ ಇತ್ತ್ಂಡ್ ಪನ್ಪೆರ್. ಜಿನ ಸ್ವಾಮಿನ ಆರಾಧಕೆರ್ ಶೈವಾರಾಧನೆದ ಲಿಂಗೊನು ವಾದಿರಾಜೆರ್ಡ ತಾಪನೆ ಮಲ್ಪಯೆರುಂದ್ ಪನ್ಪೆರ್.ಶೈವ,ವೈಷ್ಣವ,ಜೈನ ಮೂಲು ಮೂಜಿ ಪಂಥ ಧರ್ಮೊಲೆನ ಸಮ್ಮಂದ ನೆಗತ್ ತೋಜುಂಡು.

                       ಅಣ್ಣಪ್ಪ ಸ್ವಾಮಿ ನಡುಬೊಟ್ಟು

 ತಿರ್ತೇಳ್, ಮಿತ್ತೇಳ್ ಲೋಕದ ಅಧಿಪತಿ ಶಿವನ್ ಪರಬ್ರಹ್ಮಂದ್ ಪನ್ಪೆರ್.  ಶಿವನ್ ಪಶುಪತಿಂದ್ ಪಂಡುದ್ ಪಂಚಮುಖಿಂದ್ ಲೆಪ್ಪುವೆರ್. ಹರಪ್ಪ, ಮೊಹೆಂಜೊದಾರೊದ ಕಾಲೊಡೆ ಪಶುಪತಿನ ಕಲ್ಪನೆ ಉಂಡು. ಪಶುಪತಿನ ದೇವಾಲ್ಯ ತೂಯರೆ ದೈವೊಲೆ ಕಲತ ಸಿಂಗದನತಲೆಕ ನೇಪಾಳೊಡು ತೂಯೆರೆ ತಿಕ್ಕುಂಡು ಮೂಲು ಪಂಚಮುಖಿ ಪಂಡ ಪ್ರಕೃತಿ ಸಗ್ತಿದ ಬೂಮಿ, ಅಕ್ಕಸ, ಗಾಳಿ, ನೀರ್, ಬೊಕ್ಕ ಸೂ. ಪಾಣಿಪೀಠ ಪಾರೊತಿ, ಲಿಂಗ ಶಿವೆ, ಪ್ರಕೃತಿ ಪುರುಷ ಕಲ್ಪನೆದ ಮಿಥುನ ಲಿಂಗ. ಪರ್ವತೊಲು ಜಿಡೆ, ಮುಗಲ್ ರ್ದ್ ಜಪ್ಪಿನ ಬರ್ಸದ ನೀರ್ ಗಂಗೆನ ಒರುಟು ಪರ್ವತದ ಮಿತ್ತುರ್ದ್ ಸುದೆಯಾದ್ ಕಡಲುಗ್ ಪೋದು ಸೇರುನಿ.   ಬೂಮಿಡ್, ಕಡಲ್ ಡ್ ಸೂ ಉಂಡು. ಉಂದು ಜ್ವಾಲಾಮುಖಿ, ಶಿವನ ಮೂಜನೆ ಕಣ್ಣ್ ಉಂದೆಕ್ ಸಾಕ್ಷಿ. ಗಾಳಿ ಪಂಡ ನಮ್ಮ ತಿಗಲೆಡ್ ಉಂಡಾಯಿನ ಸ್ವಾಸೊ. ಉಂದೆಕ್ ಲಬ್ ಡಬ್ ಶಿವನ ಡಮರು ಸಾಗ್ಸಿ. ಅಕ್ಕಸಗ್ ಶಿವನ ತರೆತ ಚಂದ್ರೆ ಸಾಗ್ಸಿ. ಸೂರ್ಯ ಚಂದ್ರೆ, ಪ್ರಕೃತಿ ಆರಾಧಕೆರಾಯಿನ ತುಳುವೆರೆಗ್ ಶಿವೆನೇ ಮಾತಲ ಆದಿತ್ತೆ. ಆಯನ ನಾಲಿದ ನಾಗೆ ಇಸೊತ ಅರ್ಕಟ್ಟ್ ಗ್ ಸಾಗ್ಸಿ.ಸೂತ ಮಿತ್ತ್ ನೀರ್,ನೀರ್ ದ ಮಿತ್ತ್ ಮಣ್ಣ್,ಮಣ್ಣ್ ದ ಮಿತ್ತ್ ಗಾಳಿ,ಗಾಳಿದ ಮಿತ್ತ್ ಆಕಾಶ,ಇಂಚ ಪಂಚಬೂತೊಲೆನ ಸಮ್ಮಂದ ತೆರಿಯು. ಶೈವಾರಾಧಕೆರೆ ಆರಾಧ್ಯ ದೈವ ಶಿವನ ಭಸ್ಮ ಪುರ್ಸಾದ ರೂಪೊಡು ಕೊರೊಂತೆರ್.ಮಾತೆನ್ ಪೊತ್ತದ್ ಬೊಣ್ಯ ಮಲ್ಪೊಲಿ.ಭಸ್ಮೊನು ಪೊತ್ತಾಯೆರೆ ಆಪುಜಿ.ಅವ್ವೆ ಅಂತಿಮ. ಇನಿ ಅಡೆಗ್ ಗಂಧ ಬೈದುಂಡ್. ಶಿವನ ಅಡ್ಡ ನಾಮ ದೈವಾರಾಧನೆಡ್ ತೋಜಿದ್ ಬತ್ತುದ್ ಅಡ್ಡ ಅಣಿಲ ಶೈವಾರಾದನೆಗ್ ಸಾಗ್ಸಿ. ಸಗ್ತಿದ ಒರು ಪಾರೊತಿಯಾಂಡ ಶೈವ ಸಗ್ತಿ ಈಸರೆ. ಆಲಡೆದ ಪಂಚ ಸಗ್ತಿಲಾದ್ ಮೂಲ ಸಗ್ತಿಯಾದ್ ಬೆಮ್ಮೆರ್, ಉಪ ದೈವ ಆದ್ ನಾಗೆ, ಮೈಸಂದಾಯೆ, ಲೆಕ್ಕೆಸಿರಿ ಬೊಕ್ಕ ಪಂಜುರ್ಲಿ ನೆಗತ್ ತೋಜುವೆರ್‌.ಬೆಮ್ಮೆರೆ ಪೊಣ್ಣ ಒರು ಒರ್ತ್ಯಪ್ಪೆ ಕನ್ಯಾವು ಲೆಕ್ಕೆಸಿರಿ. ಉಂದು ಪ್ರಕೃತಿ ಸಗ್ತಿಲು. ಶಿವೆ ಬ್ರಹ್ಮ ಕಪಾಲ ಪತೊಂದು ನಟ್ಟ್ ನಗ ಪಾರೊತಿ ಬಿಕ್ಷೆ ಕೊರ್ಪಲ್. ಪಾರೊತಿ ಅನ್ನಪೂರ್ಣೇಶ್ವರಿಯಾಂಡ, ಜನಪದ ಕತೆತ ಪ್ರಕಾರ ಬಂಗಾಡಿದ ಅರಂತಡೆಗ್ ಕೊರತಿಯಾದ್ ಬರ್ಪಲ್. ಕೊರತಿನ, ಅನ್ನಪೂರ್ಣೇಶ್ವರಿನ ಇರ್ವೆರ್ನ ಕೈಟ್ ಲಾ ನುಪ್ಪುದ ಚೌಂಟು ಉಪ್ಪುಂಡು.  ಅಡ್ಪೆದಿಲ್ಲದ  ದಿಕ್ಕೆಲ್ದ ಕೈತಲ್ ಕೊರತಿನ ಆರಾಧನೆ ಉಪ್ಪುಂಡು.ಪೊಂಜನಕ್ಲೆಗ್ ಚಾಕಿರಿ ಉಪ್ಪುಂಡು.ಬೆಮ್ಮೆರೆಗ್, ಈಸರಗ್ ಉಳ್ಳಾಯೆ ಪಂಡ , ಪಾರೊತಿನ್ ಉಲ್ಲಾಲ್ದಿಂದ್ಲಾ ಪನ್ಪೆರ್(ಇನಿ  ಪರಮೇಶ್ವರಿನ  ಒಟ್ಟುಗು  ದುರ್ಗೆ ಸೇರೊಂಡ್. ದುರ್ಗಾ ಪರಮೇಸ್ವರಿಯಾದ್ ದುರ್ಗೆ ನೆಗತ್ ತೋಜಿದ್ ಪಾರೊತಿ ಮಯಕಾಯಲ್). ಲೆಕ್ಕೆಸಿರಿನ್ ಪುದರ್ ಪನಂದೆ ಉಲ್ಲಾಲ್ದಿಂದೆ ಲೆತ್ತೊಂತ. ಇನಿ ತುಳುನಾಡ ದೈವೊಲೆಗ್ ಪುರಾಣ ಸೇರ್ದ್ ದೇವೆರಾದ್ ಪೋಂಡು. ಲೆಕ್ಕೆಸಿರಿ ದೇವಿನೊರುತ ರಕ್ತೇಶ್ವರಿಯಾಂಡ್.ಆಟದ ರಂಗತಲೊಟು ಆರಾದನೆದ ಲೆಕ್ಕೆಸಿರಿನ್ ರಕ್ತೆಸ್ವರಿಂದ್ ಏಸ ಮಲ್ತ್ ದ್ ಕುಂಬರೊಂದುಲ್ಲೆರ್.ಒವ್ವೊವು ಓಲೋಲಿಪ್ಪೊಡೋ ಅವ್ಲವ್ಲಿತ್ತ್ಂಡ ಎಡ್ಡೆ.

               ಪಂಜಿದ ಮಿತ್ತ್ ಕುಲ್ದಿನ ಪಂಜುರ್ಲಿ ದೈವ.

ಇತ್ತೆ ಪೂರ ಪಂಜಿದ ಮಿತ್ತ್ ಕುಲ್ದಿನ ನರಮಾನಿ ಒರುನು ಅಣ್ಣಪ್ಪ ಪಂಜುರ್ಲಿಂದ್ ಪನೊಂದುಲ್ಲೆರ್.ನರಮಾನಿ ಒರುತ ಅಣ್ಣಪ್ಪ ಸ್ವಾಮಿಯೇ ಬೇತೆ,ಪ್ರಾಣಿ ಮೂಲ ದೈವ ಪಂಜುರ್ಲಿಯೇ ಬೇತೆ.ಅಣ್ಣಪ್ಪ ಸ್ವಾಮಿನ ಕೈಟ್ ಕಡ್ಸಲೆ ಉಪ್ಪುಜಿ .ಅಣ್ಣಪ್ಪ ಬೆಟ್ಟೊಡು ಸುರುಕು ಅಣ್ಣಪ್ಪ ಸ್ವಾಮಿಗ್ ನಡಾವಳಿ ನಡತ್ ದ್ ಪಿತಿ ಬೊಕ್ಕ ಒಂಜಾತ್ ಪೊರ್ತು ಕರಿದ್ ಪೊಟ್ಟ ಪಂಜುರ್ಲಿಗಾದ್ ಕುಡ ಪಿರಿದ್ ಪಂಜುರ್ಲಿಗ್ ಅವ್ವೇ ಐತೊಡು ನೇಮ ನಡಪುಂಡು.ಅಯುದೊಲು ಬೇತೆ ಉಪ್ಪುಂಡು.

ಕೆಲವು ಕೋಡಿಡ್ ಅಣ್ಣಪ್ಪ ಪಂಜುರ್ಲಿಗ್ ಸಂದಿ ಪಾಡ್ದನ ಪ್ರಧಾನ ಆದಿಪ್ಪಂದೆ ಸಗ್ತಿ, ಕಾರ್ನಿಕ ತೊಜಪಾವುನ ನುಡಿಕ್ ಮಾತ್ರ ಮಹತ್ವ ಉಪ್ಪುಂಡು. ನಿಜವಾದ್ ತೂಪುಂಡ ದೇವೆರೆಗ್ ಮಂತ್ರ ಎಂಚ ಪ್ರಧಾನನಾ ದೈವೊಲೆಗ್ ಸಂದಿಲು ಆತ್ ಪ್ರಧಾನ ವಾದುಂಡು. ತುಳುನಾಡುದ ಕೆಲವೊಂಜಿ ಬಾಗೊಡು ಸಿರಿಮುಡಿ ಉಪ್ಪುನ ಅರಸು ದೈವೊಲಾಯಿನ ಉಲ್ಲಾಕ್ಲೆಗ್ ಸಿರಿಮುಡಿ ದೀವಂದೆ ಆರಾಧನೆ ಮಲ್ಪುನಲಾ ಉಂಡು. ಅಣ್ಣಪ್ಪ ಪಂಜುರ್ಲಿನ್ ಕೆಲವು ಕೋಡಿಡ್ ಅಣ್ಣಪ್ಪ ರಕ್ತೇಶ್ವರಿ ಪಂದ್ (ಲೆಕ್ಕೆಸಿರಿ) ಪನ್ಪುನಕುಲ್ಲಾ ಉಲ್ಲೆರ್. ಸಂದಿ ಪಾಡ್ದನ ಕಲ್ಪೆರೆ ಬಾರ್ಯಾತ್ ಕಾಲ ಬೋಡು. ಆಂಡ ಕಾಲಿ ನುಡಿ ಪಂಡ ಆತ್ ಬಂಙಂದ್ ಅಕ್ಲೆಗ್ ಆವಂದ್. ಅಣ್ಣಪ್ಪೆ ಒರಿ ಸಿದ್ದಿ ಪುರುಷೆ ಆದಿತ್ತುದ್ ಆಯೆ ಪಂಜುರ್ಲಿನ ಸೇರಿಗೆಗ್ ಸೇರ್ದ್ ಅಣ್ಣಪ್ಪ ಪಂಜುರ್ಲಿಯಾಯೆಂದ್ ಕೆಲವೆರ್ ಪನ್ಪೆರ್. ಮೂಕಾಂಬಿ ಜೇವು ಗುಳಿಗನ ಸೇರಿಗೆಡ್ದಾದ್  ಮೂಕಾಂಬಿ ಗುಳಿಗೆ ಆಯಿನವು, ಬೆಮ್ಮೆರೆ ಸೇರಿಗೆಡ್ ಬಲಾಂಡಿ ಬ್ರಹ್ಮ ಬಲಾಂಡಿ ಆಯಿನ ಇಚಾರೊಲು ತುಳುನಾಡುದ ದೈವಾರಾಧನೆಡ್ ನೆಗತ್ ತೋಜುಂಡು. ಇಲ್ಲದೆಚ್ಚಿಡ್ ಪಂಜುರ್ಲಿನ್ ಇನಿ ಅಣ್ಣಪ್ಪ ಪಂಜುರ್ಲಿ ಪಂಡುದ್ ನಂಬುವೆರ್.ಪಡೆ ಕಲ್ಲ್ ಪಾಡ್ ದ್ ಅಣ್ಣಪ್ಪ ಪಂಜುರ್ಲಿನ್ ಆರಾದನೆ ಮಲ್ಪುವೆರ್. "ಮೂಡಾಯಿ ಕುಟುಮ, ಲಿಂಗ ಪತೊಂದು ಬತ್ತೆ, ಪ್ರತಿಷ್ಠೆ ಮಲ್ತೆಂ"ದ್ ಅಣ್ಣಪ್ಪ ಪಂಜುರ್ಲಿಗ್ ಕಟ್ಟುನಕುಲು ಕಲೊಟು ನುಡಿಯುನಲಾ ತೋಜುಂಡು. ಒಂಜೆ ಜಾಗೆಡ್ ಒಂಜಿ ಪ್ರಧಾನ ದೈವ ಉಪ್ಪುನಗ ಪೊಸತಾದ್ ಅಡೆ ಬತ್ತ್ ನ ಬೂತೊಗು ಸಂದಿ ಪಾಡ್ದನ ಇಜ್ಜಿಂಡ ಪ್ರಧಾನ ದೈವದ ಸಂದಿನ್ ತುಳುನಾಡುಡ್ ಕೆಲವೊಂಜಿ ಜಾಗೆಡ್ ಪೊಸತಾದ್ ಬತ್ತ್ ನ ದೈವೊಗು ಪಂಡುದ್ ಬೊಕ್ಕ ಪೊಸತ್ ಬತ್ತ್ ನೆಕ್ ಅವೆನ್ ಗೋಡ್ಯಾವೆರ್. ನಮ ಏತ್ ತೆರಿಪಾವೊಂದು ಪೋಂಡಲಾ ಜನ ಅಕ್ಲೆ ಕೊಸ್ವಾಸ್ ಗ್ ಮಲ್ಪುನೆರ್ದಾತ್ರ ಕೆಲವೊಂಜಿ ಕಟ್ಟುಲು ಪೊಳಿಯೊಂದು ಪೋವೊಂದುಲ್ಲ. ಕೆಲವೆರೆ ಪ್ರಕಾರ ಅಣ್ಣಪ್ಪ ಪನ್ಪುನ ಉಲ್ಲೇಖ ಸಂದಿಡ್ ಇಜ್ಜಿ ಪಂಡೆರ್ಡ ಮೂಲ ಜನಾಂಗದಕ್ಲು ಕಟ್ಟುನ ಪಂಜುರ್ಲಿನ ಸಂದಿಡ್ ಅಣ್ಣಪ್ಪನ ಇಚಾರ, ಅಣ್ಣಪ್ಪ ಪಂಜುರ್ಲಿನ ಸಂದಿಡುಂಡು. ಸುಮಾರ್ 5 ಸಂದಿಲುಲ್ಲಂದ್ ಸಂದಿದ ಸಂಶೋಧಕೆರಾಯಿನ ವಿಜಯ ಕುಮಾರ್, ಕಾಸರಗೋಡು ತೆರಿಪಾದೆರ್.ಉರುಂದಾರ  (ವರ್ಣಾರ) ಪಂಜುರ್ಲಿಗ್ಲಾ 7 ಸಂದಿಲಿತ್ತುದ್ ಅವು 9 ಸಂದಿ ಮುಟ್ಟ ಒತ್ತೊಂದು ಪೋಪುಂಡುಂದುಲ ತೆರಿಪಾದೆರ್. ಸಂದಿದ ಹಿನ್ನೆಲೆ ತೂನಗ ಅಣ್ಣಪ್ಪ ದೈವಲ,ಅಣ್ಣಪ್ಪ ಸ್ವಾಮಿಲ, ಅಣ್ಣಪ್ಪ ಪಂಜುರ್ಲಿಲ ಒಂಜೆ ಪಂದ್ ಪನ್ಪೆರ್. 

ತುಳುನಾಡುಡ್ ದೇವಾಲ್ಯೊಲು ಓಲು ಪೂರ ಉಲ್ಲನಾ ಹೆಚ್ಚಾದ್ ಅಧಿಕಾರ ಉಲ್ಲಾಯಿನಿ ದೈವೊಲೆಗ್. ತುಳುನಾಡ್ ಗ್ ದೇವೆರೆ ಆರಾಧನೆ ಬರ್ಪುನ ದುಂಬೇ ಪ್ರಕೃತಿ ಆರಾಧನೆಯಾಯಿನ ದೈವಾರಾಧನೆ ಇತ್ತುಂಡ ಪನ್ಪುನವು ಸ್ಪಷ್ಟ. ಕಾರ್ನಿಕೊಲು ನಮಕ್ ದೈವೊಲೆನನೆ ತೋಜಿದ್ ಬರ್ಪುನಿ. ದೇವೆರ್ ಪಿದಯಿ ಬನ್ನಗ ಕೈ ಬೊಲ್ಪು ಪತೊಂದು ಎದುರುಡೆ ಪೋಪೆರ್. ಉಂದೆನ್ ದೈವದ ಒರುಂದು ತೆರಿನ ಪೆರಿಯ ತರೆಕುಲು ಪನೊಂತೆರ್. ಧರ್ಮನೇಮ ಪಂಡ ಬೊಲ್ಪುಗು ಸುರಾಯಿನವು ಮದ್ದೆನ ಆನಗ ಪಿರಿಯೊಡು. ದೈವೊಗು ಆವಾರ ಆದ್ ಪಿರಿ ಬೊಕ್ಕ ಧರ್ಮ ನಡಪುಂಡು. ಮೂಲು ಧರ್ಮ ಪಂಡ ನುಪ್ಪು ದಾನ / ಸಮರ್ಧನೆಂದ್ ಪನ್ಪೆರ್. ಧರ್ಮ ನಡಪುನಿ ಪಗೆಲ್ ಮದ್ದೆನದ ಏಳ್ಯೆಡ್. ಧರ್ಮ ದೈವೊಲ್ನ ಧರ್ಮ ಚಾವಡಿಡ್  ನೇಮ ನೆರಿ ಆನಗ ಮದ್ದೆನ ಧರ್ಮ ನಡಪುಂಡು. ಧರ್ಮ ನೇಮ ಮಲ್ಪುನಕುಲು ಧರ್ಮೊಗು ಕುಂದೆಲ್ ಬರಂದಿಲೆಕ ನಡತೊಂತೆರ್. ಅಣ್ಣಪ್ಪ ದೈವ ಸಾಮಾನ್ಯವಾದ್ ಇಲ್ಲದೆಚ್ಚಿಡ್ ಧರ್ಮದೈವ ಆದೇ ಉಪ್ಪುನಿ. ಗಡಿ ಬೂಳ್ಯ ಪತ್ತ್ ನಗಲ ಅಂಚನೆ. ಗಡಿ ಬೂಳ್ಯ ಪತ್ತಿ ಬೊಕ್ಕ ದೈವೊಗು ನೇಮ ಪಿರಿ ಬೊಕ್ಕ ಮದ್ದೆನ ಗಡಿತೊಣಸ್ ನಡಪುಂಡು. ಇನಿ ಇರ್ಲ್ ನೇಮ ನಡಪುನಗ ಬಾರ್ಯಾತ್ ದೈವೊಲೆಗ್ ನೇಮೊಲಿತ್ತುದ್ ಒಂಜಿ ದೈವೊಗು ಆವಾರಾದ್ ಪಿರಿದ್ ಮಾತೆರೆ ಒಣಸ್ ಆಯಿ ಬೊಕ್ಕ ಬೊಕ್ಕೊಂಜಿ ದೈವೊಗು ನೇಮ ಸುರಾಪುನ ಬದಲ್ ಸುರುತ ದೈವದ ನೇಮ ಕರಿಸಾತ್ ಗ್ ಒಣಸ್ ಕೊರೊಂದುಲ್ಲೆರ್. ಕುಡೊಂಜಿ ದೈವೊಗು ಎಣ್ಣೆ ಬೂಳ್ಯ ಕೊರ್ದು ಕೋಲ ತಯಾರ್ ಮಲ್ತೊಂದುಲ್ಲೆರ್. ನಿಜವಾದ್ ಪನೊಡು ಪಂಡ ದೈವೊಗು ಆವಾರ ಕೊರಿ ಬೊಕ್ಕನೇ ನಮ ಗೆತೊನೊಡು. ಅಣ್ಣಪ್ಪ ಪಂಜುರ್ಲಿ ದೈವ ಕಾವಳ ನಾಯಗಡ "ಎಂಕೊಂಜಿ ಚೌಂಟು ಚೀಪೆ ಕಲಿ ಕೊರ್ಲ" ಪಂದ್ ಕೇನ್ನಗ ಕೊರಂದೆ ಉಪ್ಪುನಗ ಆಯನೇ ಕೆರ್ಪುಂಡು. ಪಂಜುರ್ಲಿ ದೈವ ಕೆರೊಂದು ಬತ್ತ್ ದೇ ಎಚ್ಚಾದ್ ಅಧಿಕಾರ ಸ್ಥಾಪನೆ ಮಂತೊಂದು ಬೈದ್ ನಿ.

ಅಣ್ಣಪ್ಪ ಪಂಜುರ್ಲಿಂದ್ ಆರಾದನೆ ಮಲ್ಪುನ ಪಂಜುರ್ಲಿ ದೈವ ಮಣೇಲ್ ಮಟ್ಟಿ ಬಾರೆಬಿತ್ತಿಲ್.

ತುಳುನಾಡುಡ್ ಪ್ರಧಾನವಾದ್ 3 ಪಂಜುರ್ಲಿನ ಆರಾಧನೆ ಇತ್ತುದ್ 1 - ಅಣ್ಣಪ್ಪ ಪಂಜುರ್ಲಿ, 2 -ಉರುಂದಾರ ಪಂಜುರ್ಲಿ(ಉರುಂದಾರ ಬೂಡು-ಸಾಣೂರು,ಇರ್ವತ್ತೂರು,ಕಾರ್ಲ.ಉರುಂದಾರನ್ ತೆನ್ಕಾಯಿಡ್ ವರ್ಣಾರ ಪನ್ಪೆರ್), 3 - ಕುಪ್ಪೆ ಪಂಜುರ್ಲಿ. ಅಣ್ಣಪ್ಪ ಪಂಜುರ್ಲಿ ಕುಪ್ಪೆಟ್ಟುಗು ಪೋದು ಕುಪ್ಪೆಟ್ಟು ಪಂಜುರ್ಲಿಯಾಪುನಿಂದ್ ತೆರಿನಕ್ಲೆ ಅಭಿಪ್ರಾಯ. ಉರುಂದಾರ( ವರ್ಣಾರ )ಬೊಕ್ಕ ಅಣ್ಣಪ್ಪ ಪಂಜುರ್ಲಿ ಒಂಜೇ ಮಾಯೆದ ರಡ್ಡ್ ಅವತಾರೊಲು. ಅಣ್ಣಪ್ಪ ಪಂಜುರ್ಲಿ ನ್ಯಾಯ ತೀರ್ಮಾನೊಡು ಶಾಂತ ಆದಿತ್ತುಂಡ ಉರುಂದಾರ (ವರ್ಣಾರ) ಪಂಜುರ್ಲಿ ಉಗ್ರವಾದಿಪ್ಪುಂಡು. ಅಣ್ಣಪ್ಪ ಪಂಜುರ್ಲಿ ಉಗ್ರ ಪಂಜುರ್ಲಿಯಾದ್ ತುಳುನಾಡ ಸತ್ಯ ಪ್ರಮಾಣದ ಜಾಗೆ ಕಾಣತ್ತೂರುಡು ತೂಯೆರೆ ತಿಕ್ಕುಂಡು. ಉಗ್ರ ಮೂರ್ತಿ ಪಂದ್ ಲ ಅವ್ಲು ಅಣ್ಣಪ್ಪ ಪಂಜುರ್ಲಿನ್ ಪನ್ಪೆರ್. ಉರುಂದಾರ ಪಂಜುರ್ಲಿನ ಆರಾಧನೆಡ್ ಉರುಂದಾರ ಬೂಡು(ಜೈನ ನರಸಿಂಗ ಪಕ್ಕಳೆರೆಗ್,ಉರುಂದಾರ ಬರ್ಕೆದ ಪೂಜಾರಿ ಉರುಂದಾರ ಬಿರ್ಮುಗು ದೈವದ ಕಲೊಟು ಆಯ ಬ್ಯಾಯ ಬೂರುಂಡು) ಉರುಂದಾರ ಬರ್ಕೆದ ಕಲ್ಪನೆಲ ನಮಕ್ ತಿಕ್ಕುಂಡು‌.ಉರುಂದಾರ ಬೂಡುನು ಉಮ್ಮಂದ ಉರುಂದಾರ ಬೂಡುಂದು ಪನ್ಪುನಿ.ಮುಲ್ತ ಪಂಜುರ್ಲಿನ್ ಉರುಂದ್ರಾಯ ಪಂಜುರ್ಲಿಂದ್ ಲ ಪನ್ಪೆರ್.ಅಂಚನೆ ಕೆಲವೆರ್ ಉಮ್ಮಂದ ಉರುಂದಾರ ಬೂಡುನು ಉಮ್ಮಂದ ವರ್ಣಾರ ಬೂಡುಂದುಲ ಪನ್ಪೆರ್.ಉರುಂದಾರ ಪಂಜುರ್ಲಿ ಬಲಿಕೇ ಸುತ್ತು ಬರ್ಪುನಿ ವಿನಃ ಬೇತೆ ಸಾನ ಇತ್ತುಂಡಲ ಸಾನೊಗು ಸುತ್ತು ಬರ್ಪುಜಿ. ಅಣ್ಣಪ್ಪ ಪಂಜುರ್ಲಿನ್ ಈಸರೆಂದ್ ಪಂಡಲ ಶಿವನ ಶಾಂತ ಬೊಕ್ಕ ಉಗ್ರ ರಡ್ಡ್ ಮೋನೆದ ಪರಿಚಯಲಾ ನಮಕ್ ದೈವದ ಒರುಟು ತಿಕ್ಕುಂಡು. ಅಣ್ಣಪ್ಪ ಪಂಜುರ್ಲಿನೆಟ್ ಕಾಶಿದ ಕಲ್ಪನೆ ಬರ್ಪುಂಡು. ಮೂಲ ಕಾಶಿ ಬೇತೆ ಇತ್ತುಂಡ ದಕ್ಷಿಣ ಕಾಶಿಂದ್ ತಲೊನು ಪನ್ಪೆರ್. ಉಂದು ಉತ್ತರದ ಕಾಶಿಯತ್ತ್, ದಕ್ಷಿಣದ ಕಾಶಿ. ಉರುಂದಾರ(ವರ್ಣಾರ) ಪಂಜುರ್ಲಿನ ಪುಟ್ಟಾಪುನ್ನೇ ಕಾಶಿಡ್ಂದ್ ಪನ್ಪುನಕುಲ್ಲ ಉಲ್ಲೆರ್.ಉರುಂದಾರ( ವರ್ಣಾರ), ಅಣ್ಣಪ್ಪ, ಕುಪ್ಪೆ ಪಂಜುರ್ಲಿಗ್ಲಾ ಪಂಜುರ್ಲಿಂದ್ ಪುದರ್ ಬರಿಯರೆ ಕಾರಣ ಉಂಡು.ಈ ಮೂಜಿ ದೈವೊಗ್ಲಾ ಪಂಜಿದ ಸಂಧಿ ಉಂಡು. ಅಣ್ಣಪ್ಪ ಪಂಜುರ್ಲಿಗ್ಲಾ, ಕುಪ್ಪೆ ಪಂಜುರ್ಲಿಗ್ಲಾ, ಉರುಂದಾರ ಪಂಜುರ್ಲಿಗ್ಲಾ ಪಂಜಿದ ಸಂಧಿ ಪನೆರೆ ಉಂಡು. ಅಣ್ಣಪ್ಪ ಪಂಜುರ್ಲಿನ್ ದೇವೆರೆ ಮಾನಾದಿಗೆಡ್ ಅಣ್ಣಪ್ಪ ಸ್ವಾಮಿ ಪಂಡ್ದ್ ಲೆತ್ತ್ ದೆರಾತೆ.ಅಣ್ಣಪ್ಪ ಸ್ವಾಮಿಗ್ ನೇಮ ಅತ್ತ್,ನಡಾವಳಿ. ಲೆಕ್ಕೆಸಿರಿನ್ ರಕ್ತೇಶ್ವರಿ ಪನ್ಲೆಕ, ಜುಮಾದಿನ್ ಧೂಮಾವತಿ ಮಲ್ತ್ ಲೆಕ, ಚೌಂಡಿನ್ ಚಾಮುಂಡಿ ಮಲ್ತ್ ಲೆಕ. ಉರುಂದಾರ ಪಂಜುರ್ಲಿ ಸುರುತೊಂಜಿ ಅಬತಾರೊಡು ಗಗ್ಗರ ಮದಿಪುಂದು ನಿಧಾನವಾದ್ ಪೋದು ಕುಲ್ಲುನ ಕಿರಮ ಉಂಡು. ಅಣಿಯಾಯಿ ಬೊಕ್ಕಲ ಅಂಚನೆ ಪೋದು ಕುಲ್ಲುನ ಕಿರಮ ಉಂಡು. ಮೂಲು ಮಾತ್ರ ಸಮಾಧಾನ ಉಪ್ಪುಂಡು. ಬಲಿಕ್ ನಾಲ್ ಬಲಿ, ಏಳ್ ಬಲಿಂದ್ ಬಲಿಯಾಯೆರೆ ಉಂಡು. ಉರುಂದಾರ ಪಂಜುರ್ಲಿನ ಉಗ್ರೊನು ತೂನಗ, ಮುರ್ಲುನೆನ್, ಉರ್ಡುನೆನ್, ಪುರೆಲುನೆನ್ ತೂನಗ ಒರ ನಮಕ್ ಅಸಕ್ಕ ಆಪುಂಡು.   

ತುಳುನಾಡ ಮಾತ ದೈವೊಲು ಬಾಯಿ ಬುಡ್ದು ಬೊಕ್ಕ(ಪಾತೆರ/ನುಡಿಯಾಯಿ ಬೊಕ್ಕ) ಆವಾರ ದೆತೊಂಡ, ಉರುಂದಾರ(ವರ್ಣಾರ) ಪಂಜುರ್ಲಿ ಆವಾರ ದೆತೊನುನ ದುಂಬು "ಎಂಕ್ ಸ್ವಾಮಿನ ಅಪ್ಪಣೆ ಆವೊಡು "ಪಂದ್ ಕೇನುಂಡು. ವರ್ಣಾರ ಪಂಜುರ್ಲಿಗ್ ಸುರುಕು ಆವಾರ, ಬೊಕ್ಕ ನುಡಿಯಾಪುನಿ. ತಲೊಕು ಸ್ವಾಮಿನ ಲಿಂಗ ಕೊನೊನಗ ಓಲ್ಲಾ ಆವಾರ ದೆತೊನಂದೆ ಅಡೆ ಎತ್ತವೊಡುಂದು ದೇವೆರೆ ಅಪ್ಪಣೆಯಾಯಿಲೆಕ ಅಡೆಗೆತ್ತ್ ದ್ ಆವಾರ ಸ್ವೀಕಾರ ಮಲ್ತುದ್ ಬಾಯಿ ಬುಡ್ಪುನ ಉಲ್ಲೇಖ ಸ್ಪಷ್ಟವಾಯಿನ ಹಿನ್ನೆಲೆನ್ ಸಂದಿದ ಸಂಶೋಧಕೆರ್ ಗುರ್ತಿಸಾದೆರ್. ಅಂಚಾದ್ ತುಳುನಾಡುಗ್ ಉರುಂದಾರ ಪಂಜುರ್ಲಿ/ಅಣ್ಣಪ್ಪ ಪಂಜುರ್ಲಿ(ಜೋಗಿ ಅವತಾರ/ಶಿವೆ) ತಲೊಡ್ದು ಬತ್ತ್ ನವು ಸೊಸ್ಟ. ಕುಪ್ಪೆ ಪಂಜುರ್ಲಿ ಮಾತ್ರ ತಲೊರ್ದು ಬತ್ತ್ ನವತ್ತ್.ತಲೊತ ಪಂಜುರ್ಲಿಲ ಮೂಲದ ಕುಪ್ಪೆ ಪಂಜುರ್ಲಿಂದ್ ಹಿರಿಯಾಕುಲು ಪಂತೆರ್. ಅಣ್ಣಪ್ಪ ಸ್ವಾಮಿ(ಅಣ್ಣಪ್ಪೆ ಮಾಯ ಆದ್ ಪಂಜುರ್ಲಿನ ಸೇರಿಗೆಡ್ ಅಣ್ಣಪ್ಪ ಪಂಜುರ್ಲಿಯಾಪುನಿ) ದುಂಬುಗು ಅಣ್ಣಪ್ಪ ಪಂಜುರ್ಲಿಯಾಪುನಿ. ದೈವ ಪುಟ್ಟುದು  7 - 7 ½ ಅವದಿಡ್ ಸಂದಿ ಪುಟ್ಟುಂಡುಂದ್ ಪೆರಿಯಾಕ್ಲು ಪನ್ಪೆರ್. "ಗಿರಿಟ್ ಗಿರಿ ಮುತ್ತು ಸ್ವಾಮಿನ ಗದ್ದಿಗೆದ ಬಂಟೆ" ಪಂಡ್ ದ್ ದೈವ ಪನ್ಪುಂಡು.ಅಪಗ  ಕುಪ್ಪೆ ಪಂಜುರ್ಲಿಯಾಂಡ ಮೂಲು ಬಂಟೆನೇ ಪಂಜುರ್ಲಿಯಾಪುನಿ. ದೈವ ಎಂಚ ಉಂಡುಂದು ಅವೆನ್ ಲಪ್ಪೆರೆ ಸಾಧ್ಯನೇ ಇಜ್ಜಿ. ನರಮಾನಿಯಾದ್ ಉದಿತ್ ದ್ ಅಸಾಮಾನ್ಯ ಸಗ್ತಿಡ್ ಮಾಯೆಡ್ ಮಲ್ಲೆಯಾದ್ ನೆಗತ್ ನ ಸಗ್ತಿಲು ಇನಿ ತುಳುನಾಡುಡ್ ಆರಾಧನೆ ಪಡೆಯೊಂದುಲ್ಲ. ಈಶ್ವರೆ ದೇವೆರಾಂಡಲಾ ನರಮಾನಿಯನ ರೂಪೊಡೇ ಇತ್ತ್ ನತ್ತೆ. ಪುರಾಣ ಕಲ್ಪನೆದ ನರಮಾನಿಲು ದೇವೆರಾಂಡ, ದೈವಾರಾಧನೆದ ಕಲೊಟು ತೋಜಿದ್ ಬರ್ಪುನಕ್ಲು ದೈವ ಬೂತೊಲು. ದೇವೆರೆ ಆರಾಧನೆಗ್ ಪ್ರತಿಯಾದಾ, ವಿರುದ್ದವಾದಾ ಉಪ್ಪುನಿ ದೈವಾರಾಧನೆ ಪನ್ಪುನವು ಸ್ಪಷ್ಟ. ಕುಪ್ಪೆ ಪಂಜುರ್ಲಿನೆಟ್ ಮೀನ್ ದ ಅವತಾರ ಉಂಡು. ಅಂಚಾದ್ ಮೀನೇ ಕುಪ್ಪೆ ಪಂಜುರ್ಲಿಯತ್ತ್. ಉಗ್ರೊಡು ಅತ್ಯುಗ್ರದ ಒಂಜಿ ಜೀವಿ ಉಂಡು ಪಂಡ ಅವು ಕಾಡ ಪಂಜಿ. ಜೋರು ತಾಗುಂಡ ನರಮಾನ್ಯನ್ ತಿಗುತ್ ದ್ ಬುಡು. ಉಗ್ರೊಡು ಉಗ್ರ ಪಂಜಿಯಾಯಿನೆರ್ದಾತ್ರ ಪಂಜಿದ ಒರುಟೇ ಪಂಜುರ್ಲಿ ದೈವದ ಆರಾಧನೆ ನಡಪುಂಡು. ಉಗ್ರರೂಪ ಆಯೆರೆ ಬೋಡಾದ್ ಈ ಮೂಜಿ ದೈವೊಲೆಗ್(ಕುಪ್ಪೆ, ಉರುಂದಾರ ಅಣ್ಣಪ್ಪ ಪಂಜುರ್ಲಿ) ಪಂಜಿದ ಸಂದಿ ಪನ್ಪುನಿ. ಬೇತೆ ವಾ ದೈವೊಲೆಗ್ಲಾ ಪಂಜಿದ ಸಂಧಿ ಪನೆರೆ ಇಜ್ಜಿ. ಆಂಡ ಬೇತೆ ಬೇತೆ ತಿಕ್ ಗ್ ಪೋದು ಆ ಊರುದ ಪುರಪುನು ಪತೊನ್ನ ಪಂಜುರ್ಲಿ ದೈವೊಗ್ಲಾ ಪಂಜುರ್ಲಿನ ಸಂದಿ ಪನೆರೆ ಉಂಡು. ಈ ಉರುಂದಾರ/ಅಣ್ಣಪ್ಪ ಪಂಜುರ್ಲಿಯೇ ತುಳುನಾಡುಡ್ ಬೇತೆ ಬೇತೆ ಜಾಗೆಡ್ ಬೇತೆ ಬೇತೆ ಪುದರ್ ಡ್ ನೆಲೆಯಾಪುನಿ. ಅಣ್ಣಪ್ಪ ಪಂಜುರ್ಲಿನ್ ಬೋಳ್ನಾಡ್ ದೈವಂದ್ ಪಂಡ ಕೇರಳ ಬಾಗೊಡು ಅಂಚನೇ ಪಂಡ ಮಲಾರ್ಡ್  ಮಲರಾಯನ್ ಬೋಳ್ನಾಡ್ ಸತ್ಯಂದ್ ಪನ್ಪುಂಡು. ಮಲರಾಯನ್ ಮಲಾರ ಪಂಜುರ್ಲಿ ಪಂದ್ ಲ ಪನ್ಪೆರ್. ದೈವದ ಏತ್ ಸಂದಿಲಿತ್ತಡಲ ಪ್ರಾದೇಶಿಕವಾದ್ ತೂನಗ ಒಂಜೆಕೊಂಜಿ ಸೇರೊನೊಜಿ. ಅವು ಸರಿಯಾ, ಉಂದು ಸರಿಯಾಂದ್ ಉತ್ತರ ನಾಡೆರೆನೇ ಸಾಧ್ಯ ಇಜ್ಜಿ. ಅಂಚಾದ್ ದೈವಾರಾಧನೆನ್ ಕಡಲ್ ಗ್ ಓಲ್ಪಡಿ ಮಲ್ದೆರ್. ಕೆಲವು ತಿಕ್ ಡ್ ಅಣ್ಣಪ್ಪಗ್ ಅಪ್ಪರಂಬು ಇತ್ತುಂಡ ಎಚ್ಚಾದ್ ಅಣ್ಣಪ್ಪ ಪಂಜುರ್ಲಿಗ್ ತಿರಿತ ಅಣಿಯೇ ಉಪ್ಪುನಿ. ತಲೊತ ಬೆಟ್ಟೊಡಾಪುನ ಅಣ್ಣಪ್ಪ ಸ್ವಾಮಿನ ಆರಾಧನೆನ್  ಪೊಂಜನಕ್ಲೆಗ್ ತೂವೆರೆ ಇಜ್ಜಿಗೆ. ಅಂಚನೆ ಅನಂತಾಡಿಡ್ ಬೊಳ್ಳಿದ ಮುಗ ದೀನಗ ಉಲ್ಲಾಲ್ದಿನ್, ಕೇಪುಡು ನೆರಿ ಜಪ್ಪುನಗ ಉಲ್ಲಾಲ್ದಿನ್ ಪೊಂಜನಕ್ಲ್ ತೂವೆರಿಜ್ಜಿ.

ಕೆಲವು ತಿಕ್ ಡ್ ಮಲರಾಯೆ ಪ್ರಧಾನ ಆದಿಪ್ಪುನವ್ಲು ಉಪದೈವ ಇತ್ತುಂಡ ಅವ್ಲು ಮನಿಪುನ ಅಧಿಕಾರದ ಸುರುತ ದೈವ ಮಲರಾಯನ ಸಂಧಿ ಪಂಡುದ್ ಬೊಕ್ಕ ಆ ಸಂದಿನ್ ಉಪ ದೈವೊಗು ಸೇರಾವೊಂದು ಪೋಪೆರ್. ಕಟ್ಟ್ ಕಟ್ಲೆ ನೇಮಲಾ ಮಲರಾಯಗ್ ಪಿರಿ ಬೊಕ್ಕ ಅವ್ವೇ ಐತೊಡು ಪಿಲ್ಚಂಡಿ, ಪಂಜುರ್ಲಿಗ್ ಮಲ್ಪುನ ಕಿರಮಲಾ ಉಂಡು. ಮಲರಾಯಗ್ ನೇಮ ಆದ್ ಪೊಟ್ಟ ಬಂಟನ ಕಟ್ಟ್ ಕಟ್ಲೆಲಾ ಉಪ್ಪುಂಡು. ಪಾತೆರುನ ಒಂಜಿ ಪ್ರಧಾನ ದೈವ ಉಪ್ಪುನಗ ಉಪದೈವೊಲೆಗ್ ಅವ್ಲು ನುಡಿ ಉಪ್ಪುಜಿ. ಮಲರಾಯಗ್ ಮಲಾರ ಬೂಡುದ ಸಂಧಿ ಪನ್ಲೆಕನೆ ಅಣ್ಣಪ್ಪ ಪಂಜುರ್ಲಿಗ್ಲಾ ಅವ್ವೇ ಸಂದಿನ್ ಪನ್ಪುನಲಾ ಉಂಡು. ಅಪಗ ಅಣ್ಣಪ್ಪೆನೇ ಮಲರಾಯೆನಾ? ಮಲರಾಯೆನೆ ಅಣ್ಣಪ್ಪೆನಾ? ಉಂದೆಕ್ ಉತ್ತರ ನಾಡೊಂದು ಪೋಂಡ ಬಾನದ ಕೊಡಿಕಡೆ ನಾಡೊಂದು ಪೋಯಿಲೆಕಾವು. ಮಾಯದ ಸಗ್ತಿಲೆನ ಬೇತೆ ಬೇತೆ ಅವತಾರೊಲು ಇಂಚ ಪೂರ ಉಪ್ಪು ಪನ್ಪಿನ ಕಲ್ಪನೆಡ್ ನಮ ಆರಾಧನೆ ಮಲ್ಪೊಡಾತೆ. ಅಣ್ಣಪ್ಪೆ ಪನ್ಪುನಾಯೆ ವ್ಯಕ್ತಿ ಶಕ್ತಿಯಾದ್ ಪಂಜುರ್ಲಿಯಾದ್ ಅಣ್ಣಪ್ಪ ಪಂಜುರ್ಲಿಯಾದುಪ್ಪೊಡುಂದು ತೆರಿನ ಪೆರಿಯಾಕ್ಲೆ ಅಭಿಪ್ರಾಯ. ನಮ ದುಂಬು ಧರ್ಮ ಇತ್ತುಂಡ್ ಪನ್ಪ. ಆಂಡ ದನಿ ಒಕ್ಕೆಲ್ ಗೇಣಿದ ಕಾಲೊಡು ನರಮಾನ್ಯನ್ ನೊತ್ತ್ ಹಾಕೊಂತ್ನ ಕಾಲ. ಆಂಡ ನಿಜವಾದ್ ತೂಂಡ ಧರ್ಮ ಇತ್ತೆ ಉಂಡುಂದಾಪುಂಡು. ದಾಯೆ ಪಂಡ ಇನಿ ಮಾತ ಜಾತಿ ಧರ್ಮದಕುಲ್ಲಾ ಒಂಜಪ್ಪೆ ಬಾಲೆಲ್ಲೆಕ ಬದುಕೊಂದುಲ್ಲ. ಏದ ಬೇದೊಲು ಪೂರ ಸಮಾಜೊರ್ದ್ ದೂರಾತ. ಅಣ್ಣಪ್ಪ ಸ್ವಾಮಿ ಪಂದ್ ತಲೊಟು ಆರಾಧನೆ ಇತ್ತುಂಡ ತುಳುನಾಡ ಮಾತಾ ಭಾಗೊಲೆಡ್ಲಾ ಅಣ್ಣಪ್ಪ ಪಂಜುರ್ಲಿಯಾದ್ ಆರಾಧನೆ ನಡಪುಂಡು. "ಮೂಡಾಯಿ ಗಟ್ಟೊರ್ದು ಜಪ್ಪುನಗ ಜೇನಿ ಕಲ್ಲ್ ಡ್ ಉಂತ್ಯೆ, ಜೇನಿಕಲ್ಲ ಪಂಜುರ್ಲಿ ಪನ್ಪಯೆ, ಮೂಡಾಯಿ ಕುಟುಮೊಗು ಬತ್ತ್ ದ್ ದೇವೆರೆನ ಪ್ರತಿಷ್ಠಾಪನೆ ಮಲ್ಪಾವೆ. ಅಲ್ತ್ ನಡು ಬುಳೆಕರೊಗು ಬರ್ಪೆ(ವೇಣೂರು - ಕನ್ನಡಿಕಟ್ಟೆದಂಚಿದ ಜಾಗೆ), ನಡುಬುಳೆಕರರ್ದ್ ಸೀದಾ ಪಡ್ಡೇಯಿ ಪೆರ್ ರಗ್ ಬರ್ಪೆ, ಪಡ್ಡಾಯಿ ನೂರ್ದಾಳ ಪಟ್ಟ ಪೆರ್ರರ್ದ್ ಅಂಬಡಾಡಿ ಐಂದಾಳ ಪಟ್ಟೊಗು ಬರ್ಪೆ. ಅಂಬಡಾಡಿ ಐಂದಾಳ ಪಟ್ಟದ ಕಟ್ಲೆಯಾವೊಂದು ಕುಡ್ಲ ಸಾರ ಸೀಮೆ ಬೊಕ್ಕ ತುಳುನಾಡುದ ಮಾತಾ ಕೋಡಿಗ್ ಪೋಪೆ."

ಮೂಡಾಯಿ ಗಟ್ಟ ಜತ್ತ್ ದ್ ಬನ್ನಗ ಜೇನಿಕಲ್ಲ್, ಮೂಡಾಯಿ ಕುಟುಮ, ಬಲಕರ ಕಡತ್ ದ್ ಅಣ್ಣಪ್ಪ ಪಂಜುರ್ಲಿ ಪಡ್ಡೇಯಿ ಪೆರ್ ರಗ್ ಬತ್ ದ್ ಮೂವೆರೆ ಉಲ್ಲಾಕುಲೆ ಚಿತ್ತ ಮಲ್ಲೆಂದ್ ಪಂಡೊಂಡೆ, ಸತ್ಯ ಮಿತ್ಯದ ಬಂಟ ಕಂಬ ಅವ್ಲು ಪಾಡ್ಪಾಯೆ. ಗ್ರಾಮೊಡು ನಾಲ್ ಗುತ್ತು ಬೋಡು ಪಂಡೆ. ಮುಂಡೊಟ್ಟು, ಬೆರಣೊಟ್ಟು, ಲಕ್ಕೆ, ತಿದ್ಯ ಮುಂಡೊಟ್ಟು  ತೂದಾದ್ ಅಲ್ತ್ ದುಂಬುಗು(ಪೆರ್ ರ ನೂರ್ದಾಲ ಪಟ್ಟೊರ್ದು ದುಂಬು) ಅಂಬಡಾಡಿ ಐಂದಾಳ ಪಟ್ಟ ಅಕ್ಕೆರೆ ಪಾದೆಗ್ ಬತ್ತುದ್ ಉಂತುದ್ ತೂಪೆ. ಅಕ್ಕೆರೆ ಪಾದೆಡುಂತುದು ಎಳುವೆರ್ ಸಿರಿಕುಲೆ ಸೂಕೆ ತೂಪೆ. ಅಲ್ತ್ ಬೊಕ್ಕ ಸಾಲ್ ಕೊಂಬತ್ತಿ ಬೂಮಿಗ್ ದೃಷ್ಟಿ ಪಾಡ್ವೆ.(ಸಾಲ್ ಕೊಂಬತ್ತಿ = ಕಿರ್ ಸ್ತಾನ್; ಕೊಂಬತ್ತೆರ್ = ಕಾಮತೆರ್) ಅವ್ಲ ಅಂಬಡಾಡಿ ಕೈತಲೆ ಉಪ್ಪುನ ಬೂಮಿ. ಅಂಬಡಾಡಿ ಐಂದಾಳ ಪಟ್ಟ ಕೇರ್ಪಾಯೆ, ಮಂಗ್ಲಿಮಾರ್ ಸಾನೊಗು ಪಾಣೆ ಪತ್ಯೆ. ಪಾಣೆ ಪತ್ಯೆ ಪಂಡ ಪಾದ ಊರ್ಯೆ, ಪೊಗ್ಯೆಂದ್ ಅರ್ಥ. ಅಂಬಡಾಡಿಡ್ ಬದ್ಯಾರ ಗುತ್ತು, ಬಡದೋಡಿ ಗುತ್ತು, ಎಳಂದ್ರ ಬಾವ, ತುಂಬೆನ್ನ ಗುತ್ತು, ಕಾಯೆರ್ ಮರಗುತ್ತುಲು ಪ್ರದಾನ ಆದಿತ್ತ. ಅಂಬಡಾಡಿ ಐಂದಾಳ ಪಟ್ಟ ಕಟ್ಯೆ, ಪಾಣೇರ ನಿನ್ನಿ ಪೊಯ್ಯೆಡುಂತ್ಯೆ, ಪೊರಿ ಪೊಲ್ಲೆರೆನ್ ಲೆತ್ತೆ, ಬೊಕ್ಕ ಮಂಗಳೂರು ಸಾರಾಳ ಸೀಮೆ, ಇಟ್ಟೇಲ್, ಪುತ್ತೂರ ಕೋಡಿಗ್ ಪೋಪುನಿ. ಕಾಂತಾರೊಡು ಮಯಕಾದ್ ಕಲ್ಲ ಪಂಜಾಪೆ. ಇಂಚ ತುಳುನಾಡೊರ್ಮೆಲ ಅಣ್ಣಪ್ಪ ಪಂಜುರ್ಲಿನ ಆರಾಧನೆ ಸುರಾಪುಂಡು. ಅಂಚನೆ ಈದು ನಾರಾಯಿ ಲ್ ದಂಚಿಲ ಪೋದು ಕಾರ್ನಿಕ ಮೆರೆಪೆ. ಅಂಬಡಾಡಿಡ್ದ್ ಪಂಜುರ್ಲಿ ದೈವ ರಾಯೆರೆ ಚಾವಡಿಗ್ ಬರ್ಪುನಿ. ಕಲ್ಕುಡ ಕಲ್ಲುರ್ಟಿನ ಆರಾಧನೆ ದುಂಬುಡ್ದೇ ಅವ್ಲುಂಡು. ಕಲ್ಕುಡನ ದಂಟೆ ಬೆದ್ರ, ಶಿರ್ತಾಡಿ, ಅಳಿಯೂರುದ ಕೈತಲ್ ವಾಲ್ಪಾಡಿ ಪನ್ಪಿನ ಜಾಗೆಡ್ ಒಂಜಿ ಪುದೆಲ್ದ ನಡುಟುಂಡು. ಸುಮಾರ್ 8 ರ್ದ್ 10 ಅಡಿ ಎತ್ತರದ ಉರುಂಟುದ ಕಲ್ಲ್ ದ ದಂಟೆ ಒಂಜಿ ಪುದೆಲ್ದ ನಡುಟುಂಡು. ಅಪಗ ಕಲ್ಕುಡೆ ಏತ್ ಗಟ್ಟಿ ಇಪ್ಪೆದೆ, ಏತ್ ಎತ್ತರ ಇಪ್ಪೆದೆ ಪನ್ಪುನೆನ್ ತೆರಿಯೊನೊಲಿ. ಅಂಬಡಾಡಿದ ಕೈತಲ್ ಚೌಟೆರೆ ತಡ್ಯಾಲ್ ಗುತ್ತು ಇತ್ತುಂಡ್. ದುಂಬುದ ಕಾಲೊಡು ಅಂಬಡಾಡಿಗ್ ಕಲ್ಲುರ್ಟಿ ಬತ್ತುದ್ ಅಣ್ಣಪ್ಪ ಪಂಜುರ್ಲಿಡ ಒಂಜಿ ಮೊಟ್ಟು ಜಾಗೆ ಕೇನ್ವಲ್ ಗೆ. ಅಪಗ ಅಣ್ಣಪ್ಪ ಪಂಜುರ್ಲಿ ಯಾನ್ ಮೂಲು ಈತ್ ಮಲ್ಲ ಅರಸು ಆದಿಪ್ಪುನಗ ನಿಕ್ಕ್ ಯಾನ್ ಜಾಗೆ ಕೊರಯೆಂದ್ ಪನ್ಪೆಗೆ. ಅಪಗ ಕಲ್ಲುರ್ಟಿ ಈ ತಿರ್ತ್ ಉಲ್ಲ, ನಿನರ್ದ್ ಏಳ್ ಮುಟ್ಟು ಮಿತ್ತ್ ಉಂತುವೆಂದ್ ತಡ್ಯಾಲ್ ದ ಇಲ್ಲದಲ್ಪದ ಎತ್ತರದ ಜೇರೊಡು ನಿಲೆಯಾಪಲ್. ಆ ಗುಡ್ಡೆದ ಕೊಡಿಟ್ ಕಲ್ಲುರ್ಟಿಗ್ ಇನಿಲಾ ನೇಮ ನಡಪುಂಡು. ಇನಿಲಾ ಆ ಜೇರೊಡು ಕಲ್ಲುರ್ಟಿ ನೇಮೊಡು ಸಾನೊಗು ಮೂಜಿ ಸುತ್ತು ಬನ್ನಗ ಮಂಗ್ಲಿಮಾರ್ ಸಾನದಲ್ಪ ತಿರ್ತ್ ಸೂಟೆ/ಜೀಟಿಗೆ ದೀಪದ ಬೊಲ್ಪು ತೋಜುಂಡುಂದು ಹಿರಿಯಾಕ್ಲು ಪನ್ಪೆರ್. ಅಪಗ ತುಳುನಾಡುಡ್ ಇನಿಲಾ ಸತ್ಯ ಮಹಾತ್ಮೆದ ಕಲೆ ಮಯಕಾತಿಜಿ ಪನ್ಪುನವು ಸ್ಪಷ್ಟ. ದುಂಬುದಕ್ಲು ಕಟ್ಟ್ ಕಟ್ಲೆ ತಪ್ಪಂದಿಲೆಕ, ಆಡಂಭರ ದಾಂತೆ, ಶಿಸ್ತುಬದ್ದವಾದ್ ನೇಮ ನೆರಿ ನಡಪಾವೊಂದಿತ್ತೆರ್. ದೈವೊನು ಓಲು ಶಿಸ್ತುಬದ್ದವಾದ್ ನಂಬ್ಯೆರ, ಮನ ಬಗ್ ತಿಡ್ ನಂಬ್ಯೆರ ಅಕ್ಲೆಗ್ ಇನಿಕ್ಲಾ ದೈವೊಲು ಎಡ್ಡೆ ಮಲ್ತೊಂದುಲ್ಲ. ಅವೆಡ್ದಾದ್ ಕುಟುಮೊಗು, ಪರಿಸರೊಗು ಎಡ್ಡೆ ಆಪುಂಡು. ದುಂಬು ದೈವದ ಭಂಡಾರ ಮೂಜಂಜ ಪಂಡ ಪೊರ್ತು ಕಂತೆರಾನಗ,ಕತ್ತಲೆ ಬೂರ್ನಗ ಜಪುಡಾವೊತೆರ್ ಗೆ. ರಾತ್ರೆ ನೇಮ ಮಲ್ತುಂಡನೇ ದೈವದ ನೇಮೊಗು ಸಗ್ತಿ ಪಂದ್ ಎರಿಯಾಕ್ಲು ಪನ್ಪೆರ್. "ಸಾಲ್ ಪತ್ತ್ ನಲ್ಪ  ಸಾರಮಾನ್ಯ ಬೂತೊಲು, ನೂಲು ಪತ್ತ್ ನಲಿಪ್ವ ನೂತ್ರೊಂಜಿ ಗಂಡ ಗಣೊಕ್ಲು" ಪಂದ್  ಪನ್ಪೆರ್. ಉಂದೆನ್ ಪೂರ ಪಗೆಲ್ ಡ್ ತೂವೆರೆ ಸಾಧ್ಯನೇ ಇಜ್ಜಿ. ಬೂತ, ದೈವೊಲೆ ವಲಸಾರಿ ಇರ್ಲ್ ಡೇ ನಡಪುನಿ. ಅಂಚಾಂದ್ ದುಂಬುದಕ್ಲು ಧರ್ಮದ, ಅನ್ನದಾನದ ಒರುವಾಯಿನ ಧರ್ಮನೇಮೊನು ಪಗೆಲ್ಡ್ ಮಲ್ತೊಂತೆರ್. ಧರ್ಮನೇಮ ಆದ್ ಜನೊಕ್ಲೆಗ್ ಸಮರ್ದನೆದೊರುಟು ನುಪ್ಪು ಧರ್ಮ/ಅನ್ನದಾನ ಮಲ್ಪೊಲಿಂದ್ ಅಂಚ ಮಲ್ತೊಂತೆರ್. ಕೆಲವೊಂಜಿ ದೈವೊಲೆಗ್, ದೇವೆರೆ ಮದ್ದೆನ ಪೂಜೆ ಆನಗ ಬಿರಿಯೊಡು, ಕೆಲವೆಕ್ ಬೊಲ್ಪು ಮೂಡುನ ದುಂಬು ಪೇರ್ ಗೆತೊನೊಡು, ಕೆಲವು ಇರ್ಲ್ ನೇಮ ಮಲ್ಪೆರೆ ಬಲ್ಲಿ, ಬೂತೊಲು ಅಪಗ ದೇವೆರೆನ್ ಕಾಪುವೆರುಂದ್ ಪನ್ಪೆರ್. ಆಂಡ ಉಂದು ಸರಿಂದಾಪುಜಿ. ದಾಯೆ ಪಂಡ ದೇವೆರೆ ಪೂಜೆ ಆನಗ ದೈವೊಲುಪ್ಪೆರೆ ಬಲ್ಲಿಂದ್ ಹಿರಿಯಾಕ್ಲು ಪಂತೆರ್. ತುಳುನಾಡುಗ್ ದೇವೆರೆ ಆರಾಧನೆ ಬರ್ಪುನ ದುಂಬೇ ದೈವೊಲು ಇತ್ತ್ ನೆರ್ದಾತ್ರ ಈ ಮಣ್ಣ್ ದ ಸಗ್ತಿಲು ಏರ್ನ ಚಾಕಿರಿದಕ್ಲು ಅತ್ತ್. ನರಮಾನಿ ಚಾಕಿರಿದಕ್ಲು ಉಪ್ಪೆರ್, ಆಂಡ ದೈವೊಲು ಈ ತುಳು ಮಣ್ಣ್ ದ ಸ್ವತಂತ್ರ ಸಗ್ತಿಲು ಪನ್ಪುನೆನ್ ನಮ ಮದಪೆರೆ ಬಲ್ಲಿ.

ಕುಡುಮದ (ಬೂಡುದ) ಪಂಜುರ್ಲಿ(ಉಂದುವೇ ಮೂಲ ಒರುತ ಕುಪ್ಪೆ ಪಂಜುರ್ಲಿಂದ್,ಉರುಂದಾರ(ವರ್ಣಾರ) ಪಂಜುರ್ಲಿಂದ್ ಲ ಪನ್ಪೆರ್) ದುಂಬುಡೇ ಇತ್ತ್ ನ ಸತ್ಯ.ಅಣ್ಣಪ್ಪೆ ಬೊಕ್ಕ ಅಡೆ ಬೈದ್ ನಿ ಅಣ್ಣಪ್ಪ ಸ್ವಾಮಿನ್ ಪವಾಡ ಪುರುಷೆಂದ್ ಲ ಪನ್ಪೆರ್. ಪಂಜುರ್ಲಿನ ಕಟ್ಟೈತೊಗ್ಲ, ಅಣ್ಣಪ್ಪ ಸ್ವಾಮಿನ ಕಟ್ಟೈತೊಗ್ಲ ಎತ್ತೇಸೊ ಉಂಡು. ತಲೊಟು ಪರವೆರ್ ಅಣ್ಣಪ್ಪ ಸ್ವಾಮಿಗ್, ಪಂಜುರ್ಲಿಗ್ ಕಟ್ಟ್ವೆರ್. ಅಣ್ಣಪ್ಪ ಸ್ವಾಮಿಗ್ ಪಂಜುರ್ಲಿಲೆಕ ಸೊಂಟೊಗು ತಿರಿಕಟ್ಟುನ ಕಿರಮ ಇಜ್ಜಿ. ಪಂಜುರ್ಲಿನ ಕೈಟ್ ಕೊರ್ಲೆಕ್ಕ ಕಡ್ಸಲೆ ಆವಡ್, ಸೂಟೆ ಆವಡ್ ಅಣ್ಣಪ್ಪ ಸ್ವಾಮಿಗ್ ಕೊರ್ಪುಜೆರ್. ಅಣ್ಣಪ್ಪ ಸ್ವಾಮಿಗ್ ಪಂಜುರ್ಲಿಲೆಕ್ಕ ಪಂಜಿದ ಮುಗ ಇಜ್ಜಿ. ಅಣ್ಣಪ್ಪ ಸ್ವಾಮಿನ ಕೈಟ್ ಸುರಿಯ ಇಪ್ಪುನಿ. ಈತ್ ಪೂರ ಎತ್ತೇಸೊ ಉಪ್ಪುನ ಅಣ್ಣಪ್ಪ ಸ್ವಾಮಿನ್ ಪಂಜುರ್ಲಿನೊಟ್ಟುಗು ಎಂಚ ಸೇರಾದ್ ಅಣ್ಣಪ್ಪ ಪಂಜುರ್ಲಿ ಮಲ್ತೆರುಂದ್ ತೆರಿಯೊಂದಿಜ್ಜಿ. ಅಣ್ಣಪ್ಪ ಸ್ವಾಮಿ ನಡಾವಳಿದ ದೈವ, ತಲೊತ ಬೆಟ್ಟದ ಮಿತ್ತ್ ನೇಮ  ನಡಪುಂಡು. ಅವ್ಲ್ ಅಣ್ಣಪ್ಪನ,ಧರ್ಮದೇವತೆಲ್ನ ಬಂಟೆ ಪಂಜುರ್ಲಿ. ಅಣ್ಣಪ್ಪ ಸ್ವಾಮಿಗಾದ್ ಒಂತೆಪೊರ್ತುಡು ಅವ್ವೆ ಐತೊಡು ಪ್ರಾಣಿ ಸಮ್ಮಂದಿ ದೈವ ಪೊಟ್ಟಗಾಪುಂಡು. ಅಂಡ  ಆಯೆ ನುಡಿ ಕೊರ್ರೆ ಇಜ್ಜಿ. ಅವೆರ್ದ್ ಬೊಕ್ಕ ಅವ್ವೇ ಐತೊಡು ಪಂಜಿದ ಮುಗ ದೀದ್ ಪಂಜುರ್ಲಿನ ನೇಮ ನಡಪುಂಡು. ಅಣ್ಣಪ್ಪ ಪಂಜುರ್ಲಿನ ಸಂದಿಡ್ ತಲೊಟು ಸ್ವಾಮಿ, ಸ್ವಾಮಿನ ಬಲಕೈ ಬಂಟೆಂದ್ ಬರ್ಪುಂಡು. ಕುಮಾರನ ಒರುಬನ್ನಗ ಶಿವೆ, ಕಾಳಭೈರವೆ, ಕುಮಾರಸ್ವಾಮಿ, ಕುಮಾರೆ, ಸಿರಿನ ಆರಾಧನೆದ ಕುಮಾರೆ ಅಂಚನೆ ತುಳುನಾಡ ಮೂಲದೇವೆರ್ ಬೆರ್ಮೆರೆಗ್ ಬೊಕ್ಕ ಈ ಶಕ್ತಿಲೆಗ್ ಸಮ್ಮಂದ ಉಂಡು. ಕುಮಾರ ಪರ್ವತ, ಕುಮಾರಧಾರೆ,ಸಿರಿ ಆರಾಧನೆದ ಒಂಜಿ ಬೀಲೊಡು 7 ಜಡೆತ ಬೆರ್ಮೆರ್ ಏರಾವುನ್ ಗದ್ದಿಗೆ ತೂನಗ ಬೆರ್ಮೆರೆ ಪಿರಾಕ್ ತೆರಿಯುಂಡು. ಮರ್ಲ್ ಜುಮಾದಿ(ಒರಿ ಜೋಗಿ ಮಯಕಾದ್ ಮರ್ಲ್ ಜುಮಾದಿಯಾಪುನಿಂಸ್ ಲ ಪನ್ಪೆರ್), ಮರ್ಲ್ ಮೈಸಂದಾಯೆ, ಮರ್ಲ್ ಪಂಜುರ್ಲಿ, ಮರ್ಲ್ ಲೆಕ್ಕೆಸಿರಿ/ರಕ್ತೇಶ್ವರಿ ತುಳುನಾಡ್ ಡ್ ಇತ್ತ್ ದ್ ಪಂಬದೆರ್ ಮರ್ಲ್ ಜುಮಾದಿಗ್ ಕಪ್ಪು ಬಣ್ಣ ಬೊಲ್ದು ಗೆರೆ ಚುಕ್ಕಿ, ಕೆಂಪು ಚುಕ್ಕಿ ಪಾಡ್ವೆರ್. ಕುಂಜತ್ತೂರು ಮಾಡೊಡು ಮರ್ಲ್ ಜುಮಾದಿಗ್ ನಲಿಕೆದಕ್ಲು ಕಟ್ಟ್ ದ್ ಅಕುಲು ಮೋನೆಗ್ ಕಪ್ಪು ಬಣ್ಣ ಪಾಡುಜೆರ್. ಪಂಜಿದ ಮಿತ್ತ್ ಕುಲ್ದಿನ, ಪಂಜಿದ ಮೋನೆದ ಕಾಂತೇರಿ ಜುಮಾದಿ ತೋರತ್ತ್ ಲ್ಡ್ ತೂವರೆ ತಿಕ್ಕುಂಡು. ದೇವು ಪೂಂಜನ ರುಂಡೋಗ್ಲಾ ಉಂದೆಕ್ಲಾ ಸಮ್ಮಂದ ಉಂಡು. ಸಿರಿಕುಲ್ನ ಆರಾಧನೆಡ್ಲ ಬೆಮ್ಮೆರ್ ಪ್ರಧಾನ. ಮರ್ಲ್ ಪಂಜುರ್ಲಿ ಪಂಡ ವರ್ಣಾರ ಮರ್ಲನ್ ಪನ್ಪುನಿ. ಮರ್ಲ್ ಪಮಜುರ್ಲಿ ಪಂಡ ವರ್ಣಾರ ಪಂಜುರ್ಲಿಂದ್ ಅರ್ಥ. ಕೆಲವು ತಿಕ್ ಡ್ ಪಂಜುರ್ಲಿಗ್ ಅಣಿಕ್ ತಾರೆದ ತಿರಿಯಾಂಡ ಕೆಲವು ತಿಕ್ ಡ್ ಕಂಗ್ ದ ಪಾಳೆದ ತಿರಿ ಮಲ್ಪುವೆರ್.ಲಂಕೆ ಲೋಕನಾಡ್ ನಡ್ವಾಲ್ ಅರಂತಡೆದ ಪಟ್ಟದ ದೈವ ಸೇಮೆಗಲ್ಲ ಪಂಜುರ್ಲಿ.ಸಿರಿನ ಮಗೆ ಕೋಟಿ ಪೂಂಜೆ /ಕುಮಾರೆ ಸೇಮೆಗಲ್ಲ ಪಂಜುರ್ಲಿನ ಬೇಟಿಯಾಪುನ ಕಿರಮ ಬಾರೀ ಪೊರ್ಲು. ಬಿರ್ಮೆರ್ ಬೊಕ್ಕ ಲೆಕ್ಕೆಸಿರಿ ಪ್ರದಾನ ಆಲಡೆದ ಸಗ್ತಿಲು. ಪಂಜುರ್ಲಿಗ್ ಓಲ್ಲಾ ಮೂರ್ತಿ ಇಜ್ಜಂದೆ ಮುಗನೆ ಉಪ್ಪುನಿ

ನಲಿಕೆ ಜನಾಂಗದಕ್ಲು ಮಲೆ ಜತ್ತ್ ದ್ ಬತ್ತಿನ ಮಲಾರ ಆಯಕಟ್ಟ್ ಗ್ ಬತ್ತಿನ ಮಲರಾಯನ್ ಮಲಾರ ಪಂಜುರ್ಲಿಂದ್ ಪಂಡೆರ್. ವರ್ಣಾರ ಪಂಜುರ್ಲಿನ್ ಮಂಜಾನ ದೇಬೆರೆ(ಮಂಜುನಾಥ ) ಬಂಟೆಂದ್ ಸಂದಿ ಪನ್ಪುಂಡು. ಮಂಜೇಸರ, ಬದಿಯಡ್ಕ,ಕಾಸ್ರೋಡು, ಪೆರ್ಲಂಪಾಡಿ ಬಾಕುಡೆರ್ನ ಇಲ್ಲಲುಪ್ಪುನ ಕುಪ್ಪೆ ಪಂಜುರ್ಲಿಗ್ ವಾರಾಹಿಂದ್ ಪನ್ಪೆರ್. ಗಿರಿಮುತ್ತು ಸ್ವಾಮಿನ ಗದ್ದಿಗೆದ ಬಂಟೆಂದ್ ಕುಪ್ಪೆ ಪಂಜುರ್ಲಿನ್ ಪನ್ಪೆರ್. ಕುಪ್ಪೆ ಪಂಜುರ್ಲಿನ ಮೂಲ ತಿರುಪತಿಗೆ.  ಭೂವರಾಹನ್ ಜಾಗೆದ ಪಂಜುರ್ಲಿಯಾದ್ ಅಕುಲು ತಿರುಪತಿ ಎಂಕಟ ರಮಣ ದೇವೆರೆನ್ ಗುರ್ಜಿಡ್ ನಂಬುದು ಅಲ್ತ ಜಾಗೆದ ದೈವ ಪಂಜುರ್ಲಿಗ್ ನೇಮ ಕೊರ್ಪೆರ್. ಗುರ್ಜಿ ನೇಮಂದ್ ಉಂದೆಕ್ ಪನ್ಪೆರ್. ಪಂಜುರ್ಲಿಗ್ ಗುರ್ಜಿ ನೇಮ ಪಂಡ ರಾಜಂದೈವೊಲ್ನ ಧರ್ಮನೇಮದಾತೆ ಪವಿತ್ರ. ತಿರ್ಪತಿಗ್ ಪೋದು ಪರಕೆ ಸಂದಾಯೆರೆ ತೀರಂದಿನಕ್ಲು ಗುರ್ಜಿ ನೇಮದ ಪರಕೆ ಕೊರ್ಪೆರ್. ದೈವಾರಾಧನೆ ಜಗತ್ತಿಡೀ ಪದ್ ರ್ದ್  ಉಂಡು. ನಮ ಗುವೆಲ್ದ ಕಪ್ಪೆ ಆವಂದೆ ಏಳ್ ಕಡಲ್ ದಂಚಿದ ದೈವದ ಕಾರ್ಣಿಕ ತೆರಿಯೊನೊಡು. ನಮಕೆ ಮೂಲ ದೈವೊದ ಲೆಕ್ಕ ತಿಕ್ಕಿಜಿಂಡ ಗಟ್ಟ ಜತ್ತ್ ದ್ ಬತ್ತಿನಿಂದ್ ಸಾಮಾನ್ಯ ಉತ್ತರ ಕೊರ್ಪ. ದೈವನಂಬಿನ ಕಾಲೊಡು ಎರಿಯಾಕ್ಲ್ ವಾ ಪುದರ್ ಡ್ ನಂಬಿಯೆರ ಆಪುದರ್ ಡೇ ಮದಿತುಂಡ ದೈವೊಲು ಲೆಪ್ಪುಗು ಬರು. ಒಟ್ಟಾರೆ ನಮ ಲೆತ್ತುಂಡ ದೈವ ಬರಂದ್. ಬಂಗಾಡಿ ಅರಂತಡೆಡ್ ಬೆರ್ಮೆರ್(ಉಲ್ಲಾಯೆ),ಉಲ್ಲಾಲ್ದಿ ಪ್ರಧಾನ ಆದಿತ್ತ್ಂ ಡ್. ಮೂಜಿಲ್ನಾಯ(ಲೆಕ್ಕೆಸಿರಿ), ಭೈರವೆ, ಪಿಲ್ಚಂಡಿ, ಪೊಟ್ಟ ಪಂಜುರ್ಲಿನ ಆರಾಧನೆ ಇತ್ತ್ಂಡ್. ತಲೊಟ್ಲಾ ಅವ್ವೆ ದೈವೊಲ್ನ ಆರಾಧನೆ ಉಂಡು. ಕುಡುಮ ಬೂಡು/ಇಲ್ಲ್ ಗ್ ಅರಸು ಪಟ್ಟ ಬಂಗಾಡಿ ಯಾದಿತ್ತ್ಂಡ್.ಅವ್ಲು ಅರಸುಲಿಜ್ಜಂದೆ ಕಾವಂದೆರ್ ನಡಪಾವೊಂದುಲ್ಲೆರ್. ನಲಿಕೆದ ಕುಟುಮದ ಕುಲದೈವ ಗುರು ಉಲ್ಲಾಲ್ದಿ ಯಾಂಡ ಮೈಯೊಲಿಗೆದ ದೈವ ಪಂಜುರ್ಲಿ ಪಂದ್ ಪನ್ಪೆರ್. ಪಂಜುರ್ಲಿನ ಬೊಕ್ಕ ಮಲರಾಯನ ಎತ್ತೇಸೊ ತೂಪುಂಡ ಮಲರಾಯಗ್ ನರಮಾನ್ಯನ ಕೆಬಿಲ, ಪಂಜುರ್ಲಿನ ಕೆಬಿತ ಒರು ಬೇತೆಯಾದಿಪ್ಪುಂಡು. ಬೆರ್ಮೆರೆಗ್ ರಡ್ಡ್ ರೂಪ ಉಂಡು. ಒರಿಬೆರ್ಮೆರ್, ಇರ್ವೆರ್ ಉಲ್ಲಾಕ್ಲು, ಒರ್ತ್ಯಪ್ಪೆ ಉಲ್ಲಾಲ್ದಿ ಪನ್ನಗ ಈ ಇಚಾರ ತೆರಿಯುಂಡು. ಇರಡ್ಡ್ ರೂಪ ಅಣ್ಣೆ-ಮೆಗ್ಯೆ,ಕಾಳರಾಹು- ಕುಮಾರಸ್ವಾಮಿ, ಪೂಮಾಣಿ-ಕಿನ್ನಿಮಾಣಿ, ನೇಲ್ಯರಾಯೆ-ಎಲ್ಯರಾಯೆ, ಕೇರಳೊಡು ಮುತ್ತಪ್ಪನ್-ತಿರುವಪ್ಪನ್, ಸೂಕ್ಷ್ಮ ರೂಪೊಡು ತೂಯೆರೆ ಪೊಂಡ ಬೆರ್ಮೆರ್. ಉಲ್ಲಾಲ್ದಿ ಪಂಡ ಅವೆರ್ದ್ ಮಲ್ಲ ಮಾನದಿಗೆ ತುಳುನಾಡ್ ಡ್ ಬೇತೆ ಇಜ್ಜಾಂಡ್. ಉಳ್ಳಾಯನ್ ಕಾವದೆಂದ್ ಲೆತ್ತ್ಂಡ ಲೆಕ್ಕೆಸಿರಿನ್ ಉಲ್ಲಾಲ್ದಿ ಪಂದ್ ಪನ್ಪೆರ್. ತಲೊಕು ಬನ್ನಗ ಬಿರ್ಮೆರ್ ಕುಮಾರಸ್ವಾಮಿಯಾಂಡ ಕುಕ್ಕೆಡ್ ಬೆರ್ಮೆರ್-ಕುಮಾರೆ-ಸುಬ್ರಮಣ್ಯಂದ್ ಪುಗಾರ್ತೆಪಡೆಪೆರ್. ಮೂಲು ಉಲ್ಲಾಲ್ದಿನ್ ಕನ್ಯಾಕುಮಾರಿಂದ್ ಪನ್ಪೆರ್. ಕಾಳರಾಹು ಪಂಡ ಕಪ್ಪು ಬಣ್ಣದ ಸರ್ಪದ ಮೋನೆ. ಕಾಳಿಂಗಂದ್ ಪನ್ಪ. ಕಾಳಿಂಗೆ ಬೊಕ್ಕ ನಾಗೆ ಪಂಡ ಕರಿಯ ಸಂಕಪಾಲೆ ಬೊಕ್ಕ ಬೊಳಿಯ ಸಂಕಪಾಲೆ. ನಾಗೆ ಬೊಲ್ದು, ಪೊರ್ಲಾಂಡ ಕಾಳಿಂಗೆ ಕಪ್ಪು ರೂಪದಾಯೆ. ಸಿರಿಕುಲ್ನ ಆರಾಧನೆಡ್ಲಾ ಬೆರ್ಮೆರೆ ಮೂಲ ತೆರಿದ್ ಬರ್ಪುಂಡು. ಸುಮಾರ್ ಕ್ರಿ.ಶ. 1400-1500 ತ ಪೊರ್ತುದ ಅವ್ವೆತೋ ಜನೊಕುಲು  ಕರಿದ್ ಪೋದು ದೈವ ಬೂತೊಲಾಯಿನ ಇಚಾರ ನಮಕ್ ತೆರಿಯುಂಡು.ಸುಮಾರ್ 600-700 ವರ್ಸ ದುಂಬುದ ಒಂಜಾತ್ ಕಾಲಮಾನೊಡು ನರಮಾನಿಲು ದೈವ ಬೂತೊಲ್ ಆಂಡ ಅವೆರ್ದ್ ದುಂಬಾವಡ್, ಅವೆರ್ದ್ ಬೊಕ್ಕ ಆವಡ್ ಏರ್ಲಾ ದೈವ/ಬೂತ ಆಯಿನ ಇಚಾರ ತೋಜುಜಿ. ಕಲ್ಕುಡ ಕಲ್ಲುರ್ಟಿ, ಕೋಟಿ ಚೆನ್ನಯ, ಮುದ್ದ-ಕಲಲ, ಕಾನದ-ಕಟದ, ಕಾಂತಾಬಾರೆ -ಬೂದಬಾರೆ ಇಂಚ ಒಂಜಾತ್ ವೀರ ಪುರುಷೆರ್ ಕಾಯ ಬುಡ್ದು ಮಾಯ ಆದ್ ದೈವೊಲಾಂಡ ಅವೆರ್ದ್ ದುಂಬುದಕ್ಲಾವಡ್, ಬೊಕ್ಕದಕ್ಲಾವಡ್ ದಾಯೆ ದೈವೊಲಾಯಿಜೆರುಂದ್ ತೆರಿಯುಜಿ. ಆಂಡ ನಮ ಒಂಜಿ ದೃಷ್ಟಿಡ್ ಅರ್ಥ ಮಲ್ತೊನೊಡಾಂಡ ಮಲ್ಲಕ್ಲೆನ-ಪಾಪದಕ್ಲೆನ ನಡುತ ಸಂಘರ್ಷ/ ಪೊಂರ್ಬಾಟ ಆ ಕಾಲೊಡಾದಿಪ್ಪು ಪನ್ಪುನವು ಸತ್ಯ. ಕೆಲವೆರೆ ಪ್ರಕಾರ ಕರಿದ್ ಪೋಯಿನ ಅಕ್ಲೆನ ತೋಜಂದಿ ಆತ್ಮೊಲೇ ಇನಿ ಕಟಿಮಾನಿನ, ಪತಿಮಾನಿನ ಮೇಲ್ ಡ್ ಬರ್ಪುನಿಂದ್ ಪನ್ಪೆರ್. ಸರಳವಾದ್  ಕುಲೆಂದ್ ಪಂಡ ತಪ್ಪಾವುಂದು ಬೂತ, ಕರಿದ್ ಪೋಯಿನ, ಗುರುಕಾರ್ನವೆರ್ನ ಮಾನಾದಿಗೆ ಕೊರ್ದು ಆರಾಧನೆ ಮಲ್ತೊಂದು ಬತ್ತೆರ್.  ಇಲ್ಲಲ್ ಬೂತೊಗಿನಿ, ಬೂತೊಗು ಬಲಸೆರುಂಡುಂದು ನಮ ಪನ್ಪ. ಅಪ್ಪೆ ಬಂಜಿಡ್ ಪುಟುದು ಕಲೆಕಾರ್ನಿಕೊನು ಮೆರೆದ್ ಕರಿದ್ ಪೋಯಿನೆರ್ದ್ ಬೊಕ್ಕ ಕಲೆ ಕಾರ್ನಿಕ ತೊಜಪಾಯಿನಕುಲು ಬೂತೊಲಾಂಡ, ಪುಟ್ಟು ಸಾವಿಜ್ಜಂದಿನಕ್ಲೆನ್ ದೈವೊಲುಂದು ಆರಾಧನೆ ಮಲ್ತೆರ್. ಲೆಕ್ಕೆಸಿರಿನ್ ಸಾರ ರೂಪೊಡು ಆರಾಧನೆ ಮಲ್ಪುವೆರ್. ಕನಪಾಡಿದಾಯೆ, ಮಗ್ರಂದಾಯೆ, ಮಲರಾಯೆ, ನಾಲ್ಕೈದಾಯೆ ಇಂಚ ಬೇತೆ ಬೇತೆ ಒರುಟು ಲೆಕ್ಕೆಸಿರಿನ್ ಆರಾಧನೆ ಮಲ್ಪುವೆರ್. ಆತೇ ಅತ್ತ್ ಒಂಜಿ ಕಾಲೊಡು ದೈವಲಾ ಅಂದ್, ದೇವೆರ್ಲಾ ಅಂದುಂದ್ ಪನ್ಪಾವೊಂದು ಬತ್ತಿನ ದೈವೊಲೆನ್ ನೂಲು ಪಾಡಿ ಸಂಸಾರ ಬತ್ತಿ ಬೊಕ್ಕ ದೈವ ದೇವೆರೆನ್ ಬೇತೆ ಬೇತೆಯಾದ್ ಮಲ್ತೆರ್.ಬೂತಂದ್ ಲೆಪ್ಪುಲೆ,ದೈವಂದ್ ಲೆಪ್ಪುಲೆ ರಡ್ಡ್ ಲ ಒಂಜೆ. ಬೆರ್ಮೆರ್ ಬೊಕ್ಕ ಉಲ್ಲಾಲ್ದಿ ದೈವಾರಾಧನೆಡ್ ಪ್ರಧಾನ ಆದಿತ್ತುಂಡಲಾ ಅಕ್ಲೆನ ಬಗೆಟ್ ಸರಿಯಾಯಿನ ಅಧ್ಯಯನ ನಡತುದಿಜಿ. ಬಿರ್ಮೆರ್ ತುಳುನಾಡುದ ಆದಿ ದೈವ. ಬಿರ್ಮೆರೆ ಆದಿ ಜಾಗೆ ಕಾಶಿಂದ್ ಪನ್ಪೆರ್. ಕಾಶಿ ಕಾಳಬೈರವೆ, ಶಿವೆ ಮೊಕ್ಲೆನ್ ಬೆರ್ಮೆರುಂದೇ ಪನ್ಪೆರ್. ಕಂಚಿ ದೇಶೊಡು ಪುಟ್ನ ಕುಮಾರಂದ್ ಲ ಬೆರ್ಮೆರೆನ್ ನೆನೆತೊನ್ವೆರ್. ಬೂಮಿಗ್ ಬೂಮಿ ದೇವತೆ ಲೆಕ್ಕೆಸಿರಿ. ಇಡೀ ಬೂಮಿಯೇ ಎನ್ನ, ಇಡೀ  ಸಂಸಾರ(ಜಗತ್ತ್)ನೇ ಎನ್ನಂದ್ ದೈವ ಪನ್ಪುಂಡು. ಬೂಮಿ ದೇವತೆ ಪಂಡ ತುಳುನಾಡ್ ಮಾತ್ರ ಅತ್ತ್. ಜಗತ್ತುದ ಬೇತೆ ಬೇತೆ ದೇಶೊಲೆಡ್ ದೈವಾರಾಧನೆ ನಡಪುಂಡು. ದೈವದ ಕಲೊಟು ಅಂಜನ ಪಾಡುನಿ ಪಂಡ ತಾಂತ್ರಿಕ ಆರಾಧನೆ. ಬಲಿ ಮುದ್ರೆ, ಕುರಿ ನೀರ್ ಪಾಡುನಿ ಅವು ವೈದಿಕ ಅತ್ತ್. ಶುದ್ಧ ತಾಂತ್ರಿಕ. ಅವು ಮಂತ್ರ  ಇಜ್ಜಂದಿ ಶುದ್ಧ ತಾಂತ್ರಿಕ. ಮಂತ್ರ ಒವೆಟಿಜ್ಜಾ ಅವು ಆಪುನಿ ತಂತ್ರೊಡು, ಮುದ್ರೆಡ್, ಕೈ ಬಾಸೆಡ್, ಕೈ ಸನ್ನೆಡ್, ಅವು ತಾಂತ್ರಿಕ ಆರಾಧನೆ. ಓಲೇ ಉಪ್ಪಡ್ ದೈವಾರಾಧನೆ ಪನ್ಪುನವು ಶುದ್ಧ ತಾಂತ್ರಿಕ ಆರಾಧನೆ. ದೈವ ಬೂತೊಲೆಗ್ ಮಂತ್ರ ಇಜ್ಜಿ. ಸಂಧಿ ಪಾಡ್ದನ ಬೊಕ್ಕ ತಂತ್ರದ ಬಲ. ತಾಂತ್ರಿಕ ಸಿದ್ಧಿದ ದೈವೊಲೆಗ್ ಮಂತ್ರ ಸಿದ್ಧಿದ ವಿಧಿ ವಿಧಾನದ ಬ್ರಹ್ಮಕಲಶ, ದೈವ ಪ್ರತಿಷ್ಠೆ ಮಾತ ಮಲ್ಪುನವು ತಪ್ಪು. ದೈವಾರಾಧನೆಡ್ ನಮ್ಮವು ಸರಿ ಅಕ್ಲೆನವು ತಪ್ಪುಂದು ನಮ ವಾದ ಮಲ್ಪರೆ ಬಲ್ಲಿ. ದಾಯೆ ಪಂಡ ದೈವಾರಾಧನೆಡ್ ಊರುಗೊಂಜಿ ಕಟ್ಟುಂದ್ ಬೇತೆನೇ ಉಪ್ಪುಂಡು. ಉಲ್ಲಾಲ್ದಿ ಲೆಕ್ಕೆಸಿರಿನ್ ಮೂಜಿಲ್ನಾಯೆ, ಪಡ್ಡೊಟ್ಟುನಾರ್, ರಾಜಪತಿ  ರಾವುದ್ರ, ಕಾರಂದಾಯೆ, ಕುಡುಮುಲ್ದಾಯೆ, ಬನ್ನಡ್ಕದಾಯೆ, ಹಳ್ಳತ್ತಾಯೆ ಇಂಚ ಬೇತೆ ಬೇತೆ ಪುದರ್ಡ್ಲಾ ಆರಾಧನೆ ಮಲ್ಪುವೆರ್.   

ಕುಪ್ಪೆ ಪಂಜುರ್ಲಿ ಪೂಜಾರಿ ಜನಾಂಗದ ಧರ್ಮದೈವ ಆದಿತ್ತ್ ದ್ ಕುಪ್ಪೆಟ್ಟು ಪಂಜುರ್ಲಿ(ಒಟ್ಟುಗು ಹಿರಿಯಾಯನ್), ಉರುಂದಾರ ಪಂಜುರ್ಲಿನ(ವರ್ಣಾರ) ಆರಾಧನೆನ್ಲಾ ಮೊಕ್ಲು ಮಲ್ಪುವೆರ್. ಪ್ರಾಣಿ ಸಮ್ಮಂದಿ ಪಂಜುರ್ಲಿ ದೈವದ ಪಂಜಿದ ಮುಗ ಜುಮಾದಿಗ್ ಇತ್ತಿಸಾತ್ ಗ್ ಅವು ಪಂಜುರ್ಲಿಯಾಪುಜಿ. ನೂರ್ದಾಳ, ಸಾರಾಳ ಪಟ್ಟದ ಪುರಪುದ ಸೈನಿಕ ದೈವ ಜುಮಾದಿ. ಕಾಂತೇರಿ ಜುಮಾದಿನ ಪಟ್ಟದ ಮುಗ ಪಂಜಿದ. ಕಟ್ಟ್ ನಗ ನರಮಾನಿ ಮುಗ ಉಂಡು. ದೇವು ಪೂಂಜನ ಒರುಂದು ಅವೆನ್ ಪನ್ಪೆರ್. ಪಂಜಿದ ಮುಗ ಇತ್ತಿಸಾತ್ ಗ್ ಮಲರಾಯ ಪಂಜುರ್ಲಿಯಾಪುಜೆ. ಪಂಜುರ್ಲಿನ ಪುಟ್ಟು ಪುರಪು, ಮಲರಾಯನ ಪುಟ್ಟು ಪುರಪು ಸರ್ವೇ ಸಾಮಾನ್ಯ ಒಂಜೇ ಲೆಕ್ಕ ಇಪ್ಪುಂಡು. ಬೂಮಿ ಉಂಡಾನಗದ ಇಚಾರೊಲು ರಡ್ಡೆಟ್ಲಾ ಸರ್ವೇ ಸಾಮಾನ್ಯವಾದ್ ಒಂಜೇ ರೀತಿ ಉಪ್ಪುಂಡು. ಬೆನ್ನಿ ಸಾಗೊಳಿಗ್ ಉಪದ್ರ ಕೊರೊಂತ್ ನ ಪಂಜಿಲೆನ್ ಬೋಂಟೆ ದೇರ್ಯೆರ್. ಕಷ್ಟ ಆನಗ ರಾಜಿ ಮಲ್ತೊಂದು ನಂಬೆರೆ ಸುರು ಮಲ್ತೆರ್. ರಾಜೆರ್ ಆರಾಧನೆ ಮಲ್ತೊಂದು ಬತ್ತಿನ ದೈವೊಲು ರಾಜಂದೈವೊಲಾಯ. ಜನ ಸಾಮಾನ್ಯೆರ್ ಪಂಜುರ್ಲಿನ್ ಜಾಗೆದ, ಕುಟುಮದ ಪಂಜುರ್ಲಿಯಾದ್ ಆರಾಧನೆ ಮಲ್ತೊಂದು ಬತ್ತುದ್ ಒಂಜಾತ್ ವರ್ಸದ ಪಿರವುಡ್ದಿಂಚಿ ಪಂಜುರ್ಲಿನೊಟ್ಟುಗು ಕಲ್ಲುರ್ಟಿ ಸೇರೊಂಡು. ಇನಿ ಅಣ್ಣಪ್ಪ ಸ್ವಾಮಿನ್ ಅಣ್ಣಪ್ಪ ಪಂಜುರ್ಲಿ ಮಲ್ತುದ್ ಅವೆತೊಟ್ಟುಗ್ ಕಲ್ಲುರ್ಟಿನ ಆರಾಧನೆಲಾ ಮಲ್ಪುವೆರ್. ಪಂಜುರ್ಲಿ, ಕೊಡಮಂದಾಯೆ, ಪಿಲ್ಚಂಡಿ, ಮೈಸಂದಾಯೆ, ಪಿಲಿಬೂತ, ಲೆಕ್ಕೆಸಿರಿ, ಗುಳಿಗೆ ಉಂದು ಪೂರ ಪ್ರಾಣಿ ಸಮ್ಮಂದಿ ದೈವೊಲಾಂಡ ಪಂಜಿದ ಮುಗ ಇತ್ತುಂಡಲ ಮಲರಾಯೆ, ಜುಮಾದಿ ಪ್ರಾಣಿ ಸಮ್ಮಂದಿ ದೈವ ಅತ್ತ್. ಮಲರಾಯಗ್ ಕನ್ನಡದ ದೇವಿನ ವರ್ಣನೆದ ಬಿರ್ದಾಳಿ ಖಂಡಿತಾ ಇಜ್ಜಿ. ಒಂಜಿ ರಡ್ಡ್ ತಲೆಮಾರುದಕುಲು ಕನ್ನಡದ ಈ ಬಿರ್ದಾಳಿನ್ ಉಂಡು ಮಲ್ತೆರ್. ಮೂಲದ ಕಟ್ಟುನಕ್ಲೆಡ ಕೇಂಡ ತುಳುನಾಡ ದೈವೊಗು ಕನ್ನಡದ ಬಿರ್ದಾಳಿ ಇಜ್ಜಿಂದೇ ಪನ್ಪೆರ್. ಆಂಡ ಅರಸು ದೈವೊಲಾಯಿನ ಮೆಗ್ಗಿಪಲೆ, ನೇಲ್ಯರಾಯೆ, ಎಲ್ಯರಾಯೆ ಪೂರ ಗಟ್ಟದ ಅರಸು ಮೂಲದಕ್ಲಾಯಿನೆರ್ದ್ದಾತ್ರ ಕನ್ನಡೊಡ್ಲಾ ನುಡಿ ಕೊರ್ಪೆರ್. ನಲಿಕೆದಕ್ಲು ಮಲಾರ ಪಂಜುರ್ಲಿಂದ್ ಮಲರಾಯನ್ ಪಂಡೆರ್ಡ, "ಮಲಾರ ಜುಮಾದಿ ಆದಿ ಮಲಾರ ಸಿಮ್ಮಾಸನೊಡು ಮಲರಾಯೆ ಪನ್ಪಯೆಂದ್" ಪರವೆರೆ ಜುಮಾದಿನ ಸಂದಿಡುಂಡು.  ಜುಮಾದಿಗ್ ಜಾಗೆ ಜಾಗೆದ ಬೇತೆ ಬೇತೆ ಪುರಪಿಪ್ಪುಂಡು. ಕುಂಬ್ಳೆ ಸೀಮೆದ ಓಲು ಪೋಂಡಲಾ ಜುಮಾದಿಗ್ ಪಂಜಿದ ಮುಗ. ಜುಮಾದಿ, ಮಲರಾಯನ ಮುಗೊಟು ನರಮಾನ್ಯನ ಕೆಬಿ ಇತ್ತುಂಡ ಪಂಜುರ್ಲಿನ ಮುಗೊಟು ಪಂಜಿದ ಕೆಬಿತ ರಚನೆ ಉಂಡು. ಮಲಾರ ಬೂಡುದ ಕೈತಲ್ ಪಂಜುರ್ಲಿನ ಬೇತೆನೇ ಆರಾಧನೆ ಉಂಡು. ಜುಮಾದಿ ಕನಪಾಡಿಗ್ ಪೋದು ಕನಪಾಡಿದಾಯೆ ಆಂಡ ಮಲಾರ್ ಗ್ ಪೋದು ಮಲರಾಯೆ ಆಯೆ. ಪಂಜುರ್ಲಿಗ್ ವಾಹನ ಇಜ್ಜಿ. ಅಂಬಡಾಡಿ/ಅಮ್ಟಾಡಿಡ್ ಪಂಜುರ್ಲಿಗ್ ಬಂಡಿ ಉಂಡು. ಒಂಜಿ ವೇಳೆ ಮಲರಾಯೆ ಮಲಾರ ಪಂಜುರ್ಲಿಯಾತುಂಡ ಪಂಜಿದ ಮೇಲ್ಡ್ ಮಲರಾಯೆ ಕುಲ್ಲೆರಿಜ್ಜಾಂಡ್.  ಆದಿ ಪನ್ಪುನವು ಬೆರ್ಮೆರೆ ಸಾನ. ಪುತ್ತೂರು ಸುಳ್ಯದಂಚಿ ಪರವೆರ್ ಮಲರಾಯಗ್ ಕಟ್ಟ್ ನಗ ಮಲಾರ ಜುಮಾದಿಂದೇ ಲೆಪ್ಪುವೆರ್. ಜುಮಾದಿಗ್ ಜಾಗೆಗೊಂಜಿ ಪುರಪಿಪ್ಪುಂಡು. ಮಲಾರ್ ದ ಸುತ್ತಮುತ್ತ ಎಣ್ಮ ಜಾಗೆಲೆಡ್ ಮಲರಾಯನ ಆರಾಧನೆ ಇತ್ತಿನೆರ್ದಾತ್ರ ಎಣ್ಮೂರು ಪನೆರೆ ಸಾಧ್ಯತೆ ಉಂಡು. ಆಂಡ ಕೆಲವೆರ್ ಎಣ್ಮೂರುದ ಬಲ್ಲಾಲ್ರೆಗ್ಲಾ ಮಲಾರ ಬೂಡುಗುಲಾ ದಾದಾಂಡಲಾ ಸಮ್ಮಂದ ಇಪ್ಪುಂದು ಪನ್ಪೆರ್. ಅಂಚಾದ್ ಪಂಜದ ಎಣ್ಮೂರುಗ್ಲಾ ಮಲಾರ ಎಣ್ಮೂರುಗ್ಲಾ ಸಮ್ಮಂದ ಇತ್ತ್ಂಡಾ,ಇಜ್ಜಾಂಡ ಅದ್ಯಯನ ಆವೊಡು‌. ಇನಿ ಕಟ್ಟುನಕುಲ್ಲಾ ಕೆಲವೊಂಜಿ ನುಡಿಕಟ್ಟುಡ್ ಬದಲಾವಣೆ ಮಲ್ತೊಂದುಲ್ಲೆರ್. ಬಾಕ್ರಬೈಲ್ ಚಾವಡಿಡ್ ಪ್ರಧಾನ ಜುಮಾದಿ ದೈವ ಆದಿತ್ತುದ್ ಜುಮಾದಿ ಆದಿ ಮಲಾರ ಸಾನೊಗು ಪೋನಗ ಮಲರಾಯೆ ಆಂಡುಂದ್ ಅಧ್ಯಯನಕಾರೆರ್ನ ಅಭಿಪ್ರಾಯ. 

ರಾಜಂದೈವೊಲ್ನ, ದೈವೊಲ್ನ ಅರ್ದಾಲೊಡು ಮಂಜಲ್, ಕಪ್ಪು, ಕೆಂಪು ಬಣ್ಣ ಬುಡ್ದು ತಿಕಿನೆನ್ ಪೂರ ಗಳಸೆರೆ ಬಲ್ಲಿ. ಆಂಡ ಇನಿ ಗುಲಾಬಿ, ಆಕಾಶ ನೀಲಿ, ಕುಂಕುಮ ಬಣ್ಣ ಪೂರ ಪೊರ್ಲುಗಾದ್ ಪಾಡೊಂದುಲ್ಲೆರ್. ಇನಿ ಯಾನ್ ತಾನುಂದ್ ಜನ ಅಂಕಾರ ಮಲ್ಪೆರೆ ಪೋದು ನೇಮ ನೆರಿ ಉಂತುಲೆಕಾದ್ ಇಲ್ಲಿಲ್ಲಲ್ ಪರ್ಬ ಪರ್ವ ತಂಬಿಲ ಮಲ್ಪುಲೆಕಾಂಡ್. ದುಂಬು ಕೂಡು ಕುಟುಮ ಇತ್ತುದ್ ಬಾರ್ಯಾತ್ ಜನೊಕ್ಲಿತ್ತುದ್ ನೇಮನೆರಿ ಒಂತೆ ಜನಾಂಡಲಾ ತೂವೊಂತೆರ್. ಇನಿ ಕೂಡು ಕುಟುಮ ಪುಡದ್ ಇಲ್ಲಲ್ ರಡ್ಡ್ ನಾಲ್ ಜನ ಇತ್ತುದ್ ನಿದ್ರೆ ಕಜೆರೆರೆ ತೀರಂದೆ ತಂಬಿಲೊಡು ಸುದಾರ್ತೊಂದುಲ್ಲೆರ್. ಕುಂಬ್ಳೆ ಬದಿಯಡ್ಕಡ್ ಜುಮಾದಿ ಪ್ರಧಾನ ದೈವ ಆದಿತ್ತುದ್ ಇರ್ವೆರ್ ಅರಸುಲೆಗ್ ಒರಿ ಪ್ರಧಾನಿ ಜುಮಾದಿ ಪಂಡ ಜುಮಾದಿ ಸೈನಿಕ ದೈವಂದ್ ಸ್ಪಷ್ಟವಾದ್ ತೆರಿಯುಂಡು. ಪಂಜುರ್ಲಿನ್ ಒರಿ ಬಲ್ಯಾಯೆ ಪರೀಕ್ಷೆ ಮಲ್ಪೆರೆ ತೂಯೆ. ಪಂಜುರ್ಲಿ ಕುಟುಮದ ಆಯ ನ್ಯಾಯ ತೀರ್ಮಾನೊಗು ಕುಲ್ಲುನಗ ಈ ಕುಟುಮೊಡು ಒಂಜಿ ಸಮಸ್ಯೆ ಉಂಡು ಈ ಪಂಡಿಜಂಡ ಯಾನ್ ಪನ್ಪೆಂದ್ ಬಲ್ಯಾಯೆ ಪಂಡೆಗೆ. ಅಂಚನೆ ಪಿಂಗಾರ ಸಾರಿ ತೂದು ತೂಲ ಯಾನ್ 9 ಪಿಂಗಾರ ದೆತ್ತ್ ಕೊರ್ಯೆ, ಈ ದೆತ್ತ್ ಕೊರುಗೆಂದ್ ಸವಾಲ್ ಪಂಡೆ. ಅಡೆ ಮುಟ್ಟ ಮನಿಪಂದೆ ಕುಲ್ಲ್ ನ ಪಂಜುರ್ಲಿ ಕೊಡಿಮರಕ್ ದಾಯೆ ಗರುಡನೇ ಕಟ್ಟೊಡು? ಪಂಡುದ್ ಆಯಡ ಕೇಂಡೆ, ಉತ್ತರ ಇಜ್ಜಿ. ಕುಟುಮ, ಸಭೆ ಸರ್ವೆರ್ಡ ಕೇಂಡ್, ಉತ್ತರ ಇಜ್ಜಿ. ದೇವಾಲ್ಯದ ಕೊಡಿ ಮರಕ್ ಗರುಡನೇ ಕಟ್ಟೊಡು ವಿನಃ ಕಕ್ಕೆನ್ ಕಟ್ಟೆರಾಪುಜಿ. ಗರುಡೆ ಏತ್ ಎತ್ತರೊಡಿತ್ತುಂಡಲ ಸೂಕ್ಷ್ಮವಾದ್ ಅವೆಕ್ ನೆಲತ ಮಿತ್ತವು ತೆರಿಯುಂಡು. ಅಂಚಾದ್ ಈ ಕಲೊಟು ಈ ಕಕ್ಕೆಂದ್ ಪನ್ನಗ ಮನಿಪಂದೆ ಬಲ್ಯಾಯೆ ಕುಲ್ಲೊಡಾಂಡ್. ಯಾನ್ ಗರುಡಲೆಕ ಕಲೊಟು ಪ್ರಧಾನಂದ್ ಪಂಡಿನ ಪಂಜುರ್ಲಿ ಯಾನ್ ನೇಮ ಪಿರಿನೇಟ ಎದುರುದ ತಾರೆದ ಕಟ್ಟೆಡ್ ಕುಲ್ಲು, ಲಕ್ಕೆರೆ ಬಲ್ಲಿಂದ್ ಪಂಡಿಲೆಕನೆ ಕಟ್ಟೆಡೇ ಕುಲ್ಲುನ ಆಯೆ ದೈವ ಪೇರ್ ಪರ್ನೆರ್ದ್ ಬೊಕ್ಕ ದೈವದ ಅನು ಗೆತೊಂದು ಪೋಯೆ. ಈತ್ ಗೇನ ಸಗ್ತಿದ ದೈವ ಪಂಜುರ್ಲಿ. ಉಲ್ಲಾಕ್ಲೆಗ್ ಆದಿಡ್ ನಲಿಕೆದಕ್ಲು ಕಟ್ಟೊಂದಿತ್ತೆರ್. ಅಕುಲು ಕನ್ನಡೊಡು ಬಿರ್ದಾಳಿ ಪನ್ಪೆರ್. ಕನ್ನಡದ ಅರಸುಲು ಉಲ್ಲಾಕ್ಲಾಯಿನೆರ್ದಾತ್ರ ಅಕ್ಲೆಗ್ ಕನ್ನಡದ ಬಿರ್ದಾಳಿ ಉಪ್ಪುಂಡು. ಸುಳ್ಯ ಮಂಡೆಕೋಲುಡು ನಾರಾಳ್, ಪೇರಾಳ್, ಅರ್ಕ್ಯ, ಅಂಬ್ರೋಡಿ ಪನ್ಪಿ 4 ಇಲ್ಲಲ್ ನಲಿಕೆ ಜನನಾಂಗದಕುಲೆ ಉಲ್ಲಾಕ್ಲೆಗ್ ಕಟ್ಟುನಿ. ಮೊಕ್ಲು ಉಲ್ಲಾಕ್ಲೆಗ್ 4 ಪನ್ನಿ ಪನ್ಪೆರ್, ಬಿರ್ದಾಳಿಂದ್ ಪನ್ಪುಜೆರ್. ಆಂಡ ಇತ್ತೆ ಮಲರಾಯನ ಸಂದಿ ಪಾಡ್ದನೊಲೆಡ್ ಇಜ್ಜಾಂದಿನ ಕನ್ನಡದ ಬಿರ್ದಾಳಿದ ದೇವಿನ ವರ್ಣನೆ ಪನೊಂದಿಪ್ಪುನವು ತಪ್ಪು. ಸಿರಿಮದನಾ.. ಸಿರಿಪುರದಲ್ಲಿ ಹುಟ್ಟಿ... ಅಂಧಕಾಸುರನನ್ನು ಕೊಂದಳು... ರುಂಡಮಾಲೆಯನ್ನು ಹಾಕಿದಳು.. ಕರುಳನ್ನು ಕೊರಳಿಗೆ ಮಾಲೆಯಾಗಿ ಹಾಕಿದಳುಂದು ಮಲರಾಯಗ್ ದೇವಿ ಕಾಳಿನ ವರ್ಣನೆ ಮಲ್ತೊಂದುಲ್ಲೆರ್. ಸುಬ್ರಹ್ಮಣ್ಯೊಡು ಒಂಜಿ ಭವನ ಇಂಚಿದ ಮೈಕ್ ಬೂರುಂಡ್, ಅಲ್ಪರ್ದ್ ಕುಡೊಂಜಿ ಭವನ ಅಂಚಿದ ಮೈಕ್ ಬೂರುಂಡ್.. ಮುಲ್ಪರ್ದ್ ಒಂಜಿ ತಿಕ್ ದ ಭವನ.. ಇಂಚ ತುಳುಟು ಬಿರ್ದಾಳಿ ಉಂಡು. ಕೆಂಚಮ್ಮ, ಕೇಜಮ್ಮ, ಮಾರಿಯಮ್ಮ, ಜೈಮಾ ಜೈಮಾ... ಉಂದು ಬಿರ್ದಾಳಿಯತ್ತ್. ಮಲರಾಯನ, ಸಿರಿಮದನ, ಸಿರಿಮದನ, ಸುರಪುರದ ಬಯಲಲ್ಲಿ .... ಮಹಾಲಕ್ಷ್ಮಿ ನಮೋ ಸ್ತುತೆ... ಉಂದುಲಾ ಬಿರ್ದಾಳಿಯತ್ತ್

ಅಣ್ಣಪ್ಪ ಸ್ವಾಮಿ ತುಳುನಾಡುಗ್ ಶಿಶಿಲ, ಕೊಕ್ಕಡ ಆದ್ ಬರ್ಪುನಿಂದ್ ಕೆಲವೆರ್ ಪಂಡೆರ್ಡ ನಿಜವಾದ್ ಶಿಶಿಲ, ಕೊಕ್ಕಡ ಆದ್ ಪಂಜುರ್ಲಿ ತಲೊಕು ಬತ್ತುಂಡುಂದ್ ಕೆಲವೆರ್ನ ಅಭಿಪ್ರಾಯ. ಕೊಕ್ಕಡಡ್ ಉಲ್ಲಾಲ್ದಿ, ಪಂಜುರ್ಲಿ ದೈವ ಪ್ರಧಾನ ಆದಿತ್ತುದ್ ಉಲ್ಲಾಲ್ದಿ ಬೊಕ್ಕ ಪಂಜುರ್ಲಿಗ್ ಅವ್ಲು ನೇಮ ನಡಪುಂಡು. ಅಣ್ಣಪ್ಪ ಪಂಜುರ್ಲಿಮೂಡಾಯಿ ಗಟ್ಟ ಜತ್ತ್ ದ್ ಬನ್ನಗ ಗಟ್ಟ ಸಾದಿ ನಡುತ ಜೇನಿಗಲ್ಲ್ ಡ್ ಜೇನಿಗಲ್ಲ ಪಂಜುರ್ಲಿ ಯಾಪೆ.  ತುಳುನಾಡ್ ಜತ್ತಿ ಬೊಕ್ಕ ಪಂಜುರ್ಲಿ ದೈವ ಮಟ್ಟಾರ್ ಗ್ ಪೋದು ಮಟ್ಟಾರ್ ಪಂಜುರ್ಲಿಯಾಂಡ, ಮಲ್ಪೆಗ್ ಪೋದು ಬಗ್ಗು ಪಂಜುರ್ಲಿಯಾಪುಂಡು. ಅರಸುಲೆಗ್ ಮಾಡದಡಿಟ್ ನೇಮ ಆಂಡ ಗ್ರಾಮ ದೈವ, ರಾಜಂದೈವೊಲು ಉಲ್ಲಾಕ್ಲೆರ್ದ್ ಒಂತೆ ತಿರ್ತ ಒರುಂದು ನೇಮೊಡು ಒಂತೆ ಎತ್ತೆಸೊ ಉಪ್ಪುಂಡು. ತಲೊತ ಬೆಟ್ಟೊಡು ಅಣ್ಣಪ್ಪ ಸ್ವಾಮಿಗ್ ಲೆಕ್ಕೆಸಿರಿ ಲೆಕ ಸೊಂಟೊಗು ನೆರಿ ಇತ್ತುದ್ ಅಪ್ಪರಂಬು ಇತ್ತುಂಡ ಬೇತೆ ಕೋಡಿಡ್ ಅಣ್ಣಪ್ಪ ಪಂಜುರ್ಲಿಂದ್ ಸೊಂಟೊಗು ತಿರಿ ಕಟ್ಟುದ್ ಅಣಿ ಕಟ್ಟುದ್ ಆರಾಧನೆ ಮಲ್ಪುವೆರ್. ಮುಕ್ಕಾಲ್ ಗಂಟೆ ಅಣ್ಣಪ್ಪ ಸ್ವಾಮಿನ ನೇಮ ಆದ್ ದೈವ ಕೊರ್ಪುನ ನುಡಿಯೇ ಕೇನರೆ ಬಾರೀ ಕುಸಿಯಾಪುಂಡು. ಅಪ್ಪೆ ಬಾಲೆನ್ ಎಂಚ ಮೋಕೆ ಮಲ್ಪುವಲ ಅಂಚಿನನೇ ನುಡಿ ತಲೊತ ಅಣ್ಣಪ್ಪ ಸ್ವಾಮಿನ ನುಡಿಯಾದುಂಡು. ಅಣ್ಣಪ್ಪ ಸ್ವಾಮಿನ ನೇಮ ಪಿರಿದ್ ಒಂತೆ ಪೊರ್ತುಡ್ ಕಟ್ಟ್ ಕಟ್ಲೆಡ್ ಸ್ವಾಮಿನ ಅವ್ವೇ ಐತೊಡು ಪಾಳೆದ ಮುಗ ದೀದ್ ಪೊಟ್ಟಗ್ ಕಟ್ಟ್  ಕಟ್ಲೆ  ನಡಪುಂಡು. ಪೊಟ್ಟ ದೈವ ಪಂಡ ಪೊಟ್ಟ ಪಂಜುರ್ಲಿಂದ್ ಅರ್ಥ ಅತ್ತ್. ಅಣ್ಣಪ್ಪ ಸ್ವಾಮಿನ ಪರಿಚಾರಕ ಲೆಕ ಪೊಟ್ಟೆ ಇತ್ತುದ್ ನುಡಿ ಇಜ್ಜಿ. ಪ್ರಧಾನ ಸ್ವಾಮಿ ಉಪ್ಪುನಗ ಚಾಕಿರಿದಾಯೆ ಬಾಯಿ ಬುಡ್ಪುಜೆ, ಅಂಚಾದ್ ಆಯಗ್ ಬಾಯಿ ಬರ್ಪುಜಿಂದ್ ಅರ್ಥ ಅತ್ತ್. ಪೊಟ್ಟ ನೇಮ ಪಿರಿದ್ ಇರ್ವ ನಿಮಿಷ ಕರಿದ್ ಪಂಜುರ್ಲಿಗ್ ನೇಮ ಸುರಾಪುಂಡು. ಆ ನಡುತ ಅಂತರೊಡು ತಪ್ಪಂಗಾಯಿದ ಕಜ್ಜ ಉಪ್ಪುಂಡು. ಕಾವಂದೆರ್ ಪೀಠೋಡು ಕುಲ್ಲುದು ಬತ್ತಿನಕ್ಲೆಗ್ ಕೈ ಕಾಣಿಕೆ ಕೊರೊಂದಿಪ್ಪುವೆರ್. ಪುರ್ಸಾದ, ಬೂಲ್ಯ ಕೊರ್ಪೆರ್. ಇರ್ವ ನಿಮಿಷದ ಅಂತರೊಡು ಪಂಜುರ್ಲಿನ ನೇಮ ಸುರಾಪುಂಡು. ಅಪಗ ಸಂದಿ ಸುರಾಪುಂಡು. ಪಾರೆಂಕಿ ಪಾರಿ ಬಲ್ಲಾಳ, ನೇರೆಂಕಿ ನೇರಿ ಬಲ್ಲಾಳ ಪಂದ್ ಸಂದಿ ಸುರಾಪುಂಡು. ದುಂಬುಗು ಉಮ್ಮದ ಬಲ್ಲಾಳ, ವರ್ಣಾರ ಬಲ್ಲಾಳ ಪಂದ್ ಒಟ್ಟು ನಾಲ್ ಬಲ್ಲಾಳ್ರೆನಕ್ಲೆನ್ ಪುರಪು ಲೆಪ್ಪುಂಡು. ಕೆಕ್ಕಿಲ್ ಗ್ ಸಿರಿ, ಸೊಂಟೊಗು ಸಿರಿ ಕಟ್ಟುದ್ ಮೋನೆಗ್ ಪಂಜಿದ ಮುಗ ಕಟ್ಟುದ್ ಕೋಲ್ತಿರಿ ಪತ್ತೊಂದೇ ಪಂಜುರ್ಲಿಗ್ ನೇಮ ನಡಪುನಿ. ಅವ್ಲು ಪಂಜುರ್ಲಿನ ಕೈಟ್ ಅಪಗ ಸುರಿಯಲ ಇಪ್ಪುಜಿ, ಕಡ್ಸಲೆಲ ಉಪ್ಪುಜಿ. ಪಂಜುರ್ಲಿಗ್ ಪ್ರಧಾನವಾದ್ ಕೋಲ್ತಿರಿ ಯಾರುಂಡು. ಆಂಡ ಇನಿ ಪಂಜುರ್ಲಿನ ಕೈಟ್ ಸೂಟೆ ಕೊರ್ದು ತಡ್ಪೆಡ್ ರಡ್ಡ್ ತಾರಾಯಿದ ಗಡಿಟ್ ನಿನೆ ದೀದ್ ಪೊತ್ತಾದ್ ಪೊರಿನ್ ಪಂಜುರ್ಲಿನ ಮೇಲ್ ಗ್ ಪಾರಾವೆರ್. ಆಂಡ ತಲೊಟು ಈ ಕಿರಮ ಇಜ್ಜಂದೆ ಪಂಜುರ್ಲಿ ದೈವದ ಕೈಟ್ ಕೋಲ್ತಿರಿ ಮಾತ್ರ ಉಪ್ಪುಂಡು. ಕೊಡಿ ಬಾರೆದಿರೆಟ್ ರಡ್ಡ್ ಗಡಿ ತಾರಾಯಿದ ಮಿತ್ತ್ ಪಂಜುರ್ಲಿನ ಮೋನೆ ಮಿತ್ತ್ ತೂಪುಲೆಕ ಜೆಪುಡಾದ್ ದೈವ ಪಂಜಿ ಮುರ್ಲುಲೆಕ ಮಲ್ತ್ ದ್ ಲಕ್ಕ್ನಡೆಗ್ ನೇಮ ಪಿರಿಯುಂಡು. ಅಣ್ಣಪ್ಪೆ ಪಂಡಲ ಅಣ್ಣಪ್ಪ ಪಂಜುರ್ಲಿ ಪಂಡಲ ಒಂಜೆಂದ್ ಕಟ್ಟುನೆಟ್ ಬಾರ್ಯಾತ್ ವರ್ಸ ಅಲ್ಮೋಗ ಇತ್ತ್ ನಕುಲು ಪನ್ಪೆರ್. ಈಸರ ದೇಬೆರ್ ಬೇತೆ ಅತ್ತ್ ಅಣ್ಣಪ್ಪ ಪಂಜುರ್ಲಿ ಬೇತೆ ಅತ್ತ್ಂದ್ ನಂಬಿನಕುಲ್ಲಾ ಉಲ್ಲೆರ್

ಅಣ್ಣಪ್ಪನ್ ಕೆಲವೆರ್ ಜೋಗಿಲೆ ಪವಾಡ ಪುರುಷೆ ಪಂದ್ ಪಂಡೆರ್ಡ, ಕೆಲವೆರ್ ಅಣ್ಣಪ್ಪೆ ಪನ್ಪುನಾಯೆ ಒರಿಮಲೆ ಕುಡಿಯ ಜನಾಂಗದಾಯೆಂದುಲಾ ಪನ್ಪೆರ್. ಕುಕ್ಕೆ ಬೊಕ್ಕ ಸುಬ್ಬೆ ಪನ್ಪುನಾಕ್ಲೆರ್ದ್ ಕುಕ್ಕೆ ಸುಬ್ರಹ್ಮಣ್ಯ ಬತ್ತುಂಡುಂದ್ ಪನ್ಪೆರ್. ಮೊಕುಲ್ಲಾ ಮಲೆಕುಡಿಯ ಜನಾಂಗದಕುಲಾದಿತ್ತುದ್ ಇನಿಲಾ ತೇರ್ ಕಟ್ಟೆರೆ ಕುಕ್ಕೆಗ್ ಅಕುಲೇ ಬರ್ಪುನಿ. ದುಂಬು ದೈವ, ನಾಗೆ, ದೇವೆರ್ ಪೂರ ಮೂಲ ಜನಾಂಗದಕ್ಲೆಗೇ ತಿಕುದಿನಿ. ಕುಕ್ಕೆಡ್ ನಾಗೆ, ಬಳ್ಳೊಡು ನಾಗೆ, ಕುಡುಪುಡು ನಾಗೆ ತಿಕಿನೆರ್ದ್ ಕುಕ್ಕೆ ಸುಬ್ರಹ್ಮಣ್ಯ, ಬಳ್ಳ ಮಂಜ, ಕುಡುಪುಂದು ಪುದರ್ ಬತ್ತುಂಡ ದೆಸಿಲ ಪನ್ಪುನ ಮೂಲ ಜನಾಂಗದಾಯಡ್ದ್ ಶಿಶಿಲ, ಕಟೀಲ ಪನ್ಪುನ ಮೂಲ ಜನಾಂಗದಾಯಡ್ದ್ ಕಟೀಲ್, ಕಾಂತಾರ ಪನ್ಪಿ ಮೂಲ ಜನಾಂಗದಾಯಡ್ದ್ ಕಾಂತಾವರ ಪುದರ್ ಬೈದುಂಡ್. ನಮ್ಮ ನಮ್ಮ ತುಳುವ ಮೂಲದಕ್ಲೆನ್ ಪೂರ ಮದತುದ್ ಬುಡ್ತ. ನಮಕ್ ಕಲ್ಕುಡ ಕಲ್ಲುರ್ಟಿ, ಕೋಟಿ ಚೆನ್ನಯ, ಕಾಂತ ಬಾರೆ ಬೂದಬಾರೆ ಎಂಚ ಮಹಾನ್ ಪುರುಷೆರಾ ಅಣ್ಣಪ್ಪೆಲ ಒರಿ ಪವಾಡ ಪುರುಷೆ. ಅಣ್ಣಪ್ಪೆ ಪಂಡ ಅರಸುಲೆಗ್ ಸಮವಾಯಿನ ದೈವ ಆಂಡಲ ಅರಸು ಅತ್ತ್. ದಾಯೆ ಪಂಡ ಅಣ್ಣಪ್ಪ ಸ್ವಾಮಿಗ್ ಅರಸು ದೈವದ ಲೆಕ ಮಾಡ ಇಜ್ಜಿ. ಆಯಗ್ ಗುಡಿ ಇತ್ತುದ್ ಅಣ್ಣಪ್ಪ ಗುಡಿಂದೇ ಪನ್ಪುನಿ. ಅಣ್ಣಪ್ಪೆ ತಲೊಕು ಎಂಚ ಬತ್ತೆಂದ್ ನಮ ತೂಪುಂಡ ಬಾರ್ಯಾತ್ ದುಂಬು ಇನಿರ್ದ್ ನಾಲೈನ್ ತರೆತರವಾಡುದ ದುಂಬು ಕುಡುಮದ ಬೂಡುದ ಉಲ್ಲಾಲ್ದಿ ಸೋಮಾರ ಸೋಮಾರ ಕದಿರೆಗ್ ಮಂಜುನಾಥನ ದರ್ಶನೊಗುಂದು ಪೋವೊಂತೆರ್ಗೆ. ಇಂಚ ಪೋವೊಂದಿಪ್ಪುನಗ ಸಾದಿ ನಡುಟ್ ಒಂಜಿ ಎಲ್ಯ ಪ್ರಾಯದ ಆಣ್ ಬಾಲೆ ತೂಯೆರೆ ತಿಕ್ಕುವೆ. ಬಡವುಂದು ಕೇನ್ನಗ ಅಮ್ಮ ಆ ಬಾಲೆಗ್ ದೇವೆರೆ ಪುರ್ಸಾದ ಕೊರ್ಪೆರ್. ಕುಡೊಂಜಿ ಸೋಮಾರ ಆರ್ ಅವ್ವೇ ಸಾದಿಡ್ ಬನ್ನಗ ಅವ್ವೇ ಬಾಲೆ ಅವ್ಲೇ ಉಂತುದಿತ್ತುಂಡ್. ಅಪಗ ಅಮ್ಮ ಏರಪ್ಪಾ ಈರ್ ಪೋಯಿ ವಾರಲಾ ತಿಕ್ ದರ್, ಈ ವಾರಲಾ ತಿಕ್ ದರ್, ಏರೀರುಂದ್ ಕೇನ್ನಗ ಯಾನೊರಿ ಅನಾಥೆಂದ್ ಬಾಲೆ ಪನ್ಪುಂಡು. ಅಪಗ ಇರೆನ ಪುದರ್ ದಾದೆಂದ್ ಕೇನ್ನಗ ಕೆಲವೆರ್ ಎನನ್ ಅಣ್ಣ ಪಂದ್ ಲೆಪ್ಪುವೆರ್, ಕೆಲವೆರ್ ಅಪ್ಪ ಪಂದ್ ಲೆಪ್ಪುವೆರ್. ಇರೆಗ್ ಒವು ಇಷ್ಟ ಆಪುಂಡಾ ಆ ಪುದರ್ ಡೇ ಲೆಪ್ಪುಲೆಂದ್ ಬಾಲೆ ಪನ್ಪುಂಡು. ಅಂಚ ಆರ್ ತನ್ನ ಕೈಟಿತ್ತಿನ ದೇವೆರೆ ಪುರ್ಸಾದ ಪರ್ನ್ದುನ್ ಬಾಲೆಗ್ ತಿನೆರೆ ಕೊರ್ದು ಬೂಡುಗು ಲೆತೊಂದು ಬತ್ತುದ್ ಅಣ್ಣಪ್ಪೆ ಪಂದ್ ಪುದರ್ ದೀದ್ ಕಂಡನಿಯನ ಚಾಕಿರಿಗಿಂದ್ ಉಂತವೆರುಂದ್ ದುಂಬುದ ಎರಿಯಾಕ್ಲು ಪನೊಂತೆರ್. ದುಂಬುಗು ಜೋಗಿ ಸನ್ಯಾಸಿಲು ಮದ್ದೆನ ಬಿಕ್ಷೆಗ್ ಬನ್ನಗ ಅಕುಲು ಲಿಂಗ ಪೂಜೆ ಮಲ್ಪಂದೆ ಭಿಕ್ಷೆ ಗೆತೊನುಜಂದ್ ಪನ್ನಗ, ಬತ್ತಿ ಬಿನ್ನೆರೆಗ್ ನುಪ್ಪು ಕೊರಂದೆ ನಮ ಉನಯಂದ್ ಚಿಂತೆಡುಪ್ಪುನಗ ಉಂದೇ ಅಣ್ಣಪ್ಪೆ ನೇತ್ರಾವತಿರ್ದ್ ಲಿಂಗೊನು ಕನತುದ್ ಸ್ವಾಮಿಲೆಗ್ ಕೊರ್ದು ಅಕುಲು ಲಿಂಗ ಪೂಜೆ ಮಲ್ತುದ್ ಭಿಕ್ಷೆ ಗೆತೊನುವೆರುಂದ್ ಒಂಜಿ ಕಥೆ ಪಂಡ ನನೊಂಜಿ ಮೂಲದ ಪ್ರಕಾರ ಕದಿರೆರ್ದ್ ಮಂಜುನಾಥನ ಲಿಂಗೊನು ಒಂಜಿ ಕೆರೆರ್ದ್ ಕನತುದ್ ತಲೊಟು ನಿಲೆ ಮಲ್ಪುವೆಂದ್ ಕಥೆ ಪನ್ಪುಂಡು. ಶೈವ - ದೈವ - ಜೈನ ಧರ್ಮದ ನಿಲೆಯಾಯಿನ ತಲೊಟು ಅಣ್ಣಪ್ಪೆ ಸ್ವಾಮಿಯಾದ್ ನಿಲೆಯಾದ್ ಉದಿತ್ ದ್ ನಂಬಿನಕ್ಲೆನ  ಕಷ್ಟೊನು ದೂರ ಮಲ್ತೊಂದುಲ್ಲೆರುಂದ್ ನಂಬುದೆರ್. ಉಲ್ಲಾಕ್ಲು ಪಂಡ ಕರಿಯ ಸಂಕಮಾಲೆ, ಬೊಳಿಯ ಸಂಕಮಾಲೆ ನಾಗನಕುಲು ಅಕುಲುಂದುಲ ಪನ್ಪೆರ್. ಸುಬ್ರಹ್ಮಣ್ಯೊಡು ಉಪ್ಪುನ್ಲಾ ಅಕುಲೆ. ಖಂಡಿತವಾದ್ ಉಲ್ಲಾಕ್ಲು ಪಂಡ ಬೆರ್ಮೆರೆ. ಅರೆಗ್ ರಡ್ಡ್ ರೂಪ ಇತ್ತುದ್ ಒಂಜಿ ಮಲ್ಲ ರೂಪ, ಕುಡೊಂಜಿ ಎಲ್ಯ ರೂಪ. ಮಲ್ಲಣ್ಣೆ/ನೇಲ್ಯಣ್ಣೆ - ಎಲ್ಯಣ್ಣೆ ಪಂದ್ ಪಂಡಲ, ಉಳ್ಳಾಕ್ಲಾಂಡಲಾ ಸೂಕ್ಷ್ಮವಾದ್ ಬೆರ್ಮೆರೆ. ಕೋಟೆದ ದೇಸಿಂಗೆರುಂದ್ ಅರಸುದೈವ ಉಲ್ಲಾಕ್ಲೆನ್ ಪನ್ಪೆರ್. ಕುಂಬ್ಳೆ ಸೀಮೆದ ಜಯಸಿಂಹ ಅರಸುನು ತುಳುಟು ದೇಸಿಂಗರಸುಂದು ಪನ್ಪೆರ್. ಉದಾರ್ಮೆಗ್ - ಪುರುಷೋತ್ತಮ ಪುದರ್ ಇತ್ತಿನಾಯನ್ ಪುರ್ಸೆಂದ್ ಲೆತ್ತ್ ಲೆಕ. ಅರಸುಲು ಮಲ್ತಿ ಕಿರಮ. ದೇಸಿಂಗ ಉಲ್ಲಾಯ ಪಂಡ ಜಯಸಿಂಹ ಉಲ್ಲಾಯಂದರ್ಥ. ಸಾರ ವರ್ಸದ ಇತಿಹಾಸ ಉಂಡು. ಪಂಜುರ್ಲಿ ಪಾಡ್ದನೊಡು ಸುರುಕು ಬರ್ಪುನ ಪಾರೆಂಕಿ ಬಲ್ಲಾಳ(ಬಳ್ಳ ಮಂಜ), ನೇರೆಂಕಿ ಬಲ್ಲಾಳ(ಉಬಾರ್), ಉಮ್ಮದ ಬಲ್ಲಾಳ(ಕಾರ್ಲ), ವರ್ಣಾರ ಬಳ್ಳಾಲ(ಸುಳ್ಯ) ಪ್ರಮುಖವಾಯಿನವು. ವರ್ಣಾರ ಗುತ್ತು ಸುಳ್ಯದಂಚಿ ಉಂಡು. ಅಂಚೆನೆ ಪಂಜುರ್ಲಿ ಗಟ್ಟ ಜತ್ತ್ ದ್ ಬನ್ನಗ ಜೇನಿಗಲ್ಲ್ ಡ್ ಜೇನಿಗಲ್ಲ್ ಪಂಜುರ್ಲಿಯಾದ್ ದುಂಬುಗು ತಲೊಕು ಬರ್ಪುಂಡು. ಅವೆರ್ದ್ ಬೊಕ್ಕ ಕುಕ್ಕೆಲ ಬಲ್ಲಾಳ ಇಂಚ ದುಂಬೊತ್ತೊಂದು ಪೋಪುಂಡು.  ವರ್ಣಾರ ಪಂಜುರ್ಲಿನ್ ವರ್ಣಾರ ಮರ್ಲೆಂದ್ಲ ಪನ್ಪೆರ್. ಮರ್ಲೆ ಪಂಡ ಉಗ್ರದ ಬಂಟೆಂದ್ಲ, ಪಂಜುರ್ಲಿಂದ್ಲ ಅರ್ಥ ಬರ್ಪುಂಡು. ಉಮ್ಮದ ಬಲ್ಲಾಳನ ಪಟ್ಟದ ದೈವ ಉಮ್ಮದ ಪಂಜುರ್ಲಿಗ್ ಉಗ್ರ ಜಾಸ್ತಿ. ಉಮ್ಮದ ಗುತ್ತುಂದುಲ ಪನ್ಪೆರ್. ಉರ್ನಾರ/ವರ್ಣಾರ ಗುತ್ತುಂದು, ಬೂಡುಂದು ಉಂಡು. ಸುಳ್ಯದಂಚಿ  ವರ್ಣಾರ ಗುತ್ತುಡು ಗೌಡ ಜನಾಂಗದಕ್ಲು ವರ್ಣಾರ ಪಂಜುರ್ಲಿನ್ ಆರಾಧನೆ ಮಲ್ಪುವೆರ್. ಪಂಜುರ್ಲಿಗ್ ಓಲು ನೇಮ ಆಂಡಲಾ ಈ ನಾಲ್ ದಿಕ್ಕುದ ಸುರುತ ಪುರಪಿಪ್ಪುಂಡು. ವರ್ಣಾರ ಪಂಜುರ್ಲಿನೊಟ್ಟುಗು ಅಂತ ಬೈದ್ಯಗ್ ಕಟ್ಟ್ ಕಟ್ಲೆ ನೇಮ ನಡಪುಂಡು. ಅಂತ ಬೈದ್ಯೆ ದಂಡುದ ರಾಜ್ಯೊಡು ಪೊಂರ್ಬಾಟೊಡು ಗೆಲ್ಪು ಕನತ್ ಕೊರ್ನೆಕ್ ಈಲ ನಂಬುಂದು ತನ್ನ ಪಟ್ಟದ ದೈವ ವರ್ಣಾರ ಪಂಜುರ್ಲಿನ್ ಬಲ್ಲಾಳೆರ್ ಅಂತ ಬೈದ್ಯಗ್ ಕೊರ್ಪೆರ್. ಇನಿಕ್ಲಾ ಪೂಜಾರಿಲೆನ ಇಲ್ಲಲ್ ವರ್ಣಾರ ಪಂಜುರ್ಲಿನ ಆರಾಧನೆ ನಡಪುಂಡು.ಕೆಲವು ತಿಕ್ ಡ್ ಜುಮಾದಿಗ್ ನೇಮ ನಡತ್ ದ್ ಅವ್ವೆ ಅಣಿಟ್ ಕಟ್ಟ್ ಕಟ್ಲೆದ ನೇಮ ಪಂಜುರ್ಲಿಗಾ, ಲೆಕ್ಕೆಸಿರಿಗಾ ನಡಪುಂಡು. ಅಣ್ಣಪ್ಪಗ್ ನೇಮ ಆದ್ ಅವ್ವೆ ಅಣಿಟ್ ಪಂಜುರ್ಲಿನ ಮುಗ ದೀದ್ ಕಟ್ಟ್ ಕಟ್ಲೆದ ಪಂಜುರ್ಲಿ ನೇಮ ನಡಪುನಲಾ ಉಂಡು

ಅಣ್ಣಪ್ಪ ಪಂಜುರ್ಲಿ ಬೊಕ್ಕ ಉರುಂದಾರ ಪಂಜುರ್ಲಿ(ವರ್ಣಾರ) ಒಂಜೆ ಸಗ್ತಿದ ಮಾಯೆಲಾದಿತ್ತ್ ದ್ ರಡ್ಡ್ ಅವತಾರೊಲು. ರಡ್ಡೆತ ಹಿನ್ನಲೆಲ ಸಂದಿಡ್ ತಲೊರ್ದೆ ಸುರಾಪುನಿ. ಕಾನತ್ತೂರುಗು ಪೋನಗ ಉಗ್ರ ಮೂರ್ತಿ/ಉಗ್ರ ಪಂಜುರ್ಲಿಲ ಉಂದೇ ಅಣ್ಣಪ್ಪ ಪಂಜುರ್ಲಿ. ಬೇತೆ ಬೇತೆ ತಿಕ್ ಗ್ ಜುಮಾದಿಲೆಕನೆ ಬೇತೆ ಬೇತೆ ಪುರಪುನು ಪತೊಂದು ಬೇತೆ ಬೇತೆ ಮಾಯಾ ರೂಪೊಡು ಪೋತ್ ನ ರಡ್ಡ್ ಸತ್ಯೊಲು ಪಂಡ ಅಣ್ಣಪ್ಪ ಪಂಜುರ್ಲಿ ಬೊಕ್ಕ ಉರುಂದಾರ ಪಂಜುರ್ಲಿ. ಅಂಬಡಾಡಿರ್ದ್ ರಾಯೆರೆ ಚಾವಡಿಗ್ ಪಂಜುರ್ಲಿ ಬರ್ಪುನಿಗೆ. ವರ್ಣಾರ ಪಂಜುರ್ಲಿನ ಸಂದಿಡ್ ರಾಯೆರೆ ಚಾವಡಿದ ಇಚಾರ ಬತ್ತ್ಂಡ ಅಣ್ಣಪ್ಪ ಪಂಜುರ್ಲಿ ಅಂಬಡಾಡಿರ್ದ್ ರಾಯರ ಚಾವಡಿಗ್ ಪೋಪುನಿ ಪನ್ಪೆರ್. ಉಂದೆನ್ ತೂನಗ ಅಣ್ಣಪ್ಪ ಪಂಜುರ್ಲಿ ಬೊಕ್ಕ ವರ್ಣಾರ ಪಂಜುರ್ಲಿ ಒಂಜೇ ಮಾಯೆದ ರಡ್ಡ್ ಅವತಾರಂದ್ ಅರ್ಥ ಮಲ್ತೊನೊಲಿ. ಅಣೆತ್ತಿಮಾರ್ ಡ್ ಉಂತಿನ ದೈವಂದ್ ರಾಯೆರೆ ಚಾವಡಿ(ಬಂಟಾಲ)ದ ಪಂಜುರ್ಲಿನ್ ಪನ್ಪೆರ್. ಸಾರ ಆನೆ, ಸಾರ ಕುದುರೆಲೆಗ್ ಅವ್ಲು ಪಂಜುರ್ಲಿ ಮರ್ಲ್ ಪತ್ತಾಯಿನೆರ್ಡಾತ್ರ ಬಂಟಾಲ ರಾಯೆರೆ ಚಾವಡಿದ ಪಂಜುರ್ಲಿನ್ ಮರ್ಲ್ ಪಂಜುರ್ಲಿಂದುಲ ಪನ್ಪೆರ್. ಈ ಮರ್ಲ್ ಪಂಜುರ್ಲಿ ಉರುಂದಾರ ಪಂಜುರ್ಲಿಯೆ. ರಾಯೆರೆ ಸಂದಿಂದ್ ಲ ಉರುಂದಾರ ಪಂಜುರ್ಲಿನ ಸಂದಿಡ್ ಬರ್ಪುಂಡು. ತಲೊಟು ಸಂದಿ ಪಾರ್ದನೊರ್ದು ನಡೆತ ನುಡಿ ಪ್ರದಾನಗೆ. ಅಣೆತ್ತಿಮಾರ್ ಆನೆ ಕಟ್ಟ್ ನ ಜಾಗೆಂದ್ ಆ ಜಾಗೆನ್ ಪಂಡೆರ್ಡ, ಅಣೆ ಇತ್ತಿ ಮಾರ್ ಪಂಡ ಒಂತೆ ಎತ್ತರದ ಜಾಗೆಂದ್ ಲ ಪನ್ಪೆರ್. ನಾವೂರ ಸೀಮೆ, ಅಜಿಲೆರೆ ಸೀಮೆ, ಜೀಬಿತ್ತಿಲ್, ಭಂಡಾರಿ ಬಿತ್ತಿಲ್ ಬಂಟಾಲ ಇಂಚ ಓಲು ಪೋಂಡಲಾ ಕಲ್ಕುಡ ಕಲ್ಲುರ್ಟಿನ ಆರಾಧನೆ ಉಂಡು. ದುಂಬು ರಾಯರ ಚಾವಡಿಗ್ ಕೊಡಮಂದಾಯನ ಬಂಡಾರ ಬರೊಂದಿತ್ತುಂಡು. ಕೊಡಮಂದಾಯೆ, ಪಿಲ್ಚಂಡಿ, ಕಲ್ಕುಡ ಕಲ್ಲುರ್ಟಿ ಈ ದೈವೊಲು ಸಾಮಾನ್ಯವಾದ್ ಎಚ್ಚಿನ ಕೋಡಿಲೆಡ್ ಉಪ್ಪುಂಡು. ನಾಲ್ಕೈದಾಯನ ಸಾನಲ ಉಂಡು. ಮೂಲು ನಾಲ್ ಕೈ ಪಂಡ ನರಮಾನ್ಯನ 4 ಕೈ ಆದಿಪ್ಪಂದೆ ನಾಲ್ ಮನೆತನದ ಆರಾಧ್ಯ ದೈವ ಆದಿಪ್ಪೊಡು. ಜೈನ ಅರಸೊಳಿಗೆದ ಕಾಲೊಡು ದೈವಾರಾಧನೆ ಒರ್ಮೆಲಾ ನಡಪೆರೆ ಸುರಾಂಡ್. ದುಂಬುದ ಕಾಲದ ಕೆಲ ಮುಗ ಮೂರ್ತಿಲು ಬಂಟಾಲದ ಮಣಿಹಳ್ಳದ ಕೈತಲ್ ತಿಕುದಿತ್ತುಂಡ್. ದೇವು ಪೂಂಜನ ತರೆ ಬೂರ್ದಿನ ಜಾಗೆ ರಾಯೆರೆ ಚಾವಡಿ ಕರಿದ್ ನೇತ್ರಾವತಿ ತುದೆ ಬರಿತ ಚಂಡ್ತಿಮಾರ್ ದೌಲುಂದು ಪೆರಿಯ ತರೆಕುಲು ಪನ್ಪೆರ್. ದುಂಬು ಆ ಜಾಗೆಡ್ ಕಂಬ್ಳ ನಡತೊಂದಿತ್ತುಂಡುಂದುಲಾ ಪನ್ಪೆರ್. ಜೋಗಿ ಅರಸುಲ್ನ ಕಾಳ ಭೈರವ ಮಠ ಮಣ್ಣುದ ಗೋಡೆದವಾದಿತ್ತುದ್ ಬೊಳ್ಳ ಮಗುರ್ನಗ (ನೇತ್ರಾವತಿ) ಅವು ಸುದೆ ಪಾಲಾತುಂಡುಂದ್ ಪನ್ಪೆರ್. ದುಂಬು ಜೋಗಿ ಮಠತ  ಪಟ್ಟ ಆನಗ ಜೋಗಿ ಅರಸುಲು ಆ ಜಾಗೆಗ್ ಬತ್ತುದ್ ಪೂಜೆ ಮಲ್ತುದ್ ಊರ್ದಕ್ಲೆಗ್ ನುಪ್ಪು ಪಾಡೊಂತೆರ್.  ಬಡ್ಡ ಕಟ್ಟೆ ರಾಯರ ಚಾವಡಿದ ಮರ್ಲ್ ಪಂಜುರ್ಲಿಗ್ ಸಾವಿರ ನುಡಿ, ಸಾವಿರ ಗಡಿ. ದುಂಬು ಪಂಜುರ್ಲಿ ತರೆಕ್ ಗಡಿ ಪಾಡೊನ್ನಗ ತರೆತ ಮಾಸದ ತುಂಡು ತೋಜೊಂತುಂಡುಗೆ. ಆತ್ ಕಾರ್ನಿಕ ಇಪ್ಪೆದುಂಡ್. ಪಿಲ್ಚಂಡಿ, ಕಲ್ಕುಡ ಕಲ್ಲುರ್ಟಿ, ಪಂಜುರ್ಲಿನ ನೇಮ ಆನಗ ಕೊಡ್ಯಾಡ್ ದ ಅಡಿಕ್ ಪಿಲಿ ಬತ್ತುದ್ ಕುಲ್ಲುನೆನ್ ತೂಯಿನ ಹಿರಿಯೆರಿತ್ತೆರ್. 60 ವರ್ಸ ದುಂಬುದ ಕಥೆ ಉಂದು. ನೇಮ ಆದ್ ಭಂಡಾರ ಪಿರ ಪೋನಗ ಪಿಲಿ ಗುಡ್ಡೆ ಮಿತರ್ದ್ ಪೋವೊಂತುಂಡುಗೆ. ಅವೆನ್ ತೂಯಿನ ಎರಿಯಾಕ್ಲು ಇತ್ತೆರ್. ಗುಡ್ಡೆದ ಮಿತ್ತ್ ಪಿಲ್ಚಂಡಿನ ಜಾಗೆ ಇತ್ತುದ್ ಅಡೆ ಪಿಲಿ ಪೋದು ಮಯಕಾವೊಂತುಂಡುಗೆ. ಪಿಲ್ಚಂಡಿನ ಸಾನಿಧ್ಯ ಎಚ್ಚಾದ್ ವಾ  ಊರುಗು ಪೊಂಡಲ ಕೊಡಮಂದಾಯನ ಸಾನ ಜೇರೊದ ಮಿತ್ತ್ ಇತ್ತ್ ಲೆಕ ಪಿಲ್ಚಂಡಿನ ಸಾನೊಲ ಜೇರದ ಮಿತ್ತೇ ಉಪ್ಪುನಿ. ತುಳುನಾಡುಡ್ ಸುಮಾರ್ ಸಾರ ವರ್ಸ ದುಂಬು ಪಂಜುರ್ಲಿಗ್ ಬಂಡಿದ ನೇಮ ಆತ್ ನಿ ಅಂಬಡಾಡಿ ಪಂಡ ಬಂಟಾಲ ತಾಲೂಕುದ ಅಮ್ಟಾಡಿಡ್. ಅಂಚೆನೆ ಅಮ್ಟಾಡಿಡ್ ಪಂಜುರ್ಲಿಗ್  ಮುಡಿಪು ಕಟ್ಟುಂಡ ಅವ್ಲೇ ಅಯಿನ್ ಗಿರ್ತುದ್ ಅವ್ವೇ ದೈವ ಸಾನೊಡು ಗಳಸುವೆರುಂದ್ ಪನ್ಪೆರ್. ಮಲೆಕ್ಲಾ ಅಲ್ತುರ್ದ್ ಏರ್ಲಾ ಪೋಯೆರೆ ಇಜ್ಜಿಂದ್ ಪನ್ಪೆರ್. ಬಂಟಾಲೊಡು ಪಂಜುರ್ಲಿ ನಿಲೆಯಾಯಿನ ಪ್ರಧಾನ ನಾಲ್ ಜಾಗೆಲುಲ್ಲ. - ಬಂಡಾರಿ ಬಿತ್ತಿಲ್, - ಅಕ್ಕೇರಿ ಪಾದೆ, - ಅಂಬರಾಡಿ/ಅಂಬಡಾಡಿ/ಅಮ್ಟಾಡಿ, - ಅಜೆಕಳ/ಅಜೆಕಳ ಬಾವ ಪಂಜುರ್ಲಿ - ಉಂದೇ ಆ ನಾಲ್ ಪ್ರಧಾನ ಜಾಗೆಲು. ಪೇಂಟೆದ ಬಂಡಾರಿನಕ್ಲೆನ ಕಂರ್ಬಿತ್ತ್ ಲ್ ಪಂಜುರ್ಲಿಂದ್ ಬಂಡಾರಿ ಬಿತ್ತಿಲ್ದ ಪಂಜುರ್ಲಿನ್ ಪನ್ಪೆರ್. ಈ ನಾಲ್ ಜಾಗೆಲೆಡ್ ಪಂಜುರ್ಲಿನ ಕಾರ್ನಿಕ ದೆರ್ತ್ ತೋಜುಂಡು. ಬಂಡಾರಿ ಬಿತ್ತಿಲ್ದ ಬಂಡಾರಿನಕ್ಲೆನ ಇಲ್ಲದ ಜಾಲ್ ಗ್ ಸುರುಕು ಬತ್ತುದ್ ಪಂಜುರ್ಲಿ ಉಂತುಂಡು. ಸುರುಕು ಪಂಜುರ್ಲಿ ಅಡೆಗ್ ಎರುತ ರೂಪೊಡು ಬತ್ತುದ್ ಉಂತುಂಡು. ಆ ಎರು ಕಟ್ಟಿನ ಮರ ಇನಿಕ್ಲಾ ಅವ್ಲುಂಡು. ಇಲ್ಲದ ಉಲಯಿ ಪುಚ್ಚೆದ ರೂಪೊಡು ಪೋದು ಪೇರ್ ಪರ್ದ್ ಬಂಡಾರಿ ಬಿತ್ತುಲ್ ಡ್ ಪಂಜುರ್ಲಿ ಉಂತುದ್ ತೂನಗ ಅಕ್ಕೇರಿ ಪಾದೆ ತೋಜುಂಡು. ಅವ್ಲು ಬಿರ್ಮೆರ್ ಬೊಕ್ಕ ಲೆಕ್ಕೆಸಿರಿ ಉಪ್ಪುನವು ಪಂಜುರ್ಲಿಗ್ ತೆರಿಯುಂಡು. ಅಲ್ತ್ ಉಂತುದು ತೂನಗ ಅಂಬಡಾಡಿ ಪಂಜುರ್ಲಿ ದೈವೊಗು ತೋಜುಂಡು. ಅಂಬಡಾಡಿಡ್ ಬೆರ್ಮೆರ್, ಲೆಕ್ಕೆಸಿರಿ, ಮರ್ಲ್ ಜುಮಾದಿ, ಅಣ್ಣಪ್ಪ ಸ್ವಾಮಿ ದುಂಬುಡು ಇತ್ತುಂಡು. ಅಂಬಡಾಡಿಡ್ ಅಣ್ಣಪ್ಪ ಸ್ವಾಮಿನ ಆರಾಧನೆ ಇತ್ತುದ್ ಅಡೆಗ್ ಬತ್ತಿನ ಪಂಜುರ್ಲಿ ಅವ್ಲು  ಪ್ರಧಾನ ದೈವ ಆದ್ ಆರಾಧನೆ ಗೆತೊನುಂಡು. ಅಣ್ಣಪ್ಪ ಸ್ವಾಮಿ, ಪಂಜುರ್ಲಿ ಏಪೊರ್ದು ಬೊಕ್ಕ ಅಣ್ಣಪ್ಪ ಪಂಜುರ್ಲಿಯಾಂಡ್ ಪನ್ಪಿ ಇಚಾರ ಎಚ್ಚಿನಕ್ಲೆಗ್ ತೆರಿದಿಜಿ. ಬಂಟಾಲ ಬೈಪಾಸ್ ದ ಕೈತಲ್ ದ ಅಜೆಕಲ ಬಾವ ಪಂಜುರ್ಲಿ ಸೂತಂಚಿ ಕಾರ್ನಿಕದ ದೈವ. ರಾಯರೆ ಚಾವಡಿದ ಪಂಜುರ್ಲಿ ಬಾರೀ ಕಾರ್ನಿಕದ ಪಂಜುರ್ಲಿಯಾದಿತ್ತುದ್ ಕಲ್ಕುಡ ಕಲ್ಲುರ್ಟಿ ಉಪ ದೈವೊಲಾದ್ ಅವ್ಲು ಆರಾಧನೆ ಪಡೆಯೊಂದುಲ್ಲೆರ್. ಪುರಲ್ ಸಾವಿರ ಸೀಮೆ ದೇವಿ ಸಗ್ತಿದ ಸಾನ ಆದಿತ್ತಿನೆರ್ಡಾತ್ರ ಮೂಲು ಸ್ತ್ರೀ ಶಕ್ತಿ ಕಲ್ಲುರ್ಟಿಗ್ ಮಾನಾದಿಗೆ ಜಾಸ್ತಿ. ಉಬಾರ್ ಡ್ ಸಹಸ್ರ ಲಿಂಗೇಸರೆ ಆಣ ಸಗ್ತಿಯಾದ್ ನೆಗತ್ ತೋಜಿಂಡ ಅವ್ಲು ಕಲ್ಕುಡಗ್ ಪ್ರಾಧಾನ್ಯತೆ. ಹಿರಿಯಡ್ಕ, ಕಾರ್ಲ, ಪಳ್ಳಿಡ್ ಕಲ್ಲುರ್ಟಿನ್ ವರ್ತೆ ಪಂದ್ ಆರಾಧನೆ ಮಲ್ಪುವೆರ್. ಅವ್ಲು ಕಲ್ಲುರ್ಟಿಗ್  ಪಂದ್ ಪ್ರಾಧಾನ್ಯತೆ ಇಜ್ಜಿ. ಅವ್ಲು ಕಲ್ಕುಡಗ್ ಮಾನಾದಿಗೆ ಉಂಡು. ಊರ್ದ ಕಟ್ಟ್ ಪ್ರಕಾರ ಅವ್ಲು ಕಲ್ಲುರ್ಟಿಗ್ ಅಣಿ ಉಂಡು. ತುಳುನಾಡ ಇಲ್ಲದೆಚ್ಚಿಡ್ ಕಲ್ಲ್ಲುರ್ಟಿ ಪ್ರಧಾನ. ಆಂಡ ಪಂಜುರ್ಲಿನ ಆರಾಧನೆ ಇತ್ತುಂಡ ಪಂಜುರ್ಲಿ ಪ್ರಧಾನ ಆದಿತ್ತುದ್ ಒಟ್ಟುಗು ಕಲ್ಲುರ್ಟಿ ಪಂಜುರ್ಲಿನ ಆರಾಧನೆ ಮಲ್ಪುವೆರ್. ಬಂಟಾಲ ರಾಯೆರೆ ಚಾವಡಿಡ್ದ್ ಬೊಕ್ಕ ಕಲ್ಲುರ್ಟಿ ಪಂಜುರ್ಲಿನ ಆರಾಧನೆ ಒಟ್ಟುಗು ಸುರಾಂಡ್. ರಾಯೆರೆ ಚಾವಡಿಡ್ ಪಂಜುರ್ಲಿ ರಾಜಂದೈವ. ಆ ಚಾವಡಿಡ್ ಕಲ್ಕುಡೆ ಪಂಜುರ್ಲಿನ ಬಂಟೆ. ಅಂಚಾದ್ ಪಿಲ್ಚಂಡಿ ಬೊಕ್ಕ ಕಲ್ಕುಡನ ನೇಮ ಒಟ್ಟುಗಾಪುಂಡು. ಪಂಜುರ್ಲಿ, ಕಲ್ಲುರ್ಟಿ, ಪಿಲ್ಚಂಡಿ, ಕಲ್ಕುಡಗ್ ಅವ್ಲು ನೇಮ ಉಂಡು. ಪಿಲ್ಚಂಡಿ ದೈವ ಬಂಟಾಲದ ಬಡ್ಡಕಟ್ಟೆದಂಚಿದ ಮುಖ್ಯ ಪ್ರಾಣ ದೇವೆರೆ ಸಾನದುಲಯಿ ಪೋಯಿನಂಚಿನ ಪಿರಾಕ್ ಇಪ್ಪುನಿ ಬಂಟಾಲ ರಾಯರ ಚಾವಡಿದ ದೈವೊಗು. ಇಂಚಿಪ್ಪ ಆ ಕಿರಮ ಉಂತುದುಂಡ್. ರಾಯರ ಚಾವಡಿಡ್ ಜನವರಿ ಕಡೆತ ಶನಿವಾರದಾನಿ ಪಿಲ್ಚಂಡಿಗ್ ಮನದಾನಿ ಪಂಜುರ್ಲಿಗ್ ನೇಮ ನಡಪುಂಡು. ಬಡ್ಡಕಟ್ಟೆರ್ದ್ ಬಂಟಾಲ ಮುಟ್ಟ ಕಲ್ಲುರ್ಟಿ ನಿನ್ನನೇ ಕಾರ್ನಿಕಂದ್ ಬಡ್ಡಕಟ್ಟೆಡ್ ಪಂಜುರ್ಲಿ ನುಡಿ ಕೊರ್ಪೆ. ಬಂಟಾಲದ ಜೀಪುತ್ತಿಗೆರ್ದ್ ದುಂಬು ಟಿಪ್ಪುಸುಲ್ತಾನ್ ನ್ ದುಂಪೋಯೆರೆ ಕಲ್ಲುರ್ಟಿ ಮಾಯೆಡ್ ಬುಡಂದೆ ಆಯನ ಕುದುರೆನ್ಲ ದುಂಪೋಯೆರೆ ಬುಡ್ತುಜಲ್. ಮಹಲಿಂಗೇಸರ ದೇವೆರೆಗ್ ಸುದೆರ್ದ್ ಸೀರ್ತ ಕನನಗ ಅಂಚಿಂಚಿ ಉಂತುದ್ ರಕ್ಷಣೆ ಮಲ್ತುನ ದೇವೆರೆಗ್ ಟಿಪ್ಪು ಸುಲ್ತಾನ್ ಕೊರ್ತುನ ಪದಕ ಅವ್ಲುಂಡು. ರಾಯರೆ ಚಾವಡಿ, ಬಂಟಾಲೊಡು ಕಲ್ಲುರ್ಟಿ ಸೂತಲೆಕ. ಇನಿ ದೈವೊನು ನಮ ಮದತುದ್ ಏರ್ ಕಟ್ಟುದ್  ಅಬತಾರ ಕಟ್ಟುವೆನಾ ಅವು  ಕಲೆ ಕಾರ್ನಿಕದ ದೈವಂದ್ ನಮ ನಂಬುನಡೆ ಮುಟ್ಟ ಎತ್ತುದ. ಬಡ್ಡಕಟ್ಟೆದಲ್ಪ ಪಿಲ್ಚಂಡಿ ಬತ್ತುದ್(ಮಾರ್ಕೆಟ್ ದ ಕೈತಲ್) ಮಾರಿ ದೇರುನ ಕಿರಮ ಉಂಡು. ಮಾಯೆಡ್ ವೈದ್ಯನಾಥನ್ ಭೇಟಿಯಾಯೆರ್ಲಾ ಉಂಡು. ಸುದೆತ ಈಯರೆಡ್ ಯಾನ್ ತೂಪೆ(ಬಡ್ಡಕಟ್ಟೆ ಸಂಕದಲ್ತ್) ಅಂಚಿರ್ದ್ ಈರ್ ತೂಲೆಂದ್ ವೈದ್ಯನಾಥಗ್ ಪಿಲ್ಚಂಡಿ ಪನ್ಪುಂಡು. ಬಂಟಾಲ ಪೇಂಟೆಡ್ ಲೆಕ್ಕೆಸಿರಿ ಗಡುತ ದೈವ. ಬಡ್ಡಕಟ್ಟೆಗ್ ಮುಗಿಯುಂಡು. ವೈದ್ಯನಾಥ ಅರಸು, ಜುಮಾದಿ ಬಂಟೆ ಪೇಂಟೆದ ದೈವೊಲು. ಪೇಂಟೆ  ಸರ್ವೆರೆಡ್ಲಾ ಗಗ್ಗರ ದೆತೊನ್ವೆಂದ್ ಕಟ್ಟುನಾಯೆ ಪನ್ಪೆ. ಕಟ್ಟುನಕ್ಲೆಗ್ಲಾ ಪಂಜುರ್ಲಿಗ್ ಸಂದಿ ಪನಂದೆ ಕಟ್ಟುನಿ ತಪ್ಪುಂದು ಗೊತ್ತಿತ್ತುಂಡಲ ಮನಿತುಂಡ ದುಂಬುಗು ಚಾಕಿರಿ ತಿಕುಜಿಂದ್ ಮನಿಪಂದೆ ಕುಲ್ದೆರ್. ದೇವೆರೆಗ್ ಎಂಚ ಮಂತ್ರ ಪ್ರಧಾನನಾ ದೈವೊಗು ಸಂಧಿ ಆತೇ ಪ್ರಧಾನ. ನನ ದುಂಬುಗಾಂಡಲ ಅಣ್ಣಪ್ಪ ಸ್ವಾಮಿನ್ ಅಣ್ಣಪ್ಪ ಪಂಜುರ್ಲಿಯಾದ್ ಆರಾಧನೆ ಮಲ್ಪುಗ. ದೈವ ತಪ್ಪು ಮಲ್ಪಾಯೆರೆಂದೇ ಉಪ್ಪುನಿ. ಆಂಡ ನಮ ಸರಿ ಮಲ್ತೊಂದು ಪೋವೊಡು. ಅಣ್ಣಪ್ಪ ಪಂಜುರ್ಲಿ ಗಟ್ಟ ಜತ್ತ್ ದ್ ತುಳುನಾಡ್ ಡ್ ಎಂಚ ಪಸರಣೆ ಆಂಡ್ಂದ್ ತೆರಿಬೊಕ್ಕ ನನಾಂಡಲ ಆರಾದನೆನ್ ಪೊರ್ಲುಡೆ ನಡಪಾಗ.

            

  

  89 ವರ್ಸ ಪ್ರಾಯದ ಪಂಜುರ್ಲಿ ಮಾನಿ ದಾಮೋದರಜ್ಜೆರ್,ಈಸರಗೋಳಿ ಹೊಸಬೆಟ್ಟು

               ಪಂಜುರ್ಲಿ ದೈವದ ಮದಿಪು:-

ಧರ್ಮದೈವ ಪಂಜುರ್ಲಿ....ಉದಿಪು ನೇಸರ್ಗ್ ತರೆನ್ ತಗ್ಗಾದ್.. ಅಡ್ಡಿದೆವೆರೆಗ್ ಅಡ್ಡ ಬುರೊಂದು... ಗ್ರಾಮೊಡು ಗ್ರಾಮದ ದೇವೆರೆಗ್ ಬೆರಿನ್ ಬಗ್ಗಾದ್... ಗ್ರಾಮದ ಧರ್ಮದೈವೊಲೆಗ್ ಸರನು ಪಂಡೊಂದು.....ಬೊಲ್ಲಿಗಿರಿತ ಈಸರದೆವೆರೆ ಧರ್ಮ ಒರಿಪರೆ ಗಣಮಾನಿ ಆಯ. ಮಿತ್ತಮಿರಿಲೋಕೊರ್ದು ಜಪ್ಪುನಗ ವರಹ ಮೂರ್ತಿ ಆಯ. ಸೇಮೆಗಲ್ಲ್ ಜತ್ತ್ ದ್.. ಸೇಮೆಗಲ್ಲ ಪಂಜುರ್ಲಿ ಪನ್ಪವೊಂಡಾ. ಕುಪ್ಪೆಟ್ಟಿಬರ್ಕೆ ಜತ್ತ್ ದ್ ಕುಪ್ಪೆಟ್ಟಿ ಪಂಜುರ್ಲಿ ಪನ್ಪಾವೊಂಡ.ಸೀಮಾರಾಜ್ಯೊರ್ದು ಕುಡಮಪುರಕ್ ಬನ್ನಗ ಅಣ್ಣಪ್ಪ ಪಂಜುರ್ಲಿ  ಪನ್ಪವೊಂಡಾ.. ಅಲೆರಕಟ್ಟ ಜತ್ತೊಂಡಾ ಅಲೆರ ಪಂಜುರ್ಲಿ ಪನ್ಪಾವೊಂಡ.  ಬೂಡು ಬರ್ಕೆ ಜತ್ತೊಂಡಅಂಬಡಾಡಿ ಐಂದಾಲ ಪಟ್ಟ ಪತ್ತೊಂಡ. ಅರಸುದೈವ, ಪಟ್ಟದದೈವ ಪನ್ಪಾವೊಂಡ.. ಅರಸುದೈವಾದ್ ಮೆರೆಂಡ‌ ಯಾವಂದ್.. ಪತ್ತ್ ಕುಟುಮೊದ ಸಿರಿನ್ ಪತ್ತೊಂಡ. ಪತ್ತ್ ಕುಟುಮೊದ ಸಿರಿನ್ ಪತ್ತ್ ನ ಗಾ.. ನಿಕ್ಕ್ ತೊಜಿಂಡ್ ಬೆಪ್ಪುರಾಜ್ಯೊದ ತುಲುವ ಮನ್ನ್...ಗ್ರಾಮೊಗು ಬನ್ನಗ ಗ್ರಾಮದೇವೆರೆನ್ ಒಡಂಬಾಡಿಕೆ ಮಲ್ತೊಂಡ. ಗ್ರಾಮೊದರಾಜನ್ ದೈವೊಲೆಗ್ ನಿರುಪ್ಪ ದಿವೊಂಡ. ಆ ಪೊರ್ತುಗು ನಿಕ್ಕ್ ತೋಜಿಂಡ್ ಎಂಕ್ಲೆ ಪದ್ನಾಜಿ ಬರಿತ ಸಂಸಾರ. ಈ ಸಂಸಾರೊನು ಪತ್ತೊಡು, ಈ ಸಂಸಾರದ ಕಡೆಕನ್ನ ಕೊಡಿದುಕ್ಕೊನು ದೂರ ಮಲ್ಪರೆ  ಕುಟುಮೊದ ಧರ್ಮದೈವ ಪಂಜುರ್ಲಿ  ಆದ್ ಮೆರೆಯಾ....

ಪಾರಿ/ಮದು:-

ವಸಂತ್ ರಮ್ಯ. ಕಕ್ಯಪದವು

ಬರವುಗು ಸಕಾಯ - ಯನ್. ಕೆ. ಸಾಲ್ಯಾನ್ - ಪೆರಿಯ ದೈವ ನೇಮ‌ಕಟ್ಟುನಾರ್ ವಿಜಯ ಕುಮಾರ್ ಕಾಸರಗೋಡು - ಸಂದಿ ಪಾಡ್ದನ ಸಂಶೋದಕೆರ್ ದಯಾ ಪೂಜಾರಿ, ಹಿರಿಯಡ್ಕ

##################################################

ಪುಟ್ಟು ಸಾವು ದಾಂತಿ ಸತ್ಯ ಮಂತ್ರ ಜಾವದೆ

           ಪುಟ್ಟು ಸಾವು ದಾಂತಿ ಸತ್ಯ ಮಂತ್ರಜಾವದೆ

                 

.  

ಗಂಗು ಬೈದ್ಯೆದಿನ ಮಗೆ ಕರಿಯ ಕಾಂತು ಬೈದ್ಯನೊಟ್ಟುಗು ಅಪ್ಪೆ  ಮಂತ್ರಜಾವದೆ ಬತ್ತ್ ದ್ ನಿಲೆಯಾಯಿ ಸೂಂತ್ಲಾಡಿ ಬರ್ಕೆ 

ಜಾವದೆ ಪಂಡ ದಾದ ಪಿಂದೊನ್ಗ.ತುಳುನಾಡ್ ಡ್ ಕಣಂದೂರು ವೈದ್ಯನಾಥ ಸಾನೊಡು ಬಂಟಜಾವದೆ ಪನ್ಪಿ ದೈವದ ಆರಾದನೆ ಉಂಡು.ಅಂಚನೆ ನನೊಂಜಿ ಜಾವದೆ ಪುದರ್ ಸೇರ್ದ್ ಆರಾದನೆ ಪಡೆಯೊಂದಿಪ್ಪುನ  ದೈವ ಮಂತ್ರಜಾವದೆ.ಮೂಲು ಮಂತ್ರ ಬೊಕ್ಕ ಜಾವದೆ ಬೇತೆ ಬೇತೆ ಸವ್ದ ಆಂಡಲಾ ಒಟ್ಟು ಸೇರ್ನಗ ಮಂತ್ರಜಾವದೆ,ಸಿದ್ಧಿದ ದೈವ,ಸಿದ್ಧಿದ ಶಕ್ತಿಂದ್ ಅರ್ಥ ಬರ್ಪುಂಡು.ಜಾವದೆ ಪನ್ಪುನವು ತುಳು ಸವ್ದ ಆದಿತ್ತ್ ದ್ ಸತ್ಯ ಪನ್ಪಿ ಅರ್ಥಲ ಉಂಡು.ಮಂತ್ರಜಾವದೆ ಪಂಡ ಮಂತ್ರೊಗು ಉಂಡಾಯಿನ ಸತ್ಯಂದ್,ಶಕ್ತಿಂದ್,ಕಲೆಂದ್ ,ಕಾರ್ನಿಕಂದ್ ಲ ಪನೊಲಿ.ಸೂರ್ಯೆ ಕಂತಿ ಬೊಕ್ಕ ಪಂಡ ಮೂಜಂಜ ಪಂಡ ಜಾಮಂದ ಪೊರ್ತುಡು ನಡಿರ್ಲಾಪುನ ದುಂಬು ಆರಾದನೆ ಪಡೆಯುನ ದೈವ ಮಂತ್ರಜಾವದೆ.ಜಾವ ಪಂಡ ಮೂಜಂಜ ಇಜ್ಜಾ ಒಂಜಿ ಗಳಿಗೆನ್ ಸೇರ್ಸಾವುನ ಪೊರ್ತುಂದು ತೆರಿಯೊನೊಡು.ಆ ಜಾವೊನು ಕೂಡ್ಸಾನಗ ಉಂಡಾಯಿನ ಕಾರ್ನಿಕದ ಸಗ್ತಿ ಮಂತ್ರಜಾವದೆ.ಅಂಚಾದ್ ಜಾವೊಗು ಬೊಕ್ಕ ಜಾವದೆಗ್ ಒಂಜಿ ಸಮ್ಮಂದ ಇತ್ತ್ ಲೆಕ ತೋಜುಂಡು.ಎಚ್ಚಾದ್ ಮಂತ್ರಜಾವದೆನ ಕೋಲ ಮೂಜಂಜ ಕರಿದ್ ನಡೀರ್ಲ್ ಗ್ ದುಂಬು ನಡಪುಂಡು.ಮಂತ್ರಜಾವದೆ ಜಾವದೆನೇ ವಿನಃ ದೇವತೆಯತ್ತ್.ಕುಂಟಾಲ ತಂತ್ರಿಲೆ ದೇವತಾರಾದನೆದ ದೇವತೆಯಾಂಡ ಮಂತ್ರ ದೇವತೆ‌.ದೇವಾನು ದೆವತೆಲೆಡ್ ಇಂದ್ರೆ,ವಾಯು,ಅಗ್ನಿ,ವರುಣೆ ಮೊಕ್ಲು ದೇವಲೊಕದ ದೇವತೆಲು.ನಮ್ಮ ತುಳುನಾಡ ಕಟ್ಟಿಲ್ಲ್ ಜತ್ತಿ ಬಾಕಿಲ್ ಡ್ ಆರಾದನೆ ದೆತೊನುನ ಪೊಣ್ಣು ಬೂತೊಲು/ದೈವೊಲೆನ್ ಜಾವದೆಲ್ಂದೇ ಪನ್ಪ ವಿನಃ ದೇವತೆ ಪನೆರಿಜ್ಜಿ.ಕುಂಟಾಲ ಜಂತ್ರಿಲೆನ ಆರಾದನೆದ ದೈವ ಅಪ್ಪೆ ಮಂತ್ರಜಾವದೆ.ಅಂಚನೆ ಮದಿಪುನಕುಲು ಕುಂಟಾಲ ಮಂತ್ರಿಂದ್ ಪನ್ಪೆರ್.ಅವೇರ್ಂದ್ ನನಲ ತೆರಿಯಂದಿ ಇಚಾರ.ಕಲೆ ಕಾರ್ನಿಕದ ದೈವ ಜಪತ,ಸಿದ್ದಿದ ಸಗ್ತಿ ಪನ್ಪುನವು ಸತ್ಯ.ಪೊಣ್ಣು ಬೂತೊಲೆನ್ ಹಿರಿಯಾಕ್ಲ್ ಜಾವದೆಂದೇ ಪನೊಂತ್ ನಿ.ಅಪ್ಪೆ ಕಲ್ಲುರ್ಟಿನ್ಲಾ ಜಾವದೆಂದೇ ಪನೊಂತ್ ನಿ.ಜಮಿತ್ ನ ,ಜಪತ,ಸಿದ್ದಿದ,ಕುಂಟಾಲ ಜಂತ್ರಿಲೆನ ಆರಾದನೆದ ಸಗ್ತಿ ಜಾವದೆ,ಮಂತ್ರಜಾವದೆ.

ಇತ್ತೆ ಮಂತ್ರಜಾವದೆನ್,ಮಂತ್ರಪ್ಪೆ,ಮಂತ್ರಮೂರ್ತಿ,ಮಂತ್ರದೇವಿ,ಮಂತ್ರದೇವತೆ,ಕಾಳಿ,ಮಂತ್ರಸ್ಮಿತೆ,ಪಾರ್ವತಿ

ಈತ್ ಪುದರ್ ಡ್ ಲೆತ್ತೊಂದುಲ್ಲೆರ್.ಅಪ್ಪೇಂದ್ ಒಂಜಿ ಲೆಪ್ಪುಗು ಓಕೊನುನ ಮಂತ್ರಜಾವದೆ ಪಂಡಿ ಪಾತೆರ ದೊಂಡೆಡಾವೊಡಂಡ ಕಾರ್ನಿಕ ಮೆರೆಪಾವುನ  ಸಗ್ತಿ .ಸತ್ಯಜಾವದೆನ್ಲಾ ಇತ್ತೆ ಸತ್ಯದೇವತೆ ಪನೊಂದುಲ್ಲೆರ್.ಮಂತ್ರ ಜಾವದೆನ ಆರಾದನೆಡ್ ರಾವು ಮಂತ್ರಜಾವದೆ,ಸನ್ಯಾಸಿ ಮಂತ್ರ ಜಾವದೆ,ಮಂತ್ರಜಾವದೆ ಇಂಚ ಮೂಜಿ ರೀತಿಡ್ ಆರಾದನೆ ಇತ್ತ್ ದ್ ಮಂತ್ರಜಾವದೆನ ಆರಾದನೆ ತುಳುನಾಡೊರ್ಮೆ ಪುಗಾರ್ತೆ ಪಡೆದುಂಡು.

    

ತೂಂಕನದ ಉಯ್ಯಾಲೆಡ್ ಮಂತ್ರ ಜಾವದೆ.ಅಂಚಿಂಚಿ ಚೌರಿ ಬೀಜಾವುನಿ

(ಪೊಸತಾದ್ ಬೈದಿ ಕೆರಮ)

‌    ‌‌‌‌‌. ತುಳುನಾಡ ದೈವಾರಾಧನೆಡ್ ಪೊಣ್ಣ ಸಗ್ತಿದ ಒರುತ, ಪುಟ್ಟು ಸಾವು ದಾಂತಿ ಅಪರೂಪದ ಸಗ್ತಿ ಸತ್ಯ ಮಂತ್ರಜಾವದೆ ಪಂಡ ತಪ್ಪಾವಂದ್. ಬಂಜಿಡ್ ಜನನ ಆವಂದೆ, ಬೆರಿಟ್ ಮರಣ ತೂವಂದಿ ಸತ್ಯ ಮಹಾತ್ಮೆದ ಕಲೆ ಸತ್ಯ ಮಂತ್ರಜಾವದೆ. ತುಳುನಾಡ ಎಚ್ಚಿನ ಜಾಗೆಲೆಡ್ ಇಲ್ಲದೆಚ್ಚಿಡ್ ಕೋಲ ನೇಮ ಗೆತೊನುನ ಮಂತ್ರ ಸಗ್ತಿದ ಮಂತ್ರಜಾವದೆಗ್ ರಾಜಂದೈವ ಜುಮಾದಿ ಬಂಟನ ಆರಾಧನೆ ಉಪ್ಪುನ ಪಾಲ್ತಾಜೆ ದಿ|| ದೇವರಾಜೆರ್ನ ಧರ್ಮ ಚಾವಡಿಡ್ ಆರಾಧನೆ ನಡತೊಂದುಂಡು. ಕಲ್ಕುಡ ಕಲ್ಲುರ್ಟಿಗ್ ಗ್ರಾಮದೈವ, ರಾಜಂದೈವ ಒರುತ ಆರಾಧನೆ ಕೆಲವು ಜಾಗೆಲೆಡ್ ಇತ್ತ್ಂಡಲ ಮಂತ್ರಜಾವದೆಗ್ ಅಂಚಿನ ಆರಾಧನೆ ಕಡಿಮೆ. ಮೂಡಾಯಿಡ್ ಮಂತ್ರಜಾವದೆನ ಆರಾಧನೆ ಬೋಡಾಯಿನಾತ್ ಇತ್ತುದ್, ಪಡ್ಡಾಯಿಡ್ ಇತ್ತಿತ್ತೆ ಮಂತ್ರಜಾವದೆಗ್ ಆರಾಧನೆ ಜಾಸ್ತಿ ಆವೊಂದುಂಡು. ಇಂಚಿಪ್ಪ ಬತ್ತಿನವು ಮಂತ್ರಜಾವದೆನ ಆರಾಧನೆ ಪಂದ್ ಕೆಲವೆರ್ ಪಂಡೆರ್ಡ, ಸುಮಾರ್ ನಾಲ್ನೂದು -  ಐನೂದು ವರ್ಸ ಪಿರಾಕ್ ಡೇ ಮೂಡಾಯಿ ತುಳುನಾಡ ಭಾಗ ಬೆದ್ರದ ಸೂಂತ್ಲಾಡಿ ಬರ್ಕೆ, ಕಟ್ಟೆಮಾರ್ ಜನನೊಗು ಮಂತ್ರಜಾವದೆ  ಬತ್ತಿಪ್ಪೊಡುಂದು ಪೆರಿಯ ತರೆಕುಲು ಪನ್ಪೆರ್. ಮಂತ್ರಜಾವದೆ ಆಪುನ ದುಂಬು ದಿಂಡು ದೇರಬೈದ್ಯೆರೆಗ್ ಜೋಗಿ ಸನ್ಯಾಸಿ ಕೊರ್ಪುನ ಸಗ್ತಿನ್ ಆರ್ ತೂಕತ್ತೇರಿ/ಸೂಕತ್ತೇರಿ ಆದ್ ನಂಬುವೆರ್. ಆ ಕಾಲೊಡು ಪಣವು ದ ಇಚಾರ ಬರ್ಪುನೆನ್ ತೂಂಡ, ಪಣವು ಸಬ್ದೊನು ವಾ ಕಾಲ ಘಟ್ಟೊಡು ಗಳಸೊಂದಿತ್ತೆರ್ ತೆರಿಂಡ, ಮಂತ್ರಜಾವದೆ ತುಳುನಾಡ ಮೂಡಾಯಿಗ್ ಕಟ್ಟೆಮಾರ್, ಸೂಂತ್ಲಾಡಿ ಬರ್ಕೆಗ್ ಬತ್ತಿನ ಇಚಾರ ತೆರಿಯು. ಒಂಜಿ ಕುಜಲ್ ನ್ ಏಳ್ ತಿಗ್ ತೆ ಮಲ್ತಿ ದೈವ ಮಂತ್ರಜಾವದೆ  ಪಂಡ ಮಂತ್ರ ಸಗ್ತಿ ದೈವದ ಬಿಲೆ ನಂಕ್ ಗೊತ್ತಾವು. ಕೆಲವೆರ್ ಮಂತ್ರ ಜಾವದೆ ಕಲ್ಲುರ್ಟಿನ ನನೊಂಜಿ ರೂಪ ತೂಕತ್ತೇರಿ ಪನ್ಪೆರ್, ತೂಕತ್ತೆರಿನ ಕುಡೊಂಜಿ ರೂಪ ಮಂತ್ರಜಾವದೆ ಪನ್ಪೆರ್. ಪಟ್ಟಂದಿಲ್ಲಗ್(ಬಟ್ಟೆಣಿದಿಲ್ಲ್) ಕಲ್ಲುರ್ಟಿ ಬೇತೊಂಜಿ ರೂಪೊಡು ಬೈದ್ ನಿಂದ್ ಕಾಲಾನುಬಾಗೊಡು ಅವು ತೂಕತ್ತೇರಿ ಪುದರ್ಡ್ ದುಂಬುಗು ಮಂತ್ರಜಾವದೆಯಾದ್ ಪುಗಾರ್ತೆ ಪಡೆಯುನಿ . ಈ ಇಚಾರೊಡು ಮಂತ್ರಜಾವದೆನ ಕತೆ ತೆರಿಪಾನಗ ದುಂಬುಗು ತೆರಿಪಾವೆ. ಮಧ್ಯಸ್ಥೆರ್ನಕುಲು, ಮುಕ್ಕಾಲ್ದಿನಕುಲು ಕುಂಟಾಲ ಜಂತ್ರಿ/ಕುಂಟಾಲ ತಂತ್ರಿನಲ್ತ್ ಮಂತ್ರ ಜಾವದೆನ ಪುಟ್ಟು ಪುರಪುನು ಸುರು ಮಲ್ತೊಂದು ಪೋಯೆರ್ಡ ಅವೆರ್ದ್ ದುಂಬುದ ಮಂತ್ರಜಾವದೆನ ಮೂಲ ಎಚ್ಚಿನ ಕಟ್ಟುನಕ್ಲೆಗ್ ಆವಡ್, ಮದ್ಯಸ್ಥೆರೆಗಾವಡ್ ತೆರಿಯಂದಿನೆಡ್ದಾತ್ರ ಆ ಇಚಾರೊನು ಬಾರೀ ಹಿರಿಯಾಕ್ಲೆಡ ಪಿಂದೊಂದು ಪ್ರಾಮಾಣಿಕವಾದ್ ಪನ್ಪುನ ಬೇಲೆ ಮಲ್ತ್ ದೆ. ಮದಿಪುದಕುಲು ಪಾರಿ ಪನ್ನಗ ಪುರಾಣ ಸೇರಾದ್ ದೈವೊಗು ಪನ್ಪೆರತ್ತಂದೆ ಅಷ್ಟ ಪಾದ ಪತೊನ್ಲಂದ್ ಪನ್ಪೆರ್.ವಾ ಕಾರಣೊಗ್ಲಾ ಅಪಾರ್ಥ ಬರ್ಪುನ‌ ಸವ್ದೊನು ಕಲೊಟು ಪಂಡಿಜೆರ್ಡ ಅವ್ವೆ ದೈವೊಗು ಅಕುಲು ಕೊರ್ಪುನ ಮಾನಾದಿಗೆ. ಮಧ್ಯಸ್ಥೆರ್ ನೇಮದ ಕಲೊಟು ಕಪಟೊಗು ಕಲ್ಲುರ್ಟಿ,ಮಾಯೊಗು ಮಯ್ಯೊಂತಿ, ಮಾಟೊಗು ಮಂತ್ರಜಾವದೆಂದ್ ಪಂಡುದ್ ಇನಿ ಮಂತ್ರ ಜಾವದೆ, ಕಲ್ಲುರ್ಟಿ ಮೆಗ್ದಿ- ಪಲಿಂದ್ ಪನ್ರೆ ಸುರು ಮಲ್ದೆರ್. ಮಂತ್ರಜಾವದೆನ್ ಕಲ್ಲುರ್ಟಿನ ಒಂಜಿ ಅಂಶಂದ್ ಪಂಡ ಮಂತ್ರ ತಂತ್ರದ ಸಗ್ತಿದ ಒರುಟು ಜುಮಾದಿನ ಒಂಜಿ ಅಂಶ ಪಂದ್ ಲಾ ಕೆಲವೆರ್ ಪನ್ಪೆರ್.ಕೆಲವೆರ್ ಲೆಕ್ಕೆಸಿರಿನ್ ಜಮಿತ್ ದ್ ಮಂತ್ರಜಾವದೆನೊರುಟು ಆರಾದನೆ ಬತ್ತ್ಂಡ್ಂದ್ ಲ ಪನ್ಪೆರ್. 

  ಮಂತ್ರ ಜಾವದೆನ್ ಮೂಲೊಡು ಬೇತೆ ಒರುಟು ನಂಬಿನ ದಿಂಡು ದೇರೆಬೈದ್ಯೆರೆಗ್ ಐನ್ ಜನ ಮರ್ಮಲಲ್ಲು. ಅಂಚನೆ ಲೆಕ್ಕೆಸಿರಿನ ಬಾಳೊಳಿನಕ್ಲೆನ ಕತೆಟ್ಲಾ ಐನ್ ಜನ ಮರ್ಮಲಲ್ಲೆನ ಇಚಾರ ಬರ್ಪುಂಡು. ತುಳುನಾಡ ಕೇರಳ ಪುತ್ತೂರ ಕೊಟ್ಯ, ಕುಂಬ್ಳೆ ಸೀಮೆಗ್ ಪೋಯಿನ ಜುಮಾದಿ ಕುಡ ತುಳುನಾಡುಗ್  ಬತ್ತಿನವು ನಮಕ್ ತೆರಿನ ಇಚಾರ.  ಅಂಚನೆ ತುಳುನಾಡ ಮೂಡಾಯಿ ಘಟ್ಟದ ಮುದೆಲ್ದ ನಾರಾವಿ ಈದು ಪಟ್ಟಂದಿಲ್ಲ್/ ಬಟ್ಟೆಣಿದಿಲ್ಲ್ ಪಾಲಡ್ಕ ಬರ್ಕೆಡ್ದ್ ದೈವ ಜತ್ತ್ ಪೋದು, ಉಬಾರ ಪೆರವುಲ್ಲ ದೇಸೊಗು ಪೋದು, ಮೂರ್ತೆ ಮಲ್ತೊಂತಿ ದಿಂಡು ದೇರೆ ಬೈದ್ಯೆರೆಗ್ ಒರಿ ಸನ್ಯಾಸಿಡ್ದ್ ತಿಕ್ಕಿನ ಸಗ್ತಿ ಉಂದು,ಆ ಸಗ್ತಿನ್ ಕೇರಳ ತುಳುನಾಡ ಗಡಿ ಬಾಗೊಡು ಬದ್ ಕೊಂತಿ ಅರೆನ ಸಮ್ಮಲೆ ಪಂಜಾಜೆ ಪದ್ದೊಂಞಿ / ಬದ್ದುಂ‌‌‍‌‌‌‌ಞಿ ಬೈದ್ಯೆರ್ ಮಂತ್ರ ಸಗ್ತಿಡ್ ಒಯ್ತೊನುವೆರ್, ಬದ್ದುಂಞಿ ಬೈದ್ಯೆರೆ ಪಾಸಾಡಿ ಕುಂಟಾಲ ಜಂತ್ರಿ ಬದ್ದುಂಞಿ ಬೈದ್ಯೆರೆಡ್ದ್ ಆ ಮಂತ್ರ ಸಗ್ತಿನ್ ಒಯ್ತೊನುವೆರ್. ಅಂಚನೆ ಸೂಂತ್ಲಾಡಿ ಕಾಂತು ಪೂಜಾರಿ ದೈವೊಗು ಬೋಡಾದ್ ನನಿಕೆ ಬದ್ದುಂಞಿ ಬೈದ್ಯಡ ಸಾದಿ ಕೇಂದ್ ಅಕುಲು ಇರ್ವೆರ್ಲ ದೈವೊನು ಕನಯೆರೆ ಕುಂಟಾಲ ಜಂತ್ರಿನಡೆ ಒಟ್ಟುಗು ಪೋಪೆರ್.  ಕುಂಟಾಲ ಜಂತ್ರಿಲು ಬದ್ದುಂಞಿ ಬೈದ್ಯೆರೆ ನನಿಕೆ ಕರಿಯ ಕಾಂತು ಬೈದ್ಯೆರೆಗ್ ತಾರಾಯಿಡ್ ಮಂತ್ರ ಸಗ್ತಿನ್  ಮಂತಿರ್ತ್ ದ್ ಕೊರ್ದು  ಆ ಸಗ್ತಿ ಮಂತ್ರಜಾವದೆ ಆದ್ ತುಳುನಾಡ ಮೂಡಾಯಿ ಸೂಂತ್ಲಾಡಿ ಬರ್ಕೆಗ್ ಬರ್ಪುಂಡು. ಅಂಚಾದ್ ಇರ್ವೆರ್ ಒಟ್ಟುಗು ಕನತ್ ನ ದೈವದ ಸಗ್ತಿ  ರಡ್ಡ್ ಕಡೆಟ್ಲಾ ಕಾರ್ನಿಕ ದಿಂಜಿದುಂಡು.ಪಟ್ಟಂದಿಲ್ಲಲ್ ತಾರಾಯಿಡ್ ಕೊಂಬು ಬತ್ತ್ ದ್ ಕಾರ್ನಿಕದ ಇಲ್ಲಾದ್ ಮೆರೆಯೊಂದುಂಡು.ಜುಮಾದಿನ್ ಜೋಗಿ ಸನ್ಯಾಸಿಲು(ಪುರುಷ ಪಾಲನೆದ ದೈವ ಜುಮಾದಿ) ಮರ್ದ ಬೈದ್ಯೆ ಪಾಂಡಿ ಬೈದ್ಯಗ್ ಕೊರ್ಲೆಕನೆ ,ಕುಂಟಾಲ ಜಂತ್ರಿ ಕರಿಯ ಕಾಂತು ಬೈದ್ಯೆರೆಗ್ ಮಂತ್ರ ಜಾವದೆನ್ ಕೊರ್ನ ಇಚಾರ ತೆರಿಪುಂಡು. ರಡ್ಡ್ ಲ ಮಾಂತ್ರಿಕ, ತಾಂತ್ರಿಕ ಸಿದ್ಧಿಯಾದೇ ಬೈದ್ಯೆರೆಗ್ ತಿಕ್ಕಿನ ಇಚಾರ ತೆರಿಯುಂಡು.

   
ಸತ್ಯ ಮಂತ್ರಜಾವದೆನ್ ಅಪ್ಪೆಂದ್ ಸಂಪೂರ್ಣ ಶರಣಾಗತಿಡ್ ನಂಬಿನಕ್ಲೆಗ್ ಆಲ್ ಖಂಡಿತ ಕೈ ಬುಡ್ತಿಜಲ್. ಮಂತ್ರಜಾವದೆನ್ ಮಾಟ ಮಂತ್ರೊಗು, ಮಾಟ ಮಂತ್ರ ಕಳೆಯೆರೆಂದ್ ನಂಬುವೆರುಂದ್ ಪನಂದೆ ಮನಭಕ್ತಿಡ್ ಅಲೆನ್ ಆರಾಧನೆ ಮಲ್ತಿನಕ್ಲೆನ್ ಆಲ್ ಏಪೊಲ ಕೈ ಬುಡ್ತುಜಲ್, ಕೈ ಬುಡ್ಪುಜಲ್. ತರೆಕ್ ಮೈಕ್ ಮೀದ್ ಅಲೆನ ಮಣೆ ಮಂಚವುಡ್ ಕೇಪುಳ ಪೂ, ಕೂಚಿ ನೀರ್, ತುಡರ್ ದೀದ್ ನಿಚ್ಚ ನೆಂಪುನಕ್ಲೆನ್ ಏಪೊಲಾ ಕೈ ಬುಡ್ತುಜಲ್. ಪಾತೆರ ತತ್ತುಂಡ ಕಟ್ಟುನಕ್ಲೆನ್ಲಾ ಪೊಳಿಪಂದೆ ಬುಡಯಲ್. ಕಲ್ಲುರ್ಟಿ ಬೊಕ್ಕ ಮಂತ್ರಜಾವದೆನ್ ಇಲ್ಲದೆಚ್ಚಿಡ್ ಬೇತೆ ಬೇತೆ ಮಣೆ ಮಂಚವುಡ್ ನಂಬುದು, ಅನುಕೂಲ ಶಾಸ್ತ್ರಂದ್  ಕಲ್ಲುರ್ಟಿ ಬೊಕ್ಕ ಮಂತ್ರ ಜಾವದೆನ್ ಒಂಜೆಂದ್ ಒಟ್ಟೊಟಿಗೆ ಕೋಲ ಮಲ್ಪುನ ಸರಿಯತ್ತ್, ಕಲ್ಲುರ್ಟಿಯೇ ಬೇತೆ ಮಂತ್ರಜಾವದೆನೇ ಬೇತೆ.ಕಲ್ಲುರ್ಟಿ ಮಾನವ ಸಹಜ ಅಪ್ಪೆ ಬಂಜಿಡ್ ಬತ್ತ್ ನ ಮಗಳಾದ್ ಕಾರ್ನಿಕ ಮೆರೆದ್ ಕಾಯ ಬುಡ್ದು ಮಾಯೆದ ನಿಲೆಟ್ ಉಂತ್ಯಲ್ಡ ಮಂತ್ರಜಾವದೆನ ಪುಟ್ಟುದ ಕಡೆಮುದೆಲ್ ಲಪ್ಪೆರೆ ಸಾದ್ಯ ಇಜ್ಜಿ. ಕಲ್ಲುರ್ಟಿ ಬೊಕ್ಕ ಪಂಜುರ್ಲಿಗ್ ಒಟ್ಟೊಟ್ಟಿಗೆ ಕೋಲ ನಡಪುಂಡು. ರಾಯೆರೆ ಚಾವಡಿ ಬಂಟಾಲೊಡ್ದು ಬೊಕ್ಕ ಕಲ್ಲುರ್ಟಿ - ಪಂಜುರ್ಲಿನ ಆರಾಧನೆ ಒಟ್ಟುಗು ಸುರಾಯಿನಿ. ಮಂತ್ರಜಾವದೆಗ್ ಕಟ್ಟುನಕುಲು ಕಲೊಟ್ಟು ಕೋಲೊಡು ಪಲ್ದಿ ಕಲ್ಲುರ್ಟಿ ನ್ಯಾಯ ತೀರ್ಮಾನ ಮಲ್ಪುವಲ್ ಪನ್ಪೆರ್, ಆಂಡ ಕಲ್ಲುರ್ಟಿ ಪಂಜುರ್ಲಿನ ಆರಾಧನೆ ಒಟ್ಟುಗಿತ್ತುದ್ ಕುಟುಮದ ಪಂಜುರ್ಲಿ ನ್ಯಾಯ ತೀರ್ಮಾನ ಮಲ್ಪುವೆ.ಕುಟುಮದ ಕುಲೆ ಬುಡ್ಪಾವುನ ಅಧಿಕಾರಲಾ ಆಯಗೇ ಉಪ್ಪುನಿ.ಪ್ರಾಣಿ ಮೂಲದ ದೈವೊಲೆನ್ ನಮ ಆಣಾದ್ಲ, ಪೊಣ್ಣಾದ್ಲ  ತೂವೆರೆ ಸಾಧ್ಯ. ಪಂಜುರ್ಲಿ, ಲೆಕ್ಕೆಸಿರಿ, ಪಿಲ್ಚಂಡಿ  ಈ ಮೂಜಿ ಸಗ್ತಿಲೆನ್ ಆಣ್ ಬೊಕ್ಕ ಪೊಣ್ಣು ಆದ್ಲ  ಆರಾಧನೆ ಮಲ್ತೆರ್ಡ ಮೈಸಂದಾಯನ್ ಆಣನ ಒರುಟೇ ಆರಾಧನೆ ಮಲ್ಪುನಿ. ಕೇರಳ ಬಾಗೊಡು ಅಪ್ಪೆ ಪಂಜುರ್ಲಿಂದ್ ಆರಾಧನೆ ಮಲ್ಪುವೆರ್. ಪೊಣ್ಣಾವತಾರದ ಪಂಜುರ್ಲಿ, ಪಿಲ್ಚಂಡಿಗ್ ಉಗ್ರ ಜಾಸ್ತಿ. ವಿಷ್ಣುಮೂರ್ತಿನ್ಲಾ ಬೊಕ್ಕ  ಚಾವುಂಡಿನ್ಲಾ  ಪಿಲ್ಚಂಡಿನ ಒರುಂದು ಪಂಡೆರ್ಡ, ಲೆಕ್ಕೆಸಿರಿಕ್ಲಾ ಪಿಲ್ಚಂಡಿಗ್ಲಾ ಒಂಜೇ ರೀತಿದ ಆರಾಧನೆದ ಒರುತ ಸಮ್ಮಂದೊಲೆನ್ ತೆರಿಪಾವೆರ್. ನಮ ಇನಿ ಒಟ್ಟಾರೆಯಾದ್ ದೈವಾರಾಧನೆನ್ ಅಡಿಮೆಲ್ ಮಲ್ತಿನೆರ್ದಾದ್ ತುಳುನಾಡುಗ್ಲಾ ಗಂಡಾಂತರ ಬರೊಂದುಂಡು. ಆಸುರೀ ಕಿರಿಯದ ದೈವೊಲೆಗ್ ಅಮುರ್ತ, ಅಗೆಲ್ ದಾವಾರ ಕೊರಂದೆ ಬಾಯಿ ಕಟ್ಟಾಯಿನೆಡ್ದಾದ್ ನಮ್ಮ ತುಳುನಾಡುಗ್ಲಾ  ತೊಂದರೆಯಾವೊಂದುಂಡು. ಸತ್ಯ ಚಿತ್ತೊಲೆನ್ ನಂಬುದು ದೂರದ ರಾಜ್ಯ, ದೇಸೊಡು ಬೆನೊಂದಿಪ್ಪುನಕುಲ್ಲಾ  ಕಣನೀರ್  ಪಾಡುಲೆಕಾಂಡ್. ನನ ದುಂಬುಗಾಂಡಲಾ  ಮೂಲ ಸಾಂಪ್ರದಾಯಿಕ ಪದಿನಾಜಿ ಕಟ್ಲೆದ ನೇಮ ನೆರಿ ತುಳುನಾಡುಡ್ ತೂಯೆರೆ ತುಳುವೆರ್ ಅವಕಾಶ ಮಲ್ತ್ ಕೊರೊಡು.

ಮಲ್ಲ ಮಲ್ಲ ಚಾವಡಿ, ತರೆ ತರವಾಡ್ ದಕುಲು ರಾಜಂದೈವ ಜುಮಾದಿನ ಆರಾಧನೆ ಮಲ್ತೊಂದು ಬತ್ತೆರ್ಡ, ಪಾಪದ ಕುಟುಮದಕುಲು ಮಂತ್ರಜಾವದೆನ್ ಇಲ್ಲದೆಚ್ಚಿಡ್ ನಂಬೊಂದು ಬತ್ತೆರ್. ನಂಬಿನಾಕ್ಲೆನ್ ಆಲ್ ಕೈ ಬುಡ್ತುಜಲ್. ಇನಿ ಕೆಲವು ಪಾರಿ ಪನ್ಪುನಕುಲ್ ಕುಂಟಾಲ ಜಂತ್ರಿ, ಕುಂಟಾಲ ತಂತ್ರಿನ್ಲಾ ಬುಡ್ದು  ಕುಂಟಾಲ ಮಂತ್ರಿಂದ್ ಪನೊಂದುಲ್ಲೆರ್. ಒವ್ವೆ ಒಂಜಿ ದೈವದ ಒಂಜಿ ಕತೆ ಒಂಜಿ ಕಾಲೊಡು ಪುಟ್ಟುದು, ತರೆರ್ದ್ ತರೆ ಬಾಯಿರ್ದ್ ಬಾಯಿ ಬನ್ನಗ ಒಂತೆ ಎತ್ತೇಸೊ ಅವೊಂದೇ ಪೋತುಂಡು.ಲಿಖಿತ ಆದಾರೊಲು ಇಂಚಿಪ್ಪ ಬತ್ತ್ ನೆರ್ದಾದ್ ಆಜಿನೂದು ಏಳ್ನೂದು ವರ್ಸದ ದುಂಬುದ ಪನ್ನಗ ಏತೋ ಎತ್ತೇಸೊಲು ಆದಿಪ್ಪು. ಕುಂಟಾಲ ಮಂತ್ರಿ ಮಂತ್ ನ ಕಟ್ಟ್ಂದ್ ಪಂಡ ಅವೆಕ್ ಅರ್ಥ ಇಜ್ಜಿ. ಕುಂಟಾಲ ಜಂತ್ರಿಯೇ ಕರಿಯ ಕಾಂತು ಬೈದ್ಯಗ್ ತಾರಯಿದ ಒರುಟು ಮಂತಿರ್ತ್ ದ್  ಮಂತ್ರಜಾವದೆನ್ ಕೊರ್ಪುನಿ. ಮಂತ್ರಜಾವದೆನ ಬಗೆಟ್ ಪರವಾದ್ ಬೊಕ್ಕ  ತೆರಿಯಂದೆ ಗೇನದ ಕೊರತೆಡ್ ಕೆಲವು ತಪ್ಪು ಅಭಿಪ್ರಾಯಲಾ ತೂಯರೆ ತಿಕ್ಕುವ. ಕೆಲವೆರ್ ಬಾರಿ ಪಿರಾಕ್ ಮಂತ್ರಜಾವದೆಗ್ ಇಜ್ಜಿ ಪಂಡ ಕೆಲವೆರ್ ಕಲ್ಲುರ್ಟಿನ ನನೊಂಜಿ ರೂಪ ಮಂತ್ರಜಾವದೆಂದ್ ಪನೊಂದುಲ್ಲೆರ್. ಮಂತ್ರಜಾವದೆನ ಕಟ್ಲೆಗ್ಲಾ, ಕಲ್ಲುರ್ಟಿನ ಕಟ್ಲೆಗ್ಲಾ ಬಾರ್ಯಾತ್ ಎತ್ತೆಸೊಲುಲ್ಲ. ಕೆಲವು ಪಾರಿ ಪಂಡಿತೆರ್ ಪೊರ್ಲುಗು ಪೊಸ ಭೂತ , ಮಾಯೊಗು ಮಯ್ಯೊಂತಿ, ಮಾಟೊಗು ಮಂತ್ರದೇವತೆ, ಸತ್ಯೊಗು ಸತ್ಯದೇವತೆ, ಕಪಟೊಗು ಕಲ್ಲುರ್ಟಿ, ಮಂತ್ರೊಗು ಮಂತ್ರಜಾವದೆ, ಒರ್ತ್ಂಡ ವರ್ತೇಶ್ವರಿಂದ್ ಮಧು ಪನ್ಪುನೊಟ್ಟುಗು ತುಳುನಾಡುಗ್ ಕಪ್ಪು ಮೋನೆನ್ ಧಾರಣೆ ಮಲ್ತ್ ಬೈದ್ ನ ಮಾಯಾ ಸತ್ಮ ಮಹಾತ್ಮೆ ದ ಕಲೆ ಪಂದ್ ಪನ್ಪೆರ್. ಈ ಪುರಪು ವರ್ಣನೆಲು ದಾಯೆಗ್ ಪಂದ್ ಅರ್ಥ ಆಪುಜಿ. ಸರಿಯಾದ್ ನಮ ಕಲೊನು ತೂಂಡ ಕಟ್ಟುನಕುಲ್  ಸುರುಕು ಗಂಗೆ ಮೀದ್ ಕಲೊಟು ತೆಂಬರೆ  ಬೊಟ್ಟೊಂದು ಸುರುಕು ದೈವದ ಬೀರ ಪನ್ಪೆರ್. ರಡ್ಡನೇ ಸರ್ತಿ, ಶೈವಾರಾಧನೆದ, ಭೂತಾರಾಧನೆದ ದೈವೊಲಾಯಿನೆರ್ದಾತ್ರ ಮಾದೇವೆರೆಗ್ ಕಾನಿಗೆ ದೀನಗ ತೆಂಬರೆ ಬೊಟ್ಟೊಂದು ದೈವದ ಸಂದಿ ಪನ್ಪೆರ್. ಮೂಜನೇ ಸರ್ತಿ ಕದಿರೆ ಮುಡಿ ಏರ್ನಗ ದೈವದ ಸಂದಿ ಪಾಡ್ದನೊಡು ದೈವದ ಇಚಾರ ಪನ್ಪೆರ್. ಇಡೀ ದೈವದ ಕಥೆ ಈ ಮೂಜಿ ರೀತಿಡ್ ತೆರಿಬೊಕ್ಕ ಕುಡ ಅರ್ಧರ್ಧ ಗಂಟೆ ಪಾರಿನ್ ನಾಲನೆದಾದ್ ದೈವೊಗು ಪನ್ಪುನ ಅಗತ್ಯ ಉಂಡಾ ಪನ್ಪುನೆನ್ ಯೋಚನೆ ಮಲ್ಪೊಡು. ದೈವೊಗು ತನ್ನ ಉದಿಪು, ಪಸರಣೆ, ಉಟ್ಟುಕಟ್ಟ್, ಪೂರ ತೆರಿದಿಪ್ಪುನಗ ಇಲ್ಲದಕ್ಲು ಬಾರ್ಯಾತ್ ಪಣವು ಕೊರ್ಪೆರುಂದ್ ದೈವದ ಕಥೆಕ್ ಪುರಾಣ ಸೇರಾದ್ ದೇವೆರೆ ಕಾರ್ ಪತ್ತೊನ್ಲಾ, ಅರಸುಲೆ ಕಾರ್ ಪತ್ತೊನ್ಲಾ, ಗ್ರಾಮ ದೈವದ ಕಾರ್ ಪತ್ತೊನ್ಲಾಂದ್ ದಾಯೆ ಪೊಕ್ಕಡೆ ಪನೊಂದು ಪೋವೊಡು.ತುಳುನಾಡ ದೈವೊಲು ಈ ಮಣ್ಣ್ ದ ಸ್ವತಂತ್ರ ಸಗ್ತಿಲು.ಅವು ಏರ್ನ‌ ಚಾಕಿರಿ ಮಾನಿಲತ್ತ್. ದೈವದೆದುರು ಪತ್ತೆಸಲ್ ಪೂವರಿ ಪತೊಂದು, ಇರಿಯಾಕ್ಲ್ ಮದಿತೆರ್ಡ ನಡೆನೇ ನಡಾವಳಿಯಾದ್ ದೈವ ಎಚ್ಚಿಡ್ ಬರೊಡು. ಮಂತ್ರಜಾವಾದೆಗ್, ಕಲ್ಲುರ್ಟಿಗ್ ಪೂರ ಭ್ರಮರಾಂಭಿಕೆ, ಮೂಕಾಂಭಿಕೆ, ಪಾರ್ವತಿ, ದ್ರೌಪದಿಂದ್ ಪೊಕ್ಕಡೆ ದಾದ ದಾದ ಪಂಡುದ್, ನಾಲ್ ಚಾಕಿರಿ ಜಾಸ್ತಿ ತಿಕ್ಕುಂಡುಂದ್ ಇಂಚ ಪಂಡೆರ್ಡ, ಮಲ್ಪಾಯಿನಕ್ಲೆಗ್ಲಾ ದೋಸ, ಪನ್ನಕ್ಲೆಗ್ಲಾ ದೋಸ. ದೈವದ  ಕಲೊಟು ದೈವೊಗು ಚಾಕಿರಿಗಿಂದ್ ಪಡಿಯರಿ ಪತ್ತುದ್ ಮಧ್ಯಸ್ಥೆರ್ ಪಂಡೆರುಂದ್ ಯಾನ್ ಚಾಮುಂಡೇಶ್ವರಿ, ಯಾನ್ ದುರ್ಗಾಪರಮೇಶ್ವರಿಂದ್  ಕಟ್ಟುನಕ್ಲು ಪಂಡೆರ್ಡ ಪತ್ತಿ ಪಡಿಯರಿತ ನುಪ್ಪು ಮೈಕ್ ಪತ್ತುವಾ? ಅಂಚಾದ್ ದೈವ ನಂಕ್ ದಾಲ ಮಲ್ಪುಜಿಂದ್ ಮೇಲ್ ದೃಷ್ಟಿಗ್ ತೋಜಿಂಡಲ ದೋಷ  ತರೆತರವಾಡ್ ಗ್ ದುಂಬೊತ್ತೊಂದು ಪೋಪುಂಡು. ದೈವದ  ಕಲೊಕ್ ನಮ ಪೋನಗಲ ಸುದ್ದೊಡು ಚಲ್ಲಣ(ಪ್ಯಾಂಟ್) ಪಾಡಂದೆ,  ಬೊಲ್ದು ದುತ್ತೈತೊಡು(ಮುಂಡು ವೇಷ್ಟಿಡ್) ಪೋವೊಡು. ದೈವ ದೇವೆರೆ ಬೇಟಿಗ್ ಪಂದ್ ತೊಲಚಿ ಕಟ್ಟೆಗ್ ಪೋದು ಸುತ್ತು ಬತುದ್,  ಬೊಕ್ಕ ಗ್ರಾಮ ದೈವ ದೇವೆರೆ ಭೇಟಿನ್ ಕಟ್ಲೆಡೆ ಮಾಯಾ ಭೇಟಿಡ್ ಮುಗಿಪುಂಡು. ಆಂಡ ಇನಿ ಮಂತ್ರಜಾವದೆನ್ ತೆರಿದಾ ತೆರಿಯಂದೆನಾ ಕೆಲವು ತಪ್ಪು ಅಭಿಪ್ರಾಯೊನು ಪನೊಂದುಲ್ಲೆರ್. ಕಲ್ಲುರ್ಟಿನ್ ಮಾಟದ ರೂಪೊಡ್ ಗಳಸೆರೆ ಮಂತ್ರಜಾವದೆ ಪನ್ಪಿ ಸಗ್ತಿನ್ ಕನತೆರುಂದ್ ಪನ್ಪೆರ್. ದಾಯೆ ಇಂಚಿ ಅಬಿಪ್ರಾಯ ಬತ್ತ್ಂಡ್ ತೆರಿಯಂದ್. ತೂಕತ್ತೇರಿ, ಕಲ್ಲುರ್ಟಿ ಪೂರ ಒಂಜೇ ಪನ್ಪುನಕುಲು ತೂಕತ್ತೇರಿನ ಬೊಕ್ಕ ಮಂತ್ರಜಾವದೆನ ಸಂದಿ ಒಂಜೇ ರೀತಿ ಉಂಡು ಪನ್ಪೆರ್. ಹಿರಿಯಡ್ಕ , ಪಡ್ಡೆದ್ರದಂಚಿ ತೂಕತ್ತೇರಿನ ಆರಾಧನೆ  ಜಾಸ್ತಿ ಉಂಡು. ಮಂತ್ರಜಾವದೆನ ಮೂಲ ರೂಪ ತೂಂಡ ಬಾಲಡ್ಕ ಬರ್ಕೆ (ನಾರಾವಿ)ಡ್ ದಿಂಡು ದೇರು ಬೈದ್ಯೆ ನಂಬುದಿನಿ ತೂಕತ್ತೇರಿಯಾದು. ನನ ಕೆಲವೆರ್ ಪನ್ಪುಲೆಕ ತೂಕತ್ತೇರಿ ಪಂಡ ಕಲ್ಲುರ್ಟಿನ ಕೈಟ್ ಇಪ್ಪುನ ಒಂಜಿ ಕುಲೆಗೆ. ಆಳವಾದ್ ಅರ್ಥ ಮಲ್ತೊಂದು ಪೋಂಡ ಮಂತ್ರವಾದೊಡು ಈ ಕುಲೆನ್ ಬುಡ್ಪುನಿಗೆ. ಅವ್ವೇ  ತೂಕತ್ತೇರಿನ್ ಮಂತ್ರಜಾದೆಂದ್ ಪನ್ಪೆರ್ಂದ್ ಪೆರಿಯಾಕ್ಲೆ ಅಭಿಪ್ರಾಯ. ಸನ್ಯಾಸಿಲು ಮಂತ್ರ ಪ್ರಯೋಗೊಗ್ ಈ ಶಕ್ತಿನ್ ಗಳಸೊಂತೆರುಂದ್ ಕೆಲವು ಎರಿಯಕ್ಲು ಪನೊಂತೆರ್. ಕುಲೆನ್ ಪ್ರೇತ ಸಗ್ತಿಂದುಲ ಲೆಪ್ಪುವೆರ್. ಕಲ್ಲುರ್ಟಿನ ನನೊಂಜಿ ರೂಪನೇ ತೂಕತ್ತೇರಿ, ತೂಕತ್ತೇರಿನ ನನೊಂಜಿ ಒರು ಮಂತ್ರಜಾವದೆಂದುಲಾ ಪನ್ಪುನಕುಲುಲ್ಲೆರ್.ದೈವ ಇಂಚನೆಂದ್ ಪೂರ್ತಿ ಇಚಾರೊನು ಬುಡು ಕೊರ್ತಿಜಿ. ತೆನ್ಕಾಯಿಡ್ ಕಲ್ಲುರ್ಟಿನೊಟ್ಟುಗು ತೂಕತ್ತೇರಿಂದ್ ರಡ್ಡ್ ದೈವೊಲೆಗ್ ಒಟ್ಟು ಕೋಲ ನಡಪುಂಡು. ಮೂಲೊಡು ತೂಕತ್ತೇರಿ ಪುದರ್ ದುಂಬುಗ್ ಮಂತ್ರಜಾವಾದೆ ಆಂಡ್ ಪಂದ್ ಕೆಲವೆರ್ನ ಅಭಿಪ್ರಾಯ. ಕೆಲವ್ ತಿಕ್ ಡ್ ಕಲ್ಲುರ್ಟಿ ಗ್  ಕಟ್ಟುನಕುಲು ಕೋಲೊಡು ನಿಕ್ಲೆನಡೆ ಒಂಜಿ ಕಪ್ಪು ಛಾಯೆದ ಸಗ್ತಿ ಬೈದುಂಡು ಪಂದ್ ಮಂತ್ರಜಾವದೆನ್ ನಂಬಿಸಾಯೆರ್ಡ, ಕೆಲವು ಮಂತ್ರವಾದಿಲು ಮಂತ್ರ ದೇವತೆ  ನಿಕ್ಲೆ ಇಲ್ಲಗ್ ಬೈದಲುಂದ್ ಆರಾಧನೆ ಮಲ್ಪಾಯೆರೆ ಸುರು ಮಲ್ತೆರ್. ಮಂತ್ರಜಾವದೆನ್ ಗ್ರಾಮ, ಗುತ್ತುದ, ಸೀಮೆದ ದೈವ ಆದ್ ಆರಾಧನೆ ಮಲ್ಪಂದೆ, ಇಲ್ಲದೆಚ್ಚಿದ ದೈವ ಆದ್ ಆರಾಧನೆ ಮಲ್ಪುವೆರ್

ಮಂತ್ರಜಾವದೆನ ಮಿತ್ತ ಇಚಾರ ತೂನಗ ಅಕ್ಲೆನ ಅಭಿಪ್ರಾಯೊಡು ಗೊಂದಲ ತೋಜುಂಡು. ದಾಯೆ ಪಂಡ ಗ್ರಾಮ ದೈವ ಆದ್, ರಾಜಂದೈವ ಆದ್ ಕೆಲವ್ ತಿಕ್ ಡ್ ಆರಾಧನೆ ಮನ್ಪುನ ಕಲ್ಲುರ್ಟಿಗ್ಲಾ, ಅಪ್ಪೆ ಬಂಜಿಡ್ ಉದಿಪಂದೆ ಮಾಯೆಡ್ ಮಲ್ಲೆ ಆದ್ ಆರಾಧನೆ ಗೆತೊನುನ ಮಂತ್ರಜಾವದೆಗ್ಲಾ ಸಮ್ಮಂದ ಉಂಡು ಪಂದ್ ಪನೆರೆ ಸಾದ್ಯ ಆಪುಜಿ. ಕಲ್ಕುಡ ಕಲ್ಲುರ್ಟಿ ಅಪ್ಪೆ ಬಂಜಿಡ್ ಜನನ ಆದ್ ಕಾಯ ಬುಡ್ದು ಮಾಯೆ ಸೇರ್ದ್ ಕಾರ್ಣಿಕ ತೋಜಾಯೆರ್ಡಲಾ  ಅಕ್ಲೆ ಪುಟ್ಟುಡು ಅಪ್ಪೆ ಅಮ್ಮನ ಸಾಗ್ಸಿಯುಂಡು. ಮೂಡಾಯಿಡ್(ಬೆದ್ರ) ಕಾಳಮ್ಮ, ತೆನ್ಕಾಯಿಡ್ ಕಲ್ಲುರ್ಟಿ, ಸತ್ಯದೇವತೆ ಕಲ್ಲುರ್ಟಿ, ಬಡಕಾಯಿಡ್ (ಒಡಿಪು, ಕಾರ್ಲ) ವರ್ತೆ ಪಂದ್ ಕಲ್ಲುರ್ಟಿನ್ ಆರಾಧನೆ ಮಲ್ಪುವೆರ್. ಪೊಂಜನಕ್ಲೆನ ಮುತ್ತೇಸನ ಒರ್ತು ಕಾಪುನ ವರ್ತೆಯಾದ್, ಪಿದಯಿದಕುಲ್ ಮಂತಿ ಮಾಟ ಮಂತ್ರೊನು ಕಳೆಯುನ ಮಂತ್ರಮೂರ್ತಿ, ಮಂತ್ರ ದೇವತೆಯಾದ್, ಇಲ್ಲದುಲಯಿದ ಕಪಟ ಕಳೆಯುನ ಕಲ್ಲುರ್ಟಿಯಾದ್, ಸತ್ಯೊಗು ಸತ್ಯದೇವತೆಯಾದ್ ಉಪ್ಪುನ ಕಲ್ಲುರ್ಟಿಗ್ಲಾ, ಕರಿಯ ಕಾಂತು ಬೈದ್ಯಗ್ ತಿಕ್ಕಿನ ಮಂತ್ರ ಸಗ್ತಿ ಮಂತ್ರಜಾವದೆಗ್ಲಾ ಸಮ್ಮಂದ ಉಂಡುಂದು ಪಂಡ ಆತ್ ಸಮರ್ಪಕವಾಯಿನ ಅಭಿಪ್ರಾಯಂದಾಪುಜಿ. ಕಲ್ಕುಡ ಕಲ್ಲುರ್ಟಿ ಅಮರ್ ಜೋಕುಲುಂದು ಪಂಡ ಕಲ್ಲುರ್ಟಿ ಕಲ್ಕುಡನ ಮೂಲ ಪುದರ್ ಕಲ್ಕುಡ ಬೊಕ್ಕ ಕಾಳಮ್ಮ ಅದಿತ್ತುದ್ ಅಮರ್ ಜೋಕ್ಲತ್ತ್. ಕೆಲವೆರ್ ಮಂತ್ರಜಾವದೆನೇ ಇಜ್ಜಿ ಪಂಡ ಮಂತ್ರಜಾವದೆನ್ ನಂಬಿನ ಕುಂಟಾಲ ಚಾವಡಿ, ಬನ, ಕೂವೆ(ಗುಹೆ), ಅವೆರ್ದ್ಲಾ ಮೂಲೊಡು ತೂಕತ್ತೇರಿಯಾದ್ ಆರಾಧನೆ ಮಲ್ತ್ ನ ಬಟ್ಟೆಣಿದ್ದಿಲ್ಲ್ ಬಾಲಡ್ಕ ಬರ್ಕೆ(ಈದು, ನಾರಾವಿ), ಮಂತ್ರಜಾವದೆಯಾದ್ ಪದ್ದೊಂಞಿ / ಬದ್ದುಂಞ ಬೈದ್ಯೆ ನಂಬಿನ ಪಂಜಾಜೆ, ಕರಿಯ ಕಾಂತು ಬೈದ್ಯೆ ನಂಬಿನ ಕಟ್ಟೆಮಾರ್,ಅರತ್ತಾನ ಸೂಂತ್ಲಾಡಿ ಬರ್ಕೆ(ಬೆದ್ರ_ಇರುವೈಲ್ ಕೈತಲ್) ಪೂರ ಇನಿಲಾ ಉಪ್ಪುನಗ ಇಜ್ಜಿ ಪಂದ್ ಎಂಚ ಪನ್ಪೆರ್ ಪಂದೇ ಅರ್ಥ ಆಪುಜಿ. ಅವ್ವೇತೋ ಬಡಪತ್ತ್ ಡ್ ಬರೆಲೊಂದಿತ್ತ್ ನಕ್ಲೆಗ್ ಬದುಕ್ ದ ಸಾದಿ ತೊಜಪಾದ್, ಸಂಪೂರ್ಣ ತರೆ ತಗ್ಗಾದ್ ಬೆರಿ ಬಗ್ಗಾಯಿನಕ್ಲೆನ್ ದೆರ್ತ್ ಪತ್ತಿನ, ಒರಿಪುಂಡಲ ಈಯೆ, ಕರಿಪುಂಡಲ ಈಯೆ ಪಂದ್ ಮೂಜಿ ಸಂಕ್ರಾಂತಿಗ್ ಮೂಜಿ ಅಗೆಲ್ ಪಾಡ್ದ್  ನಂಬಿನಕ್ಲೆನ ಬಗಲೆ ಕಳೆಯಿನ, ಸತ್ಯ ಮಂತ್ರಜಾವದೆನ ಕಾರ್ನಿಕ ಇನಿತ ಕೆಲವೊಂಜಿ ಪೊಸತ್ ಕಟ್ಟುನಕ್ಲೆಗ್ ತೆರಿಯಂದೆ ಪೋಂಡು. ಆಂಡಲಾ ಅಲೆನ ಪುದರ್ ಪಂಡುದ್ ಅಕುಲ್ ಗಂಜಿ ತೆಲಿ ಪರೊಂದುಲ್ಲೆರ್ ಪಂಡ ಅಲೆನ ಸಗ್ತಿ ಏತುಂದ್ ನಮಕ್ ತೆರಿಯುಂಡು. ಆಂಡ ಇನಿ ದೈವಾರಾಧನೆಲಾ ವ್ಯಾಪಾರೀಕರಣ ಅವೊಂದಿಪ್ಪುನವು ದುರಂತ. ಕೆಲವು ಮಲ್ಲ ತೆರಿನಕುಲುಂದು ಪನ್ಪುನಕುಲು ನಿಕುಲು ಮಂತ್ರಜಾವದೆಗ್ ಚಾವಡಿಡ್ ಜಾಗೆ ಕೊರಡೆ, ನಂಬೆರೆ ಬಲ್ಲಿಂದ್ ನಂಬುನಂಚಿನ ಇಲ್ಲದಕ್ಲೆನಲ್ತ್  ಮಂತ್ರಜಾವದೆನ್ ದಕ್ಕಯಿನ ಪುಣ್ಯಾತ್ಮೆರಿತ್ತ್ ದ್ ಅಕ್ಲೆಗ್ ಅವೆತ ಪೆಟ್ಟ್ ಲ ತಿಕ್ಕ್ ದುಪ್ಪು.  ಮಂತ್ರಜಾವದೆನ್ ತನ್ನ ಅಪ್ಪೆಂದ್ ಆರಾಧನೆ ಮಲ್ಪುನಕುಲು ತುಳುನಾಡುಡ್ ಉಲ್ಲೆರ್. ಅಂಚಿನಕ್ಲೆ ನಂಬೊಳಿಗೆದ ಭಾವನೆಗ್ ಕಲ್ಲ್ ಪಾಡೆರೆ ಬಲ್ಲಿ. ಏತೋ ಕಾಲ ಅಪ್ಪೆಂದೆನ್ನಿದ್ ಆರಾಧನೆ ಮಲ್ತಿನ ದೈವೊನು ಏರಾ ಪಂಡೆರುಂದ್ ಪಿದಯಿ ಪಾಡುಂಡ ನಮ್ಮ ಅಪ್ಪೆನ್ ಪಿದಯಿ ಪಾಡ್ಲೆಕ. ನಂಬುನಕ್ಲು ನಂಬುಲೆ,  ನಂಬಂದಿನಕ್ಲು ನಂಬುನಕ್ಲೆ ನಂಬೊಳಿಗೆಗ್ ಕಲ್ಲ್ ಪಾಡಡೆ. ದೈವದ ಕಾರ್ಣಿಕ ನಂಬಿನ ಅವ್ವೇತೋ ಇಲ್ಲ್ ನ್, ಸಂಸಾರೊನು ಬೆಳಗ್ ದುಂಡು. ಮಲ್ಲ ಮಲ್ಲ ಜನೊಕ್ಲು ಬತ್ತ್ ದ್ ಈ ದೈವ ನಿಕ್ಲೆಗ್ ತೊಂದರೆ ಮಲ್ಪುಂಡು ಪಂದ್ ಪೋಡ್ಯನಗ ದೈವೊನು ಕೈ ಬುಡ್ನಕುಲ್ಲ ಉಲ್ಲೆರ್. ನಮಕ್ ಬರ್ಪುನ ಸಿರ್ಕ್ ಸಂಕಡೊಲು ನಮ್ಮ ಕರ್ಮ ದೋಷ ಫಲ. ದೈವ ಬತ್ತುದ್ ಸಿರ್ಕುಲು ಬತ್ತುಂಡುಂದ್ ಪನ್ರೆ ಬಲ್ಲಿ. ಪ್ರಾರಬ್ದೊಡು ಸರ್ರೊಗು ಬರ್ಪುನ ಸಿರ್ಕ್ ನ್ ವಾ ದೈವೊಗ್ಲಾ ಉಂತಯೆರೆ ಆಪುಜಿ. ಮಲ್ಲ ಗಂಡಾಂತರೊನು ತಪ್ಪಾದ್ ಎಲ್ಯೆಡ್ ಕೊನೊಪುನ ಸಗ್ತಿ ದೈವೊಲೆಗುಂಡು. ಆಚಾರೊಡು ತಪ್ಪಿತ್ತುಂಡ ವಿಚಾರೊಡು ಸರಿ ಪಲ್ಯ ಪೋವೊಡು. ನಂಬುನೆಟ್ ದಾದಾಂಡಲಾ ಎತ್ತೇಸೊ ಅದಿತ್ತುಂಡ ಅವೆನ್ ವಾ ರೀತಿಡ್ ಆರಾಧನೆ ಮಲ್ಪೊಲಿ ಪಂದ್ ತೆರಿದ್ ಮಲ್ಪೊಡು. ದೈವದ ಪುದರ್ ಪಂಡುದ್ ಅವ್ವೇತೋ ಜನ ಕಾಸ್ ಮಲ್ತೊಂದಿತ್ತುದ್ ನಂಬಿನಕ್ಲೆಗ್ ತೊಂದರೆ ಆಂಡ ದೈವದ ಪುದರ್ ಪಂಡುದ್ ಕಾಸ್ ಮಲ್ಪುನಕ್ಲೆಗ್ಲಾ ದೈವ ಖಂಡಿತ ಸಿಗ್ಸೆ ಕೊರ್ಪುಂಡು. ದಕ್ಕ್ ಲೆ ಪಂಡಿನಕ್ಲೆನ್ಲಾ, ನಂಬಿ ಬೊಕ್ಕ ದಕ್ಕ್ ನಕ್ಲೆನ್ಲಾ ದೈವ ಏಳಿಗೆ ಆಯೆರೆ ಬುಡ್ತುಜಿ. ದಕ್ಕಯರೆ ಒರಿ, ಆ ಕಷ್ಟೊನು ಅನುಭವಿಸವುನು ಇಡೀ ಕುಟುಮ. ತಂತ್ರಿದಾರ್ ಬತ್ತ್ ದ್ ದೈವದ ಮಣೆ ಮಂಚವು ಪೊತ್ತಯರೆ ಪಂಡುದ್, ಮುಗ ಮೂರ್ತಿ ನೀರ್ ಡ್ ಬುಡ್ಪಾದ್ ಅವ್ವೇತೋ ಕುಟುಮೊರ್ದ್ ಅಕುಲ್ ಲಾಭ ಪಡೆದ್ ಕುಟುಮದಕ್ಲು ಬರೆಲ್ ನೆನ್ ನಮ ಸಾಮಾನ್ಯವಾದ್ ಮಾತೆರ್ಲಾ ತೂದಿಪ್ವ. ದೈವಾರಾಧನೆ ಪಂಡ ತೆರಿನ ದೈವದ ಚಾಕಿರಿನ್ ವಾ ರೀತಿಡ್ ಆರಾಧನೆ ಮಲ್ತುಂಡ ಸಂಸಾರೊಗೆಡ್ಡೆಂದ್ ಲೆಕ್ಕಾಚಾರೊಡು ಕೇಂದ್ ತೆರಿಯೊಂದು ನಡತೊನ್ನವು. ಅವೆನ್ ಎಂಚ ಮೂಲ ತುಳು ಕಟ್ಲೆಡ್ ಮಲ್ಪೊಲಿ ಪಂದ್ ಪನ್ಪುನ ಹಿರಿಯಕುಲ್ಲಾ ತುಳುನಾಡುಡುಲ್ಲೆರ್. ಮಂತ್ರಜಾವದೆಗ್ ನಮ ತಿನ್ಪುನಂಚಿನ ಸೊತ್ತುನು ಮಾತ ದೀವೆರಿಜ್ಜಿ. ಕಾಂಡೆದ ಒಂಜಿ ಗಿಂಡೆ ನೀರ್, ಪುರ್ಪ ಬೊಕ್ಕ ತುಡರ್. ಕಾಲಾದಿಗ್ ಒಂಜಿ ಅಗೆಲ್ ತಮ್ಮನ. ಈತತ್ತಂದೆ ಬೇತೆ ದಾಲ ದೀಯೆರೆ ಇಜ್ಜಿ. ದೈವೊನು ನಂಬುದು ಇಲ್ಲಲ್ ದಾದಾಂಡಲ ಎತ್ತೆಸೊ ಆಂಡ ತೆರಿನಕ್ಲೆಡ ಇಚಾರ ಮಲ್ತೊನ್ಲೆ, ಅವೆರ್ದ್ ಬೊಕ್ಕ ಅಯಿಕ್ ಸರಿ ಆಯಿನ ಸಾದಿನ್ ನಾಡ್ಲೆ. ಪೆದ್ದಿ ಅಪ್ಪೆನ ಒರುಟು ನಂಬೊಂದು ಬತ್ತರ್ಡ, ಖಂಡಿತ ಆಲ್ ಕೈ ಬುಡ್ಪುಜಲ್. ಕೆಲವ್ ತಿಕ್ ಡ್ ಸತ್ಯ ಸಾರ್ಲ ಪಟ್ಟದ ಕೊರಗ ತನಿಯನ್ಲ, ಸತ್ಯ ಮಂತ್ರಜಾವದೆನ್ಲಾ ನಂಬುವೆರ್. ಕುಟುಮ ಸಂಸಾರದ ರಡ್ಡ್ ಕಣ್ಣಾದ್ ನಂಬುನಕುಲ್ಲಾ ಉಲ್ಲೆರ್, ನುಪ್ಪು ಒದಗಾದ್ ಕೊರ್ಪುನ ಧರ್ಮೊಲುಂದುಲ ನಂಬುವೆರ್. ಅವು ಅಕ್ಲಕ್ಲೆ ನಂಬೋಳಿಗೆ.

ತುಳುನಾಡ ಕಲೆ ಕಾರ್ನಿಕದ ಸತ್ಯೊಲೆನ ದುತ್ತೈತದ ಪೊರ್ಲು, ರೌದ್ರಾವತಾರ, ಕಟ್ಲೆದ ಪೊರ್ಲು ಪೊರ್ಲಾಟಿಕೆ, ನುಡಿಕಟ್ಟ್ ಇಂಚ ಮಾತಾ ಮರ್ಗಿಲ್ ಡ್ಲಾ ಅರ್ಥ ಮಲ್ತೊನೊಲಿ. ಮೂಲು ನಲಿಕೆ, ಅವತಾರ, ನುಡಿಕಟ್ಟ್  ಮಾತ ಮರ್ಗಿಲ್ಡ್ ಲಾ ದೈವಾರಾಧನೆ ನೆಗತ್ ತೊಜುಂಡ್. ತುಳುನಾಡ ಮಂತ್ರಜಾವದೆನ ಬಗೆಟ್ ಮೂಡಾಯಿದ ದೈವೊಲೆಗ್ ಕಟ್ಟುನ ಹಿರಿಯಾರ್ ಯನ್. ಕೆ . ಸಾಲ್ಯಾನ್ ರ್ , ತುಳುನಾಡುದ ಪುಗಾರ್ತೆದ ದೈವೊಲೆಗ್ ಕಟ್ಟುನ ಜನಾರ್ದನ ಬುಡೋಳಿ, ಸಂದಿ ಪಾಡ್ದನದ ಅಧ್ಯಯನಕಾರೆರಾಯಿನ ವಿಜಯ ಕಾಸರಗೋಡು ಮೊಕ್ಲೆನ ಸಕಾಯೊನು ಈ ಅಪ್ಪೆನ ಬರವು ಬರೆನಗ ಮೂಲು ನೇರ್ಪು ಮಲ್ತೊಂದುಲ್ಲೆ.   ಒಂಜಿ ಮೂಲದ ಪ್ರಕಾರ ಈದು ನಾರಾವಿದ ಬಟ್ಟೆಣಿದಿಲ್ಲ್  ಬಾಲಡ್ಕ ಬರ್ಕೆ ಪನ್ಪಿ ಜಾಗೆಡ್ ದಿಂಡು ದೇರು ಬೈದ್ಯೆರ್ ಬದುಕೊಂದಿತ್ತೆರ್. ಅರೆಗ್ ಐನ್ ಜನ ಮರ್ಮಲಲ್ಲು ಇತ್ತ್ ದ್ ಅಕ್ಲೆಗ್ ಸಮ್ಮಲೆ ಪತ್ತ್ ನಾಯಿಜಿ, ಬುಡ್ತು ನಾಯಿಜಿ, ಲಕ್ಕ್ ನಾಯಿಜಿ, ಕುಲ್ಲುನಾಯಿಜಿ, ಪೋಯಿನಾಯಿಜಿ, ಬತ್ತ್ ನಾಯಿಜಿ ಪಂದ್ ಅರೆಗ್ ಮಾನಸಿಕ ಹಿಂಸೆ ಕೊರೊಂದಿತ್ತೆರ್. ಅಂಚ ದಿಂಡು ದೇರು ಬೈದ್ಯೆರ್ ಇಲ್ಲ್ ಬದ್ಕ್, ಊರು ಬುಡ್ದು ಉಬಾರ ಪೆರುವುಲ್ಲ ದೇಸೊಗು ಪೋಪೆರ್. ಅವ್ಲು ಆರ್ನ ಜಾತಿ ಕಸುಬು ಆಯಿನ ಕಲಿ ಮೂರ್ತೆದ ಈಂದಿಚ್ಚಿಲ್ ಕಲಿತ ಬೇರ ಮಲ್ಪುವೆರ್. ಗಟ್ಟದ ಮಿತ್ತರ್ದ್ ಜತ್ತ್ ದ್ ಬತ್ತಿನ ಒರಿ ಸನ್ಯಾಸಿ ಕಾಸ್ ಕೊರಂದೆ ದಿನೋಲ ಕಲಿ ಗುತ್ತಯ ಮಲ್ತುದ್ ಪರ್ದ್ ಪೋವೊಂದಿತ್ತೆರ್. ವರ್ಸಾಂಡಲ ಕಾಸ್ ಕೊರಂದೆ ಕಲಿ ಪರೊಂತ್ ನ ಸನ್ಯಾಸಿಡ ದಿಂಡು ದೇರು ಬೈದ್ಯೆರ್, ಅಂದೆ ಸನ್ಯಾಸಿಲೆ ಈತ್ ದಿನ ಎನ್ನ ಗುತ್ತಯದ ಕಲಿ ಪರ್ಯರ್, ಆಂಡ ಇನಿ ಮುಟ್ಟ ಇರೆಡ ದುಡ್ಡು ಪಣವು ಕೇಂದ್ ಜಿ, ಯಾನ್ ಬಂಙೊಡುಲ್ಲೆ, ಎಂಕ್ ದಾಲ ಈರ್ ಕೊರೊಡತ್ತೆ ಪಂದ್ ಕೇಂಡೆರ್. ಅವೆಕ್ ಸನ್ಯಾಸಿ ಯಾನ್ ಪಚ್ಚಡೆ/ಕುಂಟು ಕೊರಿಯೆಂಡ ಪರಿದ್ ಪೋವು, ಪಣವು ಕೊರಿಯೆಂಡ ಕರ್ಚಾದ್ ಪೋವು, ಅಂಚ ನಿಕ್ಕ್ ಕರ್ಚಾವಂದಿನ ಒಂಜಿ ಸೊತ್ತು ಕೊರ್ಪೆ, ಅವೆನ್ ಈ ಆರಾಧನೆ ಮಲ್ತೊಂದು ನಂಬೊಂದು ಬಲ ಪಂದ್ ಒಂಜಿ ಸಗ್ತಿನ್ ಕೊರ್ಪೆರ್. ಸತ್ಯ ಧರ್ಮೋಡು ಆ ಸಗ್ತಿನ್ ಆರಾಧನೆ ಮಲ್ತೊಂದು ಬತ್ತಿ ದಿಂಡು ದೇರು ಬೈದ್ಯೆರೆಗ್ ಎಡ್ಡೆ ಅವೊಂದ್ ಪೊಪುಂಡು. ಆಂಡ ದಿಂಡು ದೇರೆ ಬೈದ್ಯೆರ್ ಆರಾಧನೆ ಮಲ್ತೊಂದು ಬತ್ತಿನ ಆ ಸಗ್ತಿದ ಪುದರ್  ತೂಕತ್ತೇರಿ/ಸೂಕತ್ತೇರಿ ದೈವ. ಪಂಜಾಜೆದ ಇಲ್ಲದ ಪೊದು ಪತ್ತಾದ್ ಬದ್ದುಂಞ  ಬೈದ್ಯೆರೆ ಮಗಲೆನ್ ದಿಂಡು ದೇರೆ ಬೈದ್ಯೆರ್ ಮದಿಮೆ ಆಪೆರ್. ಪಂಜಾಜೆ ಪನ್ಪಿ ಜಾಗೆ ಬಾರೆ ಪುಣಿ  ಗಿರಮೊಡು ತೂಯೆರೆ ತಿಕ್ಕುಂಡು. ತೂಯೆರೆ ಪೋಂಡ ಕೇರಳ ಗಡಿ ಬಾಗದ ಮುಟ್ಟದ ಜಾಗೆಯಾದುಂಡು. ದುಂಬು ಪಂಜಾಜೆಡ್ ಮಂತ್ರ ಸಿದ್ದಿದ, ಮರ್ದ್ ಪಲಿಪುದ ಬೈದ್ಯೆರ್ ಇತ್ತೆರ್ ಪಂದ್ ಇರಿಯಕುಲ್ ಪನ್ಪೆರ್. ಅಂಚನೆ ಬಬ್ಬು ಬಾರಗನ ಕತೆಟ್ ಬರ್ಪುನ ಕಂಚಿನಡ್ಕಡ್ಲ ಮಂತ್ರ ತಂತ್ರ ತೆರಿನ ಬೈದ್ಯೆರಿತ್ತೆರ್. ಪಂಜಾಜೆದ ಪೊಣ್ಣನ್ ಮದಿಮೆ ಆಯಿ ಬೊಕ್ಕ ದಿಂಡು ದೇರು ಬೈದ್ಯೆರ್ ನನಲಾತ್ ಬೆಳಗುವೆರ್. ಏತೋ ವರ್ಸೊರ್ದ್ ಬೊಕ್ಕ ದಿಂಡು ದೇರೆ ಬೈದ್ಯೆರೆಗ್ ತನ್ನ ಬಟ್ಟೆಣಿದಿಲ್ಲ್ ಬಾಲಡ್ಕ ಬರ್ಕೆದ ನೆಂಪಾಂಡ್. ತಾನ್ ಪುಟ್ಟುದ್ ಬಲತ್ ನ ಇಲ್ಲನ್ ತೂವೊಡುಂದ್ ಬರ್ಪೆರ್. ಆರ್ ದೂರೊಡ್ ಬರ್ಪಿನೆನ್ ತೂಯಿ ಮರ್ಮಲಲ್ಲು ಬರಣ(ಬರಂದಿ) ಸಮ್ಮಲೆ ಬತ್ತೆರ್, ಮೆರೆಗ್ ದಾದಾಂಡಲಾ ತಮ್ಮನ ಮಲ್ಪೊಡು ಪಂದ್, ಬತ್ತರ ತಮ್ಮಲೆ ಕುಲ್ಲುಲೆ, ತಮ್ಮಲೆಂದ್ ಬಾರಿ ಮೋಕೆ ಮೋವಂದೊಡು ಕುಲ್ಲವೆರ್. ಅಕ್ಲೆ ಉದ್ಧೇಶನೇ ಬೇತೆ. ಮೇರ್ ಮೂಲೆ ಕುಲ್ಯೆರ್ಡ ಎಂಕ್ಲೆಗ್ ಬದ್ಕ್ ಭಾಗ್ಯ ದಾಲ ತಿಕ್ಕಂದ್ ಪಂದ್ ಎನ್ನಿನ ಮರ್ಮಲಲ್ಲು ಕುಲ್ಲೆ ತಮ್ಮಲೆ ಇತ್ತೆ ಬರ್ಪಂದ್ ನಾರಾಯಿಲ(ನಾರಾವಿ) ಪೇಂಟೆಗ್ ರಾಯಪ್ಪೆರೆ ಅಂಗಡಿಗ್ ಪೋದ್ ಒಂಜಿ ಪಣವುದ ಬೆಲ್ಲ, ಒಂಜಿ ಪಣವುದ ಬಜಿಲ್, ಒಂಜಿ ಪಣವುದ ತಾರಾಯಿ, ಒಂಜಿ ಪಣವುದ ಸಂಕಪಾಸನ ಕನತ್ ದ್ ಬಜಿಲ್ ಗ್ ಸಂಕಪಾಸನ ಪಾಡ್ದ್ ಮರತ ಮರಾಯಿಡ್ ಬಜಿಲ್ ಮೊರೆತುದ್ ತಮ್ಮಲೆನ್ ಕುಲ್ಲದ್ ಬಂಜಾರ ಬಲಸ್ಯೆರ್. ತಮ್ಮಲೆ ಒಂಜಿ ಬಾಯಿ ಬಜಿಲ್ ಬಾಯಿಗ್ ದೀನಗನೆ ದೊಲ್ಲೆ ಕಾರ್ಯೆರ್. ಅರೆಗ್ ಮೊಕ್ಲೆನ ಕಪಟ ತೆರಿದ್ ಪೋಂಡು. ಓ ಅಪ್ಪೆ ಜಾವದೆ ಯಾನ್ ನಂಬಿನ ಜಾವದೆ ಈಯಾಂಡ, ತಿಂದ್ ನಾಯನ್ ಕಕ್ಕಯಡ, ಪಾಡ್ನಕ್ಲೆ ಬಿದೆ ಮುತ್ತಯಡ, ಬದನೆ ಬಣ್ಣದ ಸೀರೆ, ದಾಸೆಮಿ ಬಣ್ಣದ ರವಿಕೆ ಒಪ್ಪಿತ್ ದ್ ಬಲಿ ಕೊರ್ಪೆ ಪಂದ್ ನಟೊನ್ವೆರ್. ಮೂಲು ಬಲಿ ಪಂಡ ನೇಮ ಪಂದ್ ಅರ್ಥ. ಮೇರ್ ಜಾವದೆ ಪಂದ್ ಜೋಗಿ ಸನ್ಯಾಸಿಲು ಕೊರ್ನ ಮಂತ್ರ ಸಗ್ತಿನ್  ಲೆತ್ತೊಂತೆರ್. ಸಂಕಪಾಸನ ಪಾಡ್ನಕುಲ್ ತುಲ್ಲು ತುಲ್ಲರ್ದ್ ಸೈತೆರ್, ಮೇರ್ ಕಕ್ಕ್ಯೆರ್. ಈ ಚೋದ್ಯೊನು ತೂಯಿನ ದಿಂಡು ದೇರು ಬೈದ್ಯೆರ್ ಈದು ಭಟ್ಟಣಿದಿಲ್ಲ್ ಬಾಲಡ್ಕ ಬರ್ಕೆಡ್ ಜಾವದೆಯಾದ್ ಬೂತಾಲ ಪೂಜೆ (ಆರಾಧನೆ) ಮಲ್ತೊಂದು ಬರ್ಪೆರ್.       

ಆ ಕಾಲೊಡ್ ಬದ್ದುಂಞ ಬೈದ್ಯೆಲ, ಕುಂಟಾಲ ಜಂತ್ರಿಲ ಮಂತ್ರ ತಂತ್ರೊಡು ಬಾರೀ ಬಿರ್ಸೆರಾದಿತ್ತೆರ್. ಅಕ್ಲೆ ಇರ್ವೆರೆ ಮಂತ್ರ ಸಗ್ತಿ ಏತಿತ್ತುಂಡ್ ಪನ್ಪಿನೆನ್ ಯಾನ್ ದುಂಬು ಪನ್ಪುನ ಇಚಾರೊಡ್ ನಿಕ್ಲೆಗ್ ತೆರಿಯೊನೊಲಿ. ಒಂಜಿ ದಿನ  ಬದ್ದುಂಞ ಬೈದ್ಯೆ, ಕುಂಟಾಲ ಜಂತ್ರಿ ಇಜ್ಜಂದಿನಪಗ ಅಯನ ಇಲ್ಲಗ್ ಪೋದು ಜಂತ್ರಿಲಿಜ್ಜೆರಾ? ಕೇನ್ನಗ ಅಲ್ತ ಪೊಣ್ಣು ಪೊಂಜೊವ್, ಪಂಡ ಜಂತ್ರಿನ ಬುಡೆದಿ, ಆರ್ ಓಡೆಗಾ ಪೇಂಟೆಗ್ ಪೋತೆರ್, ಅಪಗ ಈ ದಾದ ಮಲ್ಪುನಿ ಯಾನ್ ಕುಂಟು ಅರ್ದುನಿ, ಅಂದ ಅಪಗ ಅರ್ದುಂದ್ ಪಂಡುದ್ ಬದ್ದುಂಞ ಬೈದ್ಯರ್ ಪೋಪೆರ್. ಕುಂಟಾಲ ಜಂತ್ರಿ ಬನ್ನೇಟಲ ಬೊಡೆದಿ ಕುಂಟರ್ದೊಂದೇ ಇತ್ತೆರ್. ಕುಂಟಾಲ ಜಂತ್ರಿಗ್ ಬದ್ದುಂಞ ಬೈದ್ಯೆ ಬತ್ತ್ ನ ತನ್ನ ಮಂತ್ರೊಡು ತೆರಿದ್, ಆಂಡ್ ಯಾವು ಕುಂಟರ್ದಿನ ಪಂದ್ ಇಲ್ಲಗ್ ಉಲೈ ಲೆತೊನುವೆರ್.  ಇಂಚನೆ ಬದ್ದುಂಞ ಬೈದ್ಯೆರ್  ಇಜ್ಜಂದಿನಾನಿ ಅರೆ ಇಲ್ಲಗ್ ಪೋಯಿ ಜಂತ್ರಿಲು , ಏರಪ್ಪಾ ಇಲ್ಲಲ್, ಬದ್ದುಂಞ ಬೈದ್ಯೆರ್ ಇಜ್ಜೆರ ಪಂದ್ ಕೇನ್ನಗ ಅರೆನ ಬುಡೆದಿ ಆರ್ ಇಜ್ಜೆರ್ ಪೇಂಟೆದಂಚಿ ಪೋತೆರ್ ಅಪಗ ಈ ದಾದ ಮಲ್ಪುನಿ, ಯಾನ್ ಕನಕ್ ತೌರುನಿ ಪಂದ್ ಪನ್ಪೆರ್. ಅಂದ ತೌರ್ಲೆ ಪಂದ್ ಪಂಡುದ್ ಪೋಪೆರ್. ಪೇಂಟೆಗ್ ಪೋಯಿನ ಬದ್ದುಂಞ ಬೈದ್ಯೆರೆಗ್ ಕುಂಟಾಲ ಜಂತ್ರಿಲು ಬತ್ತ್ ನ ಮಂತ್ರೊಡು ತೆರಿದ್ ಯಾವ್ ಕನಕ್ ತೌರ್ ನ, ಉಲಯಿ ಬಲ ಪಂದ್ ಲೆತೊಂದ್ ಪೋಪೆರ್. ದುಂಬು ದೈವದ ಸಗ್ತಿಗ್ ಆತೊಂಜಿ ಬಿಲೆ ಇತ್ತುಂಡ್. ಪಂಡಿ ನಾಲಾಯಿ ದೊಂಡೆಡಾವೊಡಾಂಡ ಕಾರ್ಣಿಕ ನೆಗತ್ ತೋಜೊಂತುಂಡ್. ಮದ್ಯೆನ ದೊಂಬು ನೆತ್ತಿಗೇರುನ ದುಂಬು ಪಂಡಿ ಪಾತೆರ ಪಲಿತೊಂದ್ ಇತ್ತುಂಡ್. ಪೆರಿಯಾಕ್ಲು ಕೊಡಿ ನಾಲಾಯಿಡ್ ಕುಲ್ಲು ಪನ್ನಗ ಕುಲ್ಲೊಂದು, ಉಂತು ಪನ್ನಗ ಉಂತೊಂದು, ಲಕ್ಕ್ ಪನ್ನಗ ಲಕ್ಕೊಂದು, ತೂಲ ಪನ್ನಗ ತುವೊಂದು, ದೆಪ್ಪು ಪನ್ನಗ ದೆತ್ತೊಂದು, ನೀಟ ಬಿರೆಲ್ದ ಗುರ್ತೊಡು ಕಂಡ ಪೊತ್ತವು ಪಂಡ ಇಲ್ಲ್ ಪೊತ್ತಾದ್, ಚಟ್ಟೊಡು ಜೆಪುಡಾಯಿನ ಪುಣೊನು ಲಕ್ಕಾಯಿನ ಸತ್ಯೊಲು ನಮ್ಮ ತುಳುನಾಡುಡಿತ್ತ. 

ತೂಕತ್ತೇರಿ ದೈವೊನು ಬಟ್ಟೆಣಿದಿಲ್ಲ್ ಬಾಲಡ್ಕ ಬರ್ಕೆದ ದಿಂಡು ದೇರು ಬೈದ್ಯೆರ್ ನಂಬ್ಯೆರ್ಡ, ಆ ಸಗ್ತಿನ್ ಅರೆರ್ದ್ ಮಂತ್ರ ಸಗ್ತಿಡ್ ಒಯ್ತೊನ್ನ ಅರೆ ಸಮ್ಮಲೆ ಪಂಜಾಂಜೆ ಬದ್ದುಂಞ ಬೈದ್ಯೆರ್, ಬದ್ದುಂಞ ಬೈದ್ಯೆರೆರ್ದ್ ಆ ಮಂತ್ರ ಸಗ್ತಿನ್ ಅರೆನ ಪಾಸಾಡಿಯಾಯಿನ ಕುಂಟಾಲ ಜಂತ್ರಿಲು ಮಂತ್ರ ಸಗ್ತಿಡ್ ಅರೆಡ್ದ್ ಒಯ್ತೊಂಡೆರ್ಡ, ಈ  ಇರ್ವೆರ್ ಮಂತ್ರ ಸಗ್ತಿಡ್ ಆ ಜಾವದೆನ್ ಒಯ್ತೊಂದು ಆರಾಧನೆ ಮಲ್ತಿನೆರ್ದಾತ್ರ ಮಂತ್ರಜಾವದೆ ಪಂದ್ ಪುದರಾಂಡ್ಂದ್ ಪೆರಿಯಾಕ್ಲು ಪನ್ಪೆರ್. ಮದ್ಯಸ್ಥೆರ್ ಕುಂಟಾಲ ಜಂತ್ರಿರ್ದ್ ಬೊಕ್ಕದ ಪಾರಿ ಪನ್ಪೆರ್.ಕೆಲವೆರ್ ಪಾರೊತಿ ಪುರಾಣ ಪನ್ಪುನಲ ಉಂಡು.  ದುಂಬುಗು ಕುಂಟಾಲ ಜಂತ್ರಿ ಚಾವಡಿಡ್ ಮಂತ್ರಜಾವದೆನ್ ನಂಬೊಂದು ಬತ್ತೆರ್ ಪಂದ್ ಪೆರಿಯಾಕ್ಲು ಪನ್ಪೆರ್. ಕುಂಟಾರು ತಂತ್ರಿನ ಪುದರುನ್ಲ ಪಾರಿ ಪನ್ಪುನಕುಲು ಕೆಲವು ಕೋಡಿಡ್ ಕುಂಟಾಲ ಜಂತ್ರಿ, ಕುಂಟಾಲ ತಂತ್ರಿ ಪಂದ್ ಪನ್ಪೆರ್. ನನ ಕೆಲವೆರ್ ಕುಂಟಾಲ ಮಂತ್ರಿ ಪಂದ್ ಪನ್ಪುನ ಪುಣ್ಯಾತ್ಮೆರ್ಲಾ ಉಲ್ಲೆರ್. ಮಂತ್ರಿ ಒಲ್ತು ಮೊಕ್ಲೆಗ್ ತಿಕ್ಯೆರ್ ಪಂದ್ ಗೊತ್ತಾಪುಜಿ.  ಕುಂಟಾಲ ಜಂತ್ರಿಲು ಮಂತ್ರ ಸಗ್ತಿದ ಮಂತ್ರಜಾವದೆನ್ ಆಸುರೀ ಕಿರಿಯಡ್ ಚಾವಡಿಡ್ ಆರಾಧನೆ ಮಲ್ತೊಂದಿತ್ತೆರುಂದ್ ಕೆಲವೆರ್ ಪನ್ಪೆರ್. ಕುಂಟಾಲ ಜಂತ್ರಿಲು ಪದ್ದೊಂಞಿ / ಬದ್ದುಂಞಿ ಬೈದ್ಯೆರೆ ಬಾವೆ ಕರಿಯ ಕಾಂತು ಬೈದ್ಯೆರೆಗ್ ಕೊರ್ನ ಸಗ್ತಿನ್ ಕುಂಟಾಲದ ಚಾವಡಿ ಕೈತಲ್ದ ಒಂಜಿ ಬನತ ಕೈತಲ್  ಗುಹೆತ ಉಲಯಿ ಆರಾಧನೆ ಮಲ್ತೊಂತೆರುಂದ್ ಲ ಇಚಾರ ಕೇಂದ್  ಬರ್ಪುಂಡು. ಕುಂಡಾರು ಚಾವುಂಡಿನ ಸಂದಿಡ್ ಕುಂಟಾಲಡ್ದ್ ಕುಂಟಾರು/ಕುಂಡಾರು ಉದಿತ್ ನ ಇಚಾರ ತೆರಿಯುಂಡುಂದು ಪೆರಿಯಾಕ್ಲು ಪನ್ಪೆರ್. ಕುಂಟಾಲ ಜಂತ್ರಿನ ಚಾವಡಿದ ಬನಟ್ ಮಂತ್ರಜಾವದೆ ಸಗ್ತಿ ಬನತ  ಉಲಯಿದ ಗುಹೆಟ್ ಇತ್ತುಂಡ, ಬನೊಟು ಗುಳಿಗನ ಆರಾಧನೆ ಇನಿಲಾ ಉಂಡು ಪನ್ಪೆರ್. ದೈವೊಲು ನೂಲು ಪಾಡಿ ಸಂಸಾರೊಗು ಅಪರೂಪೊಡೊರ  ತಿಕ್ಕುಂಡಲ, ಆಸುರೀ ಕಿರಿಯದ ದೈವೊಲೆಗ್ ದೇವೆರೆ ಓಮ ಪೂಜೆ ನಡಪುಜಿ. ದೈವಾರಾದನೆದ ಕಲೊಟು ದೈವೊಲೆಗ್ ಎಚ್ಚಾದ್ ದೇವೆರೆ ಆವಾರಂದ್ ಒಂಜಿ ತಾರಾಯಿ ಕೊರ್ಪೆರ್. ಆಂಡ ಆಸುರೀ ಕಿರಿಯದ ದೈವೊಲೆಗ್ ಆಸುರೀ ಕಿರಿಯದ ಅಗೆಲ್ ಸಂದಾಯ್ತ ಆವೊಡೆ. ಕುಂಟಾಲ ಜಂತ್ರಿನಕ್ಲೆ ಬನೊಟು ಮಂತ್ರ ಜಾವದೆ ಇತ್ತುಂಡು ಪನ್ಪುನೆಕ್ ಜಾವದೆನ ಸಂದಿದ ಆಣ್ ಮರತಡಿತ ಕಲ್ಲ್ ಪಾಡ್ದ್(ನಂಬಿಯೆ) ಮೈಯಂದ ಸೇವೆ ಕೊರ್ಯೆ ಪಂದ್ ಬರ್ಪುಂಡು. ಆಯೆ ಕುಂಟಾಲ ಜಂತ್ರಿನಲ್ತ ಆಣ್ ಮರತಡಿತ ಕಲ್ಲ್ ಕನತುದ್(ಬನೊಟು ಬೇತೆ ಬೇತೆ ಜಾತಿದ ಮರ ಬೂರುಲಿತ್ತುದ್ ಅವೆಟ್ ಆಣ್ ಮರ ಉಪ್ಪರ್ಲಾ ಯಾವ್ ಪಂಡ, ಆಣ್ ಮರಟುಂದ್ ಪಂಡ ದಾದಾಂಡಲ ಅವೆಕ್ ಅರ್ಥ ಉಪ್ಪೆರ್ಲ ಯಾವು) ತನ್ನ ಊರುಡು ಕಲ್ಲ್ ಪಾಡ್ದ್ ನಂಬಿಯೆ. ಮೈಯಂದ ಸೇವೆ ಪಂಡ ಕೋಲ ನೇಮ ಕೊರ್ಯೆ ಪಂದ್ ಅರ್ಥ. ಸಜ್ಜನೆ ಆದಿತ್ತ್ ನ ಕರಿಯ ಕಾಂತು ಬೈದ್ಯೆರೆ ಬುಳೆಸೆಲೆನ್ ಕಲುವೆರ್ ಕಂಡ್ ದ್ ಕೊನೊವೊಂತ್ ನೆಕ್ ದಾಲ ಸಾದಿ ತೋಜಂದೆ ಬೇಜಾರ್ಡಿಪ್ಪುನಗ  ಇಲ್ಲಗ್ ಬಿನ್ನೆಯಾದ್ ಬತ್ತ್ ನ ಅರೆನ ಬಾವೆ ಪದ್ದೊಂಞಿ ಬೈದ್ಯೆರೆಡ ಆರ್ ಕಷ್ಟೊನು ಪನೊನ್ನಗ ಕಾರ್ನಿಕದ ಸಗ್ತಿ ಮಂತ್ರ ಜಾವದೆನ ಬಗೆಟ್ ತೆರಿಪಾವೆರ್.ಅಂಚ ಮಂತ್ರಜಾವದೆನ್ ಕರಿಯ ಕಾಂತು ಬೈದ್ಯೆರ್, ಕುಂಟಾಲ ಜಂತ್ರಿಡ ಕಲ್ವೆರೆ ಕಲ್ತಡೆನ್ ಉಂತಾಯೆರೆ ಆ ಸಗ್ತಿನ್ ಕೇನುನಿ. ಅಪಗ ಮಂತ್ರಜಾವದೆ ಕಲ್ತೆ ಪತ್ತ್ ಮಾಣಿ ಕಲ್ವೆರೆನ್ ಕೆರ್ಪೆ, ಬಯ್ಯ ಪತ್ತ್ ಮಾಣಿ ಕಲ್ವೆರೆನ್ ಕೆರ್ಪೆ ಪಂಡುದ್ ಪನ್ಪಲ್. ತಾರಯಿ,ಬಚ್ಚಿರೆ ಬಜ್ಜೆಯಿ,ಪಿಂಗಾರ ಪಾಳೆಡ್ ಬತ್ತ್ ನ ಮಂತ್ರ ಸಗ್ತಿ ಅಪ್ಪೆ ಮಂತ್ರಜಾವದೆ ಪಂಡಿಲೆಕನೆ ಮಲ್ಪುವಲ್. ಕಲ್ತೆ/ಕಳ್ತೆ ಪಂಡ ಕತ್ತಲೆಂದ್ ನಮ ತೆರಿಯೊನೊಡು. ಪಂಜಾಜೆ ಪನ್ಪಿ ಜಾಗೆ ಕೇರಳ ಕರ್ನಾಟಕ ಗಡಿ ಬಾಗೊಡಿತ್ತುದ್ ಬಾಳೆಪುಣಿ ಗಿರಾಮೊಡುಂಡು.

ಕುಂಟಾಲ ಬೊಕ್ಕ ಕುಂಟಾರು ಈ ರಡ್ಡ್ ಇಚಾರೊಡು ಕೆಲವೆರೆಗ್ ಗೊಂದಲ ಉಂಡು. ಕುಂಟಾಲನೇ ಬೇತೆ ಕುಂಟಾರುವೇ ಬೇತೆ. ಕುಂಟಾಲಡ್ ಜಂತ್ರಿಲು ಚಾವಡಿಡ್ ಮಂತ್ರಜಾವದೆನ್ ನಂಬೊಂದಿತ್ತೆರ್ಡ, ದುಂಬುಗು ಕುಂಟಾರುಡು ಕುಂಟಾರು ಚಾವುಂಡಿನ ಸಂದಿದಲೆಕ ಮಂತ್ರಜಾವದೆನ ಇಚಾರ ಬರಂದೆ, ಮಂತ್ರ ಸಾಲೆದಕ್ಲು ಪಂದ್ ಬರ್ಪುಂಡು. ಕುಂಟಾಲ ಜಂತ್ರಿಲು ತಾಂತ್ರಿಕ ಸಗ್ತಿಯಾದ್ ಮಂತ್ರಜಾವದೆನ್ ನಂಬೊಂದಿತ್ತೆರ್. ಇನಿಲಾ ಕುಂಟಾಲ ಜಂತ್ರಿಲ್ನ ಮೂಲದಕುಲು ಮಂತ್ರಜಾವದೆನ್ ಬನೊಟೆ ನಂಬೊಂದುಲ್ಲೆರ್ ಪಂದ್ ತೆರಿನಕುಲು ಪನ್ಪೆರ್. ಆಂಡ ಕುಂಟಾರು ತಂತ್ರಿನಕ್ಲೆನವ್ಲು ಮಂತ್ರ ಸಾಲೆಡ್ ಮಂತ್ರದೇವತೆಗಳುಂದು ಆರಾಧನೆ ಮಲ್ಪುವೆರ್. ಒಂಜಿ ಕಾಲೊಡು ಮಂತ್ರಜಾವದೆನ್ ತಾಂತ್ರಿಕ ಸಗ್ತಿಯಾದ್  ನಂಬಿನವು, ಕುಡೊಂಜಿ ಆರಾಧನಾ ಸಂಸ್ಕೃತಿ ಬನ್ನಗ ಮಂತ್ರದೇವತೆಯಾದಿಪ್ಪೊಡು. ಮಂತ್ರಜಾವದೆ ಪನ್ಪುನವು ಶುದ್ಧ ತುಳು ಶಬ್ದವಾದುಂಡು. ಪುಟ್ಟು ಸಾವು ಇಜ್ಜಂದಿನ ಮಾಂತ್ರಿಕ ಸಗ್ತಿದ, ತಾಂತ್ರಿಕ ಆರಾಧನೆದ, ಆಸುರೀ ಕಿರಿಯಡ್ ನಂಬಿನ ದೈವ ಸತ್ಯ ಮಂತ್ರ ಜಾವದೆ. ರಾಜಂದೈವದ ಒರುತ ಜುಮಾದಿಲಾ ಪುಟ್ಟು ಸಾವಿಜ್ಜಂದಿನ ತಾಂತ್ರಿಕ ಸಗ್ತಿ. ಅಂಚನೇ ಮಂತ್ರ ಜಾವದೆಲಾ ಜನ ಮಂದೆಲು ನಂಬುನ ಮಂತ್ರ ಸಿದ್ದಿದ ತಾಂತ್ರಿಕ ಸಗ್ತಿ. ರಾಜಂದೈವ ಆಯಿನ ಜುಮಾದಿನ್ ಜೋಗಿ ಪುರುಷೆರ್ ಮರ್ದ  ಬೈದ್ಯಗ್ ಕೊರ್ಯೆರ್ಡ, ಮಂತ್ರಜಾವದೆನ್ ಕುಂಟಾಲ ಜಂತ್ರಿಡ ಗಂಗು ಬೈದ್ಯೆದಿನ ಮಗೆ ಕರಿಯ ಕಾಂತು ಬೈದ್ಯೆ ತಾರಯಿದ ಒರುಟು ಗೆತೊಂದ್ ಆರಾಧನೆ ಸುರು ಮಲ್ತೆ. ಜುಮಾದಿಗ್ ಅರಸೊಳಿಗೆದ ಮಾನದಿಗೆ ತಿಕ್ಕುಂಡ, ಜನ ಸಾಮಾನ್ಯೆರ್ ಮಂತ್ರಜಾವದೆನ್ ಆರಾಧನೆ ಮಲ್ತೆರ್. ತುಳುನಾಡ ಎಚ್ಚಿನ ಬಾಗೊಲೆಡ್ ಮಂತ್ರಜಾವದೆನ ಆರಾಧನೆ ಇಂಚಿಪ್ಪ ಬತ್ತುಂಡಲ ಒಂಜಿ ಕಾರಣಿಕ ಸಗ್ತಿಯಾದ್ ತುಳುವೆರ್ ಅವೆನ್ ನಂಬೊಂದು ಬೈದೆರ್. ಕುಂಟಾರು ತಂತ್ರಿಲು ಬರ್ಪುನ ದುಂಬು ಕುಂಟಾಲ ಚಾವಡಿಡ್ ಇತ್ತುದು ಕುಂಟಾಲ ಬೂಡುಡು ಇತ್ತ್ ನಿ ಕುಂಟಾಲ ಜಂತ್ರಿಲು. ಜಂತ್ರಿಲು ಪಂಡ ಬೈದ್ಯೆರೆಂದ್ ತೆರಿನಕ್ಲೆನ ಅಭಿಪ್ರಾಯ. ಅಯಿಕ್ ಪೂರಕವಾದ್ ಈ ದುಂಬು ಆ ಸಗ್ತಿನ್ ನಂಬೊಂದು ಬೈದಿನಕ್ಲೆನ ಇಚಾರ ಈ ಲೇಖನೊಡು ದುಂಬೇ ತೆರಿಪಾದೆ. ಕುಂಟಾರುಡು ದೂಮಾವತಿಂದ್ ಇಜ್ಜಂದೆ ತುಳುತ ಜುಮಾದಿಂದೆ ಆರಾಧನೆ ಇತ್ತುದ್ ಕುಂಟಾರು/ಕುಂಡಾರು ಚಾವುಂಡಿನ್ ಮಂತ್ರ ಸಾಲೆಡ್ ಅಕುಲು ಆರಾಧನೆ ಮಲ್ಪುವೆರ್. ಗಟ್ಟೊಡು ಏರಾಂಡಲ ಬೇಲೆಗ್ ಪೋದು ಅವ್ಲು ಕಂಡುದ್ ಊರುಗು ಬತ್ತೆರ್ಡ, ಗಟ್ಟದಕ್ಲು ಒಂಜಿ ಕಪ್ಪು ಕಲ್ಲ್ , ಕೆಂಪು ಕಲ್ಲ್ ಗ್ ಮುಂಚಿದ ನೀರ್ ಮೈತ್ ದ್, ಕಂಕನೆ ಪಾಡುದ್, ಆಯನ ಪಿರವು ಚಾವುಂಡಿನ್ ಬುಡ್ಪೆರ್. ಆ ದೈವ ಮಾತ್ರ ಜನೊಕ್ಲೆಗ್ ತಪ್ಪು ಮಲ್ತುಂಡ ಖಂಡಿತಾ ಸಿಗ್ಸೆ ಕೊರಂದೆ ಬುಡಂದ್. ಮಂತ್ರಜಾವದೆಲಾ ಅಂಚನೆ ಕಳು, ಕಪಟ, ಕಂಡಿನಕ್ಲೆಗ್ ಸಿಗ್ಸೆ ಕೊರಂದೆ ಖಂಡಿತ ಬುಡಂದ್. ವೈದಿಕ ವಿಧಿ ವಿಧಾನೊಡು ಮಂತ್ರೊಗು ಮಾನದಿಗೆ ಇತ್ತುಂಡ ಇತ್ತೆ ತಾಂತ್ರಿಕ ವಿಧಾನಲಾ ಮಲ್ಪುವೆರ್. ಆಂಡ ಕಷ್ಟೊಡು ಬತ್ತಿನಕ್ಲೆಗ್ ಕಳೆಪುನ ವಿಧಾನೊನು ಮೂಲು ಮಲ್ಪುವೆರ್. ಕುಂಟಾಲ ಚಾವಡಿಡ್ ಚಾವುಂಡಿ ಸಮೇತ ಒಂಜಾತ್ ದೈವೊಲು ಇತ್ತುದ್ ಜಂತ್ರಿಲು ಬನೊಟು ಗುಹೆತ ಉಲಯಿ ಮಾಂತ್ರಿಕ ಸಗ್ತಿ ಮಂತ್ರಜಾವದೆನ್ ತಾಂತ್ರಿಕ ವಿಧಿವಿಧಾನೊಡು ಪೆರಿಯಾಕ್ಲು ನಂಬೊಂದಿತ್ತೆರ್ ಪಂದ್ ತೆರಿನಕುಲ್ ಪನ್ಪೆರ್. ಕುಂಟಾರುಡ್ಲಾ ಚಾವುಂಡಿನ ಆರಾಧನೆ ಮಲ್ಪುವೆರ್. ದೇವಾಲ್ಯ ಇತ್ತುನೌಲು ಎಚ್ಚಾದ್ ದೈವಾಲ್ಯಲ ಇತ್ತುದ್ ತುಳುವೆರ್ ದೇವೆರೆರ್ದ್ ದುಂಬು ದೈವೊಲೆನ್ ನಂಬೊಂದು ಬತ್ತಿನಕುಲು. ನೂಲುಪಾಡಿ ಸಂಸಾರೊಗು ದೈವೊಲು ತಿಕ್ಕ್ ಜಿಂಡಲ ದೈವೊಲೆನ್ ಅವೆಟ್ ಕೆಲವೆರ್ ಆರಾಧನೆ ಮಲ್ತೊಂದು ಬತ್ತೆರ್. ಆಸುರೀ ಕಿರಿಯೆ ಬೋಡಾಂಡ ಅಂಚಿನ ದೈವೊಲೆಗ್ ಬೇತೆಕ್ಲೆನ್ ಚಾಕಿರಿಗ್ ಉಂತಾದ್ ಲ ದೈವೊನು ನಂಬೊಂದು ಬೈದೆರ್. ಕೆಲವೆರ್ ಮಂತ್ರಜಾವದೆನ್ ಮಾಂತ್ರಿಕ ತಾಂತ್ರಿಕ ಸಗ್ತಿಯಾಯಿನೆರ್ದಾತ್ರ ಜುಮಾದಿನ ಅಂಶಂದ್ ಪಂಡೆರ್ಡ, ಮಾತಾ ತಿಕ್ ಡ್ ಬಾಯಿ ಜಪ್ಪುನ ಕುಂಡಾರು ಚಾವುಂಡಿ, ಕುಂಟಾರುಡು ಬಾಯಿ ಜಪ್ಪುಜಿ. ಬಾಯಿ ಬುಡಂದಿಲೆಕ ದುಂಬುದ ಕಾಲೊಡು ದಾದಾಂಡಲಾ ನಡತ್ ದಿಪ್ಪೆರೆ ಯಾವು. ಕುಂಟಾರುಡು ಕುಂಟಾರು ಜುಮಾದಿ ಪಂದೆ ಆರಾಧನೆ ಇತ್ತುದು ಬೇತೆ ತಿಕ್ ಡ್ ಕುಂಟಾರು ಚಾವುಂಡಿ/ಕುಂಡಾರು ಚಾವುಂಡಿ ಪಂದ್  ಆರಾಧನೆ ಉಂಡು. ಮಲೆಯಾಳೊಡು ಕುಂಡಾರು ಚಾವುಂಡಿಯಾಂಡ, ತುಳುಟ್ ಕುಂಟಾರು ಜುಮಾದಿ ಪನ್ಪೆರ್. ಮಲೆಯಾಲೊಡು ಪಡಿಂಞಾರ್ ಚಾವುಂಡಿಯಾಂಡ, ತುಳುಟ್ ಪಡ್ಡೇಯಿ ಜುಮಾದಿ ಪಂದ್ ಪನ್ಪ. ತೆನ್ಕಾಯಿಡ್ - ಪಂಡ ಕೇರಳೊಡ್ - ಜುಮಾದಿನ್ ಚಾವುಂಡಿ ಅಪ್ಪೆಂದ್, ಧರ್ಮದೈವಂದೇ ಲೆಪ್ಪುವೆರ್. ಕುಂಟಾರು ತಂತ್ರಿಲು ಇನಿಲಾ ಜುಮಾದಿ/ಚಾವುಂಡಿ ಮಂತ್ರ ಸಗ್ತಿನ್ ನೆನೆತುದ್ ಬಗಲೆಡ್ ಬತ್ತಿನಕ್ಲೆ ಕಷ್ಟ ಪರಿಹಾರ ಮಲ್ಪುವೆರ್. ಅಕುಲು  ನೆನೆತ್ ದ್ ಕೊರ್ನವು ಇನಿಕ್ಲಾ  ಜಯ ಆಪುಂಡು ಪನ್ಪಿ ನಂಬೊಳಿಗೆ ಉಂಡು. ಈಸರ ಮಂಗಲೊಡೆ ಆದ್ ಕೇರಳ ಭಾಗೊಗು ಪೋನಗ ಗಾಳಿಮುಖ ಪನ್ಪುನ ಒಂಜಿ ಜಾಗೆ ತಿಕ್ಕುಂಡು. ಅಲ್ತ್ ಒಂಜಾತ್ ದೂರೊಡು ಕುಂಟಾರು ಪನ್ಪಿ ಜಾಗೆ ತಿಕ್ಕುಂಡು. ಕುಂಟಾಲ ಪನ್ಪಿ ಜಾಗೆ ಕೇರಳ ಭಾಗೊಡಿತ್ತಿಲೆಕನೆ ನನೊಂಜಿ ಕುಂಟಾಲ ಪನ್ಪಿ ಜಾಗೆ ಕುಡ್ಲ ವಿಶ್ವ ವಿದ್ಯಾಲ್ಯದ ಮೋನೆ ಬಾಕಿಲ್ ಕುಡ್ಲ ಮಾರ್ಗೊಡು ಪೋನಗ ಒಂತೆ ಪಿರವು ಎಡತ್ ಗುಂಡು. ಆಂಡ ಮಂತ್ರಜಾವದೆನ ಕತೆಟ್ ಬರ್ಪುನ ಕುಂಟಾಲ ಇನಿ ಉಪ್ಪುನ ಕುಂಟಾಲ ಚಾವಡಿದ ಕೈತಲ್ದ ಕುಂಟಾರು ಕೇರಳ ತುಳುನಾಡ ಬಾಗೊಡೇ ಉಪ್ಪುನಿ.                                               

                     ಬಾಲೆನ್ ತಟೊಂದ್ ನ ಮಂತ್ರಜಾವದೆ
                  

      ಕುಂಟಾಲ ಜಂತ್ರಿ ಕೈಡ್ದ್ ತಾರಾಯಿದ ಒರುಟು ಕರಿಯ ಕಾಂತು ಬೈದ್ಯೆ ಕಟ್ಟೆಮಾರ್ ಸೂಂತ್ಲಾಡಿ ಬರ್ಕೆಗ್ ಮಂತ್ರಜಾವದೆ ದೈವೊನು ಪತೊಂದ್ ಬರ್ಪೆರ್.ಮೂಲ ಆರಾದನೆಡ್ ದೈವದ ಚಾಕಿರಿ ಮಲ್ಪುವೆರ್. ಮಂತ್ರಜಾವದೆನ್ ಕನತಿ ಬೊಕ್ಕ ಕಟ್ಟೆಮಾರ್ ದ ಒಕ್ಕೆಲ್ ಡಿತ್ತಿ ಅನ್ಯ ಕೋಮುದಕ್ಲೆಗ್ ಅಕ್ಲು ಕಂಡುದ್ ಕೊನೊವೊಂತಿನೆರ್ದಾತ್ರ ಅಕ್ಲೆ ನ್ ದೈವ ಇರ್ಲ್ ಮರ್ಲ್ ಮಲ್ತುದ್ ಕೆರ್ಪಲ್. ಕಾಂತು ಬೈದ್ಯನ ಬೂತೊಡ್ದಾದ್ ಒಕ್ಕೆಲ್  ಸಕ್ಕೆಲ್ ಅರಿಗಿರಿ ಅವೊಂದುಂಡು ಪಂದ್ ಕಟ್ಟೆಮಾರ್ ಅರಂತಡೆಗ್ ದೂರು ಪೋಪುಂಡು. ಊರುಗೊಂಜಿ ಅರಮನೆಂದ್ ಎಲ್ಯ ಮಟ್ಟ್ ದ ವ್ಯವಸ್ಥೆಲಾ ದುಂಬಿತ್ತುಂಡು. ಮೂಲು ಅರಮನೆಂದ್ ಪನಂದೆ ಕಟ್ಟೆಮಾರ್ ಜನನಾಂದ್, ಜನನಾಂದ ಬೂಡು ಪಂದ್ ಪನ್ಪೆರ್. ಕಟ್ಟೆಮಾರ್ ಜನನೊಗು ಕಾಂತು ಬೈದ್ಯನ್ ಲೆಪುಡಾಯಿನಾರ್ ನಿನ್ನ ಬೂತೊರ್ದಾತ್ರ ಎನ್ನ ಒಕ್ಕೆಲ್ ಸಕ್ಕೆಲ್ ಪೂರ ಪೊಂಡು. ನಿನ್ನ ಬೂತೊನು ಬುಡ್ಪನಾ ಅತ್ತ್ ಎನ್ನ ಒಕ್ಕೆಲ್ ಡ್ದ್  ಪೋಪನ ಪಂದ್ ಕೇನ್ವೆರ್. ಯಾನ್ ಪೋಂಡಲಾ ಮಲ್ಲೆಜ್ಜಿ ದನಿಕುಲೆ, ಎನ್ನ ಬೂತೊನು ಮಾತ್ರ ಬುಡ್ಪುಜಿ ಪಂದ್ ಇಲ್ಲೊಕ್ಕೆಲ್ ಗೆತೊಂದು ಕಾಂತು ಬೈದ್ಯೆ ಕಟ್ಟೆಮಾರ್ ದ ಕೈತಲ್ ಎದುರಿಪ್ಪುನ ಕೊಲ್ಲಯಿ ಪನ್ಪಿ ಸುದೆಟ್ ನೀರ ಮಿತ್ತೆ ಕುಲ್ಲುದು ಧ್ಯಾನ ಮಲ್ತುದ್ ಎಂಕ್ ದುಂಬು ಪಿರವುಂದು ಏರ್ಲಾ ಇಜ್ಜಿ, ಎನ್ನ ಒಕ್ಕೆಲ್ ಪೊಂಡತ್ತಾ, ಎಂಕೇರ್ ಗತಿ ಪಂದ್ ಕಣದುಃಖ ಪಾಡೊಂದು ಜಪ ಮಲ್ಪುವೆ. ಕನೊಟು ಬತ್ತಿ ಮಂತ್ರಜಾವದೆ, ಈ ಕಣದುಃಖ ದೆಪ್ಪಡ, ಯಾನ್ನುಲ್ಲೆ ಪಂದ್ ಧೈರ್ಯ ಕೊರ್ದು ಕುಡ ಕಟ್ಟೆಮಾರ್ ಗ್ ಪೋದು ಮಂತ್ರಜಾವದೆ ತೊಂದರೆ ಕೊರ್ಪಲ್. ಇಂದೆನ್ ತೂಯಿನ  ದನಿಕುಲ್ ಬಲಿಮೆದ ಬಲ್ಯಾಯನ್ ಲೆತ್ತುದ್  ನಿಮಿತ್ತ ನೋಟ ತೂನಗ ಕಾಂತು ಬೈದ್ಯನ ಒಟ್ಟುಗು ಬೈದ್ ನ ದೈವದ ಕಾರ್ನಿಕ ಪಂದ್ ತೋಜುಂಡು. ನಿಮುರ್ತಿ ದಾದಂದ್ ಕೇನ್ನಗ ಕಾಂತು ಬೈದ್ಯನ್ ಲೆಪುಡಾಲೆ, ಒತ್ತಿ ಕಟ್ಟಾದ್, ಆಯಡ ಪಾರಿ ಪನ್ಪಾಲೆ ಪಂದ್ ಪನ್ಪೆರ್. ಒತ್ತಿ, ಒತ್ತೆ, ಒರಿಯಗುಂದ್ ಅರ್ಥ. ಒರಿಯಗ್ ಮಂತ್ರಜಾವದೆನ್ ಕಟ್ಟಾದ್ ಪಾರಿನ್ ಕರಿಯ ಕಾಂತು ಬೈದ್ಯಡ ಪನ್ಪಾಲೆ ಪಂದ್ ಅರ್ಥ. ಅಂಚ ಕಟ್ಟೆಮಾರ್ ಗ್ ಕಾಂತು ಬೈದ್ಯನ್ ಲೆಪುಡಾದ್ ನಿನ್ನ ಬೂತದ ಕಾರ್ನಿಕೊನು, ಎಂಕ್ಲೆಗ್ ತಡೆಯೆರೆ ಆವೊಂದಿಜ್ಜಿಂದ್ ಬಲಿಮೆದಾರ್ ಪನ್ನೆನ್ ಪನ್ಪೆರ್. ಎನ್ನ ಬೂತೊಗು ಒತ್ತಿ ಕಟ್ಟಾದ್ ಪಾರಿ ಪಂಡೆಡ ಎಂಕ್ ದಾದ ಕೊರ್ಪರ್ ಪಂದ್ ಕಾಂತು ಬೈದ್ಯೆ ಕೇನುವೆ. ಅಪಗಂಡ ಸೂಂತ್ಲಾಡಿ ಬರ್ಕೆನ್ ನಿಕ್ಕ್ ಉತ್ತರುಂಬಳಿ ಕೊರ್ಪೆಂದ್ ಪನ್ಪೆರ್. ಕಾಂತು ಬೈದ್ಯೆ ಪಂಡಿಲೆಕನೆ ಮಲ್ಪುವೆ. ಕಷ್ಟ ಪೂರ ಪರಿಹಾರ ಆದ್ ಒಕ್ಕೆಲ್ ದಕ್ಲು ಸೈತ್ ಬೂರುನ, ಸೈತ್ ಮುತ್ತುನ ಪೂರ ಉಂತುಂಡು. ಸೂಂತ್ಲಾಡಿ ಬರ್ಕೆ ಉತ್ತರುಂಬಳಿ ತಿಕ್ಕುನ ದುಂಬುಲ ಕರಿಯ ಕಾಂತು ಬೈದ್ಯೆ ಅವ್ವೇ ಸೂಂತ್ಲಾಡಿ ಬರ್ಕೆಡೇ ಇತ್ತ್ ನಿ. ಸೂಂತ್ಲಾಡಿ ಬರ್ಕೆನ್ ಕಟ್ಟೆಮಾರ್ ದಕುಲು ಕರಿಯ ಕಾಂತು ಬೈದ್ಯಗ್ ಉತ್ತರುಂಬಳಿ ಕೊರಿ ಬೊಕ್ಕ ಆಯೆ ಅವ್ಲು ಮಂತ್ರಜಾವದೆನ್ ಆರಾಧನೆ ಮಲ್ತೊಂದು ಬರ್ಪೆ. ಅಲ್ತುರ್ದ್ ಬೊಕ್ಕ  ಮಂತ್ರಜಾವದೆ ಇರುವೈಲು ಇಂರ್ದಾಲ್ ಪಟ್ಟದ  ಬಟಾರದಿಲ್ಲ ನೋಣಯ್ಯ ಬೈದ್ಯ ನಡೆ ಬರ್ಪಲ್. ಅಲ್ತುರ್ದ್ ಕಡತ್ ದ್ ಕುಚ್ಚಾಡಿ ಗುತ್ತು, ಕೊರಗ ಬೈದ್ಯ ನಡೆ ಬರ್ಪಲ್, ಅಲ್ತುರ್ದ್ ಬೊಕ್ಕ  ಕುಪ್ಪೆಪದವು ಕುಳವೂರ ನೂರ್ದಾಲ ಪಟ್ಟದ ಪಾದೆದಿಲ್ಲು ಪಾಂಡಿಗುರಿಗ್ ಬರ್ಪಲ್. ಪಾಂಡಿಗುರಿಟ್ ಭೈರವ ದೇವೆರೆ ಆರಾಧಕಿಯಾಯಿನ  ಬೈರೆ  ಬೈದ್ಯೆದಿ ನ ಮೇಲ್ ಡ್ ವಸಾಯೊಡು ಬತ್ತಿನ ಮಂತ್ರಜಾವದೆ ಯಾನ್ ನಿಕ್ಲೆಗಾಪುನ ಬೂತ ಬೈದೆಂದ್ ಪನ್ಪಲ್. ಓಲು ನಂಬೊಡು ಪನ್ನಗ, ಭೈರವ ದೇವೆರೆ ಬಲ ಭಾಗೊಡು ನಂಬುಲೆಂದ್ ನುಡಿ ಕೊರ್ಪಲ್. ಅಂಚನೆ ಅಕುಲು ಭೈರವ ದೇವೆರೆ ಬಲ ಭಾಗೊಡು ಮಂತ್ರಜಾವದೆನ್ ನಂಬೊಂದು ಬತ್ತೆರ್. ಪಾಂಡಿಗುರಿತ  ಕಟ್ಟ್ ರ್ದ್ ಎಲಿಯ ಸಾರಾಳ ಸೀಮೆದ ಮಂಜಿಲ ಗುತ್ತುದ ಮಾನ್ಯಪ್ಪ ಬೈದ್ಯೆರೆಡ ಆರಾಧನೆ ಗೆತೊನುವಲ್. ದುಂಬುಗು ಕುಳವೂರ ನೂರ್ದಾಲ ಪಟ್ಟದ ಕಡೆಗುಂಡ್ಯ ಬರ್ಕೆದ ನೊಕ್ಕೆ ಬೈದ್ಯೆದಿನ ಮಗೆ ಪೊಂಕ್ರ ಬೈದ್ಯನಡೆ  ಬರ್ಪಲ್. ಅಲ್ತ್  ಬೊಕ್ಕ ಬಲ್ಲಾಜೆ ಬರ್ಕೆಗ್, ಬಲ್ಲಾಜೆ ಬರ್ಕೆರ್ದ್ ಕಲ್ಲಾಜೆ ಬರ್ಕೆಗ್, ಕಲ್ಲಾಜೆ ಬರ್ಕೆರ್ದ್ ಉಕ್ಕುಡ ಕಲ್ಲ್ ಗ್ ಬರ್ಪಲ್. ಉಕ್ಕುಡ  ಪನ್ಪಿ ಜಾಗೆ ಇಟ್ಟೇಲ್ ಡ್ದ್ ಕಾಸರಗೋಡು  ಪೋಪುನ ಸಾದಿಡ್ ರಡ್ಡ್ ಮೂಜಿ ಮೈಲ್ ದೂರೊಡು  ತಿಕ್ಕುಂಡು. ಅಲ್ತ್ ಬೊಕ್ಕ ಮಂತ್ರಜಾವದೆ ತುಳುನಾಡ ಕಡೆ ಕೊಡಿ ಪೋಪಲ್.  ಅಂಚನೆ ದುಂಬುಗು ಮಂತ್ರಜಾವದೆನ ಕೋಲೊಗು ಪೋದು ಗಂಧ ಪುರ್ಸಾದ ಏರ್ ಪತ್ತಿಯೆರಾ ಅಕ್ಲೆ ಪಿರವುಡು ಪೋದು ಅಕ್ಲೆಗ್ ಕಾಪಾದ್ ಉಂತ್ಯಲ್. ಮದ್ಮೆ ಮಲ್ಪುನಗ ಪೊಣ್ಣನ ಬೆರಿಯೆ ಪೋದು ಅಕ್ಲೆನ ಕುಟುಮೊನು  ಬೆಳಗವೊಂದು ಬತ್ತಲ್ . ದುಂಬುಗು ಪೋದು ಮಂತ್ರಜಾವದೆ ಆರಾಧನೆ ಪಡೆಯೊಂದು ಬತ್ತಲ್.  ಮಂತ್ರಜಾವಾದೆನಕ್ಲೆಡ್ ರಡ್ಡ್ ಜಾಗೆಡ್ ಸನ್ಯಾಸಿ ಮಂತ್ರಜಾವದೆ ಉದಿತ್ ನ ಇಚಾರ ಎರಿಯಾಕ್ಲೆಡ ತೆರಿಯುಂಡು. ಬಾಬಾ ಬುಡನ್ ಗಿರಿ(ಚಿಕ್ಕ ಮಗಳೂರು)ತ  ಕೈತಲ್ ಏಳ್ ಜನ  ಸನ್ಯಾಸಿಲೆಗ್  ದಾದನಾ ಇಚಾರೊಡು ಲಡಯಾದ್ ಇರ್ವೆರ್ ತುಳುನಾಡುಗ್ ಬರ್ಪೆರ್. ಒರಿ ನಾಗರ ಸನ್ಯಾಸಿ ಪನ್ಪುನಾರ್ ಬಂಟಾಲ ಬಡ್ಡಕಟ್ಟೆಗ್ ಬತ್ತುದ್ ಮಸಣೊಡು  ಕುಲ್ಲುದು  ಸನ್ಯಾಸಿ ಮಂತ್ರಜಾವದೆನ  ಸಗ್ತಿನ್  ತುಳುನಾಡುಗ್ ಪಸೆರ್ಯೆರ್ಡ,   ನನೊರಿ  ಸನ್ಯಾಸಿ ಸೂಂತ್ಲಾಡಿ ಬರ್ಕೆ ಕಟ್ಟೆಮಾರ್ ದಲ್ಪ ಕುಪ್ಪೆಪದವುಗು ಮುಟ್ಟ ಸುಣ್ಣೊನಿ ಸುದೆಟ್ ತಪಸ್ಸ್ ಮಲ್ತುದ್ ಅಲ್ಪರ್ದ್ ಸನ್ಯಾಸಿ ಮಂತ್ರಜಾವದೆ ಕೆಲವು ಕೋಡಿಗ್ ಪಸೆರುಂಡ್. ಬೆದ್ರದ ಕಟ್ಟೆಮಾರ್ ದ ಕೈತಲ್ದ ಸುಣ್ಣೊನಿ  ಸುದೆ ಬರಿಟ್ ಉಪ್ಪುನ ಜಾವದೆನ್ ಮಾಟ ದೇವತೆ, ಕೃತಿಮ ದೇವತೆ,ಕುಟ್ಟಿ ದೇವತೆ ಪಂದ್ ಪನ್ಪೆರ್. ಕೇರಳೊಡು ಕುಟ್ಟಿಛಾತನ್ ಪನ್ಪೆರ್. ಸುಣ್ಣೊನಿಡ್ ಮಲ್ಲ ಕಯ, ಮಲ್ಲ ನೆಗರ್ ಗುಂಡಿ ಉಂಡು. ಸುಣ್ಣೊನಿಡ್ ಸನ್ಯಾಸಿ ಮಂತ್ರಜಾವದೆನ ಒಟ್ಟುಗು ಗುಳಿಗನ ಆರಾಧನೆ ಉಂಡು. ಸುಣ್ಣೊನಿ ಸುದೆಟ್ ರಾಘವೇಂದ್ರ ಸ್ವಾಮಿಲು 12 ವರ್ಸದಾತ್ ತಪಸ್ಸ್ ಮಲ್ತುದೆರುಂದ್ ಪೆರಿಯಾಕುಲು ಪನ್ಪೆರ್. ಸುಣ್ಣೊನಿ ಸುದೆ ಬರಿತಲ್ಪ ಉಪ್ಪುನ ಸನ್ಯಾಸಿ ಮಂತ್ರ ಜಾವದೆಗ್ ಜೋಳಿಗೆ ಇತ್ತುದು ಓಲ್ಲಾ ಆ ಮಂತ್ರ ಜಾವದೆನ್ ಇಲ್ಲಲ್ ನಂಬುಜೆರ್, ಪಿದಯಿಡ್ ನಂಬುವೆರ್. ಬಂಟಾಲ ಮಸಣೊಡು ಕುಲ್ದು ಜಪಿತೊಂತ್ ನ ಸನ್ಯಾಸಿ ತನ್ನ ರುದ್ರಾಕ್ಷಿ ಮಾಲೆನ್ ತುದೆಕ್ ಪಾಡ್ವೆರ್. ಅವು ಒರಿ ಮೂರ್ತೆದ ಬೈದ್ಯೆರೆಗ್ ತಿಕ್ಕ್ ದ್ ಆರ್ ಆರಾಧನೆ ಮಲ್ಪುವೆರ್. ಪಣಕಜೆದ ಕೈತಲ್ ಲ ಸನ್ಯಾಸಿ ಮಂತ್ರಜಾವದೆ ಒರಿ ಬೈದ್ಯೆರೆಗ್ ತಿಕ್ ದ್ ಆರ್ ಆರಾಧನೆ ಮಲ್ತೊಂದು ಬತ್ತೆರ್. ಆಂಡ ಬೆದ್ರ ಸುಣ್ಣೊನಿಡ್ ರಾಮ ಪೂಜಾರಿ ಪನ್ಪುನಾರೆಗ್ ಸನ್ಯಾಸಿ ಮಂತ್ರಜಾವದೆ ತಿಕ್ಕ್ ದಿನಿ. ದುಂಬುದ ಕಟ್ಟುನಕುಲು ಪಾಪ ಸಂದಿನೇ ಕಲ್ತೊಂಡೆರ್ ವಿನಃ  ಅವೆತ ಇಚಾರೊನು ತೆರಿಯರೆ ಪೋಯಿಜೆರ್. ಅಂಚಾದ್ ಇನಿ ಸಂದಿ ಪಾಡ್ದನದ ಅಧ್ಯಯನಕಾರೆರೆಗ್ ಉಂದೆಡ್ದ್ ಬಾರೀ ತೊಂದರೆಯಾತುಂಡು. ಅಂಚನೆ ಮಾಟೊಗುಂದ್ ಒಂಜಿ ಜಾವದೆನ್ ಏರಾಂಡಲ ನಂಬೆರೆ ಸಾಧ್ಯನಾ? ದೈವಾರಾಧನೆ ಜಾತ್ಯಾತೀತ. ಅಂಚಾದ್ 16 ಜಾತಿದ ಚಾಕಿರಿಡ್ ಬೇತೆ ಕೋಮುದಕುಲ್ಲಾ ಚಾಕಿರಿಗ್ ಉಂತುವೆರ್. ಅಂಚನೆ ಇನಿ ಮಂತ್ರಜಾವದೆಗ್, ಕಲ್ಲುರ್ಟಿಗ್ ಮೂರ್ತಿ ಬೊಕ್ಕ ಕಟ್ಟುನಕುಲ್ಲಾ ಕರಿಯಣಿ ಪಾಡೊಂದುಲ್ಲೆರ್. ಮುತ್ತೇಸಿನಕ್ಲೆ ಒರುವಾಯಿನ ಕರಿಯಣಿನ್, ತಾಳಿನ್ ನಿಜವಾದ್ ಇಂಚ ಪಾಡೊಲ್ಯ ಬಲ್ಯಂದ್ ತೆರಿನಕ್ಲ್ ಪನೊಡು. ನನ ಕೆಲವೆರ್ ಪನ್ಪುಲೆಕ ಒರಿ ನೂಲು ಪಾಡಿ ಸಂಸಾರದಾರ್ 48 ದಿನ ನೀರ್ ದ ಮೇಲ್ಡ್ ಕುಲ್ದು ಮಂತ್ರ ಜಪ ಮಲ್ತಿನಾರೆಗ್ ಕಲ್ಲ ಸುಣ್ಣ ಮುದ್ರೆದ ಒರುಟು ತಿಕ್ಕ್ ನ ಸಗ್ತಿ ಮಂತ್ರಜಾವದೆ ಪಂದ್ ಪನ್ಪೆರ್. ಕೆಲವು ಮೂಲದ ಪ್ರಕಾರ ತೂಕತ್ತೇರಿ ಪನ್ಪುನವು ಕಲ್ಲುರ್ಟಿನ ಕೈಟುಪ್ಪುನ ಒಂಜಿ ಕುಲೆಂದ್ ಅವೆನ್ ಸನ್ಯಾಸಿಲು  ಬೋಡಾಯಿಲೆಕ ಮಾಂತ್ರಿಕ ತಾಂತ್ರಿಕ ಸಗ್ತಿಗ್ ಗಳಸೊಂತೆರುಂದ್ ಪನ್ಪುನ ಇಚಾರ ತೆರಿದ್  ಬರ್ಪುಂಡು.

     

                 ತೂಗುಯ್ಯಾಲೆದ ಮಿತ್ತ್ ಮಂತ್ರಜಾವದೆ

ಕಲೆ ಕಾರ್ನಿಕದ ಮಂತ್ರಜಾವದೆನ್ ನಂಬಿನಕುಲು ಏರ್ಲಾ ಸೋತುನಕುಲು ಇಜ್ಜಿ. ಪನಿಯರೆ  ದಾದ ದಾದ ಪಂಡುದ್ ನಮನ್ ತಪ್ಪು ಸಾದಿಗ್ ಒಯ್ತೆರ್ಡಲಾ ಯಾನ್ ತೆರಿನ ಒಂಜಿ ರಡ್ಡ್ ಮೂಜಿ ಮಂತ್ರ ಜಾವದೆನ ಕಾರ್ನಿಕೊನು ತೆರಿಪಾದೆ. ಬೊಳ್ಳೂರುದ ಕೈತಲ್ದ ಒಂಜಿ ಅಪ್ಪೆನ ಮಗೆ ತಪ್ಪದಿತ್ತುದ್ ವರ್ಸ ಕರಿಂಡಲಾ ಬರಂದೆ ಆನಗ ಓಲೋಲು ಪ್ರಶ್ನೆ ಕೇನ್ನಗಲಾ ಆಯೆ ಕರಿದ್ ಪೋಯೆ ಪಂದ್ ತೋಜಿದ್ ಬತ್ತುಂಡ, ಮಂತ್ರಜವಾದೆನ ನಡೆಟ್ ಉಂತುದು ಕೇನ್ನಗ ಬರ್ಪಿ ಕೋಲದ ದುಂಬು ಆಯನ್ ಬರ್ಪಾವೆ ಪಂಡಿ ದೈವ ಅಂಚನೇ ಕೋಲದ ದಿನತಾನಿ ಕಲೊಕು ಬರ್ಪಾಯಿನ ಸತ್ಯಮಾತ್ಮೆದ ಕಲೆ ಒಂಜಾಂಡ. ನನೊಂಜಿ ಕುಡಲದ ಬಂದರ್ ಡ್ ಲಾರಿರ್ದ್ ಲಾರಿಗ್ ಕಟ್ಟ್ ತುಂಬುದು ಪಾಡೊಂತ್ತಿನ ಒರಿ ಗಂಜಿಮಠತಾರ್ ಅಪ್ಪೆನ ಅನುಗ್ರಹೊಡು ಇನಿ ಸಾರ ಕಟ್ಲೆ ಜನೊಕು ನುಪ್ಪು ಪಾಡುನ ತಾಕತ್ತ್ ಪಡೆತೆರ್. ಆರ್ನ ಗುರ್ಕಾರ್ದಿನ ಮೇಲ್ಡ್ ಈ ತಗ್ಗ್ ಪಿರಯೊಡ್ಲ ಮಂತ್ರಜಾವದೆ ಕೋಲದಪಗ ವಸಯೊಡು ಬರ್ಪಲ್. ಅಂಚನೆ ಒಂಜಿ ಕಾರ್ ಬುಡೊಂದಿತ್ತಿನ ಚಾಲಕೆ ಒರ ಮಂತ್ರಜವಾದೆನ ಕಲೊಟು ಪಾರಿ ಪನೊಡುಂದು ಆಸೆಡಿತ್ತ್ ದ್ ಒಂಜಿ ಕಲೊಟು ಪಾರಿ ಪನ್ಪುನಾರ್ ಇಜ್ಜಂದೆ ಕಟ್ಟುನಾರೆಡ ನಾಲ್ ವಾಕ್ಯ ಪಾರಿ ಪನ್ಪುನೆನ್ ಕೇಂದ್ ತೆರಿದ್ ಪಾರಿ ಪಂಡುದ್ ಕಡೆಕ್ ಮಂತ್ರಜಾವದೆನ ಅನುಗ್ರಹ ಅಯನ ಮಿತ್ತಾದ್ ಅವೆರ್ದ್ ಬೊಕ್ಕ ಮಂತ್ರಜಾವದೆಗ್ ಚಾವಡಿ ಕಟ್ಟಾದ್ ಕಷ್ಟೊದು ಬತ್ತಿನ ಆವ್ವೇತೋ ಜನೊಕ್ಲೆಗ್ ಮಂತ್ರಜಾವದೆನೆನ್ನಿದ್ ಪುರ್ಸಾದ ಕೊರ್ನ ಆಯನ ಕೀರ್ತಿ ಲೋಕೊಮುಖೊಗು ತೆರಿದ್ ಪೊಂಡು.  ದಾದನ ಅಕಲ್ ತಪ್ಪುಡು ಒಂಜಿ ತೊಂದರೆಯಾದ್ ಸಾದಿ ನಡಪೆರೆ ಆವಾಂದಿನಾತ್ ಸಾಲೊಡ್ ಬೂರ್ನಗ ಕಡೆಕ್ ಕಟ್ಟುನಾರೆ ನಡೆ ಬತ್ತುದ್ ದಾದ ಮಲ್ಪೊಡು ಪಂದ್ ಕೇನ್ನಗ, ಮೂಜಿ ಸಂಕ್ರಾಂತಿಗ್ ಮೂಜಿ ಅಗೆಲ್ ಪಾಡ್ದ್  ನಂಬುಲಂದ್ ಆರ್ ಪಂಡಿಲೆಕನೇ ಮಲ್ತುದ್ ಬೊಕ್ಕ ಅಯನ ಕಷ್ಟ ಪರಿಹಾರ ಆದ್ ಇನಿಕ್ಲಾ ಬಂಟಾಲ ತಾಲೂಕುಡು ಬಾರಿ ಪುಗಾರ್ತೆಡ್ ಕಷ್ಟೊಗು ಬತ್ತಿನಕ್ಲೆಗ್ ಆರ್ ಸಕಾಯ ಮಾಲ್ತೊಂದುಲ್ಲೆರ್. ತಪ್ಪು ಮಲ್ತುಂಡ ತನ್ನ ಮುಕ್ಕಾಲ್ದಿಗ್ಲಾ ಶಿಕ್ಷೆ ಕೊರಂದೆ ಬುಡ್ತಿಜಲ್ ಮಂತ್ರಜಾವದೆ. ಕಮ್ಮಾಜೆದ ಒಂಜಿ ಇಲ್ಲಗ್ 45   ವರ್ಸ ದುಂಬು ಒರಿ ಮಾನೆಚ್ಚಿಲ್ ಗ್ ಬತ್ತುದು ದಾದನಾ ತಪ್ಪಾದ್ ಅಲ್ತ  ಇಲ್ಲದ ಗುರ್ಕಾರ್ದಿನ ಮಿತ್ತ್ ಮಂತ್ರಜಾವದೆ ವಸಯಾದ್ ಮುಕಾಲ್ದಿಗ್ ಬೊಕ್ಕ ಮಾನೆಚ್ಚಿಲ್ ದ ಮುಕಾಲ್ದಿನ ನಡುಟು ಪಾತೆರಕತೆಯಾದ್ ದುಂಬುಗು  ಮುಕಾಲ್ದಿಗ್ ಪಾತೆರೆರೆ ಆವಂದೆ ಬೂರ್ನಗ ಒಂತೆ ಪೊರ್ತುಡೇ ಮುಕಾಲ್ದಿನ ಇಡೀ ಸರ್ರೊಡು ತರೆರ್ದ್ ಕಾರ್ ಮುಟ್ಟ ಗುಳ್ಳೆ ಬತ್ತ್ ದ್ ತಪ್ಪು ಕಾಣಿಕೆ ಪಾಡಿಬೊಕ್ಕ ಸರಿಯಾಯಿನ ಘಟನೆ ನಮ್ಮ ಸುತ್ತಮುತ್ತಲಿಗೆಡೇ ಉಪ್ಪುನಗ,  ಅಂಚಿನ ದೈವನೇ ಇಜ್ಜಿಂದ್ ಪಂಡಿನಕ್ಲೆನ್ ಮಂತ್ರಜಾವದೆ ಬುಡುವಲಾ? ಖಂಡಿತಾ ಇಜ್ಜಿ. ಕೆಲವು ಕಟ್ಟುನಕುಲು ಚಾಕಿರಿ ಜಾಸ್ತಿಯಾವೊಡುಂದು ಕೆಲವು ಇಲ್ಲಲ್ ಮಂತ್ರಜಾವದೆನ್ ನಂಬಯೆರೆ ಸುರು ಮಲ್ದೆರ್. ಉಂದೆರ್ದ್  ಇಲ್ಲದಕ್ಲೆಗ್ ತೊಂದರೆ ಅತುಜಿ, ಇಲ್ಲದಕ್ಲೆ ಬೇನೆ ಬೇಸರ್ಪು ಪೂರ ಕಟ್ಟುನಕ್ಲೆಗ್ ಕಂತ್ ದ್, ಮಾರಿ ಬೆರಿ ಸಿರ್ಕ್ ಬತ್ತ್ ದ್ ನೇಮ ಕೋಲ ಆವಂದೆ ಒರಿದಿನ  ಇಚಾರ ನಮ್ಮ ಕಣ್ಣೆದುರುಗೇ ಉಂಡು. ಕೆಡೆಕ್ಲಾ ನಮ ಪನ್ಪುನಿ ಈತೆ, ನಮ ಪ್ರಾಮಾಣಿಕವಾದ್ ದೈವ ಉಂಡುಂದ್ ನಂಬುಂಡ ದೈವ ಖಂಡಿತಾ ನಮ್ಮ ಕೈ  ಬುಡ್ಪುಜಿ. ನಮ ದೈವೊನು ಕಾಸ್ ಡ್ ಲಪ್ಪೆರೆ ಪೋಂಡ ಖಂಡಿತಾ ದೈವ  ನಮಕ್ ಒಲಿಯುಜಿ. ದೈವೊಲೆಗ್ ಬೋಡಾಯಿನ ಒಂಜಿ ಗಿಂಡೆ ನೀರ್, ದೀಪುನ ಬೆರ್ಮೆರೆ ಸುತ್ತೆ, ನಮ್ಮ ಸುತ್ತಮುತ್ತಲಿಗೆಡ್ದ್ ಅಜತ್ ದೀನ ಪುರ್ಪ, ಒಂಜಿ  ತುಡರ್, ದೂಪ, ತಂಬಿಲ, ಅಗೆಲ್, ಎರಿಯಾಕ್ಲೆನ ಒಂಜಿ ರಡ್ಡ್ ಮದಿಪುದ ಪಾತೆರ, ನಂಬಿನಕ್ಲೆನ ಮನಭಕ್ತಿರ್ದ್ ಮಲ್ಲ ದಾದೆನ್ಲಾ ದೈವ ಬಯಕುಜಿ. ನಮ್ಮ ಅಪ್ಪೆನ್ ಎಂಚ ಅಪ್ಪೆಂದ್ ಮೋಕೆಡ್ ಲೆಪ್ಪುವನ ಅಂಚನೆ ಮಂತ್ರಜವಾದೆಗ್ ಉಪ್ಪುನ ಅಲೆನ ಮೂಲ ಪುದರ್ಡೇ ಲೆತ್ತುದ್, ದೇವಿನಕ್ಲೆನ  ಪುದರ್ಡ್ ಲೆಪ್ಪಂದೆ, ಮೂಲ ಆರಾಧನೆಡ್, ಮೂಲ ಕಟ್ಲೆಡ್ ನಂಬೊಂದು ಬತ್ತರ್ಡ, ಪೋಯಿನಲ್ಪ ಬತ್ತಿನಲ್ಪ ಕೈಕಾರ್ ಸುಖ, ಆಯುರಾರೋಗ್ಯ , ಸಿರಿ ಸಂಪೊತ್ತು ಕೊರ್ದು ಖಂಡಿತಾ ನಿಕ್ಲೆನ್ ಕಾಪುವಲ್ ಅಪ್ಪೆ ಮಂತ್ರಜಾವದೆ.

ಮಂತ್ರಜಾವದೆಗ್ ದೇವಿನಕ್ಲೆ ಆರತಿ,ತ್ರಿಶೂಲ,ದೇವೆರೆ ಅಭಯಹಸ್ತ ಬೈದ್ಂಡ್

ಮಂತ್ರಜಾವದೆಗ್ ಕಟ್ಟ್ ನಾರ್ನ ನಾಲಾಯಿಡ್ ಪೊಂಜೊವೊರ್ತಿ ಕರ್ಪೂರ ಪೊತ್ತದ್ ದೀತ್ ನಿ

  

       ಮಂತ್ರ ಜಾವದೆ ಬೇತೆ ಬೇತೆ ಲೆಕ್ಕೊಡು ಒಂಜಿಲ್ಲಗ್ ಪೋಪುಂಡು.ಕೊರ್ನ ಪೊಣ್ಣನ ಇಲ್ಲಗ್ ಅಲೆನ ಬೆರಿಯೆ ಪೋಪುಂಡು(ಅಳಿಯಕಟ್ಟ್).ಆ ದೈವೊಗು ಪರಕೆ ಪಂಡ್ ದಿತ್ತೆರ್ಡ ಅಕ್ಲೆನಡೆ ಪೋಪುಂಡು.ಒರ್ಯನ ಇಲ್ಲ ಕೈತಲ್ದಾಯೆನಾ,ದೂರದಾಯೆನಾ ಆಯಗ್ ಅನ್ಯಾಯ ಮಲ್ತೆಡ ಅನ್ಯಾಯ ಮಲ್ತ್ ನಾಯನ ಇಲ್ಲಗ್ ಪೋಪುಂಡತ್ತಂದೆ ರಡ್ಡ್ ತಿಂಗೊಲ್ದ ಉಲಯಿ ನಂಬುಲೆಕ ಮಲ್ಪುಂಡು.ಗಂದ ಪತೊಂದು ಪೋಪುನಕ್ಲೆನ ಪಿರವು ಪೋಪುಂಡು ಪನ್ಪುನವು ಸರಿಯತ್ತ್.

ಬರವು:-

ಕೆ.ಮಹೇಂದ್ರನಾಥ್ ಸಾಲೆತ್ತೂರು.ಎಂ.ಎ

ತುಳು ಒರಿಪುಗ ಅಂತರ್ಜಾಲ ಗುರ್ಕಾರ್ರ್;

ತುಳು ಸಾಹಿತ್ಯ ಪರಿಷತ್ ಅಂತರ್ಜಾಲ ಗುರ್ಕಾರ್ರ್

ಬರವುಗು ಸಕಾಯ - ಯನ್. ಕೆ. ಸಾಲ್ಯಾನ್ -  ನೇಮ‌ಕಟ್ಟುನ ಹಿರಿಯಾರ್, ಜನಾರ್ದನ ಬುಡೋಳಿ -ನೇಮ ಕಟ್ಟುನಾರ್ ವಿಜಯ ಕುಮಾರ್ ಕಾಸರಗೋಡು - ಸಂದಿ ಪಾಡ್ದನ ಸಂಶೋದಕೆರ್

##################################

ತುಳುನಾಡ ನಾಗಾರಾದನೆ ಎಸಲ್_,1

 ತುಳುನಾಡ ನಾಗಾರಾಧನೆ - ಎಸಲ್_1

ಇನಿ ನಮ್ಮ ತುಳುವೆರ್ ಸಂಸ್ಕೃತ ಬೊಕ್ಕ ಪೊಸ ಸಂಸ್ಕೃತಿದ ಆಚರಣೆಲೆನ್ ಒತ್ತೊಂದು ಪೋಯಿನೆರ್ದಾತ್ರ ತುಳುನಾಡ ಆಚರಣೆದ ಕೆಲವೊಂಜಿ ಪರ್ಬ ಪರ್ವೊಲು ಮಯಕಾದ್ ಒವು ನಮ್ಮವತ್ತ ಆ ಪರ್ಬೊಲೆನ್ ಪಾಲನೆ ಮಲ್ತೊಂದುಲ್ಲ, ನಮ್ಮ ಮೂಲ ಆಚರಣೆಲೆನ್ ಮದತೊಂದುಲ್ಲ. ಮೂಲನೇ ಇಜ್ಜಂದಿ ಆಯಾ ಬೂಮಿದ ಕುಟುಮದ ನಾಗಗ್ ಮೂಲೊನು ನಾಡೊಂದುಲ್ಲ. ಏಪ ಬೂಮಿದ, ಕುಟುಮದ ನಾಗನ ಆರಾಧನೆ ಮೂಲೆ ಸೇರೊಂದು ಪೋಂಡ ಅಡೆಗ್ ನಾಗನ ಮೂಲಂದ್ ಒಂಜಿ ಕ್ಷೇತ್ರ ಸೇರೊಂದು ಪೋಂಡು. ನಾಗೆ ತುಳುವೆರೆಗ್ ದೈವ ಆದಿತ್ತೆ ವಿನಃ ಆಯೆ ಶುದ್ಧಾಚಾರದ ದೇವೆರಾದಿಜ್ಜಾಂಡ್. ಅಂಚಾದ್ ಮಣ್ಣ ಪುಂಚದುಲಯಿ ಕುಲ್ಲುನ ನಾಗಗ್ ಅರೆಗಾಲದ ನುಂಗಿನ ಕಂಡೊಡು ಮೂಲ ಜನನಾಂಗದಕ್ಲೆರ್ದ್ ಸರ್ಪಕೋಲ ನಡತೊಂದಿತ್ತುಂಡ್. ದೈವಾರಾಧನೆದ ವಾ ಸಂದಿಡ್ಲಾ ನಾಗಗ್ ಉಂದುವೇ ಮೂಲ ಪನ್ಪುನ ಉಲ್ಲೇಖಲ ಇಜ್ಜಿ. ಆಂಡ ಮಂಜೇಸರ, ಕಾಸ್ರೋಡುದಂಚಿದ ನಾಗಾರಾಧನೆದ ಇಚಾರ ಸಂದಿ ಪಾಡ್ದನೊಲೆಡ್ ತೂಯೆರೆ ತಿಕ್ಕುಂಡು ವಿನಃ ಕುಕ್ಕೆದ ಮೂಲ ನಾಗನ ಮೂಲಂದ್ ಓಲ್ಲಾ ತೂವೆರೆ ತಿಕ್ಕುಜಿ. ಕುಟುಮದಿಲ್ಲುಲು ಮಯಕಾದ್ ದೈವೊಲೆಗ್ ಅಗೆಲ್ ಪಾಡುನ, ಸಂಕ್ರಾಂತಿ ಕರಿಪುನ, ನಾಗಗ್ ತನು ಮೈತ್ ದ್ ತಂಬಿಲ ಕಟ್ಟುನ ತರವಾಡ್ ದ ಇಲ್ಲುಲು ಬತ್ತಿ ಬೊಕ್ಕ ಕುಟುಮದ ಸಮ್ಮಂದೊಲು ಪುಡವೊಂದು ಪೋಂಡು. ಅಪಗ ತುಳುನಾಡ ಅಧಿಕಾರ ಸಾನದ ಬೆರ್ಮೆರ್ ಮೆಲಾನೆ ಬಿಲೆ ಕಳೆಯೊಂದ್ ಪೋದು ಅರೆನ್ ನಾಗನೊಟ್ಟುಗು ಸೇರಾದ್ ನಾಗಬೆರ್ಮ/ನಾಗಬ್ರಹ್ಮ ಮಲ್ತೊಂದು ಪೋಯೆರ್. ಐವೊರ್ದ್ ನೂದು ಜನ ಬದುಕೊಂತುನ ನಡಿಂದಿಲ್ಲ್ ದ, ಮಾಳಿಗೆದಿಲ್ಲ್ ದ ಮಲ್ಲ ಕುಟುಮದ ಇಲ್ಲುಲು, ಪತ್ತಿರ್ವ ತೊಟಿಲ್ ತೂಂಕೊಂತುನ, ಒಂಜೆ ಇಲ್ಲದುಲಯಿ ನಾಲೈನ್ ದೈವೊಲಿತ್ತ್ ನ ಕುಟುಮ ದರಿದ್ ದೈವದ ಉಜ್ಜಾಲ್ ದ ಗುಂಡೊಲೆನ ತರವಾಡ್ ದಿಲ್ಲಾದ್ ಪೋಂಡು. ಏಪ ಮಲ್ಲ ಮಲ್ಲ ಕುಟುಮದಿಲ್ಲಡೆ ಜೋಯಿಸೆರ್, ಪುರೋಯಿತೆರ್ ಪೊಗ್ಯೆರಾ ಅಲ್ತ್ ಬೊಕ್ಕ ಕುಟುಮದಿಲ್ಲುಲು ದೈವೊಲೆನ ಗುಂಡದ ಚಾವಡಿಲೆನ ತರವಾಡ್ ದ ಇಲ್ಲಾವೊಂದು ಪೋಂಡು. ಏಪ ಕುಟುಮದ ಇಲ್ಲ್ ದೈವದ ತರವಾಡಾಂಡ ಅಲ್ತ್ ರ್ದ್ ತುಳುವೆರೆನ ಬದುಕ್ ದ ಸಮ್ಮಂದೊಲು ಅವೆತೊಟ್ಟುಗು ಆರಾಧನೆ, ಆಚರಣೆಲು ತತ್ತೊಂದು ಪೋಂಡು. ಇಲ್ಲದ ಒಂಜಿ ಕೋಣೆಡ್ ನಾಲೈನ್ ದೈವದ ಮಣೆ ಮಂಚ ಇತ್ತುದ್ ಅವ್ವೇ ಇಲ್ಲಲ್ ಬದುಕೊಂತುನ ತುಳುವೆರ್ ನಾಲೈನ್ ದೈವೊಲೆನ್ ತರವಾಡ್  ದ ಚಾವಡಿ ಕಟ್ಟುದ್ ಅವೆತ ಉಲಯಿ ನಾಲೈನ್ ಗುಂಡ ಕಟ್ಟದ್ ಒಂಜೊಂಜಿ ದೈವೊನು ಒಂಜೊಂಜಿ ಕೋಣೆದುಲಯಿ ಪಾಡಿಯೆರ್.  ಕೆಲವೆರ್ ಇಲ್ಲ ಪಿದಯಿಡ್ ಜಾಲ್ ಡ್ ಗುಂಡ ಕಟ್ಟದ್ ದೈವೊಲೆನ ಮಣೆ ಮಂಚವುನು ಗುಂಡದುಲಯಿ ದೀಯೆರ್. ಅಲ್ತ್ ಬೊಕ್ಕ ನರಮಾನ್ಯನ ದೈವೊಲ್ನ ನಡುತ ಸಮ್ಮಂದೊಲೆಗ್ ಕುಟುಮ ಬೊಕ್ಕ ದೈವದ ಬಾಂದವ್ಯೊಗು ಒಡಕಾವೊಂದು ಪೋಂಡು. ದೈವೊಲೆನ್ ಏಪ ಇಲ್ಲದ ಪಿದಯಿ ಗುಂಡದುಲಯಿ ಪಾಡ್ದ್ ಸಂಕ್ರಾಂತಿಗೊರಂದ್ ದೆತ್ತ ನ ಆನಿರ್ದ್ ಬೊಕ್ಕ ಕೂಡು ಕುಟುಮಲ ಪುಡವೊಂದೆ ಪೋಂಡು. ಕುಟುಮದ, ಬೂಮಿದ ನಾಗನ ಆರಾಧನೆಲ ತತ್ತೊಂದು ಪೋಂಡು. ಕುಟುಮದಿಲ್ಲ್ ಪೋಯಿ ಬೊಕ್ಕ ಅವ್ಲು ಸಂತಾನ ಒರಿದ್ ಸಂತಾನಿಗೆರೆಗ್ ನಾಗನ, ದೈವದ ಆರಾಧನೆ ಅಗತ್ಯಂದ್ ತೊಜಂದೆ ಅಡೆಗ್ ಪೊಸ ಸಂಸ್ಕೃತಿದ ನಾಗಾರಾಧನೆ ಸೇರೊಂಡ್ ಅತ್ತಂದೆ ನಾಗಗ್ ಸುದ್ದಾಚಾರ ಸೇರೊಂಡ್.

ತುಳುವೆರ್ ಆದಿಡ್ ಮೂರ್ತಿ ಪೂಜಕೆರಾದಿಜ್ಜಾಂಡ್. ನಾಗೆ ತುಳುವೆರೆ ಕುಲದೈವ. ಪ್ರೇಮ ಸ್ವರೂಪಿ ದೇವೆರಾಯೆ. ನಾಗೆ ಏಪಲ ನಮಕ್ ಕಷ್ಟ ಕೊರ್ಪುನಾಯೆ ಖಂಡಿತಾ ಅತ್ತ್. ನರಮಾನ್ಯನ ಕೈತಲ್ ಉಪ್ಪೆರೆನೇ ಬಯಕುನಾಯೆ. ನಮಕ್ ಕಷ್ಟ ಬನ್ನಗ ಪ್ರಶ್ನೆ ಚಿಂತನೆದಡೆ, ಜೋಯಿಸೆರನಡೆ ಪೋಯ. ಅಕುಲು ನಾಗನ್ ಉಪದ್ರದ ದೇವೆರುಂದ್ ನಮ್ಮ ತರೆನ್ ತಿರ್ಗಾಯೆರ್. ಕುಟುಮದ ದೋಸೊಲೆಗ್, ಅಡ್ಡ ವಿಡ್ಡೂರೊಲೆಗ್, ಸಿರ್ಕ್ ಸಂಕಡೊಗು ನಾಗೆನೇ ಕಾರಣ ಪಂಡೆರ್. ತೆರಿನಕುಲು ಪಂಡೆರುಂದ್ ನಮ ಅಕ್ಲೆ ಪಾತೆರೊಗು ತರೆ ಆಡಾಯ. ಈ ದೋಸ ಪೂರ ದೂರ ಪೋಡಾಂಡ ನಾಗನ ಬನ  ದೆತ್ತ್ ದ್ ಗುಂಡನಾ, ಕಟ್ಟೆನಾ ಕಟ್ಟಾಲೆ ಪಂಡೆರ್. ತುಳುವೆರ್ ಆನಾದಿಡ್ದ್ ಇತ್ತ್ ನ, ಎರಿಯಾಕ್ಲು ನಂಬೊಂದು ಬತ್ತ್ ನ ಬನಂದ್ ತೂಯ್ಜೆರ್. ಕಡ್ತ್ ನಾಶ ಮಲ್ತ್ ಬುಡಿಯೆರ್. ಸೊನ್ಪದ ದಶಕೊರ್ದು ಬೊಕ್ಕ(ತೊಂಬತ್ತರ ದಶಕ) ಈ ಇಚಿತ್ರೊಲು ಪೂರಾ ಸುರು ಆತ್ ನಿ. ಪತ್ತೈವ ವರ್ಸೊರ್ದಿಂಚಿ ಅವ್ವೇತೋ ಬನೊಕ್ಲು ನಾಶ ಆದ್ ಉಚ್ಚುಲೆಗ್, ಪಕ್ಕಿಲೆಗ್ ನಿಲೆ ದಾಂತ್ ಲೆಕಾಂಡ್. ಬೂಮಿದ ವಸರ್ ನೆಲತ ಅಡಿಯಡಿಕ್ ಕಂತೊಂದು ಪೋಂಡು. ಬನತ ನಿರೆಲ್ ದ ಸಂಪುದ ಪುಂಚೊಡು ಇತ್ತ್ ನ ನಾಗನ್, ನಾಗನ ಬದುಕ್ ನ್ ತಪ್ಪಾದ್ ದೊಂಬುದ ಉರಿ ಉರ್ದಾಲದ ಕಟ್ಟೆಗ್, ಗುಂಡೊದ ಕಲ್ಲ್ ದ ಮೂರ್ತಿ ಮಲ್ತುದ್ ಆ ಉಚ್ಚು ಪಕ್ಕಿಲೆಗ್ ನಿಲೆ ದಾಂತಿಲೆಕ ಮಲ್ತಿನ ದೋಷ ನಮ್ಮ ಪಾಲ್ ಗಾಂಡ್. ನಾಗಗ್ ಗುಂಡ ಕಟ್ಟುದ್ ಪೂಜೆ ಮಲ್ಪುನ ವಾ ಅಗತ್ಯಲಾ ಇಜ್ಜಿ. ಕಲ್ಲ್ ಪಾಡ್ದ್ ಗುಂಡ ಕಟ್ಟಾಯಿ ಸಾತ್ ಗ್ ವಾ ದೋಷಲ ಪರಿಹಾರ ಆಪುಜಿ. ಜೋಯಿಸೆರೆಗ್ ಒಂಜಾತ್ ಪಣವು ಕೊರಿ ಸಾತ್ ಗ್ ದೋಷ ಪರಿಹಾರಲ ಆಪುಜಿ. ಬೂಮಿದ ನಾಗೆ, ಕುಟುಮದಿಲ್ಲದ ಕುಟುಮದ ನಾಗೆ ಮಯಕಾದ್ ತರವಾಡ್ ದ ಮೂಲ ನಾಗನ್ ನಾಡೆರೆ ಸುರು ಮಲ್ತ ವಿನಃ ಕುಟುಮದ ಮೂಲ ನಾಗನ್ ತೂಯ್ಜ. ಕುಟುಮದ ಮೂಲನಾಗೆ ಕುಟುಮದಿಲ್ಲದ ಬನೊಕ್ಲೆಡೇ ಒರಿದ್ ಪೋಯೆ, ಒರೊರ ಕುಟುಮದಿಲ್ಲದ ಬನೊಕುಲ್ಲಾ ನಾಶ ಆದ್ ಅಡೆಗ್ ತರವಾಡ್ ಬತ್ತುದ್ ತರವಾಡ್ ಗೊಂಜಿ ನಾಗನ ಕಟ್ಟೆ ಬತ್ತುಂಡ್. ತುಳುವೆರ್ ನಗತ ಪಂಡ ಗಟ್ಟದ ಪಂಡ  ಮೂಡಾಯಿ ಗಟ್ಟದ ಮುದೆಲ್ಡ್ ಬದುಕೊಂತಿನೆರ್ದಾದ್ ನಗತ ಮುದೆಲ್ದ ಜನಾಂಗೊನು ನಾಗರ ಜನಾಂಗಂದ್ಲಾ ಪನೊಂತೆರ್. ಮೊಕ್ಲೆಗ್ ನಾಗಾರಾಧನೆ ಪ್ರಧಾನ ಆದಿತ್ತುಂಡ್. ಪೊರ್ಲ ಜಿಡೆತ, ಮಲ್ಲ ಇಸತ ಉಚ್ಚುಗು ಪೋಡಿನ ತುಳುವೆರ್ ಮಣಭಕ್ತಿಡ್ ನಾಗನ್ ದೈವ ಆದ್  ನಂಬೊಂದು ಬತ್ತೆರ್. ಚರ್ಮ ಸಿರ್ಕ್ ಲೆನ್ ದೂರ ಮಲ್ಪರೆ ದುಂಬು ಪುಂಚದ ಮಣ್ಣ್ ಡ್ ಮಡತ್ತಾನ ಮಲ್ತೊಂತೆರ್. ಬಂಜಿಗ್ ಪುಂಚದ ಮಣ್ಣ್ ನ್ ಪುರ್ಸಾದ ಆದ್ ಗೆತೊಂದಿತ್ತೆರ್. ಸರ್ಪಗ್, ನಾಗಗ್ ಕೋಲಲ ನಡಪಾವೊಂತೆರ್. ಇನಿಲಾ ಈ ಸರ್ಪ ಕೋಲ ಮಂಜೇಶರ, ಕಾಸರೋಡುದಂಚಿ ಬಾಕುಡೆರ್ ನಡಪಾವೊಂದುಲ್ಲೆರ್. ಅಂಚಾದ್ ನಾಗನ್ ದೈವಂದೇ ತುಳುವೆರ್ ಆರಾಧನೆ ಮಲ್ತೊಂತೆರ್. ತುಳುವ ಕಟ್ಟ್ ಡ್ ನಾಗೆ, ಸರ್ಪೆ ಬೇತೆ ಬೇತೆ  ಅತ್ತ್. ಒಂಜಿ ಜಿಡೆತೆನ್ ಸರ್ಪೆ ಪಂಡ ಒಂಜೆರ್ದ್ ಎಚ್ಚ ಜಿಡೆ ಇತ್ತ್ ನವು ನಾಗೆ(ಸಯಾಮಿ). ಇಂಚ ನಾಗೆ ನಮಕ್ ತೂಯೆರೆ ತಿಕ್ಕುಜಿ. ನಾಗೆ ಸೈತುಂಡಲ, ಸರ್ಪೆ ಸೈತುಂಡಲ ಸರ್ಪ ಸಂಸ್ಕಾರಂದ್ ಪನ್ಪೆರ್. ಈ ಸರ್ಪ ಸಂಸ್ಕಾರಂದ್ ತುಳುನಾಡುಡಿಜ್ಜಾಂಡ್. ನಾಗೆ, ಸರ್ಪೆ, ಒವ್ವೇ ಉಚ್ಚುಲು, ಪಕ್ಕಿಲಾವಡ್ ಅವು ಇಚ್ಛಾ ಮರಣಿಲು. ಅವು ಏರೆಗ್ಲಾ ತೂಯೆರೆ ತಿಕ್ಕುಜ. ಆಂಡ ವಾನದಡಿಕ್, ವಿದ್ಯುತ್ ಆಘಾತೊಗು ತಿಕ್ ನವು ಮಾತ್ರ ಕಣ್ಣ್ ಗ್ ಬೂರ್ವ. ದುಂಬು ತುಳುವೆರ್ ಸರ್ಪೆ ಸೈತ್ ನ ಮಿನಿ ತಿಕ್ಕ್ಂಡ  ಅವೆತ ಬಾಯಿ ಬುಡ್ಪಾದ್ ಅವೆಕ್ ಚೆಂಬುದ ಪಾವಲಿ ದೀದ್, ಬೊಲ್ದು ಕುಂಟುಡು ಕಟ್ಟ್ ದ್ ಕೌಂತೊತೆರ್. ಆ ಚೆಂಬುದ ಪಾವಲಿ ದಾಯೆ ದೀವೊಂತೆರ್ ಪಂಡ ಇಸ ಪೂರ ಮಾಜಿದ್ ಪೋಯೆರೆ. ಇತ್ತೆ ಪೊಸತಾದ್ ನಾಗಗ್ ಸುದ್ದಾಚಾರ ಬತ್ತುದ್ ನಾಗನ್ ಪೊತ್ತವೊಂದುಲ್ಲೆರ್. ಕೆಲವು ಬುದ್ಯಂತೆರುಂದ್ ಪನ್ಪುನಕುಲು ನಾಗೆ ಬೂಮಿದಡಿಟುಪ್ಪುನಿ, ಸರ್ಪೆ ಬೂಮಿದ ಮಿತ್ತ್ ಉಪ್ಪುನಿಂದ್(ಬೂಮಿದಡಿಟ್ ಮಾಸೇಸೆ - ನಾಗ) ಪನ್ಪೆರ್. ಅವು ನಿಜವಾದ್ ಸತ್ಯೊಗು ದೂರಾಯಿನ ಇಚಾರ. ಸರ್ಪ ಸಂಸ್ಕಾರಂದ್ ಪನ್ಪುನಕುಲು ನಾಗ ಸಂಸ್ಕಾರಂದ್ ಪನ್ಪುಜೆರ್. ನಿಜವಾದ್ಲಾ ತುಳುವೆರೆ ಪಾಲ್ ಗ್ ನಾಗೆ ದೈವ ಸ್ವರೂಪ. ನಾಗಗ್ ಉಚ್ಚತ್ತ್ ಪನ್ಪುನ ಪುಣ್ಯಾತ್ಮೆರ್ ನಾಗೆ ಓಲು ಸೈತುಂಡಲ ಅವೆನ್ ಪೊತ್ತಾದ್ ಸರ್ಪ ಸಂಸ್ಕಾರ ಸಾವುಂದು ಪೂರ ಸುದ್ದಾಚಾರೊಡು ಮಲ್ಪಾವೊಂದುಲ್ಲೆರ್. ನಾಗಗ್ ಪೇರ್ ಮಯ್ಪುನ ಪಂಡ ತನು ಮೈಪುನಿಂದ್ ಲ ಪನ್ಪೆರ್. ಸರ್ಪಗ್ ಸಂಸ್ಕಾರ ಮಲ್ಪುವ. ನಾಗಗ್, ಸರ್ಪಗ್ ಕೋಲ ಆಪುಂಡು ಪಂಡ ಅವು ರಡ್ಡ್ ಲ ಒಂಜೆ ಬನ ಕಡ್ಪೆರೆ ಪಂಡಿನ ಪ್ರಶ್ನೆ ಚಿಂತನೆದಕ್ಲೆಗ್ ದೋಸ ಬತ್ತ್ ಜಿ. ನಮ ಬನ ಕಡ್ಪನಗ ಅತ್ಯರ್ ತಾಗ್ ದ್ ಕೆಲವೊರ ಉಚ್ಚುಲು ಸೈತ. ನಮ್ಮ ಕುಟುಮೊಲೆಗ್ ಅವೆರ್ದ್ ದೋಸ ಬತ್ತುಂಡ್. ಅವೆತ ಪರಿಹಾರೊಗುಂದು ಆಶ್ಲೇಷ ಬಲಿ, ಸರ್ಪ ಸಂಸ್ಕಾರ, ನಾಗ ಮಂಡಲಂದ್ ಪೋಡಿ ಕಟ್ಟಾಯೆರೆ, ಕುಟುಮದ ಪೆರಿಯಾಕ್ಲೆನ ಪ್ರೇತ ನಾಗನ ಕೈಟ್ ಉಂಡುಂದು ಪೋಡಿ ಕಟ್ಟಾಯೆರ್. ಅಕ್ಲ್ ಪಂಡಿ ಪಾತೆರೊಗು ತರೆತಗ್ಗಾಯಿ ತುಳುವೆರೆ ಬದ್ ಕ್ ಅದ್ವಾನ ಆವೊಂದು ಪೋಂಡು. ನಾಗನೊಟ್ಟುಗು ಹಿರಿಯಾಕ್ಲೆನ ಪ್ರೇತ ಉಂಡು ಪಂಡುಂದಾಂಡ ನಾಗೆ ದೈವನೇ ಆಂಡ್ ವಿನಃ ದೇವೆರಾಯಿಜಿ. ಪ್ರಶ್ನೆ ಚಿಂತನೆದಕ್ಲೆಗ್ ಈ ಇಚಾರ ತೆರಿಯಂದೆ ಪೋಂಡ್ ತೋಜುಂಡು. ಮೂಲ ತುಳುವೆರ್ ಕರಿನಕ್ಲೆನ್ ದೈವದ ಕೈಟೇ ಆದಿರ್ದೇ ಒಪ್ಪವೊಂದು ಬತ್ತೆರ್.

ನಾಗೆ ಬೊಕ್ಕ ಬನ ಪ್ರಕೃತಿದ ಒಂಜಿ ಶಕ್ತಿದ ರಡ್ಡ್ ರೂಪಂದ್ ನಂಬಿನಕುಲು ತುಳುವೆರ್. ನಾಗನ್ ಬೂಮಿ ಪುತ್ರೆಂದ್ ಮಾತಾ ಕಜ್ಜ ಮಲ್ಪುನೆರ್ದ್ ದುಂಬು ನಾಗನ್ ಆರಾಧನೆ ಮಲ್ತೆರ್. ತುಳುವೆರ್ ಆದಿಡ್ ಬೆರ್ಮೆರಾರಾಧಕೆರಾದಿತ್ತುದ್ ಏಪ ಬನೊಕ್ಲೆಗ್ ಮೂರ್ತಿಲು, ನಾಗನ ಮೂರ್ತಿಲು ಬರೆರೆ ಸುರಾಯನ ಆನಿರ್ದ್ ಬೊಕ್ಕ ತುಳುವೆರೆ ಬೆರ್ಮೆರ್ ಮೂಲೆ ಸೇರ್ಯೆರ್. ಪ್ರತಿಯೊಂಜಿ ಕಜ್ಜದ ಸುರುಕು ಉರ್ಪೆಲರಿಟ್ ಬೆರ್ಮೆರೆಗ್ ಸುತ್ತೆ ದೀಪುನೆನ್ ತುಳುವೆರ್ ಸಂಪೂರ್ಣವಾದ್ ಮದತುದ್ ಬುಡ್ದು ಇನಕ ದೇವೆರೆಗ್ ಸುತ್ಯೆ ದೀಯೆರೆ ಸುರು ಮಲ್ತೆರ್. ಬೆರ್ಮೆರೆನೊಟ್ಟುಗು ನಾಗನ್ ಸೇರಾದ್ ನಾಗಬೆರ್ಮ ಮಲ್ತುದ್ ಕಡೆಕ್ ಬೆರ್ಮೆರೆನ್ ಮದತುದ್ ನಾಗನ ಆರಾಧನೆಗ್ ಪ್ರಾಧಾನ್ಯತೆ ಬತ್ತುಂಡ್. ಬನೊಕು ನೂಲುಪಾಡಿ ಸಂಸಾರ ಪೂಜೆಗ್ ಬನ್ನಗ ತುಳುವೆರೆ ಮಣ್ಣ ಮೂರಿದ ಕರ ಅಕ್ಲೆಗ್ ಅಸುದ್ದಾದ್ ತೋಜಿಂಡ್. ದಾಯೆ ಪಂಡ ಮೂರ್ತಿ ಪೂಜಕೆರಾಯಿನ ಅಕುಲು ಕರೊಕು ಪೂಜೆ ಮಲ್ಪಂದಿನಕುಲಾಯಿನೆರ್ದಾತ್ರ ನಾಗ ಪೂಜೆಗ್ ತನ್ಕುಲೆಗ್ ಕಲ್ಲ್ ದ ಉಬ್ಬು ಶಿಲ್ಪದ ಮೂರ್ತಿಲು ಬೋಡು ಪಂಡಿನೆರ್ದಾತ್ರ ಬನೊಟಿತ್ತುನ ಮಣ್ಣ ಮೂರಿಲು ಕೆದು, ತೋಡು, ತುದೆಕ್ಲೆ ಪಾಲಾದ್ ನಾಗನ ಕಡ್ಯ(ಕರ)ದ ಬದಲಾದ್ ನಾಗನ ಪೊಸಪೊಸ ಕೆತ್ತನೆದ ಕಲ್ಲುಲು ಬನೊಕ್ಲೆನ ಕಟ್ಟೆಲೆನ್ ಸೇರೊಂಡ. ವೈದಿಕ ಆರಾಧನೆದ ಕಟ್ಟೆದ ನಾಗೆ ಸುದ್ದ ಆದ್ ಪೋಯಿನೆರ್ದಾತ್ರ ಆವೈದಿಕೆರೆಗ್ ತಾನ್ ಮಲ್ಪಯಿ ಕಟ್ಟೆದ ಉಲಯಿ ಪೋವಂದಿಲೆಕಾದ್ ಪಿದಯಿ ಕೈ ಕಟ್ಟ್ ದ್ ಉಂತುಲೆಕಾಂಡ್. ಕಟ್ಟೆದುಲಯಿ ಬತ್ತೆರ್ಡ ನಾಗೆ ಅಸುದ್ದಾಪೆಂದ್ ತುಳುವೆರೆನ್ ಅಕುಲು ಪೋಡಿಕಟ್ಟಾಯೆರ್. ಬನತುಲಯಿ ಕಡ್ಯೊಡು ನಾಗಗ್, ಪಕ್ಕಿ ಪೆರಣಿಲೆಗ್ ನೀರ್ ದೀವೊಂತಿ ನಾಗ ಜಿಡೆತೊರುತ ಮೂರಿಲು, ಅಂಚನೆ ಬನೊಟು ಕಟ್ಟೆ ಬನ್ನಗ ಪೂರಲ ಮಯಕಾದ್ ಮಣ್ಣ್ ಸೇರ್ದ್ ಪೋಯ. ನಾಗನ ಕಲ್ಲ್ ಗ್ ಬರ್ಸ, ದೊಂಬು, ಗಾಳಿ ಬೋಡು. ಇನಿ ಪೂರ ವರ್ಸೊಗೊರ ನಾಗಗ್ ಪೇರ್ ಮಯ್ಪುನೆಕ್ ಬೋಡಾದ್ ತಿರ್ತುಗ್/ನೆಲಕ್ ಸಿಮೆಂಟ್ ಪಾಡ್ಯ, ಮಿತ್ತ್ ಗ್ ಮಾಡ್ ಕಟ್ಯ. ಅಂಚನೆ ನಾಗನ ಕಲ್ಲ್ ಗ್  ಒರಿ ಬೊಳ್ಳಿದ ನಾಗನ್ ಕೊರಿಯೆಂಡ ಕುಡೊರಿ ಆಯರ್ದ್ ಕಡಮೆ ಯಾನ್ ದಾಯೆಂದ್ ಬಂಗಾರ್ ಕೊರಿಯೆ. ಮೂಲು ಮೊಕ್ಲೆಗ್ ನಾಗನ ಚಾಕಿರಿ ಬೊರ್ಚಿ ಪಣವುದ ತಾಕತ್ತ್ ದ ಆಡಂಭರ ಬೋಡಾಂಡ್. ಮೂಲು ನಮ ಭಕ್ತಿರ್ದ್ ಜನೊಕ್ಲೆ ಪುಗಾರ್ತೆ ಕೇನುನವೆ ಮುಖ್ಯ ಆದ್ ಪೋಂಡು. ನಂಬೊಳಿಗೆ, ಆರಾಧನೆ ಪನ್ಪುನವು ದೈವೊಲೆನ್ ಉಡಲ್ ದ ಮಣೆ ಮಂಚವುಡು ಕುಲ್ಲದ್ ತೂಪುನ ಮನಭಕ್ತಿ. ಮೂಲ ಕಟ್ಲೆನ್ ತುಳುವೆರ್ ಪಿಂದೆರೆ ಪೋಂಡ ಬಾರೀ ಪೊರ್ಲು ಬೊಕ್ಕ ಆತೇ ಸರಳ ಆದಿತ್ತುಂಡ್. ದೈವೊಲೆಗ್ ಕೋಲ, ನೇಮ, ರೂಪ ಪೂರ ಬೊಕ್ಕ ಬತ್ತಿನವು. ತುಳುನಾಡ ತುಳುವೆರೆ ಆದಿ ದೈವ, ಬೂಮಿ ಉಂಡಾನಗ ಉಂಡಾಯಿ ಉಲ್ಲಾಯೆ, ದೇವೆರಾದ್ ತೂಯಿನ ದೈವನೇ ಬೆರ್ಮೆರ್. ಅರೆನ್ ಬನೊಟು ಆರಾಧನೆ ಮಲ್ತೊಂದಿತ್ತುದ್ ರಡ್ಡನೆ ಪ್ರಧಾನ ಉಪದೈವ ಆದ್ ನಾಗನ್ ಆರಾಧನೆ ಮಲ್ತೆರ್. ಪ್ರಧಾನ ದೈವ ಆಯಿನ ಬೆರ್ಮೆರೊಟ್ಟುಗು ರಡ್ಡನೆ ಪ್ರಧಾನ ಉಪ ದೈವ ಆಯಿನ ನಾಗನ್ ಸಮೀಕರಣ ಮಲ್ತುದ್ ನಾಗಬೆರ್ಮೆರಾದ್ ಮಂತ್ ದ್ ಕಾಲಾನುಭಾಗೊಡು ಪ್ರಧಾನ ದೈವ ಆಯಿನ ಬೆರ್ಮೆರೆನ್ ಕೈ ಬುಡ್ದು ರಡ್ಡನೇ ಪ್ರಧಾನ ಉಪದೈವ ಆಯಿನ ನಾಗನ್ ಪ್ರಧಾನ ದೈವ ಆದ್ ಆರಾಧನೆ ಸುರು ಮಲ್ತೆರ್. ತುಳುವೆರೆ ಪೆರಿಯಮ್ಮೆ ಬೆರ್ಮೆ ಪನ್ಪುನೆನ್ ಬದಲ್ತುದ್ ಬ್ರಹ್ಮ ಮಲ್ತುದ್ ಬೆರ್ಮೆರೆ ಸಾನ, ಗುಂಡೊನು ಬ್ರಹ್ಮಸ್ಥಾನ ಮಲ್ತುದ್ ಬುಡಿಯೆರ್. ಕುಮಾರ, ಕಾಳ ಭೈರವೆ, ಬೆರ್ಮೆರ್, ಈಸರನ್ ಒಂಜೇಂದ್ ತೆರಿಯಂದೆ ಬೆರ್ಮೆರೆನ್ ಲಿಂಗದೊರುಂದು ಬ್ರಹ್ಮ ಲಿಂಗೇಸರೆ, ಮಹಾಲಿಂಗೇಸರೆಂದ್ ಮಲ್ತ್ ಬುಡಿಯೆರ್. ಬೆರ್ಮೆರ್, ನಾಗೆ, ಲೆಕ್ಕೆಸಿರಿ, ಮೈಸಂದಾಯೆ, ಪಂಜುರ್ಲಿ ಮೊಕ್ಲು ಆಲಡೆದ ಪಂಚ ದೈವೊಲಾದಿತ್ತೆರ್.

ದುಂಬುದ ಕಾಲೊಡು ಗುತ್ತು ಬರ್ಕೆಲೆಡ್ ರಾಜಂದೈವೊಲೆನ್ ನಂಬೊಡಾಂಡ ನಾಗನ ಬನೊಕ್ಲು ಸಾನದ ಕೈತಲ್ ಉಪ್ಪೊಡು ಪನ್ಪಿ ನಿಯಮ ಇತ್ತುಂಡ್. ಅವೆಕ್ ಸಾಕ್ಷಿಯಾದ್ ಇನಿಕ್ಲಾ ಸಂಕ್ರಾಂತಿಗ್ ರಾಜಂದೈವೊಲೆಗ್ ಸಂಕ್ರಾಂತಿ ಕರಿಪುನ ದುಂಬು ನಾಗಗ್ ತಂಬಿಲ ಕಟ್ಟುವೆರ್. ನೇಮ ನೆರಿ ನಡಪುನ ದುಂಬುಲ ನಾಗಗ್ ಇಂಚನೆ ತಂಬಿಲ ಕಟ್ಟುವೆರ್. ದೈವದ ಬಲತುಡ್ ಉಂತುದು ದೈವೊಲೆಗ್ ಬಲ ಕೊರ್ಪುನ ಬೆರ್ಮಗ್ ಆನಿದ ಕಾಲೊಡು ಸುರೂತ ತಂಬಿಲ ನಡಪುನ ರೂಢಿ ಇತ್ತುಂಡ್. ನಾಗ ಬನೊಕು ತಾಗ್ ದಿಪ್ಪುಲೆಕ ಕಂಬುಲದ ಕಂಡೊಲಿತ್ತ. ಕಂಬುಲ ಬೊಕ್ಕ ಬೆರ್ಮೆರೆಗ್ ಸಮ್ಮಂದ ಪಟ್ಟುದ್ ಬಾರ್ಯಾತ್ ಸಂಪ್ರದಾಯ ಆಚರಣೆಲಿತ್ತ. ವೈದಿಕ ವಿಧಿ ವಿಧಾನೊಲು ಬನೊಕು ಬನ್ನಗ ರೂಪ ಬೊಕ್ಕ ಮೂರ್ತಿ ಇಜ್ಜಂದಿನ ಬೆರ್ಮೆರೊಟ್ಟುಗು ಉಪದೈವ ಆಯಿನ ನಾಗನ್ ಸೇರಾದ್ ನಾಗ ಬ್ರಹ್ಮ ಪನ್ಪಿ ಪೊಸ ಕಲ್ಪನೆ ಪುಟ್ಟ್ಂಡ್. ಮೂರ್ತಿ ಪೂಜೆ ಇಜ್ಜಂದಿನ ತುಳುವೆರೆಡ ಬೇತೆ ಬೇತೆ ನಮುನೆದ ಮೂರ್ತಿಲೆನ್ ಮೊಕ್ಲು ಮಲ್ಪಾದ್, ಷೋಡಷ ಸಂಸ್ಕಾರ ಮಲ್ಪಾದ್ (ಮೂಲು ಪದಿನಾಜಿ ಕಟ್ಟ್ ಕಟ್ಲೆ ಪೊಳಿದ್ ದೇವೆರೆ ಷೋಡಷೋಪಚಾರ ಸುರಾಂಡ್) ನಾಗ ಮೂರ್ತಿಲೆಗ್ ನೂಲು ಪಾಡ್ದ್ ಅಲ್ತುರ್ದ್ ಬೊಕ್ಕ ನಾಗಾರಾಧನೆಡ್ ಮಡಿ ಮೈಲಿಗೆಲು ಸುರಾಯ. ಮೂರ್ತಿ ಪೂಜೆದ ಒಂಜಿ ಭಾಗವಾಯಿನ ಅಭಿಷೇಕ ತನು ಎರೆಯುವುದು ಪಂಡ್ ದ್ ಅವ್ಲ ತಂಬಿಲದ ಒಂಜಿ ಭಾಗ ಆಂಡ್. ಪೊರಿಪೊದ್ದೊಲು, ಬೊಂಡಡ್ ತಂಬಿಲ ಕಟ್ಟೊಂತ್ ನಡೆ ತನು ಮೈಪುನ ಪೊಸ ಕಿರಮದ ಅಭಿಷೇಕೊಲು ಸುರಾಂಡ್. ನಾಗನೊಟ್ಟುಗು ಪೊಸ ಪೊಸ ಪುರಾಣದ ಕತೆಕುಲು ಸೇರೊಂದು ಮಂತ್ರ, ಆರತಿ, ಜಾಗಂಟೆಗ್ ತುಳುವೆರ್ ತರೆ ಆಡಾವುಲೆಕಾಂಡ್.. ದುಂಬು ನಾಗೆ ಬನೊಕ್ಲೆಡ್ ಇತ್ತೇ ವಿನಃ ಕಟ್ಟೆಡಿಜ್ಜಾಂಡ್. ನಾಗಗ್ ಇಂಚಿನನೇ ಜಾತಿದಾಯೆಂದ್ ಇಜ್ಜಾಂಡ್. ದುಂಬುದ ಎರಿಯಾಕ್ಲು ಸುದೆತ ಪರಿತ್ ಪೋಪುನ ನೀರ್ ಡ್ ಮುರ್ಕುದ್ ಕನತಿನ ಕಲ್ಲ್ ನ್ ಮಣ್ಣ್ ಮುಟ್ಟುಲೆಕ ಬನೊಟು ನೆಲಟ್ ನಾಟಾವೊಂದಿತ್ತೆರ್. ಕುಟುಮದ ನಾಗೆ ಆಂಡ ಕುಟುಮದ ಒರಿ ಹಿರಿಯಾಯೆ, ಇಜ್ಜಿಂಡ ನಾಗಾರಾಧನೆದ ಚಾಕಿರಿಗುಂದ್ ಗುರ್ತ ಮಲ್ತ್ ನಾಯೆ ಸುದ್ದಾಚಾರೊಡಿತ್ತುದ್ ಆರಾಧನೆ ಮಲ್ಪಾವೊಂತೆರ್.  ಊರುದ ನಾಗೆಂದಾಂಡ ಊರುಡು ಒರಿ ಸುದ್ದಾಚಾರದಾಯನ್ ಗುರ್ತಿಸಾದ್ ಆಯಡ ಚಾಕಿರಿ ಮಲ್ಪಾವೊಂತೆರ್. ರಾಜಾಶ್ರಯೊಡಾಂಡ ನಾಗಾರಾಧನೆಗುಂದ್ ಅರಸು ಒರಿ ಗುರ್ತ ಮಲ್ತೊಂತೆ. ಆಯೆನೇ ಆ ಚಾಕಿರಿನ್ ಮಲ್ಪೊಡಿತ್ತುಂಡ್. ಇನಿ ಪೂರಾ ನಾಗಗ್ ವಾವಾ ನಮುನೆದ ಕಲ್ಲುಲು ಬತ್ತ್ ದ್ ನಾಗರಾಜೆ, ನಾಗರಾಣಿ, ನಾಗಯಕ್ಷೆ, ನಾಗಯಕ್ಷಿಂದ್ ಅವೆಕ್ ಸಮ್ಮಂದ ಪಟ್ನ ಪ್ರಶ್ನೆ ಚಿಂತನೆದಕ್ಲು ಪೂರಾ ಪುದರ್ ದೀವೊಂದು ಪೋಯೆರ್. ನಿಜವಾದ್ ತುಳುನಾಡ ನಾಗ ಬನೊಟು ಇತ್ತ್ ನಿ ನಾಗೆ ಮಾತ್ರ. ಕುಟುಮದ ನಾಗೆ, ಬೂಮಿದ ನಾಗೆ, ಮೂಲ ನಾಗೆಂದ್ ನಾಗನ್ ಬೇತೆ ಬೇತೆ ರೀತಿಡ್ ಬನೊಟು ಆರಾಧನೆ ಮಲ್ತೊಂದಿತ್ತೆರ್. ತುಳುವೆರ್ ನಾಗನ್ ಬುಡ್ದು ಇನಿಕ್ಕ್ ಲ ಒಂಜಿ ಪಜ್ಜೆಲಾ ದುಂಬು ದೀವಾಯೆರ್. ಇನಿತ ಕಟ್ಟೆದ ಕಟ್ಟ್ ಡ್ ನಾಗೆ ಉಪ್ಪೆರೆ ಸಾಧ್ಯನೇ ಇಜ್ಜಿ. ಸಂಪುದ ಪುಂಚದ ನಾಗೆ ಬೆಚ್ಚದ ಸಿಮೆಂಟ್ ದ ಕಟ್ಟೆಡ್, ಮಂಜಲ್ ದ ಉರಿ ಊರ್ದಾಲೊಡು ಬದುಕೆರೆ ಸಾಧ್ಯ ಇಜ್ಜಂದೆ ಸಾದಿ ಬರಿಟ್ ಕಣ್ಣ್  ಗ್ ನಮಕ್ ತಿಕ್ಕುಲೆಕಾಂಡ್. ಬನೊಕ್ಲೆಡಿತ್ತ್ ನ ನಾಗನ್ ಕಟ್ಟೆ ಕಟ್ಟ್ ದ್ ಒರಿಪುನ ಕಟ್ಟ್ ಮಲ್ಪಂದೆ ಕರಿಪುನ ಕಟ್ಲೆ ಮಲ್ತೊಂದುಲ್ಲ. ನಮ್ಮ ಕುಟುಮದ ನಾಗ ಬನೊಟು, ಇನಿತ ಲೆಕ್ಕೊಡು ಪನ್ಪುಂಡ ನಾಗನ ಕಟ್ಟೆಡ್ ನಮ್ಮ ಕುಟುಮದ ನಾಗಗ್ ನಮಕ್ ಪೇರ್ ಮೈಪೆರೆ ಆಪುಜಿ ಪಂಡ ಅವು ನಮ್ಮ ಕುಟುಮದ ನಾಗೆ ಆಯೆರೆ ಸಾಧ್ಯನೇ ಇಜ್ಜಿ. ನಮ ನಾಗನ್ ದೈವಂದ್ ನಂಬಿನಕುಲು. ದೈವೊಗು ಅಗೆಲ್ ಪಾಡ್ನಗಲ ಕುಟುಮದಕ್ಲ್ ಅಗೆಲ್ ಪಾಡಂದೆ ಬೇತೆ ಪಿದಯಿಡ್ದ್ ಜನ ಕನತ್ ದ್ ಅಗೆಲ್ ಪಾಡಾಂಡ ದೈವೊಲು ಎಂಚ ಅಗೆಲ್ ಸ್ವೀಕಾರ ಮಲ್ಪಯನ ಅಂಚೆನೇ ಪಿದಯಿದ ಜನ ಕನತ್ ದ್ ನಾಗಗ್ ಅವ್ಲ ಕುಟುಮದ ನಾಗಗ್ ಪೇರ್ ಮೈಪಾಂಡ ಅವು ನಮ್ಮ ಕುಟುಮದ ನಾಗಗ್ ಖಂಡಿತಾ ಸಂದಾಯ್ತ ಆಪುಜಿ. ದುಂಬು ಪೂರ ಕುಟುಮದಾಂಡ ಕುಟುಮದ, ಊರುದಾಂಡ ಊರುದ ಹಿರಿಯಾಕ್ಲ್ ಮೈಲಿಗೆ ದಾಂತೆ ಮಡಿ ತುತ್ತುದು ನಾಗಗ್ ತನು ಮೈತೊಂತೆರ್, ತಂಬಿಲ ಕಟ್ಟೊಂತೆರ್. ಇಂಚಿನ ಜಾತಿದಾಯೆನೇ ತನು ಮೈಪೊಡುಂದು ದಾಲ ಇಜ್ಜಾಂಡ್. ಆ ನಾಗೆ, ಈ ನಾಗೆಂದ್ ನಮ ನಂಬುಲೆಕಲಾ ಇಜ್ಜಾಂಡ್. ನಮಕ್ ತುಳುವೆರೆಗ್ ನಾಗಬೆರ್ಮೆ/ನಾಗಬ್ರಹ್ಮ ಪನ್ಪಿ ಸಬ್ದನೇ ಇಜ್ಜಾಂಡ್. ನಾಗನ ಕಲ್ಲ್ ಗ್ ಇಲ್ಲದ, ಕುಟುಮದಕ್ಲ್ ಒಂತೆ ಪೇರ್ ಮೈತ್ ದ್, ಬೊಂಡ ನೀರ್ ಮೈತೊಂತೆರ್, ನೀರ್ ಮೈತೊಂತೆರ್. ಆಂಡ ಇನಿ ಲೆಕ್ಕೊರ್ದ್ ಜಾಸ್ತಿ ಬೊಂಡ ನೀರ್, ಪೇರ್ ಪೂರ ಮೈತ್ ದ್ ಅವ್ಲು ವಾಸನೆ ಲಕ್ಕ್ ದ್(ಅವ್ಲ ತೊಟ್ಟೆದ ಪೇರಾಂಡ ಪನೊಡ್ಚಿ) ಪಿಜಿನ್ ಮುತ್ತುಂಡ ಅವ್ಲು ನಾಗೆ ಕುಲ್ಲೆರೆ ಸಾಧ್ಯನೇ? ಪಿಜಿನ್ ಮುತ್ತುಂಡ, ಪೇರ್ ಪರುಂಡ, ಮಂಜಲ್ ಪೊಡಿ ತಾಗಾಂಡ ನಾಗೆ ಸೈಪುಂಡು. ಪಿಜಿನಿತ್ತ್ ನ ಜಾಗೆಗ್ ನಾಗೆ ಬರ್ಪುನ್ನೇ ಇಜ್ಜಿ. ನೀರ್ ದ ಜಾಗೆ, ಮರಮಟ್ಟ್ ಸಂಪುದ ಜಾಗೆಡ್ ಮಾತ್ರ ನಾಗೆ ಬದ್ ಕುನಿ. ಅಕ್ಲಕ್ಲೆ ಇಲ್ಲದ, ಕುಟುಮದ ನಾಗಗ್ ಸುದ್ದಾಚಾರೊಡು ತನು ಮೈಪೊಲಿ. ನಾಗನ ಬನೊಟು ಕಲ್ಲ್ ನಾಟಾನಗ ಅವೆಕ್ ಕಟ್ಟೆ, ಆಯ ಪೂರ ಬೊಡ್ಚಿ. ಅವೆಕ್ ಸಂಪುದ ಜಾಗೆ ಬೋಡಾಯಿನಿ. ದುಂಬುದಕ್ಲು ನಾಗನ ಕಲ್ಲ್ ನ್ ನಾಟಾವುನಿಂದ್ ಪನೊಂತೆರ್. ವಿನಃ ಪ್ರತಿಷ್ಠೆ ಪಂದ್ ಓಲ್ಲಾ ಪನೊಂದಿಜ್ಜಾಂಡ್. ನಮ ಬನೊಟು ನಾಗಗ್ ತನು ಮೈತುದ್ ಸ್ವಾಮಿಂದ್ ಲೆತ್ತ್ ನಡೆಗ್ ನಾಗೆ ಅಂದಾವೊಂತೆ. ಇನಿ ನಾಗಗ್ ಕಟ್ಟುನ ಚಾಕಿರಿದಕುಲ್ಲಾ ಮೂಲೆ ಸೇರ್ದೆರ್.ಪುಂಚದ ಮರಿನ್ ಬೆರ್ಮ ಮೂಲದ  ಬೂತಂದ್ ಆರಾದನೆ ಮಲ್ತ್ ನ ಮೂಲ ತುಳುವೆರ್ ಬೇಸದ ಕಾಚೆಲ್ದ ಪೊರ್ತುಡು ಬನೊತ ಮಣ್ಣ್ ತನಿಪಾದ್ ಮುರಿ ದೀದ್ ಮರಿನ್ ಆರಾದನೆ ಮಲ್ಪುನತ್ತಂದೆ ಮೂಲ ತುಳುವೆರೆ ಜಾತಿದಪ್ಪೆ ಜೋಕುಲೆ ವಸಾಯೊಗುಂತುದು ,ಕೆಲವೊರ ನಾಗಗ್ ಕೋಲ ಕೊರ್ದು ತುಳುಟೇ ನುಡಿಯಾವೊಂತ್ಂಡ ಇನಿ ನೂಲ್ಪಾಲ್ ಸಂಸಾರ ವಸಯೊಗುಂತುದು ಕನ್ನಡೊಡು ನುಡಿ ಕೊರೊಂದುಲ್ಲೆರ್.ಇನಿ‌  ಬೂತ ನಾಗೆ ಮಡಿಮೈಲೆ ಸುದ್ದಾಚಾರದ ದೇವೆರಾದ್, ಪಗ್ಗು ಬೇಸದ ಉರಿ ಉರ್ದಾಲದ ಕಾಲದ ಬೇಸದ ತನು ಪೋದು ಒಲ್ಪರ್ದೋ ಬತ್ತಿ ನಾಗರ ಪಂಚೆಮಿನ್ ಆಟಿದ ಸಂಪುದ ಕಾಲೊಡು ಮಲ್ತ್ ದ್ ಬನೊಕ್ಲೆನ್ ಕಡ್ಪಾದ್ ಸಿಮೆಂಟ್ದ ಕಟ್ಟೆ ಕಟ್ಟ್ ದ್ ಉರಿಕ್ ಉಚ್ಚುಲು ಸಯ್ಯೊಂದುಲ್ಲ.ಕಾರ ಗಗ್ಗರೊರ್ದು ಅಣಿತ ಕೊಡಿ ಮುಟ್ಟ,,ಮುಗ,ತರೆಪಟ್ಡಿ ಮುಟ್ಟ ಇತ್ತ್ ನ ನಾಗನ ಒರು ತೂಂಡ ಮಣ್ಣ್ ದ ನಾಗಗ್ ತುಳುವೆರ್ ಕೊರ್ನ ಬಿಲೆ ತೆರಿಯುಂಡು.ಬೂತ ನಾಗನ ಗುರ್ತೊಡು ಅಪ್ಪೆ ಕಟ್ಟ್ ದ ಮೂಲ ನಾಡೊಂತಿ ತುಳುವೆರ್ ನಾಗೆ/ಮರಿ ಸೈತ್ಂಡ ಅವೆನ್ ಇನಿತಲೆಕ ವೈದಿಕ ವಿದಿ ವಿದಾನೊಡು ಪೊತ್ತಾದ್ ಸಾವು ಮಲ್ಪಂದೆ ತುಳುವ ಧರ್ಮದಲೆಕ ಮಣ್ಣ ತೂರಿಡ್ ದಿಂಜಾದ್‌ ಕೌಂತೊಂತೆರ್.ಆಲಡೆಲೆಡ್ ಬೆರ್ಮೆರ್,ನಾಗೆ ಪ್ರದಾನ ಆದುಲ್ಲೆರ್.ನಾಗನ್ ಕೆರ್ನ,ನಾಗನ್ ಪೊತ್ತಯಿನಕ್ಲೆ ಕಣ್ಣ್ ಪೊಟ್ಟಾಯಿನ,ಸಂಸಾರ ಮುತ್ತ್ ನ ಕಥೆ ನಮ ತೆರಿದುಪ್ಪ ಅಂಚನೇ ನಾಗನ ಬಗೆಟ್ ಕೆಲವೊಂಜಿ ನಂಬೊಲಿಗೆಲುಲ್ಲ.ನಾಗಗ್ ಪದ್ರಾಡ್ ವರ್ಸ ಪಗೆಗೆ (ಅವೆಕ್ ಮೆದುಳಿಜ್ಜಿ.ಎಂಚ ಪಗೆ ದೀಪುಂಡಾ),ನಾಗಗ್ ದರಿಪೊಡು,ನಾಗ ಮೂಲ ಕೇನೊಡು(ಪರಪಿ ನಾಗಗ್ ದಾದ ವಸಯನ,ಮೂಲ ಪನ್ಪುನೆಟ್ಲ ಗೊಂದಲ),ದೊಂಕು ಬುಡುವೆ ನಾಗೆ,ಕಡಪು ಬುಡಯೆ(ದೊಂಕ್ಂಡ ತುಚ್ಚಂದೆ ಕುಲ್ಲುವ).

     

              ಸಂಪುಲ್ಲ ಜಾಗೆಡ್ ಪಿರಾಕ್ ದ ನಾಗನ ಒರು

ಮೂಲೊಡು ಬೆಮ್ಮೆರೆ ಆರಾಧನೆದ ಬನೊಕ್ಲೆಡ್ ನಾಗನ ಕಲ್ಲುಲು ಬತ್ತ್ ದ್ ದುಂಬುಗು ಬನೊಟಿತ್ತಿ ಮಣ್ಣ ಮೂರಿದ ಆರಾಧನೆ ಮಯಕಾದ್ ನಾಗನ ಮೂರ್ತಿಲು ಬನೊಕು ಬತ್ತ. ಏಪಾ ನಾಗನ ಮೂರ್ತಿಲು ಬನೊಕು ಬತ್ತುಂಡಾ ಅವ್ಲು ಅಭಿಷೇಕ ಸುರಾಂಡ್. ಅಭಿಷೇಕ ಏಪ ಸುರಾಂಡ ಅಡೆಗೊಂಜಿ ಗುಡಿ ಬೋಡಾಂಡ್. ಗುಡಿಕುಲು ಏಪ  ಲಕ್ಕ್ ದುಂತೆರೆ ಸುರಾಯನಾ ಅಪಗ ಬನೊಕ್ಲೆನ್ ಕಡ್ತುದ್ ನಮ ಸಂಪೂರ್ಣ ನಾಶ ಮಲ್ತ. ಮರ ದೈತ ಮುದೆಲ್, ಮೇಲ್ಗೆಲ್ಲ್ ಲೆಡ್ ಬದುಕೊಂತಿ ಪಕ್ಕಿಲು, ಉಚ್ಚುಲು ಸಾದಿಗ್ ಬೂರ್ಯ. ಉಚ್ಚುಗು, ಪಕ್ಕಿಲೆಗ್ ಬಾಜೆಲ್ ನ್ ನೀರ್ ನ್ ದೀವೊಂತ್ ನ ಬನೊಕ್ಲೆನ ಮೂರಿಲು ನಾಶ ಆನಗ ಬನತ ಬರಿತ ಕಂಬುಲದ ಕಂಡೊಲು ಮಯಕಾದ್ ಅಡೆಗ್ ಕಂಗ್ ದ ತೋಟೊಲು ಬತ್ತ. ಕಂಗ್ ದ ಪಿಂಗಾರಲ ನಾಗ ಮಂಡಲಂದ್ ಸಾರ ಸಾರ ಪಿಂಗಾರೊನು ಅವೆಕ್ ಗಳಸಾಯ. ಇನಿ ಪೂರ ಕುಟುಮೊಗೇ ಲಿಂಬೆ ಪುಂಟೊಂದುಲ್ಲೆರಾಂದಾಪುಂಡು. ದಾಯೆ ಪಂಡ ಕುಟುಮದ ನಾಗನ ಕಟ್ಟೆಗ್ ನಾಗನ ಚಾಕಿರಿಗ್ ಬತ್ತ್ ನಕುಲು ಪೇರ್ ಗ್ ಲಿಂಬೆ ಪುಂಟುದು ನಾಗನ ಕಲ್ಲ್ ಗ್ ಪೇರ್ ಮೈತೊಂದುಲ್ಲೆರ್. ಕೇಂಡ ಪಂಚಾಮೃತಂದ್ ಪನ್ಪೆರ್. ಲಿಂಬೆ ಪೇರ್ ಗ್ ಪಾಡುಂಡ ಕೊಜಪಾಯ್ಜ? ಅಂಚಾಂಡ ಕೊಜಪೇ ಮೈತುದೊಲಿಯತ್ತ? ಇನಿ ತುಳುವೆರೆ ಆರಾಧನಾ ಸಂಸ್ಕೃತಿಗೇ ಪುಳಿ ಪುಂಟುಲೆಕಾಂಡ್. ಕೆಲವೊಂಜಿ ಕುಟುಮದ ನಾಗನ ಕಟ್ಟೆಲು ಎತ್ತರೆತ್ತರದ ಅಂತರದ ಮೊಟ್ಟುಲಿತ್ತುದ್ ಅವೆಟ್ ನಾಗ ಶಿಲ್ಪೊಲೆನ್ ದೀದುಪ್ಪುವೆರ್. ಅವೆಕ್ ಪೇರ್ ತಿರ್ತ ಮುಟ್ಟುಡು ಉಂತುದ್ ಮೈಪುವೆರ್. ಮೈತಿ ಪೇರ್ ತಿರ್ತ್ ಉಂತ್ ನಾರ್ನ ಕಾರ್ದಡಿಟೆ ಪೋದು ಪಾತ್ರೆಗ್ ಸೇರುಂಡು. ಪೇರ್ ಮಯ್ಪುನಾರ್ ಮಿತ್ತ್ ತಿರ್ತುಂದ್ ಪತ್ತ್ ಸರಿ ಪೋಪೆರ್. ಅರೆನ ಕಾರ್ ದ ಕುರೆ ನೀರ್ ಲ ಪೇರ್ದೊಟ್ಟುಗು ಪಾತ್ರೆಗ್ ಸೇರುಂಡು. ಅವೆನೆ ಸೀರ್ತಂದ್ ನಮ ಪರ್ಪಂದ್ ಪಂಡ ಓಡೆಗೆತ್ತುಂಡ್ ನಮ್ಮ ಪರಿಸ್ಥಿತಿ? ನಾಗಗ್ ಸುದ್ದಾಚಾರಂದ್ ಪನ್ಪುನಕುಲು ಇಂಚ ಮಲ್ಪುನಲ ಸರಿಯತ್ತ್. ದನಿ ಒಕ್ಕೆಲ್ದ ಗೇಣಿದ ಕಾಲೊಡು ಬೂಮಿಡ್ ನಿಲೆ ಸ್ಥಿರಂದ್ ಆಯೆರೆ ಕುಟುಮದ ಮೂಲ ಪನ್ಪಿನ ಕಲ್ಪನೆ ಬತ್ತುಂಡ್. ಮಣ್ಣ್ ದ ಮೂರಿಲು ಮಯಕಾನಗ ಮೂರ್ತಿಲು ಬತ್ತುದ್ ನಾಗನ ಮೂರ್ತಿಲು ಬನ್ನಗ ಕುಟುಮೊಗು ನಾಗನೆ ಮೂಲಂದ್ ಬತ್ತುಂಡ್. ನಾಗನ ಮೂರ್ತಿಲು ಬತ್ತಿ ಬೊಕ್ಕ ಜಾತಿಲೆಗ್ ಮೂಲ, ಮೂಲ ನಾಗೆಂದ್ ಬತ್ತುಂಡ್. ಆಂಡ ತುಳುವೆರೆ ಬದುಕುಗ್ಲಾ ತುಳುವೆರೆ ನಾಗಾರಾಧನೆಗ್ಲಾ ಸಮ್ಮಂದ ಉಂಡು. ಕುಟುಮೊಲು ಅರಿಗಿರಿದ್ ಏಪ ದೈವೊಲೆ ಗುಂಡೊಲೆನ ಚಾವಡಿದ ತರವಾಡ್ ದ ಇಲ್ಲುಲ್ ಸುರಾಯನಾ ನಾಗ ಮೂಲಂದ್ ಅಡೆಗ್ ಪೊಸತೊಂಜಿ ಕಲ್ಪನೆ ಸೇರೊಂಡ್, ಪೊಸತೊಂಜಿ ನಾಗರ ಪಂಚೆಮಿ ಅಡೆಗ್ ಸೇರೊಂಡ್. ಬೇತೆ ಬೇತೆ ಜಾತಿಲೆಗ್ ಉಪ್ಪುನ ಒಂಜೇ ಬರಿಕ್ ಒಂಜೇ ಮೂಲಂದ್ ಇತ್ತುದುಂಡ ಬೇತೆ ಬೇತೆ ಜಾತಿದ  ಒಂಜೇ ಬರಿಕ್ ಬೇತೆ ಬೇತೆ ಮೂಲೊಲಿತ್ತುದಯ. ಆಂಡ ಇನಿ ಒಂಜೇ ಬರಿತ ಬೇತೆ ಬೇತೆ ಜಾತಿಲೆಗ್ ಬೇತೆ ಬೇತೆನೇ ಮೂಲ ಸಾನೊಲುಲ್ಲ. ಅಂಚಾದ್ ಮೂಲ ಪಂದ್ ಪನ್ಪುನ ಕಲ್ಪನೆ ಬಾರೀ ಪಿರಾಕ್ ದ ಅತ್ತ್. ಈ ಮೂಲದ ಕಲ್ಪನೆ ತರವಾಡ್ ದ ಇಲ್ಲುಲು ಬತ್ತಿ ಬೊಕ್ಕ ಬತ್ತಿ ಕಲ್ಪನೆಲುಂದು ತೆರಿನ ಎರಿಯಾಕ್ಲು ಪನ್ಪೆರ್. ಏಪ  ಬನೊಕ್ಲೆಗ್ ಮೂರ್ತಿ ಪೂಜೆ ಬತ್ತುಂಡ ಆನಿರ್ದ್ ಬೊಕ್ಕ ತುಳುನಾಡ ಬೆರ್ಮೆರ್ ಮದೆಕ್ ಸೇರ್ಯೆರ್, ಬೆರ್ಮೆರೆನ್ ಮೀರ್ ದ್ ನಾಗೆ ಲಕ್ಕುದುಂತಿಯೆ. ಆಂಡಲಾ ಬೆರ್ಮೆರೆ ಆಲಡೆಲೆಡ್ ಬೆರ್ಮೆರೆ ಆರಾಧನೆ ಇನಿಲಾ  ನಡಪುಂಡು. 

 ತುಳು ನಾಡ್ ಬುಡ್ದು ಬೇತೆ ಮಾತಾ ಜಾಗೆಡ್ಲಾ ಜನೊಕ್ಲು ನಾಗನ ಕಲ್ಲ್ ಮುಟ್ಟುದು ಇನಿಲಾ ಆರಾಧನೆ ಮಲ್ತೊಂದುಲ್ಲೆರ್. ತುಳುವೆರ್ಲಾ ಅಂಚನೇ ನಾಗನ ಕಲ್ಲ್ ನ್ ಮುಟ್ಟುದೇ ಆರಾಧನೆ ಮಲ್ತೊಂತಿನಿ. ತುಳುನಾಡ ಮೂಲ ನಿವಾಸಿಲು ನಾಗ, ಸರ್ಪೊಲೆಗ್ ಆಶ್ಲೇಷ ಬಲಿ ಯಾವಡ್, ನಾಗಮಂಡಲ ಆವಡ್, ನಾಗರ ಪಂಚೆಮಿಯಾವಡ್ ಮಲ್ತೊಂದಿಜ್ಜಾಂಡ್.  ಬೆರ್ಮೆರೊಟ್ಟುಗ್ ನಾಗನ್ ಉಪದೈವ ಆದ್ ಆರಾಧನೆ ಮಲ್ತೊಂತೆರ್. ವೈದಿಕತೆ ಪಾಲ್ ಪಡೆವಂದಿ ದೈವ ಬೂತಾರಾಧನೆದಲೆಕನೆ ನಾಗಾರಾಧನೆನ್ ಮಲ್ತೊಂದಿತ್ತೆರ್. ಇನಿ ನಾಗಾರಾಧನೆ ಸಂಪೂರ್ಣ ತುಳುವೆರೆ ಕೈರ್ದ್ ತತ್ತ್ ದ್ ಪೋಂಡ ಬೂತಾರಾಧನೆಲಾ ದೇವೆರೆ ಆರಾಧನೆದೊರು ಪಡೆಯೊಂದುಂಡು. ದೈವೊಲೆಗ್ ಪೂನೀರ್ ದೀವೊಂತ್ ಲೆಕನೆ ನಾಗ ಬೆರ್ಮೆರೆಗ್ಲಾ ದುಂಬು ತುಳುವೆರ್ ಪೂನೀರೇ ದೀವೊಂತ್ ನೀ. ನಾಗಗ್ ಮೂಲ, ಆದಿ, ಅಂತ್ಯ ಪನ್ಪುನವಿಜ್ಜಿ. ತುಳುನಾಡುಡ್ ಕುಟುಮದ ಜಾಗೆದ ನಾಗಾರಾಧನೆ ಇತ್ತ್ ನಿ. ಜಾಗೆ ಪಂಡ ಬೂಮಿದ ನಾಗೆಂದ್ ಆರಾಧನೆ ಇತ್ತ್ ನಿ. ಶಂಕರಾಚಾರ್ಯೆರ್ ಸುರುಕು ಮೂಲ ಕಟ್ಲೆದ ತುಳುವ ನಾಗಾರಾಧನೆನ್ ಮೂಲ ನಿವಾಸಿಲೆಡ ಒಯ್ತೊಂದು ಆ ನಾಗಾರಾಧನೆಗ್ ಸುದ್ದಾಚಾರ ಕನತುದ್ ನೂಲು ಪಾಡಿ ಸಂಸಾರೊಗು ವಯಿಸ್ದ್ ಕೊರ್ನೆರ್ದ್ ಬೊಕ್ಕ ಕುಕ್ಕೆ ಸುಬ್ರಹ್ಮಣ್ಯ ನಾಗನ ಆದಿ ಕ್ಷೇತ್ರಂದ್ ಆಂಡ್. ಆಂಡ ಪಾಡ್ದನೊಲೆಡ್ ಕಾಸ್ರೋಡು, ಮಂಜೇಸರದ ಕೆಲವೊಂಜಿ ನಾಗ ಬನೊಕ್ಲೆನ್ ಆದಿದ ನಾಗ ಬನೊಕ್ಲಾದ್ ತೆರಿಪಾದೆರ್. ಶೈವ ಸಂಪ್ರದಾಯದಕ್ಲು ಅವೈದಿಕವಾಯಿನ ಡಕ್ಕೆಬಲಿನ್ ಇನಿ (ಬೊಲಿಯ ಪಂಬದೆರ್) ನಡಪಾವೊಂದುಲ್ಲೆರ್. ಡಕ್ಕೆ ಬಲಿ ಪನ್ಪುನವು ಶೂದ್ರೆರೆ ಆಚರಣೆಯಾದಿತ್ತುಂಡ್. ಪಾಣಾರ ಬುಡಕಟ್ಟ್ ಜನಾಂಗದಕ್ಲು ಡಕ್ಕೆ ಬಲಿನ್ ಇನಿಲಾ ನಡಪಾವೆರ್. ದೈವೊಲೆಗ್ ಡಕ್ಕೆ ಬಲಿ ಪಂಡ ಕೋರಿ/ಪ್ರಾಣಿದ ಬಲಿ ಕೊರ್ಪುನಿಂದರ್ಥ. ದುಂಬುಗು ಈ ಡಕ್ಕೆ ಬಲಿನ್ ಬ್ರಹ್ಮ ಮಂಡಲ  ಡಕ್ಕೆ ಬಲಿಂದ್ ವೈದಿಕೀಕರಣ ಮಲ್ತೆರ್. ದುಂಬುಗು ನಾಗಾರಾಧನೆಗ್ ದೇವೆರೆ ಒರು ಬತ್ತುದ್ ಪೌರಾಣಿಕ ಕಥೆಕುಲು ಸೇರೊಂದು ಮೂಲ ನಾಗಾರಾಧನೆ ನಾಶ ಆವೊಂದೇ ಪೋಂಡು. ಸರ್ಪ ಕೋಲ, ನಾಗ ಕೋಲೊಲು ಬಾರ್ಯಾತ್ ಕಡಿಮೆಯಾವೊಂದು ಪೋಯ. ಕುಡಲ, ಒಡಿಪುದಂಚಿ ಎಚ್ಚಾದ್ ಮೂಲ ನಾಗಾರಾಧನೆ ಅಳಿಯಂತ್ರ ಸಾದಿಗ್ ಪೋಂಡು. ಆಚಾರ್ಯ ಶಂಕರೆರ್ ಕುಕ್ಕೆ ಸುಬ್ರಹ್ಮಣ್ಯನ್ ನಾಗನ ಆದಿ ಕ್ಷೇತ್ರ ಪಂಡೆರ್. ನಿಜವಾದ್ ಎರಿಯಾಕ್ಲು ಪನ್ಪುಲೆಕ ಕುಕ್ಕೆ ಸುಬ್ರಹ್ಮಣ್ಯ ಅಲ್ತ ಆದಿವಾಸಿಲಾಯಿನ ಮಲೆ ಕುಡಿಯ ಜನಾಂಗೊಗ್ ಸೇರ್ದಿತ್ತುಂಡುಗೆ. ಕುಮಾರಧಾರೆ ಸುದೆ ಬರಿತ ಕಾಡುಡ್ ಬದುಕೊಂತ್ ನ ಮಲೆಕುಡಿಯೆರ್ ಬೆದುರುಡ್ ತಯಾರ್ ಮಲ್ತಿನ ಕುರುವೆಡ್ ಕಲ್ಲ್ ದೀದ್ ನಾಗಾರಾಧನೆ ಮಲ್ತೊಂದಿತ್ತೆರ್. ಆದಿವಾಸಿಲು ಮಲ್ತೊಂತ್ ನ ನಾಗಾರಾಧನೆನ್ ಶಂಕರಾಚಾರ್ಯೆರ್ ಸ್ಮಾರ್ತ ವೈದಿಕೆರೆಗ್ ಒಪ್ಪಿಸಯೆರ್ಡ, ಬ್ರಿಟೀಷೆರೆ ಕಾಲೊಡು ಆಚಾರ್ಯ ಮದ್ವೆರ್ ಸ್ಮಾರ್ತೆರೆರ್ದ್ ತುಳುವ ನೂಲು ಪಾಡಿ ಸಂಸಾರೊಗು ಒದಗಾದ್ ಕೊರ್ಯೆರ್ಗೆ. ಇನಿಲಾ ಕುಕ್ಕೆದ ತೇರ್ ನ್ ಆದಿವಾಸಿ ಮಲೆಕುಡಿಯ ಜನಾಂಗದಕುಲೇ ನಿರ್ಮಾಣ ವರ್ಸಲ ತೇರ್ ದಪಗ ಮಲ್ಪುವೆರ್. ಕುಕ್ಕೆ ಬೊಕ್ಕ ಸುಬ್ಬೆ ಪನ್ಪುನ ಇರ್ವೆರ್ ಬೆದುರುದ ಇಡೆಟ್ ತಿಕುದ್ ಬೂರ್ದಿತ್ತ್ ನ ನಾಗನ್ ಕಬರ್ ಬೆತ್ತಡ್ ಮೆಲ್ಲ ಬುಡ್ಪಾದ್ ಇನಿತ ಆದಿ ಸುಬ್ರಹ್ಮಣ್ಯ ಪನ್ಪಿ ಜಾಗೆಗ್ ಬನ್ನಗ ಆ ಉಚ್ಚು ಪುಂಚದುಲಯಿ ಪೊಂಡುಗೆ. ಇಂಚಿ ಕುಕ್ಕೆ ಬೊಕ್ಕ ಸುಬ್ಬೆ ಪನ್ಪುನ ಮೂಲ ಜನಾಂಗದಕ್ಲೆರ್ದ್ ಕುಕ್ಕೆ ಸುಬ್ರಹ್ಮಣ್ಯ ಪಂದ್ ಪುದರ್ ಬತ್ತುಂಡುಂದ್ ಪೆರಿಯಾಕ್ಲು ಪನ್ಪೆರ್. ಮೂಲ ಜನಾಂಗ ಮಲೆ ಕುಡಿಯೆರೆಗ್ಲಾ ಸುಬ್ರಹ್ಮಣ್ಯೊಗ್ಲಾ ಸಮ್ಮಂದ ಆದಿಡೇ ಇತ್ತುಂಡ್ ಪನ್ಪುನೆಕ್ ಮುಲ್ತ ತೇರ್ ಲೇ ಸಾಗ್ಸಿ. ದೈವಾರಾಧನೆನ್ ಮಲ್ತೊಂತಿ ತುಳುವೆರೆನ್ ವೈದಿಕ ಆರಾಧನೆದಂಚಿ ತಿರ್ಗಯೆರೆ ಆತ್ ಸುಲಭ ಇಜ್ಜಾಂಡ್. ಅಂಚಾದ್ ಪುರಾಣೀಕರಣದ ಆರಾಧನೆದಕುಲು ಬೆರ್ಮೆರೊಟ್ಟುಗು ನಾಗನ್ ಸೇರಾದ್ ನಾಗಬೆರ್ಮ ಮಲ್ತುದ್ ದುಂಬುಗು ಬೆರ್ಮೆರೆನ್ ಬ್ರಹ್ಮ ಮಲ್ತುದ್, ನಾಗಗ್ ಸುದ್ದಾಚಾರ ಕನತೆರ್. ಅಂಚಾದ್ ದೈವಾರಾಧನೆದ, ಬೂತಾರಾಧನೆದ ಒರಟು ಇತ್ತ್ ನ ಬೂತ ನಾಗೆ ನಾಗದೇವೆರಾದ್ ಪೋಯೆ. ಮಾತ ಜಾತಿದಕುಲು ಅಕ್ಲೆನ ಕುಟುಮದ ಬನತುಲಯಿ ಪೋದು ನಾಗನ್ ಆರಾಧನೆ ಮಲ್ಪುನವು ಮಯಕಾದ್ ಅವು ಒಂಜಿ ಜಾತಿ ವರ್ಗದ ಪೂಜೆದ ಕೇಂದ್ರ ಆಪುನಿಯತ್ತಂದೆ ನಾಗನ ಕಟ್ಟೆ ಕಟ್ಟಾಯಿನಕುಲ್ಲಾ ಕಟ್ಟೆದ ಪಿದಯಿ ಕೈ ಕಟ್ಟ್ ದ್ ಉಂತುಲೆಕಾಂಡ್.

ದುಂಬುದ ತುಳುವೆರೆಗ್ ವಿಜ್ಞಾನದ ಗೇನ ಕಡಮೆ ಇತ್ತುಂಡಲ ಅಕುಲು ತೆರಿಯಂದೆ ಮಲ್ತಿನ ಆಚರಣೆಲು ವೈಜ್ಞಾನಿಕವಾದ್ ಲ ಸತ್ಯ ಆವೊಂತುಂಡ್. ಆಂಡ ತುಳುವೆರೆ ತುಳು ಧರ್ಮ ಪಂಡ ಪ್ರಕೃತಿದ ಆರಾಧನೆಯಾದಿತ್ತುಂಡ್. ನಾಗಾರಾಧನೆ ಬೊಕ್ಕ ದೈವಾರಾಧನೆ ಆರಾಧನೆದ ರಡ್ಡ್ ಕಣ್ಣುಲಾದಿತ್ತ. ಪ್ರಕೃತಿದ ಒಟ್ಟುಗು ಬದುಕೊಂತ್ ನ ತುಳುವೆರ್ ಬನೊಕ್ಲೆನ್ ಒರಿಪಾದೆರತ್ತಂದೆ ಅಲ್ತ ಒಂಜಿ ತುಂಡು ಬೂರ್ನ ಅಡರ್ ನ್ಲಾ ಮುಟ್ಟೊಂದಿಜ್ಜಾಂಡ್. ತುಳುವೆರ್ ದೈವದ ಆರಾಧನೆಗ್ ಏತ್ ಮಾನಾದಿಗೆ ಕೊರೊಂತೆರ್ ಪಂಡ ಸಾನ ಗಿರ್ತಿನ ಅಡ್ಡ ರೀಪು ಪಕ್ಕಾಸ್ ಲೆನ್ ಇನಿತ ಲೆಕ ಪೊತ್ತವೊಂದಿಜ್ಜಾಂಡ್. ಸಾನದ ಬರಿಟ್ ಒಲಾಂಡಲಾ ಪಾಗರದ ಪಿದಯಿ ದೀದ್ ಅವು ಉದಲ್ ಡ್ ಮಣ್ಣಾದ್  ಪೋವೊಂತುಂಡ್ ಪಂಡ ಪ್ರಕೃತಿಗೇ ಸೇರೊಂತುಂಡ್. ಪ್ರಕೃತಿ ಒರಿಂಡ ಪ್ರಕೃತಿಡ್ ಬದುಕುನ ನಮ ಒರಿವ. ನಮ ಒರಿಂಡ ಸಂಸ್ಕೃತಿ ಬುಳೆವು, ಸಂಸ್ಕೃತಿ ಒರಿಂಡ ಸಮಾಜ ಒರಿವು. ದುಂಬುದ ಹಿರಿಯೆರ್ ನರಮಾನ್ಯನ ಬದುಕ್ ಗಾದ್, ಪ್ರಕೃತಿದ ಒರಿಪುಗಾದ್ ನಾಗನ್ ನಂಬ್ಯೆರ್. ಆಧುನಿಕತೆ ವಿಜ್ಞಾನಂದ್ ತೆರಿನ ನಮ ಅಜ್ಞಾನಿಲುಲೆಕ ಮಾತ ಮರಮಟ್ಟ್ ಲೆನ್ ನಾಶ ಮಲ್ತೊಂದುಲ್ಲ. ನರಮಾನಿ ಸಮ್ಮಂದೊಲು ಕಡಿಂಡ ಕುಟುಮ ಏರುಂದ್ ತೆರಿಯಂದೆ ದೂರದ ಸಮ್ಮಂದದ ಪಲಯನ್ ಮೆಗ್ ದಿ ತೆರಿಯಂದೆ ಮದಿಮೆ ಆಪುನ ಕಾಲ ಬರು. ಬನ ಕಟ್ಟೆಡ್ ಎಲಿ, ಪೆರ್ಗುಡೆ, ಪಾಂತೆನ್ ಪತ್ತ್ ತಿನೊಂದಿತ್ತಿ ನಾಗಗ್ ಸುದ್ದಾಚಾರಂದ್ ಕಟ್ಟೆ ಕಟ್ಟಾಯ, ಮಣ್ಣ ಮೂರಿದ ಮೂಲ ನಾಗಾರಾಧನೆನ್ ಮದತ್ ಬುಡ್ಯ. ನಾಗೆ ಉಪ್ಪುನಿ ಸಂಪುದ ನೆಲಟ್, ಪುಂಚದ ಉಲಯಿ. ನೀರ್ ದ ವಸರ್ ದ ಪರಿಪು ಬೂಮಿದಡಿಟ್ ಓಲು ಉಪ್ಪುಂಡ ಆ ನೀರ್ ನ್ ಗಲಸೊಂದು ಉದಲ್ ಲು ಪುಂಚ ಮಲ್ಪುವ. ಆ ಪುಂಚದ ಸಂಪುಡು ನಾಗೆ ಬದುಕುಂಡು. ನಾಗೆ ಪರಪಿ ಜಾಗೆ ಪಂಡಲ ಬೂಮಿದ ಅಡಿತ ವಸರ್ ಪೋಪಿ ಜಾಗೆಂದೇ ಅರ್ಥ. ಅಂಚಾದ್ ವಸರ್ ಪರಿಪುನ ಜಾಗೆಡ್ ಬೆಂದ್ರ್ ದಿಕ್ಕೆಲಾವಡ್, ತಂಡಾಸಾವಡ್, ಇಲ್ಲದ ತಲಲ ಪಾಡೊಂದಿಜ್ಜಾಂಡ್. ನಾಗೆಲ ಮಣ್ಣ್ ಡೇ ಪುಟ್ಟುದು ಮಣ್ಣ್ ಡೇ ಕರದ್ ಪೋಪುನವು. ನರಮಾನಿಲ ಅಂಚನೆ. ನರಮಾನಿ ಉಡಲ್ ದ ಒಪ್ಪಿತೊಗಾದ್(ಮನ ಶಾಂತಿ), ಸರ್ರೊದ ಸುದ್ದೊಗಾದ್ ಮೀದ್ ಆರಾಧನೆ ಸುರುಮಲ್ತೆಂಡ ನಾಗೆ ದಾಲ ಈ ಕಿರಮೊನು ದೀವೊನ್ನವು ನಂಕೋಲ್ಲ ತೆರಿಯುಜಿ. 

ಏಪೊಲಾ ಇಲ್ಲಲ್ ಸಿರ್ಕುಲು ಬರೊಂದಿತ್ತ್ಂಡ ಪ್ರಶ್ನೆ ಚಿಂತನೆಗ್ ಪೋನಗ ಅಕುಲು ನಾಗ ದೋಸ ಉಂಡು.ನಿಕ್ಲೊಂಜಿ ಅಷ್ಟಮಂಗಲ ಪ್ರಶ್ನೆ ದೀವೊಡು ಪನ್ನಗ ಬಡಪೊತ್ತುದ ಸಂಸಾರ ಒತ್ತೊನುಂಡು.ಈ ಅಷ್ಟಮಂಗಲ ಪ್ರಶ್ನೆ ಚಿಂತನೆದಕುಲು ,ನಿಕುಲು ಬನ ಕಡ್ಪೊಡು,ನಾಗಗ್ ಕಟ್ಟೆ ಕಟ್ಟೊಡು,ಗುಂಡ ಕಟ್ಟೊಡು,ನಾಗಮಂಡಲ ಮಲ್ಪೊಡು.ಇಜ್ಜಿಂಡ ನಿಕ್ಲೆಗ್ ಬರ್ಕತ್ತಿಜ್ಜಿಂದ್ ಪೋಡಿಪಾವೆರ್. ನಾಗ ಮಂಡಲೊಗು ಪ್ರಶ್ನೆಡ್ ತೋಜುನ ನಾಗಮಂಡಲದ ದೊಂಪ,ನಾಗಪಾತ್ರಿ,ವೈದ್ಯೆರ್ ಆವೊಡುಂದು ಪಂಡ್ ದ್ ಪೂರ ಅಕ್ಲೆ ಲೆತೊಂದು ಬರ್ಪೆರ್.ಸಾಲ ಸೋಲ ಮಲ್ತ್ ದ್ ಮಲ್ಪಾಯಿನಾಯೆ ಸಂತಾನ ಮುತ್ತುದು ಪೋಪೆ,ಬತ್ತ್ ನಾಯನ,ಒತ್ತು ಚಾಕಿರ್ದಕ್ಲೆನ ಇಲ್ಲ ಮಾಳಿಗೆ ಏರೊಂದೇ ಪೋಪುಂಡು.ನಮ್ಮ ಜಾಗೆದ ನಾಗ ಬನೊನು ಕಡ್ಪಾದ್,ಸಿಮೆಂಟ್ ದ ಕಟ್ಟೆ ಕಟ್ಟಾದ್ ಮರಿಕುಲೆಗ್ ಬದ್ ಕೆರಾವಂದಿಲೆಕ ನಮನೇ ಅವಕಾಶ ಕೊರ್ದು ಇನಿ ನರಕ ಬರೊಂದುಲ್ಲ.ಬೂಮಿದ ಅದಿಕಾರದ ನಾಗಗ್ ಮೂಲ ತಾನೊಗು ಪೋದು ನಮ್ಮ ಮನ ಬಗ್ತಿದ ಸೇವೆ ಪಂಡ ಪೇರ್,ಬೊಂಡನೀರ್ ಕೊರ್ಂಡ ಯಾವು.ಬೋಡಂಡ ತಂಬಿಲ ಕಟ್ಟಾಲೆ.ನಾಗೆ ತನು ಆಪುನೊಟ್ಟುಗು ನಮನ್ಲ ತಂಪುಡು ದೀಪೆ.ಅಂಚಾವೊಡಂಡ ಸಿಮೆಂಟ್ ದ ಕಟ್ಟೆದ ಬದಲ್ ಬನ ಒರಿಯೊಡು

######################################